زهرة🌸

الحلقة مئة و السابعة عشر

حلقة 117
زهرة تحكي:
نزلت عينيا من وجهو و عاودت غزرتلها مرة اخرى...نغزر لكمية الشبه لي بينها و بين مراد...لون عينيها...غزرتها و ملامحها الصغيرة...تقريبا نسخة من امو...كيما كريم بالظبط...اما منعرفش علاه للحظة حسيت انو هي معندهاش ذنب في اللي وصل ليه مراد...رخفت يدي شوية على يدو...و تقويت على روحي...دخولنا لهوني...هو بداية النهاية...توا بالظبط واقفة في قلعة الوحش لي بدا منها كلشي...المرا لي مقابلتني توا...رغم حالتها...و رغم منعرفش شنية الظروف لي خلاتها توصل لهوني...اما هي كانت سبب في وجود الشيطان هذا في حياتنا...بطريقة و لا بأخرى اكيد فما سبب يخلي مراد هكا...و علاش اختارني انا بالظبط...علاش محبش امي بنفس الطريقة لي حبني بيها...وقتها اكيد مكانش باش يخسر بلاصتو في حياتي...عالاقل يقعد الحامي متاعي...اما بين ليلة و نهار الحلم ولى كابوس...اول مرة ريتو حسيت بالدعم لي فقدتو من امي بعد موت بابا...حسيت لانا لقيت حد ياقف جنبي و يساندني في حياتي...اما لقيت روحي نعيش حياة اخرى...لقيت روحي في اكبر دوامة...نرقد و نفيق على كابوس اسمو مراد...لي بقى ملاحقني سنين...و منجمتش نخلص منو...كل مرة نهرب فيها...روحي تبقى معلقة بين يديه...يكبس و يرخف عليا كيما يحب...فك مني الماضي و الحاضر...و قاعد يجري ورا المستقبل متاعي...توا بالظبط و في النقطة هاذي...منعرفش اذا لي نعمل فيه صحيح و لا غالط...اني نفركس عالماضي متاع مراد هو اللي لازم يصير و لا فما حاجة اقوى من هكا...شنية لي مخبيه عليا السنين هذوما الكل و منجمتش نعرفو...رغم انو اللي عاشو معايا اكثر من اللي عاشو هوني...خذيت نفس طويل و قربت منها بخطوات ثابتة...علاش عملت هكا...و لا وين نحب نوصل منعرفش...اما غزراتها ليا هي لي خلاتني نقرب منها...هي لي لزتني باش نعرف شنية وراها و نكشف المستور...رغم انو وصلنا لنص دارو...اما من غيرها...منجم نوصل لحتى شي...نزلت عليها شوية...نحكي
انا:س..سامحنا...يمكن طريقة دخولنا غالطة...اما ملقيناش حل آخر
بقات تغزرلي من غير حتى كلمة...سرحت في تفاصيل وجهي...كانها تعرفني من قبل...خذيت نفس بالسيف...نحكي
انا:ا..انتي تعرفني من قبل
نزلت راسي على صوت الزر الاخضر...لي كبست عليه بصبعها...و لي خلى دقات قلبي تقوا بالوقت...دورت راسي شوية غزرت لعمر...هزلي براسو ايه...كانو يقوي فيا...اصلا نعرف كان مش هو مستحيل كنت ندخل لهوني وحدي...تقويت على روحي اكثر...و عاودت غزرتلها نحكي
انا:م..مراد هو لي حكالك عليا ؟
كبست عالزر الاخضر مرة اخرى...غمضت عينيا بالقاوي...بقوة الخوف لي تسلل داخلي...و لي أكدلي اني طحت بين يدين مراد مرة اخرى...يمكن معادش فرصة اني نرجع لتالي...و الاهم اني نمنع هند منو...و منخليهاش تخلص الفاتورة متاع حاجة معندهاش ذنب فيها...خذيت نفس نحكي
انا:ت..تعرف لهو راجل امي
لحظات تعدات...قعدت تغزرلي فيهم...من غير ما تنزل عينيها من وجهي...لحظات تعداو سوايع بالنسبة ليا...عينيا تركزو على صبعها لي كان بين الزر الاخضر و الاحمر...جوابها هذا بالظبط يهمني عاللخر...و يخليني نعرف شنية لي نطلبو منها...هزيت عينيا في وجها...لعينيها...لي حسيتهم لمعو...لملامح الحزن لي بدات تطغى على وجها مع سؤالي...الصوت لي خرج في لحظة...خلاني نعاود نركز مع صبعها...دموعي تحصرو بالوقت...و مشاعري دخلت بعضها...بين خوف من اللي جاي...و فرحة انها تعرف شكون ولدها...و في اللحظة هاذي بالظبط تأكدت انو #سر_مراد_هي_امو...هي بير اسرارو الصامت...لي قد ما يحكي...ماهيش باش تمنعو...و ماهيش باش تنجم تنصحو زادة...متأكدة لي هي تعرف انو ولدها قاعد يجري ورا حاجة مستحيلة...ورا حاجة ممنوعة عليه...حتى غزرتو ليا محرمة...اما تعدا الحدود و حبني...تعدا الحرام و المستحيل و مرض بيا...حتى حد ما ينجم ينكر الحقيقة هاذي...حتى هي...و غزرتها تاكد اللي قاعد يدور في راسي الكل...اما بالنسبة ليا...معادش مجال لتراجع...و معادش فما أمل غيرها...هي لي تنجم تحررني من لعنة ولدها...لي حلت بيا من سنين...بين سؤال و جواب...قاعدين يدورو في راسي...عينيا تركزو في عينيها مرة اخرى...و كسرت الحاجز لي كنت خايفة منو من اول ما ريتها
انا:ن..نحبك تعاوني ؟ ممكن ؟
عديت عينيا على وجها...نستنى في اهم جواب يمكن يحدد مصيري و يوصلني للي نحب عليه...الاشارة الخضرة كانت كافية بالنسبة ليا...و خلاتني نرد نفس جديد...عاودت كبست عليه مرتين...و رجعت لتالي شوية...تلفت على صوت البون تحكي
هي:تحبك تخلط عليها
خذيت نفس و هزيت روحي وقفت...تلفت لعمر...لي قربلي بالوقت...حط يديه زوز...على وجهي يحكي
عمر:نعرفك قوية...و صدقني مهما كان لي باش يصير باش نخرجو من هوني...انتي معندكش ذنب فيه...و انا باش نبقى معاك لآخر لحظة يا عمري
تبسمت بالوقت...كاني كنت بحاجة كلامو هذا...باش نجم نعمل الخطوة الجاية...هزيتلو براسي ايه...باسني من جبيني و جبد روحو شوية...كبس على يدي...خلطنا عليها بالوقت...لآخر بيت في الكلوار الطويل لي مشينا فيه...غزرت للبون لي حلت الباب و شعلت الضو..جبدت يدي من عمر و عملت اول خطوة للداخل و تلفت عندو نستنى فيه...حبساتو كي كبست عالزر الاحمر...كان جواب كافي انها رفضت دخولو معايا...و من تصرفها معاه تأكدت انو مراد مقصرش و حكالها على كلشي جات عيني في عينو...هزلي براسو ايه...دوب نجمت نتبسملو...بقيت نغزرلو لين البون سكرت الباب في وجهي...خذيت نفس و تلفت شوية عديت عينيا عالبيت الكبيرة لي لقيت روحي في وسطها...نفس الديكور و نفس اللون لي يحب عليه ديما...ذوق مراد موجود في كل شبر منها...زعمة من هوني كانت نقطة البداية...و لا فما مة اعظم من هكا...علاش اختار المزرعة هاذي بالظبط...علاش ديما غامض بالنسبة ليا و بالنسبة لكل حد يعرفو من قبل...يمكن كلشي نعرفو على مراد لتوا...حتى شي...من غير انو انسان متملك و معندوش حدود...و ميعرفش المستحيل...حتى ميفرقش بين الصحيح و الغالط...لحظات عديتهم سارحة بين أسئلة الماضي و الحاضر...أسئلة قعدت نطرح فيها سنين و اسئلة خطرت على بالي توا...و زوز معندهم حتى جوااب...و لا يمكن الاجوبة الكل عند المرة لي قدامي توا...بقيت نتبع فيها بعينيا...كبست عالزر...و قربت من البلار...تتفرج عالجنينة...قربت منها شوية..وقفت بجنبها نحكي
انا:انتي تعرف بالحكاية الكل ؟
كبست عالزر الأخضر بالوقت...وخرت لتالي بالوقت منعرفش شنية لي حسيتو بالظبط...اصلا لي جيت باش نحكيه هي في بالها بيه...زعمة فما مرا تاقف ضد ولدها...و مع وحدة قاعد يتعذب على خاطر...قاعد يضر في روحو و فيها...قربت من الكوافوز...و هزيت اول تصويرة جات على يدي...لحظات تعدات و انا نغزرلها...و دورتها قريت تاريخ...تصويرة تعدا عليها اكثر من عشرين سنة...في ملعب الغولف...من لبستو و العصا لي في يدو...تظهر لي هو كان عضو في نادي هاذي...حطيتها...و هزيت تصويرة اخرى...ليه و لكريم كمية التشابه بينهم واضحة من صغرهم...نزلت بعينيا لتصويرة اخرى زادة...مع امهم...هزيتها في يدي و تلفت عندها نحكي
انا:هاذي انتي ؟
كبست عالزر الاخضر...دوب تبسمت...صراحة لي يشوفها في تصويرة...ميصدقش انو نفسها المرة هاذي..لي خانها الزمان...و خلاها مجبورة تبقى على كرسي متحرك ندرا قداش من عام تعدا عليها بالظبط...اما لي خلاني مستغربة اكثر...رغم انو اكثر من تصويرة منصوبة فوق كوافوز...اما فما حد غايب بيناتهم...بو مراد ماهوش موجود في حتى تصويرة منهم...استغربت الفازة...اما استحفظت بالسؤال لنفسي...حطيتها من يدي...و غزرتلها نحكي
انا:تقابلت انا و مراد قبل 12 سنة من توا...اما و لا مرة توقعت...انو الحكاية باش توفى بيا في بيت مجهولة...لحظات تعدات عليا من قبل مشى في بالي لي انا نعرف فيهم مراد بالرسمي...اما طلعت غالطة...الحقيقة الوحيدة انو مراد هو اكبر كابوس في حياتي
قربت منها شوية...و نزلت على ركبتي...قعدت مقابلتها بالظبط...و هزيت راسي غزرتلها نحكي
انا:ن..نحب نتحرر منو...نحب نعيش حياتي من غير ما يكون موجود فيها...مرة وحدة نحب نفيق بجنب راجلي و بنتي...من غير ما نخمم فيه...و من غير ما نخاف منو...و من غير ما ندعي انو النهار يوفى بلا ما نشوفو...مراد فكلي كلشي من حياتي...امي...صغري...الماضي متاعي...و فكلي عمر زادة...حتى الراجل الوحيد لي حبيتو في حياتي...ولى عبد آخر جراير مراد...و بنتي قاعدة تكبر من غير زادة...فوق هذا الكل حب ياخو مني آخر حاجة...يمكن اني نخمم نعطيهالو
غمضت عينيا بالقاوي...نسترجع في لي صار معايا ليلتها...دمعت خرجت من عيني و لقات طريقها على خدي...خذيت نفس طويل...نلم في طاقتي لا استزفتها...و في قوتي لي بدات تضعف...و عاودت حليت عينيا نحكي
انا:ق..قبل ما نجي لتوا...م..مراد تعدا عليا
غزرتها تبدلت في لحظة...و ملامح الصدمة بانت على وجها...نزلت راسي شوية حاشمة منها و من اللي عملو ولدها فيا...منعرفش كيفاش نجمت نلم الحروف...لي وحلو على طرف لساني...مديت يدي مسحت دمعتي نحكي
انا:ك..كانت ليلة طويلة بالنسبة ليا...تقريبا كان كلشي كيما البيت هاذي...الفرش و الديكور...حتى كان حاطط من نفس ريحة البرفان لي على الكوافوز...توقعت منو يصيح يعصب...يضربني كي العادة...اما لاول مرة تعدا الحدود في معاملتو ليا...نسى وعدو لي عطاهولي من سنين...نسى خوفو عليا...دموعي و توسولاتي..منفعوش معاه...عذبني و قهرني...حتى وصل كشف عليا زادة...و لتوا مستغربة كيفاش نجمت نمنع روحي منو في آخر لحظة...يمكن...كان كمل لي بداه...مانيش قدامك توا...و حتى هو مكنتش باش تلحق تشوفو...على خاطرني متأكد انو نهايتي هي نهاية مراد
سكت شوية و هزيت راسي نغزر...لدمعتها لي نزلت على خدها...مديت يدي بالوقت مسحتهالها نحكي
انا:منقصدش نخليك تبكي...انا جيت لهوني على خاطرك الخلاص بالنسبة ليا...الحل الوحيد...لي باش يمنع الكارثة لي باش تصير...مراد خطف اخت عمر...و كان يوصل يعاود لي عملو معاايا...وقتها باش يموت واحد منهم يا عمر...يا مراااد
هزيت روحي شوية وقفت...حطيت يدي على صدري و قربت من البلار...نحس في نفس تسكر عليا...شي من الذكريات الخايبة لي هدت عليا و شي من الخوف لي نحس فيه...و من الافكار لي قاعدة تدور في مخي فكرة اني نخسر عمر...منحبش حتى نخمم فيها...رغم انو احساسي...يقولي انو العواقب باش تكون وخيمة في الاخير...و اللعبة فيها رابح و خاسر...و لا نطلعو الكل بخسارتنا...اما مستحيل الطرفين يكون رابحين في نهاية...صوت الزر لي كبست عليه...خلاني نتلفت عندها بالوقت...ضيقت عينيا نحكي
انا:ا..انتي باش تعاوني ؟
عاودت كبست عليه مرة اخرى...تبسمت بالوقت...مهما كان لي باش نعرفو على مراد...باش يكون نقطة في صالحي...نقطة تخليني نغلبو مرة وحدة عالاقل...بقيت نغزرلها...نستنى في اشارة اخرى منها...دورت الكرسي متاعها شوية...تغزر للقاردروب...ضيقت عينيا نحكي
انا:تحبني نحلها ؟
كبست عالزر الاخضر كي العادة...خذيت نفس و قربت شوية...حليتها بيدي...نغزر لدبشو لي منظم كي العاادة...اما علاش خلاتني نحلها و وين تحب توصل منعرفش...دورت راسي غزرتلها نحكي
انا:شفما هوني ؟
كبست عالزر متاعها مرتين...مفهمتش شنية تقصد...اما واضح تحبني نفركس على حاجة تخص مراد...ضيقت عينيا نحكي
انا:تحبني نفركس على حاجة تخص مراد ؟
نزلت عينيا نغزر للضو الاخضر...عاودت تلفت للقارد روب...نعدي في يدي بين دبشو...نحاول نلقى الحاجة لي تحبني نوصللها...حليت الجيهة الثانية...و بعدت الحوايج بيدي...و نزلت راسي نغزر لصندوق محطوط وراهم بالظبط...نزلت شوية...و هزيتو في يدي...دوب نجمت نكبس عليه...على خاطر الجبيرة قلقتني...تلفت عندها نحكي
انا:هذا لي تحبني نوصلو ؟
عطاتني نفس الاشارة متاعو...حطيتو عالسرير...و غزرتلها نحكي
انا:المفتاح وينو ؟
دورت الكرسي متاعها...و قربت من الكوافوز...تغزر للعبة صغيرة...لعبة بيانو قربت منها مستغربة...شاورتلو بيدي نحكي
انا:موجود هوني ؟
غزرتها كانت كافية باش تجاوبني...هزيتو في يدي نفركس على فتحة متاعو باش نحلو...اما استغربت اكثر كي لقيتو مسكر الكل...دورت راسي نحكي
انا:كيفاش يتحل هذا ؟
كبست على ازرار الكرسي متاعها مع بعضهم الاحمر و الاخضر...اكثر من مرة...فرد وقت تغزر للبيانو لي في يدي...نزلت راسي نغزرلو...كبست عليه...عرفتو يطلع موسيقى...ضيقت عينيا نحكي
انا:تقصد يتحل بالموسيقى ؟
كبست عالزر الاخضر بالوقت...رغم انو البيانو صغير...اما اكيد فما لحن سبيسيال...باش يتحل...و مستحيل تنجم تجاوبني هي...نظن قاعدة تعمل اكثر من مجهودها باش تخليني نوصل للي نحب عليه...دقايق عديتهم واقفة في بقعتي...يخليني نخمم نحل الصندوق هذا...من غير ما نظطر نكسرو...فرد وقت نتذكر في النوتات لي تعملمتهم من هند...وقت كنا نعدو الوقت مع بعضنا غمضت عينيا...نعاود في كلامنا بيني و بين روحي
انا:وين تعلمت اللحن هذا ؟
هند:من عند فراات
انا:كيفاش نجمت تحفضو ؟
هند:تحب تجربو ؟
انا:اكيد
هند:ايجا اقعد
حليت عينيا مروهجة...و انا نتذكر في تفاصيل اكا النهار...قربت شوية قعدت على طرف السرير...حطيتو على حجري...تقريب ربع ساعة و انا نعاود فيه...خاصة بيد وحدة...بقات تغزرلي و اكهو...قلبي خض بالقاوي...و انا نغزر للمفتاح الصغير...لي خرج على جنب...هزيتو و حطيت البيانو من يدي...خذيت نفس و غزرتلها...كبست بصبعها عالزر ووخرت لتالي شوية...خذيت نفس...و تلفت لصندوق لي مقابلني...منعرفش شنوة مخبي داخلو بالظبط...اما لي متاكدة منو...انو هاذي اول خطوة تخليني نعرف شكون هو مراد...شكون العبد لي عديت معاه سنين من غير ما نعرفو...و الاهم انو لي مخبي هوني...باش يخيليني نتحرر من اسوء كابوس في حياتي...غمضت عينيا بالقاوي...و عاودت حليتهم تقويت على روحي...و قربتو ليا...كبست عالقفل و حطيت فيه المفتاح...دورتو شوية...و حليت الصندوق نعدي في عينيا على اوراق...تصاور و حاجات قديمة يظهر ليها سنين...هزيت راسي غزرتلها مستغربة...يمكن مش هذا لي حاجتي بيه انا توا...و لا مش هذا لي توقعت اني نلقاه...اما مدام تحبني نحلو اكيد باش نلقى فيه لي حاجتي بيه...هزيت اجوبة في يدي...مربوطين بخيط واحد...يجي اكثر من اربعين جواب...حطيتهم على جنب...و هزيت التصاور لي محطوطين على جنب نتفرج عليهم بالتصويرة...و كل تصويرة تتعدا...نفسي يضيق اكثر...و كيما توقعتو بالظبط...تصاور هاذي مع بوهم...اما الغريبة انو في كل وحدة...راسو مقطوع...و لا ممحي بالستيلو...هزيت راسي غزرتلها...دورت كرسيها بالوقت و عاودت قربت لشباك...متحبش تغزرلي...و متحبش تعطيني اشارة اخرى نفهم بيها لي قاعد يصير حطيتهم من يدي...و هزيت كارت قديمة...نقرا في اسم المدرسة الداخلية لي قرا فيها بكري و كارت أخرى..فيها اسم الطبيب متاع امراض نفسية...كان يتعالج ؟ هذا السؤال لي طرحتو على روحي و انا نقرا فيها...و علاش واحد كيفو يقرا في مدرسة داخلية...من اللي عمرو 6 سنين...خذيت نفس طويل...قبل ما نهز رسمة قديمة فيها هو و أمو كهو...في بلاصة مزيانة...كيما المزرعة لي احنا فيها...رسمة توضح انو فما حاجة كبيرة ورا علاقة مراد مع بوه...واللي نعرفو انو مستحيل حد كيما مراد يعدي حد يوجعو بطريقة و لا بأخرى...و هذا لي استوعبتو بعد اللي صار فيا آخر مرة...حطيت تصاور من يدي...و هزيت البقية...مجموعة من تصاور تخصني انا...من وقت كنت صغيرة لتوا...متوقعتش باش نلقى جزء مني داخل الصندوق هذا...كبست عالكوليي متاعي لي كان هدية منو...و طيشتو مرة عند ساقيه...آخر حاجة توقعتو يحتفظ بيها بعد الفازة لي عملتها معاه نهارتها...خذيت نفس بالوقت...و دورت راسي شوية هزيت الجوابات في يدي...حليت الخيط و فرقتهم على بعضهم...مرتبهم على حسب التواريخ...و اول تاريخ عندو اكثر من عشرين سنة...يمكن اول سنة ليه في المدرسة...حطيت كلشي من يدي...و حليتها...عديت صوابعي على كلمات دوب مفهومة...حروف كاتبها طفل صغير...عمرو بين 6 و 7 سنين...حروف مكتوبين لأمو باش تجي تخرجو من المدرسة لي هو فيها...سكرتها عالدمعة لي نزلت من عيني فوقها بالظبط...يمكن شفقت على الطفل الصغير لي كتبها سنين من توا...رسالة كافية خلاتني نسترجع نفس الاحساس...زعمة هاذي كانت النقطة المشتركة بيني و بين مراد ؟ هزيت راسي شوية...نغزر لامو...لي مزالت عاطية بظهرها...زعمة هي زادة كانت كيما امي...هي زادة حبت بوه اكثر منو...و الا علاش خلاتو يقرا في مدرسة خاصة...خارج تونس...و يظهر انو كان يخضع لقوانين صارمة غديكا...حليت بقية الجوابات لي عام بعد عام...تحسن خطو فيها...و تحسنت عباراتو...و قصدو ولى واضح في كل رسالة حطيتهم من يدي و هزيت آخر وحدة...على خاطر مستحيل نخلط اني نقراهم الكل...اخر وحدة كانت رسالة لبوه...لي هو باش يرجع لتونس...بعد سنين عداها وحدو...اما علاش رسالة هاذي بالظبط كانت لبوه...رغم انو كل وحدة نحلها كانت لامو...دورتها نثبت في تاريخ و العنوان...طلع الجواب من غير طابع...معناها موصلش لهوني...رجعت نثبت في لاخرين نفس الشي...حتى وحدة منهم موصلتش...طول السنين لي عداها غديكا...فضل انو يكتب و يحتفظ بيها لروحو...اما علاش ؟ حطيتهم من يدي و هزيت روحي قمت...قربت منها...وقفت مقابلتها بالظبط نحكي
انا:م..مدام سعاد
هزت عينيها في وجهي...خذيت نفس و كملت كلامي نحكي
انا:ع..عرفت اسمك من الجوابات
بقات تغزرلي من غير حتى اشارة...عديت يدي على وجهي نرد في نفس و نحكي فرد وقت
انا:لي عرفتو على مراد...ماهوش كافي باش يخليني ننقذ روحي و عيلتي...حاجات من الماضي تنجم تكون عند اي حد فينا...انا لازمني نقابل س..سي امجد...نقصد راجلك...هو الوحيد لي ينجم يعاوني
كبست عالزر الاحمر بالوقت...مفهمتش منها اذا هي رافضة الطلب متاعي...و لا تقصد حاجة اخرى...نزلت عليها شوية نحكي
انا:مداام سعاااد...انا معادش عندي حل آخر غيركم...انا زادة ام و نعرف خوفك على ولدك...اما تعلق مراد بيا و حبو ليا مخوفني...و مخليني نخسر كلشي نحاول نحافظ عليه في حياتي...عاااوني اماانك نحب نعرف الحكاية كاملة
نزلو دموعها بالوقت...دموعها لخلاو هاجس الخوف يكبر داخلي اكثر و اكثر...و تسؤولات كبيرة ولات في مخي...حتى اكثر من قبل...خذيت نفس نحكي
انا:باهي...نحبك تدلني على سي امجد...و نوعدك حتى شي على مرااد
كبست عالزر الاحمر مرة اخرى...تحاول توصلي حاجة بغزرتها...ضيقت عينيا نحكي
انا:س..سي امجد عايش ؟
نزلت راسي نغزر للاشارة الحمرا لي عطاتهالي...قلبي خض بالقاوي...جبدت روحي لتالي...و رجعت للاوراق لي كنت نقرا فيها...لصور لي مقطع فيها راس بوه كبست روحي نفركس بيدي على أوراق اخرى...حليتهم نقرا فيهم...شهادة وفاة متاع بوه و تقرير طبي...كلشي يظهر عاادي...رغم انو الاوراق قديمة...و حتى مدام سعاد هي لي موقعة عليهم...على خاطر الحكاية عندها عشرين بالظبط...رجعت عندها و نزلت على ركبتي مرة اخرى...نحكي
انا:ع..علاش مراد يكره بوه لهدرجة ؟ شنية الحكاية مدام سعاد ؟
نزلت عينيها من وجهي متحبش تغزرلي...حطيت يدي على ساقيها نحكي
انا:باهي شنية سبب موت سي امجد...ما فهمت حتى شي من تقرير هذا
هزت راسها غزرتلي ندرا كيف...حلت فمها محاولة منها باش تحكي...اما الحروف خانتها و مخرجتش...كبست على يدها نحكي
انا:باهي قولي...سي امجد...موتو كان طبيعي
تعدات دقايق و هي تغزرلي...قبل ما تظغط عالزر الاحمر...عينيا وساعو بالوقت...دوب نجمت نلم الحروف لي وحلت في حلقي... و انا نسأل فيها
انا:م..مراد هو سبب في موتو ؟
كبست عالزر الاخضر...رخفت يدي عليها بالوقت...و غزرت لعينيها نحكي
انا:ت..تقصد مراد هو لي قتل سي أمجد...هو لي قتل بوه ؟
صوت الزر الاخضر كان وقعو قوي في وذني...خلاني نطيح لتالي مروهجة...حطيت يدي على فمي...و جبدت روحي منها...دوب نجمت ناقف...هزيتلها براسي لا دموعي غلبتني و نزلت على خدي...الخوف لي حسيتو كان من نوع آخر...اني عديت سنين طويلة تحت سقف واحد...مع انسان قاتل و مريض...منجمتش نستوعبها مراد مهما كان خايب ميعملش هكا...مستحيل يوصل يقتل بوه...رغم انو من قبل حاول يقتل عمر...اما مش نفس الشي...مستحيل...دخلت بعضي و منجمتش نحكي معاها اكثر...البيت متاعو خلات نفسي يضيق اكثر...دوب نجمت نمد الخطوة باش نخرج منها...من عرين الاسد...خليت كلشي اكاكا...و مديت يدي كبست عالبواني...كل خطوة نطلب في ربي يعطيني شوية قوة باش نوصل لعمر...صورتو ضبت بين عينيا...و انا نغزرلو واقف مع ملك...دوب نجمت نركز فيهم...و قبل ما يلحق عندي قوتي خانتني و طحت عالارض...صوتو حسيتو بعيد برشا...و ذكريات قديمة جات بين عينيا...ليها سنين طويلة...قدام عتبة دارنا...مع اول انسان عرفتو في حياتي...الملاك و الشيطان في نفس الوقت...الانسان لي عطاني كلشي...و في نفس الوقت فكلي حياتي الكل نفس الانسان لي حسيتو باش يدعمني...لقيتو يحطم فيا...قوتي خانتني و خلاتني نغطس في ذكريات...تجمع بيني انا و مراد اكهو
🌸🌸🌸🌸🌸🌸🌸🌸🌸🌸🌸🌸🌸
هند تحكي:
لميت ساقيا اكثر...على صوت خطواتو لي حسيت بيها...لتوا منجمتش نستوعب لي ريتو...نحس روحي في عالم آخر...مش مصدقة لي قاعد يصير معايا...للحظة وحدة كنت نقول كلام مراد ماهوش صحيح...و مستحيل نكون خايبة لأكا الدرجة لي حكى بيها...عالاقل بالنسبة لناس لي تحبني...اما لي ريتو ساعات لتالي اكدلي كلامو...كريم و حضورو هوني أكدلي كل كلمة قالها مراد في حقي...حتى هو استغلني...حتى هو كذب عليا...و جرني وراه...جيست باش يوصلني لهوني ؟ في شنية غلطت معاه منعرفش...علاش حتى يخلي مراد يخطفني بالطريقة هذيكا...اصلا انا علاش وثقت فيه من الاول...شبيني مشفعتش من عملت مراد قبل...أسئلة حرقتلي مخي...و خلاتني نكبس على راسي بكل قوتي...متوقعتش باش يجي نهار و نحتقر روحي لهدرجة...خاطرني مشيت بساقيا لمراد قبل و كريم بعدو...دموعي شاحت على خدودي...و ملقيتش جهد اكثر...ساعات تعدات و انا قاعدة تحت الشباك...من آخر لحظة ريتو فيها...تي حتى هو منعرفش عليه شكون...و استسلمت لاحساسي معاه كي الدغفة...و خليتلو يقربلي و سمحت في روحي ليه...مديت يدي شوية...مسحت شفايفي مرة اخرى...في كل مرة نتذكر فيها بوستو ليا...كل ما نتذكر ملس شفايفو على شفايفي نكره روحي اكثر...علاش صار فيا هذا الكل منعرفش...علاش مراد اختارني انا بالظبط...باش يضر خويا...هو اكثر حد يعرف لي ما عندي حتى ذنب في لي صار...يعرف لانا عمري ما نويت نضر واحد فيهم...الوقت لي تعدا الكل ستنيت عمر و لا مصطفى...حد منهم يخرجني من البيت هاذي...و يطمني لي هو مجرد كابوس و كهو...لميت روحي أكثر...و هزيت راسي شوية على صوت الباب لي تحل...جات عيني في عينو مرة أخرى...رغم الخوف لي حسيتو...اما بقيت هادية...اصلا بعد لي تعدا عليا...و بعد لي قالو ماهوش باش ينجم يأذيني اكثر من هكا...دقايق تعدات و هو يغزرلي...منعرفش علاش تقززت منو و من وجودو معايا في نفس البيت...كيما تقززت من روحي لي قعدت كي الكورة بينو و بين اتباعو...كان شديت روحي نهارتها و تعلمت من درسي...كان رفضت صحبة كريم من الاول مستحيل...كنت نوصل للحالة هاذي...و مستحيل كنت باش نطيح بين يديه مرة اخرى...صوتو لي خرج هادي...بردني اكثر
مراد:قوم
نزلت يديا شوية...استندت بيهم عالحيط لي ورايا...و هزيت روحي وقفت بالسيف...نحس في روحي دايخة بعد اللي تعدا عليا الكل...اصلا معنديش قوة باش نواجهو...و لا حتى باش نعكس كلامو...هزني و حطني يحكي
مراد:تبعني
انا:و..وين باش تهزني ؟
مراد:ازرب روحك
انا:منحبش نجي معاك
ضيق عينيه...و قرب مني بعد ما كان باش يخرج...لصقت في الحيط لي وريا...نحسب في خطواتو لي قاعد يقربلي بيها...دقات قلبي قوات اكثر...مع صوت انفاسو لي ضربت في وجهي...و ريحتو لي دخلت لخشمي من قربو ليا...صوتو خلاني نزل راسي...هاربة من غزرتو
مراد:قاعد نلعب معاك هوني ؟
انا:ا..ابعدني مراااد...خليني نمشي من هوني
مراد:في بالي حكينا فيه الموضوع هذا
انا:ن..نحب نمشي و كهو
مراد:مزال بكري عزيزتي...و توا
طلعلي راسي شوية...جات عيني في عينو...غزرلي ندرا كيف و كمل كلامو يحكي
مراد:تسمع الكلام...لين سي خوك يرجعلي امانتي و يهزك عليا
انا:ا..انت واحد بسيكوبات مراااد...م..مدام وصلت تحب بنت مرتك...انت ما جي شي كان عبد مريض و مخو مسخ
دزيتو بيديا زوز لتالي...باش نمشي...يدو لي تغرست في شعري ردتني لتالي...و قبل ما نحكي...صوابعو تغرسو في وجهي...سكتوني...و صوتو لي خرج بقوة...خلاني نحس برجة قوية داخلي
مراد:مزلت تحل فمك...نخليك تشوف الوجه الثاني متاعي...مفهوم كلامي
دوب نجمت نجبد وجهي من كبسة يدو...و هزيتلو براسي ايه...نحكي
انا:ب..باهي...س..سيبني
مراد:هيا توا...امشي قدامي
رخف يدو على شعري...و جبد روحو لتالي...دوب نجمت ناخو نفس...عديت يدي على راسي من تالي...نبرد في البلاصة...لي حسيتو باش يقلعها مع شعري...دوب نجمت نمنع دموعي باش متنزلش مرة اخرى...كبست روحي شوية...و خلطت عليه...نزلت وراه من غير حتى كلمة...نعدي في عينيا عالدار لي جابني ليها...و لا اي حاجة تخليني نخرج من هوني...منعرفش كيفاه وصلت اللوطة...نزلت راسي نغزر لطاولة...باكو بيتزا...و سندويتش...و كولا...منصوبين...هزيت راسي شوية على صوتو يحكي
مراد:شد بلاصتك
قربت بخطوات رزينة قعدت عالفوتاي...نحس في بدني مش مطاوعني...من ليلة البارح و انا هوني...و زادت ظلامت الدنيا و انا معاه في نفس الدار...ترمى عالفوتاي مقابلني...يحكي
مراد:متحبش نستدعاك
انا:معينيش
مراد:منحبكش تموت من توا عزيزتي...مزال حاجتي بيك
انا:قاعد تستنى عالفارغ...عمر يسلم في روحو و ميسلمش في زهرة
مراد:صراحة كان جيت في بلاصتو...اكيد مانيش باش نقدم على مخاطرة في خاطر وحدة كيفك انتي...اما سي خوك مبادؤو تمنعو يسلم فيك
انا:و نفس المبادىء هاذي تمنعو يسلم في مرتو
مراد:تو نشوفو قداش ينجم يصبر
انا:يا ريتني مقابلتكش جملة يا مراد
مراد:شنعمل كي انتي طلعت بهيمة و تتمشى ورا عواطفك...حتى يظهرلي مش انا كهو لي عديتها عليك
انا:عندك حق...سي كريم كمل خدمتك بالقدا
مراد:في راااييي مفما حتى حد ينجم يتحملك...اما ديما تطلع كصفقة رابحة
انا:ش..شقصدك ؟
مراد:نقصد في بوك لي حاول يبيعك مرتين قبل توا
انا:ي...يزززي مراااد
مراد:و كنت طعم ساهل برشا بالنسبة ليا...بفضلك نجمت نرجع زهرة...و نخلي خوك بين اربع حيوط
انا:اسسسكتتت
مراد:و نفس الشي توا...انتي جيتني بساقيك يا هند...متعلمتش من اخطائك و خليت عبد آخر يلعب بيك...من طرفي انا
انا:مراااد اسسكت...يزززي اسسكت
مراد:محسيتش للحظة لانتي ماكش مرغوبة...مجرد لعبة و كهو ؟
هزيت راسي شوية...جات عيني في عينو...نفس الغزرة متاع العادة ما تبدل فيها شي...و نفس الغزرة ريتها عند كريم بكري...و لي هدت آخر أمل كنت نجم نتعلق بيه...تبسم على جنب و كمل كلامو...يحكي
مراد:ياخي صدقت روحك ؟ صدقت لي كريم ينجم يحب وحدة كيفك...جرد ثقة مش عطايتها لروحك
غمضت عينيا بالقاوي...نتذكر في اللي صار البارح الصباح و لي حكيتو لكريم على روحي و على  عيلتي...للحظة صدقت...اي صدقت لي هو سمعني من قلبو و قاعد يدعم فيا...اما كلام مراد توا يثبت العكس...و مغلطش في حتى كلمة قالها...كلشي مطابق للاحداث لي عشتها مع كريم قبل...اصلا حد كيفو شملزو باش يتعامل مع وحدة كيفي من غير مقابل...شملزو حتى يتحملني...يتحمل عصبيتي...دموعي...تخرنيني و قلة ثقتي في روحي لي وصلتني لهوني...قد ما نقمت على روحي...عزت بيا...و قد ما كرهت روحي...غاضتني الحالة لي وصلتلها...حليت عينيا و رميت كلشي كان عالطاولة في الارض...دموعي نزلو اكثر من قبل و صياحي قوا في الصالة
انا:يزززززززي...اسسسسكت...معاااادش نحب نسمعك...انت و هو نفس الشي...يا ريتني مت قبل ما نقابلك يااا مراااد...انتت سبب في كلشي عشتو...و كلشي قاااعد يصير معااايا...نكرررهك...نكرررهك يا مراااااد
قربت من الباب متاع برا...نضرب فيها بكل قوووتي و نعيط على رجالو لي برا...و نحكي
انا:حلووو الباااب هذااا...حد فيييكم يخرجني من هووني...خرجوووني
جهدي طاح و انا نعيط عليهم و ندق عالباب فرد وقت...حسيت بيديه...لي كبسو على اكتافي من تالي...حاولت نجبد روحي منو منجمتش...بدني تهد و ملقيتش طاقة نواجهو بيها...لحظات تعدات لقيت روحي في حضنو...حط يدو على شعري يحكي
مراد:ايجا اقعد
قربت معاه بخطوات ضعيفة دوب نجمت نعملهم...قعدني عالفوتاي...و قعد بجنبي...يحكي
مراد:يزززي كهو...هدي روحك
انا:ن..نحب نمشي من هوني
مراد:الحل في يدك خوك بعد توا
قام و خلاني من غير ما يزيد معايا حتى كلمة اخرى...تكيت لتالي نرد في نفس...نحس في حاجة قوية تكسرت داخلي...و ماهيش باش تتصلح...معادش نعرف اذا نستنى شكون يخلصني منو و لا نسلم امري لربي...تقريب يومين تعدات...حسيت روحي عبد آخر...ضحكتي و ذكرياتي الحلوة ضاعت...و فقدت ثقتي في روحي اكثر من قبل...توا بالظبط منحب نقابل حتى حد...لا مراد...لا كريم...حتى خواتي و عيلتي منحبش نقابلهم...كل حد منهم عندو يد في اللي صارلي...و اكثر حد هو بابا...هو سبب لي خلانا نعيشو هذا الكل...مراد مغلطش في كلامو...انا ديما كنت صفقة بديلة بالنسبة لبابا...في حالة خسر مشروعو...و لا اعلن افلاسو...بين ذكريات ماضي و الحاضر...حليت عينيا مروهجة...دورت عينيا في الصالة ملقيتوش...هزيت روحي شوية وقفت...و قربت من الشباك...هزيت الريدو نغزر لرجالو...لاهيين من جيهة وحدة...حليت الشباك شوية...برودة سطعت في وجهي...بدني تكبس مع صوتو يحكي
مراد:فاش تعمل ؟
دورت راسي بالوقت...جات عيني في عينو...قلبي خض بالقاوي...مع تبسيمتو...قرب مني بخطوات ثابتة يحكي
مراد:هاك طلعت ذكية و باش تهرب مني
جبدت روحي من شباك و وخرت لتالي...من غير ما نقول حتى كلمة...حاولت نطلع مرة اخرى...يدو لي دارت على كرشي منعتني ورجعتني لتالي...نزلت بيديا زوز عليها...نفك في روحي منو و نحكي فرد وقت
انا:سييبننني مراااد...نحي يدك عليا
نزل بيدو لاخرى لجنبي و دورني عندو بالوقت...جات عيني في عينو...كبس عليا اكثر...يحكي
مراد:مش قتلك تشد بلاصتك من غير حتى مشاكل
انا:س..سيييبني
مراد:قتلك متلزنيش باش نأذيك
نزيت بيديا لصدرو ندز فيه لتالي...يدي لي تمدت و كبست على جنبو...خلاتو يرخف عليا و يوخر لتالي مروهج...موجووع ؟ اما من شنية ؟ محاولتش نركز برشا شنية سبب ورا حالو...قد ما خممت اني نستغل الوضع لصالحي...اول ما قرب مني...عاودت ضربتو بككل قوتي لجنبو...كبس عليه موجوع اكثرمن الاول...كبس بيدو على حرف الحطب متاع الدروج...يرد في نفس ورا بعضو...هز راسو غزرلي ندرا كيف...و عاود غزر ليدو لي بدم...عرفت و استوعبت انو غزرتو هاذي مستحيل تخليه يتراجع عاللي يخمم فيه...اول ما شدلي يدي...ضربتو مرة اخرى لنفس البلاصة...كبست يدو ترخفت عليا...اصلا من بكري حسيتو محموم و مش قد بعضو...غمض عينيه بالقاوي...جبدت روحي لتالي...و قربت من الشباك...حليتو بالقدا...نسمع فيه يحكي
مراد:ه..هند ارجع احسنلك
دورت راسي شوية غزرتلو...النزيف متاعو قوا...استنادو على يدو...يقول لي فقد قوتو و مستحيل ينجم يخلط عليا...كبست روحي...و خرجت من الشباك...الطيحة كانت قوية بالنسبة ليا...و الوجيعة لي حسيتها في ساقي...كتمتها بحطان يدي على فمي...دورت راسي شوية...نغزرلهم يدورو و يحكو مع بعضهم...رجعت لتالي شوية...و هزيت راسي نغزر لواحد منهم يحكي
هو:هرررربت...الحقهااا فيسع
خذيت نفس و عطيت على ساقيا...رغم قلة الجهد لي عندي...و الوجيعة لي نحس فيها...اما عزيمتي في الهروب كانت اكبر...و مستحيل نرجع لبين يديه مرة اخرى...جريت كيما عمري ما جريت قبل...معرفتش روحي وين انا و لا وين دخلت...حبست كي سطعت في واحد منهم...كبست بيديا زوز على صدرو و هزيت راسي...نغزرلو مع ضو القمرة...نفسي تقطع...آخر توقعت نزيد نشوفو مرة اخرى...يديه لي كبسو على اجنابي خلاوني نسلم...و دموعي نزلو اكثر...دوب نجمت نلم الحروف لي وحلت في حلقي...نحكي
انا:ك..كريم...خليني نمشي من هووني اماانك...سييبني...منحبش نرجع عندو
فقدت اعصابي و انا نحكي معاه...يديا رعشو فوق صدرو...جيت باش نحكي قص عليا...كي دورني في لحظة...ورا كوخ صغير...قربلي اكثر...و هز صبعو حطو على فمو...يسكت فيا...هزيتلو براسي ايه...من الخوف اللي قاعد نعيش فيه جرايرهم...هربت منو طحت في يد واحد من رجالو...فكرة لي هو باش يرجعني عندو...و لي انا باش نكون بين يديه بعد لي عملتو روهجتني...و دخلتني بعضي اكثر...كبست على صدرو و حاولت نجبد روحي منو...كبس عليا أكثر...حسيت بضعفي و انا بين يديه...خممت في مخرج آخر بيني و بين روحي ملقيتش...رجال لي تعداو في لحظة...و الضو لي ضرب في الارض...خلاني نغرس راسي غي حضنو...بقوة و حجم الخوف لي حسيتو...يدو لي تغرست في شعري...هداتني و خوفتني فرد وقت...معادش نجم ناثق في حتى حد بعد توا...خاصة بعد اللي عشتو في الليلتين هذوما...و بعد لي ريتو من مراد...دقايق تعدات...الحس بات في لحظة...و اصواتهم بعدت علينا...رخفت يديا على صدرو بالوقت...وخر خطوة لتالي...يحكي
كريم:سافا ؟
هزيتلو براسي لا...و جبدت روحي شوية لتالي...دوب لقيت صوت نحكي بيه
انا:ا..ابعد عليا
كريم:متخااافش
قرب مني باش يمسني...وخرت لتالي اكثر...و هزيت راسي غزرتلو نحكي
انا:ابعععد عليا م..متمسنيش
كريم:هننند يززي...متخااافش مانيش باش نأذيك
بقيت نغزرلو من غير حتى كلمة...البارح عملت نفس الشي...وثقت فيه...و مشيت معاه لبلاصة مجهولة...و جرايرو وصلت لهوني...و توا باش يعاود عملتو معايا...كان ناثق فيه و نعطيه يدي...يرجعني لعندو...و يخليني مرة اخرى...غزرة مراد في آخر لحظة...خلات الخوف لي داخلي يكبر اكثر...لدرجة منجمش حتى نتوقع كان نطيح في يدو مرة اخرى...شنية باش يصير فيا...دورت راسي عالشيرتين...نثبت في البلاصة لانا فيها...حسيت بيه قربلي...وخرت لتالي أكثر...رجعت شعري بيدي...نحكي
انا:م..متقربليش
كريم:لازمنا نمشو من هووني...هيا عزيزتي
غمضت عينيا بالقاوي و عاودت حليتهم...نهدي في روحي و نثبت في وجهو...باش مندوخش أكثر...جبد يدو لتالي...يساير فيا...و يحكي فرد وقت
كريم:متخاافش مني...هيااا
وخرت لتالي اكثر...و عطيت على ساقيا مرة اخرى...نجري بكل قوتي...هاربة منو و من مراد و من اللي صار معايا الكل...مستحيل نخليه يرجعني ليه مرة اخرى...مستحيل ندخل لهذيكا دار...و لا نخليه يعذبني اكثر من اكاكا...خطواتو لي حسيتهم ورايا خلاتني نقوي في الفيتاس أكثر...لدرجة منعرفش وين ماشية...و لا وين باش تكون الوجهة متاعي...لي يهمني اني نهرب و كهو...حتى وجيعة ساقي محسيتش بيها...آخر خطوة ليا...منعرفش وين دعثرت و جيت على وجهي...دوب نجمت نهز روحي شوية...يديه كبست على اكتافي...و هزتني شوية...دورني عندو يحكي
كريم:شنية لي تعمل فيه انتي
جبدت روحي منو شوية...و مديت يدي نمسح في وجهي نن تراب لي تخلط بدمي...كبست بيدي لاخرى عالارض نحكي
انا:ك..كريم امااانك خليني نمشي من هوني...م..منحبش نرجعلو...و..والله باش يقتلني المرة هاذي
قربلي اكثر...سلمت و منجمتش نقاومو...غزرتو و خوفي منو خلاوني نسكت بالوقت...المنديل لي جبدو من جييبو عداه على جبيني و خدي...يمسح في الجروح لي تخلفت على وجهي...مديت يدي بالسيف...نزلتلو يدو نحكي
انا:ق..قلو لانت ضيعتني...اكيد باش يصدقك
كريم:هند...هدي روحك
انا:ا..انا وثقت فيك كريم...ع..علاش عملت فيا هكا ؟
حاوط وجهي بيديه زوز...كبس عليا و غزرلي ندرا كيف يحكي
كريم:اغزرلي هوني...مانيش باش نخليك ترجع عندو...و مانيش باش نخون ثقتك فيا...هيا قوم لازمنا نبعدو من هوني
هزيتلو براسي لا...و جبدت روحي منو...نرد في النفس بالسيف و نحكي فرد وقت
انا:ع..عمر باش يلقااني...و باش يحاسبكم زوز مع بعضكم
كريم:ياااا هننند...والله العظيم ما عندي ذنب في اللي صار...هيااا قوم معاايااا...كي نبعدو من هوني نفهمك في كلشي صار
انا:ا..انت كذبت عليا...ا..انت و هو نفس الشي
كريم:هننند كان يلحقو بينا الجماعة توا...مستحيل نجم نمنعك
انا:خ..خليني نمشي ملا...حتى حد ماهو باش يشك فيك...امااانك...نحب نمشي من هوني و كهو
كريم:نمشو مع بعضنا...وعد مني مانيش باش نضرك...اثق فيا المرة هاذي زادة
انا:م..ماكش باش ترجعني لدار هذيكا مرة اخرى ؟
كريم:على جثتي...هيا قووم
سمعت اصواتهم من بعيد...مديت يدي بالوقت...حطيتها في يدو...كبس عليا و قربلي اكثر...وقفني...يحكي
كريم:تنجم تمشي ؟
هزيتلو براسي ايه...استندت عليه...نمد في الخطوة بالسيف...منعرفش علاش وثقت فيه مرة اخرى...اما في الوضع لانا فيه...ما عندي حتى حل آخر...كان اني نمشي معاه...تفرهدت شوية كي بعدنا عالدار...هزيت راسي نغزر لنفس الكرهبة لي تخطفت فيها البارح...وخرت لتالي مصدومة...نحكي
انا:ش..شباش تعمل ؟
كريم:اركب
انا:م..مستحيل
كريم:هند هيااا عزيزتي
انا:منحبش نركب معااك...ا..انت وعدتني ماكش باش ترجعني عندو
قرب مني شوية...جبدت روحي بالوقت...خطفني من يدي في لحظة...ضربت في صدرو بالوقت...كبس على ظهري...و باسني من راسي يحكي
كريم:متخااافش مني...الكرهبة هاذي مش متاعي...اما معندناش حل آخر...لازمنا نخرجو من المنطقة هاذي توا...باهي
هزيت راسي شوية...عدا صوابعي على خدي...و تبسملي يهدي فيا...خذيت نفس نحكي
انا:م..منحبش نشوفو مرة اخرى...ك..كان ناثق فيك توا...تبعدني من هوني ؟
كريم:سااعة نجم نسلم فيك ياخي...متخااافش...مدامك معايا توا...حتى مرااد مينجمش يقرب منك
انا:ب..باهي
كريم:هيا ايجا ملا
قربت منو شوية...حلي الباب...و عاوني طلعت بحكم درجة الكرهبة عالية شوية...خلط عليا...حط دبوزة الما في يدي...و خدم الكرهبة...خرج واحد من رجالو في وجهنا...كبس عالفيتاس اكثر...من غير ما يعمل حساب للسلاح لي في يدو...بعد من وجهو بالوقت...و الغريبة لا خلطو علينا و لا حتى حد عرضلنا...خرج لطريق...و هز تليفونو...بقيت نغزرلو من غير حتى كلمة...يكلم في شكون...دخلت بعضي أكثر مع صوتو...يحكي
كريم:هند معايا توا...خلي رجالك بعاد عليا...و معادش تخمم انك توصللها مرة اخرى...اصلا نظن المرة هاذي انت بحاجة السفرة لامريكا...باش تفيدك برشا صدقني
نزل التليفون...و رماه من يدو...لصقت في الباب اكثر نحكي
انا:و..وين باش تهزني ؟
كريم:عملك شي ؟
انا:ش..شقصدك ؟
كريم:سالتك جاوبني هند...مرااد عملك حاجة...حاول انو يمسك ؟
هزيتلو براسي لا...كبست على حرف الكرسي...و خذيت نفس نحكي
انا:ل..لا
نزلت راسي...وقت حسيت بدموعي غلبوني و نزلو على خدي يجرو...شد الفران بالقاوي...و غزرلي يحكي
كريم:شنية نفهم من الدموع هذوما هند ؟
هزيت راسي شوية نغزرلو...دموعي زادت اكثر...حتى منجمتش نفسرلو لي صار معايا...ملامحو لي تبدلت في لحظة...خلاتني دوب نلم الحروف...و نحكي
انا:و..وجعني برشا كريم
جبدني من يدي بالوقت...حطيت راسي على صدرو و غمضت عينيا...نحب ننسى لي صار معايا الكل...و ننسى اني ريتو معاه غديكا و لي حتى هو كذب عليا زادة...يدو لي غرسها في شعري...خلاتني...نكمل كلامي بالوقت
انا:ق..قالي برشا كلام يوجع...معاادش نحب نشوفو و لا نقابلو مرة اخرى في حياتي...معادش نحبو يجرحني...لتوا مصدقتش اني بديت نبرا منو...عاود وجعني مرة اخرى
كريم:هو نفسو لي كنت تعرفو من قبل ؟
جبدت روحي شوية...مع سؤالو لي خرج بصوت مكبوس...مديت يدي مسحت دموعي...و هزيتلو براسي ايه...دور راسو شوية...و عدا يدو على وجهو يحكي
كريم:ك..كنت تحبو هند ؟
بقيت نغزرلو من غير حتى كلمة...سؤالو روهجني...و مش في وقتو جملة...لا الوقت و لا حالتنا...تسمحلنا باش نحكو في الموضوع هاذي...رجعت بذكرياتي لتالي...لي كنت معجبة بيه فرات مش مراد...و اصلا مكانش حب بالنسبة ليا...و هذا لي تاكدت منو بعد اللي تعدا عليا اليومين هذوما...فيقني من سرحتي يحكي
كريم:جاوبني هند ؟ حبيتو ؟
انا:لااااا...مراااد اكبر كذبة في حياااتي...و مستحيل يجي نهار نحب عبد مريض كيفو
دورت راسي شوية...محبيتش سؤالو بعد اللي تعدا عليا الكل...مستحيل نحب عبد مريض كيفو...اصلا لي عملو فيا...دمر حاجة داخلي مستحيل انها تتصلح...خذيت نفس نحكي
انا:ه..هزني من هوني
خدم الكرهبة من غير ما يزيد معايا حرف آخر...تكيت راسي عالبلار...و سرحت في افكاري...و في اللي تعدا عليا الكل...هزيت راسي شوية نحكي
انا:ن..نحب نكلم عمر
مد تليفون و حطو في يدي...من غير ما يغزرلي...اول ما كتبت نومروه...طفى في يدي...غزرتلو نحكي
انا:كريم شوف
نزل راسو يغزر لتليفونو...و عاود غزرلي...جات عيني في عينو...تنهد بالقاوي يحكي
كريم:طاحت الشارج
انا:ش..شنعمل توا
كريم:هدي روحك...فما حومة صغيرة هوني...اكيد باش نلقاو حل...باهي
انا:باهي
كريم:حاول ارتاح توا و ما تخمم في حتى شي
انا:ع..علاش تعمل معايا في هذا الكل ؟
كريم:نظن انك خذيت الجواب متاع سؤالك البارح
فهمت عليه...انو يقصد في كلامو و البوسة متاع بكري...اصلا وقت تذكرتها...بدني رعش بالوقت...خذيت نفس نحكي
انا:م..ملا شبيك سلمت فيا البارح ؟
كريم:مسلمتش و مكنتش نعرف لهذا باش يصير...و الا مستحيل كنت نخليه يقربلك
انا:و ماكش خايف على روحك ؟
كريم:مراد مينجم يعملي حتى شي...انتي بامان توا ارتاح
كبسة يدو عالفولون و الدورة القوية...خلاتني نسكت بالوقت...اصلا معادش عندي جهد باش ناخو و نعطي معاه...عاودت حطيت راسي عالبلار...الدوخة القوية لي تملكتني...خلاتني نغفى بالوقت...من غير ما نحاول نفهم علاقتو مع مراد...و الغريبة اني عاودت وثقت فيه...و صدقت لي ماهوش باش يرجعني ليه مرة اخرى...رغم اني ريتو خارج من الدار بعيني...منعرفش شنية لي مزال مخبي....و شنية لي مزال باش يعملو مراد فينا اما لي نعرفو...كان نموت مانيش باش نرجعلها الدار هذيكا مرة أخرى

#سمر 💙💙💙