زهرة🌸

الحلقة الخامسة و الخمسون

🔸️حلقة 55
🔸️حسام يحكي:
حليت عينيا مروهج...نحس في راسي باش يطرشق دورت عينيا...نثبت في الدار...منعرفش كيفاش وصلت لهوني...هزيت روحي بالسيف تقعدت...عديت يدي على وجهي...و نفخت بالقاوي...دوب تذكرت لي صار...تكيت راسي لتالي نحكي
انا:اااه يا مريم شعملت فيا ؟
هزيت روحي...نمد في الخطوة بالسيف...طلعت لبيتي عملت دوش...تفرهدت بيه...و نجمت نصحصح...بدلت دبشي...و نزلت للكوجينة...نسمع في تليفوني ينوقز رجعت لصالة...هزيت عليه نحكي
أنا:كنت تحلم بيا ياخي ؟
عمر:حتى أنا ليلة كاملة مرقدتش على خاطرك
أنا:حتى أنا قلت اكاكا
عمر:هوكا وصيتهم صباح...يبعثولك كرهبة من سوسيتي ميجيش حسام الماجري...يتمرمد في طاكسيات
انا:صحيتك عشيري الغالي...على أساس عملت فيا مزية...مش انت لي خليتني من غير كرهبة
عمر:و مش أنا لي قتلك اسكر...لين تنسى إسمك
انا:من غير ما نحكيو في الموضوع...وقيت باش نتعدا لدار...و نخلط عليك للخدمة مبعد
عمر:باهي...سلام
أنا:عيشك صاحبي
علقت عليه...شربت قهوتي و خرجت...وصلت الكرهبة بالوقت...شديت المفاتح عليه...عطيتو حقو باش يرجع و قصدت ربي لدار...مزال بكري شوية الخدمة...اول ما وصلت...لقيت محمد باش يدخل...ظاهر فيه كان يجري دخلت وراه...وقفت امي في وجهي...تحكي
أمي:وين كنت ؟
محمد:فتحية من غير ما تحاول تغطي لي قاعد يصير خاطر بعد نص ساعة...تقعدو فرد طاولة كأنو ما صار شي
أمي:محمد يزي عيش ولدي
أنا:هذاكا لي باش يصير...و مانيش ناقص أسئلة...خليني نطلع لبيتي احسن
خليتهم واقفين...و طلعت...منحبش نحكي معاه أكثر على خاطر أمي...تقريب أربع سنين ما تبدل فيهم شي حليت الباب و دخلت...ضيقت عينيا كي مريتهاش في البيت...كنت باش نخرج...اما حبست على صوت تليفونها ينوقز...قربت من تابل دونوي...هزيتو في يدي الدم جمد في عروقي...و أنا نقرا في إسمو...منعرفش علاه يطلب فيها...طلعت راسي على صوت الباب...عينيا ترشقو فيها...في المنشفة لي لافتها على بدنها الصغرون شعرها لي مزال يقطر على بدنها...كنت باش نحكي اما ساعتها الكلام وحل في حلقي...اخر شي توقعتو تخرجلي هكا...روهجتني الفرخة...رغم إني ملكتها...رغم إني ريت كلشي فيها...و خذيت كلشي منها...اما لتوا ما عشت معاها شي...أكا ليلة عطاتني كلشي...و خذات مني كلشي زادة...مزلت نحبها...مزلت كي نقرب منها ندخل بعضي...مزلت شاهيها لتوا..دقايق دخلوني بعضي و نساوني في اللي كنت باش نعملو...فيقني من سرحتي صوت تليفونها...لي نوقز في يدي مرة أخرى خذيت نفس...هزيتها و حطيتها...هزت يدها كبست على المنشفة و قربت شوية مني تحكي
مريم:فاش يعمل تليفوني عندك ؟
أنا:إنتي لي باش جاوبني
مريم:على شنوة ؟
رميت التليفون عالارض...وخرت خطوة لتالي...و طلعت راسها...غزرتلي بحقد...أصلا أول مرة تغزرلي بالطريقة هاذي...حتى قبل عرسنا...عمري لا ريتها الغزرة هاذي فيها...كان بعد لي صار بينا اخر مرة...قحرتلها نحكي
أنا:سي وائل لالة
مريم:و أنت شمدخلك فيه وائل ؟
منعرفش على روحي...كيفاش وصلت ليها...شديتها من زندها...كبست عليها و جبدتها عندي نحكي
انا:¤¤¤¤¤¤ عليا...شنية حكاية ساقط هذا...من إمتى تكلم فيه ؟
مريم:مكلمتوش...و مهزيتش عليه...سيبني توا
أنا:اغزرلي هوني...والله كان نعرف لإنتي مزلت تكلمو..ما تلوم كان روحك
مريم:سيبني...يدي توجع فيا
كبست عليها اكثر...غمضت عينيها بالوقت...غزرت لكل تفصيل في وجها...خذيت نفس...نشد في روحي عليها نعرف لي نخمم فيه مستحيل يصير...حلت عينيها قحرتلي...فرد وقت تحاول تجبد في روحها...جبدتها عندي اكثر...نزلت عليها شوية...نحكي
أنا:متخدمش مخك معايا...احسنلك...والله ندمرك يا مريم
طلعت راسها...غزرتلي ندرا كيف...كبست عالمنشفة بيدها...تحكي
مريم:كون عبد لخمس دقايق برك...و تصرف كيما الناس الكل...كان جا عيني في وائل...مانيش واقفة قدامك توا و مدامو يكلم فيا توا...معناها ميعرفش..وين انا واحلة و بشكون عرست
انا:صااار...و امتى ناوية تخبرو ان شاء الله ؟
مريم:والله توا مفماش داعي حد يعرف بالمسخرة هاذي
أنا:وين تحب توصل ؟
مريم:ما عندي وين نوصل...معادش يهم هذا الكل طريقنا من توا واضحة...على هذاكا من غير ما تعمل فيها حزار و تغير على مرتك...يزي عاد
أنا:صحيح لي تقول فيه...اما مدامك مرتي و على اسمي مجبورة باش تعيش كيما نحب انا...و تتصرف كيما نحب انا...حتى تتنفس كي نقلك أنا
مريم:معناها تطلب مني نموت و أنا حية
أنا:بالظبط...مكانش باش يكون عندي تصرف اخر معاك
مريم:شنية مزلت تحب مني انت ؟
أنا:انتي شنية لي تحب عليه من وائل ؟
مريم:ما نحب حتى شي...و توا سيبني...توجع فيا
أنا:مزال باش ترا اكثر من هكا
مريم:اعمل لي تحب عليه...و يا ريت معادش تاقف قدامي و تحاسبني مرة اخرى
رخفت يدي عليها...جبدت روحها شوية...كابسة على المنشفة بيدها...باقي تغزرلي بنفس الطريقة...عديت يدي على وجهي نحكي
انا:شنية تستخايل في روحك إنتي ؟
مريم:شقصدك ؟
انا:نسمع فيك
مريم:شنننوة ؟
انا:حلللل فمك و جاوبني شيحب منك...فاش قام يكلم فيك
مريم:منننعرفش...ياخي
انا:اسكككت...سككككر فمك...انتي باش تسمعني توا..من يوم مفماش تليفون...و ماكش باش تخرج من الدار...و لا تقابل حد...من غير ما نعرف
مريم:فاش تحكي انت ؟
أنا:قتلك اسسسسكت...متحلش...فمك حتى نقلك
منعرفش كيفاش هديت عليها...فقدت أعصابي الكل هزيت يدي...ضربتها لراسها...و كملت كلامي نحكي
انا:حتى متخممش...تسممممع فياااااا ¤¤¤¤¤¤ متخممممش...انا لي باش نخمم في بلاصتك بعد توا مكانش باش نقتلك...والله نقتلك...و نباصي عليك
مريم:أنت واحد مريض..مستحيل تكون إنسان مستحيل و مش أنت لي توريني حدودي...نعرفها بالقدا فهمتني و نعمل لي نحب عليه...و مانيش مظطرة نسمع كلمة منك
هزيت يدي كبست على وجها...كل كلمة تقولها...تعصبني بيها أكثر...فكرة لهو باش يرجع لحياتها...خلاتني ندخل في سينة أخرى...و منعرفش شنوة لي قاعد نعمل فيه كبست عليها اكثر...نحكي
أنا:مجبورة على هذا الكل
مريم:ك..كيفاش باش تجبرني ؟
انا:عللللى خااااطر تحمممل إسمي
غرست صوابعي فيها...و دزيتها عالسرير...و نزلت عليها نحكي
انا:على خاطرك مرااا معرسة تواااا....مجبورة باش تحترمني...سمممعتني....مجبوووورة على هذا الكل
عدات عينيها على وجهي و تركزت في عينيا...مفهمتش شنية لي تحب توصلني ليه...بغزرتها هاذي...رخفت يدي شوية...نغزرلها...نفسها طالع نازل تحتي...باقي نحاول نستوعب لي عملتو فيها...و الطريقة لي تصرفت بيها توا خوفها لي مخلط بحقد و غل...بان على وجها...هزت يدها تغطي في روحها...بقيت نغزرلها و كهو...شي أقوى مني خلاني منجمش نقوم من فوقها...فقت من سرحتي على صوتها تحكي
مريم:طلقني
كلمتها باقي تتعاود في وذني...آخر شي توقعت نسمعو توا...تحلم كان نخليها تمشي من هوني..مستحيل نخليها تكون لحد آخر...هي لإختارت الثنية هاذي...و مجبورة تكمل فيها...و النار لي حرقتني بيها...باش تتحرق بيها هي زادة...تبسمت نحكي
أنا:تبدل دبشك...و تنزل للفطور...كأنو شي ما صار و كان تحل فمك بكلمة أخرى...ما تلوم كان روحك
مريم:أقل حاجة تعملها...أنك تضربني و لا تقتلني...و زوز ميخوفونيش...و تصرفاتك هاذي...ماهيش باش تهدني و لا حتى تخوفني
أنا:و أنا أكثر حاجة نعشقها فيك قوتك هاذي...أما خليني نخبرك بشي إنتي متعرفوش...كان إنتي عملت خطوة عكس أنا لي باش نقولو...بوك باش ينسى خدمتو
مريم:بابا مستحيل مزال يرجع يخدم عندك
أنا:يخدم عندي و لا عند أي حد غيري...تعرف شنية نجم نعملو...بخلاف ليسي لي تقرا فيها أختك
مريم:شمدخل رنيم ؟
انا:حياتهم مربوطة بيدك توا...كان تحبهم زوز يكونو بخير...تعيش هوني بالطريقة لأنا نقلك عليها
مريم:تعرف شنية...كل يوم قاعدة نكره فيك أكثر لدرجة معادش فما حتى شي باهي ليك في قلبي...حتى وليت نتقزز من قربك ليا زادة
أنا:في يدك عشر دقايق...تحضر روحك...و تخلط علينا
نزلت عليها أكثر...دورت وجها بالوقت...بستها من راسها نحكي
أنا:مطولش عاد...عيش حبي
كبست عالمنشفة اكثر...و غمضت عينيها...جبدت روحي منها...عدلت الفاست متاعي...و خرجت من البيت..نطرت الباب ورايا...و عديت يدي على وجهي...تنهدت بالقاوي معادش نعرف روحي شكون انا...لي نعرفو اني نحبها نعشقها و نموت عليها...اما كلشي ضدنا...يمكن كنت نفضل نعيش في الكذبة متاعها حياتي الكل و لا العذاب هذا...لي قاعد يقتل فيا بالعرق...لي يجبرني نأذيها بالسيف عليا...تنهدت بالقاوي...كبست روحي...و نزلت اللوطة...لقيت امي طالعة...غزرتلي تحكي
أمي:شفمااا...شبي صواتكم طالعة ؟
أنا:مفما شي
أمي:حساااام...شعملت لطفلة...ياخي ناوي تجلطني..شهر واحد و قاعد تتصرف هكا...يمشيش في بالك باش تتحملك ديما
أنا:باش تتحمل...مدامها تحب تعيش هوني باش تتحمل
أمي:أبعد خليني نطلع عندها
أنا:حد ماهو باش يطلع عندها
أمي:نعيمة برا ناديلها
أنا:قلللللت حتى حد...وقت الفطور...معناها كل حد يشد بلاصتو...و تو تنزل وحدها
أمي:حسام
أنا:يززززززي...مانيش باش نعاود كلامي مرة اخرى
قحرتلي و سبقتني لطاولة...شوية و خلط محمد..طلعت راسي نستنى فيها تنزل...كبست عالشوكة في يدي
نهدي في روحي فرد وقت...ارتحت كان كي لقيتها هابطة...قربت منا تحكي
مريم:صباح الخير
أمي:صباح النور بنيتي...لباس ماهو ؟
مريم:لباس خالتي عيشك
جبدت الكرسي و قعدت بحذا محمد...طلعت راسي غزرتلها...منعرفش علاه قعدت غديكا...محبيتش نكبش في الحكاية أكثر...قحرتلها و نزلت راسي لصحن...نحس في روحي باش نطرشق...معادش نعرف وين باش نوصلو لي قاعد يصير...حتى كل مرة نحاول نسألها علاه حكات مع اختها اكاكا...البرود متاعها يخليني نتراجع...الحكاية لي محاولتش تفهمها...خلاتني نشك في لي قاعد يصير اكثر...خلاتني نعيش اكبر تناقض في حياتي...لتوا منجمتش نتقبل انو لي قاعد يصير لعبة و انو هي تنجم تعمل اكاكا...و توا خرجلي اكا ساقط مرة اخرى...مزال اعترافو ليها يدور في مخي...و من غير شي هوما عطلة...معناها مفما حتى سبب يخليه يكلمها لا و تزيد تقولي ميعرفش بالعرس...منعرفش كيفاش نجمت تقولي اكاكا...و زيد برودة دمها تحرقني...خاصة كي تتصرف كأنو مفما شي...و انو الحكاية مش مقلقتها اصلا مستحيل نفكر نقرب من بوها و لا اختها...ركحتها من بعيد و خليتهم يقبلوه في سوسيتي اخرى...عملت اكاكا جيست...باش متعاودش تحل الحكاية خاصة توا خاطر مهما صار...مستحيل نطلقها...مستحيل نخليها توصل للي تحب عليه
🔸️مريم تحكي:
دورت وجهي عليه....منحبش نغزرلو...لتوا نحس بكبست يدو على زندي و خدي...معادش نعرف شنوة لي قاعد يصير بالظبط...و لا شكون الوحش لي عرست بيه...و خليت كلشي على خاطرو...حاسة روحي في حلمة..شهر تعدا عليا كأنو عام...شهر دوب نراه و لا يجي...حتى ساعات يعدي ليلة برا...معادش نعرف شنوة لي نحب عليه انا بالظبط...من شيرة نحس لانا كرهتو و معادش حتى نجم نغزرلو...اما من شيرة اخرى...نلقى روحي نتحير عليه...و نحاول نفهم تناقض متاعو زادة...اما وسط هذا الكل...مستحيل نخليه يهدني...مستحيل يرا دموعي...مستحيل نخليه يوصل للي يحب عليه..طلعت راسي...غزرتلو...عديت عينيا على ملامحو بزربة...رجع حسام لي نعرفو...بلا تنرفيزو و صياحو...و البرود متاعو تنهدت بالقاوي...و نزلت راسي لصحن...عوجت فمي منعرفش شبيها خالتي نعيمة...دورت راسي نغزر لل plat متاع محمد...و رجعت غزرتلو...يفطر...كأنو مش معانا جملة...مديت ساقي...ضربت ساقو تحت الطاولة غزرلي بالوقت...ضيق عينيه مستغرب...قربتلو شوية نحكي بيني و بينو
أنا:دالي
محمد:مممم
أنا:نحب على ال plat متاعك
محمد:شننننوة ؟
طلعت راسي...لقيتو يغزرلنا...يحاول يفهم لي قاعد يصير...رجعت تلفت لمحمد...نحكي
أنا:باش تعطيهولي و لا لا
محمد:مريم شبيك ياخي...هوكا نفس لي عندك
أنا:بدلي ملا...أمانك والله منعرفش شصارلي...شاهيتو عاللخر
محمد:باهي هات صحنك
تبسمت بالوقت...هزيت الصحن حطيتو في يدو...و شديت عليه الصحن متاعو...حطيتو قدامي...غزرولي باهتين...نسمع في خالتي فتحية تحكي
فتحية:لباس عزيزتي ؟
هزيتلها براسي ايه...للحظة نسيت غشي...و غطست فيه نحس في روحي جيعانة عاللخر...و منعرفش علاه صحنو فيه طعم سبيسيال...هزيت يدي...رجعت شعري لتالي...باقي يغزرلي من غير حتى كلمة...محاولتش نثبت فيه...هز مفاتحو و تليفونو و خرج...تلفت لمحمد نحكي
انا:مرسسي برشا...و سامحني كان قلقتك
محمد:ميسالش...حتى أنا ربحت صحن اخر
تبسمتلو بالوقت...و كملت فطوري...هز روحو يحكي
محمد:صحة ليكم
أنا:عيشك
فتحية:عيش ولدي
أول ما خرج...حطت يدها على يدي...غزرتلها بالوقت غزرتلي ندرا كيف تحكي
فتحية:تحب تحكيلي ؟
انا:كيما شنوة ؟
فتحية:حسام يعامل فيك بالخايب
انا:لاا...جيست تغشش مني قبيل و كهو
فتحية:مريم...نعرف ولدي بالقدا...و تصرفاتو هاذي معاناها فما زوز حاجات...إما فما حكاية هو متأكد منها و ضراتو برشا...و الثانية...يكون فاهم الحكاية نفسها بالغالط...و قاعد يستنى في توضيح منك
انا:خالتي فتحية...صدقني مفما حتى شي...و مدامو يتصرف بالطريقة هاذي...معناها مقتنع باللي يعمل فيه على هذاكا منحبكش تتقلق منها الحكاية...و تعب روحك على خاطرنا...يعني مرة متفاهمين و مرة متعاركين...اما اكيد مناش باش نسلمو في بعضنا...باهي
فتحية:محلاك عزيزتي...و محلا طبيعتك...كان صار و حسام خسر وردة كيفك...ماهوش باش يلقاها مرة اخرى
انا:عيشك خالتي
عدات يدها على خدي...و تبسمتلي بالوقت...تحكي
فتحية:كان تحب حاجة...تو نوصي نعيمة تحضرهالك
انا:بالرسمي
فتحية:أكيد
انا:يا ريت تحضرلنا كيك شكولاطة...زعمة باش تحضرو
فتحية:علاه حتى متحضروش...تو نوصيها عليه من توا...و كان تحب شي آخر تنجم تخبرها
انا:هيا باهي...انا باش نطلع نكلم زهرة...على أساس باش تجي اليوم
فتحية:باهي عزيزتي
هزيت روحي...طلعت للبيت...نفس تسكر عليا...وقت تذكرت لي صار قبيل...هزيت تليفوني من الارض شعلتو من الغزول قبيل بدلت دبشي و خلطت عليه...لقيت زهرة طلبتني مرتين...بعثتلها ميساج...و حطيتو في شارجور...قربت من المرايا...غزرت لروحي...ياسر ضعفت على اخر مرة جيت فيها لهوني...كل يوم نكره روحي بعد اكا ليلة...كل يوم نتذكر الكلام...لي كان يقولو أول ما عرفتو...و كل ليلة نخمم في السبب لي وصلنا لهوني و في حياتي كيفاش تكون مبعد....اخر شي توقعتو منو انو يوصل يهددني ببابا و رنيم...مهما عملت...نعرف لمزالت صغيرة...و انا لي بعدتها عليا برشا...حتى بابا توا وين حسيت بيه...حسيت لي انا بالرسمي غلطت في حقو...ياسر افكار دخلتني بعضي...و خلاقي دارت حطيت يدي على فمي...و زربت لبيت البانو...رجعت لي كليتو الكل...غسلت وجهي...و خرجت...قعدت على طرف سرير...و تكيت لتالي...نرد في نفس...لين حسيت روحي تفرهدت...تغميت اكثر في البيت...هزيت روحي و نزلت اللوطة...خرجت للجنينة...لقيتو قاعد غديكا غاطس في الورق...تبسمت و قربت منو...نحكي
انا:نجم نقعد
محمد:مممم
جبدت الكرسي...و قعدت بحذاه...نغزر للبيسي...و نحكي
انا:قاعد تحضر لتخرج متاعك
محمد:بالظبط
انا:مش كأنك روطار شوية ؟
محمد:تقريب أربع سنين
انا:علاه ستنيت الوقت هذا الكل ؟
محمد:ظروف
انا:كيما شنية ؟
محمد:برشا حاجات...يعني مكاش باش تفرح برشا كان تسمعهم
انا:نحب نسمعهم
محمد:و انا منحبش نحكي فيهم
انا:باهي على راحتك...ملا خليني نقوم احسن
محمد:والله انتي قعدت و كملت...كمل مزيتك
انا:ممممم بشنوة نجم نعاونك ؟
محمد:منعرفش...اعمل لي يظهرلك
انا:خليني نجيب حاجة نشربوها قبل
محمد:ماكش باش تاخو كاستي زادة
انا:هههههههه لا متخافش...تو نختار الكاس في الكوجينة
محمد:هيا باهي...نستنى فيك
انا:باهي
تبسمتلو و هزيت روحي...منعرفش علاه نحسو كانو مش من العيلة جملة...اصلا كانو عايش وحدو هوني اما ديما حاضر في المشاكل...تبسمت عاللي نفكر فيه...اهم شي لازم نعملو توا...انو نعيش حياتي كأنو مش موجود فيها...كيما قبل بالظبط...و كيما خسرت عيلتي...انا ربحت عيلة اخرى...و اكيد باش يجي نهار و بابا يسامحني على كلشي...كلشي باش يتصلح و يرجع كيما الاول...اكيد باش يوفا الكابوس هذا...و باش نعيش الحياة لي نحب عليها انا و كهو