دخل هذال وعياله وراه وهو يلقي السلام الحار على الرجّال
فرح سليمان وهو يشوف سياف جاء معهم قابله بالمبخره وهو يرقص معه والعيال يضحكون
تركي : اهجد الرجاجيل جوو
هجدوا وهم يستقيمون بهيبتهم وهم يسلمون على ابو بسام وولده بسام
نايف وهو يمسك بسام : الله حيهم
بسام : الله يحيك
نايف : وينك يارجال مطول الغيبات ؟
بسام وهو يغمز له : فتره قصيره واصير عند بابكم كل يوم
ضحك نايف بعدم فهم بس ما اهتم وهم يسولفون
-
" عند الحريم "
دخلت مهره وبناتها ومرت ولدها وراها وهم يسلمون على حريم صالح
سُعاد : يالله انك تحييهم
دخلوا وهم يجلسون وكان المجلس مزدحم بسبب انهم مسويين عزيمة كبيرة عشانهم
ضربت ابتهاج ظهر سُلاف بخفه وهم يسلمون على بعض بفرحة
سُلاف : وينك يالقاطعة ماتقولين عندي بنت عم ؟
ابتهاج : ياروحي وربي اني مشتاقه لكم ولأيامنا
الجوهرة وهي تضحك : يقولون فيه وحدة بتعرس فيكم وينها ؟
اشرت نجود على هند : العروسة موجودة
الجوهرة : موفقه حبيبتي
هند بحب : عقبالكم يارب
ابتهاج وهي ترفع يدينها : امينننن
ضحكوا منها ومن صدمة الجوهرة وهي تضحك
-
" بيت جابر ال مسعد "
الجدة وهي تنتظرهم تحت : قسم بالله ان مانزلتم اني لأطقكم بهالعصاة !
الهنوف وهي تسحب العصاة وترقى فوق تنزل البنات
مايا : دقيقه بشوف دقيقه
الهنوف با استعجال : حلوه حلوه بس انزلي
نزلتهم وهم يلبسون عباياتهم ويتوجهون لبيت ابو راشد
-
" عند الرجّال "
دخل ابو نسرين هو وبنته وهو يتأكد انها دخلت استودع بنته وهو يدخل المجلس ويلقي عليهم سلامه
ابو راشد : الله حيه الله حيه
ابو نسرين وهو يسلم عليه وهو مبتسم : الله يحيك
فرح سليمان انه جاء تأكد ميه بالميه ان نسرين جات فكر انه يقول لنجود تدخله عليها يبي يلمحها مسكه نايف مع يده : اهجد ولا تخرب شي كلها ماغير يومين ونخطبها لك!
دخلت بكامل اناقتها وجمالها اللي يفتن اللي لو شافها كافر قال امنت بالله فلت شعرها با انوثه وهي تسلم عليهم
العنود با انذهال : بسم الله عليك حصني نفسك ترا الزين مايسلم من عيون البشر
ابتسمت نسرين بخجل وهي تسلم على الحريم والبنات
الجدة ليالي با اعجاب : بسم الله ماشاءالله المزيونة هذي بنت من ؟
رحاب : يايمه هذي نسرين خطيبة سليمان
الجدة ليالي بصوت مسموع : افا ثم افاا يا ام سليمان تخطبين لسليمان وحنا ماندري ولا جتنا عزيمه ؟
مسكت سُلاف يد نسرين اللي فزت على بالها خطب غيرها
شرقت العنود وهي تكح : وشنهوو ؟ خطب منهي ؟
انحرجت رحاب وهي قصدها تقول لأمها ان نسرين اللي بيخطبونها لسليمان
الجدة ليالي : المخلوقة ذي تقول انكم خطبتوا بنت ناصر لولدتس
رحاب : يمه الله يصلحتس انا اقصد اللي بيخطبها !
العنود : ذي ماغير تهرج تسذا ماعليتس يا ام ماجد مير لو خطبت له انتِ اول الحاضرين لعرسه ان شاء الله
التفتت الجدة ليالي ام رحاب لنسرين وهي تفصلها تفصيل بعيونها وهي منعجبه فيها : مير والله انها صاروخ واللي يشوفها يدوخ الله يحفظ قلب وليدتس
ضحكوا من كلامها والعنود اللي تدعي ان الله يتمم لهم على خير
تفصيل بسيط للبنات :-
{ الرّيم : اللي كانت من زينها محد يركز على كشختها كثر مايركزون على جمالها اللي خذته من امها وتميزت بشامتها اللي تحت شفايفها كانت لابسة فستان ابيض ضيق ومفتوح من الصدر توب وكعب بيج مفتوح من الاصابع
نسرين : لابسه فستان فوشي ومفتوح من الصدر بدون اكمام والكل اللي شهد على جمالها
افنان : فستان بنفسجي فاتح مُريح للعين وشعرها القصير والشامه اللي مزينه خدها ورقبتها
مسك : فستان ازرق مموج وضيق ووسيع من تحت وشعرها الويفي وروجها النود
جُمان عروستنا : لابسة فستان اخضر ليموني وشعرها الاشقر الفاتح وروجها البينك وجمالها اللي مبرزها }
افنان وهي تشكي للبنات : قسم بالله تعبت وهي تشلعني معها لكل مكان واذا شافت الفستان طلعت فيه الف عيب وعيب !
هند وهي تغمز لجُمان : جُمان خذيني معك حنا على وجه زواج نعرف نختار لبعض
ضحكت جُمان وهي تمد لها يدها بمعنى كفك : تحزمي اجل بكرا احنا عندك
نجود : وع وع مسوين الخوات المتزوجات ترانا معكم حنا بنات خذونا معكم !
ابتهاج : ماش ماعجبوني
جُمان : انا لو باخذ باخذ هند والجوهرة وهنادي الا انتِ تخسين ماتطبين معي للسوق
الرّيم وهي تضرب فخذ جُمان بخفه : وجع يالسلقه وانا ؟!
جُمان : صح والرّيم ونسرين حنا على وجيه زواج
ابتهاج : والله ما اسلق منك غير اختي وبنت عمي
طاحوا يضحكون من الجوهرة اللي كانت بتفسخ كعبها بس ردتها هنادي
نسرين : ياحظك ياهنوده عندك توم وجيري بالبيت
سُلاف : كلها سنة ونصيرلك احلى توم وجيري بس قلب اخوي لايتغير
نسرين وهي تضحك با انوثة : ياخوفي قليبي اللي يتغير
-
" عند الرجّال "
وهم يلعبون بسيوفهم
وقفوا عيال جابر ال مسعد واحفاده بصف مع عيال صالح وهذال ومعهم بسام وهم يلعبون لعب الرجّال وعلى ايمنهم صالح وهو يطلق الرصا/ص بالجو
طلع راشد وتركي وهم يلعبون بوسط الرجّال بسيوفهم
-
سُلاف وهي تفز من طلقات النار : بنات تعالوا تعالوا !!!
الرّيم : علامك ؟
سُلاف : الرجّال يرقصون تعالوا نشوف
هند : انجنيتي والله لو يدري ابوي وراشد دفنونا
سُلاف : ماعليك على مسؤولتي ! يلاااا !
مشوا وراها بحماس وهم يشوفونهم يلعبون دخل عليهم بسام ونايف وهم يلعبون مع راشد و تركي
وصالح ومشعل كل مالهم يزيدون من طلقات النار
نجود : هذاك مين ؟
الجوهرة : اخوي مشعل
نجود : اخو فارس ؟
الجوهرة : اييي
هند وهي تدور بعيونها سلطان نطت بحماس وهي تشوفه واقف معهم بصف العيال ويلعبون : سلطانييي !
الرّيم وهي تمسك راسها : وابلشتي بلشتاه اللي بلشني بك يالخفيفة
هند وهي تضحك : شسوي زوجي احلى واحد فيهم اكذب ؟
هنادي وهي تلعب بشعرها وتشوف تركي : هالمره اقولك غلطانه الا ان تروكي اللي غطى عليهم كلهم !
الجوهرة وابتهاج بصوت واحد : انشهد قاموا يضحكون وهم يسكتون بعض عشان مايسمعون
نجود بغثيان : يععع تزوجوا وابلشونا هااه جُمان بتصفين معهم ولالا لأن اللي بندفنهم الحين ثنتين تبين تصيرين الثالثة وتحطمين الرقم القياسي لهم ؟!
جُمان وهي تضحك : لا لا مو معهم
جلسوا وهم يناظرونهم بحماس
بعد لحظات بعد لعبهم جلسوا بالجلسة اللي برا عشان الجو قام راشد وهو يسحب الثلاجات ومعه سليمان وبسام يساعدونه
وهم يمشون قاطع مشيهم رنين الجوال واصوات شهقاتهم
نسرين بتوتر : طفيههه نجودد!
الرّيم بصراخ خفيف : الله يقلعتس اكتميه كتموك !
رفعت الجوال نجود وهي تسكره زفروا انفاسهم براحة بعد تصميتها للجوال
راشد بشك : به احد هنيا !
شهقت مايا بقوه نطت ابتهاج والجوهرة وهم يسكرون فمها
ضحك راشد بغضب وهو يصر على اسنانه : سليمان بسام ارجعوا وراكم وخلوني
طلعوا وقف راشد وهو يشمر اكمام ثوبه بحدة اقترب منهم وهو يتنحنح : قومي انتِ وياها واندفنوا داخل لأدفنكم !
ماتحملت مايا وهي تطلع له بعصبيه : انت هي هييي شفت اننا سكتنا قلت بتطاول عليهم الرجولة مو بالكلام والدم الحار !
هند وهي تمسك راسها بهمس لمايا: وجع يقص لسانك انطمي
مايا : ماني ساكته تحملته وتحملت كلامه لمتى بسكت !
راشد بغضب : مايا انتِ مالتس شغل من يوم طلعتي من بيتنا وانا غاسل يدي منك انا كلامي مع خواتي وبنات عمي
هند : ادخلوا ادخلوا !
بقت مايا اللي رفضت تدخل عناد فيه
راشد وهو يغمض عيونه بقوه : مايا ادخلي !
مايا ببرود : ماراح ادخل ! اقتربت منه وهي تمسك شماغه : لما تعدل اسلوبك معي ذيك الساعة ادخل اوك ؟
شهقت تهاني بقوه ( تهاني عمتهم اخت ابو راشد وهذال ) : آي اللي ماتنتخين تمسكين رجال مب محرم لتس
تلعثمت بكلامها وهي مو مستوعبه : هاااه ، وشش ،
ش شتقول هذي !؟؟
تهاني : والله اني ما اعدي لكم هالسالفة تبون تطيحون سمعة ابويييي ! وهو بقبره عشان وحده ! مع حفيده جعلك باللي مانيب قايل!
راشد بصراخ : شفيتس انتِ ادخلي الرجال طلعوا على صوتس ادخلي مسك ذراع مايا بدون ادراك وهو يدفها لعمته : ودخلي ذي معتس لأدفنها هنا
نسف شماغه وهو يطلع ويقول : وجع يوجعها !
نسرين وهي تهف على نفسها بمجلة ومتوتره
والبنات اخس منها خايفين على مايا جُمان بعدم تحمل : افف خلاص مقدر اتحمل اخاف مسوي لها شي
هند بحدة : شقصدك ؟
جُمان : انتِ عارفه قصدي زين اخوك كله معصب اتوقع منه كل شي !
سُلاف با ابتسامه مزيفه : سدي حلقك يابعد عمري ماودنا نخرب شكلك قبل زواجتس !
مسكت افنان جُمان اللي كانت بترد دخلت تهاني ومعها مايا
تهاني : اجلسي وخلتس راكده اركدي !
مايا : استغفرالله العظيم واتوب اليك من كل ذنبٍ عظيم! التفتت تهاني للبنات : امسكوها هاه !
افنان وهي تطق الصدر : ماعليك عندنا
تهاني بصدق : من يوم اني شفتس وانا مدري شلون مأمنينك احس وراتس بلاء مدري ليه مير الشكوى لله
ضحكوا البنات من ملامحها المصدومة
افنان : شكراااااً شكراً يعطيك العافية على طحن المعنويات
تهاني وهي تطق صدرها : ابد بالخدمة
طلعت تهاني والبنات يضحكون على افنان
" عند الرجّال "
دخل راشد وهو يفور
نايف وهو يمد له الموية : خذ برد على قلبك
راشد : جعلك تسلم
نايف : اسمعني يابو صبا انت اخوي انا ما اقولك هالكلام هذا عشان تزعل مني بس طنشها عشان ابوي هي جاهلة لاتصير جاهل مثلها وتطيح من عين ابوي
راشد بحقد : يمين بالله ان لـ احرق قلبها اليوم مير اصبر !
فز نايف بخوف : اهجددد بس !
" عند العيال "
سياف وهو رابط ثوبه على خصره وسليمان مثله
فارس : والله لو ابوي درا عنك ياسياف كان حطك بدال هالصواريخ " الطرطعان طراطيع العيد "
سياف : يارجّال مب داري ، سليمان هااه نشغلها
سليمان بحماس : يلا
مشعل : 1 , 2 , 3
بمجرد سماعهم للرقم الاخير اشتغلت ابتعدوا عنها وهم يضحكون
" مجلس الرجّال "
الجد جابر ابو ماجد وهو يكمل سالفته : اي اقولك يوم اننا بالعسكرية كنا نتعب مب مثل هالحين
ابو راشد : اي بالله انك صادق انت خابر يوم رقونا للجبل وحنا حافيين ياووك يا انه عذاب كان
جابر ابو ماجد : والله يارجليني شهر ماطابت بس قطع سالفتهم صوت المتفجرات فزوا برعب وهم خايفين طلعوا لبرا وهم الرعب ماليهم
تركي وهو طالع من دورة المياه : وشصاير !
ابو صالح : صلح سروالك بس !
انفجروا ضحك العيال وهم منصرعين من الضحك
سليمان وهو جالس يضحك : الله يقلع بليسك ياسياف الشيبان ارتقصوا من الخوف " فزوا "
هذال بتعقيدة حاجبه : شمسوين انتم؟
راشد بلحظة ادراك : اهااا السرابيت ذولي قاعدين يلعبون بالطراطيع !
ماجد وهو يفسخ حذاه ويرميه عليه : يالسلنتح سلنتحه
امير وهو ماسك فارس اللي جالس بحضنه ميت ضحك : السموحه السموحه منكم يالشيبان
ابو راشد بكتمان لضحكه : يلا يارجّال الشاهي برَد ادخلوا دخلوا وهم يتحسبون عليهم
" عند الحريم "
وهم يجهزون العشاء
طاح الصحن من العنود وصرخوا برعب مجرد سماعهم لصوت
رحاب بخوف : وشذا الصوت !
العنود وهي تذكر الله : الله يحمينا من الشر
دقت سُعاد على نايف : الوو ، فيه شي ؟ ، اجل وش هالصوت ، والله ان مسكتهم اني لا اصفقهم هالكلابة !
سكرت وهي معصبه
العنود : وشبتس ؟
سُعاد : مشغلين طراطيع
مناهل وهي تدخل على الحريم وتطمنهم : تطمنوا ياحريم بس العيال يلعبون بالطراطيع
الجدة ليالي وهي ماسكة قلبها : حسبي الله على عدوهم خبصوا قلبي !
مسك : بسم الله على قلبك
سُلاف وهي ماسكة نسرين : تجين معي ؟
نسرين با استغراب : وين ؟
سُلاف بعدم مبالاة : تعالي وماعليك
سحبت نسرين وهم يطلعون ويشوفون العيال
نسرين : شتسوين وراك جايبتنا لهم !
سُلاف وهي تدور بعيونها بسام : اصص فضحتينا
تنحنح بسام وهو معطيهم ظهره : شمطلعكم هنا والرجّال تارسين البيت !
صرخت نسرين بخوف فزت سُلاف وهي تسكر فمها : اصصص ، اءء انت ش شتسوي هنا ؟!
بسام : سُلاف ادخلي انا عارف نيتك بس ادخلي !
طلعت الورقة من جيبها وهي تمدها ليده : امسك
عقد حواجبه با استغراب وهو معطيهم ظهره : وش امسك ؟
سُلاف : الساعة 3 كلمني ضروري !
سحبت نسرين وهي تدخل
نسرين بعصبيه : انتِ ماتستحين على وجهك تعطينه رقمك ؟!
ضحكت سُلاف وهي تجلس على سريرها وتلعب بشعرها بدلع : اي ما استحي
وسعت عيونها بصدمه وهي تناظرها : سُلاف انتِ تدرين براشد لو درا عن فعلتك ! ليش تبيعين نفسك له !
سُلاف : لاا عاد مو لهدرجة ابيع نفسي له يخسي ويعقب بس عندي موضوع بكلمه فيه وبعده بحح مافيه لارقم ولا مكالمة ولا غيره ! شرايك ننزل !
-
" بسام "
مسك الورقة وهو يقرا المكتوب ابتسم بحماس وهو يقرا كلامها : الله يطعني عنك بس !
تسلل نايف ومشعل وهم يمسكون بسام نايف :وشتسويي؟!
فز بسام وهو يسمي : اعوذ بالله وشبكم يارجال !
عُدي : عجل عجل وشعندك الضحكة ذي والدعوة تقول ان بك شي
مسك بسام لحيته وهو يضحك : بتعرفون قريب قريب ان شاء الله