زهرة🌸

الحلقة الثامنة و الستون

حلقة 68
🔸️هند تحكي:
خذيت نفس...و مديت يدي دقيت الباب...حلتلي البون تحكي
هي:تفضل مدموزال هند
انا:عيشك...فرات وينو ؟
هي:في صالة متاع سبور
انا:باهي
دخلت و خليتها...بالدورة لي عملتها اخر مرة...صالة السبور اول وحدة عرفني عليه...اول ما وصلت...قلبي دق بالوقت...منعرفش علاه...و منعرفش علاه انا هوني من اصلو...و لا كيفاش طاوعتو و جيت عندو...شنية الحاجة لي خلاتني نجي من غير ما نخمم مرتين..كلامو معايا البارح...و لا نبرة صوتو...و لا توترو لي كان واضح من كلامو...شكون فرات...و شنعمل انا هوني...زعمة نرجع و لا نكمل..نقرب منو و لا نهرب...افكاري غمتني صراع بين عقلي و قلبي فرد وقت...لقيت روحي...قربت بخطوات مترددة...وقفت بحذا الباب...نغزلو...عاطي بظهرو...و مش حاسس بشي...زعمة يعمل في سبور و لا يفرغ في غشو...بقيت واقفة في بلاصتي...نثبت فيه...و مخي يهز فيا و يجيب...فقت من سرحتي على صوتو يحكي
مراد:شبيك واقفة غديكا ؟
هزيت عينيا فيه بالوقت...منعرفش كيفاش حس بيا في لحظة تلفت عندي...بدنو يصب بالعرق...حتى من وجهو خصلات شعرو طاحو على جبينو...هز المنشفة يمسح في وجهو...و يحكي فرد وقت
مراد:باش تبقى برشا واقفة هكا
انا:اه...انا...صراحة...البون
مراد:انسى توا...احسن حاجة انك جيت
انا:لباس توا ؟
مراد:احسن ببرشا على قبل
انا:باهي برشا ملا
مراد:تنجم تدخل توا ؟
هزيتلو براسي ايه...حطيت صاكي عالكرسي...منعرفش شنية نعمل بالظبط...اصلا كي نبدا معاه...منعرفش شنعمل و لا كيفاش نتصرف...قرب مني...وقف قدامي بالظبط...نزل راسو و حط عينيه في عينيا يحكي
مراد:باش تبقى واقفة هوني ؟
انا:شنعمل ؟
مراد:عملت سبور من قبل ؟
انا:لا
مراد:باهي...ايجا
انا:وين؟
حط يدو في يدي...كبس عليا...قلبي خض بالقاوي منعرفش شنية لي حسيتو بالظبط...و لا حتى كيفاش تبعتو...وقف قدام tapis course...جبدت يدي منو نحكي
انا:فاش تعمل ؟
مراد:شنية خفت ؟
انا:لاا...علاه نخاف اما
مراد:اما شنية ؟
انا:مانيش لابسة سبور
مراد:عملت حسابك
انا:شقصدك ؟
مراد:هوكا دبشك...برا بدل و ايجا
تلفت نغزرلهم...هزلي براسو باش نزرب...قربت مترددة هزيتهم في يدي...و عاودت غزرتلو...تبسملي بالوقت...خذيت نفس...و خرجت للبيت لي مقابلة صالة...بدلت دبشي...و قربت من المرايا...نغزر لروحي...نثبت في تفاصيل وجهي...و نسأل في روحي...زعمة لي نعمل فيه صحيح...زعمة علاقتي بفرات اكثر من اللي في راسي...شنية الحالة لي قاعدة نعيش فيها...نعرفو من شهور قليلة...منعرفش شكون هو بالظبط...و لا فاش يعمل هوني...علاه عايش وحدو...كلشي خلاني نراه...انو هو شخص غني برشا...و بفلوسو يشري لي فوقو و لي تحتو...اما زادة متأكدة لي فما جانب اخر من حياتو...جانب مخبيه على ناس الكل انا هوني باش نكشفو ؟ و لا هوني خاطر احساسي غلبني المرة هاذي...و خلاني نجي لعندو من غير ما نخمم في اللي باش يصير مبعد...لميت شعري...و قربت من الباب...تنهدت بالقاوي...و خرجت...جات عيني في عينو...هزني و حطني ندرا كيف...دوب تبسم و قرب مني يحكي
مراد:هيا ايجا
انا:باهي
قربت منو وقفت قدامو...شرلي بيدو باش نطلع...خذيت نفس...و هزيتلو براسي ايه...تبسم يحكي
مراد:حاضرة
انا:اكيد
قرب مني عاللخر وقف ورايا...بدني رعش...من نفس متاعو...مد يدو يريقل فيها...تلفت شوية عندو...جيت باش نحكي...اما تروهجت من قربو مني...تروهجت من انفاسو القوية...من غزرتو...و من كل حركة يعمل فيها...تنهد بالقاوي...يحكي
مراد:لباس ماهو ؟
انا:ل...لباس...كنت باش نقلك
مراد:شنية ؟
انا:متقويش في الفيتاس...اول مرة نجربها راني
مراد:متخافش هاني معاك
انا:ب...باهي
كبست عليها بيديا زوز...وقف مقابلني...كل مرة يزيد فيها شوية...غزرتلو نحكي
انا:فراات يززي كهو...قتلك اول مرة نركبها
مراد:تو تستانس بيها...متوقعتش لي باش تسلم فيسع
انا:مسلمتش
مراد:اكا ظاهر
انا:تحب تتأكد ؟
مراد:تفضل وريني
مديت يدي...زدت فيها اكثر من قبل...و تبسمت على جنب...منعرفش قداش جريت بالظبط...حسيت روحي تهديت و معادش فيا...نقصلها و قرب مني يحكي
مراد:برشا عليك...انزل توا
غمضت عينيا بالقاوي و عاودت حليتهم...مديت ساقي باش ننزل منها...و اووب نجي في حملتو...منعرفش كيفاش دعثرت و شعرة لا طحت...كبس على اجنابي يضحك و يحكي
مراد:سايس روحك...مترصاليش هازك للكلينيك توا
انا:تفرك فيهم عليا ؟
مراد:والله طلعت فراجيل عاللخر
انا:بربي
كبس عليا اكثر...و جبدني عندو...هزيت يدي بالسيف استندت عليه...غزرلي ندرا كيف يحكي
مراد:علاه مش صحيح ؟
انا:لا يا سيدي مش صحيح
مراد:باهي ايجا تقعد ساعة
جبدت روحي منو...و قعدت على tapis في الارض منجمتش ناقف اكثر...تبسم و نزل قعد بجنبي يحكي
مراد:شنية تعبت ؟
انا:ناوي تعذبني اكثر ؟
غزرلي ندرا كيف...و هز يدو...بعدلي خصلات شعري لتالي...يحكي
مراد:نسيت باش نقلك...انو العذاب و الغش و الحزن حاجات متواتيكش...حاول ديما تكون ايجابية في حياتك هند...مهما صار باهي
انا:انت شبيك حزين ملا ؟
مراد:حزين ؟
انا:مممم...ورا هذا الكل...نرا في حزن مخبي في عينيك
ترمى لتالي...يغزر لسقف...غمض عينيه بالوقت...تنهد بالقاوي...يحكي
مراد:شنية اكثر حاجة تتمناها ؟
عديت عينيا على وجهو...و تسطحت بجنبو...حطيت يديا زوز...على كرشي...غزرت لسطح نحكي
انا:اكثر حاجة نحب عليها....انو بابا يبطل يعاملني...كأني عبئ عليه...و لا مجرد واسطة باش يربح صفقة...انو مرة وحدة في حياتو...يتنازل على الجبروت متاعو معادش يتحكم في حياتنا و قرارتنا...هو مرة بقرارو دمر عمر...و توا يحب يدمرني انا
مراد:شنية صار ؟
انا:كان باش يعرسلي بولد صاحبو...و منها تنجح الاتفاقية متاعهم زوز...بخصوص الشراكة
مراد:و شنية حسيت ساعتها ؟
انا:اخيب احساس يمكن تتصورو...اني ماشية مع بابا باش يعقد بيا صفقة...للحظة حسيت انو عمر هو بابا مش هو...هو لي نجم نعتمد عليه و نتكى عليه...هو السند متاعي...اكثر حاجة تمنيتها و كنت ندعي عليها كل ليلة...هي رجوع عمر لهوني
مراد:في رايك باش يبقى هوني ؟
انا:باش يرجع لتونس بعد يومين تقريبا
مراد:و شباش تعمل وقتها ؟
انا:وعدني لهو باش يبقى معايا ديما...و هذاكا يكفي باش يطمني
مراد:باهي برشا
انا:و انت شنية اكثر حاجة تمنيتها ؟
دورت راسي شوية نغزرلو...سرح في سقف مرة اخرى حط يدو تحت راسو يحكي
مراد:انا ما نتمنى حتى شي
انا:شقصدك ؟
مراد:كلشي نحب عليه نشاور عليه بيدي
انا:لهدرجة
مراد:و اكثر
انا:غريب برشا
مراد:بربي
انا:ممم يعني كي تتمنى حاجة...و تتحقق على غفلة تفرح بيها اكثر...من انك تستعمل نفوذك باش تاخوها
مراد:تو كي تكبر...تفهم انو مش كلشي تتمناه يتحقق خارج المنطقة هاذي...فما برشا حاجات...لازمك تعيشهم وقيت باش تتعرف على روحك
انا:يا ريت كلشي ساهل...كيما قاعد تحكي عليه توا
مراد:في رايي لازمك تاخو فرصتك
دور راسو يغزرلي...جات عيني في عينو...قرب مني اكثر...عدا صوابعو على خدي...الاغرب اني منجمتش نبعد عليه...برغم نعرف لي قاعد يصير غالط...اما شي اقوى مني يقود فيا ليه هو و كهو...أنفاسو قوات على وجهي...خلاتني نغمض عينيا بالوقت...اول ما وصل لشفايفي...نوقز تليفونو...حليت عينيا نغزرلو...جبدت روحي من غير ما نحس...تقعد و عدا يدو على وجهو دورت وجهي منحبش نغزرلو...نحس في بدني الكل يرعش...لدرجة محسيتش بيه كيفاش قام و هز على تليفونو...بقيت نتبع فيه بعينيا...علق و عاود حطو..قرب مني...مدلي يدو يحكي
مراد:هيا قوم توا...لازمك تاكول باش تعوض دقايق لي جريتهم
انا:ميزيتش يعني
مراد:تي قوم ساعة
حطيت يدي في يدو...كبس عليا...و وقفني...ضربت فيه تبسم يحكي
مراد:ظاهر ماكش تاكول بالقدا
انا:فراات يززي اماان
مراد:باهي باهي ايجا
خلطت وراه...خرجنا للجنينة...خذيت نفس من النسمة الباردة...حسيت روحي تفرهدت برشا...و نجمت نتنفس بالقدا...برشا حاجات تخلطت عليا...و معادش نعرف شنوة نعمل بالظبط...برغم نعرف و متاكدة انو اللي قاعد يصير الكل غالط...و اني في البلاصة الغالطة زادة اما اللي واقف قدامي توا...اول مرة نقابل حد كيفو...و لا بالأحرى...اول مرة حد يقتحم حياتي بالطريقة هاذي بطريقة تخليني نحب نعرف عليه اكثر و اكثر...نحب نعرف شكون هو فرات...و شنية نهاية الطريق هاذي برشا اسئلة نحب نلقالها اجوبة...و اكيد هو برك لي عندو تفسير لهذا الكل
🔸️محمد يحكي:
حليت الباب و دخلت لبيتي...طيشت الفاست عالفوتاي و ترميت عالسرير...غمضت عينيا بالقاوي...تعدات صورتها بين عينيا كي العادة...قد ما حاولت...قد ما عملت...منجمتش ننساها...خمس سنين تعدات عالحادثة كأنها صارت البارح...هزيت روحي شوية...حليت القجر و جبدت صورتها...توا ليها سنين...عديت عينيا على ملامحها...عينيها...خشمها...شفايفها...تبسمت و انا نرا في ضحكتها...اللي واضحة في صورة...زعمة كان معركتهاش ليلتها...كان مسمعتش كلام حسام...كانت مزالها معايا لتوا...و معملتش الاكسيدون...كانت باش تسامحني...علاه تحرمت منها على بكري...تنهدت بحصرة على ضحكتها..لي كانت اخر ضحكة ليها و احنا مع بعض...صورة انا خذيتها بنفسي وقت كنا مع بعض و اخر صورة ليها زادة...خمس سنين لقيت روحي نصارع في روحي باش نجم نعيش بلا وجيعة...خمس سنين حاولت ننسى لأنا السبب في موتها...اما منجمتش كل ليلة....نحس بيها معايا...ساعات نسمع صوتها...و نحسها قريبة مني...خمس سنين منجمتش نغزر لطفلة اخرى...خسرت روحي...وقت خسرتها...خسرت حسام لي نحسو اكثر من خويا...و تربيت على يدو...توا و الليلة بالظبط...تعدات خمس سنين كاملة...خمس سنين من اللي تقلبت حياتي و عمري 23 سنة كهو...عديت صوابعي على ملامحها...كانها قدامي توا...طلعت راسي على صوت الباب لي تحل...نغزرلها كيفاش طلت عليا دوب تبسمت و عاودت نزلت راسي...دخلت و غزرتلي تحكي
مريم:نجم ندخل
تبسمت عالفازة...اصلا دخلت من غير ما تشاور...قربت مني...قعدت بجنبي...قربت مني شوية...غزرت لصورة تحكي
مريم:محلاها
انا:صحيح
مريم:نظن معنديش حق...نسأل وينها توا
انا:في بلاصة بعيدة برشا
مريم:لهدرجة
انا:و اكثر...لدرجة منجمش حتى نتمنى انها ترجع
مريم:قداش تعدا توا ؟
انا:خمس سنين
مريم:صحة ليها...بعد السنين هذوما الكل انت مزلت تحبها كيما قبل و اكثر
انا:شنية الفايدة ؟
مريم:مفماش فايدة محمد...فما حب حقيقي...انا كان جيت في بلاصتها...كنت مستعدة ندفع عمري زادة لراجل يحبني كيما نحبو و اكثر
انا:و راجلك ؟
مريم:حسام مرة موجود و مرة ضايع...تعلق بيا باش يخرج من الماضي متاعو...اما غرقني معاه اكثر...ضيعت برشا...و ضحيت برشا...معنديش استعداد باش نبدا معاه من اول و جديد...و لا باش نجري وراه و نخليه يحبني...علاقتي بيه علمتني برشا حاجات...و خلاتني نتعلم نفكر مرتين قبل اي قرار
بقيت نغزرلها...نغزر لغزراتها لي ضايعة...نعرف لهي تحبو دموعها لي محصورين يقولو هكا...كبست يدها على كرشها...تقول لهي تموت عليه...اما قاعدة تكابر...اول مرة نقابل وحدة في قوتها...اول مرة نحس لحسام باش يخسر قدام مرا...حتى شراز عطاتو دافع أقوى...و كمل كأنو مكانتش في حياتو جملة...اما الاغرب من هكا كيفاش مشلقتش لهو تبدل...غزرتو ليها...خوفو عليها الدار لي ولا يرجعلها اول ما يكمل الخدمة...هذا الكل يقول لهو تبدل على خاطرها...و فهم انو باش يخسرها حسام بدا يشد الثنية الصحيحة في حياتو...رغم كلشي صار بينا...اما نحبو يرتاح...يزي من اللي تعدا على راسو يزي من اللي راه من موت بابا...لبعد شراز...لي متأكد انها رجعت...و قريبة منو عاللخر...اما مريم كهو لي تنجم تخليه يعيش حياة عادية...تنهدت بالقاوي...و غزرتلها نحكي
انا:حسام يحبك مريم
طلعت راسها...غزرتلي ندرا كيف...و تبسمت على جنب تحكي
مريم:مش هذا كلامك قبل
انا:صحيح...اما تصرفاتو توا الكل تقول لهو يحبك..حاول تاخو فرصتك...متسامحوش...اما متسمحش فيه زادة
مريم:معادش يفيد الكلام هذا توا
انا:صارت حاجة منعرفش بيها ؟
غزرتلي...و عاودت نزلت راسها...تفرك في يديها و تحكي
مريم:حسام عايش معاها فرد دار
انا:شنننوة...على شكون تحكي ؟
مريم:عالأغلب صحبتو لولا
انا:من وين عرفت ؟
مريم:سمعتو يحكي معاها...ل...ليلة لي كلمتك فيها باش تجي تهزني
انا:علاه محكيتليش ؟
مريم:معادش ينفع...شي ماهو باش يتصلح
انا:حكيت معاه ؟
مريم:لا...منجمش نواجهو في حاجة هكا...طلبت منو يطلقني...اما رفض...على خاطر بنتو...و علاقتو هاذي معادش تهمني...يعني كان فما احتمال اني نسامحو قبل و ننسى...و بالأحرى نتناسى لي عملو فيا...اما توا لا منجمش نكون مع راجل...فما شكون في حياتو و عايش معاها كأنها مرتو...كان انا مزلت هوني...على خاطر بنتي و كهو
انا:مريم...اغزرلي هوني...ماكش مجبورة تتحمل هذا الكل...كان يطلع كلامك صحيح...والله ناقف مع اختي لاخر نفس في حياتي
تبسمتلي بالوقت...و هزت يدها حطتها على يدي..كبست عليا...تحكي
مريم:تعرف حاجة...حسام باللي عملو فيا الكل...اما عطاني ام و خو مكنتش نحلم بيهم...محمد انا عمري ماني باش ننسى وقفتك معايا...و اللي عملتو على خاطري...اما عندي شي واحد...يعني طلب واحد برك
هزيت يدي عاودت حطيتها على يدها...كبست عليها نحكي
انا:اكيد مريم...قتلك و باش نعاودلك...مدامني خوك تنجم تطلب لي تحب عليه
مريم:بنتي
انا:شنوة ؟
مريم:بنتي محمد...كان انا صارلي شي
انا:مريم فاش تحكي ياخي ؟
مريم:محمد اسمعني امانك
انا:لا انتي باز هبلت
مريم:محمممد...اسمعني امانك...حبالتي صعيبة عاللخر و حسام ميعرفش بالحكاية هاذي...و زادة نفسيتي تاعبة عاللخر...خاصة بعد الاحداث لي صارت الكل...كان انا صارلي شي...كي نولد و لا مبعد...متخليش فرح وحدها...نعرف لي حسام ماهوش باش يخليها...اما زادة منجمش ناثق فيه برشا...نخاف كان يتلهى بحياتو و لا يحملها ذنب هي معندهاش فيه...انت اقف معاها...باهي
انا:مرييم...عيش اختي يززي...شي ماهو باش يصير انتي باش تربي بنتك بيدك...و ماكش باش تحتاج لحد اخر...و متأكد لحسام عندو تفسير للي قاعد يصير الكل
انا:ميسالش...نحبك طمني...عالاقل نجم نرتاح شوية
انا:انا معاك مريم...و بنت خويا لي في الثنية كيما بنتي بالظبط...اما نحبك قوية...نحبك انتي تربي بنتك و تكبرها...و ما تحتاج لحتى حد...لا ليا و لا حتى حسام
مريم:ان شاء الله
دوب تبسمتلها...اصلا من وقت دخلت حسيتها مش قد بعضها...هد علينا في لحظة كي الحاكم...يغزرلنا مبهم جبدت يدها مني بالوقت...و غزرتلي ندرا كيف...وقفت بالزربة...قرب شوية يحكي
حسام:شتعمل هوني انتي ؟
مريم:ا...انا
انا:مفما حتى شي
حسام:انت متدخلش احسنلك
مريم:حساام يزي امانك
حسام:سألتك جاوبني...شتعمل هوني ؟
مريم:انا جيست حبيت نحكي مع محمد شوية
انا:ماهوش باش يفهم كي العادة
حسام:محمممد
مريم:حساام...هيا نخرجو من هوني امانك
حسام:برا لبيتك توا
مريم:لا...انت باش تجي معايا
حسام:مرررريم...قتلك ارجع لبيتك...متنرفزنيش اكثر
غزرتلي...هزيتلها براسي ايه...جبدت روحها لتالي...و خرجت...قرب مني وقف قدامي بالظبط...يحكي
حسام:اغزرلي هوني...نعرف لانت ماكش باش تسامحني برغم الحقيقة لي في مخك غالطة...اما متحاولش تنتقم مني على طريقها هي
انا:مش انا لي نستغل حد ما عندو حتى ذنب...باش نوصل للي نحب عليه...مانيش انا حسام...كان انت تنجم تتصرف بالطريقة هاذي...تبقى مشكلتك
حسام:تعرف بالقدا...لانا مستحيل نتصرف بالطريقة هذيكا...و لا حتى نستغل طفلة نحبها
انا:تحبها ؟ في رايي مفهوم الحب غالط عندك...نصيحة مني...تصرف قبل ما تخسر كلشي
هز يدو حطها على كتفي...كبس عليا...و غزرلي ندرا كيف يحكي
حسام: في رايي خمس سنين...كافية برشا...وقيت باش تعرف الحقيقة لي دفنتها مع ريم...و تخرج من الظلام لي غرقت فيه
جبد روحو مني...و خرج من البيت...بقيت واقف في بلاصتي...برغم معنديش ثقة في كلامو...اما حسيتو جا سبيسيال باش يقول الكلام هذا...دورت راسي...غزرت لتصويرتها مرة اخرى...دخلت في صراع بين المد و الجزر...احداث ليها سنين قاعدة دور في مخي...و سؤال واحد...باش يجاوب عليه الحلقة لي بقات ضايعة في ماضي ريم و كهو
🌸🌸🌸🌸🌸🌸🌸🌸🌸🌸🌸
🔸️زهرة تحكي:
بقيت واقفة في بلاصتي...نغزرلها و هي تحضن فيه و تعاود...عندها حق...حتى هي تحرمت منو سنين...و صعيب تتقبل بعدو مرة اخرى...اما زادة انا ما عندي حتى ذنب...من غزرتها عرفت لهي تلوم فيا...خاطر قرر يرجع لتونس...نزلت راسي بالوقت نتهرب منها...حسيت بسلمى لي نزلت بالوقت...قربت منو...وقفت قدامو تحكي
سلمى:باش تمشي من غير ما تودعني
بقى يغزرلها من غير حتى كلمة...قرب منو بوه يحكي
عثمان:عمر ولدي...سامحها المرة هاذي ميسالش
عمر:غلطة كيما هاذي منجمش نغفرها بابا
عثمان:و بلكشي مكانتش غالطة
عمر:شنوة ؟
عثمان:الأمور متتحلش بالطريقة هاذي و انت تعرف بالقدا...سلمى ربيتها بيدي...و اكيد مش قصدها باش تقتلك ولدك
قربت منو بالوقت...حطت يديها زوز على يدو...كبست عليه...قلبي خض بالقاوي...و انا نغزرلهم...متوقعتش جرأتها قدامنا الكل...بقى يغزرلها من غير حتى كلمة...و من غير ما يبدل غزرتو اما حاجة داخلي تحركت...خوف من المستقبل...خوف من انو سلمى...قاعدة تعمل في خطواتها الاولى...غزرتلو بطريقة...تخلي اي راجل يضعف قدامها...تحكي
سلمى:قتلك و باش نعاودلك...قدام الناس الكل منقصدش لي صار...و مكنتش نعرف لي تيزانة باش تضرها...و الا مكنتش باش نعمل فيها هكا...مش على خاطر شي...اما على خاطرك انت عمر...انا مستحيل نضرك
فاطمة:عمر عيش ولدي...من غير ما تروح متغشش مدام ولدك و مرتك بخير...سامحها
طلع راسو غزرلي...نزلت عينيا بالوقت...منحبش نغزرلو ما نحب نجبرو على حتى قرار...هو غلط في الاول و عطاها الفرصة هاذي...و منستغربش كان سامحها زادة خاطر مستحيل يكون عاش شوية من الخوف لي عشتو ليلتها...طلعت راسي على صوتو يحكي
عمر:مش انا لي لازم نسامحك سلمى
جبد يدو منها...و قرب مني وقف مقابلني...دوب تبسم يحكي
عمر:حاضرة عزيزتي
هزيتلو براسي ايه...حط يدو على يدي...كبس عليا...و تلفتلهم يحكي
عمر:وقيت باش نمشيو...و اكيد باش نرجع في الويكاند
هند:زهرة انتي زادة باش ترجع معاه
جيت باش نحكي...قص عليا كي كبس على يدي اكثر يحكي
عمر:اكيد...وين انا...وين مرتي
عثمان:رد بالك على روحك
انا:عيشك بابا
مصطفى:والله كان انا حد ماهو معبرني هوني
انا:بربي ؟
مصطفى:باش ترجع مش هكا ؟
انا:كان مرجعتش انت تعرف ثنية توا
مصطفى:اكيد
قرب مني...حضني بالقاوي...غمضت عينيا بالقاوي...و عاودت حليتهم...نحكي
انا:مصطفى الكل هوني في امانتك...كنت راجل دار هاذي و باش تبقى ديما
مصطفى:طمن...و انتي زهرة...اكيد باش ترجع مش هكا
هزيتلو براسي ايه...برغم انو اكثر بلاصة نحب نهرب منها توا...و معادش نرجعلها جملة...يمكن مصطفى و هند كهو...لي يحبوني نرجع لهوني...قربت من هند حضنتها بالقاوي...برغم الاحداث اللي صارت هوني في أربع شهور...اما يكفي لي حسيت اني كسبت أخت اخرى دورت راسي غزرت لمليكة...تبسمتلها...و قربت منها حضنتها...نحكي في وذنها
انا:مرسي على كلشي مليكة
مليكة:من غير مزية عزيزتي
جبدت روحي منها و غزرت لحماتي...قربت منها مترددة منعرفش كيفاش حضنتني...برغم نعرف لهي عمرها ما حبتني و عمرها ما حسبتني وحدة من ولادها...منعرفش اذا لي عملاتو توا على خاطر ولدها و لا حفيدها لي في الثنية...اما للحظة تمنيت كان عملت هذا الكل بحب جبدت روحي منها...و رجعت بجنبو...حط يدو على كتفي يحكي
عمر:يززي...اكيد باش نرجع لهوني...من غير ما نحس اني نعمل في حاجة غالطة
فاطمة:برا ولدي ربي يسيرلك امورك
عمر:عيش امي
خرجو معانا الكل لبرا...حليت الباب باش نركب...جات عيني في عينها...غزرتلي بتحدي...فهمت قصدها بالقدا تبسمت نفس التبسيمة على فمها...و ركبت...معينيش باش ندخل في حرب معاها...خاطر اكيد باش تخرج خاسرة منها...اول ما خدم الكرهبة...تنهدت بالقاوي حطيت يديا زوز على كرشي...و دورت راسي غزرتلو نحكي
انا:ماكش باش تندم ؟
عمر:على شنوة ؟
انا:انك خليت عيلتك مرة اخرى
هز يدو حطها على يديا زوز...و غزرلي ندرا كيف يحكي
عمر:عندي عيلة اخرى توا...و مدامني معاكم...مستحيل نندم على شي...و الحاجز لي كان بيني و بين عيلتي تهد...يكفي لي تعدا علينا...وقيت باش نرجعو لحياتنا
هزيتلو براسي ايه...و تكيت لتالي...جبد يدو مني...و كمل يسوق...منعرفش علاه حاسة لي فما حاجات اكبر باش تصير...و الاهم من هكا رجوع مراد...لي حد ميحبش يصدقو...غمضت عينيا بالقاوي...نتذكر في كلامو << صدقني مهما هربت مني يا زهرة...باش تبقى متاعي انا و كهو >> حليت عينيا مصدومة...نرد في النفس...غزرلي مستغرب يحكي
عمر:لباس ماهو ؟
انا:ل...لباس...لباس
عمر:زهرة شفما ؟
انا:حتى شي...تعبت شوية و كهو
عمر:تحبني ناقف ؟
انا:لا...لا...تو كي نلحقو لدار نرتاح
عمر:باهي...ايجا عندي تراه
انا:مرتاحة هكا
عمر:مانيش ناخو في رايك...و مش وقت غشك توا
جبدني من يدي...جيت في حملتو...كبس على ظهري يحكي
عمر:هكا ترتاح اكثر
محبيتش نقاومو...خاصة و هو يسوق...اما الفازة جات لصالحي...حتى انا بحاجتو توا...بحاجة يحضني من غير حتى كلمة...و اكثر شي ريحتو...غمضت عينيا بالوقت منحبش نفكر في اللي باش يصير...و لا شنوة الحالة اللي احنا فيها...يكفي لهو معايا توا...و بجنبي غفيت في حضنو...و محسيتش بالثنية كيفاش وصلنا هزيت روحي مروهجة...تبسم يحكي
عمر:هيا عزيزتي
انا:وصلنا ؟
عمر:مممم هيا...ترتاح في دارنا احسن
انا:باهي
تكا راسو لتالي...و تنهد بالقاوي...ضيقت عينيا مستغربة نحكي
انا:ماكش باش تطلع ؟
عمر:هاني باش نخلط عليك
انا:باهي
حليت الباب و نزلت...طلعت راسي نغزر لدار...تنهدت بالقاوي...سكرت الباب...اول ما نزل...ستنيتو نزل لي فاليز و طلعت معاه...اول ما دخلت...استغربت من ريحة دار...تلفت عندو مستغربة...تبسم يحكي
عمر:خالتي نعيمة حضرت كلشي
هزيتلو براسي ايه...قلبي غم عليا...حطيت يدي على فمي و فصعت لبيت البانو...خلط عليا مفجوع...يسايس فيا...عدا يدو على وجهي يحكي
عمر:لباس توا ؟
انا:م...منعرفش
عمر:باهي ايجا معايا يا روحي
كبست على يدو...و رجعت للبيت معاه...ترميت عالسرير بالوقت...قعد بجنبي...يعدي في يدو على شعري و يحكي فرد وقت
عمر:زهرة قوم بدل دبشك باش ترتاح اكثر
انا:نحب نرقد و كهو
تنهد بالقاوي...و جبدني عندو اكثر...نحالي الفاست و الكونفارس يحكي
عمر:هيا عزيزتي...لازمك تاكول شوية
انا:منحبش...عمر سيبني...كرشي توجع فيا
عمر:هيا قوم نهزك للكلينيك ملا
تلفت عندو...طلعت راسي نغزرلو...وجهو مشى الوان من الخوف...قربت منو شوية...نحكي
انا:لباس عليا...جيست دايخة من الطريق...و معدتي قلبت...تو نرقد شوية...نرتاح
حط يدو على كرشي...و لاخرى على خدي...يحكي
عمر:هاني عملت بخاطرك و رجعنا على بكري...حتى كلام طبيبة حطيناه على جنب...ملا متعبش روحك...و من غدوة ناخو موعد...لازمك تولي تابع عند طبيبة هوني
انا:عمممر...والله لباس عليا...مفماش داعي للخوف هذا الكل
عمر:منحبش نكون سبب في اني نخسر حد فيكم
قربت منو اكثر...برغم اني لتوا منجمتش نسامحو عاللي صار...اما منحبوش يعيش هذا الكل جرايري...اكيد كل حاجة عندها وقتها...و حقي نعرف كيفاش ناخو منو...و كيما يلزم زادة...حطيت راسي على صدرو...نحكي
انا:و انت لازم ترتاح زادة
غرس يدو في شعري...و نزل عليا اكثر...باسني من راسي...يحكي
عمر:مرتاح عزيزتي
انا:عمر
عمر:مممم
انا:امتى نجم نرجع لفاك ؟
عمر:اول شي باش تمشي لطبيبة...مبعد ساهل
انا:معناها فما احتمال...منجمش نرجع
عمر:باش ترجع عزيزتي...انا وعدتك لانتي باش تكمل اما اهم شي توا صحتك
انا:باهي
عمر:تعرف لنعيمة...حضرتلك حاجات بنينة...متحبش تاكول ياخي
انا:بالرسمي
عمر:مممم هيا ارقد شوية توا...عندي خدمة نبعثها لحسام...مبعد نتعشاو مع بعض
انا:باهي
جبد روحو مني...باسني من خدي...و هز الغطا عليا شوية...و خرج من البيت...غمضت عينيا بالوقت...اول مرة بعد شهور...نحس روحي مرتاحة عاللخر...كيما اول نهار رقدت فيه هوني...احسن شي مفما حتى حد هوني غيرنا...بقيت نتقلب في بلاصتي...اول ما بعد عليا...طار نوم في لحظة...نفخت بالقاوي...شنوة باش يصير...كان قعد معايا لين غفيت...هزيت روحي بالسيف...دخلت لبيت البانو...عملت دوش...و لبست روبة خفيفة...اكثر روبة يحبها هو...شيحت شعري...و خرجت عندو...لقيتو في الكوجينة...طلع راسو غزرلي شوية...حط من يدو يحكي
عمر:صحة ليك حبي
انا:عيشك
عمر:ايجا تراه
قربت منو...قعدت عالطاولة...كمل حط الصحون...و قعد بجنبي...متوقعتش لي نلقى كلشي حاضر اول ما نرجع عديت عينيا عالطاولة...ما عيني في شي توا...غزرلي مستغرب يحكي
عمر:شبيك عزيزتي ؟
انا:حتى شي
عمر:ملا شبيك متحبش تاكول ؟
انا:معينيش
عمر:تحب حاجة اخرى
هزيتلو براسي ايه...ضيق عينيه...و هز يدو كبس على يدي يحكي
عمر:شنية شاهية ؟
انا:نحبك تحطلي سكر عالسلاطة
عمر:سكر في سلاطة ؟
انا:مممم
عمر:متأكدة
انا:هكا شاهيتها...و ما نحب حتى شي اخر...امانك
عمر:كهو
هزيتلو براسي ايه...هز روحو كي الشاطر...حطلي شوية منو...و قعد بجنبي...يغزرلي مستغرب و انا ناكول فيها هزيت راسي نحكي
انا:تحب تجرب ؟ ياسر بنينة
عمر:لا عزيزتي صحة
انا:على راحتك
اول ما كملت صحني...طلعت راسي غزرتلو...نحكي
انا:مفماش غيرو ؟
هزلي براسو لا...غزرت لصحنو...ما كلا منو شي...قحرتلو نحكي
انا:شبيك ما كليت شي
عمر:الفايدة فيك عزيزتي
انا:مدام مفماش صحن اخر...نمشي نرقد على روحي
عمر:باهي
هزيت روحي...خرجت من الكوجينة...و خليتو في بلاصتو...قربت من الكوافوز...قعدت عالكرسي...نمشط في شعري...طلعت راسي نغزرلو...قرب مني...و كبس بيديه على كتافي زوز...قلبي خض بالقاوي...نزل عليا باسني من راسي...و قربلي اكثر يحكي في وذني
عمر:تعرف لي توحشتك برشا ؟
هزيت روحي وقفت...و تلفت عندو...بدني الكل يرعش هز يدو دورها على ظهري...كبس عليا...و جبدني عندو اكثر...جيت باش نحكي...نزل على شفايفي بالوقت هزيت يدي بالسيف...كبست على جنبو...منحبش نضعف بين يديه توا...كل مرة يقربلي...تتعدا الاحداث الكل بين عينيا...جبدت روحي منو بالسيف...كبست عليه اكثر نحكي
انا:ع...عمر
كبس عليا اكثر...عرفت لي ماهوش باش يسمعني توا خاصة لتقريب شهرين...ما صار بينا شي...اما زادة منجمتش ننسى لي عملو فيا...ساعات كان يعتبرني مش موجودة جملة...جرة سوء تفاهم...كان باش يخسرني في كلشي...لتوا منسيتش كلامو...لتوا منسيتش لهو يراني كيما أمي بالظبط ...نزلو دموعي بالوقت...جبد روحو مروهج...يرد في النفس بالسيف...طلعلي راسي يحكي
عمر:زهرة...شبيك ؟
منجمتش نرجعلو...دموعي نزلو اكثر...وخرت لتالي
عاود كبس على يدي...غزرتلو نحكي
انا:ع...عمر سيبني امانك
بقى يغزرلي مستغرب...كأنو يستوعب في اللي صار قربلي اكثر...حاوط وجهي بيديه زوز...يمسح في دموعي و يحكي فرد وقت
عمر:ششش...يزي اسكت
انا:ا...انا...انا
عمر:ششش قتلك اسكت...ماكش مجبورة على حتى شي...و انا مستحيل نمسك من غير رضايتك باهي
هزيتلو براسي ايه...برغم الغش لي حسيتو فيه الكل اما ما قال حتى كلمة...جبدني عندو بالوقت...حضني...و باسني من راسي يحكي
عمر:هيا توا...ايجا ترتاح
جبدت روحي منو شوية...قربت من سرير...قعد بجنبي من غير حتى كلمة...حسيتو مش قد بعضو...صوت أنفاسو مسموع في البيت الكل...نزل عليا اكثر باسني من خدي يحكي
عمر:عندي خدمة نكملها...انتي ارقد توا و ما تخمم في حتى شي باهي
انا:ب...باهي
هز روحو خرج من البيت...غمضت عينيا بالقاوي منجمتش نمنعو...منجمتش نخليه يبقى...قد ما حاولت ننسى لي صار اما شي...برغم حتى انا باش نموت على قربو...عديت يدي على خدي... كبست على مخدتو بيدي...منحبش نخلط عليه...منحبش نضعف توا...هو زادة غلط برشا...و خلاني نكره كلشي فيا...حطيت يدي على كرشي...نحكي
انا:سامحني يا روحي...نعرف لباش تتعب برشا جرايري اما زادة هو عندو يد في اللي قاعد يصير..يستهل مش هكا
بقيت نحكي معاه...كأنو يسمع فيا...لين هزني نوم و رقدت...خاطر نعرف و متأكدة لي ما عندو حتى خدمة و مش باش يرجع حتى انا نرقد...على هذاكا رغم كلشي نحبو يبقى بجنبي و معايا...معايا انا و كهو
🌸🌸🌸🌸🌸🌸🌸🌸🌸
🔸️مريم تحكي:
نزلت من الكرهبة...من غير حتى كلمة...اصلا من بارح هاز خشمو...و مش عاجبو شي...مع انو يعرف لمحمد مكانش في حالة تسمح باش يعاركو فيها...و مفما حتى شي يخليه...يعمل هذا الكل...تلفت نغزرلو...دور الكرهبة و مشى على روحو تنهدت بالقاوي...و غزرت لساعة مزال ساعتين عالكور متاع مدام شراز...كبست على صاكي مترددة...زعمة نمشي عندها و لا لا...زعمة وقيت باش نحكيو في كلشي...اول ما طمنت لهو بعد...خرجت من لفاك...دريكسيون لليسي متاعها...وقفت نستنى فيها نغزرلهم خارجين...طلعت راسي نفركس عليها في وسطهم...قلبي خض بالقاوي...كي ريتها...خارجة مع زوز صحاباتها...تضحك و عاملة جو...منجمتش نقرب منها ملقيتش جرأة تكفي باش ناقف قدامها...اصلا منعرفش علاه جيت لهوني...وقفت في بلاصتها...اول ما جات عيني في عينها...كبست على صاكي اكثر...ودعتهم و قربت مني...وقفت قدامي...غزرتلي ندرا كيف تحكي
رنيم:شتعمل هوني ؟
انا:م...ميسالش نقعدو مع بعضنا شوية ؟
رنيم:متأكدة ؟ من اللي تطلب فيه
هزيتلها براسي ايه...معادش نعرف...شنية لازم نعمل بالظبط...و لا شنية لازم نقول...غزرت لكرشي...و عاودت غزرت لعينيا تحكي
رنيم:منجمش نطول معاك برشا...بابا يتحير عليا
انا:باهي...باهي...مانيش باش نشدك برشا
رنيم:فما جنينة قريبة من هوني...هيا ايجا
دوب تبسمتلها...متوقعتش...باش تقبل تقعد معايا...بعد اللي صار الكل...و خاصة اخر مرة...قعدت بجنبي...بقينا زوز ساكتين...لين تكلمت هي
رنيم:قداش عندك حبالة توا ؟
انا:خمس شهور
رنيم:ولد و لا بنية
انا:طفلة
رنيم:مبروك عليك
انا:عيشك
رنيم:علاه جيت ؟
انا:ر..رنيم...نعرف لأنا جيت متأخرة برشا...اما عالاقل نجمت نعمل الخطوة هاذي
رنيم:جيت على خاطر بابا ؟
انا:لا...لا...انا هوني على خاطرك انتي
رنيم:انا ؟
انا:ص..صحيح...رنيم نحبك تسامحني
رنيم:نسامحك ؟ شنية لي صار باش مريم تنازلت و ولات تطلب السماح ؟
نزلت عينيا منها...و كبست على يديا زوز...خذيت نفس نحكي
انا:عندك حق متسامحنيش...كيما عندك حق متسمعنيش جملة...رنيم انا عمري ما حبيتك...و هذا الكل كان عندو سبب واحد و كهو...على خاطر...انتي كان عندك ام و انا لا...انتي كان عندك حياة مستقرة و انا لا...من اول مرة جيت ليها لدنيا...من اول مرة ريت بابا حطك في حضنو كرهتك...خاطر حسيت لأنتي سرقتلي حياتي انا...و امك فكت بلاصة امي...فكت دارها و بيتها و كلشي يخصها البيت هذيكا ماتت فيها امي رنيم...على هذاكا كل مرة كنت نسمع حياة تضحك فيها كنت نكرها اكثر من قبل و ساعات نتبلى عليها و نفرح وقت بابا ينبزها و يسمعها الكلام جرايري
غمضت عينيا بالقاوي...نرد في نفس...حطيت يدي على كرشي و كملت نحكي
انا:هذاكا الشي الوحيد لي كان يرضيني و يحسسني لأنا ناخو في حق أمي و حقي...حياتي الكل عديتها و انا نغير منك...و من كلشي عندك...كنت نحسدك على طرف ضحكة مع امك...كنت نلوم بابا...خاطر فك مني عيلتي و عطاهالك انتي...عديت سنين و انا نموت من داخل رنيم...كل مرة نحاول نقرب منك...نرا امي بين عينيا...و مدامني تحرمت منها...كنت نحب بابا ليا وحدي انا و كهو...صحيح غلطت معاك برشا...برغم انا مش خايبة لهدرجة...عمري ما نويت نضرك...بالعكس كنت متأكدة لانتي باش تبقى اختي و من دمي...و نعرف لي الكلام هذا ماهوش باش يفيد توا...اما نحبك تسامحني...نحب نمشي من هوني و انا مرتاحة...نحب بنتي كي تكبر...ما تقولها حتى حاجة خايبة عليا...في الاخير تبقى انتي خالتها الوحيدة
رنيم:انا زادة كنت نغير منك مريم...كنت نحس لانتي فكيت بابا مني...كنت نرا خوفو عليك لمعندوش مبرر كان كي يحل الباب...يقول وينها مريم...مريم رجعت مريم كلات...مريم مليحة...كنت كي تمرض...يسهر معاك ليلة كاملة...اما أمي كانت تقولي...لهو زادة يحبني...و لي انتي محتاجتو اكثر مني...امي عمرها ما كانت تكرهك...بالعكس....كي طول كانت تخاف من بابا يعاركها على هذاكا تفرغ غشها فيك...على هذاكا كانت قاسية عليك...خاصة و انتي كنت تاقف في وجها كل مرة...رغم هذا الكل بقيت نعتبرك اختي...برغم غشي منك...اما كنت نقول لاكيد انتي تحبني كيما زهرة قداش من مرة نحب نقلك لانا اختك مش هي...قداش من مرة كنتو تباتو فيها مع بعض...انا نرقد بدموعي...و تظطر امي تواسيني...و تقولي لأنا مزلت صغيرة...على هذاكا منجمش نبقى معاكم...انتي خسرت امك مريم...و انا خسرت بابا في الحياة
انا:رنيم...سامحني عيش اختي...يمكن ماهيش باش تكون عندي فرصة اخرى...نطلب فيها سماح منك
رنيم:فاش قام الكلام هذا؟
خذيت نفس و حطيت يدي على يدها...غزرتلي مستغربة...تبسمت نحكي
انا:فقت مأخر...فهمت انو الغلطة مش متاعي و لا متاعك...و لا حتى الغلطة متاع امك...المذنب الوحيد هو بابا...هو لي خلانا نعيشو بالطريقة هاذي...توا و بعد سنين...نحب نحس لي انا بالرسمي عندي اختي...من دمي و لحمي...و ماكش مظطرة تبينلي هذا الكل...يكفي انك تكون خالة مليحة لبنتي
جبدت يدها مني...حسيتها مش قد بعضها...غزرتلي ندرا كيف تحكي
رنيم:متكلمنيش بالطريقة هاذي مريم...متحسسنيش لانا باش نخسرك بالرسمي...فاش قام هذا الكل...كان تحبني نسامحك...و نبداو صفحة جديدة...اثبتلي لانتي باش تكون اختي بالحق...حتى كان نهار واحد كهو
انا:أكيد يا روحي
قربت منها حضنتها بالوقت...اول مرة نحضن فيها اختي بعد السنين لي تعدات الكل...اول مرة نحس روحي قريبة منها...و مخسرتهاش جملة...جبدت روحي منها...و تبسمت بالوقت...هزيت يديا زوز...كبست على يديها نحكي
انا:رنيم...اختي الغالية...سامحتني مش هكا ؟
رنيم:انتي زادة سامحني مريم...على كل غلطة عملتها في حقك
انا:اغزرلي هوني...فما زوز حاجات متفرطش فيهم في حياتك...عيلتك و قرايتك...اللي صار صار توا...بابا أملو الكل فيك انتي توا...متأكدة لهو نساني اول ما خرجت من دار...و تو مع الوقت ينسى كلشي يتعلق بيا كيما عمل مع امي...على هذاكا نحبك تكون قوية ديما...انسى كلشي خايب عشناه مع بعض...و تفكر اللحظة هاذي كهو شي اخر...بنتي امانة عندكم زادة...خليها تعرف انو امها عندها عيلة...و يا ريت بابا ما يحاسبها على حتى شي يتعلق بيا...و الا مستحيل نسامحو لا دنيا و لا اخرة
كبست على يدي اكثر...غزرتلي ندرا كيف...قلبي غم عليا...وجيعة خايبة قاعدة نحس بيها...خايفة على بنتي اكثر من اي شي آخر في دنيا...خايفة منجمش نكمل معاها...كيما عملت امي...خايفة حسام ياخو المرا لي كان يحبها...و يخليها تصارع وحدها...نحب نطمن لي كل حد نعرفو ماهوش باش يخليها و لا يعطيها بظهرو غزرتلي ندرا كيف تحكي
رنيم:مريم...من اول نهار حطيت فيه ساقك برا دار...و بابا ولى عبد اخر...صدقني معادش بابا لي نعرفو..الوقت الكل يعديه في بيتك...صدقني تعب برشا بعدك و مرض عاللخر
بقيت نغزرلها...ذكرت اخر مرة قابلتو في الكلينيك..قلبي خض بالقاوي...في لحظة تذكرت كلشي عشتو معاه خذيت نفس نحكي
انا:لباس توا ؟
رنيم:كي العادة...اصلا قص عليها الخدمة
انا:تحكي بجدك ؟
رنيم:الكلام هذا الكل ماهوش باش يفيد توا...نتوما زوز محتاجين باش تقعدو مع بعضكم...و تفهمو بعضكم زادة
جبدت يدي منها شوية...و تنهدت بالقاوي...مستحيل ننسى لي قريتو في المذكرة متاع امي...خذيت نفس نحكي
انا:لازمني نرجع للفاك قبل حسام
رنيم:على ذكر حسام...كيفاش علاقتكم مع بعض
انا:عادي كيما اي كوبل
رنيم:متأكدة ؟
انا:طمن عزيزتي...الاهم عندي توا اني نجمت نحكي معاك
رنيم:متتوقعش قداش حسيت براحة توا
انا:من غير ما يعرف بابا لأنا قابلتك...عالاقل باش نجم نراك مرة اخرى
رنيم:أكيد عزيزتي
قربت منها حضنتها مرة اخرى و جبدت روحي بالوقت وعدتها...و خرجت لطريق...شديت طاكسي لفاك...اول مرة حسيت لأنا عملت خطوة باهية في حياتي...و تصرفت كيما امي بالظبط...حطيت حقدي و انانيتي و كرهي على جنب...و جربت نكون كيما امي...نطلب السماح و نسامح...اول ما وصلت...لقيتهم خارجين من الكور...غمضت عينيا بالقاوي و عاودت حليتهم متوقعتش لي يدخلو قبل الوقت و يكملو بكري...قربلي مستغرب يحكي
وائل:مريم لباس ماهو ؟
انا:ضيعت كور آخر
وائل:متخافش يتعوض
انا:إن شاء الله
وائل:من غدوة نعطيك المحضارات الكل
انا:عيشك
وائل:من غير مزية
جا باش يمشي...تلفت عندو...و وقفتو...نحكي
انا:واائل
وائل:تفضل
انا:ص..صراحة...كنت باش نسألك على مدام نورهان
وائل:لباس ماهو...صارت حاجة ؟
انا:ل...لا...لا...اما لازمني نقابلها في اقرب فرصة
وائل:بعد غدوة باش تسافر...و ممكن طول شوية...كان تحب برا قابلها اليوم...صحيح هي في عطلة...اما اكيد باش تستقبلك
انا:متأكد ؟
وائل:لحظة تراه
هز تليفونو...يكلم فيها...بقيت في بلاصتي نغزرلو يحكي
وائل:أمي فاضية توا...باش نعديلك مريم...باهي
حط تليفون في يدي...شديتو عليه...مترردة...نحكي
انا:اهلا طاطا نورهان
نور:اهلا بيك عزيزتي...لباس ؟
انا:لباس عيشك و انتي ؟
نور:لباس بنتي...طمني عليك انتي
انا:نحب نشوفك...في اقرب فرصة زادة
نور:هاني في دار توا...كان تحب ايجا مع وائل
انا:باهي عيشك
حطيت تليفون في يدو...نسمع فيه يحكي معاها
وائل:باهي...باهي
علق عليها و غزرلي مستغرب...عدا يدو على شعرو يحكي
وائل:باش تجي معايا
طلعت راسي غزرت للبركينغ...اكيد ماهوش باش يوصل توا...و اكيد زادة ماهيش باش جيني فرصة اخرى اني نقابلها...خاصة و غدوة عطلة...و مش باش يخليني نخرج...هزيتلو براسي ايه...دوب تبسم يحكي
وائل:باهي تفضل
مشيت معاه...و قلبي مقبوض...منعرفش علاه...ياسر خايفة من اللي باش يصير مبعد...كلشي قاعدة نعمل فيه على خاطر بنتي و كهو...ثنية كاملة و هو يغزرلي يجي باش يحكي مبعد يسكت...كبس عالفولون بيدو يحكي
وائل:مريم شنية الحكاية ؟
انا:حتى شي
وائل:هو سبب مش هكا ؟
انا:شقصدك ؟
وائل:حذرتك من قبل...قتلك باش تغلط...غلطة عمرك قتلك لهو ماهوش باش يهنيك...ريت توا...ريت الثنية لانتي فيها
غمضت عينيا بالقاوي...و عاودت حليتهم...خذيت نفس نحكي
انا:وائل...يزي امانك
شد الفران بالقاوي...و تلفت عندي...غزرلي ندرا كيف يحكي
وائل:اطلق منو مريم
دورت راسي...غزرتلو مصدومة...متوقعتش جراتو توصل بيه لهوني...اما زادة غزرتو دخلتني بعضي اكثر عدا يدو على وجهو و كمل يحكي
وائل:نعرف لماكش مرتاحة معاه...ياخي غزرت لروحك ماكش مريم لي نعرفها...متخسرش اكثر على خاطرو امانك...اغزرلي مريم...صدقني لانا باش نبقى معاك لاخر لحظة...كيما قبل و اكثر...حط يدك في يدي و خليني نخرجك من الحبس لانتي فيه
بقيت نغزرلو...نستوعب في كل كلمة قالها...خذيت نفس...نحكي
انا:وائل...انا عمري ما ندمت على قراري...و مدامني اخترت حسام...معاناها حبيتو...و مزلت نحبو لتوا...و علاقتي بيه...حاجة تخصني انا و كهو...و مستحيل نفكر اني نطلق منو...و لا نبعد بنتي على بوها
وائل:هذا هو سبب ؟
انا:قتلك و باش نعاودلك وائل...انا مستحيل نندم على قرار خذيتو بنفسي...و مقتنعة بيه...و مهما صار...و مهما كانت علاقتي معاه...ما نحب حتى حد يدخل فيها...لا انت و لا اي حد اخر امانك...و كان متحبش توصلني عندك أمك...ميسالش...تو ننزل هوني..عيشك
وائل:باهي يا مريم باهي....اتو نشوفو وين باش تهزك صحة راسك هاذي
خدم الكرهبة من غير حتى كلمة...حطيت يدي على كرشي...منعرفش شنية لي حسيتو بالظبط...من شيرة وائل عندو حق...انا ماشية في ثنية مسكرة...و نعرف لحسام مستحيل يكمل فيها معايا...اما معنديش حل اخر...يمكن قبل كنت نجم نبعد عليه...اما مانيش باش نخلي بنتي تعاني جرايري...خايفة منجمش نكمل معاها لتالي...وقتها تلقى عيلتها الكل معاها...منعرفش كيفاش وصلنا...نزلت من غير ما نزيد معاه كلمة...اول ما دخلت عارضتني طاطا نورهان...سلمت عليها...فرحت بيا عاللخر...شدتني من يدي تحكي
نور:ايجا عزيزتي...ايجا اقعد
انا:عيشك طاطا نورهان...اما نحب نحكي معاك وحدنا
كملت كلامي...و غزرت لوائل...غزرلي ندرا كيف يحكي
وائل:انا في الجنينة...كان احتجتو شي كلمني
نور:باهي عيش ولدي
اول ما خرج...قربت معاها...قعدت عالفوتاي...غزرتلي تحكي
نور:لباس عزيزتي
حليت صاكي...و جبدت منو العقد و الشاك...حطيتهم عالطاولة...نحكي
انا:ه...هذوما خذيتهم من عند خالتي...قالت لي حق امي...ميسالش تتأكدلي منهم توا
هزتهم في يدها...تقرا فيهم...طلعت راسها غزرتلي تحكي
نور:بعد ما توقع الاوراق هذوما تنجم تتصرف بالفلوس لي عندك
انا:معناها كلشي طبيعي
نور:نورمالمون كلشي طبيعي...و زادة الفلوس لي هوني اكيد باش تعاونك برشا
انا:لا...لا ما عيني في حتى شي...و مانيش بحاجتها الفلوس هاذي
نور:في شنية تفكر ؟
انا:نعمل وصية
نور:وصية ؟؟
هزيتلها براسي ايه...غزرت لشاك و عاودت غزرتلها نحكي
انا:الفلوس هذوما باش نخليهم لبنتي
نور:شقصدك ؟
انا:منعرفش شنية باش يصير...بعد ما نولد...يعني كان متت و انا نولد...و لا حتى بعد ما نولد...نحب الفلوس هذوما يكونو لبنتي...اما بشرط حتى تعرس و تنجم تعتمد على روحها...و زادة باش نخلي مبلغ صغير لاختي رنيم
نور:مريم بنتي فاش قاعدة تحكي ياخي ؟
انا:طاطا نورهان...منحبش لي صار فيا...يتعاود في بنتي...الفلوس هذوما كان جاوني قبل توا...أكيد كنت باش نستغلهم و نعيش مع بنتي وحدنا...اما توا معادش يفيد...و في حالة ما صار شي...أكيد باش نهز بنتي و الفلوس هذوما و نمشي من هوني
نور:نحي الافكار هذوما من مخك...نعرفك اقوى من هكا
انا:باش تعاوني طاطا نورهان
بقيت نغزرلها...هزتلي براسها ايه...حطيت يدي على يدها كبست عليها نحكي
انا:ما نحب حتى حد يعرف بالحكاية هاذي...لا وائل...و حتى حسام زادة
نور:باهي عزيزتي طمن...اول ما نرجع...نحضرلك كلشي
انا:باش طول ياخي ؟
نور:لا حكاية اسبوع و لا اسبوعين
انا:كان تحضرها توا تاخو وقت
نور:لا اما نحبك تخمم مرة اخرى
جيت باش نحكي قص علينا صوت الباب...وقفت اول ما سمعت صوتو مع البون...يحكي
حسام:مريم وينها ؟
انا:ح...حسام
نور:اهدا عزيزتي
انا:ك..كيفاش عرف لانا هوني...طاطا امانك من غير ما يعرف علاه انا هوني
نور:اكيد...اهدا تو نحكي معاه انا
نزلت هزيت العقد و الشاك معاه حطيتهم في صاكي حسيت بوجيعة خفيفة في كرشي...هد علينا في لحظة من غير ما يستأذن حتى...جات عيني في عينو...دم جمد في عروقي...من غزرتو عرفتو ناوي على فضيحة و مش باش يعدي لي صار...و الاهم كيفاش عرف لانا هوني...تلفت شوية نغزر لوائل لي دخل من الجنينة يغزرلنا مستغرب...جيت باش نحكي قص عليا هو
حسام:جيت باش ناخو مرتي كان معندكمش مانع
نور:تفضل سي حسام
حسام:لا ميسالش...لازمنا نمشيو
قرب مني شدني من زندي و كبس عليا...غزرلي ندرا كيف...و كمل يحكي
حسام:مش هكا عزيزتي
هزيتلو براسي ايه...منحبوش يتنرفز اكثر من هكا جبدني معاه...غزرتلها...نأكدلها في كلامي متاع قبيل جبدت يدي منو بالوقت...و قربت منها نحكي
انا:مرسي برشا طاطا نورهان
نور:من غير مزية يا روحي
وائل:اهدا سي حسام...مفماش علاه تعصب لهدرجة
حسيتو يستفز فيه بكلامو...قربت منو شديتو من يدو قبل ما يحكي كلمة...تبسم على جنب يحكي
حسام:في رايي مزلت صغير برشا عالامور هذوما
نور:وائل
كبس على يدي اكثر...و غزر لطاطا نورهان...يحكي
حسام:متشرفين مدام
نور:عيشك
حسام:هيا عزيزتي
خرجت معاه...و قلبي باش يخرج من بقعتو...نعرف مش باش يعدي لي صار...اول ما تسكر الباب...جبدت يدي منو نحكي
انا:سييبني
حسام:امشي قدامي...احسنلك
انا:و الا شنية تعمل ؟
حسام:هوكا لباش نعملو
قرب مني...جبدني من يدي...يجر فيا معاه للكرهبة محبيتش نعافرو اكثر...خاصة و احنا مزلنا في دارهم حل الباب...و ركبني يحكي
حسام:ترص هوني...احسن ما نباصي عليك
قحرلي و نطر الباب...سكرو بالقاوي...و خلط عليا...خدم الكرهبة و طار بيها...يسوق و يصيح
حسام:طحاااان انا...في بالك طرطور معرسة بيه...باش تركب معاه...تكلللللم جاوبني
انا:م..متصيحش عليا
حسام:بربي...تحبني نفرح بيك...ياخي نورمال في مخك انتي...متحبش نزيد نشجعك زادة...و لا نخلي صاحبك القديم يوصلك مرة على مرة
تلفت عندو قحرتلو...خذيت نفس بالسيف...نحكي
انا:وائل...مكانش صاحبي...يززي عاد...حبيت نقابل طاطا نورهان كهو الحكاية
حسام:مزالت تحل في ¤¤¤¤¤ فمها...مزال تحب تجهلني و تكفرني...شتعمل بيها نورهان انتي...من امتى تمشي لعندها ؟ ياخيي تحب تهبلني في هالعشية الكلبة جاااااوبني...حل فمك ترااه ؟
انا:حياتي الخاصة متهمكش...معادش تتصرف معايا بالطريقة هاذي...و تلحق عليا من بلاصة لبلاصة...كيما انا مانيش نحاسب فيك...انت اعمل نفس شي
حسام:والله...و على شنية باش تحاسبني بربي...تكلم عاااد...مدامك تحب تحاسبني
انا:قتلك لي اخر همي نحاسبك انت
حسام:باااهي...يمشي في بالك باش نعديلك لي عملتو ياخي نورمال تركب مع ¤¤¤¤¤¤ هذاكا...تحبني نستجرم فيك باش تبرد
انا:هذاكا لي مزال معملتوش انت
حسام:سكررر ¤¤¤¤¤ فمك توا...اسكت...منسمعش صوتك احسنلك...متركبهاليش اكثر...هاني لتوا محسوب ما عملت شي...ترحم عاللي في كرشك
انا:و الا شنية كنت باش تعملو...باش تضربني ؟ و تقتلني ؟ ساعة هذا لي شادك لتوا...خاطرني بروحين خفت عاللي في كرشي ؟
ضرب يدو عالفولون اكثر من مرة...حسيتو هبل و معادش فيه...غزرلي يحكي
حسام:اناااا الغالط...نستهل...نستهل هذا الكل....مشى في بالي كي ترجع تقرا تتفرهد على روحك...اما لاااا...فيسع ما حنيت للماضي...انا لي رخفتلك...ساعة معرسة بطحااان...باش تركب معاه انتي...تتسبب بأمو باش تبقى معاه...اما مش عليا يا مرريم...ساااقك معادش تحطها في لفاك...هذيييكاااا تسمممع فياااا ؟
حطيت يدي على كرشي...شي من الوجيعة لي حسيتها و شي من نفس لي حسيتو تقص جملة...طلعت راسي نغزر للكميونة لي باش تدخل فينا...اصلا معادش مركز في ثنية...من الغش لهو فيه...خرج صوتي بالسيف نحكي
انا:ح...حساااام...رد بالك
تلفت مصدوم...و دور الكرهبة بالوقت...سلك منها بشعرة و كبس عالفيتاس اكثر...كبست على كرشي نحكي
انا:حسسااام اقف...باش تقتلنا راك
حسام:هذا احسن حل لينا زوز
انا:حبسها...براس امك...حبس الكرهبة...م...معادش نجم اكثر
حطيت يدي على صدري...نحس في قلبي باش يخرج من بقعتو...دوخة قوية سيطرت عليا...حسيت بيه كي شد الفران بالقاوي...يحكي
حسام:م..مريم
مديت يدي بالسيف...حليت الباب و نزلت...قعدت عالارض...نحاول ناخو نفس اما شي...خلط عليا مصدوم يفركس عالفونتولين متاعي...دوب نجمت نركز معاه نزل عندي...كبس على راسي من تالي...و حطها في فمي يحكي
حسام:حاول تاخو نفس...هيا عزيزتي
هزيت يدي بالسيف...حطيتها على يدو...خذيت نفس منها...حسيت روحي تفرهدت شوية...غزرلي يحكي
حسام:لباس توا ؟
هزيت راسي غزرتلو...حطيت يدي على صدرو...دزيتو شوية بالسيف...نحكي
انا:ا..أبعد عليا...ابعدني
حسام:مرريم
تنهدت بالقاوي...و هزيت يديا زوز...ندز فيه بالقاوي نحكي
انا:علاااه هكا...علاااه...ابعدني...ابببعد...متمسنيش
كبس على يديا زوز...و جبدني عندو...حضني بالقاوي يحكي
حسام:ششش يززي...اهدا...منقصدش لي صار...يززي
انا:س..سيبني...ابعدني حسام...أخرج من حياتي...تعبت والله تعبت أنا...حس بيا مرة وحدة أمانك
كبس عليا اكثر...باسني من راسي...و عدا يدو على شعري يحكي
حسام:وفاات...منقصدش لي صار...هيا معايا توا
انا:منحبش...ابعدني
حسام:تحبنا نقعدو في نص الطريق هكا
انا:قتلك معادش دخل روحك فيا
حسام:هيا برك...هيا صغرونتي
كبس عليا اكثر...وقفني معاه...قعدت عالكرسي...هز دبوزة الما حطها في يدي...شديتها عليها...و دورت وجهي...سكر الباب و خلط عليا...يحكي
حسام:لباس توا ؟
انا:نحب نمشي لدار
هزلي براسو ايه...خذيت رشفة ما...و حطيت يديا زوز على كرشي...ضيق عينيه يحكي
حسام:مريم شبيك ؟
انا:ش..شي لباس عليا
تكيت راسي لتالي...و دورت وجهي...منحبش نغزرلو بعد الفجعة لي كليتها جرايرو..منعرفش كيفاش هزني نوم ورقدت...حليت عينيا على صوابعو لي يعدي فيهم على خدي بالسياسة...هزيت روحي شوية مروهجة...لتوا تاعبة من اللي صار...و زادة بنتي من الصباح مركحتش في كرشي...غزرت لدار و عاودت غزرتلو...مستغربة..اكثر من ست شهور مجيتش لهوني...و حتى هو معادش جبد سيرة دار هاذي بعد ما عرسنا...و زادة علاه هو هوني...و صحبتو لي عايشة معاه...زعمة بعد اللي صار قبيل...خذا قرارو فيسع...باش يخليني نقابلها...زعمة بالرسمي باش يخرجني من حياتو...و برا كان صار هذا الكل...شبيني خفت لهدرجة...مش هذا لي نحب عليه...عالأقل حد فينا يخرج من الدوامة هاذي...أما فرد وقت قلبي يقولي متخسرش كلشي في لحظة..خمم في بنتك زادة..كبست على كرشي نحكي
أنا:ع..علاه جينا لهوني ؟
حسام:فما برشا أمور...لازمنا نحكيو فيها
أنا:مش لازم هوني...نرجعو لدار...نحكيو غديكا و لا هوني في الكرهبة أحسن
حسام:شبيك خايفة ؟
أنا:مانيش خايفة...أما مفماش داعي باش نقعدو هوني
حسام:هيا أنزل
أنا:قتلك لا
حسام:صدقني هوني ترتاح أكثر...هيا معايا
أنا:منحبش
نزل و قرب مني حل الباب...شدني من يدي...نزلت بالسيف عليا...نمد في الخطوة...بطلوع روح...كبست على يدي...اول ما حل الباب...تذكرت كل لحظة عشتها معاه هوني...كلامو...وعودو...آخر مرة حضنتو و أنا فرحانة...أما كلشي تبدل أول ما حطيت ساقي برا دار هاذي...كلشي كان حقيقة هوني...كان أكبر كذبة برا عديت عينيا على كل تركينة...فرد وقت نستخايل فيهم مع بعض هوني...في الوقت لانا كنت نتحصر على روحي...فقت من سرحتي على صوتو يحكي
حسام:لباس ماهو ؟
هزيتلو براسي إيه...و دخلت...و برشا اسئلة تتعاود في مخي...متأكدة لهي كانت هوني...اما علاه مشات...علاه خلاها مرة اخرى...زعمة لي كانت عايشة معاه هوني مش صحبتو لولا...و لا هي خلاتو مرة أخرى...على هذاكا تبدل معايا مرة أخرى...و معادش يبعد كيما قبل قرب مني يحكي
حسام:إيجا تقعد
أنا:نحب نغسل وجهي
حسام:باهي...هاني باش نطلب عشا و نخلط عليك
انا:باهي
عطيتو بظهري...و طلعت الدروج بالسيف...قربت من بيتو...حليتها...هوني كانت اول مرة رقدت في حضنو من غير ما نخمم في حتى شي آخر...خذيت نفس بالسيف...و دخلت لبيت البانو...حليت السبالة...باش نغسل وجهي...جات عيني عالمشطة...لي محطوطة عالرخامة...هزيتها في يدي...بدني رعش بالوقت..للحظة كنت باش ننسى لي كانت فما وحدة غيري هوني...و في بيتو زادة...بقيت نثبت في شعرها الاصفر...لي لاصق في المشطة...حطيتها من يدي...و غزرت لروحي في المرايا...دمعة هربت مني بالوقت...منعرفش شنية لي حسيتو بالظبط...برغم اني كنت نعرف هذا الكل من قبل...اما توا لي حسيتو كان اقوى ببرشا...عديت يدي على خدي...و خرجت حتى من غير ما نسكر سبالة ورايا...حبست في نص البيت...جات عيني على التابل دونوي...تبسمت على جنب و انا نغزر...للبرفان متاعها عديت عينيا عالسرير...قلبي خض بالقاوي...مش صعيب نعرف لي صار داخل البيت هاذي...و على سرير هذا بالظبط...طلع عايش حياتو بالطول و العرض...و مع المرا لي يحبها زادة و هذا واضح...باهي انا علاه جابني هوني...شنعمل في دارو و في بيتهم...و مدام عندو حياتو هوني...علاه بعدني على عيلتي...علاه خدعني...و خلاني نصدقو...علاه عمل فيا هذا الكل...علاه اختارني انا بالظبط...قد الكره لي نحس فيه توا...قد كمية الغيرة و الحب لي داخلي...قد ما نقول كرهتو ومعادش يهمني نعرف لقاعدة نكذب على روحي...نعرف لأنا مزلت نحبو و نغير عليه...قلبي محروق من داخل...الدار هاذي كانت باش تولي متاعي..كان عندي الحق فيها أكثر منها كلشي عاشتو هوني هي...كان من حقي انا و كهو...هو لاختار الثنية هاذي...هو لي تعمد يجرحني و يستغلني باش يرجعها ليه و نجح...نجح في كلشي كان مخططلو من الأول...كمية القهر و الوجيعة لي عشتها معاه..و اللي حسيتها توا...منجمش ننساها...و منجمش نسامحو عليها نعرف لمستحيل...يكون فما شي اسمو حسام و مريم...و توا بالظبط...حسيت بخوف غريب على بنتي...خفت نخليها في نص الثنية...و معاد يتلفتلها حد...خاصة هو خفت تلومني على الكل يكرهني و باش تظطر تعاني من نفس الشي جرايري..غمضت عينيا بالقاوي و عاودت حليتهم...كلشي نحب عليه اني نخرج من هوني و كهو و ننسى كلشي ريتو و حسيتو هوني.