زهرة🌸

الحلقة الستون

حلقة 60
🔸️هند تحكي:
عديت عينيا عالطاولة...نغزرلهم بالواحد...اول مرة نحس روحي مرتاحة...اول مرة نحس بطعم العيلة...سنين تعدات...غابت الفرحة فيهم...عمر رجع معاه كلشي باهي كملت فطوري...و هزيت روحي نحكي
انا:لازمني نمشي توا
عمر:استنى نوصلك
انا:لا متعبش روحك...اسيا تستنى فيا لبرا
عمر:باهي عزيزتي
بابا:رد بالك على روحك
انا:باهي بابا
تبسمت لزهرة...هزيت صاكي و اوراقي و خرجت..سلمت على آسيا...لقيتها تطلع عالباب...تبسمت نحكي
انا:قاعد يشبع في كرشو عزيزتي
اسيا؛على شكون تحكي ؟
انا:باش تعديها عليا توا
اسيا:بااهي...باهي...لي يغلبك يجي يحاسبني
انا:هيا برك
شديتها من يدها...شايخة عليها...توا اسبوعين تعداو بعد اخر لمة جمعتنا...و رجعت عمر لدار...دخلنا مع بعض عديت الحصة لولا و شديت بيرو المدير...اول ما دخلت غزرلي يحكي
هو:تفضل هند...تستحق حاجة ؟
انا:اه...لا...نسأل على مسيو فرات...حاجتي بيه
هو:تعرف لي ميجيش ديما...اما كان تحب...تو نخبرو لي حاجتك بيه
انا:لا ميسالش عيشك
هو:باهي
رجعت لتالي...و سكرت الباب...نفخت بالقاوي...تقريبا اسبوع لا ريتو و لا حكيت معاه...و توا كي حاجتي بيه معادش ظهر السخطة...ضرب في راسي نومروه...هزيت تليفوني...بقيت مترددة بين نطلبو و لا لا...اما معادش عندي حل اخر...باش نخرج سلمى من اللي هي فيه خذيت نفس و طلبتو...شوية و هز عليا يحكي
مراد:ياخي كنت تحلم بيا انتي ؟
كبست عالتليفون في يدي...ديما يتعمد يكرزني بكلامو خذيت نفس مرة اخرى...نحكي
انا:صباح الخير سي فرات
مراد:صباح النور
انا:تعديت للمكتب اما ملقيتكش
فرات:تحب تغيب مرة اخرى
انا:لاا
مراد:ملا
انا:اه...ص...صراحة...انا
مراد:شفما هند ؟
انا:لازمني نراك...كان تنجم تتعدا للمعهد مبعد
مراد:معينيش
انا:باهي...سامحني كان قلقتك
جيت باش نعلق...وقفني صوتو مرة اخرى...يحكي
مراد:لحظة
انا:شنوة ؟
مراد:تنجم تجي انتي
انا:شننوة...وين نجي ؟
مراد:عندي
انا:باز هبلت على روحك انت
مراد:مانيش باش ناكلك...كان حاجتك بيا...تنجم تجي الفترة هاذي...واحل بالخدمة
انا:اما...
مراد:نستنى فيك
انا:باهي...وينك انت ؟
مراد:تو نبعثلك العنوان في ميساج
انا:باهي
كبست عالتليفون و علقت عليه...رجعت للكلاصة..هزيت صاكي...غزرتلي تحكي
اسيا:وين ماشية انتي ؟
انا:آسيا لازمني نخرج توا..تو كي نرجع نحكيلك استناني هوني باهي
اسيا:باهي...رد بالك على روحك
انا:باهي
خرجت بالسرقة...وصلني الميساج بالوقت...حليتو نقرا فيه...عينيا وساعو...كي ريت العنوان...تي كيفاش يسكن غديكا هذا...منجمتش نستوعب...خذيت نفس و خرجت نستنى في طاكسي...نفخت بالقاوي..دوب تتعدا طاكسي من هوني...مصدقتش كي ريت وحدة جاية...وقفتها و ركبت...منعرفش اذا لي نعمل فيه...صحيح و لا غالط اما عالاقل نخرج بنتيجة...منعرفش كيفاش وصلت عديت عينيا عالبلاصة...كانو مش هي لي كانت قبل شنية عمل السخطة هذا...قربت شوية من الباب...لقيت الشوفور متاعو برا...غزرلي يحكي
اشرف:تفضل مدموزال ؟
انا:حاجتي بسي فرات
اشرف:لحظة نخبرو
انا:باهي
اول ما دخل...خلطت عليه...نمشي وراه...فرد وقت نعدي في عينيا عالقصر القديم..هكا كنا نسموه..بالرسمي طلع محلاه من داخل...متوقعتش لهو هكا من داخل طلعت راسي شوية...نغزرلو...مسطح عالكرسي متاعو في الجنينة...متكي راسو لتالي...جا اشرف باش يحكي وقفتو نحكي
انا:انا هوني
اشرف:مش قتلك استنى برا
انا:والله معنديش وقت كيفك...سي الشوفور...ورايا برشا قضيات...و زيد هذا...نقصد فرات...سي فرات يعرف لانا جاية لهوني...باهي
اشرف:اما..
مراد:تنجم تخرج
اشرف:باهي
مراد:تفضل لالة
عديت عينيا...عالجنينة...و رجعت غزرتلو...نحكي
انا:لازمنا نحكيو
مراد:اقعد ساعة
انا:مش لازم
مراد:ملا مانيش مظطر اني نسمعك من اصلو
انا:باهي باهي
قعدت قدامو...و كبست على صاكي...غزرلي يحكي
مراد:شنية تحب تشرب ؟
انا:حتى شي...لازمني نرجع للمعهد في اقرب وقت
مراد:و عندك تبرير للغياب هذا ؟
انا:لااا عاد...ماكش باش تحسبو عليا...هاني قتلك
مراد:باهي...يا فرخة
انا:ياخي باش نسالك قبل
مراد:مممم
انا:ياخي كيفاش نجمت تكري البلاصة هاذي
مراد:شريتها
انا:شنننوة ؟
طلع حاجبو مستغرب...وقتها شلقت بروحي...خذيت نفس نحكي
انا:سامحني...اما كيفاش نجمت تشريها ؟
مراد:مهم برشا سؤال هذا ؟
انا:ممم
مراد:نجم نعرف السبب ؟
انا:مفما حتى سبب...جيست مرة بابا...حاول يشريه...اما قالو ملك دولة...و لا ندرا شنية...و زادة طلبو فيه برشا على هذاكا استغربت
مراد:توا ولى تحت تصرفك
انا:معناها نجم نراه من داخل ؟
مراد:اكيد
انا:اما مش توا...لازمني نرجع بكري
مراد:اكيد مجيتش باش تسألني عالدار
انا:اه...لا...فما موضوع صغير...نحبك تعاوني فيه...اما كان متحبش...مش لازم باهي
مراد:نسمع فيك
انا:مش المعهد ولى متاعك توا ؟
مراد:مممم
انا:معناها تنجم توظف اي حد
مراد:تحب تخدم ؟
انا:مش انا
قحرتلو...و تلفت عندو بالقدا...ضيق عينيه...يحكي
مراد:باهي لالة كمل
انا:بنت خالتي...باش تقدم طلب متاع خدمة عندكم غدوة...نحبك تقبلها على أساس الشهادات متاعها...نعرف لانتو ما تحتاجو حد في المعهد...اما الخدمة هاذي مهمة برشا ليها صدقني
مراد:شنية نوع الخدمة ؟
انا:منعرفش...بروف و لا سكريتيرة...هي تفهم برشا في المواضيع هذوما...و حتى رسوماتها مش نورمال
مراد:متأكدة ؟
انا:كملت جامعتها...عندها برشا...و بعد ما توفات امها زادة...معادش فكرت في حتى شي يفيدها...متأكدة الخدمة هاذي باش تعاونها برشا
مراد:باهي
انا:معناها باش تقبلها
قرب مني شوية...حط وجهو في وجهي...دخلت بعضي و كبست على صاكي اكثر...نثبت في عينيه...مزيج بين الاخضر و الاصفر...مريتش كيما لونهم من قبل...تبسم على جنب يحكي
مراد:مش انتي طلبت...اكيد باش نخدمها
انا:و باش يبقى سر بيناتنا
مراد:اكيد
انا:باهي عيشك
تبسم ندرا كيف...و تكا لتالي...كبست على صاكي و وقفت نحكي
انا:لازمني نمشي توا
مراد:مقتليش شنية اسمها بنت خالتك ؟
انا:سلمى
مراد:باهي
هز تليفونو و خلط عليا...تلفت عندو شوية...نحكي
انا:وين ماشي انت ؟
مراد:نوصلك
انا:لااا...لاا...مش لازم...تو نمشي وحدي
مراد:ماكش باش تلحق
انا:منحبش يراني حد معاك
مراد:الكرهبة متبينش...و زيد نحطك في المعهد...احسن ما تتحط في مشكلة
انا:مش على اساس معينكش ؟
مراد:توا ولا عيني فيه المعهد...امشي برك
انا:باهي
شد مفاتحو على شوفور...و فتحلي الباب...كبست على صاكي و ركبت...معنديش حل اخر...لازمني نرجع بكري...بقيت طول الثنية ساكتة لين وصلنا...تلفتلو نحكي
انا:مرسي عالتوصيلة
جيت باش ننزل...شدني من يدي...تلفت عندو بالوقت غزرت ليدي...و رجعت غزرتلو...تبسم يحكي
مراد:باش نراك مرة اخرى
انا:اكيد...مش انت المالك هوني
مراد:منقصدش المعهد
انا:ملا
مراد:في رايي لازمنا نقعدو مرة اخرى
عديت عينيا على وجهو...جبدت يدي منو...و حليت الباب...نحكي
انا:مفماش داعي
مراد:اكيد باش يكون
انا:لازمني نمشي
هزلي براسو ايه...خذيت نفس و نزلت...اول ما سكرت الباب...طلعت الدروج نجري...لين حسيت نفس تسكر عليا...منعرفش شبيني...لتوا مش مستوعبة لي قاعد يصير...و لا شبيني في الحالة هاذي...فقت من سرحتي على صوت آسيا تحكي
اسيا:وينك لتوا يا طفلة ؟
انا:هاني جيت...خلينا نخرجو توا...و مبعد نحكيلك كلشي
اسيا:باهي...باهي امشي برك
هزيتلها براسي ايه...و مخي مش فوقي...نتبع فيها من غير حتى كلمة...دوب نجمت نفهمها لي صار في الثنية اول ما دخلت لدار...طلعت لبيت سلمى...لقيتها غاطسة في كتابها كي العادة...ترميت بجنبها نحكي
انا:ياخي مفديتش من القراية ديما
سلمى:لا عزيزتي
انا:اسمعني وعدتني باش تقدم طلب متاعك غدوة
سلمى:هاني نرا فيك...متحمسة اكثر منك
انا:بالطبيعة...لازمني معارف في المعهد هذاكا و لا باش يطردوني
سلمى:ههههههههه توا وين فهمت
انا:هيا عاد...باش تقدم و لا لا
سلمى:باهي باهي...لي يغلبك يجي يحاسبني
انا:هاني باش نقوم توا ملا...نرتاح شوية...و نمشي بحذا زهرة
دوب تبسمتلي...و هزتلي براسها ايه...مديت يدي كبست على يدها نحكي
انا:سلمى...توا زهرة وحدة منا...و ما عندها حتى حد غيرنا...والله طفلة حلوة و تتحب...مش لازم تحملها حتى ذنب...باهي عزيزتي
سلمى:اكيد عزيزتي تهنى
انا:عيش اختي...هاني باش نقوم توا انا
سلمى:باهي
خرجت من عندها...و دخلت لبيتي...طيشت صاكي عالارض...و ترميت عالسرير...نغزر لسطح...كاني نغزر لتفاصيلو...منعرفش شبي صورتو بين عينيا توا...هزيت براسي لا...برشا مرات...و تلفت لشيرة لاخرى...غمضت عينيا بالقاوي...نحب ننسى كلشي صار...و ما نخمم في حتى شي...اصلا زايد لي قاعدة نفكر فيه توا...منعرفش الراجل هذا علاه جا لهوني...ظاهر فيه بفلوسو...علاه حتى يجي لهوني و يشري حاجات ماهيش باش تفيدو غريب برشا لي قاعد يصير...غميت على راسي....باش معادش نخمم فيه اكثر...منعرفش كيفاش غفيت و هزني النوم.
🌸🌸🌸🌸🌸🌸🌸🌸🌸🌸🌸
🔸️زهرة تحكي:
علقت على مريم...و ترميت عالفوتاي...وليت نحكي معاها...تقريبا كل يوم...مع انو مش حاستها لباس...اما ظاهر من الوحم...توحشتها برشا...مريم كهو لي تنجم تفهم عليا...منعرفش علاه بعد ما جينا لهوني...نفسيتي تعبت اكثر...نرتاح كان كي يبدا هوني معايا...هزيت روحي بالسيف...باش نخرج بحذاهم...منعرفش علاه ديما نحس روحي غريبة بينهم...خاصة كي يبدا عمر موجود...رجعت شعري لتالي و خرجت..دخلت للكوجينة نغزرلها...منعرفش فاش قاعدة طيب...الطفلة هاذي..على قد ما هي هادية...على قد ما هي غريبة شوية...عبيت كاسة الما...شربت منها نحكي
انا:فاش تعمل ياخي ؟
سلمى:نحضر في الحلو...لسهرية
انا:نجم نعاونك ؟
حطت من يدها...و تلفتت عندي...تبسمت ندرا كيف تحكي
سلمى:لا عزيزتي ميسالش...احنا عندنا الضيف ما يحط يدو على شي هوني
انا:باهي
سلمى:اما كان تحب تنجم تخرج البوبال معاك...حطها برا
بقيت نغزرلها مستغربة...متوقعتش باش تطلب مني حاجة هكا...تبسمت باستهزاء...اصلا طفلة هاذي مش غريبة كهو...نحسها مطيقش تغزرلي...و لا تراني قدامها منعرفش شنية السبب بالظبط...اما باز السبب هذا عندو علاقة بعمر...جيت باش نحكي...قص عليا صوت هند...تحكي
هند:تو نخرجو انا ميسالش
انا:ما صار شي عزيزتي
هند:سلمى عزيزتي...زهرة توا وحدة منا...مش ضيفة عندنا
سلمى:و هذا لي قصدتو انا
تلفتت عندي...تبسمتلي ندرا كيف...دوب نجمت نتبسم...قربت مني...شدتني من يدي تحكي
هند:ايجا نقعدو في الساحة
انا:باهي
غزرتلها مرة اخرى...و خرجت قبل اي ردة فعل اخرى ترميت عالكرسي...بجمبها...نحكي
انا:هند
هند:مممم
انا:بنت خالتك شبيها غامضة هكا ؟
هند:ششش رد بالك تسمعك
انا:منقصدش...اما حسيتها مختلفة عليكم شوية
هند:صحيح...يمكن خاطر ستانست ديما وحدها
انا:مش عايشة معاكم ؟
هند:ايه...اما سلمى طبيعتها هادية برشا
طلعت راسي شوية...نغزرلها...خارجة من الكوجينة..هازة صينية في يدها...حطتها قدامنا تحكي
سلمى:هوكا التاي حاضر
هند:مرسي عزيزتي...والله جا في وقتو
انا:عيشك
شديت الكاسة من يدها و تكيت لتالي...قعدت مقابلتنا مديت يدي رجعت شعري لتالي...ياسر الجو سخون اليوم...فقت من سرحتي على صوت هند..تحكي
هند:ياسر حلو الكولييي متاعك
عديت صوابعي...عليه و تبسمت...غزرتلها نحكي
انا:هدية عمر...في ليلة عرسنا
طلعت راسي بالوقت...كي ريتها شرقت...تكح بالقاوي غزرت لهند...لي بقات ساكتة من غير حتى كلمة..حسيت روحي ضايعة بينهم...غزرتلها نحكي
انا:سلمى لباس ماهو ؟
سلمى:ل لباس
تلفت لهند...نزلت راسها بالوقت...مفهمتش شبيهم الزوز قص علينا صوت هند مرة اخرى...تحكي
هند:زهرة عزيزتي...شرايك تعاوني نحضرو الطاولة برا...ياسر الجو سخون الداخل
بقيت نغزر لسلمى...لي منزلتش عينيها مني...حطت يدها على يدي تحكي
هند:شقولك ؟
انا:اكيد عزيزتي
هزيت روحي...خلطت عليها...قربت منها...نحكي
انا:هند...ياخي انا قلت حاجة غالطة ؟
هند:لا...علاش تسأل ؟
انا:شي...اما ريتكم الزوز دخلتو بعضكم
هند:متحطش في بالك عزيزتي...مفما حتى شي
انا:باهي
هند:شرايك جي معايا للمعهد غدوة...الجو باش يعجبك غديكا
انا:يا ريت...والله حتى انا فديت برشا الاسبوعين هذوما
هند:هيا باهي
انا:زعمة عمر باش يخليني ؟
هند:اكيد عزيزتي
تنهدت بالقاوي...و كملت معاهم بقية تحضيرات...لحق عمر اخر واحد...خلط عليا للكوجينة...اول ما تلفت لقيتو قدامي...حطيت الطبق من يدي...و قربت منو...حضني بالوقت...و نزل يحكي في وذني
عمر:توحشتك يا روحي
انا:حتى انا
عمر:شبي حبي...متغشة هي ؟
انا:لا...جيست حسيت روحي بحاجتك اليوم
عمر:عيش بنوتي...هيا توا...مبعد نحكيو باهي
انا:باهي
باسني من راسي...و تلفت باش يخرج...دخلت امي فاطمة بالوقت...نزلت راسي...حاشمة منها...تبسمت تحكي
فاطمة:هيا الطاولة حاضرة
عمر:باهي
فاطمة:ياخي لباس عزيزتي
انا:لباس امي عيشك
فاطمة:مممم زعمة مفماش حويجة في ثنية...يمكن على هذاكا حالتك هكا
فهمت قصدها...و الاسوء من هكا...نعرف لي مفماش خاطرني جيست تاعبة من العادة...تنهدت بالقاوي...باش نحكي...سبقني عمر...كي رد عليها يحكي
عمر:مزال مكتبش ربي
فاطمة:ميسالش...تو يكتب و نفرح بيكم...هيا توا الجماعة حسو بغيابكم
تبسمت بالسيف...و خلطت عليهم...طول القعدة و انا سارحة...كلامها دخلني في حيط...طلعت راسي نغزر لعمر...لقيتو مركز معايا...تبسمتلو...نطمن فيه...تعدات السهرية كي العادة...جات عيني على بوه...كي هزلو براسو باش يخلط عليه...خرجو من صالة زوز...غزرتلنا سلمى تحكي
سلمى:انا زادة باش نطلع لبيتي
فاطمة:مزال الحال عزيزتي...باش ترقد من توا ياخي
سلمى:لا خالتي...اما تخنقت من الجو هوني
غزرتلي دوب كملت كلامها...تقريبا فهمت شنية تقصد خذيت نفس طويل...نهدي في روحي...تبسمت تحكي
سلمى:ليلة سعيدة
هند: و انتي اسعد سلمى
رصت على كلامها...حسيت كمية توتر لي بيناتنا كبرت اول ما خرجت...بقينا احنا ثلاثة كهو...تلفتتلي امي فاطمة تحكي
فاطمة:عجبك الحال عندنا ؟
انا:اكيد
فاطمة:تو بالشوية تتعود عالجو هوني
هند:لا امي...دوب يوفا الفاكونس...لازمهم يرجعو لتونس
فاطمة:توونس ؟ شبيني ما فيبااليش بيها الحكاية ؟
هند:يا امي شبيك...زهرة لازم تكمل العام متاعها...و عمر يشد خدمتو كي العادة
فاطمة:اما مش على اساس باش يستقر بحذانا
انا:اكيد امي...اصلا كل ويكاند نجيو بحذاكم
دوب تبسمتلي...دخلت بعضي اكثر...تنهدت بالقاوي نحكي
انا:ميسالش نقوم توا
فاطمة:اكيد عزيزتي...رد بالك على روحك
انا:عيشك
هزيت روحي بالسيف...خرجت من الصالة...خلطت عليا هند بالوقت...وقفتني تحكي
هند:زهرة لحظة
انا:مممم
هند:عزيزتي...منقصدش لي صار الكل...العيلة الكل داخلة بعضها...و امي لتوا متنجمش تتقبل انو عمر يبعد مرة اخرى
انا:عادي يا روحي...انتي ما عندك حتى ذنب...و زادة مفما حتى شي مهم باش نتغشش منو باهي
هند:محلى طبيعتك يا روحي
حضنتها بالوقت...و جبدت روحي منها...حطيت يدي على خدها نحكي
انا:كيفك بالظبط عزيزتي
هند:عيشك
انا:هيا ليلتك زينة
هند:و انتي زادة
خذيت نفس و نزلت الدروج...منعرفش كيفاش وصلت لبيتي...بدلت دبشي...و ترميت عالسرير...تلكمت على روحي...منعرفش شنية لي قاعد يصير بالظبط...اما الاحساس هذا عندي برشا عليه...و اكثر حاجة نفد منها زادة...منحبش نحس لانا وحدي...منعرفش قداش تعدا وقت...باش خلط عليا...سكرت عينيا بالوقت...حسيت بصوابعو يتعداو على خدي...نزل عليا شوية...يحكي
عمر:شبي حبي ؟
منجمتش نرجعلو...باقي نمثل عليه لأنا راقدة...تنهد بالقاوي يحكي
عمر:نعرف لانتي تسمع فيا
بدني ترخف بالوقت...تلفت عندو و حليت عينيا نغزرلو رجعلي شعري لتالي...يحكي
عمر:شفما...شنية لي صار ؟
انا:حتى شي
عمر:شبي حالتك هكا ؟
انا:قتلك حتى شي عمر...تاعبة و نحب نرقد
عمر:ماكش باش ترقد...حتى تفهمني شبيك
انا:مفما حتى شي عمر
غصيت مع الكلمة تالية...قرب مني اكثر...مد يدو جبدني عندو يحكي
عمر:ايجا عندي تراه
قربت منو بالوقت...كأني كنت نستنى فيها...ترميت في حضنو...كبشت فيه...و نزلو دموعي بالوقت...غرس يد في شعري يحكي
عمر:زهرة...يا روحي...شبيك ؟
انا:م...منعرفش
عمر:اغزرلي هوني
هزيتلو براسي لا...و كبشت فيه اكثر...كبس عليا بيدو يحكي
عمر:باهي قولي...فما شكون قلقك ؟
انا:لا
عمر:معناها باش تخليني محير عليك هكا
انا:خليك معايا و كهو...تو نرتاح وحدي
عمر:اما انا مانيش باش نرتاح
هزيت راسي غزرتلو...عدا يدو على خدي...خذيت نفس نحكي
انا:منعرفش شبيني...اما هكا رجعلي الاحساس متاع قبل...خاصة كي متكونش معايا انت
عمر:نعرف روحي قصرت معاك برشا...شارج الخدمة...و زيد امور المعمل لقيتها داخلة بعضها...لا بابا و لا حتى مصطفى...ينجمو ينقضوه توا...اما وسط هذا الكل تفكيري هوني عندك...امتى نرجع و نحطك في حضني كيما توا
انا:نعرف عزيزي...و مانيش قاعدة نلوم فيك بكلامي...اما
عمر:شششش...حقك عليا...اكيد باش نعوضك على هذا الكل...جيست اصبر عليا شوية...باهي
انا:اصلا انت لي مصبرني على الدنيا الكل عمر...من غيرك كنت باش نضيع
نزل على شفايفي...باسني منهم...و تبسم يحكي
عمر:بما انو اللعب ممنوع توا...شرايك في فيلم ؟
انا:مفماش تلفزة هوني
عمر:فيلم في pc هوني في فرشنا
انا:و كونكسيون ضعيفة هوني زادة
عمر:ههههههه عملت حسابي و تليشاريجت مجموعة باهية اخر مرة
انا:تحكي بالرسمي
عمر:مممم هاني باش نقوم...نجيبو...اما كي نرجع منحبش نرا دموع هذوما مرة اخرى
انا:باهي
هزيت يديا نمسح فيهم..حسيتو شايخ عالفازة..هز روحو بدل دبشو...جاب البيسي...و قعد بجمبي...قربت منو اكثر...باسني من راسي يحكي
عمر:هيا اختار انت
انا:مممم مشكلة
عمر:شرايك في هذا
انا:لا...نهاية خايبة
عمر:اما الحكاية متاع الفيلم حلوة
انا:نعرف...اما انا منحبش تكون نهاية متاعنا هكا
عمر:و تكون عزيزتي...مش مهم برشا...خاطر لي يجمعني بيك اقوى من الموت صدقني...انا معاك و باش نبقى معاك ديما
انا:نعرف يا روحي...اما منحبش نتفرج عليه مرة اخرى
عمر:هههههه باهي عزيزتي...كيما تحب
تبسمتلو...و مديت يدي اخترت فيلم اخر...و قربتلو اكثر...غرس يدو في شعري يعدي فيها...حسيت روحي هديت شوية...طلعت راسي شوية غزرتلو...مش مركز مع الفيلم برشا...خذيت نفس نحكي
انا:عمر
عمر:مممم
انا:باش نسألك
عمر:شفما عزيزتي ؟
انا:هند تحبني نمشي معاها للمعهد غدوة
عمر:و انتي تحب تمشي ؟
انا:مممم نحب نبدل جو
تبسم بالوقت...و نزل عليا شوية...خطف بوسة من شفايفي يحكي
عمر:باهي حبي...برا بدل جو معاها...و تو كي نفضى نخرجو وحدنا باهي
انا:باهي حبي عيشك
عاودت تكيت عليه...منعرفش كيفاش هزني نوم و رقدت...فقت صباح على يدو...لي تتعدا على خدي حليت عينيا بالسيف...نغزرلو...تبسملي يحكي
عمر:صباح النور
انا:صباح الخير
عمر:هكا ترقد و تخليني نكمل الفيلم وحدي
انا:شصار في النهاية ؟
عمر:نهاية حلوة كيفك انتي
تنهدت بالقاوي...و تبسمتلو...قرب مني شوية...باسني من خدي يحكي
عمر:هيا قوم توا...باش تخلط على هند
انا:وين ماشي انت ؟
عمر:باش نشوف المحامي مع بابا
انا:باهي
خلطت عليه...نمشي بالسيف...دايخة بالنوم...حضرت روحي...و خرجت معاه...لقيت الكل عالطاولة كان هند تبسمت خاطر نعرف لمزالت روطار كي العادة...ياسر تذكرني في روحي...صبحت عليهم و قعدت...اول ما كملنا الفطور...نزلت تجري...قربت منا تحكي
هند:راني روطار يا ربي...و جيعانة باش نموت
عثمان:اقعد و افطر في عقلك
هند:منجمش ياسر روطار...قداش ساعة توا
كريم:توا 8:30 لالة
هند:معناها مانيش باش نخلط عالحصة لولا...نقعد احسنلي
عمر:تو نوصلكم انا
هند:ميسالش...تو نمشيو بنات وحدنا...و باز آسيا في طريقها...حتى هي روطار زادة
عمر:باهي على راحتكم...هاني باش نسبق انا...المحامي اكيد وصل...نستناكم غادي
عثمان:باهي ولدي...برا على روحك
هز روحو قام...باسني من راسي و خرج...و اول ما خرج هزت روحها وقفت...كبست على صاكها تحكي
سلمى:انا زادة لازمني نمشي توا
هند:شبيك مزروبة تو نمشيو مع بعض
سلمى:لا عزيزتي...لازمني نمشي من توا...ورايا قضية
هند:باهي
كملنا الفطور...وخرجنا...طول ثنية...هند مرة تحكي معايا...مرة مع آسيا...اول ما وصلت قلبي خض بالقاوي و انا نغزرلهم...حتى هند حسيتها دخلت بعضها...طلع راسو...جات عيني في عينو...قربت منو مروهجة...مرة نغزرلها...مرة نغزرلو...قرب مني...حط يدو على خدي يحكي
عمر:لباس عزيزتي ؟
انا:ش شتعمل هوني عمر ؟
عمر:سلمى مزروبة عالمقابلة...وصلتها في ثنيتي
سلمى:مرسي عمر...انا لازمني نمشي توا
عمر:موفقة
سلمى:عيشك
تلفت عندي...غزرلي ندرا كيف...و ضيق عينيه...يحكي
عمر:زهرة شبيك عزيزتي ؟
انا:حتى شي...هاني باش ندخل مع لبنات توا
جيت باش نمشي...شدني من يدي...كبس عليا...يحكي
عمر:مقتلكش امشي
انا:باش ترجعني ؟
عمر:زهررة...باش تدخل و انتي متغشة مني هكا ؟
انا:مانيش متغشة منك عمر...ما صار شي
عمر:شنية التصرفات هذوما ملا ؟
انا:مفما حتى شي...تاعبة شوية و كهو
قرب مني اكثر...جبدني عندو حضني...و نزل عليا شوية يحكي
عمر:ما تحط شي في بالك...حتى وحدة ما تستهل غيرتك هاذي باهي...خاطرني انا ما نرا حتى حد غيرك انتي...مفهوم كلامي صغرون
طلعت راسي غزرتلو...جات عيني في عينو...تبسمت نحكي
انا:اصلا ما تنجم تشوف حد غيري
عمر:اكيد يا روحي
قرب مني اكثر...باسني من راسي...و قرصني من خدي يحكي
عمر:هيا توا...نحبك تعدي نهار حلو...باهي
انا:باهي عزيزي
خليتو و رجعت بحذاهم...لقيتهم زوز يضحكو...ضربتني هند تحكي
هند:متخافش عليه عزيزتي...مينجمش يغزر لوحدة اخرى غيرك
انا:هنند
هند:باهي...هاني سكت...هيا توا
خلطت عليهم...عدينا دورة في conservatoire هزت يدها تحكي
هند:هوني غرفة البيانو...و لي قدامها متاع الكمان...انتي برا اعمل دورة فيهم...نحضرو الحصة هاذي و نرجعلك
انا:طول برشا ؟
هند:ساعة كهو...والله غيابات برشا...و اختك معندهاش تبريرات كافية...صدقني ماكش باش تحس بالوقت هوني
انا:باهي طمن
اول ما دخلت للكلاصة...قربت من صالة شوية...مفما حتى حد لداخل...خذيت نفس و دخلت...عديت عينيا عالتحف الموجودة...حتى البيانو متاع البروف...ظاهر فيه تحفة مش نورمال...قربت شوية نغزر للورق المعلقة حاجة ياسر حلوة...رجعت قربت من البيانو..عديت يدي عليه...و نزلت بصوابعي...نجرب فيه...صوت ياسر قوي حسيت بشكون...تلفت بالوقت...قلبي خض بالقاوي كأني ريت شكون تعدا...قربت من الباب بزربة...دورت راسي في شيرتين...مفما حتى حد...اما ريحة هاذي مش غريبة عليا...استندت بيدي عالحيط...لا مستحيل...مراد مات...هذا لي قلتو داخلي...و انا نشم في ريحة برفانتو لي يستعملها من سنين...خلطت عليه...بلكشي نعاود نرا شكون تعدا...سمعت صوت الباب...لي تسكر...بلكشي نفسو لي كان هوني...منعرفش كيفاش لقيت روحي مخالطة عليه...اول ما وصلت للباب...تهزيت و تحيطت على صوت سلمى...تحكي
سلمى:فاش تعمل ؟
انا:سلمى
سلمى:هذاكا بيرو المدير
انا:صاار...مشى في بالي كيما صالة متاع بيانو
سلمى:وين هند ؟
انا:عندها درس مهم لازم تحضرو
سلمى:باهي ايجا...نعملو قهوة لين تكمل هي
تلفت للبيرو مرة اخرى...باقي نشم في ريحة برفانتو
كل نفس...يدخلني بعضي...و يزرع داخلي خوف غريب ضيقت عينيها تحكي
سلمى:باش تجي ؟
هزيتلها براسي ايه...و خلطت عليها...نمشي و مخي وقف غديكا...حطت كاسة القهوة في يدي...تبسمت بالسيف نحكي
انا:مرسي
سلمى:عجبك المعهد
انا:مممم برشا
سلمى:حتى انا
انا:شصار في المقابلة ؟
سلمى:سيبون قبلوني
انا:مبروك ملا
سلمى:عيشك...و انتي لتوا مزلت تقرا ؟
انا:مزالي عام اخر
سلمى:معناها مزلت تقرا عند عمر
انا:لا معادش يقري توا
سلمى:شنية السبب ؟
انا:مفما حتى سبب...خدمتو توا احسن ببرشا كهو
سلمى:ياخي قداش عندكم معرسين توا ؟
انا:تقريب عام
سلمى:اما على حد علمي...كان خاطب سيرين مش هكا
تلفت عندها بالوقت غزرتلها...تبسمت ندرا كيف و كملت تحكي
سلمى:مجرد فضول عزيزتي
انا:كلامك صحيح...اما المكتوب...كان عندو دور اخر
سلمى:عندك حق...اما ظاهر فيه المكتوب هذا...بدل عمر جملة
انا:شقصدك ؟
سلمى:عمر لي تعرفو انتي...مش نفسو عمر لي نعرفو انا و في رايي هو توحش حياتو القديمة...على هذاكا رجع لهوني
بقيت نغزرلها مستغربة...جيت باش نحكي...قص عليا صوت هند...تحكي
هند:قاعدين هوني...و انا من بكري نفركس عليكم
سلمى:حبيت نتعرف على زهرة اكثر
غزرتلي مستغربة...تبسمتلها بالسيف نطمن فيها...نحب نمشي من هوني و كهو...شي من ريحتو لي قعدت في خشمي...و شي من كلامها...تخنقت اكثر من الجو هوني منحبش نفكر فيه...منحبش نحط احتمال لهو قريب مني...مراد مات و ماهوش باش يرجع...منحبش نضيع في دوامة متاعو مرة اخرى...اقل شي نجم نعملو اني ننسى لي صار جملة...و ما نخبر حتى حد عليه...خاصة عمر...خذيت نفس و هزيت روحي وقفت نحكي
انا:هند وقيت باش نمشيو
هند:باهي عزيزتي...اما استاني لحظة عندي ما نعمل و نرجعلك
انا:مطولش عيشك
هند:باهي
سلمى:انا باش نمشي توا...رد بالك على روحك...البلاصة هوني مش كيما تونس...الكل يعرفو بعضهم
انا:باهي...عيشك
دوب تبسمتلي و مشات...نفخت بالقاوي...و ترميت عالكرسي...من اول يوم قابلتها و هي تستفز بيا بكلامها تحزر باقيلي ايامات و نرجع...و الا مستحيل نجم نتحملها اكثر من هكا...تعكر مزاجي...و طارت الشيخة نحب نرجع نغم على راسي و نرقد...كهو.
🌸🌸🌸🌸🌸🌸🌸🌸🌸🌸🌸
🔸️مراد يحكي:
كبست على يدي...و رميت كلشي في البيرو عالارض نحس في قلبي...يخض بالقاوي...باش يخرج من بقعتو ريتها مرة اخرى من غير ما نجم نعمل شي...كانت قريبة مني...قريبة لدرجة نجمت نرا كل تفصيل فيها...و نعشق فيه من جديد...عينيها...خشمها...شفايفها...ريحتها...لي برغم بدلتها...اما مزلت نسكر بيها...اول ما نشمها...نحس في بدني يرعش...لتوا تحضينتو ليها بين عينيا...مصمم يخليني ننقم عليه اكثر...لدرجة حتى اسمو منجمش نسمعو...عديت يديا زوز على وجهي...نرد في النفس مزلت داخل بعضي...قربت من شباك...نغزرلها قاعدة مع بنت خالتو...مع اني مقابلتهاش انا...اما نحس لي وراها برشا حكايات...و هذا لي حسيتو زادة من التوتر لي بينها و بين زهرة...فقت من سرحتي على صوت الباب ما نحب نقابل حتى حد توا...اما ميسالش...ظاهر النهار هذا فيه برشا حاجات جديدة...نفخت بالقاوي...نحكي من غير ما نتلفت
انا:ادخل
تبسمت على جنب...كيف سمعت صوتها ورايا تحكي
هند:سي فر...
سكتت بالوقت...فهمت لي حالة البيرو دخلتها بعضها خذيت نفس نحكي
انا:ظاهر فما ضيفة اخرى معاك
هند:شبي حالة البيرو هكا...مبعد نحكيو عالضيفة
تلفت عندها...نغزرلها...دور في عينيها عالاوراق لي مفروتة عالارض...تبسمت نحكي
انا:مجيتش باش تسألني على حالة البيرو ؟
هند:لا اكيد...كنت باش نشكرك عاللي عملتو مع سلمى
انا:ما عملت شي...عندها مؤهلات و تستهل الخدمة متاعها
هند:عيشك
كانت باش تتلفت...اما وقفت في لحظة...عدات يدها على شعرها...تحكي
هند:ياخي لباس ؟
انا:في رايك انتي ؟
هند:في رايي لماكش لباس...اما صدقني حتى شي ما يستهل هذا الكل
انا:زعمة ؟
هند:اكيد و زيد حد كيفك...شي ما يصعب عليه...معناها من غير ما تقلق روحك على شي
انا:و شنية نعتبرو كلامك هذا ؟
هند:نصيحة
انا:ماكش ترا في روحك مزلت صغيرة على نصائح هذوما
هند:هذاكا لي ترا فيه انت سي فرات
انا:مممم باهي
هند:لازمني نمشي توا طولت عالجماعة
انا:متحبش تتوسط لطفلة لي جات معاك زادة
هند:ههههههه لا...هذيكا مرت خويا عمر...حبت تبدل جو معانا
انا:و عجبها ال coservatoire
هند:اكيد
انا:باهي برشا
هند:نجم نمشي توا سي فرات
انا:فرات كهو
هند:متأكد ياخي
انا:مممم
هند:باهي...مرسي مرة اخرى...س...نقصد فراات
انا:من غير مزية
اول ما خرجت...تلفت لشباك...نغزرلها...النسمة الخفيفة تلعب بشعرها...منعرفش علاه حسيتها متقلقة...مش كي عادتها...اصلا كي تبدا هكا...ما طيق تحكي مع حد..مرت عمر...الكلمة هاذي لي بقات تتعاود في راسي...تبسمت نحكي
انا:زعمة باش تبقى مرت خوك يا هند...والله ما نعمل من عذابكم صنعة...انتي و خوك...و الناس لي دايرين بيكم الكل...و اول وحدة مرت خوك...باش نخليكم تاقفو قدامي بالصف
حطيت يدي عالبلار...نثبت في تفاصيلها و كملت كلامي كأنها قدامي...و تسمع فيا
انا:انتي اول وحدة يا زهرة...اول وحدة باش تخلص لي عملتو فيا...باش تظطر تخلي عمر متاعك...و ترجع بساقيك لعندي...الشك و الخوف...لي باش تراه...ما ينجم يراه حد غيرك...و سي عمر باش نعفسو بساقيا و نتعدا...الا ما نخليه يخسر كلشي...حتى روحو زادة باش يخسرها...الايام بيناتنا يا روحي
غمضت عينيا بالقاوي و رجعت حليتهم نغزرلهم خارجين مع بعض...تنهدت بالقاوي...ظاهر فما كارطة جديدة...اما قبل هذا الكل...نحب نقابلها بنفسي...تلفت هزيت تليفوني...و نزلت اللوطة...اول ما وصلت...فتحلي الباب...ركبت...تكيت لتالي نحكي
انا:اشرف
اشرف:تفضل سي فرات
انا:فما فرد جديد في العيلة...سلمى ¤¤¤¤¤¤ نحبك تعرفلي عليها كلشي...و خاصة قبل عشر سنين من توا
اشرف:باهي سي فرات
تبسمت على جنب...و غمضت عينيا...لتوا نذكر الخوف لي ريتو في عينيها ليلتها...و الخوف لي عاشتو...هذاكا كان اول خطوة لمدام زهرة...باش تعرف انو جات للعذاب بساقيها...خذيت نفس نحكي
انا:فما اخبار على حسام و مرتو ؟
اشرف:لا...تحب نكبسوه مرة اخرى
انا:لا...في بالي مرتو حبلة توا...ما نحب حتى حد يقرب منها...مفهوم كلامي
اشرف:باهي سي فرات
تكيت راسي لتالي...اكيد باش يجي دورهم...اما كلشي في وقتو حلو...توا وقيت باش نسلط الضو على زهرتي كهو...توحشتها...و نحبها ترجعلي...اما قبل هذا الكل باش نخليها تعرف بالقدا...شكون العيلة لي عايشة في وسطها...اكيد باش يظهر كلشي في تالي...مستحيل نغلط في الوجوه...مش المرة هاذي...و لي باش تعيشو معاهم...دوبل لي باش تراه مني...تو مع الوقت تعرف بالقدا وين رمات روحها...و وين باش تهزها ثنية هاذي تو مع الوقت...كلشي يولي واضح...تو تفهم انو هي مزال مكبرتش...و مزال برشااا حاجات...تو تفهمهم مع الوقت...و تستوعب وين هزتها ساقيها...تنهدت بالقاوي لتوا مزلت نشم في ريحتها...و النهار هذا بالظبط...نحب نبقى رايض...و ما نخمم في حتى حد غيرها...هي و كهو
🔸️حسام يحكي:
شديت الفران بالقاوي و نزلت...طلعت راسي نغزر لدار قداش تعدا وقت...على اخر مرة وقفت هوني...منعرفش لي نعمل فيه صحيح و لا غالط...منعرفش اذا لي نعمل فيه...على خاطر العشرة لي كانت بينا...و لا على خاطر حاجة اخرى انا منجمتش نفهمها...اما زادة يمكن اخر خطوة نعملها...باش نسكر الماضي لي خرج في وجهي فقت من سرحتي كي حلت الباب...طلعت راسي نغزرلها عديت عينيا على وجها...تبسمتلي بالوقت تحكي
شراز:باش تبقى واقف برشا
انا:بونصوار
شراز:مرحبا بيك
انا:عيشك
شراز:تفضل
خذيت نفس...و دخلت...خلطت عليها لصالة...اول ما قعدنا...جات البون حطت القهوة...تبسمت تحكي
شراز:مرسي برشا...خاطرك جيت
انا:مانيش باش نطول برشا
شراز:عيشك
انا:نجم نراه توا
شراز:اكيد...ايجا
اول ما وقفت...هزيت روحي خلطت عليها...طلعت الدروج بخطوات رزينة...كأني نحب نقوم بالواجب...و نخرج من هوني فيسع...قربت من البيت...حطت يدها عالبواني...قلبي خض بالقاوي...اخر حد توقعت اني نقابلو في حياتي...و نحكي معاه...خذيت نفس طويل و دخلت وراها...جات عيني عليه...وينو سي طارق...هذا لي قلتو داخلي و انا نغزرلو...كيفاش هدو المرض الماكينة و السيروم...بحذا راسو...و الفرملية...واقفة تفحص فيه...قص عليا سرحتي...صوتها تحكي
شراز:بابا عزيزي...شنية حوالك توا ؟
فرملية:احسن من الصباح مدام شراز...هاني باش نخليكم معاه شوية...نرجعلو مبعد
شراز:باهي عيشك
تعدات من قدامي خرجت...بقيت واقف في بلاصتي مزهبل...منعرفش شنية نعمل...و لا شنية نقول...كسرت حاجز الصمت مرة اخرى تحكي
شراز:بابا...فما شكون يحب يشوفك
بعدت شوية من قدامو...جات عيني في عينو...هز يدو شوية...يحكي بالسيف
طارق:ح...حسام الماجري
هوكا طلع متذكر شكون حسام الماجري...حسام لي وقف قدامو مرة...باش يطلب يد بنتو...اما مكانش قد المقام...حالتو ميسورة...اما معندوش شركات و كراهب مزال يقرا...و صعيب برشا يكون روحو...خلاني نكره روحي...و نكره بنتو...و ننقم عالوضع لي تحطيت فيه بسببو هو منجمتش ننسى كلام مريم زادة...الكل يلوجو عالمادة...هذا لي خلاني ننقم على مرتي زادة...غمضت عينيا بالقاوي...و رجعت حليتهم...منحبش نفكر في الماضي مرة اخرى...تبسم بالسيف يحكي
طارق:ا..ايجا حسام...انت باش تحقق اخر حاجة ليا قبل ما نموت
تلفت عندها نزلو دموعها بالوقت...جيت باش نحكي خرجت من البيت تجري...حبيت نخلط عليها...اما حبسني صوتو مرة اخرى
طارق:خ...خليها...لازمها تتعود من توا
انا:مش لازم...تو تقوم لباس و ترجع كيما قبل
طارق:اقعد
دورت راسي شوية...و قربت من الكرسي متردد...جبدتو بيدي و قعدت...غزرلي يحكي
طارق:تعدا وقت برشا...على اخر مرة ريتك فيها
انا:صحيح
طارق:تعرف علاه طلبتك لهوني
انا:مش مهم برشا
طارق:نحبك تسامحني...سامحني عالكلام لي قلتهولك و انت في بداية مشوارك...سامحني خاطر وقفت في طريقكم...حطمتك و حطمت بنتي معاك...ب...بنتي نوارة عيني...لي كنت نرا فيها تموت نهار بعد نهار...شراز خلاتني نتأكد انو لا البعد...و لا عرسها من حد اخر باش ينسيها فيك...بالعكس...كنت نرا في حبكم يكبر...و انا بأنانيتي كنت عافس عليه...خليتكم تدفنو حبكم سنين طويلة...و وقت فهمت...لقيت روحي وخرت برشا..نحبك تسامحني يا حسام...باش بنتي تنجم تسامحني
كبست على يدي...منحبش نسمع كلامو...اصلا معادش يهمني...نعرف لي صار و لا لا...خذيت نفس بالسيف نحكي
انا:مسامحك...مكانش لي ميغلطش...معادش يفيد الماضي توا
طارق:باهي...تعرف علاه انا اخترت نرجع لهوني
انا:لا
طارق:باش نصلح لي عملتو سنين لتالي
طلعت راسي...نستوعب في كلامو...هز يدو بالسيف حطها على يدي و كمل يحكي
طارق:شراز امانة عندك
انا:شقصدك ؟
طارق:ب...بعد ما نمشي...شراز باش تبقى وحدها...لازم شكون ياقف معاها و يساندها...و هي بحاجتك انت متخليهاش حسام...وقيت باش تعاودو تعيشو حياتكم و حتى حد ماهو باش ياقف في طريقكم المرة هاذي
عديت يدي على وجهي...خذيت نفس طويل...نحكي
انا:سي طارق...مقدر موقفك...اما كان جا الكلام هذا قبل سنين لتالي...يمكن راني وافقتك...صحيح في نهار من نهارات انا حبيت بنتك...و كنت مستعد نعمل كلشي على خاطرها...اما توا صعيب برشا...و مش صعيب كهو مستحيل يكون فما شي اسمو حسام و شراز
طارق:و شنية لي باش يمنعكم ؟
انا:مرتي...توا انا نحب مرتي سي طارق...لي عشتو و اللي حسيتو في الشهور هذوما مع مرتي...مكنتش باش نعيشهم مع شراز...يمكن وقتها احسن حاجة عملتها انك فرقتنا...الموقف لي تحطيت فيه...خلاني نبني روحي من جديد...و ما نخلي حتى حد يحطني تحت امر الواقع مرة اخرى
طارق:معناها حبكم وفا ؟
انا:مبداش حتى يوفا...انت قتلتو في اول الثنية...هزيت بنتك و مشيت و خليتني نتخبط بين الماضي و الحاضر مانيش باش نقلك نسيت شراز بين ليلة و نهار بالعكس قعدت سنين موجوع منها...نقمت على روحي و على كل مرا تعرضني في حياتي...اما نسيت هذا الكل...وقت حبيت لاول مرة سي طارق...مانيش باش نقلك لحياتي ولات مثالية...اما باش نعمل المستحيل اني نحافظ على مرتي و ولدي اللي في ثنية...مستحيل نخسرهم خاطرني منجمش نعيش من غير مريم...انا نسيت الماضي و سامحتك عليه...اول ما هي دخلت لحياتي...و انا و شراز...باش نبقاو صحاب كيما البارح...كيما اليوم تنجم تعتبرني خوها...و تو ناقف معاها في كلشي تحب عليه...سامحني خاطر منجمش نعمل اكثر هكا
طارق:طول عمرك راجل...توا فهمت على بنتي تحبك لهدرجة...ميهمش شنية باش تكون طبيعة علاقتكم
اللي يهمني..انو شراز باش تلقى سند تتكا عليه بعدي
انا:مزالت البركة سي طارق....ان شاء الله تقوم لباس...و تاقف مع بنتك
طارق:عيش ولدي...توا طمنت عليها...ربي يفضلكم لبعض
انا:عيشك...لازمني نمشي توا و نخليك ترتاح...بالشفا عليك...مرة اخرى
طارق:عيشك.
هزيت روحي خرجت من البيت...خذيت نفس طويل يمكن احسن حاجة عملتها اني قابلتو...نزلت اللوطة من غير ما نتلفت ورايا...كنت باش نخرج...اما لمحتها قاعدة في الجنينة...عديت يدي على وجهي...و خلطت عليها...قعدت بحذاها...غزرتلي تحكي
شراز:مبروك عليك
عرفت لهي سمعتني نحكي مع بوها...تنهدت بالقاوي نحكي
انا:عيشك
شراز:كنت نعرف لانا خسرتك...من اكا نهار...كان عندي امل صغير اني نكون معاك مرة اخرى...اما ضيعتو نهار ريتك معاها في الفرماسي
انا:زايد نخمو في الماضي توا شراز
شراز:ماهوش ماضي بالنسبة ليا يا حسام...انا عايشة خاطرك موجود في دنيا هاذي...اما ميسالش...طول ما انت لباس...و فرحان في حياتك...انا باش تكون مليحة صدقني مريم طفلة باهية...اكيد باش ترتاح معاها
انا:شرااز...وقيت باش تتعدا الماضي انتي زادة...حياتك ماهيش باش تاقف على حتى حد...باهي
شراز:مرسي حسام...مرسي على كلشي
انا:من غير مزية...شرايك نتخلاو عالرسميات هاذي زادة
شراز:هههههه اكيد
انا:باهي...قص عالبكا و برا بحذا بوك...هو بحاجتك...انا لازمني نمشي توا
شراز:باش نرجع نشوفك مرة اخرى
انا:أكيد...هيا توا
هزتلي براسها ايه...اول ما وصلنا للباب...غزرتلي تحكي
شراز:مزال بكري...شرايك تتعشى معايا قبل ما تمشي
انا:مرة اخرى شراز...طولت على مريم برشا...منجمش نخليها وحدها اكثر
شراز:باهي
قربت مني اكثر...سلمت عليا...هزيت يدي حطيتها على زندها...و جبدت روحي منها...نحكي
انا:تصبح على خير
شراز:و انت بخير
رجعت للكرهبة...ركبت و تكيت راسي لتالي...خذيت نفس و هزيت تليفوني...استغربت كي لقيت امي طلبتني...جيت باش نعاود نكلمها...طفى تليفون في وجهي...ضربت يدي عالفولون...و خدمت الكرهبة بالوقت...طرت بيها...تفكيري الكل عندها...خفت كان تصيرلها حاجة في غيابي...خاصة و حبالتها في الريسك منعرفش على روحي كيفاش وصلت...شديت الفران بالقاوي و نزلت...اول ما دخلت...لقيت امي في وجهي تحكي
امي:حسام وينك لتوا ؟
انا:مريم لباس ؟
امي:لباس عليها
انا:هاني باش نطلع نشوفها ملا
امي:ماهيش هوني
وقفت في اخر خطوة...تلفت عندها مستغرب...نحاول نستوعب كلامها...عديت يدي على وجهي...نحكي
انا:كيفاش ماهيش هوني ؟
امي:لي سمعتو
انا:امي ياخي ناوية تهبلني انتي توا...وين عندها تمشي كي ماهيش هوني
امي:عندي ساعتين من اللي طلبتك...صحيح و لا لا
انا:مسمعتوش...توا تنجم تفهمني شنية لي صاير
امي:خرجت مع محمد...تو شوية يرجعو
انا:كيفاااش...امي واعية لروحك فاش قاعدة تقول..اللي تحكي عليها مرتي...ياااخي نورمال تقولي خرجت مع محمد
قربت مني...وقفت قدامي بالقدا...غزرتلي ندرا كيف تحكي
امي:قبل 3 اشهر من توا...قتلك كان معينكش فيها طفلة...رد بالك تمرمدها معاك...رد بالك تاخوها باش تعذبها...و تفددها في حياتها...اما انت شعملت...قلي تراه...عرست بيها...و من اول نهار قاعد تذل فيها...في الطالعة و النازلة...و حتى بعد ما حبلت شي ما تبدل فيك...تعرف حاجة خسارة فيك الطفلة...انا السبب خاطرني وافقت...في بالي وليت راجل يتعمل عليك...و باش تتحمل مسؤولية مرا و صغار
انا:اممممي يززززي...من غير ما طيح قدر عيييشك...و زيد فاش قام الكلام هذا توا...ياخي قاعدة تشتكيلك مني لالة مريم
امي:تشتكيلي...شخص كان جات تحل فمها و تفرغ قلبها...في بالك مانيش شالقة بيك...كي تروح لدار سكران في الليل...و تدخل عليها...و ندرا شنية لي تحسو مسكينة...خلي الكلام لي كنت ترميه عليها...راني في بالي بكلشي...و مانيش راقدة...سكت لين قلت يزي الطفلة صغيرة برشا عالتمرميد لي تعيش فيه...مدامك كنت تعرف لي باش تندم علاه عرست بيها...علاه خليتها تحبك و تصدقك...و تخلي دارهم و بوها و تخلط عليك لهوني...جااااوبني تراه ؟
عديت يدي على وجهي...بعصب...نحس في راسي باش يطرشق...شي من كلامها...و شي من الخرجة الكلبة لي طلعتلي بيها عقاب ليالي...عفست على كلامي...و تعرف روحها مزالت تاعبة...و اكثر من هذا...الكل قاعد يلوم فيا...باهي وين انا في وسط كلامها...ياخي فرحان انا باللي نعمل فيه...يا ديني راهي مرتي...لا نجم نقرب منها و لا حتى نبعد عليها...كل مرة نحط يدي عليها نتذكر كلامها...منجمش نمسها و هي رافضتني من داخلها كبست عالبونية متاعي نحكي
انا:انا ما جبرتها على حتى شي...لا باش تخلي بوها و لا دارهم...هي لي حبت عالعيشة هاذي...و في رايي حتى مكانتش تحلم بيها من قبل
امي:ياسر واثق من روحك...تو هاذي عيشة تحكي عليها حتى شهاويها منجمتش تخلط عليهم...شهرين الطفلة مراتش رحمة ربي...و تفرهدت كيما لبنات الكل...انا لي بعثتها مع محمد...و كلشي يخصها انا باش نتكفل بيه معادش نحبك تلومها جملة
انا:باهي برشاااا...طحان انا باش مرتي تخرج تتفرهد مع خويا
جات باش تحكي...اما سكتت في لحظة...تلفت ورايا نغزرلها...واقفة مع محمد...تنهدت بالقاوي...ناقص باش تسمع الكلام هذا توا...منعرفش كيفاش لقيت روحي واقف قدامها...العصب متاعي و الاسئلة...طاحو في الما من غزرتها...غزرتها لي تحاول تقولي بيها برشا حاجات عديت عينيا عليها...لتوا كابسة على البوات متاع القلاص في يدها...ظاهر كانت عاملة جو...كسرت حاجز صمت...كي شديتها من يدها نحكي
انا:ايجا معايا
حليت الباب وخرجت...اول ما وصلت للكرهبة...نطرت يدها مني تحكي
مريم:سيييبني...فاش تعمل ؟
انا:اركب
مريم:منحبش...وين باش تهزني ياخي ؟
انا:مريم اغزرلي...مزال عندي شوية صبر...متفددنيش امانك
مريم:كان تعمل مزية...خلي الصبر لي عندك يوفا...و طلقني...طلقني و رتحني من المنظر هذا
انا:مرررريم....يززززي...يززززي لي عملتو فيا الليلة
مريم:شنننية عملت انا...ميمشيش في بالك لانت حابسني هوني...كلشي عندو حدود فهمت
انا:طولة اللسان هاذي مش معايا...تسمع فيا...ياخي واعية لروحك انتي...قداش من مرة نبهت عليك انا اه حل جلغتك..فوق هذا الكل تعرف لي حبالتك متتحملش علاه تعب في روحي...خبرني تراه...حل ¤¤¤¤¤ فمك
مريم:ماكش باش تخاف على ولدي اكثر مني باهي اااههه ساامحني نسيت...لانت موفرلي عيشة منحلمش بيها...على هذاكا ميجيش نحل فمي...مش هكا سي حسااام ؟
انا:استغفر الله يا ربي...عالليلة الكلبة لي وحلت فيها
مريم:لحظة برك...ياخي في بالك شريتني بفلوسك انت و لا توقعت لانا معاك على حساب كرهبتك الفخمة و لا الفيلا لي عايش فيها...نورمال انت في مخك...هذا لي عاطيه حساب في حياتك...خسارتك والله...اغزرلي بالقدا حسام...انا طول عمري راسي مرفوع...مانيش باش نوطيه على وسخ الدنيا...اللي انتو تجرو وراه طول عمري مقتنعة باللي عندي...و ما مديت يدي لحد في الدنيا من غير بابا...حتى ليك لي عامل فيها راجلي مانيش باش نمد يدي...اللي تربيت عليه انا...متربيتش عليه انت...و كان انت عاطي قيمة زيادة للفلوس و المظاهر...و تقيم ناس على حسابهم...تنجم تمشي من توا...و اختار مرا اخرى كيفك انت بالظبط...و عاشت كيما انت زادة...هكا ماكش باش تظطر تقارن روحك بيها باهي
بقيت نغزرلها...كلامها دخلني بعضي اكثر...مدامها تخمم بالطريقة هاذي...علاه قالت لاختها اكاكا...دخلت بعضي و منجمتش نفكر...كلشي جا في مخي اني نحكيلها لي سمعتو الكل ليلتها...عالاقل نحط حد للحرب النفسية لي دخلنا فيها الزوز...خذيت نفس نحكي
انا:مرريم
مريم:عندك حق...انت ما جبرتني على حتى شي...و بابا زادة ما جبرني على حتى شي...اما نتوما زوز حطيتوني في النص...كان اخترت بابا وقتها...انت كنت باش تخليني...و كي اخترتك...بابا خلاني....و توا كان يعرف لي قاعد يصير...اول حد يتشمت فيا...و مش بعيد اختي و امها زادة...العيلة الكل تتشمت فيا...على نتيجة اهم قرار خذيتو في حياتي...انت و بابا...كل حد اناني بطريقتو...حد فيكم ما خمم فيا شنية نحب...و لا شنية لي حاجتي بيه انا...بابا فك مني امي...و انت فكيت حياتي...اما هذا ماهوش باش يطول برشا...تسمع فيا القوة و الجبروت لانت فيها باش يجي نهار و توفا...و كان مزلت دقيقة في دار هاذي...على خاطر الصغير لي في كرشي و كهو...خاطرني نعرفك بالقدا...كان انا نحط ساقي و نختار ثنية جديدة...نلقاك في وجهي و ميهمش حجم الوجيعة لي تكون جايبها معاك...و تضرني بيها باش انت تاخو ولدك و ترضي غرورك...اما صدقني تو يجيك نهار و يتكسر الغرور متاعك...و القيمة الزايدة لي عطيتها لروحك تو دور عليك يا حسام...خاطر في نهار من نهارات...ماكش باش تنجم حتى تطلب سماح...و بطبيعتي ما نجم نسامح حد...و لا نغفر لحد...كلشي وليت نتمناه توا...انو ربي يعطيني قوة على خاطر ولدي و لا بنتي...وقتها حتى وجهي معادش تراه قدامك
قربت منها شوية...حطيت يديا زوز على جنابها...و جبدتها عندي...دزيتها عالكرهبة...و غطست في شفايفها شفايفها لي عندي برشا عليهم...و على بنتهم...لقيت روحي...غاطس فيهم...من غير ما نعمل حساب لشي...لا للبوات لي طاحت من يدها...و لا يديها لي تحاول تبعدني بيهم...حتى معادش يهمني شكون لي باش يخرج...و يشوفني...جبدت روحي منها بالسيف نحكي
انا:انتي لتوا متعرفنيش يا مريم...برغم لي صار و لي باش يصير...و برغم حجم الوجيعة لي تربطنا...انتي متاعي انا...و اللي في كرشك متاعي زادة...كان حبيت امشي لاخر دنيا...تبقى ملك حسام...و اللي في كرشك قطعة منو...حط هذا في بالك و رد بالك تنساه جملة
مستنيتهاش جاوبني...كبست على يدها...و غطست فيها مرة اخرى...لين حسيتها رخفت شوية...كبست عليها ييدي...و جبدت روحي...دزتني بيدها لاخرى تحكي
مريم:ابعد عليااا...فاش تعمل يا هامل...يا اللي متحشمش...ابعععد
وخرت شوية لتالي...مزلت مروهج منها الفرخة..قحرتلي تحكي
مريم:فاش قام تبوس فيا اه...بأنا صفة يا ساقط
انا:بصفتك مرتي يا روحي...و كان متسكرش اكا الفم توا...باش تلزني نبوسك مرة اخرى
مريم:اصلا انت اكا فاش فالح...كان في البوس...و الباقي يرحم ربي
انا:شقصدك بالباقي...تحب اكثر انتي ؟
مريم:زايد متحشمش...و مخك ناقص
انا:شنية قلت انا توا ؟
مريم:حسااام...برا اخطاني ليلة هاذي...جرتك باش يطيحلي الصغير توا
انا:بااهي اهدا...منقصدش...شنية تحس في روحك توا
مريم:شيهمك فيا شنية نحس ؟
عديت يدي على وجهي...معادش نعرف شنية نعمل قصت عليا سرحتي...كي نزلت هزت البوات...و تلفتتي تحكي
مريم:الله لا تربحك يا حساااام...علاه هكا...من بكري شاهيتها انا...كلو جرايرررك
انا:باهي اسكت...تو نشريلك وحدة اخرى
كبست عليها...و رماتها عالارض...قربت مني...تحكي
مريم:اقسم بالله يا حسااام...تو تاخولي وحدة كيفها تسمع فيا...تي علاه هكا...علااااه...والله ماني باش نعديهالك...والله
حسيت بيها دخلت بعضها...اصلا ديما تولي هكا...كي تبدا شاهية حاجة...قربت منها اكثر...جبدتها من يدها حضنتها...نحكي
انا:باهي...سامحني منقصدش لي صار...ادخل توا...ربع ساعة يكون عندك باهي
جبدت روحها مني...رجعت شعرها لتالي...تحكي
مريم:لااا...مانيش باش ندخل
انا:باهي اركب ملا
مريم:لاااا
انا:حتى هي ليلة كلبة...شتحب توا ؟
مريم:حتتتى شي...كلو منك يا هم...كلو جرايرك
انا:نبقاو هكا معناها
مريم:محححححححمممممد...ياااا دااالي
عينيا وساعو مع صياحها...هديت عليها في لحظة سكرت فمها بيدي...نحكي
انا:شبببي ¤¤¤ هبلت ياخي
قحرتلي...تحاول تفلت روحها مني...خرج محمد بالوقت كبست عليها نحكي
انا:تو نتفاهمو عليها مبعد الفازة هاذي
محمد:شفما ياااخي ؟
جبدت روحها مني...قربت لعندو شوية...تحكي
مريم:نحب على وحدة اخرى امانك
طلع راسو غزرلي...نفخت بالقاوي...قربت منها قبل ما يحكي...جبدتها من يدها نحكي
انا:ارتاح انت...و انتي تحرك قدامي...تنطق كلمة وحدة برك...ما تلوم كان روحك
حليت الباب ركبتها...و خلطت عليها...كبست عالفولون بيديا زوز...و طرت بيها...نزلت البلار...نحاول نبرد اعصابي...و ننسى لي صار...حسيت بيدها لي تحطت على يدي تحكي
مريم:حسام سوق بعقلك امانك...خواطري دايرة
معادش نجم امانك
خذيت نفس...و ركيت الكرهبة على جنب...نحكي
انا:لباس توا ؟
هزتلي براسها لا...و حلت الباب نزلت...خلطت عليها بالوقت...نغزرلها رجعت كلشي كلاتو...هزيت دبوزة الما و قربت منها...غسلتلها وجها...و حطيتها في يدها...شربت منها...تبسمت نحكي
انا:لباس توا ؟
مريم:مممم
انا:تحب ترجع لدار
مريم:لاا
انا:ملا مزلت تحب عالقلاص ؟
هزتلي براسها ايه...عديت يدي على شعرها...نحكي
انا:فراز و لا شوكولا
مريم:زوز
انا:باهي ايجا
ركبتها و سكرت الباب...خذيت نفس طويل...و خلطت عليها...احسن شي هدات توا...خدمت الكرهبة...و شديت الثنية...منعرفش كيفاش وصلت...ضربة زوز نغزرلها تقحرلي...شديت الفران نحكي
انا:انزل
مريم:وين جايبني انت يا معلم...مش هذا لي كنا عندو قبيل انا و محمد
انا:معندكش حل اخر...تنزل و لا ترجع لدار
مريم:باااهي
اول ما دخلنا...تلفتت عندي...غزرتلي ندرا كيف تحكي
مريم:على شوية قلاص جينا لهوني
انا:الريستو هذا ايطالي
مريم:اه قصدك متاع ناس الكلاص لي كيفك
انا:مممم بالظبط...تفضل
مريم:يعيشك سي حسام
قربت من الطاولة...جبدتلها الكرسي باش تقعد...غزرتلي تحكي
مريم:هوكا طلع عندك شوية اخلاق زادة
انا:اقعد...و الا ترصيلك في الدار
مريم:والله اللي تعمل فيه على خاطر ولدك...مش على خاطري...كي تطلع الوحمة في وجهو...فسرلو انت الحكاية
انا:ماهيش باش تطلع اقعد برك
هزيت يدي شاورت لسرفور جاني...غزرتلها نحكي
انا:تحب تاكول حاجة قبل القلاص
مريم:لااا...نحب على قلاص متاعي و كهو
هو:انا نوع تحب بالظبط
مريم:فاش يحكي هذا ؟
انا:زوز فراز شكولا...بالغلة عيشك
هو:باهي
مريم:ياخي انت زادة قاعد تتوحم ؟
انا:لم فمك احسنلك
مريم:قداش من وحدة عرضتها لهوني زعمة ؟
انا:منذكرش
مريم:مشاء الله...ياخي لبنات داخلين في البرستيج متاعك زادة
انا:مممم تنجم تقول
مريم:خييت...وين وحلت انا
انا:مررريم يزززي...من غير ما تفركس في الماضي توا امانك
مريم:علاااه...فما حاجات منعرفهمش انا ؟
انا:كيما شنية ؟
مريم:مثلا...الطفلة لي كنت...و لا مزلت تحبها لتوا
قلبي خض بالقاوي...منحبش نحط احتمال...انها تعرف بحكاية شراز توا...خاصة و هي في الوضع هذا...صحيح باش نخبرها كلشي اما اكيد مش توا...فقت من سرحتي على صوتها تحكي
مريم:شبيك دخلت بعضك...ميهمنيش برشا كان مزلت تحبها و لا لا...اما في رايي من غير ما تعذب روحك اكثر من هكا...تنجم تمشيلها وقت ما تحب...احسن ما تغطس في الماضي اكثر
انا:واعية للكلام لي تقول فيه انتي ؟
مريم:اكثر من اي مرة
انا:مررريم...اغزرلي هوني...الماضي متاعي سكرتو من سنين...و مانيش باش نعاود نفكر فيه جملة...اللي يهمني توا...الحاضر متاعي و كهو...حتى المستقبل منحبش نخمم فيه
مريم:هذا لي تحاول تقنع بيه روحك...اما تصرفاتك تقول العكس...كان مزال قدامك فرصة وحدة...تصلح حاجة عملتها...متضيعهاش...فما عباد تنجم تغفر و تسامح...اما
انا:شننوة ؟
مريم:السماح هذا مبني على حساب الغلطة لي عملتها انت معاها
انا:مغلطتش...و مانيش باش نطلب سماح من حد مفهوم
مريم:مممم مفهوم...اصلا هذا متوقع منك...ربي معاها و كهو
انا:في بالك لانا معرس بيك انتي...مش هي
مريم:عالورق كهو...يعني تصحيح اخر عالورق...و نولو منفصلين جملة
انا:ولدي عندك
مريم:ولدك صحيح...اما هذا ميسمحلكش انك تتحكم في حياتي
انا:بالعكس يا روحي...انتي متاعي انا و كهو...معناها لا الصغير لي في كرشك...و لا الماضي لي تحكي عليه يخليك تتحرر مني
مريم:ياسر واثق من روحك...صدقني هكا الطيحة تكون قوية برشا عليك
جيت باش نحكي...قص عليا سرفور...كي حط القلاص عالطاولة...جبداتو عندها تحكي
مريم:اوووونفاااان...شووو محلااه
طلعت راسي نغزر لسرفور...لي باقي مركز معاها...مبهم في تصرفاتها خذيت نفس نحكي
انا:عييشك
حسيتو فاق على وضعو...هز روحو و مشى...تكيت لتالي نغزرلها...غطست فيه...و تحكي فرد وقت
مريم:والله اول مرة ناكول قلاص هكاااا
انا:صحححة ليك
مريم:ممممم مبنو
تبسمت بالوقت...محسيتش بالوقت كيفاش تعدا...طلعت راسها...غزرتلي تحكي
مريم:شبيك لتوا مكليتش انت ؟
انا:معادش عيني
مريم:نجم ناكلو انا
انا:مممم اكيد
جبداتو عندها بيديها زوز...خذيت نفس...نحكي
انا:متكثرش منو...تو يضرك
مريم:مانيش باش ناكول قلاص كيما هذا مرة اخرى ملا خليني رايضة
انا:باهي
اول ما كملت...حطت يدها على كرشها تتغوصر...غزرتلي ندرا كيف...غزرتلها نحكي
انا:تستهل انتي حبيت
مريم:نحب نمشي
انا:باهي هيا قوم
حطيت الفلوس عالطاولة...و خلطت عليها...طلبت تشكيلة متاع قلاص...هزيتها و خلطت عليها للكرهبة حطيتو في يدها نحكي
انا:شد هذا
مريم:ياااا هذا الكل متاعي
انا:مممم...اما رد بالك تاكلو فرد مرة
مريم:باهي
رقدت في الطريق...اول ما وصلت لدار...حليت الباب و رجعت هزيتها في حملتي...لقيت خالتي نعيمة في وجهي...غزرتلها نحكي
انا:خالتي امانك...خليت القلاص في الكرهبة...حطو في الفريجيدار...قبل ما يذوب
نعيمة:باهي...برا طلعها قبل ما تفيق
انا:باهي عيشك...تصبح على خير
نعيمة:و انت بخير ولدي
كبست عليها اكثر و طلعت لبيتي...حطيتها عالسرير نحيتلها الكونفارس متاعها...و الجيلي...بدلت دبشي...و ترميت بجنبها كي العادة...اما المرة هاذي...انا لي قربت منها...انا لي خذيتها في حضني..يمكن هذا لي استانست بيه...معادش يهمني لي نعيشوه في النهار...و لا العركات لي تصير...المهم عندي...اني نحملها و نرقد...و معاد يهمني اي شي اخر في دنيا.
#سمر ❤