#العشق_المتمرد "اختبار"
#جمان_فريد
الجزء 120 القسم التاني
💖..
في الجامعه..
كانت رزان مقعمزة في باحة الكليه تراجع قبل تخش الإمتحان..
بروحها مقعمزة..
تغريد وحدهم كانوا يديروا في إمتحان..
قطع عليها مراجعتها صوت بنت وقفت عليها كلمتها..
"رزان"..
رزان قامت عيونها وقالت؛بسمه..
بسمه قعمزت جنبها وقالت :عندك امتحان؟..
رزان:بعد ساعه..
بسمه:اممم..باهي رزونه بنقولك..
رزان:قولي..
بسمه:كلمني مصلح مرة تانيه..
شقلبت رزان عيونها بملل..
بسمه بضحكه:ياودي هالمرة ناوي يخش الحوش من بابه وقال انه فتح الموضوع مع اهله..وحتى امه كلمت امك..
اشرت رزان ع نفسها وهي فقمه الإستغراب: كلمت امي اني؟!!
بسمه:ايه هو هكي قال..وقال قوليلها تفكر في الموضوع بالشوي عليها وماتستعجلش فقرارها..ابتسمت بغمزة وقالت..بيطلع بعثه لتركيا يارزونه راهو..
رزان قعدت تشبح بإمتعاض القدام وهي ساكته..
بسمه:والنبي شوفيه رزان كيف يشبحلك..بيهبل عليك..
رزان شبحت وين ماتشبح بسمه..
شافت مصلح واقف من بعيد ويشوفلها بإبتسامه..
غيرت عيونها عنه وقالت:تمام تو نفكر..
بسمه شبحت لرزان بإندهاش وهي تقول:بجديات!!..
رزان :ايه..لكن قوليله مايتأملش واجد..
بسمه:صدقيني يارزونه مصلح ولد كويس صح كان لخباط لكن توا تغير واجد واجد..
هزت رزان راسها بإيجاب وهي تقول:إن شاء الله خير إن شاء الله خير..
ناضت بسمه وقالت:تمام..تو نخليك تقري..بالتوفيق..
رزان:شكرا..
مشت بسمه ورزان معاها بعيونها..لعند ماوقفت بسمه ع مصلح اللي كان بس يشبح لرزان..
غيرت عيونها عنه وشبحت لشيتها وكملت تراجع..
🍁🍁🍁🍁
ضروري جدا يادلال تجيني للمكتب الأحدإن شاء الله..
دلال بإبتسامه:حاضر استاذ نجيب..
نجيب:خلاص اتفقنا..سلام..
دلال:سلام..
مشي نجيب من جهة وهي مشت من جهة تانيه.
طلعت من الكليه ومشت بطريقها لسيارتها..
وصلت فيها فتحت الباب الخلفي حطت حاجاتها..
بعد صكراته مشت ركبت القدام..
شغلت السيارة وتحركت..
وفي سيارة طلعت وراها..
وورا هالسيارة طلعت سيارة تانيه..
طلعت دلال من الجامعه..ووجهتها كانت لوحده من اكبر محلات الحلويات فالعاصمه..
وصلت فإشارة وقفت فيها...
والسيارتين كانوا وراها واقفات..
كانت وين توقف ع الإشاره اطلع كتاب تقرا فيه لعند ماتولي الإشارة خضرا..
بعد حوالي 7دقايق بالزبط..
سمعت صوت الكلاكس..
حطت الكتاب ع الكرسي اللي جنبها وتحركت طول..
ومازالوا السيارتين وراها..
وهكي..
لعند ماوصلت لمحل الحلويات..
درست فتركينه..
نزلت من السيارة..
سكرتها كويس ومشت طول خشت..
والسيارتين اللي قعدوا وراها..
درسوا ونزلوا صحابها وخشوا طول حتى هما..
لما خشوا..
لقوها واقفه ع المعروضات وتشوف فيهم..
واحد كان مخطط يخلي لقائه بيها صدفه..
اما التاني كان مخطط لنفس الشي بس بطريقه اخرى..
قامت عيونها للبايع وقالت؛لو سمحت شويه..
جاها البايع وقعدت تقوله ع الحاجات اللي تبيهم..
قدم واحد من اللي يتبعوا فيها..
ومشي وقف جنبها..
البايع:تمام لحظه شويه بس..ومشي بيحطلها اللي طلباته فباكوات..
ودلال تراقب فيه..
فجأة..
"عفوا"..
شبحت ايمينها لقت راجل طويل عريض انيق فلبسه ومميز جدا..كان مبتسم ابتسامه حلوة وهو يشوفلها قال بصوت راكز ولكنته بدويه:كاني مش غالط انتي دلال بنت العميد عبدالسلام *****..
دلال بإستغراب:من حضرتك؟..
ضحك وقال:اني صديق والدك ريتك مره معاه في نادي الفروسيه اللي في ******..
هي قعدت مرتابه منه غيرت عيونها عنه وشبحت للبايع ومابتش ترد..
هو ضحك و مسح حاجبه من التوتر بعدين قال:معاك عبدالرؤوف المصراتي وفعلا راني صديق الوالد ...
هي شبحتله وقالت:اهلا وسهلا..
هو هام فعيونها معاش قدر يحول عيونه عنهم...
وهي ارتبكت طول غيرت عيونها وبعدت عنه..
هو ابتسم..
اما هي جاها البايع وعطاها طلباتها..
هي خدتهم ومدت حقهم..
ومشت بتطلع..
كيف وصلت للباب طلع قدامها ضو..
انخلعت..
ضو ابتسم بربكه وقال:اسف..
دلال ابتسمت مجامله وقالت:مافيش مشكله..
ضو بنفس الإبتسامه:احمم..صدفه خشيت لمحتك ماكنتش متأكد لما شفت الاخ واقف معاك..
هي التفتت شبحت عبدالرؤوف وهو ياخد فطلبيته بعدين شبحت لضو وقالت:صديق بابا..
رفع حواجبه وهو يشوف لعبدالرؤوف وهز راسه بإيجاب..
فات من حداهم عبدالرؤوف شبح لضو بطرف عينه بعدين شبح القدام لبس نظاراته وطلع..
ضو رفع حاجبه وقال:حسبته حد يضايق فيك..
دلال:لالا..
ضو:احمم..باهي دلال ..لو فيها كيف..غدوة ان شاء الله نشوفك نبيك فموضوع ضروري..
دلال قرنت حواجبها بإستغراب وقالت:إن شاء الله خير!!؟
ضو ابتسم بربكه وقال:خير خير موضوع عادي شوي..
دلال:مالاش علاقه بخالي؟..
ضو ضحك وقال:لالا ابدا..حك حاجبه وقال..هو هكي موضوع عادي عادي يعني..مش خطير...وابتسم بإرتباك..
دلال هزت راسها بإيجاب وقالت:تمام ..
ضو ابتسم بفرح وقال:تمام لينا لقاء غدوة .
دلال ابتسمت وقالت:لا بعد غدوتين غدوة جمعه وبعده سبت..
هو انحرج واضايق فنفس الوقت واخفى هالمشاعر بضحكه وقال:افف نسيت بكل ..هز راسه بإيجاب وقال..خلاص لينا لقاء يوم الأحد..
دلال ابتسمت مجامله وقالت:ان شاء الله..نستأذن ومشت طول طلعت.وهو وراها ..
مشي لسيارته..بدون مايركز ع السيارة اللي فجنبه واللي فيها..
ركبت دلال وشغلت السيارة وتحركت..
وهما طول وراها...
🌴🌴🌴🌴🌴
الساعه 2:30بعد الظهر..
كانت المطر تبشبش..
والجو مصقع..
فهالوقت رزان نزلت من سيارة خالها وتوجهت لحوشهم بعد سلمت ع بنت خالها..
وصلت الدروج وركبت..
وصلت في الباب وخشت..
💓وهو كان يراقب فيها من روشن المربوعه الخارجيه..
كان مضايق هلبه..
ومحتار ومش عارف كيف يدير بش ينهي هالفراق نهائي..
ويخليه وصل يدوم لآخر العمر..
استمر بالتفكير لين وصل لشي لعل وعسى يكون فيه الفرج..
مشي طلع من المربوعه..
وتوجه لسيارته..ركبها وشغلها وتحرك طول..
🌼في حوش ميلاد..
رزان وهي ماشيه لدارها..
طلعت امها من دار النوم..
رزان:مازال الغدي؟.
سعيده:طايب من بكري غير كنت نراجي فسيدك..
رزان:اني والله مانقدر نراجي جعانه جعانه..
سعيده:باهي بعد تغدي تعاليلي الصاله نبيك..
طول رزان خطر عليها كلام بسمه زميلتها..
هزت راسها بإيجاب بعدين كملت طريقها لدارها فتحت الباب وخشت وصكراته وراها..
سعيده وهي تشوف لباب الدار برفعة حاجب؛ماهو واخدك لو ينقب السمي..
بعدين مشت للصاله..
🍁🍁🍁🍁
"رفقه..يارفقه"..
ناضت رفقه من سريرها وهي تقول:جايه ياماااماا جاايه..
مشت طلعت من دارها متوجهه لكوجينه..
وصلت فيها وخشت..
لقت امها واقفه حدا الطنجره والكسكاس لما شافتها خاشه قالت:تعالي بنتي سقي الغدي اني بنمشي نرقد..
رفقه بخوف:ماما انتي كويسه؟..
ابتسمت لطيفه وقالت:ايه كويسه كويسه مافيا شي غير نازل عليا النوم..
شبحت رفقه لبطنها وقالت:غير امتى تجيبهم وترتاحي..
ضحكت لطيفه وقالت:مازال شهر بس..هانت خلاص..
رفقه:إن شاء الله يعدي زي البرق يارب..
ضحكت لطيفه بعدين قالت:هي سقي الغدي سقي..
ومشت طلعت من الكوجينه..
اما رفقه ضحكت بعدين مشت بدير اللي قالتلها عليه امها..
🌴🌴🌴🌴
بعد بدلت وصلت..وتغدت..وغسلت اماعينها..
مشت لأمها فالصاله..
لقتها مقعمزة قدام التلفزيون..
قعمزت حداها وقالت:فشن تبيني ماما..
نقصت سعيده صوت التلفزيون بعدين شبحتلها وقالت:جايك موضوع..
ارتسمت ع وجه رزان ملامح الضيق ..غيرت عيونها للتلفزيون وماردتش..
سعيده:ناس كويسين وعيله باهيه وولدهم متخرج وبيطلع بعثه لتركيا..
رزان مازالت بنفس وضعيتها ومابتش تقول كلمه..
سعيده:قال نخليها تقرا معاي برا..مادياتهم متريحه وماناقصهم شي..
مازال رزان ساكته..
سعيده:خلاص معناها السكوت علامة الرضا..
شبحت لأمها بتفنيصه وهي تقول:ماما!!
سعيده بحده :لا ماما لابابا..كان مزال هداك الموال فراسك حوليه منه وانسي مستحيل نعطيك لواحد دار فيك الويل ووصلك للموت..
قلبها وجعها هلبه من كلام امها...ردت بشي من العصبيه :مافيش مواويل فراسي..مافي شي..وكانك ع الموضوع هدى عندي علم بيه..هدت شويه وهي تقول..عطوني وقت نفكر..
سعيده برفعة حواجب قالت تهكما:ايه كيف الوقت اللي عطاهلك السرتاوي!؟..
رزان بإنزعاج:خلاص ماما بالله عليك اللي فات معاد تتكلمي عليه تربحي..اني قت بنفكر يعني بنفكر..وناضت وقفت وهي تقول..خل بنعدي نوتي روحي لحفلة هيفا جمل..
ولفت ومشت وهي تقول..صبي وتي روحك حتى انتي..
سعيده غمضت عيونها وفتحتهم بنفاذ صبر بعدين قالت:فكري يارزان فكري..اخرتك بتقولي باهي تبي ولا ماتبي..
🍁🍁🍁🍁
طلعت بصفرة الغدي لبوها..
وصلت للمربوعه الخارجيه..
خشت ..
لقت بوها مقعمز ويشبح فالفراغ ويبان سرحان ومهموم..
هي عارفه اللي فيه..
تنهدت بضيق بعدين قدمتله وهي تقول:بابا..بابا..
وصلت فيه حطت صفرة الغدي وعلت صوتها وهي تقول:باابا..
هو استاقض من سرحانه شبحلها ..
هي قالتله:الغدي..
نزل عيونه للصفرة بعدين هز راسه بإيجاب..
قرب الصفرة ليه..
وهي لفت ومشت بتطلع
مجرد وصلت الباب..
"حدود"..
التفتت..
حسن بضيق:تعالي ارفعي..
حدهم بإستغراب:علاش بابا؟.
حسن وهو يتمدد ع فراش:مانيتيش
عطي بالظهر ورقد
هي شبحتله بنظرة الم..بعدين مشت للصفره طبست خدتها ومشت للباب وطلعت ودموعها عبوا عيونها
🍁🍁🍁🍁
الساعه 7:30مساءا..
علق بالطوه فالدولاب وهو يتكلم بالتليفون ويقول..
توفيق:مانبي نشوفله شبح وجه..
أريج بضيق:عيب ياتوفيق يجيك لمكان عملك وماتطلعلاش مهما كان هدا ولد عمتك..
مشي قعمز ع السرير وهو يقول:واللي داره هو مش عيب!؟
اريج:عيب وغلط والباين هو يبي يصلحه مهما كان تقعدوا اقارب يا توفيق..بوك خو امه..
توفيق:اني ماعندي مشكله مع عمتي ولاباقي خوته مشكلتي معاه هو بروحه بس..
اريج :باهي لأمتى بتقعدوا هكي..
توفيق:ليوم القيامه..
اريج:نهاري!!توفيق طلع قلبك اسود..
توفيق مد رجليه ع السرير وهو يقول:قلبي اسود مع اللي قلبه اسود..اما انت يالحب..يالغلا..يالحلا قلبي معاك ديما ابيض فالأحمر..
شدت ضحكتها اريج وهي فقمة الخجل..
توفيق بضحكه:تحشمتي يالقلب..
اريج بضحكه:خلاص توفيق عاد زودتها راك..
توفيق:هههههههه..💕
🍁🍁🍁🍁
الساعه 8:30مساءا..
فعرس الجيران..
كانت الاجواء حلوة..
والعروسه طالعه قنينه...صح هادي المرة التانيه اللي تتزوج فيها بس كانت تبان فرحانه..
لأنها حاسه ان التجربه هادي حتكون ناجحه وانها اختارت صح؟
او لأنها هربت من وضع صعب عايشه فيه مع عيلتها..وهاربه كذلك من كلام الناس؟!
الله أعلم شن هي اسبابها..
بس حميده وهي تشوفلها قعدت تفكر وتسأل فنفسها هل ياترى مازال مكتوبلها تعاود الكرة وتتزوج تاني؟!..
اضايقت لمجرد تفكيرها فحاجه زي هادي..
حست انها ماتبيش..ومعاش تبي..🍃
عكسها البارقه..
كانت تبي وتتمنى بس مع شخص مناسب يكون ليها العوض الجميل وينسيها مرار التجربه السابقه..
وعيون حدهم تراقب فيها..
حدهم"عندك حق بابا يصير فيه هكي ع خاطرها "ابتسمت بعدين ناضت من مكانها ومشت قعمزت حداها..
قربت منها وقالت :ابله بارقه..
بارقه شبحلها بإبتسامه:حدود!اهلا..
حدهم ابتسمت وقالت:حلوة حفلتها..
شبحت البارقه للعروسه وقالت :ايه..
حدهم:الفال ليك..
شبحتلها وقالت بإبتسامه:تسلمي..والفال ليك حتى انتي نفرحوا بيك..
حدهم:تسلمي..
سكتت حدهم وهي تشوف للبارقه كيف تهدرز مع اللي حداها وتصفق مرة مرة مع اغاني المنظومه..
خدت نفس بعدين قالت:ابله بارقه...
شبحتلها وقالت:نعم حبيبتي..
حدهم:عندك علم ان بابا قبل دخلني واسطه بينه وبين ابله فضيله..
ابتسمت البارقه..
حدهم:باهي عندك علم اني مابيتش نساعده لأني كنت خايفه عليها منه ونقول لروحي بابا مستحيل تعيش معاه مرتاحه..
البارقه رفعت حواجبها..
حدهم:لكن هدا كان زمان..توا بابا تغير هلبه..هلبه حاجات فيه تغيرت وولى احسن من قبل...
هزت البارقه راسها بإيجاب ورجعت شافت للعروسه..
حدهم شدت يدها وقالت:والله العظيم تغير هلبه وبروا اسألوا عليه..صدقيني لو كان ماينفعش بيك والله ماخشيت فيه موضوعه..وراهو والله المرة هادي ماطلب مني ندخل بكل..اني كلمتك مني ليا..
شبحتلها شويه بعدين قالت:سامحيني حبيبتي اني مانبيش وصكرته الموضوع هدى خلاص..وان شاء الله ربي يبعت لسيدك اللي خير مني بمليون مرة..ابتسمتلها مجامله بعدين التفتت للمراة اللي فجنبها وقعدت تهدرز هيا وياها..
اما حدهم اضايقت منها هلبه..ناضت من حداها ومشت ولت لمكانها...
🍁فمكان تاني فالخيمه..
كانت العين ع كناين عيت رمضان..
بالذات مرام وبلقيس ..
بلقيس اللي كانت لابسه قفطان كبير وطالعه فيه قمة فالجمال..
ومرام بقفطان راقي وحلو ويبان من برا...
تميزهم مش بس بمظهرهم الخارجي..حتى الأبتسامه اللي مافارقتش الوجه والروح الحلوة والتواضع زادوهم تميز..
🖤عكس اللي كانوا قالبين وجوههم من اول ماخشوا ولو ابتسموا إبتسامتهم صفرا...
طبعا الكلام ع لمياء وسناء...
🍃وياقداش مليانه حياتنا بأمثال لمياء وسميه🍃
🍁جو اهل العريس وروحوا بالعروس..
وبهكي يكون العرس تم..
فهديكا الليله هانيبال روح بمرته وولده ع حوش اهله بيباتوا غادي بإعتبار ان اليوم التاني الجمعه الغدي فحوش اهله..
🍁🍁🍁🍁
بعد بدلوا ومسحوا مكياجهم..
وصلوا اللي فاتهم..
دارو سهرية ...
مع صفيرة قهوة وحلويات والهدرزة كلها كانت ع العرس وشن صار فيه..
"ههههههههههههههه"..
حميده بضحكه:عطيك الخير يابلقيس..
مرام بضحكه:تخطر عليك حاجات!!
بلقيس:هههههههه..
ولمياء تبتسم بتصنع..
غاليه بعد هدت ضحك قالت:جعانه جعانه..
مرام:حتى اني..
بلقيس:هدى الشتي مايبي كان الماكله..
حميده:عاد انتن التلاته حوامل من غير شي جعانات..
ضحكوا مرام وبلقيس..
غاليه ناضت وهي مبتسمه قالت؛خل نعدي ندير حاجه..
بلقيس جت بتنوض..
شدتها حميده وقالت:والله ماكن متحركاتها..
ناضت حميده وهي تشبح لغاليه قالت؛هيا..
غاليه؛هيا..
ومشوا الزوز طلعوا مع بعض..
وقعدوا السلفات التلاته برواحهم..
بلقيس ومرام يهدرزوا عادي مع لمياء لكن هي كانت جابده روحها منهم...
🍁فالكوجينه..
غاليه بهمس:قالبه زومتها اليوم كله..
حميده:غير هي؟!حتى هديك مرت خوك هداك..ريتيها كيف مستكردة امي لاامس ولااليوم سلمت عليها..
غاليه:هديك خليها بروحها قديش واكله ع كبدي وشاربه..
حميده:الحقيرة..
سكتوا لما سمعوا صوت المطر وهي تصب من صوتها تبان امطار متوسطه..
ابتسموا الزوز..
لما شافوا رزان خاطمه تجري من قدام الروشن..
شبحوا الزوز للباب..
لحظات وخشت..
نزلت برنوس التوته وهي تضحك قالت:يهبل الجو برا..
غاليه بإبتسامه :إيه..
وزعت نظرها رزان عليهم..
لقت حميده تخلط فالمفروم الني..
وغاليه تقرض فالبطاطا..
رزان:شن بديروا..
حميده وهي تخلط قالت:جوع عقاب الليل خلانا نوضوا نديروا كباب فهالوقت..
رزان:الله !!...
غاليه:اقعدي اسهري معانا..
رزان بشي من الضيق:مرة تانيه..اني جيت توا نبي ناخد منك الخلطه متاع الرز اللي درتيه اخر مرة..
غاليه: بعد غدوة عزومة البنات..
رزان:ايه...
غاليه:باهي..هوينا تليفوني ع السكريه..
مشتله رزان بتاخده..
حميده:من عازمه اوكل؟..
رزان وهي تشوف فالتليفون:تغريد وزوز بنات كانن يقرن معاي ايام الثانوي وبلقيس معاهم وحدهم..
حميده:اكيد يعزمنك هن بعدين..
رزان:اكيد..
"غال..يه"
عماتها الزوز التفتوا وشبحولها..
هي سيبت التليفون طول وهي تقول:تو نجي ناخدهن منك غدوة.
وكيف جت بتمشي..
هو خش وصكر الباب..
خالاته انصدموا..
وهي انخلعت..
هو :ارجوك ارجوك..خليك شويه بس اسمعيني شويه بس..
وهي منزله عيونها لوطا تقول:مانبي نسمع شي..مانبي..
ومشت بتطلع وقف قدامها وشد يدها..
هي رعشت وجت بتجبد يدها هو قعد شادها دموعها نزلوا وهي تقول:حولوه من قدامي حولوه بنطلع..
خالاته اللي كانوا يشوفولهم وهما مصدومات فيه هو تحديدا..
جاته وحده منهم وقفت بينه وبينها وحولت يدها من يده وهي تقول:عماد خيرك هبلت!؟.
عماد:هبلت ايه هبلت..شبح لرزان وقال..رزان حرام عليك اللي ديري فيه فيا ..
رزان بعصبيه ودموعها ينزلوا:خلاص معاش في شي بيني وبينك خلاص معاد نبيك..فهموه ياناس قولوله اني معاد نبيه معاد نبيه..
عماد ودموعه فعيونه قال بصوت غاضب:كذابه..
جتها حميده وخدتها معاها وهي تقول:تعالي اطلعي تعالي..
هو قعد يشوفلها ويقول:رزان بالله عليك ماديريش فيا هكي..
فتحت حميده الباب وطلعتها..
هي طول مشت تجري وهي حاطه يدها ع صدرها ودموعها سيل ..وصلت في الحوش..
خشت وصكرت الباب..
ومنه طول لداره..
خشتها وصكرت عليها الباب وقعدت شداته بإيديها وهي تبكي بعبره مكتومه..وقلبها موجوع موجوع موجوع ويتألم لأبعد حد..
💔عنده هو..
بعد حميده طلعتها وصكرت الباب التفتت وقالت:عماد خير بلاك شن جاك..
رد بصوت غالبه عليه البحه:خيرني !؟تسألي خيرني..من مش عارف خيرني ياخالتي مني بالله ...كلكم عارفين..
غاليه قعدت تشوفله بألم وغصب عنها دموعها نزلوا..
عماد:مش قادر نعيش من غيرها..مش متحمل نكمل حياتي وهي مش معاي..معاش نبيها بعيده عليا..عامين عشت فيهم فجحيم..فجهنم حمرا فنار ماحد عالم بيا كان ربي...حياتي ماتنطاقش من غيرها ياناس باش تبوني نشرحلكم بش تفهموني وتعرفوا خيرني...باش!!؟..
مشي طول طلع من حداهم هارب لأن دموعه خلاص كانوا حينزلوا..
مجرد طلع من فم البوابه نزلوا..
قعد يمشي ويمشي وهو يبلع فريقه المر ويبلع فعبرة البكي..
عجز تام..
مش عارف كيف بيدير مش عارف..مافيش عقده من عقد همه معاها انفكت..لا كل مالها تزيد تتعقد اكثر واكثر..
🍁فهالوقت..
كانت مرام واقفه فروشن الدار وتشوفله..
ودموعها تنزل..
سمعت كلامه لما كانت ماشيه للكوجينه بتغسل مرضعة ولدها..
اللي يتكلم حد عاشق بكل معنى الكلمه ..يتكلم من وسط قلبه من داخل..
مرام بنبرة باكيه:اول مرة فحياتي نشوف راجل يحب هكي..
تنهدت بألم بعدين صكرت الروشن وقعمزت فمكانها وهي تفكر فاللي راته وسمعاته..
🍁فالكوجينه..
حميده بإندهاش:لهالدرجه!
غاليه بدموع:مال شن تحسابي ياحميده..ايام كنتي تقوليلها يضحك عليك ويكذب وراك تصدقيه كانت مسكينه برغم انها تحبه لكن تصدق فكلامك وماتقدر تحط فيه الثقه وهو ياناري مش عارف شن يدير بش يرضيها ويخليها تأمنله من كثر مايحبها حب عمري ماريت كيفه...
نزلوا دموع حميده..
غاليه مسحت دموعها وهي ترشف وتقول:الله يسامحكم انتم اللي وصلتوهم لهنى..والله لايسامح من خش بيناتهم بنيه سودا وزاد فرقهم عن بعض.
مشت غاليه وطلعت من الكوجينه..وخلت حميده مع عذاب الضمير..
🍁هديكا الليله..
ماصارش منه عشاهم..
اللي هادي حبست روحها فدار..
اما السلفات رقدوا التلاته فدار وحده..
وبلقيس ولمياء مش فاهمات شن صار..
لمياء فضولها كان بيقتلها تبي تعرف..
اما بلقيس فكانت متوترة وخايفه تبي تعرف شن صار بش ترتاح..
ومرام ماقدرت تدوي بشي ...
🍁🍁🍁🍁
تاني يوم..
الساعه 11:30 صباحا..
كانت الحاجه فاطمه المخزن...
ترحي فحبوب الشعير فالرحى وتغني فالبوطويل..
عادة عندهم من زمان..وين يقعمزوا ع الرحى يغنوا فالبوطويل.
هو كان جايها..
من لما قرب من المخزن وهو يسمع فصوت غناها..
ابتسم..
وصل في الباب..
وقف قدامه وهو شاد طاسه فيها مغلي الزعتر يشرب فيه ع خاطر الزكمه اللي جاته من امس..
قعد يسمع فيها ويشوف وهو مبتسم...
شوي وقفت غني وقالت...
الحاجه فاطمه:شن عندك ياكبدي قول...
ابتسم وقال:حناي...معاد ليا حد من بعد ربي كان انتي.
ضحكت وقالت وهي ترحي فحبوب الشعير:مادارت فيك هالملعكه..
ضحك عماد بإحراج..
فاطمه:كبدك فجرتها انسحنت كيف هالحبوب هدين..
نزل عيونه وقعد ساكت..
فاطمه:لكن حتى انت تستاهل...
شبحلها وكذلك قعد ساكت..
شبحتله وقالت:ياودي باهي...
ابتسم وقال:نحبك طومتي 💓💓💓
فاطمه ضحكت وهي ماطة شواربها بتهكم:عقاب عمري دخلتوني في الحاجات هدي..
ضحك عماد وقال:بركتنا انت ياسمح راهو..
ضحكت وحركت راسها ايمين ويسار وبعدين بدت تغني في البوطويل
🍁🍁🍁🍁
فنفس الوقت
فحوش ميلاد..
خشت رزان للصاله وفيدها صفرة فيها فطور
"غير ليش هدى كله والله فطرت قبل نجيك"
حطت رزان الصفرة وهي مبتسمه قالت:افطري مرة تانيه عادي..
ضحكت مرام..
رزان:كان قتي بتجي رانا درنالك حاجه من قيمتك..
مرام بإبتسامه:كبر قيمتك حبيبتي..اللي درتيه فوق القدر بزايد
رزان ابتسمت وقالت:لا والله مافي حاجه من قيمتك..
ضحكت مرام وقالت:ربي يحفظك رزونه..
رزان:تسلمي..تفضلي
مرام: يزيد فضلك..وبدت تاكل مجامله
ورزان تساير فيها ومرة مرة تشوف لعمار وهو راقد فقعمازه وتبتسم
شويه..
ومرام بعد شربت من طاسه العصير قالت:رزونه..
رزان شبحتلها وقالت:نعم..
مرام بأبتسامه:لاحظت امس في الحفله مواضيع واجد جنك..
ابتسمت رزان بخجل..
مرام:انتي شن تبي؟تتزوجي تو ولابعد تتخرجي..
رزان نزلت عيونها للصفره وقالت؛مش عارفه..
مرام:لا رزان لازم تعرفي..لازم تعرفي شن تبي ولازم اديري اللي انتي تبيه من قلبك..ماتخلي ولا مؤثر خارجي يتحكم فقرارتك بالذات القرارات المصيريه يارزان..
رزان هزت راسها بإيجاب وتبان ع وجهها ملامح الضيق..
مرام شبحتلها شويه بعدين قالت؛رزان..مش حتلقي راجل يحبك كيف عماد..
قامت عيونها فيها..
مرام:ايه تمام معاك دار حاجات تقهر..لكن وين تجي تفكري فالسبب مش حتلقي غيره انه يحبك وبس..لأنه يحبك دار هكي..ماتسأليش وتقولي اللي يحب يقهر اللي يحبه..لأن الإجابه عندك يارزان..
خدت رزان نفس بعدين قالت:اني تعبت معاه واجد ماتريحتش..وبعد اللي داره مش غير فيا اني بس حتى هلي معاد قادرة نتقبله ولا نحط فيه ثقه..اللي داره قبل اكيد حيعاود يديره بعدين
مرام:هو غلط واكيد معترف بغلطه ونادم عليه وتعلم منه..
رزان:كله تخمينات بس..واني مانقدرش ناخد قرار بناءا ع تخمين يامرت عمي..مانبيش ندير خطوه اني خايفه من عواقبها..مانبيش نتحدى هلي ع خاطره وبعدين يدير شي يخذلني بيه ويخليني منكسفه قدام هلي بعدين..
مرام مالقتش بشن ترد غيرت عيونها لولدها وقعدت ساكته..
رزان: توا عماد بالنسبه لياماضي نبي ننساه وبس
مرام شبحتلها..وركزت فعيونها..
اللي يقول فيه الفم..
عكس اللي يقولوا فيه العيون..
تنهدت..بعدين ابتسمت وقالت:ربي يعطيك اللي فبالك ويوفقك..
ابتسمت رزان بألم وقالت:اجمعين يارب...هي كملي فطورك..
مرام هزت راسها بإيجاب وقعدت تاكل بمجامله..
🍁🍁🍁🍁
بعد العصر
هانيبال رفع مرته لحوش اهلها بتبات غادي
ومحمد كذلك رفع بلقيس لحوش اهلها بتبات حتى هي
اما لمياء جي عمر روح بيها واليوم التاني ناوي يرفعها لحوش اهلها ..
🍁🍁🍁🍁
"سعيده"
فالصاله..
رزان:هدي حناي..
سعيده ناضت ومشت طلعت من الصاله ورزان وراها..
وصلوا فيها
سعيده:مرحبتين ديداي..خشي خشي..
خشت الحاجه فاطمه وهي تحول فبلغتها..
رزان؛شنو حالك حنينه اليوم..
فاطمه:الحمد لله بنيتي مابياش..
سعيده:تفضلي عمتي..خشي..
فاطمه مشت وهي تقول:يزيد فضلك يابنتي..
وهما مشوا معاها للصاله..
🍁🍁🍁🍁
هاكي خالتي اهو درتلك صفحه..
خدت حميده التليفون من رباب وهي مبتسمه بحماس..
غاليه بضحكه:يضحك اسمك..اميرة الوادي..
حميده برفعة حاجب:مازال خير من اسمك بمليون مرة السلطانه هويام!!..
ضحكت رباب..
غاليه:عدي عدي..يهببل الإسم ومميز..
حميده وهي ترقص فحواجبها:واني مميزين..
رباب:ايوه انت يامميزين..
ضحكوا..
حميده بضحكه:نبي ندير صورة معتبره..
غاليه:شن رايك يامعتبره انتي اديري صورة كاريس بشار فيك منها واجد..
رباب :والله حق خالتي..
حميده برفعة حواجب:زعمه!؟..
غاليه:من زمان نقولك فيها..
ابتسمت حميده وقالت :خلاص كاريس كاريس..
🍁🍁🍁🍁
واقفه وهي شاده بنتها..
وقدامها بوها مقعمز وخوتها الولاد..
واقفه جنبها مرت خوها وهي تبكي بالعبرة..
ومن بعيد شوي امها ع الكروسه..واقفه حداها مرت خوها التانيه..
بوها قال بحده:تكلمي ياحليمه حق اللي قالاته مرات خوك انور؟..
حليمة برفعة حاجب؛اكيد لا...
شبحتلها اميره بصدمه..
حليمه:هي بلعاني حطتها فراسي تحساب روحها بتنجى كان لصقتها فيا..
اميرة بصدمه:حليمه شن تقولي.!!؟..
حليمه :اهي احلام عندكم وانشدوها..
شبحوا لأحلام..
احلام كانت هاربه بعيونها عن اميره..ومتوتره ع الآخر..
حليمه:مش انتي قتيلي ان اميره تعدي للسحارات بش دير سحر لأنور وتخليه يقول السلام سلامها والكلام كلامها..
اميره قعدت تشبح لأحلام وهي تبلع فريقها ودموعها يقطروا من وجهها وتراجي فالرد..
احلام نزلت عيونها وقالت:ايه صح..
خبطت اميره بيدها ع فمها..
وراجلها يشوفلها بغل..
بو حليمه قال:وليش ماخبرتي عنها..
احلام بإرتباك:اني...حاولت ننصحها..ولما قلتلها راهو بنخبر حليمه هددتني قات والله نسحرك انتي بعدين..خفت منها واجد..
اميره بعياط:كذاااابه..كذاااابه..والله كذااابه..
حليمه شدتها من ذراعها بقوة وقعدت تشبحلها بنظره تخوف:انتي الكذابه ياكذابه يامفتريه..
ولوحت يدها..
اميره تبكي بالعبره وهي تقول؛والله العظيم ماهكي والله ماهكي..
شبحت لراجلها وهي تقول:وحق ربي ياأنور ماهكي..
انور ناض وقدملها جبدها من يدها بقوة وقعد يكر فيها وهي تقول...والله ماهكي..
بو حليمه:طلقها الكلبه هدي وقول لهلها كل شي..
انور:مش قبل ماتاكل الطريحه..
اميره:لاااا..لااااااا ياحليمه قولي الحق ياحليمه..
وبدي صوتها يبعد شوي شوي..
حليمه؛حق شني يا كلبة غير اللي عرفناه..مسخه..سحاره..
شبحت لأحلام..
احلام نزلت عيونها ومازالت ترعش..
غيرت عيونها لناجي وقالت:رد بالك منها حتى هدي راهي مش خير منها.
ناجي شبح لأحلام وقال بنبرة تهديد؛نقص راسها بعدين..
زادت احلام رعشت..
وحليمه تشوفلها..
ناض بو حليمه وقال:حاجه كيف هدي تتعاود مرة تانيه ندير شي عمركم ماريتوه ومازال حد يوصل
فحليمه بكلمه نقص لسانه..
حليمه:ربي يطول فعمرك ياسيدي..
هو هز راسه بإيجاب بعدين مشي...
وناجي ناض ومشي وراه..
مشت حليمه قعمزت ع المندار وحطت بنتها لوطا تلعب وهي تقول:ديريلي قهوة..
احلام طول مشت بسرعه ادير اللي قالت عليه حليمه..
فجأة قعدوا يسمعوا فصوت عياط اميره..
حليمه:تستاهل الحقيره..
قامت عيونها جو فعيون امها..
اللي كانت تشوفلها بنظره كلها ازدراء..
حليمه غيرتهم عنها وخدت تليفونها وقعدت تبربش فيه ولاكأنه صايرة حاجه..
🍃اميره قعدت تبتز فحليمه وتطلب منها فحاجات فوق الحدود..ولأن حليمه معاش تحملتها..قررت اديرلها لعبه دنيئة..
فاليوم اللي تمشي فيه اميره للسحاره بش تجدد حليمه السحر للصديق..
بعتت لخوها رساله من رقم تاني تقوله فيها..
(عدي شوف مرتك ف****** شن دير)..
وهو ماكذبش خبر طول مشي للعنوان..
ولما سال الناس اللي يسكنوا غادي عن صاحب العنوان قالوله انه حوش وحده سحارة..
قعد قدامه لين طلعت منه اميرة عرفها من عبايتها..
طول نزللها وجبدها..
وركبها السياره معاه..
وهو يهزب ويسب ويشتم..
وهي من خوفها طول هرت اللي هناك..
وخوها بعد وصل للحوش اتصل باخته وطلب منها تجي بسرعه..
وحليمه كانت حاسبه حساب كل شي..واتفقت قبلها مع احلام ع كلام تقوله وهددتها بإنها حتفضحها وتقول اللي شادته عليها كانت مادارتش كيف ماقالتلها..
واحلام من خوفها الشديد وافقت لأن اللي مدايراته فيه قطع رقبه...
احلام تخون فراجلها ومصاحبه واحد من صحابه..وحليمه عرفت من الصديق...لان صاحب ناجي يكون صاحبه وشده مرة وهو ماشي لحوش اهل حليمه كان مدرس من الخلف وخش داخل وهو منقز من الصور..
والصديق لحقه..
وركب السور وري الكارثه..
وطول مشي عاود لمرته..
ولأن حليمه شيطانه همها كله مصلحتها مااهتمتش لكرامة خوها قد مااهتمت لفايده هالمعلومه وكيف لما تشدها ع احلام حتخليها خاتم فصبعها ماتطلعش عن طوعها وشن ماطلبت منها ادير...نبهت ع الصديق مايقول شي..والصديق معروف وضعه شن ماتقوله حليمه يدير بإرداته ودون ارادته🍃
🍁🍁🍁🍁
سامحيني ديداي راس بنيه راهي مش مهبوله بش نرضى ياخدها..
فاطمه:حرام عليك ياسعيده عماد راهو راجل باهي..نسيتي اللي داره معاكم قبل.. قرنت حواجبها وقالت.. نستيه شكلك!!؟؟.
سعيده:هداك شي وهدى شي ياديداي..
تنهدت فاطمه بعدين قالت:باهي صاحبة الشان شن تقول؟..
سعيده شبحت لبنتها..
رزان بملامح حده حاولت تخفي بيهم وجع قلبها:اني ياحناي بو سيدي وامي وخوتي يقولوا باهي حنقول لا..خلاص ياحناي..راني صكرته موضوع عماد ومعاد نبيه ينفتح..قولوله يعدي فحاله بالله عليكم..
فاطمه حست ان رزان فعلا ولت رافضه عماد..
مابتش تزيد تناقشها اكثر من هكي..
فاطمه رفعت حواجبها وقالت بعد تنهدت:ع راحتك يابنيتي..دام انتي هكي تبي خلاص ..
وناضت وهي تقول..يارب البيت استر ماريت..
سعيده ناضت وهي تقول:اقعدي تعشي معانا..
فاطمه:فالفرح يابنتي فالفرح ان شاء الله..
ولفت ومشت...وسعيده معاها تسقد فيها..
اما رزان بعد مشت جداها..
اطلق سراح دموعها ..ومن داخل قلبها قاعد يتقطع..
🍁🍁🍁🍁
فدار الحاجه فاطمه..
خلاص وليدي الموضوع هدى سكره وانساه راهي البنت بروحها ماتبي مش غير امها ياعماد..
وهو قعد يشوف للفراغ بحزن وصدمه..
مادام حتى حناه قالت هالكلام معناها فعلا رزان طوت صفحته..
ناض من حداها وماقالش اخطى من كلمة وحده بصوت مخنوق..
"صحيتي حناي"..
ومشي طلع...وحناه معاه بعيونها..
تنهدت بعد طلع وقالت:يفرج الله وخلاص..
هو بعد طلع من الدار..
طلع من الحوش كله من الباب القدامي..
قام تليفونه واتصل بخاله محمد يستأذن منه يركب فوق السطح..
ومحمد سمحله بما ان بلقيس مش موجوده...
ركب عماد فوق...
ورجليه بالسيف حاملينه...
وصل فوق...وقدم للسياج..ووقف..
وقعد يتفرج ع منظر البلاد وهي ضاويه هديكا الليله..
بس هو من داخله كان مطفي..
قلبه ظلم...لما بدي يفقد امله في ان بنته حترجعله...
مصكرة من جميع الجهات..
من ناحيتها هي بالذات...
وهالشي خلا الدنيا بكل معنى الكلمه..
ظلمت فعيون عماد...
🍁🍁🍁🍁
الساعه 12:00ليلا
هديكا الليله كانت باردة جدا...
الصقع فيها ينخر العظم نخر..
ركب محمد يجري لشقته من كثر ماكان صقعان ويبي يخش حوشه يدفا ويرقد..
كيف وصل فوق..
شبح ايساره...
وقف مصدوم..
لقي عماد مقعمزة ع بلوكه ضام نفسه بقوة ويرجف مع بعضه..
محمد:عماااد!!...
قدمله جري...وهو يقول:صبي معاي صبي..
ناض معاه بالسيف وهو مازال يرجف..وسنونه يصطكوا..
مشي بيه محمد وهو يقول:معقول قاعد هالوقت كله فوق..
حط يده ع جبهته حولها طول وقال:نهارك احرف..والعه فيك النار انت!!
فتح باب شقته ودخله داخل..
قعد يمشي هو وياه لين وصل بيه للكنبه اللي فوسط الحوش..
حوله كبوطه...والفانيليا متاعه..
قعمز عماد ع الكنبه بعدين طاح عليها راقد وهو مازال يرعش
محمد مصدوم لين خلاص
اول مرة يشوف عماد بهالحاله..
من خوفه اتصل بغاليه طول..
لوطا..
قول والله!..
توفيق بضحكه:اقسم بالله..قالوا ع خاطر سلوكه وسمعته الكويسه قرروا يقدموله الطلعه هو
ومجموعه اخرى لنهار 14\2..
غاليه ضحكت بفرح وعيونها دمعوا..من الفرحه لسانها انعقد..
الهادي بإبتسامه فرح؛سيدك وامك يعلموا؟..
توفيق: لا..اول ماسمعت جيت لغاليه طول نبشرها..
حطت غاليه يدها ع خد توفيق وقالت:بشرك بالخير ياغالي انت..
ابتسم توفيق..
شوي رن تليفون غاليه..
مسحت دموعها ومشت لمكان التليفون خداته شافت المتصل محمد..
فتحت الخط وقالت:هاه محمد.......تبدلت ابتسامتها لملامح الخوف وقالت..خيره!!؟؟..
خافوا توفيق والهادي..
غاليه:جايه جايه.....صكرت ع محمدوقالت..عماد..
وطلعت بسرعه من الكوجينه..
وهما وراها..
الهادي:غير شنو في..
غاليه:محمد قالي عماد مريض واجد..
وصلوا الدروج وركبوا..
وتوفيق معاهم ..
خاف ع ولد عمته..
وصلوا فوق...وللشقه طول..
خشوا لأن بابها كان مفتوح..
الهادي:محمد..
محمد؛هنى هنى..
تبعوا الصوت..وين وصلوا فيه...
انصدموا بمنظر عماد..
ومحمد انصدم لما شاف توفيق..
بالذات وان عماد..كان خاش حالة حمى..
ويهتري..
"رزان"..
غاليه لما حطت يدها ع جبهته بتشوف حرارته سمعاته شن قال..
مش هي بس..
حتى الهادي...
وتوفيق!!
شبحوله محمد والهادي...
لقوا وجهه متغير وملامح الصدمه ممزوجه بالغضب مرسومات عليه..
طول لف ومشي طلع من الشقه..
الهادي بضيق:لاحول ولاقوة الا بالله..
غاليه بعيون مليانه دموع:تو نعرف شن نديرله...شبحت لخوتها وقالت...خليكم حداه..
وبعدها مشت طول من حداهم..
وهما الزوز قعدوا يشوفوا لعماد وهو فحالة يرثى لها..
يهتري بإسمها هي بس..
"رزان...رزان💓"..
لوطا..
غاليه لما وصلت لوطا مشت للدار..
وطلعت من الدولاب شيشة سبيرتوا..
خدتها وطلعت للكوجينه..
لما وصلت للكوجينه...خشت حطت الشيشه ع الرخامه..
بعدين خدت صونيه صبت فيها ميه..
حطتها عالرخامه..
بعدين مشت للدولاب بطلع منه شيشة الخل..
فهالوقت..
رزان كانت خاشه من فم البوابه...
خشت للكوجينه...
لقت غاليه واقفه ع اللاوندينو..
رزان:عمتي فكرت غدوة فعزومه البنات ندير عصير فروالة طبيعي شن رايك؟
غاليه وهي تصب في الخل في صونيه فيها ميه قالت بنبرة حزينه:حلو..
رزان شبحتلها شن دير وقالت:في حد مريض..
غاليه:عماد..
حطت يدها ع صدرها :خيره؟!
شبحتلها غاليه :فشن يهمك ياحنه انتي يمرض ولايموت عليك قلب عندك ..دموعها نزلوا...يهتري بإسمك من الحرارة فوق والله حتى خواله مصدومين فيه كيف عماد اللي كيف الجبل ينهد هكي..
رزان بدموع:عمتي كإنك نسيتي..
غاليه مسحت دموعها وقالت :لا مانسيت..بس خلاص عاد انتم انسوا ...ياسركم ياسر..
رزان ماقدرتش تشد دموعها مجرد نزلوا..
مشت طلعت هاربه بيهم..
وغاليه حتى هي دموعها ع خدودها..
خدت الصونيه وحطتها فصفره..ومعها شيشة السبيرتوا وفوطه نظيفه وطلعت بيهم من الكوجينه..
🍁برا..
توفيق كان معصب ع الآخر..بس فنفس الوقت وجعه عماد هلبه..
قعد من داخل عايش صراع..غيرة الأخ ع اخته...
والتعاطف مع شخص شافه فحاله صعبه بسبب حبه لبنيه..
ومش اي شخص..
راجل بمواصفات عماد حتى ساحه الحرب خشلها بدون تردد وواجه الموت..ومتحمل مسؤوليات كبيرة فحياته..
راجل زي الجبل كيف ماوصفاته خالته..
فهديكا اللحظه اللي وصله توفيق فعلا ان عماد يحب اخته حب ماصارش..وممكن رزان فحياتها ماحتلقى راجل يحبها هكي..
🍁نزل من سيارته..
وتوجه لحوشهم...
خش وصكر الباب..
بعدين مشي لداره..
بس قبل يخش عيونه جو ع دار اخته..قعد يشبحلها شويه..
بعدين خش لداره..
🍁🍁🍁🍁
سهرت غاليه مع محمد وهما يعانوا فعماد..
قعدوا للساعه 4بش بدت تنزل حرارته بعد دارتله غاليه اللازم..
من كمدات وادويه..
ولما صحصح شويه محمد نوضه ودخله الحمام بش يدوش بميه مصقعه تساعد فإنخفاض درجة حرارته..وعطاه دبش من عنده يلبسه...
غاليه نزلت بعدخش عماد للحمام ..
ووصت محمد عليه..
🍁بعد طلع من الحمام طول مشي مع خاله للكنبه..
تمددت عليه ورقد بدون مايقول حرف..
ومحمد فرش حداه وقعد ساهر...
🍁🍁🍁🍁
تاني يوم..
الساعه 9:00صباحا..
فاق محمد مخلوع...
ناض قعمز شاف للكنبه..
مالقاش عماد..ولقي الحوايج اللي عطاهمله محطوطات عليها..
ناض وقف خدي تليفونه من ع الطاوله..
كيف جاي بيتصل لقي رساله ..
فتحها..
(خالي اني روحت..حالي باهي ماتنشغلوش عليا وسامحوني فتعبكم)..
نزل محمد تليفونه ومشي طول لباب الشقه فتحه وطلع..
شاف من فوق للمكان المدرسه فيه سيارة عماد لقاه فاضي.
ضم شواربه لداخل بأسف..
بعدين لف ومشي لشقته..
🍁🍁🍁🍁
مع الساعه 5:00العصر..
كانوا صاحبات رزان عندها ومعاهم بلقيس رزان..
العزومه رزان صاحبتها صح..
بس كانت فيها ومش فيها..
وبلقيس وحدهم كانوا يحاولوا يغيرولها جوها بهدرزتهم مع البنات..
هي مرة تسايرفيهم ومرة تسرح بعيد وماتندريش عليهم شن يقولوا..
ومشت العزومه كيف مامشت..
بعد روحوا..
رزان طول خشت دارها وصكرت ع روحها..
🍁🍁🍁🍁
تاني يوم..
الساعه 10:30 صباحا..
بالقرب من كافتيريا كلية الهندسه...
صغارك حالهم باهي؟..
دلال:الحمد لله...احمم..شن هو الموضوع اللي تبي تكلمني فيه..
تنهد بعدين قال :دلال نبيك تسمعي كلامي وتوعديني انك ماتفهميش كلامي غلط..
هي قرنت حواجبها وقالت:نحاول..
هو ابتسم وغمض عيونه بعدين فتحهم وقال:تمام....بدل ملامح وجهه للجديه وهو يقول..مازلتي دوري ع عمار؟..
هي تبدلت ملامح وجهها للضيق ونزلت عيونها لوطا..
ضو:اسف لو ضايقتك بسؤالي..
قامت عيونها فيه وقالت:دورت ومازال مستعده ندور اكثر..
اضايق ضو ورد عليها يقول:دلال..الحكايه هدي متعلقه بالنفسيه راهي..يعني اللي انتي فيه..شي من الوهم..او نقولوا انتي متأمله أمل كذاب لو قعدتي تجري وراه ممكن يوصلك مواصيل خطيره..
ضيقت عيونها وقالت:شن قصدك..
هو قرن حواجبه وتشجع وقال فمرة وحده:لازم تعرضي روحك ع طبيب نفسي..
غيرت عيونها عنه وشبحت للكافتيريا وهي رافعه حاجبها..
ضو:ممكن نكون تجاوزت حدودي بس..كلامي هدى..لمصلحتك..
شبحتله بطرف عينها..
نظرتها كانت حاده..خوفاته من ردة فعلها المرتقبه..
نزلت عيونها بعدين قالت:استاذ ضو..قامت عيونها فيه وكملت تقول...لو نمشي لدكاترة الطب النفسي اللي فالعالم كلهم ولا واحد فيهم حيغير احساسي بوجود عمار فهالدنيا..حتى لو كل شي حواليا يثبتلي انه ميت اني فقلبي حيقعد اليقين بوجوده حي لين نموت... ببساطه
لأن اللي زي عمار مايموتوش ليوم القيامه..
ضو كان حاس بشعور الغيرة وكأنه نار ولعت فيه كله بظاهره وباطنه..
فداخله كان حينوض وحش الغضب ويطلعه كله فدلال..
ويعترف بمشاعر مدفونه ليها سنين وسنين تكبر ماتصغرش..
مش قادر يبوح بيها..
وكأنه يحب فمراة متزوجه..ديما تذكر فراجلها بلسانها وتصرفاتها..
مش ارمله راجلها ميت ليه فوق 5سنين..
بكل قوة كبت هالوحش وكتفه..ورسم ع وجهه ابتسامه اخفت ثورة هالمشاعر الملتهبه وقال: عندك حق..الشهداء احياء عند ربهم يرزقون..
هي هزت راسها يإيجاب مسايرة وقعدت ساكته..
ضو:اهم شي ماتكونيش زعلتي بس..
دلال ابتسمت وقالت:لا..عارفه ان نيتك خير...مشكور ع كل حال..
هو بلع ريقه وابتسم ووزع نظره ع المكان وقال:العفو احني عيله وحده..
هي ردت وقالت:اكيد...
شبحلها ..وهو يشوف بس لعيونها..
هي ارتبكت من نظرته نزلت عيونها وقالت: نستأذن الأستاذ يستنى فيا..سلام..
ولفت ومشت طول وهي متلخبطه ومضايقه قالت فنفسها
"شكله كلام نور حق"..
💓اما هو قعد معاها بعيونه لين خشت للكليه..
ابتسم بحب..
بعدين لبس نظراته ومشي متوجه لكلية العلوم..
🍃🍃🍃🍃
مر اسبوع...
وهالأسبوع صارت فيه مفاجئة مدويه..
رزان ..
وافقت ع مصلح
الصدمه اللي عقبت سماع هالخبر كانت قويه ع الكل
بالذات صاحباتها
رفقه وحدهم وبلقيس..
اللي حاولوا يخلوها ترجع عن هالقرار لكن عبث..
رزان مصرة..
الشخص الوحيد اللي كان فرحان..
سعيده...
واكثر حد كان مغموم ..
لامش عماد..
كفايه..
باهي وعماد؟..
عماد مسافر...وقاطع اتصاله بليبيا تماما..
سفرته هالمرة ماكانتش عاديه..
عماد سافر للسعوديه ودار عمرة ومافي حد من عيلته يعلم..
طق البيبان كلها..
وقعد بس باب ربي..
وهو توجهله..
🍁🍁🍁
اسبوع اللي بعده..
تحديدا يوم التلاتاء ..
كانت فضانية رزان..
الساعه 5:00عصرا..
🍁انتي كان تشوفي شكلها كيف يابلقيس وكأنها بتتنحر..
بلقيس بغضب:قتهلها هالحمارة وهي كسحت راسها..خليها ادير ماتبي صدقيني ماهي مطوله معاه..
حدهم:شن تقولي يابلقيس ماحد من عيلتها حيرضالها باللعب هدا..تنخطب وتفسخ بلاسبب..حيجبروها تكمل اللي بداته..
بلقيس :افف منك يارزان اففف..
"حدووود"..
حدهم:جااايه بابا..اسمعي بلقوسه اني بنسكر توا بعدين نهدرزوا..
بلقيس:باهي..باي..
صكرت بلقيس وهي مضايقه..
"معقوله مافي حد قدر يوصل لعماد ويقوله"..
بلقيس:محمد قال امس فالليل روح من العمره مالك نبه ع محمد مايقوله شي ولاحتى تلميح..
اريج:هو يعني لو عرف شن بيدير؟..
بلقيس:يقربعها اكيد..
اريج ابتسمت بمكر وقالت:خله يقربعها..
بلقيس شبحتلها بإستغراب..
رفعت اريج حاجبها مع ابتسامتها الماكره..
ارتسمت ع وجه بلقيس نفس الإبتسامه وقالت:باهي من بيوصلهله..
اريج خبطت بيدها ع صدرها وقالت:خليها عليا اني..
بلقيس:حي عليك انتي خطيبك ما يحبله شبح وجه..يابال اديري حاجه كيف هدي..
اريج:تس..يحبه هلبه غير زعلان منه..وبالنسبه للي ناويه نديره مافي حد حيعرف بيه نهائي..غير عطوني رقمه بس..
بلقيس ابتسمت وقالت:تو بعد نروح نتصرف انتي خلي تليفونك فيدك..
ع خشة مراد قال:صبي محمد جي..
ضحكت بلقيس وقالت:هيا هي..
🍁🍁🍁🍁
وفعلا بعد روحت بلقيس طول ركبت لشقتها هي وراجلها..
محمد اول ماخشوا الشقه مشي للحمام..
وبلقيس استغلت الفرصه..وخدت الرقم بسرعه من تليفونه
وبعدين بعتاته طول فرساله لأريج..
بلقيس وهي تضحك بحماس مخلط بالخوف قالت:يستر الله..
🍁🍁🍁🍁
الساعه 5:45 مساءا..
قدام مقر كتيبة "فرسان العاصمه"..
عماد :المهم عازمك حتى انت وقال قوله يجي..
رافع:اني مانمشيش كان ماكلمنيش مولى العزومه نفسه..
عماد بضحكه:تصكير راس..
رافع:لا مانصكرش فراسي بس تيفسا من بعد الثورة قطعنا مرة وحده واضح مايبيش صحبتنا وحتى حني مانبوشي..
ابتسم عماد وهو يحرك فراسه ايمين ويسار بعدين قال:يللا توا اني ماشي..تبي شي حبيبي..
رافع:سلامتك يابرو..
عماد:تمام..تشاو..
رافع:سلام..
مشي عماد لسيارته..
اول ماوصل في الباب رن نقاله بنغمة رساله..
شافه..وفتحها..
(بنت خالك الليله فضانيتها ياتلحق ياماتلحقش)
من الغضب لين قعد يرجف مع بعضه..
طول اتصل بمالك..
نادى مرة وفتح..
عماد بغضب:شن مدرقين عليا..
مالك بإرتباك:شن بندرقوا عليك!!؟..
عماد بنفاد صبر :فكني من جو الإستغباء اهوا وقولي شن مدرقين ع فية امي..
مالك تنهد وقال:اليوم بيفضوا فبنت خالك ميلاد..
غمض عيونه بعصبيه وهو يقول من تحت سنونه:تمام تمااامم..صكر عليه..
بعدين فتح عيونه وشبح للمقر..
لقي رافع قاعد واقف يشوفله قاله:خير عماد في حاجه!!..
مشاله عماد بإندفاع وقال؛ خش جيبيلي كلاشن..
رافع :غير قول شني في ع خاطرك نطلع قوة ..
عماد؛لا هو كله كلاشن بس..بسرعه يارافع..
رافع:تم ياصاحبي..
ومشي خش داخل..
وعماد قعد برا يمشي ويجي وهو والع مع بعضه..
🌴🌴🌴🌴🌴
الساعه 8:30مساءا..
المربوعه الخارجيه معبية بالرجاله..
وفحوش ميلاد النساوين يعولوا ع العشي..
وفدار التقعميز..
كانت رزان مقعمزة هي وصاحباتها..
معاهم ومش معاهم..
حدهم؛بلقيس اشربي طاسة السحلب..
بلقيس بتوتر:خليها تبرد..
حدهم:ولت جيلاطي..
بلقيس:خليها..
حدهم قعدت تشبحلها بشك..
بلقيس شبحت لرزان وقالت؛وانتي خيرك قالبه وجهك هكي مش مفروض توا فرحانه وجوك مليح..مش هدا مصلح اللي تبيه؟!!
شبحتلها رزان بنص عين ..
بلقيس رفعت حاجبها وقالت:خيرك تشبحيلي هكي ياحنه كلامي مش حق!!؟..
حدهم بضحكه؛بلقيس!!
بلقيس بعصبيه:والنبي فوتيني انتي الاخرى لابلقيس لاسعده..
حدهم بضحكه:باهي اشربي سحلبك..
بلقيس:واجعك السحلب انتي!!؟..
خدت الطاسه بعنف وقالت...اهو بنشربه بش تريحي..
ورزان تشبحلها والضحكه بتغلبها برغم الحزن اللي ساكن فيها..
كيف جت بلقيس بتحط الطاسه ففمها..
انطلست منها الطاسه وتبزعت من الخلعه..
بعد سمعت صوت صلي رصاص ماباش يوقف..
النساوين كلهم عيطوا..
وطلعوا من الكوجينه الخارجيه...
وخشوا للحوش يجروا..
سعيده وغاليه وامال و سميه ومرام وحميده..
والعزايز حدهم وفاطمه معاهم..
وقفوا كلهم فوسط الحوش..
والبنات طلعولهم يجروا..
فاطمه بخلعه:ياسيدي ربي ياسيدي ربي هدى شنوا..
حدهم الجده:قتها اني قتها برقه ومناجيهها والله ماهم ناويين خير بسكاتهم..
سعيده وهي تندب:حي عليا زعمه شن صاير برا يايامي سود..
صوت الصلي تكرر مرة تانيه..
عيطوا..
وغاليه تعيط وهي حاطه ع ودنها التليفون بعدين قالت:مايردوووش مايردووا..
فاطمه:ياحييي ياحييي...
حميده حاضنه بنتها وتقول:مافي شي ماما مافي شي..
مرام بخوف:غير كان نفهموا شن في بس!!
"اطلعوووا...روووحوا...."..
فنصوا كلهم لما سمعوا الصوت..
برا..
عماد كان واقف بالكلاشن فم المربوعه وهو يقول بصوت عالي: البنت لولد عمتها ياخالي...لولد عمتها..وديني تعطيها لغيره..نغرقلكم المربوعه بالدم..
فالمربوعه..
هانيبال وهو مغمض عيونه بغضب:استغفر الله العظيم..
حسن:عماد ولد سعد هدى..
الرجاله اللي جايين من طرف مصلح يوزعوا فانظارهم ع رجاله عيت العروس وهما مش فاهمين حاجه..
"بايع امها والله بايعها بايعها وحق الله نصفي دمه "..
محمد:هدى يدوي من جده راهو..هبل رسمي..اي شي يديره..
عمر:والله حتى اني مانضمنه..
بو مصلح:غير فهمونا شن في ياجماعه..
شبحوا كلهم لباب المربوعه لما سمعوا صوت الصلي..
فالحوش..
سعيده بصدمه:هبل هدى.!!
فاطمه؛تي غير ليش تعطوا فيها لغيره بس!!قتله ميلاد قتله ولد اختك والله ماهو معديها ع خير كان عرف..
"البنت لولد عمتهااااا...سمعتونيييي..لولد عمتهاااا"
حميده حضنت بنتها بالقوة وهي تضحك قالت:سلمه ياربي اللي مش مسلم فحبه..
ضحكوا النساوين غصب عنهم من اللي قالاته..
وسعيده معاهم...
اما رزان فكانت تسمع فيه وهي حاطه يدها ع فمها ومبتسمه بإندهاش وفرح..
فالمربوعه..
عم مصلح؛ليش ماقلتوا انها محجورة من الاول..
محمد؛وهاكم عرفتوا..
شبحوله الهادي وهانيبال بتفنيصه..
توفيق:الله غالب هدى اللي صار تو طلعت محجورة..
خليفه وسليمان شبحوا لتوفيق بصدمه..
وميلاد منحرج ع الآخر مش عارف شن يقول ولاكيف يتصرف..
"والله مانلعب ولانخوف فيكم..راااهو نحذر فيييكم قاااعد نحذر رااااهوووو"
وبدي يضرب في النار مرة تانيه..
فهاللحظه..
جو الجيران يجروا من جهة ..
ودرست سيارة سعد اللي كانت جايه من الجهة التانيه..
انفتحوا البيبان..
ونزلوا هو وخوه الكبير..
سعد وهو يشوف لعماد اللي كان عاطي بالظهر وهو يطلق فرصاص فالهوا....نادى بصوت عالي: عماااااد..
تلقائيا بعد سمع صوت بوه..
وقف...
ونزل سلاحه لوطا....
...يتبع...
