#العشق_المتمرد "اختبار"
#جمان_فريد
الجزء 120 القسم الأول
💖..
العشق..
قلنا قبل...قد ماهو حلو قد ماهو واعر..
بس حتى واعارته حلوه..
يخلي العاشق حتى وهو فذروة زعله من معشوقه مش قادر يمنع قلبه من اللهفه عليه والشوق ليه...
مايقدرش يمنع قلبه من العشق مهما حاول يقسيه..
💕هدا حال رزان لما طلعت من الحوش الساعه 7الصبح بش تسقي ليمتها بعد مامنعها من فعل ذلك جية الضيف المداهم..
وين بانت عليها الجردينه..
وقفت فمكانها..
لما شافاته يحط فطوبو الميه تحت شجرتها..
بعدين وخر وقعمز ع رشاده قريبه ع الشجره وقعد يتفرج عليها..
عيونها تعبوا دموع..
قعدت واقفه فمكانها تشوفله وخلاص..
وقلبها بيطير من المشاعر اللي هاجت كلها فمره...كل شعور ونقضيه..
حب..كره..
شوق..تمنع..
زعل..رضا..
لهفه..مكابرة..
نزلوا دموعها وهي تتفرج عليه كيف يتأمل فشجرتها...
سألت نفسها زعمه فشن يفكر..
يفكر فيك طبعا..يبيك توليله...
مستحيل مازال يحلم نوليله!!..
ع من تمشي فيه يارزونه..انتي بتموتي عليه..من داخلك متمنيه توا فهاللحظه لو تقدري تمشيله وتقعمزي معاه وتلوحي اللي صار كله ورا ظهرك وكأنه ماكان..
مالقتش بشن ترد ع روحها...
التزمت الصمت حتى من داخلها..
وقعدت بس تشوفله..ودموع عيونها ولاقالوا نوقفوا..
فهاللحظه..
وقف..
حط ايديه فجيوب سرواله..تنهد..
والتفت بيمشي..
شافها..
هي ماهربتش..
نزلت عيونها بس..وقعدت واقفه وكأنها تستنى..
وهو يشوفلها بعيونه الملهوفه..
وحركة صدره واضحه..من قوة نبض القلب المتسارع..
قعد يشوفلها ويراجي منها فأي إشاره تريح قلبه المتملح شويه..
هي قعدت ع حالها..
هو قدم..
قعد يمشي..ويمشي..
لين طلع من الجردينه متوجه جيهتها..
هي رفعت عيونها شافاته لما طلع..
تحركت..
وبدت تمشي..
هو وقف فمكانه ولهفته كل مالها تزيد وتزيد مع كل خطوة تخطيها اتجاهه..
لما خلاص قربت منه..
فاتت من حداه...
فاتت بدون ماتشوفله..
فاتت...
ولاكأنه في حد اساسا فاتت من حداه كإن الطريق فاضيه مافيها حد..
هو قعد يتبع فيها بعيونه..
لين خشت للجردينه..متوجهه لليمتها..
لقاها ماشيه جهة بلوكه مش كبيرة...
خدتها وقامتها وحطتها مقابله شجرتها..
بعدين مشت للرشاده اللي كان مقعمز عليها خدتها وبعدتها ع شجرتها بعيد..
بعدين ولت للبلوكه..وقعمزت عليها..
هي ماتكلمتش ولا بحرف..
حتى بالنظرات ماعبرتش..
بس وصلت رسالتها باللي دارته..
خلت قلبه مع كل حركه منها ينعصر عصر..
وكأنها حطاته فقبضة يدها وقعدت تعصر فيه وتعصر فيه وتعصر فيه...
وكأنها تبي تنشفه من الدم..وتنهيه..
تقتل فيه بتجاهلها واستكرادها تقتل فيه..
هالمرة غير كل مره...
ملاحظ انها تحاول تنساه واطلعه من حياتها فعلا..
ماتحملش..
لف ومشي...
قعد يمشي ويمشي ويمشي..
لين وصل فم بوابه الحوش القديم...
وقف..
جي بين عيونه موقف قديم صار فهالمكان...
《اني غالطه نعترفلك بيها مرة تانيه ومليون مرة..بس والله العظيم كل اللي درته كله لأن قلبي انجرح..لأني..لأني نحبك واجد ..ماتحملتش اللي سمعته..عشت شي ربي بس اللي يعلمه...ماتحملتش فكرة انك تخوني ولا قدرت نعديها..من قهري درت اللي درته..》
《انسيه عماد..طلعي من راسك عماد..فوتيه عماد خلاص..كان في..وتوا معاش في ..ياريت ياريت معاش تحاولي تكلميني مرة تانيه ولا بأي شكل..مانبيش ندير حركه خيي ونمشي لبوك وخوك ونقوللهم شدوا بنتكم..》
《 حط عينك فعيني وتكلم ترا..
:كان هادي مشكلتك هاه حطيتهم فعيونك ونقولهالك انتي اكبر غلطه غلتطها فحياتي ونادم عليها اشدالندم ولا يمكن مازال نكررها مرة تانيه..》
لما اذكر هالموقف والكلام اللي صار بينه وبينها..
تنكر لعماد هداكا وكأنه مايعرفاش..
استنكر كلامه كله..
قال بنبرة الم وهو مغمض عيونه بشده؛ريته انقص لسانك ولاقلت اللي قلته ياثور..
فتح عيونه وكمل يقول...والله شن مادير فيا شويه شويه..
لف ومشي طول بطريقه للجردينه..
ايه ماشي يكلمها ومش مهم عنده لو هزباته ومسحت بيه الأرض..يستاهل..هو هكي يقول لنفسه..
لما وصل غادي..
وقف فمكانه..لما شاف حناه فاطمه واقفه معاها والزوز يهدرزوا ويضحكوا..
ضم شواربه لداخل بأسف..
وكور قبضة يده وشاد عليها بقوة..
بعدين غصب عنه مشي ...
🍁🍁🍁🍁
حط فنجان القهوة وقال:شن تشوري عليا ترا؟..
هي من داخلها كانت بطير من الفرح اللي حكالها شي خاص وسري وحساس وطلب مشورتها فيه هدا بس يكفي فنظرها ليبين قيمتها عنده..
ردت عليه تقول:انتي الصغير فخوتك اصغر منه مافيش بيناتكم حواجز كيف اللي مع خوته اللي اكبر منه..لازم تعديله يامحمد وتوقف معاه لومه بس ماتستصغره ولاتهينه..هو عمره مادار حاجه كيف هدي..مانعرفوا الظروف اللي خلنه يغلط هالغلطه الكبيره..حاول تسمعه وتفهم منه..
محمد تنهد وقال:قد مايجيه من مراته الغبرة هدي هدت حيله بطلباتها هدى غير مصاريف العيادات مرة هنى ومرة فطرابلس..وهو من قبل ظروفه تاعبه لعند توا قاعد ماكمل اقساط الشقه لحميد..وفوق هكي عليه ديون..ودنيا مغبرة..
بلقيس اشمئزت لما جت سيرة لمياء..قالت لمحمد:باهي اللي ربي فك عماد من اختها..
محمد:اقسملك بالله فرحت من قلبي نهار سمعت بيه فسخ..
ضحكت بلقيس..
وهو ابتسم نص ابتسامه...بعدين قال:اسمعي جاي..الدوة اللي صارت بيني وبينك تو لو طلعت يابلقيس نطلقك طول..
هي ضحكت بصدمه وقالت؛مستحيل نديرها نهاري انت قت سر..خلاص سر ويموت هنى...
هو شبحلها بطرف عينه وقال؛ايوه يموت فمكانه..ناض وقف وهو يقول..وتيلي دبشي وقت ع العمل..ومشي توجه للحمام وهو يسمع فيها تقوله..حاضر..
🍁شويه وطلع من الحمام..
وبدي يلبس..كمل لبس..مشي وقف ع الزيانه..
بدي يمشط فشعره...
بعد كمل حط المشط ع الزيانه..والتفت مشي للقجر متاع الكامدينو اللي جنب السرير قعد يدور فيها..
مالقهاش..تأفف ونادى بصوت عالي:بلقيييييس..
هي جاته تجري وقفت حدا الزيانه وقالت:نعم..
هو جاها وقال..
محمد بنتورة :تي وين النظارات وييين..
هي رمشت عيونها بخوف ومشت طول للزيانه:اهما قدامك ع الزيانه..
هو وجهه تغير لما شافهم قال مكابرة:حطيهم في مكانهم مرة تانيه في القجر ..
هي قالت بإبتسامه:حاااااضر وامرك ع راااسي..
محمد:نتكلم جد..
بلقيس بإبتسامه:حتى اني..
شبحلها بطرف عينه وخدي النظارات بيلبسهم رجع شافلها لقاها تشبحله:خير!!
هي ضحكت وقالت:راجلي سمح وبنتامل فيه لاحرام ولاعيب..
هو فنص..
بلقيس ضحكت وبدت تغني:والله بحبك موت ياحماده انا بعدك انت اموت ياحماده..وقعدت ترقص بكتافها وتغني..
وهو يشوفلها برفعة حواجب..
قربتله وهي ترقص:انا قلبي نار..والهوا غدار وبموت فحب..
باست خده وكملت...حمااااده..
هو شد ضحكته ولبس نظاراته طول وطلع من حداها..
بلقيس:ههههههههههههه
💕💕💕💕
الساعه 10:00صباحا..
قعدت لين روحنا مع بعضنا العشيه..
عماد :صعب يام عندي بضاعه اليوم توصل لازم نكون في الميناء الساعه 12:00..
كفايه تنهدت وقالت:باهي برا مربوحه وليدي..
هو ابتسم وقال:امي..
كفايه:نعم امي..
غير عيونه وشبح جهة حوش خاله وقال:حاولي اديري حاجه..شبحلها وهو يقول..حاولي..
امه حطت يدها ع ذراعه وقالت:حاضر ياامي تو نحاول..
ابتسم...بعدين حط يده ورا راسها وقربه ليه وباسه..
بعد..ولف ومشي لسيارته..
وهي تشوفله وتدعيله:يارب افتحها فوجه وليدي ياربي ريح قلبه ونوله اللي فباله وفرحه يارب..
شبحاته ركب سيارته..بعدين شغلها وتحرك..
قعدت مع السيارة بعيونها لين اختفت
تنهدت بضيق..ومشت خشت داخل..
🍁🍁🍁🍁
نص ساعه تانيه..
وروحوا..
حميد بعيلته..
وخيري بعيلته..
وعبدالسلام بعيلته..
وحمزة وسند معاهم..
قعدوا بس سعد وولاده ..لانهم ناويين يروحوا العشيه..
🍁🍁
الساعه 1:00ظهرا..
كفايه:قالي بإذن الله مانيش مروح لين نقنعه..
فاطمه:يارب يسر يارب..
حميده:هو يقربله من ناحية بوه ولا؟..
كفايه:ايه..
حميده:الله يرحمه سيدي..ريته وقتها دخل سيد سعد فيها راهو محلوله من زمان..
كفايه:بوي الله يرحمه كتوم ماحد يعرفله شي..
فاطمه:ايه الله يرحمه..ماكانش يحكي كان لميلاد..
حميده:لكن ميلاد مايعلمش بيها يمي الحكايه هدي..
فاطمه:لا ياحنه طلع يعلم وسيدك محلفه مايقول لحد..تعرفي ليه عامين يجري عليها بروحه وماحد يعلم بيه..
كفايه:ياناري وخيي قداش تحمل..راجل عنده القلب ويتحمل هالمسؤوليه بروحه..
فاطمه تنهدت وقعدت ساكته وهي تشوف لسبحتها وتسبح..
"هي بالسلامه توا"..
صوت سعيده وهي طالعه من عند غاليه فالكوجينه ..
ردوا عليها..
مشت طلعت من فم البوابه..
وكفايه ناضت وراها..
وامها وحميده معاها بعيونهم..
فاتت من قدام الكوجينه...
شافتها غاليه...قرنت حواجبها بإستغراب.
ومشت وقفت فالروشن..
برا..
"سعيده..ياسعيده"..
وقفت سعيده بعدين التفتت وهي رافعه حاجبها قالت:نعم..
كفايه تنهدت بعدين ابتسمت وقالت:نبيك فكليمتين..
سعيده:تكلمي نسمع فيك..
كفايه بلعت ريقها وقالت:انتي بنية عمي ومرت خوي وام صغاره عمره ماصار بيني وبينك غلط..غير اخر كلمتك فيها كان واجعني ولدي حالته بالويل...يبي بنتك من قلبه قريب يموت عليها ياسعيده ..
سعيده تهكما:هدى ليش عدى خطب سناء!..
كفايه:ايه صح..من كتر مايحبها دار هكي..انتي تعرفي باللي صار بيناتهم..وراهو كيف ماغلط هو هي غلطت قبله..
قاطعتها سعيده تقول:ماتعبيش روحك ع الفاضي..بالنسبه لولدك ياكفايه اني معاد نقبله ولاعاد بنتي عندها ليه خلاص..بعد اللي داره فيها لايمكن نرضى نعطيهله..
كفايه:غير صلي ع النبي ياسعيده..
سعيده:عليه الصلاه والسلام..وبعدين هدى مش كلامي بروحي..انتي بروحك ماتبيش..بلسانك قتيها ولدك حرام فبنتي..
كفايه:فلحظه غضب قلت هكي..
سعيده بحده:فلحظه غضب فلحظة فرح..مايهمنيش..اني كل همي بنتي وبس..بنتي الوحيده اللي ولدك قريب رزاني فيها لولا لطف ربي..
كفايه:واهي فاقت وولت احسن من قبل..ماتنسيش مافاقت الا بعد ما خشلها هو..
ضحكت سخريه وقالت :ههههههه...تعرفي ياكفايه لو يصبي ع رموش عيونه رزان معاد طايل ظفرها..
كفايه:سعيده صلي ع النبي واسمعيني..
سعيده رفعت سبابتها فوجهها وقالت بغضب:لا نسمعك لاتسمعيني..لو يموت بنتي معاد مازال يحلم بيها..
ولفت ومشت..
وكفايه وراها :سعيده وخيتي تربحي اسمعيني ياسعيده..سعيده...
وسعيده مكلمه طريقها وهي تمشي بعصبيه رافضه تسمع ولا تناقش حد فالموضوع هدا..محسوم خلاص بالنسبه ليها..
ومازال كفايه تمشي وراها وتنادي ياسعيده..
لعند ماسعيده خشت للحوش وقربعت فوجهها الباب بكل قوة..
كفايه وقفت فمكانها وهي تشوف للباب بنظرات ألم ممزوجه بالغضب..
خدت نفس..بعدين مشت بتولي للحوش..
🍁🍁🍁🍁
خديتي رقمه..
تغريد بإبتسامه خجل:ايه..
رزان بضحكه:وشن جوه..
تغريد :يهبببل..
حدهم بضحكه:سعدودك يافرخه..اني من لما ايمن ولا شيخ معاش بديت نشوف فيه بكل..تلاشت ضحكتها وهي تقول..خايفه معاش نعجبه خلاص ويمشي يدور شيخه زيه ياخدها..
رزان بضحكه:حتى انتي ولي شيخه ع خاطره..
ضحكت تغريد..
حدهم :لاحبيبتي اني نولي شيخه ع خاطر ربي مش ع خاطر حد تاني..وزعت نظرها ع المكان وهي تقول..رضي بيا هكي باهي..كانهدا سلامته..مش واقفه عليه..
عيونها دمعوا لما قالت كلامها الأخير..
تغريد حطت يدها ع يد حدهم وقالت:اني متاكده انه يراجي فالفرصه المناسبه بش يخطبك طول..هو شيخ توا وهدى اللي يناسبه..
رزان:معاها فكلامها..
شبحتلهم وقالت:ماتقولوش هكي بش تواسوني ولا؟..
تغريد بإبتسامه:عن نفسي والله لا..اني هكي نشوف فعلا..
رزان :واني معاها..
حدهم مسحت دموعها وهي مبتسمه بخجل..
وهما يشوفولها بضحكه..
شوي..
فات من قدامهم مصلح..شبح لرزان بطرف عينه بعدين غيرهم وكمل طريقه..
تغريد:تغير واجد بعد تخرج ولى لبس وطرحات وجو..
رزان بصدمه:امتى تخرج!؟..
حدهم بضحكه:لما كنتي راقده..
ضحكت تغريد..
رزان شبحت لحدهم وقالت بضحكه:ياحقيره...
ضحكت حدهم..
تغريد:مازال عينه عليك يارزونه..
حدهم:حتى اني لاحظته كيف شبحلك توا..
تنهدت رزان بعدين قالت:خلونا منه توا وركزوا في الأمتحانات النهائيه اسبوع الجاي راهن..
شبحولها بإمتعاض..
هي ضحكت..
فجأة رن تليفونها شافت المتصل لقاته توفيق ناضت وقالت:هي صبوا توفيق جي..
ناضوا الزوز وهما يقولوا :هي..هي..
لموا حاجاتهم فيسع ..
بعدين مشوا ....
🍁🍁🍁🍁
الساعه5:20عصرا..
بعد سقدت غاليه اختها كفايه وعويلتها وروحوا..
مشت لحوش خوها الهادي..
استقبلها خوها وخش هو وياها للصاله..هدرزوا شويه
بعدين جت سميه سلمت ع غاليه وقعمزت حداهم..
فحدود 5دقايق..ناض الهادي ومشي طلع من الحوش..
وقعدوا سميه وغاليه مع بعض..
سميه:اني ياغاليه والله ماتكلمت الا ع خاطر وضعنا اللي انتي تشوفي فيه بعيونك..ناقصتنا سته وستين حاجه محرومين من سته وستين حاجه..صغارنا من دون صغار الناس لالبس باهي لاألعاب لاغيره لاغيراته..والله ياغاليه والله يوجعني قلبي منين يروح فؤاد من المدرسه ويقعد يحكي ع حاجات عند الصغار هو يتمناها..ولا لما يعدي لحوش عمه ميلاد يلعب مع قصي يروحوا هو وخوه ويقعدوا يحكولي ع اللي عنده من العاب ودبش وفعيونهم الحسرة..هدى غير لما يتلاقوا مع ولد نعيمه وولاد دلال..ايييه شن بنحكي ولانقول بس..
غاليه بتفهم:اني فاهماتك كويس وعارفه كل شي..بس معاد نبيك تخليهم يقارنوا بين وضعهم ووضع غيرهم..راهو قصي غير دخل بوه عنده خوه توفيق مدلعه اخر دلع وديما وهو يشريله ويجيبله مش ميلاد بروحه..وولد نعيمه وولاد دلال حالتهم الماديه مرتاحه واجد ياسميه..مفروض مايقارنوا ارواحهم بيهم..علميهم القناعه ياسميه..
سميه"تفلسفي ع راسي تو":باهي سألتك بالله غلطت اني لما تكلمت ع حق الهادي فالأرض؟!
غاليه:لا ماغلطتي بس امي ياسميه خايفه خوتي يديروا مشكله للراجل وتكبر القصه بس..
تنهدت بعدين قالت:باهي شن صار مع سعد راجل كفايه..
غاليه:قال خلاص الراجل وافق ياخد حقه فلوس وتوا الولاد بيدبروله فيهن ويعطوهله..
سميه:امتى باهي؟ ..
غاليه:نص واحد الجاي ان شاء الله هدى الموعد اللي حددوه معاه..
سميه:باهي مش حميد متكفل بالموضوع..
غاليه:المبلغ قريب50الف..خوته مارضوها يدفعهم بروحه..
سميه بتهكم:خوته اللي هما مني..
رفعت غاليه حواجبها وقالت؛خوته كلهم..
سميه:كلهم!!مالا الهادي ناوي يبيع كلاويه بش يعطي معاهم!!
غاليه نزلت حواجبها وقالت بشي من الحده:اسأليه مش انتي مرته مفروض انتي اللي تعرفي حاجات كيف هدي..
سميه مطت شواربها بملل وقالت:تو نسأله..
غاليه رفعت حاجبها وقالت:وتوا خلينا من الموضوع هدي..سميه...من قبل مابيتش نكلمك فاللي بنقوله توا قلت بالك فيه سوء فهم..لكن بعدين تبينلي انه مش سوء فهم لأنه هالشي تكرر واجد واجد ياسميه..
سميه قرنت حواجبها وقالت:اللي هو؟..
غاليه:دوتك بينا قدام الناس..
جت بترد قاطعتها غاليه تقول..ماتنكري ياسميه كلهم يقولوا قالتلنا كنتهم ***** ومافي كنه ****** غيرك انتي ياسميه..
غيرت سميه عيونها عنها وهي رافعه حاجبها وقعدت تهز برجلها..
غاليه:امي لو تبي فيك سو راهي طول عدت قالت للهادي ياسميه...وهاني اني جيت نحذرك يتكرر تصرف كيف هدى مرة تانيه..طول يوصل كل شي للهادي..
قعدت سميه ع نفس وضعيتها مابتش ترد..
اما غاليه ناضت وهي تقول:وهي بالسلامه تو..
ومشت طول متوجهه للباب..
بعد سمعتها سميه فتحت الباب وطلعت وصكراته وراها قالت:طز فيكم كلكم انتم وولدكم....
وناضت مشت لدارها وهي تقول...ماناقصني كان غاليه تجي تعطيني محاضرة..تعدي تلهى فعمرها ادور راجل ولادير لروحها حل بدال ماهي قاعدتلنا ع وحده وحاطه راسها براسنا...مرض..
🍁🍁🍁🍁
دفعهم كلهم؟.
بدون مايشبحلها قال:ايه؟..
لمياء شبحت لعمر بإندهاش...
اما هو فكان يشبح فالفراغ بضيق وساكت..
محمد حط يده ع رجل خوه وقال:عارفك والله مادرتها الا مجبور ولو عندك كيف تردهم راك ردتيهم ..والبنادم مش معصوم ياخوي..اهم شي انك معاش تعادوها واني متأكد انك مستحيل تعاودها..
مسح عمر بيده ع وجهه بعدين غمض عيونه بأسف وهو يهز فراسه بإيجاب قال:صحيت يا محمد صحيت اللي جيت..
لمياء:ايه والله صحيت انك وقفت مع خوك وتفهمته يامحمد..
محمد ماباش يعبرها..
ناض وقف وهو يقول:مالا اني بنعدي توا ..
ناض عمر وقال:وين !؟اقعد تعشى..
محمد:مرة تانيه إن شاء الله..هي تصبح ع خير...
مشي وعمر مشي وراه وهو فقمة الضيق..
لمياء بهمس:ماحاسب فروحه الخليقه هدا..تنهدت وقالت..يللا المهم هداكا دفع الفلوس وفكنا من همهم..
🍁🍁🍁🍁
الساعه 6:00مساءا..
سمعت آذان المغرب وهي طالعه من دارها قالت:صدق الحق وزهق الباطل..
قرنت حواجبها بإستغراب لما شافت امها ماشيه بصفره فيها طاسة حليب وصونية تمر..وطاسة اميه..
رزان:من صايم؟..
سعيده ردت وهي ماشيه:سيدك..
توسعوا عيونها وهي تشوف لامها كيف ماشيه للصاله..
قلبها قعد يقربع..💓 وهي تفكر فسبب صيامه..
بلعت ريقها..وطردت من عقلها التفكير فالسبب..وهربت للحمام بش تتوضا للصلاه..
🍁🍁🍁🍁
هي هكي قالت؟!..
كفايه بضيق:ايه...قداش تغيرت من ناحيتك كرهاتك رسمي..
عماد هز راسه بإيجاب وهو قارن حواجبه ويقول:معذورة حتى هي معذورة واني نستاهل...لكن..اطير تجنح بنتها بناخدها يعني بناخدها..
قال كلامه الاخير وهو يحرك في ايديه فوق ولوطا بعصبيه..
كفايه وهي تشوفله بخوف:شن ناوي؟!!..
رفع حاجبه اليسار..وشبحلها وهو يحط ايديه فجيوبه قال:كل خير إن شاء الله كل خير..ولف ومشي لداره..
وخلا امه واقفه وع راسها الف علامة استفهام..
🌴🌴🌴🌴
تاني يوم..
الساعه 11:15 صباحا..
خشوا الزوز من باب المستشفى..
بس الزوز كانوا في حالات تختلف عن بعضها..
الكبيرة كانت حالتها عاديه زي كل مرة تجي فيها المستشفى من سنين طويله..
لكن الصغيره..
كانت وكأنها خاشه لساحة حرب..
خاشه مواجهه..
مع نفسها..مع مخاوفها..
ومع نظرة المجتمع المحيط..
كانت تظاهر بالقوة والثقه..
نظرة عينها كانت نظرة كبر مصطنع...
كانت تبي كل من يشوفها مايحسش اتجاهها بالشفقه نهائي ولاتبي حد ينظرلها ع انها مكسورة...
نظرة المجتمع المحيط بيها فمدينه محافظه جدا زي المدينه اللي هي عايشه فيها تكون قاسيه بزياده واكثر تعصب وللأسف جاهليه..
وهي تبي تواجه هالمجتمع وتبي تنتصر على تفكيره المعاق..
بس طبعا الحرب هادي مش حتكون ساهله ابدا..
🍁رسمت ع وجهها ابتسامه لما جو عيونها ع وحده سابقتها وخشت ساحة هالحرب من مده...
البارقه بإبتسامه:ياهلا ياهلا نورت المستشفى..
ضحكت حميده وسلمت عليها بالخد وهي تقول:منوره بيك..
بعدوا عن بعض..وسلمت البارقه ع غاليه..
البارقه:كيف الحال..
غاليه:الحمد لله..كيف حالك انتي..
البارقه:الحمد لله..
بعدوا عن بعض ..وغاليه تسأل:وين فضيله..
البارقه:والله مانعلم عليها اتصلت بيها ماتردش..
غاليه:تو نعدي ندورها..سلام توا..
مشت غاليه..
وحميده معاها بعيونها..
البارقه شبحت لحميده ابتسمت وحطت يدها ع ذراعها وقالت:احسن حاجه درتيها..
شبحتلها حميده وبادتلها الإبتسامه..بعدين قالت:هي خل بنعدي للمدير ..
البارقه :نسايرك؟..
ضحكت حميده وقالت:ياريت..
البارقه بضحكه:هيا..
ومشوا مع بعض وهما يهدرزوا...
وكان وجود البارقه القويه حقيقة..داعم ومريح لحميده بشكل كبير فأول يوم دوام ليها..
🍃🍃🍃🍃
ومروا يومين..
كانت حميده فيهم مع اختها وفضيله تراجع معاهم فأساسيات خدمتها اللي نستهم في فترة الإنقطاع اللي دامت لسبع سنوات..
وتحاول تنطلق شوي شوي..
طبعا كان يرفع فيهم محمد ويروح بيهم ..
وبنتها تقعد مع بلقيس..اللي كانت تتعامل معاها وكأنها اختها الصغيره وحنين حبتها هلبه..
🍁🍁🍁🍁
قدام المستشفى..
فضيله:قديش استاحشت العراس..
غاليه بضحكه:ماليكش شهر حاضرة عرس..
فضيله بضحكه:كان نلقى فكل شهر نحضر 4اعراس..
حميده بضحكه:كل اسبوع فعرس..
البارقه:هههههه..تخيلوا...مايكمل الشهر الا واني نتكلم بالإشارات..
فضيله:واني عظامي ينحلن من بعضهن..
حميده وغاليه:هههههههه..
غاليه وهي تضحك وزعت نظره القدام...
تلاشت ضحكتها لما جو عيونها ع حسن وهو واقف بسيارته بعيد شوي لابس نظارات سود ويشبح جيهتهم..
غيرت عيونها عنه وشبحت للبارقه اللي كانت تضحك وتهدرز مع البنات...بعدين رجعتهم لحسن ..
🍁🍁🍁🍁
الساعه 5:00عصرا..
درست السياره..
نزل منها وهو مستعجل يبي يهرب قبل يشوفه حد من خوته..
نزل الصاكو وعطاه لمرته اللي كانت كيف نازله..
خداته منه..
وهو طول جري للسياره ركبها وتحرك..
وهي معاه بعيونها..
بعد اختفي من قدامها تنهدت بملل..
بعدين..
لفت ومشت لممر فم البوابه...
فالحوش..
تحديدا الصاله..
هي قصي اقرا وراي..
إذا زلزلت الأرض زلزالها...
قصي:إذا زلزت الأرض..بلع ريقه وكمل..زلزالها..
بلقيس:واخرجت الارض اثقالها..
قصي:واخرجت..الأرض..اثقاالها..
فالدار..
كانت غاليه ادير فالفتله لحميده وحنين تتفرج ع التلفزيون..
حميده:زعم مرت خوك هداك تعدي..
غاليه وهي تركز بالنظر ع وجه اختها قالت:مال شنو ياحنه قداش ليها تراجي فيه..
"السلام عليكم"..
حميده بتهكم وهي تشقلب فعيونها:اممم..شرفت الفسخه الأخرى..
غاليه بتفنيصه:اصصص..
فالصاله..
مشت لمياء لبلقيس طقت يدها طقان وهي تقول:شن جو..
بلقيس وهي تشوف للكتاب:تمام..
شبحتلها من فوق للوطا ومشت..
قصي بهمس:الصباح هدي مانحبها..
بلقيس شبحتله وضحكت بتفنيصه..
فهالوقت ..
لمياء خشت ع حمواتها فالدار وهي تقول:مرحبا..
حميده:عاش من شافك ياحنه..
قدمتلهم لمياء بعد حطت الشنطه وهي تقول:عمر انشغل هلبه الايام اللي فاتوا..
ومدت يدها لغاليه...
صافحتها غاليه من غير ماتشوفلها..
بعدين مدت يدها لحميده صافحتها حميده..
لمياء :سهريه عاديه اليوم..
حميده؛ايه..
لفت ومشت لشنطتها قعمزت حداها وهي تقول:مادارولهاش كسوة؟..
غاليه :تس تس..
لمياء وهي تفتح فشنطتها:مش لازم اندارتلها كسوة فعرسها الاول ساد..
رفعت حميده حاجبها..
وغاليه اشرتلها بملامح وجهها وكانها تقول"خليها تقطف"..
ولمياء ابدا مش مهتمه قالت كلمتها وهي قاصدتها وعارفه انهم مش حيردوا عليها..
طلعت من الشنطه اللبسه اللي بتلبسها علقتها ع مقبض فرده من فرادي الدولاب..
شبحت حميده بطرف عينها للبسه وقالت:قاعده عايشه هدي..
لمياء التفتت وقالت:شريتها فعرسي..
حميده: طاحت موضتها..
لمياء:لاطاحت موضتها لسو ماصكرتش عامين متزوجه..
حميده ضحكت وقالت:نهارك !هي الموضه كل شهر تتغير..
بلقيس برا كانت تسمع فحميده شن تقول وهي تضحك..
ولمياء برغم انها تكنطت لين خلاص لكن حاولت تبان هي العاقله قالت:وقت توا مش وقت موضه ياحميده فهالظروف الصعبه والغلاء الواحد القرش اللي يفضل يدسه...عمر خوك وانتي ادرى بظروفه مانبيش نزيدها عليه..نحاول نساعده ع قد مانقدر نبدا خاطري فحاجه نحرم روحي منها بش مانكدراش ونحيره..
حميده وغاليه جايين بيتعاطفوا معاها لولا صوت بلقيس العالي اللي جاهم من الصاله وهي تقرا..
"إذا زلزلت الأرض زلزالها...الزلزال هنى ياقصي يوم القيامه..يوم القيامه ياقصي ياما من ناس بتشفشف فهداكا اليوم"..
شدوا حميده وغاليه ضحكتهم..
ولمياء نخصوها مرافقها قالت:هادي خيرها؟!!هكي مستحيل يستوعب منها الولد..
حميده بضحكه:تلقي ولد سعيده مهبلها..
غاليه بضحكه:ايه..هي اسكتي توا خلاص ومعاش تحركي راسك خل نكملك بسرعه معاش في وقت..
حميده وهي تضحك قالت:باهي..
اما لمياء ولت لشنطتها اطلع منها فالحاجات وهي تسحن سحن ع بلقيس..
🍁🍁🍁
بعد المغرب جتهم رباب ببنتها وبضاعتها..
ولبست فحوش جدها مع خالتها حميده فدار..
ولمياء وبلقيس وغاليه فدار..
والحاجه فاطمه كانت توتي فروحها فدارها بروحها..
لبست قفطان لونه حني كاتفه...ولبست ع راسها محرمه زرقا كحلي مورده بالحني..
وحولي حرير أزرق كحلي مخطط بالأبيض..
وفوقه جرد لونه قريب من لون الحولي..
لبست حداديها..وبخت من ريحة خاصه بيها..
ومشت قعمزت قدام التلفزيون وهي تراجي فالبنات والكناين..
🍁فالدار اللي فيها غاليه وبلقيس ولمياء ..
مرة مرة السلفات يعطوا بعضهم نظرات حارقه خارقه..
وغاليه تراقب فيهم..
اول مابدوا مكياج..
لفت انتباه بلقيس وغاليه حركه لمياء دارتها..
قعدوا يشوفولها الزوز وهي تمكيج..
شويه تكلمت غاليه:لميا قديش ليا خاطري نسألك سؤال..
لمياء بإبتسامه:أسألي حبيبه..
غاليه:ليش ديري فأحمر خدود ع وجهك طول هكي لاكريمه ولابودرة..
بلقيس شدت ضحكتها وهي ترسم فعينها..
لمياء:مش مستحقه كريمه وبودرة ماعنديش عيوب نخفيهم..
رفعت بلقيس حاجبها..
غاليه:لاهو يعني الكريمه والبودرة مش اخفاء العيوب بس..
لمياء:اللي هو المهم اني شايفه نفسي مش مستحقتلهم..
رفعت غاليه حواجبها وكملت مكياج لروحها..
بلقيس:احممم...حممم...امممم... وبدت تغني...بالشفااا ياهلنااا ...بالشفاااا يااااهلنا...
شبحتلها برفعة حاجب...
وغاليه ناضت وهي تقول:خل بنعدي نشوف كندرتي وطلعت تجري وهي تضحك ع الصامت...
ومشت خشت ع حميده ورباب وصكرت وراها الباب وهي ميته من الضحك..
الزوز سيبوا اللي فإيديهم وقعدوا يشوفولها..
حميده بضحكه:خيرك شن جاك؟..
وغاليه تضحك بدموعها..
رباب ضحكت وقالت:تي تكلمي..
غاليه:ههههه..بلقيس..حطت لمياء فراسها..شدت بطنها وهي تضحك وتقول .وووك عليا ووك..
فالدار التانيه..
لمياء:بلقيس...
بلقيس وهي ادير فالمسكره:اممم..
لمياء:شن رايك لو كل وحده فينا تحط حدود فالتعامل مع التانيه يعني علاقتنا فحدود خير مسا الخير وبس..
بلقيس:وليش هي غير هكي؟
لمياء بحده:ايه..انتي تتجاوزي فالحدود هلبه بتصرفاتك وحركاتك..
نزلت بلقيس يدها وشبحت للمياء بنظرة فيها شي من الإستهزاء..بعدين ابتسمت بتهكم وغيرت عيونها للمرايا ولا عبرتها..
لمياء ضمت شواربها لداخل بغضب بعدين قالت:المهم
اني قلت اللي عندي..
بلقيس طنشتها تماما قعدت تكمل فمكياجها ومن داخلها فرحانه اللي حرقت دم لمياء وعصبتها...
🍁🍁🍁🍁
بعد وتوا ارواحهم..
رباب طلعت هي وحميده وحنين ركبوا مع مؤنس..
وفاطمه وغاليه وبلقيس مع محمد ولمياء اندكت معاهم...
كانوا مقعمزات الزوز من الخلف وغاليه فنصهم منعا لأي تماس مباشر ممكن يأدي لإنفجار
🍁وصلوا لحوش جيرانهم صحاب العرس..
لما خشوا...
لقوا مرام وسميه سابقات..
مرام ناضتلهم ..وسميه مابتش تحرك ساكن..
لمياء وهي تحول فعبايتها وزعت نظرها ع مرام من فوق للوطا تشوف للبستها وذهبها ومكياجها وشعرها..
كانت راقيه جدا مش مبالغه..ومميزة جدا بأناقتها..
قريب طقت منها..
ومرام تسلم ع عزوزتها والبنات والإبتسامه مافارقتش الوجه..
وصلت فلمياء سلمت عليها بالخد وهي تسأل عن الأحوال ولمياء ماردتش بحرف..
مرام كعادتها طنشت ومشت هي والبنات بش يقعمزوا..
اما هي مشت طول لسميه وقعمزت حداها..
صافحتها وهي تقول:خيرك ياغبيه مانضتيش سلمتي..
سميه:ماخاطريش..
لمياء؛معبطك سميه معبطك تخلي في هادي مرام خير منك..
سميه بلامبالاه؛يشبعوا بيها وتشبع بيهم..
لمياء شبحتلها بنظرة متهكمه..بعدين غيرت عيونها ليهم وهي تشوف لبلقيس تحديدا..
شويه..
وخشوا سعيده وبنتها وامها وبنت خوها..
عيون حدهم طول جو ع البارقه اللي كانت مقعمزة حدا حميده..
تنهدت بضيق وبدت تحول فعبايتها..
حولوا كلهم عبايتهم ومشوا قعمزوا..
حدهم الجده مع سلفتها..
وسعيده حدا نجاة ام بلقيس..
ورزان وحدهم الحفيده حدا غاليه والباقي..
بدت السهريه..
وبدي اول شوط..
وكان حامي بكل معنى الكلمه..
كعادتها فضيله لازم تقعد واقفه ادور ع الناس تغني وتنشط فيهم و بنت خالتها مابطلتش غني..
وسعيده مرة مرة تشوفلها..
وامها مره مرة تشوف لبرقه وبرقه تشوفلها والزوز كان يطلقوهم ع بعض مايفكوهم الا ووحده فيهم قاتله التانيه..
💕نوضت فضيله بلقيس بش ترقص وقعدت تغني عليها عاد هي اجدد عروس فشارعهم ولازم يقيموها بيها..
بعدين نوضت مرام بعد حلفت عليها..
ناضت مرام وقعدت ترقص وغنوا عليها اغاني هلبه منهم اللي تخص درجتها العلميه اللي حصلتها مؤخرا..
وغنوا ع وليدها..
بعدين ع راجلها..
وشرتع يازيتونها...هنيوة نور عيونها..
ومرام ترقص وتضحك..
البارقه..
عيني سلم سيفها...مخليها ع كيفها..
وسميه قاعد تتاكل بنار حسدها من مرام بطق قريب تموت..
ولمياء مش احسن منها حال..
شوي..
ركزوا الزوز بمسامعهم ع حديث يدور بين زوز نساوين..
وحده منهم اخت سالم صاحب هانيبال..قالت..
:هانيبال قداش يحبها ياناس..ليلتها اتصل بخوي الساعه 2 فالليل وقاله جايك..قولي ليش؟..
:ليش؟
:يبي منه يعطيه جيلاطي ع خاطر مرام متحومه عليه..
:الله؟!..كلا مرام هدي حظها من السمي اللي حصلت راجل كيف هانيبال..من فينا ماتمناته..
ضحكت اخت سالم وقالت:قريب بنات القبيله كلهن واني اولهن..
:حي كان يسمعوا رجالتنا
ضحكوا الزوز..وهما مايندروش ع حجم الناراللي زادو سعروها فصدور سميه ولمياء
في نفس الخيمه..
من بعيد شوي..
ريتها ماما هديك هي رزان..
:ماشاء الله تبارك الله..تاريته عنده حق خوك مصلح..
ضحكت وقالت:قتلك من الاول احلى من بنت عمتي بمليون مرة..
:بنت عمتك قدام هدي مهناك شي..ناضت وقالت..بنعدي نكلم امها وخير البر عاجله..
ومشت طول أم مصلح لسعيده...
قعدت لمياء تراقب فيهم وهما يتكلموا ..
بعدين غيرت عيونها لرزان اللي كانت تهدرز هي وبنت خالها..
قالت فنفسها"فالوقت هدا البنات مايحصلوا الراجل لين يكووا عند جازيه العورا..وهادي الفرخه يتعاركوا عليها عراك غير كان نعرف شن شايفين فيها بس"..
🍁🍁🍁🍁
بعد مرور تلاته ساعات..
من الغني وشتاوي والرقيص..
اللي هادي روحت..
🍁من جانا..
غاليه:عماد يمي عماد..
فاطمه؛اه عموده ولدي..
شقلبت لمياء عيونها ومشت طول لسميه طلبت منها تروح معاهم..وسميه مامنعتش..
برا..
كانوا من ضمن هلبه سيارات مدرسه..
سيارة الهادي..
وسيارة توفيق..
وسيارة مؤنس..
وسيارة هانيبال..
وسيارة عماد..
عماد لما لمح مرت خاله طالعه..ومعاها زوز بنات وعزوز..
علا صوت الأغنيه اللي كان فاتحها..
"يامسهر عيني"..
انخلعت رزان لما سمعتها..
عيونها قعدوا يدوروا..لين جو ع السيارة..
قلبها قريب طلع من مكانه 💓..
بلعت ريقها ولحقت امها ..
وحدهم كانت مركزة وزابطه اللي صار..
ركبوا كلهم..
فاطمه:نقص العازي..
عماد بضحكه :امرك طومتي..
نقصه وغاليه وبلقيس يضحكوا بكتمان..
طول تحرك ورا سيارة توفيق..
والهادي ومؤنس كانوا وراهم..
اما هانيبال فكانت طريقه غير عنهم..
💖صوت الأغنيه كان ناقص شوي بس مسموع..
وهي تسمع وشاده روحها..
وتحاول تردد عبارات بينها وبين نفسها تخليها تتجاهل كل اللي قاعد يصير..
بس يقعد القلب ديما هكي متمرد وعنيد مايدير كان اللي يبيه وبس💓
اما عماد فكان هايم مع الأغنيه وهو يشوف للسيارة ويغني بهمس..
"ياحلاوتك وانت على قلبي قاسي..
ياغلاوتك وانت هاجر وناسي"..💓
💕💕💕💕
وصلوا للقطعه..
مؤنس وتوفيق لفوا ايمين..
وعماد وراهم..
اما الهادي كمل طول..
وصلوا مؤنس وتوفيق للساحه المقابله العماره وحوش ميلاد..
وعماد فات من حداهم..ودرس القدام شوي..
انفتحوا بيبان السيارات بعد درسوا..
رباب خشت لعمارتهم هي وراجلها..
وحميده نزلت وهي حاضنه بنتها..
راها عماد لما جي نازل..
صكر الباب..
ومشي بسرعه لخالته..
جت فايته قدامه سعيده قريب انخبط فيها..
شد فرينو فأخر لحظه وهو رافع ايديه يقولوا بربكه:اسف..مسا الخير...
وسعيده ولاحسباته موجود وكملت طريقها..
هو تنهد بضيق ..
جاته خالته وهي تضحك قالت:شدها عيني هاك..
مدتله بنتها..
هو ابتسم بإحراج وخداها منها..
"تصبحي ع خير رزونه"..
تلفت طول...
رزان وهي تأشر بيدها لحدهم قالت:قدامك كل خير..
غيرت عيونها عن بنت خالها جو فعيونه مباشرة..
خلتها وكأنها نظره عابره..غيرت عيونها عادي ومشت لحوشهم..
حميده:بنتي بتموت بالصقع ياهوو.
شبحلها عماد وقال بإرتباك :هي..هاني ماشي..
مشي وهو يشوف لرزان كيف خشت لحوشهم..
بعدين عيونه جو ع توفيق اللي كان راكب ويشبحله بحده..
حياه عماد بحركة الحواجب..
توفيق غير عيونه عنه وردهاله باليد..ومشي خش..
عماد ضحك بفرح لما تجاوب معاه توفيق..
تقول عطوه رزان لما صارت الحركه هادي..
وحميده معاه باللقطه وهي تضحك على حاله..
🍁🍁🍁🍁
تاني يوم..
الساعه 11:30صباحا..
كانت سعيده اضم فالحوش ..
ماكان فيه حد غيرها..
ميلاد وتوفيق فأعمالهم..
ورزان فكليتها..
وقصي فمدرسته...
بعد كملت مساوا لمخاد جلسة الصاله..
وقفت وهي مضيقه بعد سمعت صوت الباب طق...
قالت:من؟!..
"اني يامرت خالي"..
فنصت عيونها..
بعدين غمضت وفتحتهم بنفاد صبر..
ومشت طول بعصبيه للباب..
لقاته خاش...وواقف حدا الكوجينه..
سعيده بعصبيه:من قالك خش؟من قالك؟..
عماد وهو متوتر مسح ع لحيته وقال:مرت خالي استهدي بالله..وصلي ع النبي وعطيني فرصه نحكي معاك بهدوء..
سعيده بغضب:كلمه منك مانبيش نسمعها وقلتها لأمك قبل ونقولهلك انت تو..لو تقعد اطلع فالروح قدامي ياعماد بنتي معاد مازال تحلم بيها..وتو توكل...اطلع برا حوشي...
هو قعد يشوفلها بنظرة غل..
سعيده بصوت عالي:اطلع..
هو هز راسه بإيجاب وقال بتحدي:والله لما ناخدها..
ولف ومشي طلع..
وهو يقول...الله لما ناخدها..
سمع باب حوش خاله تقربع بقوه..
عماد:ان شاء الله تهبلي.. والله بنتك ماضال الا واخدها..
.يتبع..
