زهرة🌸

الحلقة الواحدة و الثمنون

حلقة 81 🔸️
🔸️زهرة تحكي:
حليت الشباك...و غمضت عينيا على نسمة خفيفة...دخل الصيف و عطى لونو في كلشي...منعرفش علاش بعد شهرين...نحس في إحساس جديد..إحساس غريب برشا منعرفش كان فما وحدة منكم عاشتو قبل...اما للحظة وحدة حسيت لأنا نجم...نمد يديا و نشد احلامي الكل و نحضنها ليا بكل قوتي...و حتى حد ماهو باش يفكها مني...نعرف لهي صعيبة برشا...أما بنتي لقاعدة تتحرك في كرشي توا...عطاتني أمل جديد...حطيت يديا زوز نتحسس في كل حركة منها...اليوم تعمل 6 شهور بالظبط...حسيت بيها اكثر...بعد ما كبرت...تبسمت نحكي
انا:كلشي باش يكون مليح...مبقاش برشا يا روحي
هزيت راسي على صوت الباب لي تحل...قرب مني باسني من راسي يحكي
مراد:صباح الخير يا روحي
أنا:صباح الخير
مراد:كيفاش تحس في روحك اليوم ؟
أنا:أحسن
جبدت روحي شوية لتالي...منجمش نتحملو قربو ليا...تبسم يحكي
مراد:هيا تفطر
هزيتلو براسي ايه و خلطت عليه...نغزر لطاولة..محضرة كي العادة...جبدلي الكرسي قعدت...شهرين تعدات ما تبدل فيهم شي...قعد مقابلني...هزيت راسي نغزرلو..أكثر حد حبيتو يختفي من حياتي...و معادش حتى نذكر لهو كان موجود في حياتي...ضيق عينيه يحكي
مراد:لباس ماهو ؟
انا:قداش باش نبقى محبوسة هوني ؟
مراد:رجعنا لنفس الموضوع ؟
انا:نحب نرجع نذكرك لأنا مانيش أسيرة عندك مراد...و نظن حكينا فيه الموضوع هذا قبل ما ندخل لدار هاذي
مراد:تحب نرجع نذكرك لإنتي خنت ثقتي مرة اخرى
انا:ثقتك ؟
مراد:نفهم منك لإنتي طول الشهرين هذوما ما عملت حتى شي غالط ؟
انا:شقصدك ؟
مراد:باهي هاو باش نفهمك قصدي
مد يدو جبد ورقة من الفاست متاعو...حلها و هز روحو وقف ورايا...حطها عالطاولة قدامي...و استند بيدو عالكرسي متاعي...يحكي قريب من وذني
مراد:شد عندك اقرالي هاذي
هزيت راسي شوية...قلبي شعرة لا سكت...و انا نغزر للجواب لي بعثتو لعمر...جمدت في بقعتي...منجمتش حتى نسألو كيفاش وصل بين يديه...من صدمتي منجمتش حتى نتلفت عندو...ضرب يدو عالطاولة فوق الجواب بالظبط...تهزيت و تحطيت على صوتو يحكي و يصيح
مراد:اقراااااهااا....هااااني نسمع فيك...نحبببك تقراها تواااا
غمضت عينيا بالقاوي...معادش نجم نستوعب لي قاعد يصير...حطيت يدي على كرشي...حتى بنتي حسيتها تكمشت داخلي و ركحت من الخوف...خذيت نفس بالسيف نحكي
انا:باز أنت قريتها
مراد:إيه قريتها
انا:ملا مانيش مظطرة باش نعاود نقراهالك مرة أخرى
حط يدو على شعري...كبس عليا بالقاوي...و جبدلي راسي لتالي يحكي
مراد:شنية تحاول تعمل ياخي ؟ في بالك كي تبعثلو جواب و الإيكو متاع بنتك باش يتلفتلك...و لا باش يرجع في قرارو و يعاود يعرس بيك...ديجا تحب تعرف حاجة
انا:م..ما نحب شي...سيبني وجعتني
نزل عليا اكثر...حط خشمو على خشمي...و كمل كلامو يحكي
مراد:عمر متاعك ماهوش يستنى فيك بعد توا
حسيت روحي تروهجت من كلامو...كبست بيديا زوز على حرف الكرسي...نحكي
انا:ش..شنية عملتلو ؟
رخف يدو على شعري...و وخر خطوة لتالي...يستفز فيا بتبسيمتو...هزيت روحي وقفت...قربت منو بلا ما نحس دزيتو بيديا زوز نحكي
انا:شبيييه عمممر ؟ شنييية عملتلو....تكللم...حل فممك
شدني من يديا زوز...جبدني عندو...و كبس عليا يحكي
مراد:ششش اهدا...لتوا ما عملتلو شي...و مانيش نخمم نعمل شي...مدام هو اختار حياتو...و ماهوش باش يدور بيك مرة اخرى
هزيت راسي مروهجة...نغزر لعينيه...منجمتش نستوعب لي قاعد يصير جملة...جبدت روحي منو...و شديتو من الفاست متاعو...و غزرتلو نحكي
انا:تعبت منك...و من اللعب الخامج متاعك مراد...تعبت من أني نكون ضحيتك...عمر طلقني صحيح..اما مانيش باش نسلم فيه...بعد توا أعمل فيا لي تحب عليه انا باش نخرج من الباب هذا...و باش نمشي عندو...باش نخبرو لأنا و بنتو نستناو فيه...بعدها باش نرجع لداري و حتى حد ماهو باش يخرجني منها...و أنت لي يطلع بيدك متقصرش فيه...مانيش باش نخسر أكثر من اللي خسرتو...على هذاكا بعد توا مانيش باش نقعد معاك هوني...كان على جثتي يا مراااد
مراد:ساعات تخليني نشفق عليك...ياخي ماشي في بالك عمر متاعك...باش يقعد حياتو الكل يجري وراك
انا:اغزرلي مراد..اقسم بالله كان نعرف لأنت عملتلو شي...الا ما نحرقلك قلبك...كيما قبل و اكثر
قحرلي قحرة موت...و هز يدو كبس على وجهي..يحكي
مراد:جرب تراه...ارجعلو و خليه يمسك مرة اخرى...و راسك المرة هاذي...انا لي باش نحرقلك قلبك عليه...و نخليك تحضر جنازتو قبل ما تفرح ببنتك
انا:و..واطي...و متحشمش...في بالك كي تقتلو تكون ربحت...أنت وقتها باش تحضر جنازتين مع بعضهم
دزني شوية لتالي بعدني عليه...حطيت يدي على كرشي نرد في نفس..عدا يدو على وجهو يهدي في روحو..تنهد بالقاوي يحكي
مراد:باهي...هاني باش نعطيك أول و آخر فرصة
بقيت نغزرلو من غير حتى كلمة...هز يدو غزر لمنقالتو يحكي
مراد:بقات نص ساعة و يحلو وقت زيارة...تحب تمشي عندو برا توا
انا:ك..كيفاه ؟
مراد:أما وقت ترجع لهوني...باش يكون عندك زوز إختيارات معندهمش ثالث
غزرتلو بعينين ضايعة مش فاهمة شنية يقصد بكلامو تبسم ندرا كيف يحكي
مراد: الأول أنك تمد بنتك لعمر و تنساها جملة...و الا باش تخلي بنتك عندك و عمر ينسى لهو عندو طفلة منك
انا:ياخي هبلت و لا شنية حكايتك...لي هوني بنتي انا و عمر...و انت آخر حد تاخو قرار يخص بنتي تسمع فيا
مراد:القرار يرجع ليك حبي...خاطر في الحالتين احنا باش نخرجو منها البلاد هاذي
انا:لا...أنت باز هبلت على روحك
مراد:معادش فما وقت...يمكن هاذي آخر فرصة تخليك تقابل طليقك عزيزتي...خاطر مبعد عندي ليك مفاجأة ياسر حلوة و باش تعجبك
منجمتش نسمعو اكثر...اصلا منعرفش كيفاه باش نخلط في الوقت هذا للحبس...خذيت نفس نحكي
انا:مدامك تحب تعطيني فرصة اخيرة...وصلني أنت
مراد:بربي
انا:خبر شوفور متاعك يوصلني...تصرف اعمل حاجة
كبست على كرشي موجوعة...قرب مني شدني من يدي يحكي
مراد:باهي...هدي روحي
جبدت روحي منو...و هزيت راسي قحرتلو...نحكي
انا:يزي ما لعبت بأعصابي لتوا...نعرف لي حد كيفك مستحيل يكون كلامو صحيح
قرب مني في لحظة...شدني من يدي يمشي فيا وراه خرجني لبرا...فك المفاتح من أشرف...يحكي
مراد:اركب فيسع
قربت نحل في الباب بالزربة...معادش يهمني شنوة باش يصير مبعد...شنية باش تكون قرارات مراد و عمر معادش يهمني حتى شي...كان أني نشوفو و نحضنو مرة أخرى...كبست بيديا زوز على كرشي...نتحسس في بنتي...ارتحت كي تحركت داخلي...تعرفو على شنية ممكن تتخلو...على خاطر ضمة وحدة من العبد لي تحبو أنا عملت هكا اليوم...معادش يهمني شنية لي جاي...و لا فاش يخمم مراد...و لا اللعبة هاذي...شهرين كانت كافية باش تخليني نخمم بالقدا...و فهمت فيهم مراد أكثر حاولت نكمل في لعبة لتالي...أما قربو ليا خنقني أكثر حتى النفس متاعو كي يبدا قريب مني تخنقني..مانيش باش نحمل روحي أكثر من طاقتي و نتحمل هبالو أكثر من هكا...اللي يهمني انو عمر و بنتي بخير..اصلا مبقاش قد لي فات...أقل من أربع شهور و يرجع عمر و يوفى الكابوس هذا الكل...اول ما شد الفران...حليت الباب و نزلت من غير ما نغزرلو...و لا نتلفت ورايا...تعديت لتفتيش و دخلت...يمكن عشر دقايق و يوفى موعد زيارة...زربت في خطواتي أكثر...رغم الوجيعة لي حسيتها في كرشي...نحب نشوفو و نعنقو مرة أخرى...و معاد حاجتي بحتى شي آخر في دنيا...وقفت قدام الحرس نحكي
انا:نحب نقابل عمر بن قاسم...انا مرتو
هو:ديجا عندو زيارة...و مدام اليوم زيارة مفتوحة..تنجم تتفضل توا قبل ما يوفى الوقت
انا:باهي عيشك
هو:من هوني مدام
هزيتلو براسي ايه...و خلطت عليه نمشي وراه...قلبي غم عليا...منعرفش علاه حاسة بحاجة خايبة باش تصير نعرف لمراد ما يعمل حتى شي...قبل ما يخمم مرتين هزيت راسي على حلة الباب...نغزر للعباد لي قاعدين عالطاولة...لي يقابل في أهلو...و لي يستنى في شكون يجيه...برشا حس...و جوجمة...خذيت و نفس و دخلت بخطوات رزينة...نفركس عليه في وسطهم...نحس في قلبي باش يخرج من بقعتو...توا فايت شهرين مريتوش و مشميتش ريحتو و مسمعتش صوتو..في بالي الجواب لي بعثتو وصل...اما ديما يبقى مراد سابقنا بخطوة هزيت راسي شوية نغزرلو...قاعد يحكي مع سلمى ساقيا رزنت...و منجمتش نكمل الخطوة...استندت بيدي عالطاولة نغزرلهم...منجمتش نقرب...منجمتش نعمل لي جيت على خاطرو...مخي وقف لدرجة مفهمتش شنية لي قاعد يصير...و فاش قاعدة تعمل معاه توا...خذيت نفس نهدي في روحي...فرد وقت نهرب في الأفكار لي هدت عليا...نعرف لهو يشوفها كيما هند مش أكثر
حاولت نقرب أما زادة منجمتش...حاجة تشد فيا لتالي نحب نغزرلهم لتالي...مرة عيني فيه و مرة فيها...هزت يدها حطتها على يدو...دوخة لعبت عليا...دوب نجمت نركز فيهم...نستنى في ردة فعلو...زادة نحب نقرب منها و نبعدها عليه...و لي باش يصير يصير...سمعت الحرس يقول لي وقت الزيارة باش يوفى..هز روحو وقف قربت منو في لحظة ترمات في حملتو...جمدت في بقعتي هذيكا بلاصتي أنا...شنية لي قاعد يصير ؟ علاه حتى يحضن فيها توا...شبيه محسش بيا حتى شوية أنو ممكن نكون هوني...هو أكثر حد يعرف شنية لي صار بينتنا...علاه حتى يقابلها و يوصل حتى يعنقها...وخرت لتالي من غير ما نحس...منعرفش كيفاه ضربت في الكرسي...تلفت مصدومة منجمتش حتى نهزو...و لا نتعدا...حتى يدي منجمتش نهزها باش نمسح دموعي قرب مني الحرس...بعدو من ثنيتي يحكي
هو:لباس مدام ؟
جبدت روحي منو...نعمل في الخطوة بالسيف...نحب نخرج من هوني و كهو...وصلت بحذا الباب...ندق بالقاوي...أول ما تحل...سمعتو يعيط عليا من تالي
عمر:زهرررة
غمضت عينيا بالقاوي...و عاودت حليتهم...تلفت عندو نغزرلو...واقف يغزرلي مصدوم...نزل بعينيه لكرشي تقويت على روحي و خرجت...خرجت من غير ما نستنى منو كلمة أخرى...اول ما تسكرت الباب...سمعتو يصيح من داخل...زربت في خطواتي اكثر منحبش نتلفت ورايا...كبست بيديا على حدايد الباب...نستنى في شكون يحلو...وجيعة قوات في كرشي...دوب نجمت ناقف على ساقيا...لبني العرق في بدني الكل كأني تحصرت في دبوزة كحلة...و منجمتش نخرج منها...حسيت بشكون ورايا...يحكي
هو:لباس مدام ؟ شتعمل هوني ؟
تقويت على روحي اكثر...و تلفت عندو...طلعت راسي نغزرلو...دوب نجمت نثبت في ملامحو...خذيت نفس بالسيف نحكي
انا:ن..نحب نخرج من هوني
هو:باهي...هدي روحك ساعة
تكيت لتالي نرد في نفس...كأنو فما حد كابس عليا قربلي اكثر يحكي
هو:مدام هدي روحك أمانك
انا:خرجني من هوني
هو:فماااا حد هوووني
هزيت راسي نغزر للحرس جا يجري...حل الباب...و نزل راسو يحكي
حرس:سامحني سيدي منقصدش
هو:اعتبرها اخر مرة
قرب مني شدني من يدي...عاوني نتعدل في وقفتي...يحكي
هو:ايجا متخافش
هزيتلو براسي ايه...خذيت نفس...و جبدت روحي شوية نحكي
انا:نجم نمشي وحدي
هو:متأكدة ؟
هزيتلو براسي ايه...و وخرت لتالي...استندت بيديا عالحيط...نمد في الخطوة بالسيف...منعرفش كيفاه وصلت لبرا...حتى لي عاوني منجمتش نشكرو...هزيت راسي نغزرلو...متكي عالكرهبة...يستنى فيا...كان لي صار كان مخطط من الأول بينو و بين سلمى...علاه حتى عمر يخضعلها مرة أخرى...علاه اهتم بوجودها...و فرحان بيها...قربت منو اكثر...وقفت قدامو بالظبط...تبسم يحكي
مراد:شنية قررت ؟
انا: ا...انا...مر
منجمتش نكمل كلامي...حتى منجمتش نثبت فيه أكثر ساقيا رزنو اكثر...و منجمتش ناقف عليهم اكثر...حسيت بيه كي حاوطني بيديه زوز قبل ما نطيح...دوب غزرت لوجهو...و لونو لي تخطف في لحظة...عينيا تسكرو و معاد حسيت بحتى شي.
🌸🌸🌸🌸🌸🌸🌸🌸🌸🌸🌸
🔸️عمر_يحكي:
ضربت الباب بكل قوتي...باقي نصيح...أما حتى حد ما حب يحل...معادش نعرف اذا ريتها بالحق...و لا خيالها تعدا قدامي...لتوا مش مستوعب أنها كانت هوني ضربت الباب بيديا زوز...جبدني الحرس من تالي يحكي
هو:نقص حسك يا سيد...ماكش وحدك هوني
انا:سيييبني...ابععدد عليا و حل الباب هذااا...زهرررة زهرررة
ضربت الباب بساقي...نحس في روحي باش نهبل...كان منخلطش عليها و نحكي معاها...حسيت بيد سلمى تحطت على كتفي...تحكي
سلمى:عمر يزي امانك
تلفت عندها...جبدتها من يدها في لحظة جات قدامي كبست عليها و قحرتلها نحكي
انا:تو تخلط عليها...و تفهمها أنو مفما حتى شي من اللي تخمم فيه...متخلينيش نندم لأنا قررت نقابلك و نسمعك مفهووووم كلااامي
سلمى:باهي هدي روحك...هاني باش نخلط عليها...شي ماهو باش يصير طمن
هزيتلها براسي ايه...و جيت باش نحكي جبدوني من تالي...قحرتلها...و جبدت روحي منهم...رجعت للمهجع و أنا باش نطرشق...نمشي و نجي في بلاصتي...كأني قاعد نعفس عالجمر...قرب مني وقف قدامي...شدني من يدي يحكي
يعقوب:إيجا معايا
هزيت راسي نغزرلو...من آخر عركة صارت برا معادش دار بيا...دوب نحكي معاه و نسكت إذا جات فرصة...أما توا بالظبط...لازمني نحكي...لازم حد بجنبي...و إلا باش نخرج من أم عقلي...منعرفش على روحي كيفاه خلطت عليه...قعدت بجنبو...نهز في ساقي بعصب..تبسم يحكي
يعقوب:شنية عملتلها ؟
هزيت راسي غزرتلو...ضربني لظهري...و ضحك يحكي
يعقوب:تصرفاتك تقول أنو انت الغالط...شنية لي صار ؟
انا:منعرفش...منعرفش شنية لي صار...أما متأكد لي ماهيش باش تسامحني...بعد اللي شافتو
يعقوب:مدامك مقصدتش تغششها باش تسامحك
انا:مستحيل...متأكد لي ماهيش باش تسامحني المرة هاذي
يعقوب:مدامك تعرفها باش تغير عليك...شبيك تصرفت من غير ما تخمم
ضيقت عينيا مستغرب منعرفش كيفاه فهم عليا...كبست على راسي بيديا زوز...نحس فيه باش يطرشق...خذيت نفس نحكي
انا:كان تصيرلها حاجة جرايري مستحيل نسامح روحي جملة
يعقوب:متخافش...كلشي باش يكون لباس
انا:مش المرة هاذي
يعقوب:صار اللي صار توا...خمم في اللي جاي مش اللي فات
انا:شنية الفايدة بعد ما نخسرها ؟
يعقوب:ماكش باش تخسرها...على حد علمي باقيلك تقريب أربع شهور و تخرج من هوني
انا:صحيح
يعقوب:اما غريبة كيفاه مهندس كيفك...يعمل صفقة بيع و شرا خاسرة...و يخاطر بحياة الناس لي في الشونطي و زادة يشد الحبس حتى بلا ما يتحاكم
انا:شقصدك ؟
يعقوب:قصدي واضح...انا و أنت نعرفو لهذا الكل مصارش...و أنت هوني لسبب آخر
انا:مدامك عرفت عليا هذا الكل...باز تعرف السبب زادة
يعقوب:نعرف لأنت هوني باش تحمي مرتك...أما توا نحبك تحكيلي السبب لي وصلكم لهوني
انا:مش لازم تعرف...أموري تو نحلها وحدي
يعقوب:مدام مرتك بين يدين مراد بن عيسى...في رايي خمم بالقدا
هزيت راسي مستغرب...كيفاه يعرف هذا الكل...كبس على كتفي يحكي
يعقوب:تنجم تقول أنو أنا نعرف عليك كلشي...من يوم دخلت فيه لهوني
انا:فاش قام حتى تنسنس على حياتي
يعقوب:انا قبل قتلك لي حاجتي بيك
أنا:و انا مانيش مستعد باش نكون واحد من رجالك...و ما نجم نمشي بأوامر حد
يعقوب:عمر ولدي...انا حاجتي بحد يكون يدي اليمين مش حد من رجالي
أنا:أكيد تفدلك ؟ و بشنية نفيدك انا ؟
مد يدو شاور لواحد منهم...حطلو كتاب في يدو...و رجع لبلاصتو...حل الكتاب...جبد تصويرة منها...عديت عينيا نغزرلها...طفلة تكون أكبر من زهرة شوية...زين عربي...مفماش حد يرا زينها و ميسألش عليها...أما بالنسبة ليا...شي ما تحرك داخلي...يمكن استغربت اكثر صحيح...مش فاهم شنية يحب مني بالظبط...هزها في يدو يحكي
يعقوب:هاذي ملاك بنتي...تنجم تقول آخر وحدة بقات معايا
انا:شتقصد ؟
يعقوب:قبل خمس سنين من توا...خسرت اعز زوز ليا مرتي و ولدي...الحادث كان قوي برشا...منعت منو ملاك بشعرة...وقتها دخلت في دبريسيون قوية...لتوا مش مصدق انها تعدات لي صار...و نجمت تكمل حياتها مرة اخرى
انا:ربي يرحمهم
يعقوب:أمين
انا:اما علاه قاعد تحكيلي في هذا الكل ؟
يعقوب:بعد 6 شهور من توا...ملاك باش تدخل في مشروع كبير
انا:يعني ؟
يعقوب:معناها انت لي باش تاقف على المشروع هذا
انا:على حد علمي السوسيتي متاع بنتك...تابعة للموضة و الازياء...و انا ماهوش اختصاصي جملة
يعقوب:طلع عندك معلومات علينا
انا:مش كان انت عندك يد لبرا سي يعقوب...أما الغريبة راجل كيفك شيعمل هوني ؟
يعقوب:كي يبدا عندك صغير تو تفهم علاش انا هوني
انا:شقصدك ؟
يعقوب:دخلت لهوني باش نحمي بنتي...الحادث لي صار مكانش صدفة...كلشي كان مخططلو من البداية
انا:و شكون عندو مصلحة ؟
يعقوب:باش نحكيلك كلشي مع الوقت...اما توا نحبك تاقف مع بنتي...و ما تخلي حتى حد يستغلها في غيابي يعني بالمختصر المفيد انت باش تحميها
انا:كيفاه تنجم تاثق في حد...دوب تعرف حكايتو ؟
يعقوب:اللي يضحي على خاطر مرا يحبها...ماهوش باش يخون اليد لي تمدتلو
انا:يمكن انت غلطت في اختيارك المرة هاذي...برا الحبس هذا عندي حياة تستنى فيا...و أمور عالقة نحب نكملها...و زادة هذوما الحاجات أنا منفهمش فيهم
يعقوب:أربعة شهور كافية باش تتعلم فيهم كلشي...و باش تكون حاضر أنك تواجه مراد
هزيت راسي...غزرتلو مستغرب...ضيق عينيه و تبسم يحكي
يعقوب:ماهيش مقايضة بيني و بينك...اما باش تكون عندك وكالة عامة...و كافة الصلاحيات...معناها باش تعمل لي تراه مناسب و كهو...و الشريكة متاع مراد هي أكبر شريكة منافسة لينا
انا:أكيد مانيش باش نستغل المنصب متاعك...على خاطر إنتقامي...القضية بيني و بين مراد شخصية...و نعرف كيفاه نحلها
يعقوب:هذا لي يخليني ناثق فيك اكثر...يا ولد خويا الغالي
انا:خوك ؟
يعقوب:عمك الطاهر يكون خويا...و انت هوني في حمايتو قبل حمايتي...مانيش باش نجبرك على شي...اما نحبك تخمم بالقدا قبل ما تاخو اي قرار...و في الحالتين إحنا معاك
يمكن توا برك الصورة ولات واضحة بالقدا...و نجمت نعرف تقريبا شكون هو يعقوب...هزيتلو براسي ايه...و قمت...رجعت لبلاصتي...معادش نجم نخمم اكثر...بعد اللي صار اليوم...تكيت لتالي...و غمضت عينيا بالقاوي ريت صورتها مرة اخرى...متوقعتش باش نشوفها بعد الوقت هذا الكل...حتى أخبارها تقطعت عليا الكل...و الزيارة ولات ممنوعة على حسام زادة...في الشهرين هذوما دوب قابلت سلمى مرتين...و بابا مرة وحدة نعرف لهي معاه توا...كيما نعرف لفما شي مخبيه بابا و سلمى مع بعض..مستحيل تخلي الدار و تمشي بالطريقة هاذي...باش تعيش مع مراد...للحظة حسيتها كيف الحلمة قدامي...كرشها لي بانت اكثر...لتوا بين عينيا اليوم بالظبط...عندها 6 شهور...منعرفش كيفاه عدات هذا الوقت الكل وحدها و كيفاه تحملت لي صار..غزرتها خلاتني نلعن روحي ألف مرة عالحالة لي راتني فيها نعرف بالقدا غيرتها من سلمى...و شنية ممكن تخمم منعرفش كيفاه باش نوصللها و لا كيفاه نفهمها لي صار يا ريت نجمت نخلط عليها...نحضنها و نشم ريحتها...و نعدي يدي على كرشها مرة أخرى...بعدها اللي باش يصير خليه يصير...حتى كانت تهدت دنيا فوقي...لتوا مش مصدق أني عديت شهرين بلا ما نسمع صوتها...و نعرف أخبارها...زادة منجمتش نستوعب كيفاه جات اليوم في لحظة...و كيفاه موقفش في وجها...حتى سلمى حسيتها نادمة عاللي صار قبل...و كان مش أخبار عيلتي مكنتش باش نقابلها و لا نسمع كلمة منها...أصلا منعرفش كيفاه ترمات في حملتي بالطريقة هذيكا عاودت هزيت روحي تقعدت...نحس في روحي باش نهبل عليها...نحب نعرف حالتها و نطمن عليها...يمكن توا برك حسيت لي انا قاعد نعدي في أصعب وقت في الحبس..نحس في روحي مقيد من الجيهات الكل كبست على راسي بيديا زوز...نحاول نرتب افكاري عالاقل نجم نلقى حل للي صار...زادة معنديش ثقة في سلمى...و لا شنية تنجم تعملو...اصلا محسبتش الخطوة هذيكا منها...ضربت بيدي على حرف السرير...و عاودت قمت...قربت منو نحكي
انا:لازمني تليفون توا
يعقوب:متأكد ؟
انا:نحب نكلمها توا...منجمش نستنى اكثر من هكا
شاور بيدو لطفل لي واقف مقابلنا...شوية و رجع عندي حط تليفون في يدي...غزرلي يحكي
يعقوب:أهم حاجة لازمك تتعلمها هوني الصبر
هزيتلو براسي ايه...و مديت يدي نقيد في نومروها دخلت بعضي اكثر كي لقيتو مسكر...كلمت حسام بالوقت...هز عليا يحكي
حسام:ألو
انا:عمر معاك
حسام:لباس عمر ؟ صارت حاجة ياخي ؟
انا:زهرررة كانت هوني...ألحقها...كان لزم أدخل لدارو بالقوة حسام...متأكد لي هي ماهيش بخير...تصرف عيش خويا...تليفونها مسكر...و نحس في روحي باش نهبل
حسام:بااهي عمر هدي روحك...كان مزلت متذكر عنوان دارو...ابعثلي ميساج تو نتصرف
انا:باهي تو يوصلك ميساج...وينك أنت توا ؟
حسام:هاني في المطار...معنديش برشا من اللي وصلت نستنى في محمد
انا:باهي برشا...أمانك حسام...تصرف نعرف لي زهرة تاثق فيك...كان لزم خرجها من دار هذيكا بالقوة...نعرف لي هزها بالسيف عليها
حسام:باهي عمر لي تحب عليه باش يصير...تو نبعثلك خبر من عندي
انا:باهي نستنى فيك
حسام:باهي
علقت عليه و كتبت الميساج بالزربة...منعرفش حتى كيفاه تذكرت عنوان متاعو...حطيت تليفون في يدو نحكي
انا:لازمني نعاود نكلمو باش نطمن عليها
يعقوب:عمر هدي روحك باش تنجم تتصرف...مكانش تو تزيد تعقد الامور اكثر
انا:كان تصيرلها حاجة...ليها و لا للبيبي...شنعمل انا وقتها ؟ كيفاه باش نواجها...مدامها جات لهوني معناها صارت حاجة كبيرة...راني نعرفها بالقدا...مستحيل تخاطر بيا و لا بروحها و تجي لهوني من غير سبب
يعقوب:عممممر
هزيت راسي على صياحو...الكل لي معانا سكتو...كبست بيدي عالحيط و حطيت راسي عليه...قلبي مش مهنيني حتى طرف...حط يدو على كتفي و كبس عليا يحكي
يعقوب:يزي كهو...لازمك تكون أقوى من هكا...اللي جاي أصعب من اللي تعدا...و تهورك هذا باش يضر زهرة اكثر من أنو يحميها
انا:شنية نعمل...نخليها تحت رحمتو أربع شهور اخرى شبيني مخممتش فيها...و في نفسيتها...يا ربي شنية لي عملتو
ضربت يدي بالقاوي...يمكن توا استوعبت شنية لي عملتو...كيفاه دخلتها في لعبة هاذي...و نطلب منها تصبر و انا متأكد كل لحظة تعديها معاه كابوس بالنسبة ليها زادة منعرفش كيفاه مشى عم طاهر من مخي...يمكن الفيرما بلاصة آمنة ليها و حد ماهو باش يضرها...و لا يقربلها...عديت يدي على وجهي نمسح في العرق لي نزل عليا...بدني الكل يرعش...غزرلي يحكي
يعقوب:اسمعني عمر...انا و انت نعرفو لي مراد ماهوش باش يضرها...و لا يأذيها...خاصة و هي حبلة...على هذاكا ريض روحك
انا:ماهوش باش يضرها صحيح...اما انا نعرف شنية لي تعدات بيه...و انا بيدي لي لزيتها ليه مرة اخرى...كان يخمم يخرجها من البلاد ؟؟ خاصة بعد ما طلقتها...الله لا تربحو الساقط...إلا ما ندمرو...و نخليه يندم عالنهار لي وقف في وجهي
يعقوب:تحبني نتصرف ؟
هزيت راسي غزرتلو..يستنى في الجواب متاعي..خذيت نفس نحكي
انا:لا...منجمش نخاطر بيها..خاصة في حالتها هاذي..كان فما حد باش تسمعو و تحكي معاه...هو حسام و كهو
يعقوب:باهي أقعد هوني ملا...و هدي روحك بكويس تاي...متنفعلش برشا...و الا ماكش باش تنجم تتصرف جملة
هزيتلو براسي ايه...و جبدت الكرسي...قعدت...حطيت يديا زوز عالطاولة...نغزر لكاسة تاي لي محطوطة في نص...و لسي يعقوب لي قاعد مقابلني...غمضت عينيا بالقاوي و عاودت حليتهم...شنية عملت فيك يا روحي شنية لي عملتو...الكلام لي سمعتو من سلمى...و الحالة لي ريتها فيها قتلتني من داخل...حطيت راسي بين يديا نتذكر في كلام بابا في آخر مرة زارني فيها
بابا:شنية هذا لي عملتو ؟ نورمال طيشت روحك هوني على وحدة ما تسواش
انا:باابااا احترم روحك...متخلينيش نغلط معاك أمانك و كان باش تكمل في كلامك هذا امشي من هوني
بابا:توا وليت انا الغالط...رماتك هوني..و ندرا وين هاملة انا بطولي و عرضي طردني كنتي...و كي مرضختلهاش خلات دار و هجت
انا:شننوة ؟ وين مشات ؟
بابا:منعرفش عليها وين مشات...و ساقي معادش نحطها لا هوني و لا في دارك...لين طيش عليك الهم
انا:ثيقتي في مرتي أكبر من اللي تتصور و قتلك من قبل كان نتوما رفضتو مرتي بيناتكم معناها رفضتوني تنجم تمشي و معادش ترجع جملة...و سيرة مرتي معادش تجبدها على لسانك بالطريقة هذيكا...خاطر احترامها من إحترامي...تنجم تمشي و معادش ترجع كان تحب...أما مرتي خليك بعيد عليها...حتى حد ما عندو الحق يحاسبها و لا يحكي معاها من غيري انا و كهو...على هذاكا خليها رايضة بابا ماهيش ناقصة المشاكل متاعكم زادة
بابا:باهي يا عمر
عديت يديا زوز على وجهي...هذا كان أول و آخر لقاء بيني و بينو في الحبس...نعرف بعد اخر فترة كانو الكل ضدها...و مش بعيد يتعمد يضرها...على هذاكا كان لازمني نبعدو عليها...منجمش نحطها تحت الظغط هذا الكل...اما آخر شي توقعتو انو الساقط هذاكا يجبرها تعيش معاه...منعرفش كيفاه استغلها و لا بشنية هددها اما أكيد مانيش باش نغفرلو لي عملو...و باش نخليه يندم على كل حاجة عملها فينا...هزيت راسي غزرت ليعقوب نحكي
انا:موافق...أنت باش تحمي بنتك و انا باش نرجع مرتي
هزلي براسو ايه...و خذا رشفة من كاستو من غير حتى كلمة...منعرفش القرار لي خذيتو صحيح و لا غالط...أما هاذي باش تكون أكبر فرصة تخليني ناخو منو كلشي...و نرجع ليا كلشي فرد وقت...بعد توا ما نجم نغفر لحتى حد مهما كان يكون...انو يقرب منها و لا حتى يحاول يضرها...المرة هاذي مانيش باش نفلت حتى فرصة تخليني نعفسو و نذلو...إلا ما نخليه يرا الوجه الثاني و يخلص لي عملو الكل وحدة وحدة...باش يجيك نهار يا مراد...وقتها برك تعرف قيمة الخسارة .
#سمر 😘