🔸️حلقة 43
🔸️مريم تحكي:
سكرت الشباك بغزول...طيشت تليفوني...و خرجت من بيتي نجري...منعرفش كيفاش وصلت لصالة...لقيتو يعلق في كبوطو...و رنيم معنكشة تبوس فيه...غزرتلو نحكي
أنا:طمنت توا...طمنت لي مفما حتى شي بينا
بابا:مريييم
أنا:شنننوة بابا شنننوة...في بالك لأنت وجعتني بالفازة ياخي نورمال تاقف قدام راجل و تقولو أبعد على بنتي
بابا:عملت لي لازم يتعمل
أنا:ماااا عملت شي...ما عملت شي...أنت هنتني بالطريقة هاذي...كان جيت سألتني...راني قتلك ما فما حتى شي بينا...أما لااااا انت ديما تتعمد تتحكم في حياااتي...ديما تتعمد توجعني...مريم باش تعرس بصبري...مريييم معادش تخرج من دار...مريييم...مريييم...أنت معندكش حق تحاسبني...أنا كهو لي لازمني نحاسبك...انا كهو
قرب مني شوية وخرت لتالي...كلشي جا على يدي رميتو عالارض...منعرفش شنوة الكلام لي كنت نقول فيه...نحب نخرج غشي الكل...منعرفش علاه دخلت بعضي لهدرجة...كل ما نتذكر كلامو...نفقد اعصابي اكثر...قربت مني رنيم...شدتني تحكي
رنيم:مريييم يزززي...فاش تعمل إنتي ؟
دزيتها بيديا زوز لتالي...و طلعت راسي قحرتلها نحكي
انا:رد بالك تقرب مني مرة أخرى...فهمت
بابا:مررررريم
أنا:معاااادش تحكي معايا...معادش تصيح عليا...كيما قتلت أمي...تحب تبعدني من هوني زادة مش هكا...على هذاكا قاعد تتصرف معايا بالطريقة هاذي
بابا:مريم فاش قاعدة تحكي ؟
أنا:نحكككي في الحقيقة...كان جيت نهمك حتى شوية متعملش هذا الكل...مشى في بالي لأنت تحبني بالحق أما طلعت غالطة...أنت كيفهم بالظبط
قرب مني شوية...خليتو...و رجعت لبيتي...نطرت الباب بالقاوي...نفركس عالبخاخة متاعي...نحس في روحي باش نتخنق...غصة حسيتها في حلقي...أما منجمتش نخرجها...دموعي تحصرت في عينيا كي العادة..استندت بيدي على حرف البيرو...الباب تحل بالوقت...دخل و سكرو وراه...قرب مني شدني من يدي...حط البخاخة في فمي يحكي
بابا:ششش اهدا توا...وفات يا روحي
تنهدت بالقاوي...كبس عليا اكثر...بعدلي شعري من وجهي...يحكي
بابا:إيجا
بقيت نغزرلو...حسيت روحي هديت...هزيتلو براسي ايه قرب معايا لسريري...قعدني...و قعد بجنبي...تكاني عليه يعدي في يدو على شعري يحكي
بابا:مريومتي...بنتي الصغرونة...كيفاش تنجم تخمم فيا بالطريقة هذيكا...مستحيل نفرط فيك انا مهما صار نعرف روحي تسرعت...اما من خوفي عليك و كهو..انتي امانة غالية برشا عندي...انتي بنت الغالية يا روحي حبيت نعرسلك بصبري...باش نتهنى عليك...باش تبقى قدامي ديما...خممت فيه خاطرو راجل و باش يهنيك ردة فعلك توا تقول لانتي تحب حسام
طلعت راسي غزرتلو ندرا كيف...الكلام وحل في حلقي منجمتش نقولو لا و نرفض كي العادة...بعد الكلام لي سمعتو قبيل...تأكدت لانا بالرسمي تعلقت بيه منكرهوش كيما ديما مستانسة نقول...منحبوش يبعدني منعرفش شبيني بالظبط...اول مرة نحس هكا...اول مرة حد يدخل لحياتي بالطريقة هاذي...اول مرة يقرب مني راجل و يمسني...حسام بدل فيا حاجات متوقعتش يجي نهار و نعيشها...متوقعتش انو يجي نهار نتعلق بيه هكا...برغم التناقض الكبير لي بينا...اما كلامو خلاني نرجع للواقع...خلاني نعرف مستحيل ينجم حد يحبني تي حتى انا ساعات منحبش روحي...كيفاش نستنى منو يغزرلي...تي الفازات لي تعدات علينا الكل عملها بلعاني باش يغزلني و كهو...في الاخير طلعت كيفي كيف زهرة فقت من سرحتي كي كبس على شعري و كمل يحكي
بابا:حسام نعرفو من سنين...مش من توا
انا:م منين تعرفو انت ؟
بابا:واحد من لي يديرو الشريكة
انا:تقصد لهو المدير غديكا
بابا:بالظبط...و الناس هذوكا...ميغزروش للتحت يا بنتي هو كان وصل ليك...جيست باش يعدي وقيت...كي العادة...العباد لي هكا...في بالهم ينجمو يشريو كلشي بفلوسهم...المهم يرضو روحهم...و يوصلو لي يحبو عليه...ماهمش باش يخمو في ناس لي وجعوهم شنية يحسو...وجعوهم و لا لا و انا منحبش نخسرك بالطريقة هاذي...منحبكش تتوجع في حياتك...منحبكش تعيش مع راجل يخليك تحس بالنقص في حياتك...و ديما يحسك لهو شراك بفلوسو...كان هو سمعتو مضروبة في الشريكة هكا...كان منجمش يحترم الخدامين عندو مينجمش يحترم المرا لي باش تعيش معاه...كان انا اخترت صبري...مش باش نبعدك من هوني...اما نحب نتهنى عليك...كان نهار من نهارات مشيت من دنيا هاذي...نطمن لانا خليتك بين يدين آمنة...بين يدين راجل ينجم يحميك و يقدرك...و يحبك كيفي...كان تسألني...شكون حبيت نقلك امك...و لتوا خاتمها في يدي...حياة وقت دخلت لدار هاذي...مكنتش نعرفها..امي لزتني نعرس بيها...باش تنجم تتلهى بيك...اما انتي فسرت كلشي كيما تحب...صدقني كان نجمت نخلط عليها مستحيل كنت نخليها تمشي من هوني...و كل مرة نغزرلك...نلقى روحي نغزر لتفاصيلها...انتي قطعة مني و مهما قلت و مهما بقيت متغشة مني...مانيش باش نسلم فيك...و لا باش ينقص حبي ليك
خذيت نفس بالسيف...حسيت كلامو صحيح...حسام مستحيل يغزر لناس لي كيفنا...مع انو امو مش هكا و محمد زادة...حتى هو ساعات نحسو عادي...اما يكفي نظرات الاستهزاء لي كان يغزرلي بيهم ساعات...غمضت عينيا بالقاوي...ورجعت حليتهم نحكي
انا:منحبش نعرس توا...منحبش نعرس بصبري...و مفما حتى شي بيني و بين حسام...و مستحيل يكون...نعرف وين نحط ساقي بابا
بابا:لي تحب عليه باش يصير...و راس بنتي ما نقصد شي من اللي عملتو كان مصلحتك
انا:و انا زادة منقصدش الكلام لي قلتو...سامحني امانك
بابا:عيش صغرونتي المزيانة...مممم خليني نذكر مش انتي كنت تحب على حاجة
انا:مممم شنوة نسيت ؟
هز روحو شوية...جبد ورقة من جيبو...حطها في يدي ضيقت عينيا نحكي
انا:شنوة هاذي ؟
بابا:مش قلت تحب تتعلم السواقة
انا:ايه...اما الموضوع عندو برشا و انا نسيتو
بابا:من غدوة تنجم تبدا...تعمل في دورات متاعك
غزرتلو و رجعت حليت الورقة...نثبت فيها...طلع بالرسمي سجلني...ضحكت بالوقت...ترميت عليه حضنتو بالقاوي نحكي
انا:مرسسسي باااابا...متوقعتش لانت باش تسجلني معناها تو ناخو بارمي مش هكا
بابا:وريني شطارتك...و كي يسهل ربي...ناخو لبنتي كرهبة
انا:بابا تحكي بالرسمي انت ؟
بابا:مش قتلك لي تحب عليه باش يصير...اه نسيت شي اخر
انا:شنننوة ؟
بابا:وين حطيتها...وييين...مش هوني...و مش هوني زادة...هوكا تذكرت
بقيت نغزرلو...كيف طلع باكو شكولاطة من جيبتو يحكي
بابا:و هاذي زادة لبنوتي الصغرونة
خطفتها من يدو...و رجعت حضنتو بالقاوي...نضحك و نحكي
انا:ههههههههههه مرسي بابا...يخليك ليا...سااامحني امانك
بابا:ششش منحبش نسمع الكلمة هاذي منك...انسى كلشي صار...و خلينا نسكرو على الحكاية جملة
انا:باهي عزيزي
غرس يدو في شعري اكثر...غمضت عينيا...نستحلى في قربو...اول مرة نحس لي بابا قريب مني لهدرجة منحبش نبعد عليه...منحبش ننسى كلامو...للحظة ندمت على الكلام لي قلت في وجهو بكري...زعمة انا حبيت حسام...على هذاكا تصرفت بالطريقة هاذي...و لا جيست خاطر حكى معايا اكاكا...نحس في احساسي داخل بعضو...منعرفش اذا نحبو و لا نكرهو...منعرفش علاه منجمتش نتقبل الكلام لي قالو...اما فرد وقت هديت بكلام بابا...فهمت و استوعبت لي قاعد يصير مستحيل...لي قاعد يصير باش يضرني انا و كهو...هو بالظبط...ما نجي شي قدام النسا و البنات لي عرفهم في حياتو...منعرفش كيفاش هزني نوم و رقدت...حليت عينيا في فرشي وحدي...عرفت لي مشى بعد ما رقدت هزيت روحي شوي..عديت يديا زوز على وجهي أحداث البارح تعدات بين عينيا...تنهدت بالقاوي...و قمت من بلاصتي...منحبش نفكر في الحكاية برشا...دخلت لبيت البانو...عملت دوش...بدلت دبشي و نزلت عندهم لقيتهم الكل عالفطور...صبحت عليهم...و قعدت بجنب بابا كي العادة...تبسملي يحكي
بابا:رقدت مليح ؟
انا:مممم أحسن
بابا:عيش بنتي
أنا:توصلني أنت و لا نمشي وحدي ؟
جا باش يحكي...قص علينا صوت الباب...خذيت نفس نحكي
انا:أنا نحل
هزلي براسو ايه...منعرفش كيفاش وصلت للباب...اول ما حليتها لقيتها في وجهي...نطرت عليها بالوقت حضنتها بكل قوتي...نحكي
أنا:توحشتك يا حلوفة
زهرة:و انا زادة يا روحي
كبست عليا أكثر...جبدت روحي شوية...باستني من خدي تحكي
زهرة:مريييم وينك انتي...هكا تخليني وحدي
أنا:تو نحكيلك كلشي...ادخل توا
زهرة:باش تمشي معايا لفاك مش هكا...مكانش والله معاد نعفسها من غيرك
انا:يا بنتي اهدا...خلي نخبر بابا و نخرجو مع بعض
زهرة:باهي
اول ما تلفت...لقيت بابا في وجهي...نسمع في زهرة تحكي
زهرة:صباح الخير عم احمد
احمد:صباح النور بنتي
انا:بابا...نحب نمشي مع زهرة...من غير ما نتعبك معايا
بابا:على راحتك
زهرة:عم احمد ميسالش نطلب منك حاجة
بابا:تفضل عزيزتي
زهرة:عم أحمد صراحة أنا باش نعرس الأسبوع الجاي و أنت تعرف بالقدا ما عندي حتى حد غير مريم...خاصة في الفترة هاذي...م ميسالش تخليها تعدي الأيامات هذوما معايا
طلعت راسي نغزر لبابا مصدومة...خاصة بعد ما تأكد لي حسام يعيش في نفس دار...و أكثر من هكا كيفاش نجم نغزرلو بعد اللي صار...و متأكدة لي بابا مستحيل يوافق جيت باش نحكي...قص عليا يحكي
بابا:باهي عزيزتي...مبروك عليك...و كان احتجت شي عمك موجود
زهرة:عيشك عم أحمد
دورت غزرتلو...نستوعب في كلامو...هزلي براسو ايه منعرفش علاه حسيتو يحب يعطيني فرصة اخرى...اني نثبت كلامي...تبسمتلو...نطمن فيه و تلفت لزهرة نحكي
انا:نطلع نجيب دبشي و صاكي و نخلط عليك
زهرة:باهي عزيزتي
طلعت لبيتي بالزربة...مش مستوعبة لي قاعد يصير
اني نكون معاه فرد بلاصة بعد اللي قالو البارح وترني حبيت نرفض...اما زادة منجمش نخلي زهرة وحدها هزيت الحاجات لي نستحقها...و نزلت عندها...لقيت بابا في اول دروج...حط فلوس في يدي يحكي
بابا:شد عزيزتي
انا:بابا شنوة هذا...علاه الفلوس هذوما الكل
بابا:منحبش بنتي تحضر عرس صحبتها...بلا ما يكون عندها دبش جديد...و زادة مصروف اليومين هذوما
شديتهم عليه و قربت منو حضنتو...عدا يدو على شعري يحكي
بابا:خلي تليفونك مفتوح ديما...أول ما نكلمك هز عليا و كان حسام قلقك في حاجة خبرني بالوقت باهي
جبدت روحي منو...و طلعت حاجبي نغزرلو و نحكي فرد وقت
انا:بابا متخافش عليا...تعرفني بالقدا...و أي حد يقرب مني...هو لي يوحل في المشاكل مش أنا
بابا:هههههههه ريض عزيزتي...دوب يكمل العرس ترجع لدار...يومين و ثلاثة متزيدش فوقهم
أنا:باهي بابا طمن...نخليك توا...باش نتأخر عالكور
بابا:باهي برا على روحك...ربي معاكم
انا:عيشك بابا
بستو من خدو و خالطت على زهرة...خرجت معاها نحكي
أنا:عمر يعرف لي جيت لهوني
زهرة:مممم خبرتو صباح
انا:باهي
زهرة:توا تفسرلي لي قاعد يصير
أنا:حتى شي...جيست فرحانة عاللخر...أول مرة نحس بابا يحبني بالحق
حبست في بلاصتها...و تلفتتلي...حضنتني بالوقت تحكي
زهرة:شكون ميحبكش إنتي ؟
أنا:سييبني يا طفلة وه...فاش قام تعنق فيا...يعني بالسيف عليكم باش تحبوني
زهرة:ههههههه تعرف حاجة...توحشت نقعدو في بلاصتنا متاع العادة...اما نظن المرة هاذي مانيش باش نتطرد وحدي
انا:متخافش...البروف محلاها...يعني ماهيش كيف عمر اما باز ماهيش باش طردنا
زهرة:ممممم باهي...هاني من يومين نقرا و لتوا مزلت متلقيتش بيها
انا:هيا ملا
تنهدت بالقاوي...و كملنا الثنية مع بعض...نحس في روحي فرحانة عاللخر...اما فرد وقت...فما حاجة قاعدة تكبس عليا من داخل...زعمة لي قالو حسام صحيح اصلا فاش يهمني فيه...بعد اللي عملو الكل وليت كيما اختو...و هذاكا لي باش يصير بالظبط...باش نمحي كلشي صار معاه من راسي...احسن شي صار لتوا...انو انا باش نرتاح منو جملة...و معاد لا يدور بيا و لا يقلقني هذا لي كنت نحب عليه من شهور...و ساايي تحقق أصلا بعد ما تعرس زهرة...مستحيل نحط ساقي في دار هذيكا مرة أخرى...و يا ريت معادش نشوفو بعدها في حياتي جملة
YOU ARE READING
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
