#العشق_المتمرد "عندما يزهر الليمون"
#جمان_فريد
الجزء 140 الجزء ماقبل الاخير"القسم الرابع"..
⏳...
ركب بيها الدروج..
وصلوا في الباب..
ووقفوا قدامه..
عماد بدي يطق بقوة..
ورزان كانت تحاول توقف بكي وتقوي نفسها ماتبيش تبان قدام عمتها مكسورة..
انفتح الباب..
نورهان اللي فتحاته لما شافتهم اتفاجئت..
عماد دفها وخش برزان..
ونورهان مشت وراهم وهي خايفه..
خشوا للصاله..
وقعد يدور فيها بعيونه..مالقهاش..
عماد:وينها وين!..
"عماد!"..
الزوز التفتوا لقوها خاشة الصاله وقفت وهي تشوفلهم بملامح وجه مصدومه..
عماد بدي يضحك بسخريه بعدين قال:ايه عماد جيتك بش نقولك افرحي وتهني ربي استجاب لدعاك..
عقدت حواجبها بإستغراب..
شبحت لرزان..
لقتها تشوفلها بنظرات حزن ع خيبة والعيون معبيات دموع..
عماد بإبتسامه سخريه:حملت ببنية كانت اغلى ماتتمنى من ربي مالحقتش تفرح بيها الا وعرفت ان هالبنت مشوهه ومش حتعيش وجابتها وماتت واهو ربي فرق بينها وبين ضناها..نزلوا دموعه وع وجهه ابتسامة السخريه..رفع ايديه قدامه وقال..ضناها اللي هي ضناي دفنتها بإيديا..
رزان حطت يدها ع وجهها وهي تبكي..
وكفايه دموعها يطيحوا وحده ورا التانيه وهي شاخصة البصر في ولدها...
وعماد نزل ايديه وهو يقول:وبش ينمسح ع قلبك مزبوط اليوم نرفعها تعاين متعبها الحزن والهم لاعاد تاكل لاترقد زي الناس لاارتاحت بكل وهي ليلها نهارها تشغل فروحها بش تنسى..امس اغمى عليها قتلها اليوم نرفعك تعايني ديري تحليل اكيد يطلع عندك فقر دم..ومشينا..مشينا اليوم ومن تحليل دم عادي صبحنا في تحليل مرض الخبيث..
رعشت مع بعضها..كل شي فيها رعش..شعر جسمها وقف..
جلدها تقعشر...وقلبها قعد يدق بقوة شديده...
وهي تغير فعيونها لرزان اللي لقتها حاطه راسها ع ذراع راجلها وتبكي..
عماد ضحك بسخريه وقال:واهو ربي فرق بينها وبين صحتها..امي..رزان فيها سرطان...
نورهان حطت ايديها الزوز ع فمها وشهقت بصدمه..
وكفايه تشبح لرزان وخلاص...
عماد ودموعه سيل:تعرفي انتي ماقهرتي حد يام قد ماقهرتيني اني..اني ولدك اللي قاعد كل يوم نتقطع مرة ع بنتي..وتوا على....غمض عيونه بشده ودموعه ينزلوا...
ورزان تبكي بشده وهي شاده ذراعه بإيديها الزوز..
فتح عماد عيونه وقال:تعرفي لو كنتي امي حق وتحبيني ماكانش ليك هم فالدنيا هادي غير سعادتي قريب ولابعيد..زي حناي فاطمه..خوالي ميلاد وحميد قداش بعدوا عنها ونسوها تنوجع صح لكن كانت تقول كلمه سمعتها منها اكثر من مرة
"دامهم مرتاحين وصحيحين بينهم"..
عماد:هادي هيا الام حق يام..الأم حق يام ماديرش اللي درتيه انتي بكل...تنهد بحرقه وقال.. ربي وصلك اللي تبيه..لكن صدقيني لو..رزان......سكت وماقدرش يكمل وهو يشوف لأمه..لحظات بعدين قال...اعتبري روحك ماجبتيش ولد اسمه عماد بكل...
فك ذراعه من ايدين رزان وضمها ليه ومشي طول بيها طلع من الصاله..
فاتوا من قدامها وهي مازال واقفه جامده في مكانها..
لما وصل عماد بمرته فالباب..
شاف بوه كيف وصل لأخر درجه وجي قدامهم..
عقد حواجبه لما شافهم بهالحاله..
حول نظاراته وقال:عماد!..
عماد نزل عيونه وقال:بالله بوي حول..
سعد شبحله شويه بعدين وسعله..
نزل عماد بمرته وهو ضامها وهي تبكي..
وسعد معاهم بعيونهم لين طلعوا من الحوش بكل..
لف ومشي خش داخل طول بدون مايحول اللي فرجليه..
وصل في الصاله وخش..
لقي كفايه مقعمزة ع مندار فالصاله وهى شاده راسها ونورهان واقفه حداها وتبكي وتقول:ماما..ماما..
جاها طول..
وصل عندها وحط يده ع كتفها وقال بخوف؛كفايه..كفايه...
حولت ايديها وقعدت تقول بصوت باكي مرتجف:سعد..سعد..
وماقدرتش تقول غير هكي...
هو مسح ع شعرها وهو يقول بخوف:شن تحسي..كفايه شن تحسي..
حطت ايديها ع وجهها وقعدت تبكي بعبرتها..
نورهان شبحت لبوها وقالت:عماد قاللها رزان فيها سرطان؟
فتح عيونه ع وسعهم بصدمه وهو يشوف لبنته..
بعدين غير عيونه عنها وقعمز جنب مرته بهده وهو مش قادر يستوعب اللي سمعه توا من بنته...
🌴🌴🌴🌴
مقعمزة هي وامها وبنت خوها فالصاله يهدرزوا..
حدهم:جدي مختار وجداي كامله ليهم اسبوعين مستقرين في سرت..
حدهم الجده:ايه قالتها في العرس بيروحوا لسرت..
سعيده؛وامينه ولت لصبري..
حدهم بإبتسامه؛ايه.
سعيده ابتسمت وقالت:احسن مادارت..
حدهم سكتت شويه بعدين قالت:ماعندهاش رزان جية قريبه..
سعيده بضيق:تس تس..
حدهم بحزن:ياريت نلقى كيف نطق فيها مشكلة ايمن شبه مايفضاش..
سعيده بإبتسامه:اني ناويه نعديلها اليومين الجايات نبي نقعد عندها اسبوع..
حدهم امها؛ميلاد قالك باهي.
سعيده:اكيد بيقول باهي يمي مادا بيه نعدي نقعد معاها مشغول عليها واجد..
حدهم امها:ربي يريح بالكم عليها..
سعيده:آمين..
وحدهم بنت خوها سرحت وهي تفكر في رزان..
"حدهم"
سعيده عقدت حواجبها بإستغراب وقالت:ديداي..
حدهم امها:خشي يافاطمه خشي..
شويه وخشت عليهم فاطمه ويبان عليها من وجهها انها معصبه..
وقفت فنص الصاله وقالت:شن كنتك هدي ياحدهم لوين تبي توصل!
سعيده:اين منهن ياديداي!؟
فاطمه شبحتلها وقالت:صبريه يا سعيده..تو جايه من حوش عيت عبدالواحد سمعت من كنتهم قطاف قالاته قطاف معفن ياسعيده..
حدهم عضت ع شاربها وهي تشوف لحناها وعمتها..
ع جية البارقه من الكوجينه وهي تقول:كلمة حق وبنقولها ومش قاصده بيها ضرر لحد..بوداني سمعتها صبريه وهي تدوي ع حميده وحتى امال شاهده..وحميده اني نعرفها المراة في حالها تبي تربي بنيتها وخلاص..
فاطمه:يكون في علمكن راهو خليفه عدالها مكان عملها وقال يبي ياخدها وهي رداته وقالت لانخرب حوش ولانجي ضرة عدي شوف حالك واخطاني..
حدهم الجده:سكتت عنها واجد صبريه هدي..
سعيده بغضب:تو نكلم خليفه يجي اليوم ونتفاهم اني وياه ماعليك في شي ياديداي..
فاطمه؛فهميه حتى هو يخلي بنتي في حالها ماصدقت ولى حالها باهي وعايشه كيف الناس تربحن تربحن قولنله يخطاها مانبي ندخل فالحكايه خوتها وتصير مشاكل مانبوها..
سعيده:لا ياديداي حتي تو نحلوها مادخلوا حد..
"شنو في ياحدهم"
سعيده بإنزعاج:تس سيدي سمع..
لفت فاطمه ومشت بتطلع..
لاقت الحاج عبدالله اللي قاللها:خيرك يافاطمه شنوفي؟
غطت عنه وجهها بطرف الردي وقالت؛مافي شي ياحاج مافي شي..
ومشت طلعت من الحوش...
وعبدالله خشلهم داخل يبي يفهم منهم شن صاير..
🍁🍁🍁🍁
مدرس السيارة في تركينه..
ومقعمز هو وياها في مكان مستخطي تحت شجره..
ضامها لحضنه وهو يحرك في ابهامه ع خدها وسرحان يفكر..
وهي كذلك كانت ساكته وتفكر..
شويه وقالت..
رزان بصوت مبحوح؛عماد..
عماد استاقض وقال بفزة :روحي..
رزان بعدت عنه وشبحتله وهي تقول:مش مفروض تو نولوا العياده ونعرفوا منهم شن هو وضعي بالزبط؟
عماد حط يده ع خدها وقال؛هدا اللي كنت نفكر فيه لكن قلت خلي اليوم تروح ترقد وترتاح وغدوة نمشوا..
رزان:اي نوم وراحه ياعماد! اني نبي نعرف كل شي نبي نعرف كان في امل نشد فيه لاخر لحظه..
ضمها لصدره وقال:في امل ونص..بإذن الله بإذن الله تبري ياعمري..مستعد نرفعك لأخر الدنيا نصرف عليك حق كبدي المهم تبري ياعمري..
ضحكت رزان من بين دموعها وقالت:بقديش ناوي تبيعها كبدك؟
ضحك ومسح دموعه وهو يقول؛ غاليه نار باليورو حقها يدفعوه كبدي اللي ذابت فيك..
ضحكت بعدين تنهدت وقالت:عمري..اسفه..
عماد عقد حواجبه وقال:ع شني!؟
رزان ودموعها ينزلوا:ماريحتكش بكل معاي ديما شاقي..
عماد زاد ضمها وقال:اني اللي شقيتك مش انتي اني.
رزان :عماد..
عماد بنرفزة:وراس بوك وراس امك فكينا منها الدوة هديكا متاع كان صارت فيا حاجه ومش عارف شن..
ضحكت رزان وقالت:الدوة هدي مانيش قايلتها بكل..
بعدت عنه وقالت..اللي بنقوله كلام تاني ياعماد..مسحت دموعها وقالت..اني نبي نشفى منه مهما قالوا الدكاترة بنحط املي كله في الله واللي يبيه يصير المهم اني مش حنقطعه منه بكل..نبي مازال نعيش نجيب بنيه ووليد تاني وبنيه اخرى يصاحبوا بعضهم نكبرهم ونربيهم..ونبي نعيش معاك سنين طويله بحلوها ومرها..ونبي حاجات واجده وبعون الله نبرى ونديرهن كلهن..
عماد ارتسمت ع وجهه ابتسامه حلوة وهو يقول:وحق ربي رفعتيني فوق..
رزان بإبتسامه من بين دموعها؛هدى اللي نبيه..نبيك انت تكون قوي ياعماد القدام مرات تشوفني بحالات صعبه واجد مانبيكش تنهار بكل نبيك تتحمل وتقعد قوي نبيك ديما اضحكني باهي..
خداها فحضنه وضحك ودموعه تنزل وهو يقول؛ويلوموني فيك يابازوزة انتي..زاد ضمها بقوة وهو يقول...نعشقها ياناااس..
وهي تضحك وتقول:بنموت تو راني..
ضربها ع ظهرها ضربه خفيفه وقال؛معاش تقوليها كلمة موت بكل بكل..
رزان:ههههههه...حاضر..
🍂🍂🍂🍂🍂
يلزم اجراء فحص الخزعه مشان ينعرف نوع الورم وحجموا والموقع تبعوا..وبناءا عليه بيتم رسم خطة علاجية تمشي عليها زوجتك..
عماد:باهي دكتور شن احسن بلاد يتعالج فيها المرض؟
د.رفعت:اذا بدك بالوطن العربي الافضل الاردن واذا فيك ماديا فأفضل بلدان بالعالم بتعالج الورم..سويسرا والمانيا والنمسا فيها مراكز كبيرة والاطباء اللي فيها متخصصين علاج اورام كل واحد برفيسور بمجالو..بس طبعا التكلفة جدا عاليه..
عماد:مش مهم بكل...
رزان:عماد حتى الاردن باهيه..
عماد بدون مايشوفلها:مالكش علاقه انتي..تو نتصرف..
رزان تنهدت بضيق وسكتت..
عماد:تمام دكتور مشكور..وناض..هي ناضت معاه وعيونها عليه..
رفعت ناض ومد يده وقال:واجبي..الله يكتبله الشفا..
عماد صافحه وقال:آمين..تسلم..
طلقوا ايدين بعض وشبح الدكتور لرزان وقال:المرض هاد اللي بيهزموا او يخليه يربح العامل النفسي مدام..
رزان بإبتسامه هزت راسها وقالت؛عارفه..
رفعت ابتسم وقال: كتير منيح خليكي قويه..بالشفا ان شاء الله..
رزان:ان شاء الله..
عماد مدلها يده وقال بشي من الحده؛هيا..
هي شدت ضحكتها وحطت يدها فيده..
عماد:السلام عليكم..
ومشوا مع بعض للباب..
الدكتور قعمز وقال:وعليكم السلام..
فتح عماد الباب وطلعوا من المكتب..وصكره..
🌴🌴🌴🌴
اني تخليني قدام سيدي كيف العيل يهزبني قدام خواتي وامي من ورا راسك ياحمارة!
صبريه بخوف:واني شن دخلني كان الناس تدوي بيها؟!
خليفه بإنفعال:الناس تدوي بيها وتقول صبريه قالت..
صبريه بصوت عالي:اني ماقت شي الناس تشوف راهي ماهمش عمي..
خليفه وصلت عنده حدها رفع قفا يده بيضربها..
هي غطت وجهها بإيديها..
تراجع ونزل يده وقال:عدي..عدي لمي شلاتيك في حوش هلك هدرزي ع من تبي براحتك..
ولف ومشي طلع من حداها وهو يشتم فيها...
وخلاها تسب في حميده وتدعي عليها..
🍁🍁🍁🍁
سيدي قاله عدي قلها لهلها خل يربوها مرة تانيه..
غاليه بضيق؛والله حميده ماتبي لحد الخراب لكن صبريه ربي يهديها جاباته لروحها..
سعيده:ايه صدقتي دارتها بإيدها..
غاليه تنهدت وسكتت..
شبحتلها سعيده بعدين قالت؛غدوة بيقلني توفيق لطرابلس لرزان..
غاليه ابتسمت وقالت؛كويس..
سعيده بإبتسامه:بنقعد عندها اسبوع..
غاليه:باهي معناها وين نجي نهار الخميس نلقاك..
سعيده:ايه..تنهدت وقالت..الله اعلم كيف نلقى حالها تو..
غاليه :حزنها ياخد وقته ويعدي سيورها تتعود..
سعيده هزت راسها وسكتت شويه بعدين قالت:هي مالا خل نعدي نوض ميلاد العصر قريب..
غاليه:باهي..بالسلامه..
سعيده:بالسلامه...
مشت سعيده وغاليه صكرت روشن الكوجينه ومشت طلعت منها..
🍁🍁🍁🍁
في الطريق..
بعد خطموا ع وداد وخدوا منها ميلاد توجهوا لحوشهم..
طول الطريق ورزان ضامه ولدها ودموعها ينزلوا وتمسح فيهم
وعماد ع وجهه ملامح الحزن اللي ولت جزء من تقاسيمه..
🍁🍁
فتح الباب..
خشت هي بولدها اللي كان راقد في حضنها ومشت طول لدار النوم..
هو خش وصكر الباب..
ومشي بخطوات ثقيله للكرسي وقعمز بتعب...
تنهد بألم...
بعدين اتكا ع الكرسي..
حط ايديه فوق بعض ع راسه وغمض عيونه..
اما هي فالدار..
حطت ولدها فسريره وهي تبكي..
بعدين مشت لدولاب وطلعت حوايج ومشت طلعت بيهم للحمام بش ادوش..
وهي طالعه شافت عماد كيف مقعمز ع الكرسي..
قلبها زاد وجعها..
مشت طول للحمام وهي تكتم في عبراتها..
🍁🍁
عبراتها اللي طلعت وهي تحت المية السخونه..
تبكي وتفكر في حالها..
وتتخيل في هلبه حاجات...
تتخيل في ردة فعل بوها وامها لما يعرفوا بالذات بوها..
تتخيل في ردة فعل عمتها غاليه ورفقه..وكل احبابها..
بس اكثر تخيل ردة فعل وقفت عنده كان لخوها رمزي
رمزي المسكين اللي ليه سنين يراجي امتى يجمعه بحب عمره حوش واحد
رمزي اللي ياما شاف ويام مر عليه..
اكبر سبب في عذاب رمزي كان رزان..
وتوا لو علم بمرضها اول حاجه حيديرها يأجل عرسه
مستحيل يدير عرس واخته بهالحاله...
استجمعت قوتها ووقفت بكي..
وكملت الدوش...وبعد نشفت ولبست طلعت من الحمام وهي حاطه الفوطه ع كتافها ومشت طلعت من الحمام..
وهي ماشيه وين ماموجود عماد..
لقاته راقد وايديه الزوز محطوطات ع رجليه..
انعصر قلبها عليه...
مشتله وجت حداه قعدت تنوض فيه وهي تقول:عماد..عماد..
ناض وهو مخلوع يقول:هاه رزان خيرك!.
شدت وجهه وقربت باست خده بعدين بعدت وقالت؛خش ارقد داخل حبيبي..
عماد شبح لعيونها وقال:و انتي ارقدي جنبي..
رزان هزت راسها وقالت:حاضر..
تنهد وناض ومشوا مع بعضهم لدارهم..
هو رقد ع السرير طول بحوايجه..
وهي تمددت جنبه لكن ماقدرتش ترقد وهي تفكر..
شويه..
ناضت من مكانها ومشت خدت الملايه..
وطلعت من الدار..
خشت الصاله خدت المصحف بعدين لبست ملايتها..
وقعمزت..
فتحت المصحف وبدت تقرا..
وطول ماهي تقرا الدموع ماجفوش من عيونها...
قعدت تقرا ربع ساعه..
فجأة سمعت صوت تليفون عماد يرن..
صكرت المصحف وحطاته ع تركينه وناضت مشت للدار
وصلت فيها خشت شافت لعماد..راقد بالنوم..
خدت التليفون من ع الزيانه لقت بوه يتصل بيه..
تنهدت بضيق..
فتحت الخط..
وطلعت من الدار وهي تقول:الو عمي..
"رزان بنتي.."
رزان:ايه عمي..
سكت شويه بعدين قال..
"ترا افتحيلي الباب "..
رزان:حاضر..
نزلت التليفون ومشت للباب..
فتحاته وطلعت توجهت للباب البراني..
فتحاته بالبطمه..
انفتح بروحه....
خشت سيارة سعد..
هي كانت واقفه ع تركينه شافت السيارة ولمحت عمتها كفايه بطنها وجعتها..
تصكر الباب..
وهي قعدت واقفه فمكانها تشوف للسيارة..
نزل سعد..
وبعده انفتح الباب التاني ونزلت عمتها..
التفتتلها..
رزان قعدت تشبحلها ودموعها ينزلوا...
كفايه جتها طول..
وهي مشتلها بسرعه..
وسعد يشوفلهم ودموعه فعيونه...
نزلوا وحط يده ع فمه وهو يكتم فعبرته لما شافهم حاضنات بعض والزوز يبكوا بالعبره..
كفايه ببكي:والله ماكنت نبي هكي..والله العظيم..والله يابنتي ماكنت نبي هكي..سامحيني يارزان سامحيني يابنتي..
ورزان غمضت عيونها بشده وزادت ضمتها وهي تبكي بالصوت مش قادرة ترد بكلمه..
وسعد اللي معاش تحمل يشوفلهم غير عيونه عنهم وقعد يبكي بصمت...
🌴🌴🌴🌴
مروح من الجامع ماشي وهو يفكر في ألف حاجه..
وصل في مكان معين وقف..
حط ايديه الزوز فجيوب سوريته وقعد يشبح جهة حوش جارهم عبدالمقصود..
شويه وتنهد..بعدين شبح القدام وكمل طريقه للقطعه..
لما خش رن تليفونه..
طلعه من جيبه وشاف المتصل ابتسم وهو متفاجئ..
فتح الخط وحطه ع ودنه وقال..
ميلاد:يوم القيامه غدوة شكله!
زينب بضحكه:يابارد بطل برادة وقول شنو حالك..
ميلاد بإبتسامه:الحمد لله..شنو حالك انتي وحال خيري والبنات والاولاد.
زينب:الحمد لله شن حال سعيده والولاد والكنه..
ميلاد:الحمد لله الحمد لله مابيهمش..
زينب:باهي الحمد لله..
سكتوا شويه بعدين هو قال..
ميلاد:تبي حاجه زينب؟!
زينب:لالا اتصلت نهدرز عليك بس..
ميلاد بضحكه:شورك رقدتي القايله وحلمتي بيا..
زينب قعدت ساكته..
ميلاد بإستغراب؛زينب خيرك كان في شي قولي..
زينب:لالا والله مافي حاجه..ايه انت قولي شن داير في خدمتك ماشيه تمام..
ميلاد:الحمد لله كل شي ماشي تمام..خليك مني وقولي انتي خيرك كان في شي قولي يازينب ماتشغليني..
زينب بضحكه:لا والله مافي حاجه الله..ندمتني اللي كلمتك ننشد عليك.
ميلاد بضحكه؛ايوه معاد تعاوديها..
زينب بضحكه:خزي ع رمتك..
ميلاد:ههههههه..هي توا عدي عندي خدمه بنعديلها..
زينب :باهي..ربي يفتح عليك..
ميلاد:آمين..سلمي ع خيري..بالسلامه..
زينب:يوصل..بالسلامه..
نزل تليفونه وصكر وهو يقول:هبلات زينب..
شبح القدام لقي ولده وولاد خوه جايين بالدراجات فاتوا من حداه..
وهو قاللهم:راكم تشدوا كتباتكم وتقروا ياضلايليه..
وهما هايمين يجروا بالدراجات وماسمعوشي شن قال اصلا..
ضحك وحرك راسه يمين ويسار..وصل باب حوشه الخلفي وخش..
🍁🍁🍁🍁
مقعمزة..
وبنت خوها راقده ع رجلها وهي تمسحلها ع شعرها بلطف وتقول:بوك كان اقرب واحد لينا اني وزينب حميد ماكانش قريب عليه زينا حني..بوك كان من الخوت الحنينين ويطفطفوا ديما زي عماد توا..اللي ماقدرش يعطيه بوي من حن عطاهولنا ميلاد..زينب هادي تقول هو وياه توامه اسرار ميلاد كلها عندها هي..كانت روحها معلقه فيه..واني كنت نديرله في كل شي يبيه من قبل مايطلبه مش خوف لا لاني نحبه هلبه..حتى لما يجي في الليل ينوضنا ويقول صحابي جو نوضوا ديرولنا خفايف ع السريع..اني وزينب نطيبوله ونديروله صفره مقومه يرفع راسه بيها بين صحابه وكان ديما يتفكر فينا بحاجه ياقفطان يامحرمه ياريحه ياكندره
بعدين نعيمه دخلت روحها حتى هي ودار معاها زي مادار معانا...
تعرفي لما تزوجت زينب..بوك ياما بكي ع خاطرها..مرة شاداته امي..مرة اني..مرة حميده...حس روحه بروحه بعد خدت...
ولما تجينا عنده نهار عيد مايخلي مايجيب لجيتها..
لين مافي مرة جتنا زينب وقالت انها تبي ميلاد يخطب سعيده امك..قالت البنيه هاديه وطيبه وفي حالها لكن سمعة خوها وقفت نصيبها..خالك حسن..وقالت مافيش احسن من ميلاد لسعيده..بنت عمه وهو اولى بيها
لما فتحنا الموضوع مع بوك صكره طول..قال مش هادي المراة اللي نتمناها..كانت عنده مواصفات معينه..بوك في صغره كان يطيح الطير من عشه وبنات القبيله بيهبلوا عليه
كان شايف روحه شويه هدا علاش ماباش ياخد امك فالبدايه قعدت في جرته زينب لين خلاته ياخدها
وبعد خداها...سبحانك ياربي..الراجل تغير..بدي ينسحب شويه شويه من العيله وكلنا لاحظنا انه معاش زي قبل لكن قلنا طبيعي الراجل تزوج ولت عنده عيله اكيد بيلهى فيهم..لكن بوك تغير مرة وحده تغيير جذري..نسانا بالمرة ولت امك عنده كل شي..امك اللي رينا وجه تاني ليها صدمنا كلنا..سعيده الهاديه الطيبه اللي ماينسمعلها حس..بالحق كانت مراة قويه ماكرة جبارة..مايقدر عليها حد...
بعد صدمتنا سلمنا للأمر الواقع..لكن زينب ماقدرتش تتقبل كرهت سعيده كره لايوصف..حست ان هي اللي خدت خونا اللي كان لينا بونا منا..
اني كنت نقول معليشي الله غالب هدا ماراد علينا ربي فالنهايه يقعد خوي مهما صار...
خوي الكبير اللي حتى امه بعد عنها بسبب سعيده..
لما كنت نشوف في امي كيف كانت تشوفله وين يقعد بالساعات مع سعيده وامها في مستراح حوشهم وهي عشرة دقايق بالكثير ويروح وهي ساكته لاتلوم لاتعاتب..
كنت نقول اني حنخلي ولادي ديما معاي مستحيل نفرط فيهم ونخلي مراة تاخدهم مني..قلت مش جابرتهم ياخدوا اللي اني نبيها نخليهم يختاروا برواحهم وفي نفس الوقت مانخليهمش يتحملوا يعدي يوم ومايشوفوش امهم فيه
فرحت هلبه لما عرفت ان مالك يبي نور بنت نعيمه..
وفرحت اكتر لما عرفت ان عماد يبيك انتي..تعرفي علاش؟
رزان بصوت مبحوح:علاش..
كفايه تنهدت وقالت:لما شفتك كيف دافعتي عنه فهداكا الموقف قلت هادي حتهنيني عليه...ومش هكي وبس قعدت نشوف فيك كيف قربك من غاليه اختي غيرك هلبه نسيت هداكا الوقت كل شي درتيه قعدت نفكر بس فرزان اللي قدامي..وحتى عماد..عماد كان بيموت عليك واني كنت نبي قلبه يرتاح وبس..
لما صارلكم نصيب من بعض..بديت نلاحظ في عماد بادي يتغير..عماد قبل كنت اني عنده الكل فالكل..نورهان اخته كانت بنته مش اخته..بعد خداك بدي يبعد..
اني هني طول رجع بيا الوقت اللتالي وشفت قصة ميلاد مع امك بدت تتكرر..قداش سبيت روحي واني نقوللها ياغبيه ياحماره..كنتي تشوفي فيها طيبه كيف ماشفنا امها زمان وبعدين شن دارت امها..تو حتى انتي يصير فيك هكي..
رشفت ومسحت دموعها وهي تقول..وعقلي رفعني وجابني وبديت نتخيل في عماد يولي النسخه التانيه من خاله..ماتحملتش بكل..حبي ليك كله تحول لكره..قعدت نبي حاجه وحده بس اني نفتك منك وولدي يوليلي زي قبل..
رزان ببكي:والله ياعمتي ولا مرة فكرت حتى مجرد التفكير اني ناخده منكم والله العظيم..
مسحت كفايه ع خدها وقالت؛عارفه..اني اني اللي بوسواسي وخوفي خسرت ولدي وبعدته عني..كنت نحساب روحي هكي بنحافظ عليه واني كنت نخسر فيه..ومش بس هو حتى بوك..للمرة التانيه نخسره بس هالمرة الخسارة اني سببها خسارة مانظني مازال نكسب بوك بعدها
رزان:لا ياعمتي سيدي طيب واجد صدقيني فيسع ينسى ويولي..
ابتسمت بحسرة وقالت:خوي هدا يابنتي مابنغبى فيه ميلاد زي الجمل ماينساش ومايسامحش فيسع...
تنهدت رزان بألم وسكتت..
وكفايه دموعها ينزلوا وهي ساكته وسرحانه فالفراغ..
فجأة..
خش عماد للصاله وع وجهه ملامح الفجعه لأنه ناض ومالقاش رزان
لما شاف امه قعد جامد في مكانه وهو يشوفلها بصدمه..
رزان ناضت قعمزت وهي تشبحله..
وامه قعدت تشبحله بألم ودموعها تنزل...
🌴🌴🌴🌴
الساعه 8:00مساءا..
فالصاله...
"شن رايك فيه يمي"
فاطمه وهي تاكل في خبزة مغمسة بزيت الزيتون:كويس كويس..
ميلاد:نقول للوليد اللي يخدم عندي يجيب منه بيدون..
فاطمه هزت راسها وهي تاكل..
ع جية غاليه وهي تقول:ترا ذوق وقولي رايك..
ميلاد خدي منها الصونيه وقال:اللي يشوفك يقول اذوقي في اسامه الطيب..
غاليه بضحكه:انت كيفه وخير منه..
ميلاد:لقاقه..
ضحكت امه..
غاليه بضحكه:هي كول.
خدي طرف الحلو اللي كان من اللوزيات وكلي منه..
عكرش وجهه وشبحلها وهو يمضغ..
هي عقدت حواجبها بخوف..
بلع وقال بنفس ملامح الوجه؛مليح..
غاليه:هههههه..خزي عليك جبت قلبي فرجليا..
مدلها الصونيه وقال؛هاك..
خدتها ومشت للكوجينه..
قعد يشوفلها لين بعدت بعدين شبح لأمه وقال:يمي..
شبحتله..
ميلاد؛نبي ندير حاجه بس بناخد رايك فيها قبل..
فاطمه حطت اللي في يدها وركزت معاه...
🍁🍁🍁🍁
قدام محل المعجنات متاع سليمان عبدالله..
توفيق:شن تبيني نقولك ياعمي..
محمد:حق في حاجه ولا لا؟
توفيق تنهد وقال:ايه..لكن هي صكرت الموضوع..
محمد سكت وملامح الغضب باديه ع وجهه..
توفيق:محمد..انت مش قلبت صفحتها خلاص..
محمد:وبنتي؟!
توفيق سكت وهو مضايق..
محمد هز راسه وقال:عدي شوف شن عندك عدي..
ومشي وخلاه...
وتوفيق قعد معاه بعيونه لين بعد بعدين ولي خش المحل وهو يحرك في راسه يمين ويسار..
🍁🍁🍁🍁
"شن بديروا توا"..
عماد وهو حاضن امه:بنطلع بيها برا..لألمانيا..
سعد:المانيا؟!
رزان:الدكتور قال حتى الأردن كويسه..
عماد بحده:رزان..
تأففت بضيق..
سعد:لازم يرفعك للمكان الاضمن يابنتي..
رزان:غالي واجد ياعمي..
شبحلها عماد بحده..
كفايه بعدت وقالت وهي تشوفلها:الحمد لله ربي عاطينا يابنتي الناس تبيع اللي فوقها واللي تحتها بش تعالج وانتي مستخسرة في روحك!..
تنهدت رزان بضيق..
عماد؛يام قوليلها مش شغلك..
كفايه:قالك مش شغلك..
ضحكوا سعد ورزان..
عماد رجع ضم امه وباس راسها وهو يضحك وكفايه مبتسمه..
سعد هدى ضحك وقال:شن ماكان اللي تبيه نعطيك..
عماد:يطول في عمرك ياغالي اني تو نتصرف بروحي..
سعد بحده؛عماد فكني من الطروح ترا بنعطيك وانت تاخدهم وضم فمك..
عماد :باهي ياحاج مش قدام المدام..
ضحكت رزان..
سعد:كان لزم الامر نضربك قدامها حتى الضرب..
عماد حك حاجبه وهو متصنع الإحراج وامه ومرته يضحكوا عليه..
بعدين رزان قالت؛نبي منكم حاجه..
شبحولها..
رزان:مانبي حد يعلم غيركم..
سعد ضيق عيونه وقال:كيف يابنتي؟!
رزان:بالله عليك ياعمي افهمني..سيدي لو عرف اني نعرفه حيتعب مش حيتحمل وخوي رمزي اللي ليه سنين يراجي امتى يعرس بيأجل ع خاطري..واني مانبيش نوقفله فيها نبيه يتزوج ويستقر ساده بهدله..
كفايه بعدت عن عماد وقالت:باهي انتي توا بتسافري للعلاج والعلاج حيطول وعرس خوك شهر 4 كيف يعني مانكش حاضرة!ماهو هكي بيعلموا..
سعد:غير هكي سبب سفرك شن هو؟!!
رزان:مسافرة برا بنعاين ع المشكله اللي عندنا متاع تشوه الاجنه وبنتعالج برا وبنطول..وفي اسبوع العرس نجي نحضر عارفه وقتها حينعرف اللي اني فيه لكن مش حنخلي حد يعرف الابعد العرس..تو ندبرها تو نتصرف غير انتم بالله عليكم طاوعوني..رشفت وقالت..لو رمزي علم واجل ع خاطري والله نقولهلكم نموت من قهرتي..ورجعوا دموعها نزلوا..
عماد:لالا خلاص خلاص..اللي تبيه يصير بالله عليكم الدكاترة قالوا نفسيتها اهم شي في العلاج..
كفايه شبحتلها بحزن وقالت:ع راحتك..
سعد هز راسه وقال:باهي كان هدا يريحك نديروه..
كفايه شبحت لسعد وقالت؛باهي اللي نبهت ع نورهان..
سعد:طمنوا بالكم ماتقول لحد كان اني قتلها ماتقولش تخاف..
فجأه..سمعوا صوت ميلاد وهو يقول
"ماما"
ناضت وهي تقول:ميلو..
ومشت طلعت من حداهم..
بعد طلعت كفايه حطت ايديها ع وجهها وقعدت تبكي..
وعماد شبح فالفراغ والحزن بادي ع وجهه وبوه يشوفله بألم..
🍁🍁🍁
بعدين خشت عليهم رزان بميلاد اللي نساهم بلعبه ومشاغباته الألك والحزن شويه..
وهديكا الليله روح سعد للحوش وكفايه قعدت معاهم...
طول الليل كانت مع رزان تحاول تقويها وتزيد تكبر في قلبها الأمل..
اللي راته رزان من عمتها هديكا الليله نساها كل شي سيء بدر منها في حقها..
🍁🍁🍁🍁
تاني يوم..
الساعه 11:25 صباحا..
ماشي في الممر في يده ملف..
ومن الجهة التانيه كان جاي زميله فالعمل..
عبدالمنعم:صباح الخير يا...
ابتسم محمد وقال:صباح النور..
فاتوا من حدا بعض وفي الزوز شبحوهم واحد منهم قال..
:سبحان مغير الاحوال..
:المده الاخيره ارطاب الجو بيناتهم..
:يغير ولايتغير..
ومشوا الزوز في حالهم..
🍁🍁🍁🍁
واقف تحت العمارة بسيارته يستنى..
شويه شاف راجل بنت خالته جاي..
فتح باب السيارة ونزله ...
تلاقوا الزوز قدام السيارة وتصافحوا..
عمار:مرحبا بعماد شنو حالك..
عماد بإبتسامه:الحمدلله..انت شنو حالك وحال العويله..
عمار:الحمد لله..
طلقوا ايدين بعض وعمار قال:هلك حالهم باهي؟
عماد:الحمد لله كويسين..عمار ممكن تركب السيارة نبيك في موضوع ضروري وحساس شويه..
عقد عمار حواجبه بإستغراب وقال:باهي..
عماد اشرله بيده ع السيارة وقال:تفضل..
مشي عمار بإتجاه الباب وعماد مشي من الجهة التانيه..
🍁🍁🍁🍁
طالعة برا الجنان تسقي فشجرات الليمون متاعها..
وعزوزتها داخل لاهيه مع حفيدها..
فجأة طق الباب هي استغربت..
حطت الطوبو متاع الميه ومشتله طول..
وهي تقول:منو؟..
"رزونه افتحي"
انصدمت وهي تقول في نفسها
"ماما!"
خدت نفس..وتصنعت ع وجهها ابتسامة..
وفتحت الباب...
~~~~~~~~~~~~
