#العشق_المتمرد "عندما يزهر الليمون"
#جمان_فريد
الجزء 139 القسم الأخير
⏳..
الساعه 12:00ليلا..
لانه شهر ديسمبر الشتي فيه في عزه بالذات الليل..
خشوا كملوا السهريه فالحوش..
طبعا الجيران روحوا..
وقعدوا نساوين العيله بس ملتمات..
اريج وامال شادات الدرابيك ويدربكوا والباقي بين اللي يغني ويصفق..
زينب
حني حوشنا حوش الهني والراحه
الجود ساسه والكرم مفتاحه..
.....
نعيمه
احني حوشنا عالي ومايتواطى
الجود بابه والكرم عرصاته..
...
غاليه
احني حوشنا الله يعمره بولاده
يجوه الكناين يقهروا حساده..
الكناين شبحوا لغاليه بإبتسامه ماعدا لمياء تصفق وهي تشوف للي يدربكوا وخلاص..
....
حميده
احني حوشنا الله يعمره بتريسه
يجلوا عليه الهم والتغشيشه
....
سعيده
احني حوشنا حوش الكرم والهمه
صغيرهم بين العرب يتسمى..
....
امال
حني حوشنا ملبنة تراكينه..
فيه اوبي واميمتي الحنينه..
....
عزيزة
حني حوشنا عالي وفيه ثريا
البو رايس والام كيف البيه
......
مع بعض غنوا..
احني حوشنا عالي وفي شاشيه
الله يعمره بخيرة الذريه..
🍁🍁🍁🍁
ايه كفايه مش موجوده معاهم..
كفايه روحت هي وبنتها من الخيمه لحوش بوها طول..
بعد غيروا هي وبنتها حوايجهم شدوا تركينه في دار ورقدوا..
وفي الدار التانيه..
نور ودلال ورزان..
دلال ترقد في اسيا..
ونور ورزان يرقدوا فولادهم..
وهما يهدرزوا عن سبب وجود كفايه في الحوش..
رزان:حاسه ان في حاجه صايره حتى عماد مش عاجبني اليومين اللي فاتن..
نور تشبح لولدها اللي راقد وخلاص..تعرف اللي فيها لان امهم حكتلهم هي ودلال...
دلال:معاش تخممي فوتي..
تنهدت رزان بضيق وسكتت..
نور حطت ولدها وغطاته بعدين شبحت لاختها وقالت:بتقعدي هني دلو..
دلال:ايه معاش عندي جهد بنرقد..
نور ناضت وهي تساعد في روحها وتقول:بنولي لحوش خالي نفرهد ع روحي شويه..
رزان حطت ولدها وقالت:راجيني..
ناضت حتى هي ونور ساعدتها..
بعدين مشوا وهما شادات في ايدين باعضات وطلعوا من الدار وهما يهدرزوا...
قعدت دلال معاهم بعيونها وهي مبتسمه بعدين شبحت لبنتها اللي راقده حداها..
غيرت عيونها عنها وشبحت لتليفونها ورجعت فتحت الفيديو وقعدت تتفرج عليه..
وكل مالها ابتسامتها تزيد تتوسع وتكبر..
وقلبها ينبض بقوة وصوت نبضه مسموع..
فجأة وقف الفيديو وطلع فالشاشه من فوق اتصال..
تنهدت من اعماق قلبها..
بعدين فتحت الخط وحطاته ع وذنها وقالت:آلو
وجاها الرد..
بـيعنى واشــــرينى....
💓وقلب دلال فر فران💓
ومازال يلعب بيه بكلماته واسلوبه اللي يسحر وهو يقول..
والعـــــب بعمرى شيلنى او واطينى
سلـــــمت نفسى ليـــــك
اشـــــرى وبيع
سلمتلك دنــــــيا العـــــمر ربــــــيع
وتميت وســـــط ايديك طــــــفل رضــــيع
سلمتلك مـــــفتاح باب كنينى
خـــــــوذ راحتك اعــــلن افراحك ذيع
وخلـــــى السعاده دنيتك هنينى
انت دليلى ونا بــــلاك انضيع
ياطــيف فى عز المــــنام ايـجينى
هي ماقدرتش ترد بغير تنهيده طالع من وسط قلبها الهايم والمتولع بيه..
عمار ابتسم وقال:خلاص عاد الحظر انرفع والحدود انهدت وتوحدنا يا قرة القلب..
هي ضحكت وقالت؛مبارك عليك اني وياسعدك وياهناك بيا ربي يحبك اللي عطاني ليك..
عمار:ههههههه..ااخ يامغرورة..سيورك غدوة تحصلي ونوريك السعد والهني..
دلال بخجل شديد:عماااار!
عمار:لا عمار لا بوعجيله وحق الله ماني ساكت..
دلال ووجهها احمر وهي مبتسمه بخجل:نصكر راهو..
عمار:ديريها باهي خليك مراة وديرها يادلال كان ماجيتكم تو وخديتك من وسط المكان اللي انتي فيه مانبدا عمار مختار وانتي تعرفيني..
ضحكت وبعدين قالت:اممم باهي قولي شن قصة العرض متاع اليوم علاش اني اخر من يعلم!؟
عمار حك مقدمة انفه وقال:تمام انتي بتغيري الموضوع لكن نا تو نعرف كيف نوليله..
ضحكت بكتمان..
عمار:عاااالمهم...مش انتي اخر من يعلم مافي حد كان يعلم غير ناس تنعد ع الأصابع..
رفعت حاجبها وقالت:زي الدكتورة هادي مش عارفه شن اسمها ولا؟
ضحك وقال؛ميريللا..
دلال بغيرة؛باهي بالشويه عليك وانت تقول في اسمها..
عمار بضحكه:ليش كيف نقول فيه!!
دلال:تنغم فيه تنغيم..ميريللا قريب تولي تتكلم لبناني..اني حاسه حتى الاغنيه تحفظ فيها لآسيا عرفتها منها..
عمار:هههههههه..حيلك يامهبوله وين ماشيه بيه هدى كله! اول شي الاغنيه نعرفها من زمان واجد كانت اصاله تحبها وتغني فيها وهي صغيره والفترة الاخيره خطرت عليا وتخيلت بنتنا تغني فيها حفظتها وبديت نعلملها فيها..وتاني شي ياسمحة السمحات..ميريللا دكتورة ليا لااكثر..
دلال وهي رافعة حاجبها قالت:ولعند امتى؟!
عمار:لاخر العمر..
دلال بإنفعال وغيره:والله!!!لا مادخليش بيك والله مانعرفك تغيرها بدكتور يعني تغيرها ياعمار..
عمار قعك يضحك عليها وهي تسمع في ضحكته وتقول:ديما هكي انت احر ماعندي ابرد ماعندك تموت في حرق دمي..
عمار هدى ضحك وقال:يامهبولة المهبولات انتي المراة هدي لو تعرفي كانت مراة من وبعد اسبوع بتولي مرات من تضحكي ع روحك..
دلال برفعة حواجب:الله بتتزوج!!
عمار:ههههههههه..ايه و قولي من هو راجلها؟!
دلال بإستغراب:من هو؟!
عمار بضحكه:عبدالرؤوف..
دلال بتفنيصه:من عبدالرؤوف!
عمار:عبدالرؤوف المصراتي..
دلال ضحكت بصدمه وقالت:هو نفسه عبدالرؤوف صديق بابا؟!
عمار:اها وصديق راجلك..
دلال بضحكه:باهي كيف عرفها ووين..
عمار:قصتهم طويله..
دلال بفضول:احكيلي احكي...
ضحك عمار وقال:باهي..هدى ياسيد بن سيد عام 2007....
🍁🍁🍁🍁
"الله يبارك ياعليك بنات وين مايمشوا مشكورات"
كانوا يغنوا ع رفقه وهي ترقص في النص وامها تتفرج عليها وهي مبتسمه..
لكن رزان كانت حاسه بوجع تحاول ادريه ع الكل ع قد ماتقدر..
شويه وناضت وهي تشبح لأمها اللي كانت لاهيه بالهدرزة مع زينب..
مشت طلعت من حداهم..
وغاليه تشوفلها بإستغراب..
شويه ونور ناضت ومشت بتطلع وراها...
وقفت لما امها سألتها..
نعيمه:وين دلال؟
نور:قالت بترقد..
حميده:ترقد عينها وراها حنه..
نعيمه:بالله حميده بريلها جيبيها نعرفها بنتي اني كان رقدت معاش ترضى تنوض..
حميده ناضت وقالت:ع كيفها ماهو!..
ومشت طول طلعت من حداهم..
ونور مشت وراها وهي تضحك..
بعدين قعدت ادور فرزان..
شافت دار المعيشة لقتها فاضيه زادت خافت..
مشت طول بإتجاه باب الحوش تحسابها طلعت من الحوش..
وين جت خاطمه حدا دار رزان لقت بابها مردود وضيها مفتوح..
جاته وطقت الباب..
بعدين فتحاته وخشت لقت رزان راقده بالجنب ع السرير ووتتوجع..
نور بقلق:رزان!
رزان شبحت للباب وقالت بوجع:صكري الباب صكريه..
صكريه..
نور صكرت الباب وجتها وقالت:خيرك رزان؟
رزان بألم؛وجع ويمشي ع حاله..
نور قعمزت حداها وحطت يدها ع رجل رزان وقالت:تحسي بيه قبل قصدك!
رزان:الفترة الاخيره..شويه ويعدي..
نور بخوف:باهي شن تحسي بالزبط..
رزان غمضت عيونها وقالت بصوت متعب:مغص بسيط...وسكتت
ونور قعدت تشوفلها بألم..
سكتت حتى هي معاش سألتها مرة تانيه لكن قعدت حداها لحظات وانفتح الباب وخشت عليهم رفقه..
استغربت وين شافتهم بهالوضع..
صكرت الباب وقالت:خيركم..
نور :لاشي غير رزان شكلها تعبت شويه من حوسة اليوم..
رفقه ضمت ايديها ع بعض وقعدت تشبح لوجه رزان..
ذابل وشاحب وتبان فيه ملامح الحزن..شبحت لنور وقالت:نور...
شبحتلها نور..
رفقه:مافي شي تاني ولا؟!
نور حركت راسها يمين ويسار وقالت:لالا شن بيكون في؟
رفقه هزت راسها والتفتت ومشت للكرسي خداته وجاباته حداهم وقعمزت...
🍁اما برا..
فكانت حميده خاشه بدلال تجر فيها وهي تقول:وراها حنه وبترقد!
دلال بانزعاج:حنة الهم هادي..
حميده:تحركي قدامي واسكتي محور..
ضحكت دلال بإنزعاج..
بعدين خشوا هي وياها لدار التقعميز..
وشويه وخشوا الباقي ومعاهم حدهم بحاجات الحنه..
وقعمزوهم الزوز ع الفراشات..
حدهم بتحنيها البارقه وسعيده وامال..
ودلال..حميده وزينب ومرام..
دلال:ارجوكم ابدو بإيديا..
حميده:ايه بيش ترقدي..
دلال تأففت..
زينب بضحكه:خل نبدوا بإيديها هي..
ابتسمت دلال وقالت:سلم خالتي الكبيرة هي الراي وهي والشيرة ..
ضحكوا..
حميده:باهي يادلوعه يامشرتعه..
🌹وبدوا يحنوا فيهم ويغنوا عليهم..
مرام وهي تحني في دلال كانت مضايقه شويه ع خاطر خوها اللي سيب البلاد كلها ع خاطرها لمن في نفس الوقت كانت مرتاحه لأن هكي اصلحله..سيوره ينسى..
البارقه:الليله ليلة حنايات وغدوة عند الغالي تبات..
حدهم ابتسمت بخجل..
اما دلال وهي مغمضه عيونها بترقد خلاص بعد بدولها رجليها لما سمعت الاغنيه ابتسمت..
💕وكملوا هالليله ع خير ليلة حلوة لاتنسى وتنحفظ كأجمل ذكريات افراح القطعه وناسها..
💕💕💕💕
تاني يوم..
الأحد..
الساعه 12:30قبل الظهر..
رفقه وهي طالعه من فم البوابه وتتكلم بالتليفون:باهي حبيبي حمد لله ع سلامتك..كلمت بابا توا جايك.......مرحبتين بيهم.......ابتسمت وقالت....تمام عمري باي....باي..
وصكرت ومشت بإتجاه الخيمه...
🍁🍁🍁🍁
قدام دار الضيوف..
عماد:والله ياحمزة ناس كويسه والعقد هديكا مش عندهم..
حمزة ابتسم وقال:حتى لو ياعماد البنت صغيره عليا الحق انب نبي وحده ناضجه تفهم عليا ونفهم عليها..
عماد ابتسم وقال:قصدك عرب كندا..
ضحك حمزة وحرك راسه يمين ويسار..
عماد بإبتسامه:اللي فيها الخيرة يجيبهالك ربي..
حمزة ابتسم وقال:إن شاء الله...بعدين ضيق عيونه وقال..ايه قولي مروان مش جاي للعرس!؟
عماد:لا بيجي العشيه ان شاء الله يكون هني..
حمزة هز راسه بإيجاب وسكت..
🍁🍁🍁🍁
طالع من كليه الطب وهو يتكلم بالتليفون..
مروان:لا والله اليوم عندي مناسبه فرح في***** مش جاي للراديو........تمام مهندسنا نتلاقوا التلات ان شاء الله...تشاوات...وصكر..
وصل فسيارته فتح الباب وركب وصكره...
ولهي بتليفون وهو يشوف فصفحته ع الفيس..
خشلها بيكتب منشور فيه اعتذار من الجمهور على حلقة اليوم...
▪▪▪▪▪▪
وصال اختي وراجلها جوني بنروح خلاص..
:وينه باصكم تالا ليه فتره ماجاكمش..
تالا:فوته بنشترك فواحد تاني..يللا باي صبايا..
ومشت تجري بإتجاه بوابة الكليه..
وصلت برا وين مافي السيارات مدرسات شافت وحده كيا سودا مشتلها تجري..فتحت الباب الخلفي وركبت وهي تشوف لسروالها اللي تلبز بالميه لما كانت تجري:السلام عليكم اسفه عطلت..
مارد عليها حد استغربت واللي زاد استغرابها ريحة العطر الغريبه عليها فالسيارة..
قامت عيونها طول انصدمت وقالت:حيي انت!! حيي اسفه نحسابها سيارة تيفسا..فتحت الباب طول وهي تقول..ياحشمتي..
ونزلت وصكرت الباب..
هو طول فتح الباب ونزل وقعد يشبحلها كيف ماشيه تجري وادور فالسيارات لين لفت سيارة تيفسا راجل اختها ركبت طول...
قعد واقف يشبح للسيارة كيف تحركت ولما جت فايته من قدامه شبحله تيفسا وحياه بيده ردهاله مروان...
بعدين ركب السيارة وهو يضحك..صكر الباب وتحرك طول...
🌴🌴🌴🌴
"وقت غروب الشمس
وقف عالبحر بعيد
عمال بحكيله وأشكيله
وأشرح وأعيد
فجأة لقيتها
وكنت فاكرها عروسة البحر
خارجة من الماية
وطلتها أقوى من السحر
لما شوفتها قلبي
دق تلات دقات
والطبلة دخلت لعبت
جوه دماغي حاجات
لما الرق دخل قلبي
رق وحنيت
طب هعمل إيه
رحت أنا غنيت
إمتى الحب طال
قلبي ولا في الخيال
عودك ده فيه يتقال موال
وياعيني ياه
يا سيدي على الأيام
لما تهادي قلوبنا غرام
فجأة يهون كل اللي فات"
💕الاغنيه هادي كانت والعه في المربوعه الخارجيه لعيلة عبدالله المكان اللي بيديروا فيه حفلة حدهم ودلال..
والبنات وهما يرتبوا فيها كانوا يرقصوا ويغنوا مع الأغنيه..
والعرايس في حوش ميلاد يوتوا فأرواحهم لجية المزينه..
كانوا في دار المعيشه مقعمزات وحداهم صناديق البدالي الكبار يراجو في المزينه وهما يتبادلوا في أطراف الحديث..
💕💕💕💕
اما في حوش عيت مختار..
كانوا هندا وبنات مختار يديروا في اخر طلة ع اجنحه العرسان اللي كانت مفصوله عن بعضها بباب..
وطبعا قروا فيهم سورة البقرة..
هندا في جناح ولدها...
وسليمه في جناح خوها...
وبعد كملو..بخوا مية الرقيه ومن ثم طلعوا وصكروهم كويس...
🍃الحرص الواجب🍃
🍁🍁🍁🍁
الساعه 4:00 عصرا..
في سقيفة الحوش..
كان واقف اويس والصغار حواليه يوزع عليهم فالشكلاطه والحلوة للبنيات الصغيرات بكل..
ونورهان كان مقعمزة مقابلتهم وتشوفله بعيون حاقده معبيه دموع لانه ناداهم كلهم ماعداها هي..
بعد خدوا كلهم مشوا خشوا داخل..
وهو يشوفلهم بإبتسامه..بعدين شبحلها..
غيرت عيونها عنه مسحت دموعها اللي نزلوا وناضت مشت للدار..
هو رفع حاجبه بعدين لف وطلع برا...
🍁🍁🍁🍁
الساعه 7:40 بعد المغرب...
كانوا العرايس الزوز واتيات...
حطوهم في دار حدهم الزوز يراجو امتى يطلعوهم للمربوعه الخارجيه..
دلال:امتى باهي!
ضحكت حدهم وقالت:وليت زي الجندي المدرع واقفه..
ضحكت دلال..
انفتح الباب وخشت البارقه وهي لابسه عبايه ووشاح..
البارقه:ربي يحفظن الله يبارك عليكن..
الزوز ردوا عليها بإبتسامه:تسلمي..
البارقه شبحت لحدهم وقالت:خوتك يبوا يشوفوك..
حدهم:الله!
البارقه بإبتسامه:ايه... هي تعالي معاي..
مشت حدهم مع البارقه..
لما وصلوا في الباب التفتت البارقه وقالت لدلال:شويه وجاياتك...
دلال هزت راسها بإيجاب وهي مبتسمه..
صكرت البارقه الباب..
ومشت بحدهم لخوتها..
كانوا واقفين اخر الممر..
لما شافوها الزوز ابتسموا من قلوبهم بفرح..
عبدالله:ماشاء الله ماشاء الله..
ورمضان يشوفلها بإبتسامه..
حدهم بضحكه:شن جو..
الزوز قالوا:تمام..مليح..
البارقه بإبتسامه:نستأذن..
عبدالله ورمضان هزوا روسهم وهما مبتسمين..
والبارقه لفت ومشت وخلت حدهم مع خوتها...
عبدالله:صح خوتك اصغر منك لكن بنوصوك..خلي راجلك ديما يترحم ع امي اللي عرفت تربي ياحدهم..
تعبوا عيون حدهم دموع وهي تقول:ان شاء الله اكيد..
رمضان:ايااا بتبكيها..اسمعي وخليه يقول ماشاء الله عليك مراة طالعه لخوها رمضان..
ضحكوا هي وعبدالله..
رمضان وهو يمرر فنظره عليهم:علاش تضحكوا قلت الحق..
وهما مازال يضحكوا عليه..
💕💕💕💕💕
الساعه 8:15مساءا..
غاليه وهي واقفه فم باب المربوعه اشرت بيدها لرانيا اللي كانت واقفه حدا المنظومه...
رانيا هزت راسها بإيجاب..
ع خشة العرايس وهما لابسات الكابات..
وحده ورا التانيه..
حدهم شاداتها عماتها عزيزة وامال...
ودلال شادتها حميده ومرام...
الناس كانت ابصارها متوجهه ليهم...
وقفوهم حدا بعض..
بعدين حولولهم الكابات وقعدوا يساولهم في قصاصهم.."الغرة"..
والناس يتفرجوا عليهم بإعجاب شديد...
الزوز حلوات كل وحده احلى من التانيه..
فتحت رانيا اغنية زفه لمحمد حسن..
"صلى الله على النبي"..
وبدوا يدرجوا العرايس بإتجاه الكوشه...
والعيون عليهم..
ورفقه تصور فيهم فيديو...
اسيا وهي تشوف لأمها:محلااااهاااا ماما!!
ضحكوا حناها وخالة امها زينب..
▪▪▪▪
رباب:ماشاء الله الزوز يهبلوا وحدود بانت اكبر من عمرها فيها
رزان بإبتسامه؛ايه..ماشاء الله عليهن..
💕وصلوا العرايس للكراسي وقعمزوا...
واصوات الزغاريد تعالت...
ومحمد حسن يتغنى بجمال طلتهم...
💓💓💓
الحفله كانت حلوة هلبه..ماشغلوش فيها اغاني اخطا اغاني محمد حسن..
رقصوا وهيجوا...وخلوا الليله والعه بأجوائها الجميله...
بعد تلات ساعات متواصله..
بين رقيص واغاني وضيافه
جو اهل العرسان 💓
العرايس وهما يسمعوا فالكلاكسات..
وحده منهم كانت تحاول تخفي لهفتها...والتانيه متوترة ومتحشمه..
شبحت نور لأختها وقالت بإبتسامه:بس بس..
شبحتلها دلال وابتسمت..
شويه وخشوا اهل العرسان..
امينه واصاله وسمر بنت عمهم ونوريه ام هندا..
امينه واصاله لما روا العرايس فرحوا بيهم هلبه..
ونوريه ام هندا عجبتها حدهم ع الآخر..
طبعا..
استقبلوهم احلى استقبال..
وقعمزوهم في احسن مكان...
وضيفوهم...
وبعد نص ساعه..جي وقت المرواح..
مشوا بسرعه لبسوا العرايس كاباتهم....
والتموا حواليهم مع اهل العريس وبدوا يشتوا عليهم...
والعرايس الزوز فرحانات..ومتوترات في نفس الوقت..
آسيا:حنينه..
نعيمه طبستلها وهي شاده دموعها بالسيف:نعم حنينه..
اسيا:بنمشي معاهم
نعيمه:لا بتقعدي معايا الليله وغدوة ان شاء الله تمشوا لماما..
اسيا :باهي..
"ان شاء الله تطلع نايرة..تجي لبوها زايره"
....
"عدي يازينه مربوحه..قدامك بيضا مطروحه"
💕💕💕💕💕
وطلعوا العرايس بعد لبسوهم فوق كاباتهم ملايات سود كبار..
ركبوا حدهم في سيارة عمها سليمان ومعاها مرته وعمتها سعيده ومرت حميدا نرجس..
اما دلال ركبوها فسيارة هانيبال ومعاها مرته وخالتها زينب وعمتها آمنه اللي جت اليوم تحضر...
هي بس اللي حضرت من اهل عبدالسلام..
وتحركوا السيارات ووراهم سيارات اهل العرسان..
لما طلعوا من البوابه الخلفيه للقطعه لقوا موكب كبير يراجي فيهم..
تحركوا طول بعد طلعوا سيارات العرايس...
وهالموكب دار اغلب قبايل البلاد....
لعند ماوصل بداية الشارع اللي فيه حوش مختار..
كانوا الجمله بالكراميد في انتظارهم..
كل جمل كان واقف في جهة...
جابوهم وقربوهم لسيارات العرايس...
نزلوا خوال دلال...وعمام حدهم...
وكان في عندهم غطا كبير...
تساعدوا فيه بش يغطوا بيه العرايس لما ينزلوا من السيارة ويركبوا الكرمود..
في هالوقت..من بعيد شويه..
كانوا في مجموعه واقفين من ضمنهم العرسان وواحد يشعر...
وكانت هادي ابياته...
حتى لو اطول رجاك اسنين ما مرجه انمل **** نرجا فيك حتى لو اطول
حتى لو طويل رجاك اسنين ما لغيرك انميل **** ونعشق صوب ثانى مستحيل وان جانى حلم ما لوالى انعل
انخاف ازعلك يا عين الهميل **** ونا لك يوم ما نحمل زعل ****
فنجع الصوب واقدارك نزيل **** جار اطانب يسود الخجل
اطمن بيك وارتاح الدليل **** عقيل اركاب فى ظلك عقل
طليب ابدين رامنبه الخيل **** على بوزيد وفى عرضه دخل
حتى انكان طال رجاك اسنين **** يا شبه الغزال يام غتيت ع لخاوى اطوال
لوطه لين لقدامك وصل **** اتقول جريد واحة فى رمال فوق نظاف جرعودك نزل
ايه بحق ولله الكمال **** انقول العفوا خوف من الزلل
جميل الله ويحب الجمال **** عطاك الحسن من خلقه الكل
عطاك اعيون فى يوم الاوحال **** افواه اكلاش برودة اعكل
حاجب رسم كيف قوس الهلال **** عقاب الشهر واول ما يهل
وهذبك فوق وجناتك اظلال **** تعقب لين فى ابعاضه احصل
مانقدر بلاك انعيش انهار **** ولا انيس دناك
انتى الامل حتى لو رجاك **** اطول بى ما انعوز السبل
عندى الكون ما يسوا بلاك **** بما يحويه من الاشياء كل
بعدك موت ويحينى دناك **** قبل الموت بحدود الاجل
ورود اربيع فوحه شذاك **** انفاسك كم يبرى من علل
ورياقك بيه تامل من شفاك **** رحيق ازهار من قير النحل
نوصف فيك للى ما رأك **** وصفك كاد وصافك اوحل
ما رسام برسومه اوفاك **** وخيال الشعر ما لوصفك اوصل
بديع الكون من لطفه عطاك **** وصف الحور به وصفك اكمل
مانقدر بلاه حتى كان يطاول رجاه **** عندى قلب عايش بى هواء
شريك انفاس ما منه عزل **** نبض بيه سارى فى دمه
ان غاب الورد فى غصونه اذبل **** ويزه بيك فواحه شذاه
اجنان الصوب من طلك هطل **** يا توصيف هلى فى خلاه
تنوخص وين رى ظله جفل..
💕وهو يشعر..
ركبوا العرايس الكرمود وغطوهم زين...
وبدوا يسوقوا في الجمال للحوش...
وعرسانهم يشوفوا وكل واحد فيهم واصل حده من اللهفه والشوق...
في الكراميد..
حدهم بخوف وهي تهمس:يارب استر يارب يارب استر..
اما دلال..
دلال بإبتسامه لهفه وهي تهمس:هي عاد خف روحك ياجمل تربح..
وصلوا لفم الحوش..
وخشوا بيهم داخل...
بركوا الجمال...
وبدوا ينزلوا فيهم....
بعد نزلوهم..
طلعوا طول الرجاله...
والنساوين جو للعرايس شدوهم ومشوا خشوا هما وياهم داخل..
💕💕💕💕
الساعه 1:00ليلا..
مقعمزة ع السرير وهي في قمة التوتر..
ومرة مرة تشوف لروحها في المرايه...
فجأة سمعت باب انفتح وتصكر..
حدهم غمضت عيونها وقالت:ياربي...
سمعت خطواته قربت من باب دار النوم..
شبحت للباب المفتوح..
شويه وبان عليها...
قلبها قريب طلع من صدرها..
هو ابتسم وقال:السلام عليكم..
حدهم ابتسمت وقالت:وعليكم السلام..
قدملها وجاها قعمز جنبها وهو يشوفلها وهي تشوفله..
ايمن؛الله يبارك..زدتي جمال ع جمالك..
حدهم ابتسمت بخجل..
وايمن ضحك بعدين شد وجهها بإيديه..
قعدوا يتأملوا في عيون بعض بنظرات كلها حب وشوق..
بعدين قرب ايمن منها وباسها ع راسها...
وهي غمضت عيونها وع وجهها ابتسامه حب..💓
💕💕💕💕
واقفه قدام المرايه تخاطب في نفسها..
دلال بتوتر:خيرك يابنت توا كنتي عاديه..علاش توترتي هكي فجأة..
سمعت باب تصكر وانفتح..
بلعت ريقها وشافت للباب طول..
والقلب بيفر💓
شويه وخش...
هي انفاسها تسارعت بالذات وين شافت ابتسامه حلوة بالمرة ارتسمت ع وجهه..
لفت بجسمها كله ناحيته وهي تشبحله..
وهو بدي يقدملها خطوة خطوة..
لما وصل فيها وقف..
وقعد يمرر في نظراته العاشقه الولهانه ع ملامح وجهها الجميل...
وهي تشوفله بنظرات كلها غرام واللهفه باينه فيهم..
هو كالعاده اشعاره لازم تعبر عن مايجول في قلبه وخاطره..
بدي يقول وهو يتأمل فعيونها..
💓 ريم غزال اوصاف عطاها .. يامحلاها .. سبحان المولى سواها
كيف ملاك الحور نشاها .. وين اتمر .. عليها لعيون ابتنضر
وتصبح ملهوفه ابملقاها .. اتقول قمر .. افوان اطلوعه العين سحر
جميله والسالف غطاها .. انكان حدر .. علي الضبنون ايجي هادر
وليها ريق سكن اشفاها .. ماهو مر .. عسل امخلط بي زعتر
و بيضه يشكع نور عضاها .. العين بهر .. امفصل في شكله نادر
وعين اتقابل في مثناها .. الي يبصر .. نداوي في وصفه امحكر
وبالخد انكمل دكراها .. ابلون حمر .. طغي عالكون ابها نور
وهدا القول عشان اسماها .. ريم البر .. غلايا ليها ماهو سر...
💓شد بإيديه الزوز وجهها وبدي يقرب ولهفة العطشان للمية كانت لهفته..
هي غمضت عيونها وهي ملهوفه زيه..عطشانه لوصاله بعد فراق سنين بأيامها ولياليها...
هو ابتسم لما غمضت عيونها وقعد مركز بنظره ع الهدف وبس..
ووصله...
وكانت اول قبله بعدين سبع سنين عجاف...
قبله الزوز تبادلوا فيها شوق لايمكن وصفه..
هو نزل ايديه وحاوطها من ظهرها وضمها ليه...
وهي لفت ايديها وحاوطت رقبته..
والزوز غارقين في احلا شعور يحسوه العشاق فهاللحظه..
كانت قبله طويله..عميقه..الزوز فيها نسوا الدنيا ومن عليها..
ومافكوا بعض..مافكوا بعض الا بش يلتقطوا انفاسهم..
فكوا بعض بس قعدوا قراب ع بعض وهما شادين بعض..
عمار وهو ولهان فعيونها:اااه ياريمي..ياعرق قلبي..ياروحي..ياانفاسي..ياهواي..ياماي..ياعمر عمار كله..ياحياة عمار كلها..ياسر فرحتي وحزني...ااااه يادلال اااه..نا وصلت لمرحله في العشق لتو مالقولها اسم..
دلال وهي تشوفله بعيون ذبلها الشوق:اني شن نقول مالا..اني ماحسيتش روحي عايشه كان توا بس..روحي انت راك روحي...نموت فيك اني عماري..
عمار:اااه يانار عمارك منك جننتيه عمارك انتي سلبتيه سلب..
ورجع باسها مرة تانيه وكانت قبله شبيهة بسابقتها...
لحظات وبعدوا عن بعض..
ضحك عمار وقال:دلولتي فكينا من ذهاب الشيره..خل نطبقوا السنه وبعدين تنذهب شيرتنا ولاجعلها ولت..
دلال:هههههه..
عمار:ماعندي معاك عزم ياهوو خفي عليا تربحي..
دلال بضحكه:باهي..لكن قبلها عاوني نحي هدا كله..
عمار ضحك وبعد عنها وقال:حااضر..
حول العمامه متاعه...حطها ع السرير...
ودلال تتأمل فيه..
بعدين حول الجرد وحطه ع السرير..
كيف جاي بيشبحلها يكلمها لقاها جاياته..
لفت ايديها ع رقبتها وضماته بقوة وهي مغمضه عيونها..
هو قال بضحكه:دلال!..
دلال دموعها نزلوا وعيونها مغمضات وهي تقوله بنبرة:نبي نصدق عمار نبي نصدق انه حق واني مانحلمش..انت ماتعرفش قداش مرة عشت اللحظه هادي فاحلامي واني راقده واني فايقه لما نستاقض منها نقعد نبكي بمرار..وحسرة ووجع..
هو طول دمعة عينه نزلت..
ضمها بقوة وهو يقول بنبرة مخنوقه:سامحيني ياعمري نا اسف اسف..سامحيني..
هي زادت ضماته وقعدت تبكي وهو وزاد ضمها اكثر ودموع عينه مابطلوش نزول..
💕💕💕💕💕
بارك الله فيك ياميلاد ياوخيي..
ميلاد:خير عمكن انتن اللي نديرلها حاجه تشكرني عليها تقول مش خوكن بكل..
زينب بضحكه:ياودي هدا برتوكول مشيه وخلاص وقوللها فيك بارك الله..
ميلاد:انتي من كلمك..
شبحولها وقعدوا يضحكوا..
زينب:غير وليت جد بس..
ميلاد: وكاني مش جد شن بديري!!
سعيده بضحكه؛موليه بصارته رزينه يازينب قصري معاه خيرلك..
ميلاد شبحلها وقال:اسمعي منها راهي مجربه لين باكيه..
كلهم:ههههههههه..
وسعيده تضحك وهو ماطة شواربها للأسفل..بعدين نعيمه قالت:الفال لفرح رمزي وقصي..
ميلاد ابتسم وقال:ان شاء الله تسلمي وربي يفرحك بضراريك...
زينب:يفرحها هي بس!
ميلاد:واااك..ياودي كلكن ربي يفرحن بعويلتكن وعويلة عويلتكن عليك حصله..
قعدوا يضحكوا ع زينب وهي تضحك معاهم...
هالحديث كان بين ميلاد وخواته ومرته وبنته وبناتهم يدور في ممر حوشه..
اما في ممر فم البوابه..
من غدوة الصبح..
مالك:حاضر يام..
كفايه:الساعه تسعه..
مالك هز راسه بإيجاب..
وهي خشت داخل طول...وهو معاها بعيونه وكان مضايق ع الآخر..
تنهد بضيق ولف ومشي ولى للمربوعه..
وفي روشن الكوجينه..
كانت لمياء واقفه تسمع فاللي صار بين كفايه وولدها وعندها فضول كبير تعرف شن صاير بين كفايه وخواتها...
🍁🍁🍁🍁
مابعدكن والله..
دلال وهي قاعده في القمجه والسروال:الفيلو مازال اخف.
عمار وهو يصكر في صندوق الخناق:لكن لبسنا احلى..
دلال بإبتسامه:اكييد..
رفع الصندوق وقال :وين نحطه..
دلال مشت للدولاب وهو يمرر فنظره عليها بإبتسامه جانبيه..
فتحت الدولاب وقعدت تشبحله وهي تحرك
فشعرها بإيديها قالت بحيرة:اممم..باهي ترا تعالى حطه هني..
جاها وصل في الدولاب وحطه وين ماقالتله..
شبحتله وقالت:ايه حقه عماري..
حاوطها من خصرها وجابها لحضنه وهي حطت ايديها ع صدره وعيونها فعيونه..
عمار:روحه عمارك هدى..
ضحكت وهي تلعب ببطم الفرمله قالت:حبيبي عرس رمزي ورانيا في اربعه..
عمار وهو يمرر فنظره ع ملامح وجهها قال بإبتسامه:باهي.
دلال قعدت تتصخفله وهي تقول:ع خاطري حبيبي خلينا هني لبعد العرس قلبي انت..
عمار ضحك وقال:باهي اسمعيني نسافروا شهر العسل نقعدوا شهر كامل في البلاد اللي بنعدولها اللي مانيش قايلك شن هي تو..وبعدها نروحوا هنى نقعدوا لعند العرس..
ضحكت وضماته وقالت:نجيه ياربي اللي ديما واخد بخاطري..وطبعت بوسه ع رقبته..
عمار:هيييه هووه الصلاه يابنت الناس الصلاة نصلوا قبل..
ضحكت دلال وبعدت عنه وهي تقول بدلع:واني شن درت..
عمار لف ومشي وهو يقول:مانكش جابيتها البر انتي..
ومشي طول طلع من الدار وهي تضحك عليه..
💕في هالوقت..
كانوا العرسان التانيين متعديين كل المراحل بنجاح..
وتهنت العروس💕
🍁🍁🍁🍁
بس بنت عمتها كانت راقده في دارها ع سريرها وهي متعبه..
رجعت حست بالمغص مرة تانيه وهالشي كان مخوفها هلبه..
وراجلها مشغول عليها يتصل بيها ماتردش لين اضطر يكلم غاليه وهي طمناته وقالتله راقده...
ومع هدا كان واخد قرار يروح بيها تاني يوم الصبح ع خاطر موعدها عند الدكتوره...
🍁🍁🍁🍁
كان طارح الصلايه وفي كرسي في اخرها وهومقعمز ع السرير يراجي فيها تطلع من الحمام..
بش يصلوا..
شويه وخشت عليه وهي لابسه روب الدخول..
غير عيونه وقال:قاتل الله شياطينك..
هي ضحكت وقالت:خمسة بس خل نلبس الملايه..
عمار قلبه يرف رفان💕
لبست وكملت وقالت:خلاص لبست.
هو ناض بدون مايشوفلها وقف ع الصلايه...
وهي وقفت وراه..
رفع ايديه وكبر..وهي كبرت بعد..
بعدين حط ايديه ع صدره وبدي الصلاه.
وهي خشت في حالة الخشوع مع صوته..
صوته ولى اجمل من قبل وتلاوته مختلفه..
عيونها دمعوا وهي تسمع فيه يقرا..
وطول الصلاة كانت في داخلها تحمد ربي ع هاللحظات اللي عايشتها...خلاها ربي اسعد من خلق فهالليله..
"السلام عليكم ورحمة الله...السلام عليكم ورحمة الله"
هي سلمت بعده..
بعدين هو التفتلها وهي شبحتله..
ناض من الكرسي وجاها وهي وقفتله..
وصل فيها..حط يده ع راسها وبدي يدعي..
وهي تشوفله..
بعد كمل نزل يده وقال:هي..ورينا الحلاوة اللي عيوني خانوني بيها..
ضحكت وبدت تحول في الملايه..
هو راح فيها💕..
طول جاها....
وهي تراجي فيه...وبدت عاصفه شوق هوجاء..
الزوز فيها كانوا يعبروا عن شوقهم فيه تعبير كله ثورة وتمرد..
ماكانش هام دلال وضعه وقتها..
وهو كان واثق من نفسه من ثقته بعشقها ليه اللي عبرت عنه دلال بكل جرأة حطمت فيها كل القيود..
ماتنلام..ولاهو ينلام..
العشاق ماعليهم ملام...
دلال بهويام:نحبك اني..
عمار بعشق:نا نموت فيك ونعيش بيك ياعسل انتي ياعسل ياربي شن هدى.. وعض خدها وهي تضحك...
💕💕💕💕💕
حنينه..
نعيمه:امممم..
اسيا:شن يديروا بابا وماما توا؟! راقدين؟
نعيمه وخواتها قعدوا يضحكوا..
حميده بضحكه:جاوبي ياحنينتها..
نعيمه:ايه راقدين وحتى انتي ياسرك سهر وارقدي وكتفتها بالبطانيه واسيا تضحك بعدين قالت:غدوة بنرقد معاهم..
زينب بضحكه:ايه باهي!
كلهم ضحكوا..
🌹واسيا ليلتها مارقدت كان بالسيف..وحناها وخالات امها حصلوا عليها جو بعدين اللي هادي جاها النوم ورقدت..
🍁🍁🍁🍁
وع بعد مسافه بسيطه من قطعتهم..
كانت كنتهم السابقه حتى هي تستعد للنوم..
قبل ماتجيها رساله ع هاتفها..
استغربت وخدت تليفونها وفتحتها..
(كاره الدنيا ومافيها من غيرك..بلقيس معاد نقدر بنبعت هلي يردوك يابلقيس)
هي عاودت قرتها وهي مصدومه ع الآخر ومش مصدقه..
وجسمها كله يرجف...
بعدين نزلت التليفون وقالت بصدمه:يردني!!!؟
~~~~~~~~