#العشق_المتمرد "عندما يزهر الليمون"
#جمان_فريد
الجزء131 القسم الأول
⏳..
واقفه فالكوجينه إدير في الفطور اشكال والوان..
وعمتها تعاون فيها..
كانت تشوفلها كيف تتحرك من حاجه لحاجه وترقص وتغني وكأنها فراشه..
هدا وين رجعت الحياة ليها..
هدا وين ردتلها الروح..
رزان...
رحالة بين عينيك السود ونسيت انا مين..
والحاله قلبي بيك موعود ايام وسنين..
غاليه بضحكه:دوم هالفرحه ياربي..
وقفت رزان ع الرخامه وضحكت بخجل وهي تقول:يدوم وجودك يااحلى مراة عرفتها فحياتي كلها..
غاليه:ههههههههه..
ع خشة حميده وهي تغني وترقص بكتافها..
لما الناس انك جاي شفت انا احلويت الزاي..
جت لرزان وعطتها بالظهر وقعدت تهز بكتافها وتوخر عليها وهي تغني:شفت انا..شفت انا..شفت انا احلويت الزاي..
غاليه ورزان:ههههههههههه..
رن تليفون رزان سيبت اللي فيدها ومشتله طول خداته من ع الدولاب..
لقاته هو يتصل..
وجهها اشرق بإبتسامه ماليهاش مثيل فحلاوتها..
وغاليه وحميده يشوفولها بإبتسامه...
فتحت الخط وردت..
رزان بتنهيده:آلو..
💕هو كان طالع من الحمام الخارجي بعد مادوش..
كان لابس كبوطه والطاقيه الصوف ويجري ويكلم فيها:يااحلى آلو...امممواااه ع خديداتك..و الفيم اللي يقول آلو هدا..
ابتسمت رزان بخجل ووجهها ولا أحمر..
عماد بضحكه:واتي الفطور كربوجتي..
رزان بضحكه:ايه..
عماد:جاي ع جراد...تشاو..صكر..
رزان وهي عاقده حواجبها بإستغراب :ههههههه..مصطلحاته ولت حربيه..
ضحكوا خالاته..
شويه وخش عليهم ويقول:هااااي..
حميده ضرباته ع ذراعه بوكس وقالت؛كنت في سرت ولالندن.!!؟
هو ردلها الضربه وقال:وانتي مالك..
حميده حطت يدها ع ذراعها وهي تتوجع:اااي..
عقدت حواجبها بغضب مصطنع وردتهاله فجنبه..
توجع بقوة..
رزان ضيقت عيونها وهي تشوفله..
هو فيسع ضحك وشد خالته حاوطها من رقبتها وهو ضاغط عليها بقوة..
حميده وهي مغمضه عيونها بشده قالت:هييه خنقتني قتلتني..
عماد:مازال تعاوديها!؟
حميده:خلاااص خلاص معاد نعاودها..
رزان :خلاص خليها..
شبح لرزان وهو رافع حواجبه..
ضحك بعدين طلق حميده وقال:ع خاطر هالفكرونه بس..
ابتسمت رزان بخجل..
حميده وهي تتحسس في قفاها :سعد الفكارين..
ضحك وهو يشوف لرزان ورزان مبتسمه بخجل وهي منزله عيونها..
غاليه بضحكه:تعالي انتي ..
جبدت حميده من يدها وطلعوا..
حميده وهي طالعه التفتت لرزان لقتها تشبحلهم..غمزتلها..
ضحكت رزان بخجل..
عماد رد الباب وجاها...
هي كانت تشوفله كيف جايها وقلبها يفر فران💓
اما هو فكان يشوفلها بنظرات شوق ممزوجه بالحزن..
وصل فيها...
حط ايديها الزوز ع خدودها وقال:مش زعلانه مني؟مسامحتيني..؟
رزان وهي تشوفله بنظرات كلها عشق غارقات بالدموع..
" ردي بالك تقولي كان تحبني مادرتش هكي..ورب العزة يامراة انتي نعشقك عشق لايوصف..لكن ياعمري البلاد مايجي قبلها شي.."
ارتسمت ع وجهه ابتسامه حلوة..
رزان بنفس الإبتسامه:حفظتها حفظ وفهمتك زين..مانيش زعلانه منك بكل بالعكس اني فرحانه بيك واجد لكن خفت نفقدك متت من خوفي...الحمد لله اللي ردك ليا..
طبس راسه وقربلها..
وباسها...
رزان شدت وجهه بإيديها وبادلاته بشغف وشوق شديدين..
وهو اكثر منها...💕
برا...
خش الهادي للحوش ومشي طول للكوجينه..
غاليه كانت فالحمام..
اما حميده كانت حدا امها راته خاش..
نطت من مكانها ومشت طلعت تجري..
لحقت عليه وشداته من ذراعه..
وقف وشبحلها وهو يقول:خير بلاك!!
حميده بتفنيصه:عماد ورزان يفطروا داخل..
الهادي وجهه ولى احمر نفض يدها وقال:قولي هكي من الاول..
حميده بضحكه:عقبالك..
شبحلها من فوق لتحت..
بعدين مشي لفم البوابه وهو يحرك فراسه ايمين ويسار وطلع..
حميده:هههههههه..
ع طلعة غاليه من الحمام..
غالية:خيرك تضحكي!!؟فنصت وقالت بهمس..تصنتي عليهم؟!
حميده قدمتلها وهي تضحك قالت:عينك ياحمارة...
جبدتها من ذراعها وقالت:شن بيصير فعرس الهادي وفضيله مش مفروض فعطلة نص السنه؟..
غاليه بضيق:والله حتى اني نفكر فيه الموضوع هدى..نأجلوه ولانخلو موعده كيف ماهو..
حميده؛امي مادوتش معاك بكل فالموضوع ؟..
غاليه:تس..تو نكلمها عنه اليوم..
حميده:ايه بش حتى الناس يعرفوا روسهم من كرعيهم..
غاليه هزت راسها بإيجاب ومشت خشت داخل وهي تمسح فشعرها بالفوطه..
وحميده ولت خشت لأمها..
🍁🍁🍁🍁
هاه شنو توا حالك باهي؟
رباب وهي تتأمل فملامحه قالت بهيام :وابهى من الباهي💓
رفع حواجبه وقال بضحكه وهو يحرك فعيونه للباب ويرجعهم ليها:امي هنى يامراة..
تنهدت رباب بهويام وهي تشوفله بنفس النظرات..
مؤنس غير عيونه عنها وقعد يضحك..
فالكوجينه..
امينه وهي تتكلم بالتليفون؛تعال روح بيا بلا رزالة..
اصيل بضحكه:باهي هي شويه ونكون غادي..
امينه:سقد بسرعه نرجى فيك..وصكرت..
شبحت لتليفونها وتنهدت براحه بعدين ابتسمت وقالت:الحمد لله...
💓فمربوعه الحوش المجاور لعمارتهم..
حدهم:غير خليك تغدا هني..
ايمن:صعب واجد والله مانقدر امي ترجى فيا..
حدهم ابتسمت بأسف وقالت:صح..
ايمن ناض وقال وهو مبتسم؛تو نكلمك بعدين تمام..
حدهم ناضت معاها وقالت بضحكه فرح:تمام..
قرصها من خدها وهو يضحك بعدين قال:السلام عليكم..
حدهم:خل نسقدك..
ابتسم..ومشي وهي معاه..
لين وصل في الباب هي قالت:السلام عليكم..
ايمن بإبتسامه:وعليكم السلام..
مشت حدهم طول..
هو قعد معاها بعيونه لين خشت بعدين مشي طلع برا..
لاقا بوها وقف عليه هدرزوا شويه بعدين توكل لحوش جده..
🍁🍁🍁🍁
واقفه هي وولادها الزوز وكنتها وبنتها فالصاله..
تتكلم بغضب وهما يسمعولها..
كفايه بإنفعال؛تو بالله من اولى اني ولاهي قولوا؟
تنهد مالك وقال:يام مشي لمرته الاول ع خاطر وضعها ماتنسيش شن صار بعد انصاب من الإنفجار..
كفايه بدموع:واني صار فيا شويه؟!
نور كانت تسمع وهي مضايقه هلبه..
مروان:يام البلاد غادي اقربله من هني خطم ع مرته الأولى وبعدين بيجي هني اكيد..
كفايه ضحكت بسخريه وقالت:دراويش كلا انتم حركات اللفع اهيا اني اللي نعرفها..
نورهان تسمع فيها وتهز فرجلها بغضب..
ونور تشوفلها..
كفايه لمالك؛اتصل بيه وقول يشد روحه مانبيله جيان..
شبحولها بصدمه..
مروان:يااام..مش من جدك!!؟
كفايه بكبر:لا من جدي وجد جدي
☘سعد كان كيف خاش للحوش لما بدي نقاشهم سمعها شن تقول وفهم ردة الفعل المبالغ فيها هادي علاش..
تنهد بعصبيه..
بعدين خش للصاله وقال؛مروان خود اختك واركبوا فوق..مالك خود مرتك وروحوا...
كفايه قعدت تشبحله بخوف..
مروان طول خدي اخته ومشي طلع
البنت كانت تشبح لبوها بضيق وهي طالعه..
اما مالك وهو عاقد حواجبه بإستغراب قال لمرته:هيا
نور:هي..شبحت لكفايه وقالت..بالسلامه خالتي..
ومشت ورا راجلها بدون ماترد عليها كفايه..
فاتوا من حدا سعد وطلعوا..
وهو كان قاعد واقف يشوفلها بإمتعاض..
راجى لين سمع باب الحوش تصكر
قدملها وقال:تبي تقلبي عليهم الطاوله ولا؟
كفايه بلعت ريقها وقالت بشي من الربكه:طاولة شني؟
سعد وصل فيها وقال:كفايه..تصرفاتك هادي حتخليك تخسري عماد..ومش عماد بس..حتى خوك وعيلته..وممكن حتى عيلتك..
كفايه نزلوا دموعها وهي تقول:ايه ماهو كفايه ديما الكيه فنظرك!
سعد:انتي تعرفي كويس انك عمرك ماكنتي كيه فنظري..لكن الوسواس اللي راكبك حرصك الشديد ع ان صغارك يقعدوا ديما محاوطينك وتقعدي انتي بس عندهم الكل فالكل..حيخليك تخسريهم ياكفايه بالذات عماد اللي شوره من راسه ومافي شي يقدر يغيرله قرار خداه وهو مقتنع بيه..يعني لما بيسمع اللي صار بينك وبين مرته اللي رمزي خوها شهد عليه حيقرر يحول من هني ويسكن بروحه..الحاجه هادي صايرة لامحاله..
كفايه كانت تشبحله بألم ممزوج بالقلق..
سعد:نصيحه مني..الراجل توا مروح من حرب حتى بعد يسمع باللي صار مش حياخد منك موقف قوي لكن انتي لو تصرفتي معاه بالشكل هدا..حتجبريه ياخد منك موقف قوي هلبه هلبه ياكفايه..
كفايه:انت مش بوه!مش مفروض تأثر عليه وتغصب عليه يقعد معانا!!مش انت اللي تبي لمة ولادك !؟
سعد:اللمه اللي بتجيب المشاكل اني مانبيهاش المهم عندي كل واحد فيهم يرتاح مع مرته وبس..وتاني شي وانتي تعرفيه من زمان تدخل فحياة ولادك مستحيل ندخل رجاله كبار مسؤولين عن انفسهم وحياتهم فاتوا السن اللي يخلوني ندخل فيهم..وياريت حتى انتي تفهمي الحاجه هادي يابنت الناس...
غيرت عيونها عنه وهي مضايقه هلبه من كلامه ويبان مش عاجبها..
سعد فهمها لهذا قال وهو ماشي:قاعد نتكلم بالعقل..
طلع من حداها..
هي شبحت للباب وقالت بغضب:حسبي الله ونعم الوكيل فيك يارزان يابنت سعيده..
🌴🌴🌴🌴
خلاص ياقلبي اقسم بالله معاد عندي وين نحطه..!
رزان وهي تتفحص فجسمه:شوف روحك كيف رحت!الفانيليه هدي مذكر كيف كانت تجي عليك؟!
عماد بضحكه:ايه حقه قلبي من قالك بنروح هني طول..قصدي حوايجي علاش جبيتهم معاك؟
رزان بإبتسامه:جبت اللبسه هدي ولبسه صيفيه اكثر لبستين تحب تلبسهم..كل ليله وين نجي نرقد نحطهم حداي..
ضحك وحط يده فجيب الكبوط وطلع التوكه.
رزان:هههههههه..بعدين هدت ضحك وابتسمت وفكت وشاحها ووراته سلسلته اللي لابستها فرقبتها..
ابتسم بعشق..وقربلها طبع قبله ع رقبتها
رزان غمضت عيونها وهامت فريحته...
هو بعد شويه وشافها هكي ضحك وقال:نروحوا العشيه فزغولتي..
هي استاقظت وفتحت عيونها ولون وجهها انخطف..
هو استغرب ومازال محافظ ع ابتسامته:خيرك !ماتبيش تروحي..
هي ابتسمت بربكه وبعدت عنه شويه ولفت الوشاح ع رقبتها..
عماد بدت تتلاشى ابتسامته سألها بإستغراب وقال:في حاجه؟!.
رزان كانت متوترة هلبه ومش عارفه شن تجاوب عماد اللي يبان ميت من شوقه ليها زيها هي..
لو قالت مانبيش نروح..عماد حيضايق ويحس انها مش مبادلاته الشوق نفسه..
هكي تفكير اغلب الرجاله..
ولو قالت بنروح رمزي حيمانع واكيد حيقول السبب..
فجأة..
طق الروشن..
"بونسيب البطل"..
ضحك عماد وقال: وخر ترا..
رمزي:وخرنا..
ضحك وهو عاقد حواجبه بعدين قدم وفتح الروشن..
مالقي حد...
شويه..
وارتفعوا تلاته روس من تحت الروشن..
رمزي وتوفيق وعمر..
رزان:ههههههههههههه..
عماد قعد يضحك وهو يحرك فراسه ايمين ويسار..
التلاته وقفوا ومدوا ايديه من حديد الروشن وقعدوا يشحوا فيه وهما يضربوا فيه..
ورزان تضحك وخلاص..
عماد وهو يتلقى فالضرب:ااه...ياكلاب..ااه...جبد الكاشيك من الصفرة وقعد يضرب في ايديهم بقوة..
التلاته جبدوا ايديهم وكل واحد يقول بوجع:آححح...
رزان بضحكه:تستاهلوا...💓
🍁🍁🍁🍁
روحوا كلهم الحمدلله مافيهم سو..
عبدالسلام بإبتسامه:باهي..الحمد لله..طيب فماليهم وفيك ع سلامة ولد اختك..
نعيمه بإبتسامه؛الله يسلمك...
غير عبدالسلام عيونه للصغار اللي كانوا مقعمزين حداهم يكتبوا فواجباتهم..
ركز بنظره ع صغار بنته..
تلاشت ابتسامته وتنهد بحسره..
ونعيمه اللي كانت تمرر فنظره عليه وعليهم ارتسمت ع وجهها ملامح الحزن..
🍃(الحمد لله..كلهم روحوا سالمين..
فرحت لرباب..فرحت لرزان..وفرحت لحدهم..بس فنفس الوقت غبطتهم هلبه..تمنيت روحي لو كنت مكانهم وعشت نفس شعورهم)
وقفت كتابه وشبحت لصورته اللي ع طاولة مكتبها...
شويه وسرحت بخيالها لبعيد هلبه...
💖☄
مقعمزة فالصاله متاع حوش اهلها وهي شاده تليفونها فيدها وتراجي ع نار امتى يرن..
دلال:هيا امتى توصل هيا..
"احنا احنا ليبين احنا تاريخ وفرسان احنا مانا خوانين بوجودك ليبيا آمان"..
كانت تسمع فصوت الأغاني اللي جايبتهم قناة الجماهيريه..
ع جية امها خشت قالتلها..
نعيمه:القذافي بيخطب اليوم فالسرايا الحمرا بمناسبة النصر مرات عمار مايجيش توا وينشغل بنتي..
ناضت دلال وبطنها قدامها فالشهر التاسع حامل بآسيا:لالا متاكده حيجي يشوفني ويشوف صغاره حتى خمسه دقايق..
فجأة انفتح باب الحوش وخش بوها..
عبدالسلام:بنتي راجلك جي دخلته المربوعه ماعنداش وقت اطلعي فيسع...
دلال بإبتسامة فرح من بين دموعها؛باهي بالله عليكم جيبوا جواد ومعمر خل يشوفهم..
ومشت بسرعه ع قد ماتقدر للباب..
وطلعت..
قعدت تمشي وهي ملهوفه..
لين وصلت فالمربوعه الخارجيه..
خشت..
لقاته واقف وقفته المعروفه ببدلته العسكريه وطاقيته اللي يتوسطها نسر ع راسه..
يتكلم بالتليفون...
وهي قعدت واقفه فمكانها تتأمل فيه..
عمار:تمام تمام شوي تانيه وجاي..بالسلامه...
صكر..
بعدين تنهد بإبتسامه والتفت..
شافها..
ارتسمت ع وجهه ابتسامه فرح ممزوجه بالشوق..
دلال ضحكت بفرح ودموعها ينزلوا:عماري..
عمار فتح حضنه وقال:روح عمارك...
جاته وهي تمشي بصعوبه..
هو ضحك وقدملها..
خداها فحضنه وقال:فلفوله رحتي..
دلال بضحكه:قريب تجي اسيا..
عمار بإبتسامه؛ملهوف ع شوفتها..
بعدت عنه شويه وقالت بغيره:بتبدالي من توا؟!
عمار:ههههههه..
ورجع خداها فحضنه وقال:بعد ماانتصرنا بفضل الله حندير امسيه شعريه كبيرة..نقول فيها اشعار كتبتهن لها..وكتبتهنلك حتى انتي..
دلال:حتى وانت غادي عقلك معانا؟
عمار:قلبي معاكم وين مانكون ووين ماتكونوا مستحيل ننساكم لحظه..غير ان شاء الله انتم ماتكونوش نسيتوني بس.
🍃☄
حطت راسها ع يدها المحطوطه ع الطاوله وقعدت تبكي بحرقه وبحسره...وهي تقول..
"والله ولااني قدرت ننساك لحظه"...
☘مشتاق لك..
مازال عقلي معاك..
محال فيوم ينسى..
ومازلت صاين غلاك..
وع الشوق نصبح ونمسى..
مشتاق لك وأنت بعيد..
وكان جيت نشتاق اكثر..
وكل يوم شوقي يزيد..
ول الصبح كل يوم نسهر..
🌴🌴🌴🌴
راقد ع رجل حناه وهي تمسحله ع شعره..
عماد:دمار ياحناي دمار..الحي الاخير هدا اللي كنا محاصرينهم فيه شبه كله انمسح..
فاطمه:لاحول ولاقوة الا بالله..باهي قولي حق يذبحوا ويصلبوا فالناس!
تنهد بألم وقال؛ايه ياحناي..شفناهم..
فاطمه غمضت عيونها بشده وقالت:يالطيف ياربي..مسحت ع راسه وقالت..حماكم الله ياوليد روحي..
غاليه بشي من التردد:باهي..عبدالرزاق..كيف مات؟
فتحت فاطمه عيونها وشبحتله..
بلع ريقه وقال:مانعرفش مؤنس ولد عمته هو اللي ري الجثة متاعه..ع الاغلب مات برصاص قناص..
غاليه بألم:الله يرحمه ويجعل مكانه الجنه..
عماد وغاليه:آمين..
🍁🍁🍁🍁
فالكوجينه..
سعيده وهي تشوف فكسكاس الكسكسي:بنطلع صدقه ان شاء الله..
ابتسمت رزان اللي كانت تشوف فالطاجين فالكوشه..
حميده وهي دير فنوع موالح:ايه والله تبيلها صدقه مرواحتهم ع خير..
بلقيس وهي تغسل الماعين:لولا الحزن رانا درنا عزومه كبيره..
سعيده شبحتلها وقالت:ايه والله..
اريج ورت لحميده كمية الخضرا اللي بديرها للسلاطه:هكي باهي عمتي حميده؟
حميده:زيدي طمطمتين..
اريج :حاضر..
سعيده:ايه حقه اريج شن صار فعيلة صاحبتك السراته..
اريج وهي واقفه ع التلاجه:مشطوا منطقتهم مافيها شي تو بيروحوا كلهم لحوش جدهم جاي فمنطقه مش مضررة هلبه ويقعدوا كلهم مع بعضهم لين يصينوا حوشهم..
رزان:بيجوا هنى؟
اريج:ايه..
سعيده:قلت لعمك وقال قوليلهم يتفضلوا مرحبتين بيهم..
رزان:كوكب هدي ولا؟
اريج بإبتسامه:ايه..
حميده:حلو واجد اسمها..
بلقيس:وحتى هي سمحه تجنن...
حميده؛خسارة تموا ضرارينا..
كلهم:هههههههه..
🍁🍁🍁🍁
مطار مصراته...
ماشي فالمطار وهو يجر فشنطته وراه...
قعد يدور بعيونه فحد يعرفه..
ابتسم لما جو ع الشخص المقصود..
قدمله بسرعه..
لين وصل فيه...
ضحك وقال:ع خاطرك انت وهلي جيت والله.
حضنه بوه وقاله:حمد لله ع سلامتك اشتيوي..
هو ضحك وقال:الله يسلمك..
حاوط بوه ظهره بذارعه وهو حاوط ظهر بوه ومشوا مع بعض..
:شنو حالك وشنو داير..
:اموري تمام التمام....
وحالي باهي دام حالكم باهي..
ابتسم بوه وقال:الحمد لله..
🌴🌴🌴🌴
"هانيبااال..هاني"
خش داخل وقال:السحابه وين..
مرام من دار النوم:تلقاها معلقه حدا المدخل..غير تعال خود عمار مش مهني روحه..
هانيبال:جايه الشيطان هدى جايه وياويله مني..
قعد يمشي لين وصل فدار النوم لقي عمار واقف قدامه ورافع ايديه وهو يقول:تيارة..
ضحكت مرام..
طبس هانيبال وطبه فغمره وقال:تبي بطحه مش طيارة..
لبست مرام لهويام طاقيتها الورديه المزينه بفيونكه ع جنب طالعه عسل..
قامتها امها وخدت الشنطه وقالت:خلاص وتينا...
قدم هانيبال للسرير خدي شنطة يد مرام وجاها وقال:مدي يدك..
ابتسمت وهي تشوفله مدت يدها..
لبسها الشنطه ع كتفها...وخدي شنطة الصغار من يدها وقال:وراي..
مشي طلع..
وهي ببنتهم وراه وابتسامة حب ع وجهها..
وصلوا حدا المدخل..
قدمت مرام للسحابه خدتها..
وطلعوا مع بعض برا..
صكرت الباب بعد تكت السحابه ع الحيط..
بعدين شبحت للسحابه خدتها وشبحتلها وقالت:تعالى..
ابتسم وهوعاقد حواجبه قرب منها..
هي فتحت السحابه ورفعتها فوقهم كلهم..
ومشوا مع بعض للسيارة...
🍁🍁🍁🍁
واااك ياعمر نسيت شنطتي..
عمر بتذمر:تو مش قبل نطلعوا عييت واني ننبح مانسيتي شي!؟
لمياء بضحكه:واهوا نسيت..غير هيا وراس عموره حط برنوسك ع راسك وامشي اركب جيبها..
تافف وقال:اللهم وسع بالي..
ومشي طلع من السيارة وقعد يجري لين خش للعمارة ولمياء تضحك عليه..
🍁🍁🍁🍁
ممتاز سوسو حبيبتي..
سهى:كله كله صح؟
لطيفه:ايه بنتي كله صح..وتوا تريحي شويه وامشي لخوك رمضان قوليلها يجي للكوجينه بش تتغدوا..
سهى:حاضر..
لطيفه:دااارين..
ناضت تجري لحقتها قبل تمس الدفايه..
طبتها وحطتها فالحباس مع خواتها..
••••••
هلبه عليها يابابا تعانيهم كلهم بروحها..
رفقه بضيق:باهي وانت من بيك بابا كان اني روحت للحوش؟
ابتسم حميد وقال:ماتخافيش بابا نعرف نهتم بروحي..
رفقه؛اكيد بابا..
حميد بضحكه:ياودي اكيد اكيد..
تنهدت رفقه بإبتسامه وقالت:كل عشيه تو نجيك كانك قاعد..
حميد بإبتسامه:تمام..ايه بابا!
رفقه بإنتباه:نعم..
حميد:احمم..بنتي قبل ليصير معانا اللي صار..في واحد جي وطلبك مني بابا لكن اني اجلت الكلام فالموضوع معاك لين تكملي السنه هادي وهاك كملتيها.
نزلت عيونها لوطا بخجل..
حميد:الراجل اثبتلي فعلا انه يستاهلك..واني موافق وراضي..لو انتي موافقه وراضيه..
رفقه قعد ساكته من الخجل..
حميد:بابا مافيش داعي تتحشمي لهالدرجه قولي رايك..موافقه ولا لا..
رفقه وهي منزله عيونها:نقول لماما قبل..
حميد:تمام..اللي يريحك ديريه..شبح لصونيتها وقال..كملي غداك..
رفقه:حاضر..
وهالحديث كان يدور بيناتهم قدام باسم اللي كان يسمع بإنتباه..
🌴🌴🌴🌴
حاضنين بعض بقوة..
هانيبال:بطل وراجل لاقبله ولابعده..
عماد بضحكه: هكي بننغر هلبه ياخال...
ضربه هانيبال ع ظهره وقال بإبتسامه وهو عاقد حواجبه:اللي كيفك بس يحقلهم ينغروا..
كانوا واقفين حواليهم..
رزان ومرام وغاليه وعمر ولمياء اللي كانت تشوف لهانيبال بنظرة امتعاض..
اما رزان فكانت تشوف لراجلها وملاحظه ان كل مايسلم عليه حد يحاول يخفي ملامح وجع ما بضحكه وابتسامه..
مرام:حمد لله ع سلامتك ياعماد وطيب فيك رزونه..
عماد:الله يسلمك مرت خالي..
رزان:تسلمي يارب..
لمياء مدت يدها وقالت:حمد لله ع سلامتك..
شبحلها هانيبال بإمتعاض بعدين غير عيونه لعماد..
عماد ابتسم مجامله وصافحها وقال:الله يسلمك مرت خالي..
طلقوا ايدين بعض..
ولمياء ماعبرتش رزان بكلمه..
غاليه بإبتسامه؛هي عدوا للمربوعه الغدي واتي..
هانيبال شبح لعمر وعماد وقال:هي..
عماد:تم..
ومشوا التلاته مع بعض طلعوا من الحوش بطريقهم للمربوعه الدخلانيه..
غاليه:هي رزونه..
مرام:جايه معاكم..شبحت للمياء وقالت..بالله لميا عيونك ع الصغار..
ومشت معاهم للكوجينه..
🍃هي مرام وكأنها تقول للمياء انتي ارتاحي ماديري شي حني نديروا..لأن وضع لمياء خاص وهي حامل بالنسبه للعيله كلها..بس طبعا لمياء مستحيل تفهمها هكي بالذات وانها جت من مرام🍃
مشت للدار وهي تقول بهمس:تشبح فيا بيبي ستر المتكبرة هادي..
خشت للدار وقعمزت..
كانت هويام محطوطه ع فراش و راقده جنب اوسمه..
بينما فطومه كانت مقعمزه تلعب بالألعاب..
وعمار واقف قدامها يشوف فيها كيف تلعب..
شوي قعمز قدامها وقال؛العب معاك..هتومه..
ضحكت لمياء غصب عنها..
فاطمه كانت داكه ففمها لعبه على هيئة تفاحه وتشبحله وهي مش فاهمه شي..
خدي منها التفاحه..
تصكها عيطه ع طول رقبتها..
انفجعوا هو ولمياء..
عمار قال:هاكي هاكي..
خدت منه التفاحه بشراسه لين خبشت يده ورجعتها لفمها..
وعمار يشوف ليده اللي خبشتها..
لمياء:طالعه لامها الشنعب..
عمار شبحلها وناض قدملها وشد خدها بظفاره وخبشها..
بدت تبكي..
لمياء قعدت تزحف ع ركابها وهي تقول:علاش هكي ياعمار حرام عليك..
خدت فطومه وقامتها بصعوبه وقعدت تزازي بيها..
وعمار شاد صوابعه اللي خبش خدها بيهم وهو يشبحلهم..
🍁🍁🍁🍁
الساعه 5:00عصرا..
مقعمزين مع بعض فالمربوعه..
واحد يحكي وزوز يسمعوله..
ايمن وهو يشبح للفراغ وعيونه معبيات دموع كان يقول...
مانعرفش كم يوم قعدتهن غادي بس وحق الله مروا عليا تقول سنين..عشت فوضع نفسي صعب واجد..من جهه نفكر لو لقونا نا والراجل والعزوز والبنية الصغيره شن يديروا فينا!؟ومن جهه نفكر في امي وهلي اللي مايعلموا عن مشيتي بكل..ومن جهة..مسح بيده ع وجهه وقال..نفكر فعبدالرزاق الله يرحمه..
مختار حط قبضة يده ففمه وعضها بقهر..
اصيل بحزن:امتى علمت؟
ايمن بألم:بعد تحررت البلاد..طلعنا نا والراجل وين تأكدنا ان الدنيا أمان خلاص...تعرفوا قبل بيأسرونا يحسابونا منهم..لين جو مؤنس وعمي صبري..
اصيل:باتي!!..قصدك شفتوا باتي!!قاعد حي؟!
شبحله ايمن بإبتسامه وقال:ايه...بس كانت عنده اصابه..راسه كان ملفوف بالشاش منين ريته..هو وعماد كانوا منصابين الباين عليهم لكن نهار التحرير موجودين..لدرجه عماد تعب وقتها ونزف جرحه رفعوه طول لمصراته..
اصيل:شهاده لله عماد هدى طلع راجل اصلي..
ايمن هز راسه وقال:فعلا..
مختار بألم؛باهي من قالك ع عبدالرزاق؟
ايمن شبحلها بحزن وقال؛مؤنس..وقال..برصاصة قناص استشهد..
حط مختار ايديه ع وجهه..
قربله ايمن وخداه فحضنه...
ومختار قعد يبكي....
واصيل يشوفلهم بحزن..
برا...
الحاج مختار:ان شاء الله مومن..
مشي جهة الباب اللي يطق وهو حاط ع راسه السحابه..
فتحه...
وتفاجأ ع الآخر وقال:هدى انت ياناكر اصلك!!
:ناكر اصلي!!حرام عليك ياجدي..
ضحك مختار وخداه فحضنه...
وهو حضن جده بقوة...
مختار:امتى جيت..
بعد عن جده وقال:ل*****هدي الوصله..
مختار:منو جابك؟
:باتي..عدى لحوش مؤنس..
مختار رفع حواجبه وهو متفاجئ..
ضحك وقال:بنقعد مصبي واجد فالباب!!
ضحك مختار وقال:خش خش..
خش وهو يضحك..
فم الباب الدخلاني كانت امينه واقفه..
وين شافت اللي خش شهقت بصوت عالي بعدين قالت بعيطه:عثمان!!!
هو ضحك..
ومشالها يجري..
هي نزلت من الدروج وهي تضحك وتبكي بفرح..
وصل فيها..
وحضنها وهو يقول:مغلاك يمي مغلاك توحشتك وااااجد..
هي كانت اضم فيه وتبكي من الفرحه ومش قادره تتكلم...
🍁🍁🍁🍁
مقعمزات مع بعضهم فالدار حدا الحاجه فاطمه..يهدرزوا ويشربوا فالسحلب..
مرام كانت مضايقه هلبه لأن بلقيس ماتبيش تشبحلها حتى الشبح..
وبلقيس مضايقه اكثر منها لانها مجبورة تتعامل هكي الحكايه فيها طلاق..
ولمياء تراقب فيهم الزوز..
سعيده:تبارك الرحمن ع اوسمه يابلقيس..
بلقيس:تسلمي ياسعيده..وزعت نظرها عليهم وقالت..قريب يجيها ونيس..
كلهم فرحوا ماعدا لمياء اندهشت..
غاليه بإبتسامه:ماشاء الله..
حميده:امتى عرفتي..؟
بلقيس:امس..
حميده:من توا الاسم عليا كان جي وليد سميه تيم وكان جت بنت سما..بش تبدا ع وزن واحد هي واختها..اوسمه وسما..
بلقيس بضحكه:ان شاء الله..
الحاجه:غير نقرشن ماضال الا مسميها محمد اسم ماتعلمي من وين جايبه..
غاليه:اسم مركب المرة هدي عايشة معمر..
كلهم:ههههههههه..
فاطمه:لا يديرها ويسميها بيه يسميها..
وكلهم يضحكوا..
مع عدا لمياء اللي كانت تشرب وهي مبتسمه وفعقلها تفكر فحاجه..
🍁🍁🍁🍁
فوحده من الديار المسكرة بالمفتاح..
ااااه ياقلبي قديش استاحشت ريحتك..
عماد وهو يضحك:بنكتر من المشي للحروب..
عضاته من رقبته..
عماد:اااهههههه..متزوج ضبعه اني..
رزان وهي دافنه وجهها فرقبته:قول متزوج لبوة..
ضحك وقال:ايه صح ماني اسد..
ضحكت رزان..
بعدين حطت يدها ع خصره..
هو تبدلت ملامح وجهه من الإبتسامه للضيق..
رزان بعدت عنه وع وجهها ملامح الخوف...
حولت يدها وحطتها تحت حوايجه..
عماد؛ههههههه..ايديك مصقعات..
رزان وعيونها معبيات دموع:هدى شنو؟
هو ضحكته بدت تخف..
شبحت لجنبه وقامت حوايجه لقت لصقه جرح كبير مغطيه جنبه..
حطت يدها ع فمها بصدمه.
عماد حط يده ع ظهرها وقالت؛تي ماهو تعرفي اني انصبت..
رزان حولت يدها من ع فمها وقالت بنبرة باكيه؛قالوا مش خطيرة اصابتك..
عماد:ايه حبي مش خطيرة..
رزان بحده ودموعها ينهمروا؛عماد..مادرقش عليا..
عماد قربلها وباس دموعها اللي تنزل ع خدودها يبي يهديها..
رزان رشفت وقالت؛قولي كل شي بالله عليك..
غمض عيونه بعدين فتحهم وبعد عنها شويه..
شد وجهها بإيديه وقال: صابتني شظيه من الإنفجار وجت فجنبي...تنهد وقال...طبعا دارولي عمليه بش حولوها...
رزان بدموع:كمل..
عماد:خسرت الكليه..
خبطت بيدها ع صدرها..
ضمها طول وقال:لا ياقلبي لا بالله عليك ماديريش هكي..عادي جدا هلبه ناس عايشين بكليه وحده..
رزان ببكي؛عماد..خلاص بالله عليك خلاص..مرة تانيه صدقتي حنموت والله مانقدر نتحمل اكثر من هكي..راني فيك انت ديما ضعيفه...
زاد ضمها وهو يقول:ياعمري اني...
وطبع ع رقبتها قبله طويله..بش يهديها..
فجأة..
تحرك الغريم...💖
رزان:حيي..
عمادوخر وقال:والله حسيت بيها..
حط يده ع بطنها..
تحرك مرة تانيه..
عماد بفرح وحماس:ههههههه...جووو...
ورزان تضحك..
شبحلها..ابتسم..
قرب باسها بوسه لطيفه بعدين بعد وقال؛نجيلي هالضحكه..
ابتسمت بخجل..💕
بس سرعان ماتلاشت هالابتسامه لما رجعت شافت لجنبه..
ضماته مرة تانيه وهي تقول:ربي مايوريني فيك مكروه..
عماد بإبتسامه:ولافيك ياعمري🍃
🍁🍁🍁🍁
تعالي لجدو تعالي تعالي ياسمحه تعالي..
جاته ادب ع رجليها وهي تضحك وقفت قدامه ورفعت ايديها طبها ورفعها فوق وهو يقول:اباء صبري انتي..
مؤنس:اباء مؤنس..
رباب فنصت فراجلها..
صبري بضحكه شبحلها وقالت:هو كان مانابشني مايرتاح.
ابتسم مؤنس ع جنب..
ورباب ابتسمت بإحراج..
مؤنس:عديت لحوش جدي؟
صبري:امم..رفعت عثمان غادي وجيت هنى..
مؤنس بصدمه:عثمان!
صبري بضحكه:احح ياجدي..
رباب:بيبوو..
مؤنس شبح بنته شاده خشم جدها بظوافرها ضحك وقال:خليها شن دارت؟؟
رباب:مؤنس!!..
صبري:هههههههه...المهم خوك روح اليوم عن طريق تونس نزل فمصراته..قال قوله يتريح نا جايه بكرا..
مؤنس رفع حاجبه وقال:ايه يجيني هو غصبا عنه ناكر اصله هدى..
رباب حطت يدها ع جبهتها من الإحراج..
ومؤنس وصبري يشبحولها ويضحكوا..
🍁🍁🍁🍁
ومر باقي اليوم..
ومازال كلهم عايشين فرحة عودة الغائب..
ماعدا كفايه اللي مشي يومها كله فالبكي من الخوف...
الخوف..الهواجس..الوسواس اللي مخليها ادمر كل شي قعدت سنين تبني فيه
وسعد كان يحاول مايتصرفش معاها تصرف قاسي بش ماتزيدش شراسه وكره لرزان...
🌴رزان اللي كانت متوترة وخايفه هلبه..
وهي تشوف لخوها وعماد كيف واقفين فالمستراح ويهدرزوا...
تنهدت بخوف وقالت؛استر يارب..
🍁رمزي:تبي تروح انت روح سلم ع هلك هي تقعد هنى..
عقد عماد حواجبه وقال:تبصر صح؟
تنهد رمزي ووزع نظره ع المكان بعدين شبحله وقال:اللي بنحكيهلك تو لاسيدي ولاامي ولافي حد من العيله يعلم عنه حاجه اخطاي اني ورزان هنى..وفطرابلس سيدك وخوك مروان وامك..
عماد قلبه انقبض بقوة شبح لرمزي بنظرة قلق ممزوجه بالعصبيه وقال:قول اللي عندك بسرعه..
🍁🍁🍁🍁
غدوة ان شاء الله بيجوا يتغدوا عندنا وبعد العصر يعدوا لحوش واخدينه من واحد صاحبهم قاللهم يباتوا فيه الليله..
ميلاد؛كان فيها كيف والله ماخليناهم يباتوا كان عندنا..
سعيده:الله غالب هدى حد مانقدروا..
ميلاد ابتسم وقال:تكبري من قدر كنتك واجد باللي ديري فيه...
سعيده حطت حوايج راجلها اللي طبقتهم فالدولاب وقالت:ياسيدي قدرها من قدر ولدي...وبعدين هي تستاهل من يكبر بقدرها..ليها قريب 8شهور معاي ولا مرة ريت منها عيب ولاغلط..تستاهل نكبر بيها وبكل حد قريب عليها..
ميلاد ابتسم بعدين تمدد ع فراشه وتغطا وهويقول:باهي اطفي الضي بنرقد..
سعيده بإبتسامه:حاضر..
ناضت مشت طفت الضي..
وطلعت من الدار وصكرت بابها....
🍁🍁🍁🍁
مغمض عيونه بغضب..
وهو حاط ايديه فجيوبه ويهز فرجله اليسار..
رمزي:والله لولا خوفي من القطيعه كنت حطيت سيدي فالصورة..وللسبب نفسه ياعماد نبيك تكون هادي وتعرف كيف تتعامل مع المشكله هدي..
فتح عماد عيونه وهو يهز فراسه بالموافقه وملامح الغضب ع وجهه بعدين قال:تمام..مشكور رمزي وبارك الله فيك..
ولف ومشي بطريقه للحوش القديم..
رمزي بأسف:ماكان في حد يتمناها توصل لهنى..
تنهد بعدين التفت بيمشي شاف اخته طالعه برا..
رمزي:قتله..
رزان بقلق:شن قال؟
رمزي:ماقال شي..
رزان شدت فمها بيدها وشبحت جهة شجرة النبق اللي قدام الحوش القديم..
رمزي:خلاص توا خشي داخل صقع..
رزان شبحتله هزت راسها بإيجاب بعدين مشت خشت وهو مشي كمل طريقه...
🍁🍁🍁🍁
مع 11..
روحوا عمر وهانيبال بنساوينهم...
وركبت بلقيس لشقتها ومارقدتش لين حقق معاها محمد وتاكد انها مااحتكتش بمرام...
وحل النوم ع كل العيون...
وهلبه ناس رقدت بعمق وهي مرتاحه..
بعد مضوا ليالي نومها قليل..وكان رقدوا لاتريحهم كوابيس ولانوبات الهلع...
زي هندا..
اللي رقدت فنفس الدار مع ولادها الزوز...
كان تلقى تردهم لبطنها مرة تانيه..
المهم يسلمولها...بس مع هذا القلب كان يبكي دم ع اللي راح ع غفله...🍃
ورباب..
اللي واخيرا ارتاحوا بالها وقلبها..
وراجلها روحلهم هي وصغارها....وربي برحمته حماه ليهم من كل مكروه...💕
وحدهم..
اللي كانت راقده براحه تامه..
بعد اطمن قلبها ع اكبر سبب قاعده تضحك ع خاطره فالدنيا..
اما رزان...
فكانت فرحتها مش كامله..
من جهة تفكر فإصابه راجلها..
ومن جهة تفكر فاللي حيصير لما يروح لأمه غدوة..
ماقدرتش ترقد وهي تخمم فيه..
ناضت من مكانها وطلعت للصاله..
اتصلت بيه..
نادى مرتين وانفتح الخط..
رد بصوت ناعس:هاه عمري..
رزان:راقد..
عماد:اممم..
ابتسمت وقالت؛باهي خلاص عدي كمل نومك..
عماد:اعطيني بوسه قبل..
ضحكت وقالت؛اممممواه..
عماد اتاوب وهو يقول:هاااعسسسلهل ياعمري..
رزان ضحكت وقالت:تصبح ع خير..
عماد؛باهي..
رزان ضحكت عرفاته النوم غالبه..
صكرت وهي مرتاحه...مدام رقد معناها الموضوع من مضايقه هلبه..
🍃النوم اكبر مهرب وانت ست العارفين يارزونه🍃
🍁🍁🍁🍁
صبح الصبح...
وتسقد عماد لطرابلس بدون مايسلم ع رزان ماكانش يبيها تشوف حالة الغضب اللي كانت مسيطرة عليه..
هو كان خايف من نفسه هلبه خايف من ردة فعله اول مايشوف امه..
ساعتين الا ربع مروا فالتفكير وبس..
وصل لحوشهم..
انفتح الباب..
وخش...
كان ياخد فنفس ويزفر بقوة..
محاولة منه لتهدئة نفسه...
بعد درس السيارة..
فتح الباب ونزل..
طلع بوه من الحوش..
ابتسم لما شافه..
اما سعد فتح حضنه ونزله وهو يقول:يابطل..يابطل..
وصلوا فبعض وحضنوا بعض بقوة..
ع طلعة نورهان..
نورهان:عماااااد..
عماد باس راس بوه..
بعدين طبس باس ايديه وبوه باسه ع راسه..
شويه بعد..
وجي لنورهان..
حضنها وهو مطبس عليها ماقدرش يقيمها...
نورهان؛استاحشتك هلبه..
عماد:حتى اني ياخنفوسه..
كفايه كانت متردده تطلع..
مترددة فعلا..
من خوفها..
بس قوت نفسها وطلعت...
هو وقف ع حيله وشبح للباب شافها..
كانت تشوفله بشي من الريبه..
وهو ارتسمت ع وجهه ملامح الآسف ممزوجه بالخذلان..
النظرة متاعه خلوا الدموع يطيحوا من عيونها..
بوه كان يشبحله هو وبس..
شويه..
تبدلت ملامحه للإبتسامه وقال:كييفو..
ومشالها ركبت الدروج...
وصل فيها ..
وخداها فحضنه..
هي لما خشت حضنه قعدت تبكي..
هو يزيد يضم فيها ويقول:استاحشتك هلبه..
وكفايه تبكي وبس...
🍁🍁🍁🍁
الساعه12:00قبل الظهر..
يدوروا الزوزفالشقه وحده تتفرج والتانيه توري فيها..
كوكب:ماشاء الله حلوة واجد..
اريج:تسلمي...اشرتلها ع الروشن..وهدا الروشن مطل ع الوادي..
نحب نوقف عليه مع الفجر وفي الليل المنظر حلو هلبه..
•••••
جاي قبل مرتين..
مؤنس:اها ..لكن ولا مرة شفت الإطلال هدي..
ضحك عثمان وهو يشوف للوادي من فوق سطح العماره..
مؤنس قدم يشوف للخزان..
اما عثمان اللي كان منسجم..
قطع عليه انسجامه صوت برسيانه انفتح بقوة..
فضولا التفت براسه بيشوف من وين جي الصوت..
كوكب بضحكه:يجنن المنظر...
قعدت تشوفله وهي مبتسمه بحماس..
وعثمان مسهم فيها💕
هي لما كانت تمرر فنظرها ع المكان..
جت عينها عليه...
ابتسامتها بدت تخف شويه شويه لما شافاته كيف يشبحلها..
قعدوا يشبحوا لبعضهم وخلاص..
من داخل..
اريج:ووك الصقع خش..صكريه...
☘مؤنس:لازم نفتح البير...
قام راسه وشاف وضع خوه..
ميل راسه شاف البنيه اللي واقفه فالروشن..
رجع راسه وضحك..
☘اريج:كوكب!!
التفتت كوكب وقالت وهي شبه دايخه:هاه!
اريج رفعت حاجبها اليسار بإستغراب وقدمتلها وقالت:صكري الروشن جمدنا..
وصكرت اريج البرسيانه فوجه عثمان..
عثمان بهويام؛ليش باهي؟!!
مؤنس:بالله عليك!!
التفت وشبح لخوه وهو مفنص عيونه..
بعدين غيرهم للوادي وقال بشي من الربكه:سمحه الإطلاله..
ضحك وحرك راسه ايمين ويسار وقال:الباينها هكي حق!
عثمان عقد حواجبه وتنحنح...
🍁🍁🍁🍁
مقعمزين فالصاله مع بعض...
عماد:الحمد لله الحمد لله..هانا تريحنا فالنهايه..
سعد:الحمد لله..
عماد خبط كفوفه فبعض وقال:وتوا نبيك تشد معاي الهمه ياحاج وادورلي ع حويش قنين خلال شهر واحد بس.
كلهم توجهت انظارهم لكفايه..
اما هو ماحولش عيونه عن بوه بكل..
بوه اللي كان يشوف لمرته وخايف جدا من ردة فعلها
تزيد تهد ماقعد...
....يتبع...
