#العشق_المتمرد "عندما يزهر الليمون"
#جمان_فريد
تكملة القسم الأول من الجزء 140
🍃🍃🍃🍃🍃🍃🍃
سافروا العرسان لشهر العسل...
عمار اختار سويسرا لانه سبق وشاف في حساب دلال ع الفيس صور لسويسرا وان عندها رغبه تزورها وهو حققلها هالرغبه..
اما ايمن وحدهم مشوا لقبرص وكانت هادي هدية من واحد من خواله..
💕عاشوا احلا اسبوعين..كلهم عسل في عسل وعشق وغرام
ووثقوا اجمل الذكريات فهديكا الاماكن..
بعدها..
ايمن سافر بحدهم لمصر بيقعد غادي اسبوع...
💕لكن عمه..
سافر بمعشوقته لرحلة تانيه...
رحله يعرف فيها دلال ع العالم اللي كان عايش فيه وهو بعيد عنهم...
اول ماوصلوا لتنزانيا...
كانت دلال حاسة اتجاه البلاد هادي بشي من النفور..
ماتقبلتهاش..ممكن حست اتجاهها بالغيره لأنها خدت منها معشوقها لسنين طويله حضت بيه في اصعب حالاته اللي تمنت هي تكون معاه فيهم..
💚بس تبدل هالشعور اول ماخشوا للقريه اللي كان عايش فيها...
تفاجئت..بل انذهلت بمحبة الناس ليه..
بالذات الاطفال اللي التموا عليه وهما يرددوا
"Amary"
قعدت تتأمل في معاملة عمار ليهم..
مش هو بكل..انسان لطيف..حساس رقيق هلبه..
مش عمار بكل..💕
طبعا هو عرفهم عليها...
وهما رحبوا بيها وحبوها طول لأنها زوجته...
💕💕💕💕
في الحوش متاعه في هديكا القريه..
واقفه هي وياه..
هو ضامها ليه ولاف ايديه ع ظهرها..
وهي شاده وجهه بإيديها وهي تتأمل فيه بعشق وتقول: قبل كنت كل يوم نزيد نعشقك اكثر من اليوم اللي قبله...وتوا كل دقيقه اكثر من اللي قبلها..نموت فيك اني.
هو ضحك وقرب باسها بوسة لطيفه بعدين قال:تعرفي شن اكثر شي تعلمته هنى..ان الواحد مايقدرش يكسب الناس الا لو كسب قلوبهم المحبه ماتنشرا بالفلوس بكل..اول ماجيت هنى ماحد كان يعلم اني ميسور الحال..ومع هدى صبوا معاي وكانوا ليا خير ونيس فوحدتي مع يعقوب التارقي طبعا الله يرحمه..
هي قالت:الله يرحمه..بعدين لفت ايديها ع رقبته وقالت:قداش غرت منهم كانوا معاك فالوقت المفروض نكون فيه اني معاك...
عمار ابتسم وقال:وحق الله مافارقتيني دقيقه ياعمري..والله..
قربت منه وهي تشوفله بنظرات عشق ممزوجه بالحزن..وباساته وهي مغمضه عيونها..
وهي غمض عيونه وبادلها وكل مشاعره كانت ثايرة..
قبلتها كانت حنونه..متملكه..متشبته..
وكأنها تقوله اني احق بيك من كل الناس في كل حالاتك ومش حتلقى قلب يحن عليك ويحبك زي قلبي..
بعدت عنه وهي تشوف لعيونه قالت:معاش تخليني بكل..راهو لو...سكتها بقبله قويه وعميقه...وكأنه يزيد يأكدلها فيها انه مستحيل مازال يرجع يعيشها نفس الشعور المؤلم مرة تانيه..
بعد وقال:معاد نقدر..نا مانقدر نخليك بكل مهما صار..خلاااص..
💕وهام فيها وهام فيه..وشهد هداكا الحوش اللي كان يحمل هلبة ذكريات حزينه بين جدرانه ع اجمل لحظات العشق والسعاده والحب💕
🌴🌴🌴🌴
12\1\2018...
الساعه 5:00عصرا..
في الدار..
رزان بإبتسامه:اتفقنا اني وياها نكمل امتحاناتي نجو هنى ع طول..
غاليه بإبتسامه:احسن مادرتن..
نور بإبتسامه:باهي وين خالتي حميده..
غاليه:قاعده في المعمل..
رزان شبحت لنور وقالت:سمعت خالي الهادي يقول لعماد ومالك كان بيعدوا معاه للمعمل يروح بيها..
نور:اها خشيت قبلك ماسمعتهمش..
غاليه:شن حال عرب طرابلس..
نور:الحمد لله كويسين..غير آسو متعبه ماما شويه تبي امها وبوها..
غاليه:خلاص هانت مازال 10ايام ويروحوا..
ع خشة فضيله وفي جنبها فاطمه تمشي قالت:السلام عليكم..
هما ردوا عليها السلام..
نور:فطوم..تعالي سلمي..
جتها فاطمه ومدت يدها سلمت عليها نور وباست خدودها..
رزان:موليه عسل بزياده هالفطومه..
فضيله وغاليه ابتسموا..
وفاطمه مشت دب لرزان وسلمت عليها..
رزان حضنتها وباستها وهي تقول:نجيها ياربي..
ونور تشوفلها بإبتسامة حزن..
فضيلة تعكرت ابتسامتها فجأة..
لاحظتها غاليه وقالت:خيرك فضيله !؟
فضيله:من الصبح شادني مغص..
نور:اخر واحد موعدك ولا؟
فضيله شبحتلها وع وجهها ملامح الوجع:ايه..
فجأة..
فضيله بوجع:اااااه..
خافت غاليه..
ورزان حطت يدها ع بطنها لانها حست بوجع حتى هي..
فضيله فنصت عيونها وقالت:واااك..وووووه عليا..وووه...
نور شبحت لبطنها وحطت يدها ع عليها..حست بوجع حتى هي..
فضيله ضمت شواربها لداخل بقوة من الوجع بعدين عيطت..
ورزان حتى هي عيطت معاها..
غاليه تفلوشت وهي تشوفلهم..
نور بوجع:خالتي....اااه..اااااه...
غاليه ناضت ومشت طلعت تجري بتليفونها..
وخلتهم يتعايطوا وفاطمه واقفه في نصهم وتبكي..
🍁في الصاله..
غاليه اتصلت بالهادي طول نادى مرتين وفتح الخط..
هي طول تكلمت..
غاليه:تعالى انت وياهم نساوينكم..التلاته بيجيبن...
"آااااااااااه...وووووه عليا"
حولت التليفون من ع وذنها وسمعاته.....رداته من جديد وقالت...سمعت بوذنك......هيا سقدوا ارواحكم...
"خاااالتي"
"عمتيييي"
"غااااااااليه"
لوحت التليفون ومشتلهم تجري..
🍁🍁🍁🍁
عماد وهو في قمة التوتر والقلق:بسرعه ياخال بالله بسرعه..
الهادي بربكه؛هاني قريب نقلبها...
ومالك كان قلق جدا ع مرته ومرت خوه وخوه...
🍁اول ماوصلوا للقطعه..
طلع عماد يجري من السيارة...
ومشي طول للحوش لقاهم واقفات يتوجعوا
جي لمرته طول شدها وقعد يمشي فيها...
رزان جت عند وذنه وقالت:صورهلي كانت عاشت حتى عشرة دقايق صورهلي..
عماد بعيون مليان دموع باس راسها وقال:حاضر..
🍁بعده خشوا خوه وخاله وخدوا نساوينهم وغاليه مشت معاهم...
🍂🍂🍂🍂🍂🍂
خشوا التلاته حالات الولاده..
التلاته حالات ولادة مبكرة...
كانت اصعب حالة ولادة عند فضيله تعبت هلبه..
جابت..ولد..
نور...بعد مشقه حتى هي...جابت ولد...
🍁لكن رزان..
جابت البنيه..
كان منظر التشوه واضح..راسها كان كبير هلبه ع جسمها..
الدكاترة بلغوا عماد انها مش حتعيش وهو قاللهم انه يعرف...
بس اللي ماكانتش تعرف غاليه..
غاليه بصدمه ودموعها ينزلوا:ياغبيني عليك يارزان ياناري عليك يابنتي..
عماد مشي من حداها وهو يمسح فدموعه وخلاها تبكي بعبرتها...
🍁🍁🍁
وصل في المكان اللي حاطينها فيه..
كانت في سرير في الحضانه..
دموعه ينزلوا من عيونه سيل وهو يشوفلها..
بعدين مسحهم وقال بنبرة مرتجفه:هي نصورك لماما...
قام تليفونه...وقعد يصور فيها..
كانوا عيونها يدوب ينفتحوا ويتصكروا...
وعماد يصور فيها ويبكي...
فجأة..
نزل التليفون..
لما لاحظ انها صكرت عيونها ومعاش فتحتهم وحركة صدرها وهي تتنفس وقفت...
الدكتور اللي كان موجود حداه ويراقب فيه وهو متأثر مشي طول خش داخل ومعاه وحده من الممرضات..
جي للبنية...فحصها..
بعدين قام عيونه وشبح لعماد وحرك راسه يمين ويسار بأسف..
طول عماد انهار..
قعمز ع روس اصابع رجليه وحط ايديه ع وجهه وقعد يبكي بالصوت...
فهالوقت كان مالك يدور عليه لين دلوه ع مكانه ولقاه..
وين شافه وشاف حالته..
مشاله يجري..
قعمز جنبه ع ركابه وخداه فحضنه..
عماد ببكي:ماتت قدامي يامالك..بنتي ماتت قدامي وماقدرت نديرلها شي..
غمض مالك عيونه بشده ودموعه نزلوا....
وقلبه مفطور من الألم وهو يسمع فصوت عبرات خوه...
~~~~~~~~~~
