ابو نسرين بحب : اليوم بيخطبك سليمان العصر و اهله بيجون معه عشان يشوفونتس
نزلت راسها بخجل وهي ترجع شعرها ورا اذنها : ان شاء الله
حط يده على كتفها ب ابتسامة : فكري فكري وانا ابوتس ترا الحب مايجي منه غير البلاوي استخيري واذا ما ارتحتي برفضه ويجونك عشر احسن منه هذا زواج لا انصّك عليكم الباب محد بيفتحه مره ثانيه ويرجعك على نفس ما انتِ !
انخرشت من كلام ابوها وهي مافهمت كلامه الاخير : مافهمت يبه شقصدك ؟
تنهد بعدم حيلة : اللي اقصده لا انقفل هالباب محد مرجعك على وضعك يامطلقه يا ارمله ياهاجه منه بتكونين من هالثلاث فكري رص على كلمة فكري وهو يشد على كتفها فكري ترا العرس مو طقطقة ووناسه واحبك وحبني ترا ورا هالجانب الحلو جوانب سيئة واولهم المشاكل هي طبيعية بس بتزيد لا حسيتوا انكم مو فاهمين بعض ثانياً العيال هم نعمه من رب العالمين بس يمكن يكونون نقمه يصير فيهم شي بسبب عدم تفاهمكم فكري وانا ابوتس والله ماني بايعك لهم ترا وراك سند تسندين ظهرتس عليه فكري زين وردي انا تحت بقرأ قران لا فكرتي تعاليلي
حبت راس ابوها وهي تطمنه : والله اني ما ابيعك ولا ابيع نفسي بعد انا بفكر واستخير واذا ربك كتب النصيب ف الله يتمم لنا على خير
ابتسم براحة من كلامها وهو يطلع من غرفتها جلست على الكرسي وهي تحس مو مرتاحة قامت تتوضى وتصلي وتستخير للمره الاخيره
-
" امير و جُمان "
اقترب منها وهو يهمس في اذنها : انتِ اللي جنيتي على نفسك وبتشوفين الرد لا تزوجنا لا اخليك تحترقين وانتِ حيه ! ابتعد منها ونظراته تطلق شرار : والحين اذلفي من وجهي ولا اشوفك الا بعد الزواج !
دفته بقوه وهي تصارخ : انت تحسب نفسك ميننن يوم تطردني ؟؟! ابتدت تكسر كل ما في الغرفة مسكت الفازه وهي ترميها عليه انتبه للفازه وهو يبتعد عنها بسرعه
صرخت بقهر : الله ياخذكككك والله ماتحرقني وانا بنت ابوي الا وانا اشوف رمادك بين يديني !
ناظرت فيه وهي تتفل عليه جت بتطلع بس حست انها مافرغت القهر اللي بداخلها سكرت الباب وهي تتمسك بشعره وتشده صرخ بألم وهو يبعدها عنه جُمان بصراخ : والله ما افكك يالكلب !
" تحت في بيت الجد جابر ال مسعد "
نزلت فنجالها بسرعه وهي تناظر في امها وابوها واخوانها
حورية: كأنه صوت جُمان ؟؟
قام فايز وماجد وهم يركضون للغرفة ووراهم امه وابوه واخته وحريمهم
فتح الباب بسرعة وهو منصدم شاف جُمان فوق امير وهي تشد شعره وتضربه وهو يبعدها عنه
فز ماجد وهو يبعدها عن ولده : مجنونة انتِ مب صاحيه !!
قام امير وهو يصفقها بكل ما أوتيته من قوة : وطلاق ماني مطلق وبتجلسين معلقه وبتزوج عليك وخلي افعالك تنفعك !
صرخ الجد بغضب : تراب يدحى فميكم ان شاءالله ! ( يملى ) انتِ كيف تضربينه وانت يالخسيس كيف تقول هالكلام قدامي وقدام عمك !
فايز بعصبيه : وشفيكم !
امير وهو يمسح الدم اللي من شفايفه : بنتك جايه وفارده عضلاتها على انها مسترجله وقويه وتبي الطلاق وانها بترمدني قبل تحرقني اسألك بالله هذا كلام وحده لزوجها ياعم !؟
شهقت وهي تشوفه يكذب : انا انا طلبت الطلاق الله يجعلهم يطلبونك في قضايا مالها اول ولا تالي يالحقير!!
امير : طلاق مافيه من الحين اقولك بعدين ياجدي انت تشوفها زينه ان المره تدخل غرفة زوجها قبل لايتزوجها ولا تشوفها قلة حياء !
الجد : الظاهر اني ماعرفت اربيكم ! كلً ياخذ اهله وامه ويذلف مابي اشوف واحد منك الا هالخسيسين ذول انثبروا هنا ثبركم الله !
طلعوا جميعاً من الغرفة ومابقى الا الجد وامير وجُمان
جلس وهو يفّح بغضب : راضها !
امير بحدة : نعمم ؟؟
شد على اسنانه بحدة : راضها !
امير : هي اللي اخطت ليش اراضيها ،؟
جُمان وهي تعدل فستانها اللي خرب من الهوشه : انت اللي بديت !
امير بحدة: ولا كلمه انتِ !
الجد بنبرة مرتفعة : راضها قلتت!
" بيت ابو راشد "
كان الوضع بالبيت الكل يركض
نزلت العنود وهي شايلة كعبها بسرعه : هند هندد
وقفت هند وهي تنزل المبخره : سمي ؟
العنود : وين سليمان ؟!
هند : توه دخل يتسبح
رمت كعبها بغضب : سبحت عليه اللي مانيب قايله ابوه برا ينتظر ! ، خلصتي انتِ ؟
هند : اي اي
لبسوا عباياتهم وهم ينتظرون سليمان يطلع
" سليمان "
طلع بسرعة وهو يلبس ثوبه وشماغه طلع العود وهو يتبخر فيها والابتسامه شاقه وجهه من الفرحه
دخلوا خواته عليه وهم مستانسين ويصفقون ويرقصون
نط سليمان بحماس وهو يرقص معهم وقف وهم يضحكون على حماسه
نطقت نجود ب ابتسامه : لهدرجه تحبها ؟
تنهد بحُب وهو يقول : ياناس احبها ! والمحبه مقادير .
معي قلب واحد لو تقسمه خمس اقسام بحبها بكل اقسامهَ الخمس وَزيادَة !
سُلاف : تهد الدنيا عشانها ؟
سليمان ابتسم وهو يشوف طيفها قدامه : اهد كل الدنيا لجلها ولجل ارضيها ولجل تبتسم بالدقيقة مليون مرّه !
دخلت العنود وهي تدمع بفرح له : لعنبوا حيها طاحت لها على رجالً يموت بالتراب اللي تمشي عليها مسحت دمعتها وهي تكمل : الله يتمم لكم على خير يارب ويجعلها من نصيبك
ضم سليمان امه وهو يبوس راسها انحنى وهو يبوس رجلينها قام وهو يمد ذراعه لأمه ويبتسم : مشانا ؟
العنود : اي بالله مشانا !
ضحكوا وهم متجهين لأبو راشد وحريمه اللي ينتظرونهم
" بيت ابو نسرين "
دخلت الرّيم وامها وهم يجهزون نسرين ويجهزون القهوة والحلويات
مسحت دمعتها مريم ام الرّيم وهي تضم نسرين : خابرتك ورع بس مدري شلون كبرتم وكبرتوني معكم
الرّيم : الله يتمم لك على خير ياخيتي
جلست نسرين با ارتباك وهي لابسه فستان ابيض ضيق وشعرها منسدل على اكتافها بنعومة وفخامة طلتها
وكان شكلها يفتننن سمت بالله بتوتر واضح
ام الرّيم : الرّيم انزلي شوفي العرب جو ؟
" المجلس "
ابو نسرين كان جالس بالمجلس هو وابو سلطان وسلطان وعيال ابو راشد
ابو راشد وهو ينزل فنجاله : جيناكم اليوم يابو نسرين لجل نخطب كريمتكم لولدي سليمان ونطلبها على سنة الله ورسوله
ابتسم برضا ابو نسرين : وما اردك خايب الله يكتب اللي فيه الخير مير بسأل البنت وان شاء الله توافق
ابو راشد : ابد خذ راحتك
قام ابو نسرين وهو يدخل يشوف
ابو نسرين : موافقه ؟
ابتسمت بخجل وهي تردف بهدوء : موافقه
ابتسم بفرح وهو يردد كلمة : الله يكتب اللي فيه الخير
اعتلت الزغاريط عند الحريم
" المجلس "
فز بفرح وهو يقول : وافقت وافقت !
دخل ابوها وهو. يضحك : مبروكك مبروك والله يتمم لكم على خير
قام سليمان وهو يبوس راس ابوه ويسلم على ابو محبوبته والموجودين
سلطان وهو يشد على ذراعه : مبروك ياخوي
ارتفعت التباريك وهم يباركون له
راشد با ابتسامه : مبروك منك المال ومنها العيال
سليمان بحماس : الله يبارك في اعماركم يارب وعقبالكم
ابو سلطان : حتى انا ؟
ضحكوا على ابو سلطان وهم يعلقون عليه
راشد : انت وابوي وعمي ناصر بنزوجكم سوا
ضحكوا وهم يشوفون وجه ابو سلطان
" عند الحريم "
ابتدوا يسلمون على نسرين وهم يباركون لها
جلست بخجل وهي تبتسم كانت مثل الملاك بينهم وملامحها الجذابه خطفت انظارهم وروجها الاحمر اللي يسحر
" سليمان "
طلب الشوفة الشرعية وهو متلهف على شوفتها دخلت عليه ب استحياء وهي تفرك يدينها ببعض
سليمان : مبروك
نطقت بصوتها اللي سحره : الله يبارك فيك
سليمان : كم لي وانا انتظر هاليوم والحمدلله كتبك الله لي مو لغيري سنة انتظرتك وانا على نار والله انها اجمل الصدف يوم اني صدمتك والتقيت فيك ياروحي!
نسرين : تصدق اني انتظرتك بكل شوق خفت لو لحظه افقدك وتروح من بين يديني لكن الحمدلله على اللي جمعنا فبعض اقترب وهو يقبل رأسها بحب
يوم جديد على الديرة واهم يوم بحياة امير & جمان
" زواجـــهـــم "
" بيت الجد جابر ال مسعد "
" امير "
وقف مع ابوه وهم يختارون الذبايح تنهد بطفش وهو يفتح جواله انصدم من رسالة جُمان اللي للحين مانست هوشة الاسبوعين اللي طافت كانت محتويه هالرسالة
" كلها كم شهر وتطلقني ! زواج الاجبار هذا مايمشي معي ابي اتزوج واحد احبه ويحبني واعيش معه كل عمري ! واكون عائلة معه فاهم ؟!!"
ارتفع صدره وهو يتنفس بقوه وبغضب شديد سكر جواله وهو يساعد ابوه
" جُمان "
صحت على ازعاجهم وصراخ امها وهي تقومها فتحت جوالها وهي تشوف فتح رسالتها او لا عصبت من شافته فتح الرسالة ولا عبرها قامت وهي تتعوذ من ابليس وتدخل دورة المياه " يُكرم القارئ "
" حريم بيت الجد جابر ال مسعد "
كانت الجدة ليالي جالسة وهي تنتظرهم يخلصون تنقيشها
رحاب بتركيز وهي تنقش يد امها ( تحني يدها ) : يمه تكفين لا تتحركين
سحبت يدها الجدة بغضب : صارلتس ساعة وانتِ تحنيني افف خلاص قومي !!!
حورية : يابعيدي ارتاحي مابقى لتس غير يد وتخلصين
دخلت مايا وافنان وهم حاطين اللفافات وشايلين فساتينهم
افنان بتحلطم : يمهه شوفي ضيق علي !
الهنوف بعصبيه : احسن تستاهلين كم مره وانا اقولتس قيسيه شوفي اذا زين عليتس ولا بس الحمار مايفهم وانا امتس مالتس غيره البسيه ولاتزعجيني ! ، اختس قامت ؟
افنان بزعل : اي
" جُمان "
طلعت وهي ضامة الروب على جسدها تنهدت بخوف : الزواج مره بالعمر استانسي وانبسطي ولايكدر عليتس هالمخنز
" امير "
ماجد وهو يمسك ظهره بألم : اسمع ياولدي حط هالشاة بذات عند حوارها والخرفان الباقيه صفهم معها وشوي بيدق عليك المسلخ وده لهم انت وصقر عشان العشاء يخلص بدري ومايتأخر على الضيفان
عُدي بحزم : ابشر !
ماجد : بشرت بالجنة ان شاء الله اخوك وين ؟
عُدي : هذاهو جاك
دخل امير عليهم وهو عليه سروال وفنيلة : سم يبه ؟
نزل انظاره له وهو يرفعها : وراك طالع من البيت بهالشكل ؟
استغرب امير : وشفيه شكلي ترانا بالحوش يبه مب فالشارع
ماجد : لاحول ولا قوة الا بالله خلاص خلاص ادخل وتجهز ورح يم ابوي قيس له الضغط كيف وعطه علاجه بروح اجيب ثوبي من المحل
عُدي : اجيبه لك يبه ؟
ماجد : لا بس انتبه الخرفان واقفل الباب
هز راسه عُدي وهو يدخلها للشبك المؤقت اللي مسوينه بالحوش دخل امير وهى متجه لجده لقى قدامه مسك وهي تضحك عليه
امير : شفيتس !
مسك : احس مو مصدقه انه عرسك الليلة
امير : ليه علامي ؟
مسك : مافيه شي انا بروح امي تنادي علي
ضربها مع راسها بخفه وهو يضحك دخل وهو يرقى يجيب علاجات جده شاف غرفتها مفتوحه وهي لابسة بجامتها البيضاء الحرير ومكياجها وتسريحتها الجاهزين دخل بغضب وهو يصك الباب ويقفله
فزت بخوف وهي تشوفه مقبل عليها وعيونه تطلق شرار : اميررر !
امير : وتراب وشذا الكلام اللي مرسلته تبيني ادفنتس هنا ياللي ماتستحين !
جُمان بنفس النبرة : اكذب يعني اكذب ! اي مابي اتزوج اجباري ومع واحد زيك تدري ليه ؟ لأني ابي اعيش مع اللي احبه ابي اتزوجه لأنه يستاهلني اكون معه اسره وانا مرتاحه !
امير بغيرة : يعني تعترفين انك تحبين واحد غيري !؟
بلعت ريقها بكذب : اي مابي احلامنا تروح بالهواء واحنا ماتزوجنا ونقعد نتخيل نهايات سعيده انا وياه ! ووو
قاطع كلامها صوت الكف اللي دوى بالغرفه من قوته لفت للجهه الثانية
" انتهى "
لنا لقاء ثاني بإذن الله
تعالوا انستا انزل هناك بشكل يومي انستا : wjaff60 🩵❕
ادعموني بنجمة 🪞🩵
"استودعتكم الله "