زهرة🌸

الحلقة مئة و السادسة عشر

حلقة 116
كريم يحكي:
هزيت راسي شوية من الفولون...ليلة كاملة عديتها في الكرهبة...نحس في روحي مقيد من الجهات الكل...فكرة انو هي مخطوفة محبتش تركح في مخي...لتوا مش مستوعب لي صار...شكون عندو مصلحة و شكون لي خطفها منعرفش...حاولت نخلط عالكرهبة اما شي...فقد الاثر متاعها في نص الثنية...عديت يدي على شعري نستنى في تليفون من اي حد...من البوليسية لي عطيتهم خبر...من معارفي لي وصيتهم واحد واحد...اما ما تلقيت حتى خبر منهم...خممت اني نمشي لدارهم...اما منعرفش كيفاش نواجهم...و لا بشنية نخبرهم...احتمال كان عرفت عليها اكثر...كان دخلت في حياتها اكثر...راني عرفت تفاصيلها و اسرارها و مكانتش باش تضيع مني بالطريقة هاذي...لتوا نشم في ريحتها البنينة...لتوا نحس ببدنها بين يديا...رغم انهم دقايق...اما خلاوني نحس بحاجة بنينة منعرفهاش قبل...حاجة استفقدتها حياتي الكل...رغم لي عشتو...لتوا منعرفش شنية الحاجة هاذي لي شدتني ليها...و لي خلاتني نتعلق بيها اكثر...ريت لي كيفها و لي احلى منها...اما هي بالظبط...فما حاجة سبيسيال فيها...تصرفاتها...ضحكتها...ريحتها...عينيها
منجمش نحدد...لي نعرفو انو الطفلة هاذي خلقت فرق كبير في حياتي...لدرجة ولى عندي هدف واضح نجري على خاطرو...رغم متأكد انو فما شكون سبقني...و خلى جرح صعيب انو يتلم...واضح من غزرة عينيها...من سرحتها...الغريبة اكثر...اني وليت نغير من الماضي المجهول متاعها...لي ما نعرف عليه حتى شي...اما وسط هذا الكل مزال عندي امل في فرصة اخيرة...فرصة  انها تكون ليا من غير ما تكون مقيدة بالماضي...و لا تخاف من حتى شي يمكن يعترض طريقها...اصلا معادش نعرف شنية الحالة لي وصلتلها...اما كلشي متاكد منو انو الطفلة هاذي حبيتها من اول مرة...كبست بيديا عالفولون و خدمت الكرهبة...معادش عندي حل آخر من غير مراد...هو الوحيد لي يمكن يوصلني ليها و لا عالاقل يستغل معارفو على خاطري...هزيت تليفون...كلمتو...رد عليا بالوقت...خذيت نفس نحكي
انا:حاجتي بيك اكيد
مراد:لباس ماهو ؟
انا:مانيش لباس...نحب تعاوني
مراد:شفما ؟
انا:طالبة عندي مفقودة
مراد:شيهمك فيها ؟
انا:الطفلة هذيكا تخصني مرااد...لازمني نلقاها في اقرب فرصة
مراد:صااار...شبيني منعرفش الحكاية قبل
انا:مراااد كان ماكش باش تعاوني...تو نتصرف وحدي...متخلينيش نندم خاطرني لجأت ليك
مراد:مدام الطفلة تهمك...اكيد باش نعاونك...شنية اسمها ؟
انا:هند...هند بن قاسم
عديت يدي على وجهي...اصلا من ليلة البارح و انا على اعصابي...و مراد كان آخر حل بالنسبة ليا...خذيت نفس نحكي
انا:تسمع فيا
مراد:من وين تعرفها انت ؟
انا:قتلك تقرا عندي في المعهد
مراد:و شنية علاقتك بيها ؟
انا:قاعدة تستجوب فيا ياخي
مراد:جاوبني كريم
انا:باش تعاوني و لا لا
مراد:نستنى فيك
انا:شقصدك ؟
مراد:ايجا عندي...تو نتصرف بيها انا الحكاية
انا:باهي
علقت عليه و شديت الثنية لدار الزريعة...كبست عالفيتاس اكثر...طريق ساعة حرقتها في ربع ساعة...اللي يهمني اني نوصللها و نتأكد لي هي بخير...اصلا نحس في مخي باش يتحرق من تفكير...اسئلة قاعدة تتعاود في راسي...و كيما عملت منجمتش نجاوب عليها...شكون خطفها و علاش ؟ شنية لي وراها ؟ اصلا حالتها كانت تاعبة اول ما قبلتها...زعمة فما حكاية ورا هذا الكل...لتوا مزلت نسمع في صياحها...لتوا منجمتش ننسى غزرتها...و مزلت ناقم على روحي على خاطر خليتها تخرج من الريستو وحدها و منجمتش نخلط عليها...منعرفش على روحي...كيفاه وصلت...شديت الفران بالقاوي و نزلت...مزلت مستغرب من الرجال لي حطهم برا...اصلا معادش نعرف شنية لي وراه بالظبط...رغم اني تربيت على يدو...اما لتوا مزال غامض بالنسبة ليا...و لتوا منعرفش علاش ديما يخليني بعيد على حياتو الشخصية...لي يخليني انا زادة منجم نحكيلو حتى شي يخصني...يمكن على خاطرني تعلمت اني نعتمد على روحي...في اغلب الاوقات لي كان غايب فيها عليا...خذيت نفس و حليت الباب دخلت...لقيتو قاعد في صالة...هز راسو غزرلي...يحكي
مراد:اقعد
انا:مجيتش باش نقعد
مراد:كريييم قتلك اقعد
طيشت تليفوني عالطاولة و ترميت عالفوتاي مقابلو...اصلا هذا لي يعملو ديما...كلامو ميتعاودش مرتين...هزيت راسي نغزرلو...نحكي
انا:خطفوها قدام عينيا...و منجمت نعمل حتى شي
مراد:فاش كنت تعمل معاها ؟
انا:مش هذا موضوعنا
مراد:جاوبني ؟
انا:تحب تعرف...الطفلة هذيكا اهم ببرشا من اللي تتوقع
مراد:شنية نفهم من كلامك ؟
انا:كلامي ماهوش مهم باش تفهمو
مراد:شنية علاقتك بيها كريم...جاوب قد سؤال
هزيت روحي وقفت...و دورت راسي غزرتلو...نحكي
انا:مجيتش هوني باش نقعد نجاوب على اسئلتك...الطفلة لي مخطوفة تعنيلي برشا...حتى كان ما تربطني معاها حتى علاقة
مراد:ارجع لبلاصتك
انا:يظهرلي جيت للبلاصة الغالطة
نزلت هزيت تليفوني من الطاولة...و تلفت باش نمشي...حبسني يحكي
مراد:لي حاجتك بيه عندي
دورت راسي بالوقت...نغزرلو مستغرب...مصدوم من كلامو التالي...لي عديت دقايق نستوعب فيه...و دوب لقيت صوت نسأل بيه
انا:ش..شقصدك ؟
مراد:اللي سمعتو
انا:هند عندك ؟
مراد:اقعد
انا:مراااد جاااوبني
مراد:اقعععععد
عديت يدي على وجهي بعصب نهدي في روحي...خذيت نفس طويل و عاودت قعدت...كاني قعدت على الشوك...المهم عندي نفهم و نستوعب اللي قاعد يقول فيه...نستوعب اللي قاعد يصير من الاساس...تنهدت بالقاوي نحكي
انا:نسمع فيك
مراد:مظطر جاوبني على كلشي ساعة
هزيتلو براسي ايه...اصلا معادش عندي جهد باش نحكي اكثر...قحرلي يحكي
مراد:فما بيناتكم علاقة شخصية ؟
انا:وين تحب توصل ؟
مراد:لوين هزك مخك بالظبط
انا:اللي في بالك مكانش منو...اصلا معنديش برشا نعرفها الطفلة...و مانيش مظطر نفسرلك علاقتي بيها مراد...هاني انا مندخلش في علاقاتك...تي حتى مرتك منعرفهاش من قبل
مراد:باهي برشا...اهم شي عندي انو عيلة بن قاسم خط احمر...منحبكش تقربلهم و لا تنطق اسمهم على لسانك
انا:نفهم منك...انو
الكلام وحل في حلقي...و منجمتش نكمل لي باش نقولو...فكرة انو هو لي خطف هند و بالطريقة هذيكا روهجتني...قد ما نحسو انو غامض...مستحيل يوصل لدرجة انو يخطف و بالطريقة هذيكا...فقت من سرحتي كي اكدلي لي في مخي...يحكي
مراد:لي فهمتو صحيح...انا خطفتها
هزيت روحي وقفت بالوقت...حسيت الارض لعبت تحتي...منجمتش نصدق الكلام لي قاعد يقول فيه...اصلا شنية مصلحتو من هذا الكل...علاش يخطف طفلة معندوش علاقة ؟ و شنية حكايتو مع عيلة بن قاسم ؟ مخي وقف و منجمتش نخمم اكثر...منجمتش نتوقع لي صاى و لا لي باش يصير...كلشي قاعد يدور ي راسي وينها ؟ و شنية عمل فيها ؟ هزيت راسي على صوتو يحكي
مراد:اقعد
انا:وينها ؟
مراد:كريييم...شد بلاصتك
انا:معاااادش تقوولي اقعد...سألتك وينها ؟ شنيييية عملت فيها ؟
مراد:مظطر تسمعني للاخير...و لا باش يكون عندنا حديث آخر مع بعضنا
انا:باش تعمل فيا كيفها ؟
مراد:كريم شد بلاصتك
نفخت بالقاوي و عاودت قعدت على طرف الفوتاي...نحس في بدني يرقل من العصب و الغش...خذيت نفس نهدي في روحي و نحكي فرد وقت
انا:نسمع فيك ؟
مراد:منعرفش شنية لي بينك و بينها...اما لي متاكد منو انك بعد ما تخرج من الباب هذا...تنساها و تنحيها من مخك جملة
انا:شنية علاقتك بيها ؟
مراد:مانيش مظطر نفسرلك علاقتي بيها كريم
انا:نفس الشي بالنسبة ليك معادش تقولي شنية نعمل...اذا خرجت من الباب هذا...باش نهزها معايا...غير هكا...متستناش مني حاجة اخرى
مراد:و مانيش باش نستنى زادة...انت مجبور تنفذ لي نقول عليه و كهو
انا:في وضع آخر كنت باش نولي مجبور...اما توا معادش عندك سلطة عليا
تبسم على جنب....و هز الدوسي لي بجنبو...حطو عالطاولة قدامي...ضيقت عينيا نحكي
انا:شنية هذا ؟
مراد:املاكك...عقاراتك...حتى خدمتك باش تتحول لامريكا...معناها معادش عندك حتى شي في تونس
انا:شقصدك ؟
مراد:باسبورك و اوراقك في الظرف لي بجنبك...غديكا تنجم تبدا من جديد
انا:خممت في امي قبل ما تعمل هذا الكل ؟
مراد:خمم في روحك ساعة
انا:مانيش باش نسافر...و ماكش باش تجبرني نسافر من هوني مهما صار
مراد:المرة هاذي باش تكون مجبور...مفماش طريقة اخرى نحميك بيها
انا:تحميني من شكون و فاش قاعد تحكي مرااد...نحس في مخي ياش يطرشق...ياخي جبتني هوني باش تهججني انت
مراد:معندكش حل آخر
انا:فما حل...خليني ناخو هند و نخرج مم هوني...و ما حاجتي بحتى شي من فلوسك و لا املاكك...حتى كان تحب تنجم تنحيني من الورثة زادة
مراد:مانيش ناقش فيك...هذا آخر كلام عندي
انا:شنية لي يخليك متأكد اني باش نسافر ؟
مراد:كان تحب هند تكون بخير باش تعمل هكا على خاطرها
بقيت نغزرلو من غير حتى كلمة...الحروف وحلت في لساني...و منجمتش ننطقها...هاذي اول مرة مراد يهددني فيها...رغم اني ولا مرة عصيت اوامرو من قبل...علاش اختارها هي باش يهددني بيها...عديت يديا زوز على وجهي نحكي
انا:شقصدك ؟
مراد:هند باش تكون بخير كان انت عملت لي قتلك عليه
انا:نحب نشوفها
مراد:للاسف نظن لي عديتو معاها ليلة البارح كافي...من غير ما تتعلق اكثر مع العيلة المسخة
انا:مانيش باش نمشي...حتى نعرف علاش قاعد تعمل في هذا الكل ؟
مراد:مش لازم تعرف
انا:نظن من حقي اني نعرف
مراد:طيارتك بعد ساعتين من توا
كبست عالبونية متاعي...غمضت عينيا بالقاوي...و عاودت حليتهم نحكي
انا:شنية عملتلها ؟
مراد:لتوا ما عملت شي...اما بعد اللحظة هاذي القرار في يدك انت
انا:باش تضرني انا بالطريقة هاذي
مراد:بالعكس انا قاعد نبعد فيك خاطرني خايف عليك
انا:و انا خايف عليها هي...خليني نهزها من هوني و نمشي مراااد...يزييك ما تحكمت في حياتي لتوا
مراد:الوقت ماهوش في صالحك كريم...متخلينيش نتصرف انا
هزيت روحي وقفت...هزني و حطني...ووقف في جرتي...خذيت نفس طويل...نحكي
انا:باااهي...لي تحب عليه باش يصير...اما
مراد:شنية ؟
انا:نحبك توعدني...انو مهما كان اللي يربط بينك و بين رنيم...مستحيل تضرها...حتى بكلمة وحدة
بقى يغزرلي من غير حتى كلمة...دقايق تعدات و احنا مواجهين بعضنا...بالنسبة ليا حسيت روحي بين الواقع و الحلم...الطفلة لي خذات جزء من حياتي في شيرة و خويا السند متاعي في كلشي في شيرة اخرى...منعرفش اذا امتحان آخر باش نعديه...و لا هي اكبر خسارة في حياتي...متوقعتش باش نخسرها حتى قبل ما نعرفها...يمكن انسحابي توا...باش يخلصها من اللي هي فيه...عديت عينيا على ملامحو...باردة كيما كل مرة...لا تعرف منها حق و لا باطل...اما لي متأكد منو رغم هذا الكل...انو وقت يعطيني وعد...مستحيل يدور عليه...تنهدت بالقاوي...نحكي
انا:نستنى في جوابك
مراد:باهي
انا:نعتبر وعدك دين بالنسبة ليا...و الا
مراد:شنوة ؟
انا:كان يصير شي على هند...مانيش باش نعتبرك خويا بعدها...و باش نفسخ كلشي يجمعني بيك لآخر عمري
مراد:طيارتك بعد ساعة و نص من توا
هزيتلو براسي ايه...و نزلت هزيت الظرف و الدوسي من الطاولة...وخرت خطوة لتالي...و عطيتو بظهري...حليت الباب و خرجت...حبست في بلاصتي...نرد في نفس...هزيت راسي شوية...غزرت لشباك لي فوقي...جات عيني في عينها...آخر شي توقعتو اني نجم نلمحها قبل ما نمشي...جمدت في بقعتي...يديها لي قاعدين يضربو عالبلار...فهمت منهم لي تحب تحكي معايا...اما صوتها قعد محصور داخل البيت...نزلت راسي شوية...تمنيت كان نجم نرجع...اما انا أكثر حد نعرف مراااد...و نعرف انو لي في راسو باش يعملو...و ماهوش باش يرجع لتالي...فقت من سرحتي على صوت واحد منهم يحكي
هو:تفضل سي كريم
انا:نمشي بكرهبتي
هو:كرهبتك ماهيش هوني
انا:شقصدك ؟
هو:الاوامر تقول اني نوصلك للمطار توا
تبسمت على جنب...ماهيش حاجة جديدة عليه...ديما يتأكد انو الطلب متاعو تنفذ...خذيت نفس و هزيتلو براسي ايه...نحكي
انا:باهي...خلينا نمشو ملا
هو:تفضل
خلطت عليه...نمد في الخطوة بالسيف...قلبي مش مطاوعني نمشي و نخليها تصارع وحدها هوني...كيما زادة منجمش نمشي من غير ما نلقى اجوبة للاسئلة متاعي...عاودت هزيت راسي...دوب لمحتها من بعيد و ركبت...تكيت لتالي...نرد في النفس لي تسكر عليا...مديت يدي شوية نزلت البلار...الكرهبة لي بعدت...خلاتني نسترجع افكاري...نسترجع الايامات لي عشتهم معاها قبل...و مشاعري معاها البارح...كلشي تعدا بين عينيا في لحظة...غمضت عينيا بالقاوي...و عاودت حليتهم...كبست عالدوسي في يدي...حليتو نقرا فيه...طلعت اموري الكل مريقلة برا...حتى من الخدمة و الدار...حطيتو من يدي و حليت الظرف...نغزر لباسبوري...لي منعرفش كيفاه وصل ليه...و تذكرت الطيارة معاه...اصلا منعرفش امتى لحق يحل هذا الكل...كبست عالتذكرة في يدي...منعرفش شنية لي باش يصير توا...اما مستحيل نمشي و نخليها ورايا...عالاقل مرة وحدة نعصي فيها اوامر مراد...مستحيل نمشي من غير ما نفهم لي قاعد يصير...من حكاية زهرة...لي متأكد انو يفنى عليها...لحكاية هند...و الاهم عيلة بن قاسم و شنية يربطو بيها...مش المرة هاذي مستحيل...نمشي من غير ما نجاوب على كلشي...و قبل ما نحررها من يدو...فما احساس داخلي يخليني متاكد انو هي ما عندها حتى ذنب في اللي قاعد يصير...اما المهم عندي توا...كيفاش نرجع لغديكا و كيفاش نعاود ندخل لدار مرة اخرى...من غير علمو و من غير علم رجالو...و مهما كانت اللعبة هاذي كبيرة...منحبوش يتضرر...و لا يخرج خاسر منها...اما اذا كان هو الظالم في الحكاية...نحبو يفيق على وضعو و يرجع كيما قبل...رغم كلشي يبقى هو عيلتي الوحيدة...و متاكد لس مستحيل يضرني...و قرارو هذا وراه حاجة أكيد و نفس الشي بالنسبة ليا...باش نحاول جهدي نخليه يفيق على وضعو و يخرج من المستنقع لي هو فيه...خذيت نفس و هزيت راسي نحكي
انا:ميسالش تاقف شوية
هو:صارت حاجة سي كريم ؟
انا:اقف و اخرج من الكرهبة...نحب نعمل تليفون مهم
هو:معادش وقت على طيارتك
انا:اقف
شد الفران بالقاوي...نحى مفاتح الكرهبة و نزل...دورت راسي شوية...غزرت للبلار...الطريق خالية...و بعدنا برشا عالدار...حليت الباب و نزلت...قرب مني يحكي
هو:سي كريم...ع..
قبل ما يكمل كلامو...ضربتو براسي...طاح لتالي مروهج...نزلت عليه بالوقت...فرغت غشي الكل فيه...لين حسيتو داخ...نحيتلو سلاحو و تليفون متاعو...هزيت مفاتح الكرهبة من الارض...خذيت نفس طويل و هزيت روحي ركبت...شديت ثنية مرة اخرى...اما المرة هاذي...ثنيتي باش تكون للمجهول
🌸🌸🌸🌸🌸🌸🌸🌸🌸🌸🌸🌸
عمر يحكي:
ركيت الكرهبة...و تكيت لتالي...متوقعتش الثنية طويلة لدرجة عديت ليلة كاملة فيها...اصلا معنديش حل آخر يخيليني نمنع هند منو..من غير ما نظطر لخسارة اخرى...دورت راسي شوية نغزرلها...احسن شي غفات شوية...حتى هي عدات ليلة كلبة جرايري...مديت يدي شوية...بعدتلها خصلات شعرها على وجها...و سرحت في تفاصليها...لي عديتو في غيابها كان اكبر كابوس بالنسبة ليا...و مكنتش نعرف شنية نعمل كان صارتلها حاجة...اصلا رغم انها ايامات معايا...اما مش مصدق انها رجعتلي و بجنبي...خذيت نفس و نزلت...محبيتش نفيقها...عالاقل ترتاح شوية...تكيت عالكرهبة...و شيعت راسي لتالي...نغزر لنهار لي بدا يطلع...و ندرا شنية مخبي معاه...و شنية لي باش يصير معانا اكثر...تنهدت بالقاوي و هزيت تليفوني...نغزر لنومرو سي يعقوب...رغم انو عندو فترة من اللي خرج من الحبس...اما ملقيتش فرصة اني نقابلو فيها...كبست عليه في يدي...و طلبتو...نعرف لي مزال بكري...اما الشهور لي عديتها معاه...عرفت منها انو ديما يفيق بكري...شوية و هز عليا يحكي
يعقوب:صباح الخير
انا:صباح الخير سي يعقوب
يعقوب؛شحالك ؟
انا:حاجتي بيك اكيد
يعقوب:تحب تعرف اختك وينها ؟
انا:كيفاش عرفت ؟
يعقوب:من مصادري
انا:تعرف وينها ؟
يعقوب:للاسف مراد ديما سابق بخطوة...على هذاكا ماكش باش توصللها بالساهل
انا:شنية الحل في رايك ؟
يعقوب:ملك في طريقها لعندك
انا:شنوووة ؟
يعقوب:ماكش باش تلقى مراد وحدك
دورت راسي شوية...نغزر لكرهبة بعيدة شوية...ضيقت عينيا نحكي
انا:تراقب فيا ياخي ؟
يعقوب:نحمي فيك
انا:ملا علاش بعثت ملك ورايا
يعقوب:ملك هي الشخص الوحيد لي تنجم تاثق فيه و انت في الوضع هذا...و اكثر حد باش تكون بحاجتو...رد بالك على روحك و عليهم
علق عليا قبل ما نقول حتى كلمة اخرى...تعدلت في وقفتي...نغزر للكرهبة متاعها لي ركاتها ورا كرهبتي و نزلت...قربت مني بخطوات ثابتة...وقفت قدامي بالظبط...تحكي
ملك:لحقت في الوقت
انا:علاش جيت ؟
ملك:اوامر سي يعقوب
انا:و من امتى تسمع كلام بوك انتي ؟
ملك:كي الامر يتعلق بيك انت عمر
انا:لتوا منسيتش لي عملتو مع زهرة ليلتها
ملك:منقصدش لي صار ليلتها...كنت على اعصابي و خفت عليك
انا:مش هذا موضوعنا توا
ملك:باهي...شنية باش نعملو ؟
انا:منعرفش...المهم نلقى حاجة توصلني ليه
ملك:باهي خلينا نمشو من توا ملا
هزيتلها براسي ايه...ورجعت للكرهبة...اول ما ركبت...حلت عينيها شوية شوية...و تعدلت في قعدتها تحكي
زهرة:سامحني عمر...منعرفش كيفاه حتى غفيت
قربت منها شوية...بستها من جبينها...و نزلت بصوابعي لخدها نحكي
انا:شنية تحس في روحك توا ؟
زهرة:سافا...انت شحالك ؟
انا:لباس يا روحي
دورت راسي شوية نغزر لملك...لي شدت الفران بجنبي...نزلت البلار نسمع فيها تحكي
ملك:وين وجهتنا ؟
انا:المنطقة الكل
ملك:باهي هاني باش نسبقك ملا
انا:باهي
خذيت نفس و تلفت لزهرة...لي حسيتها استغربت و هي تغزر لملك...هزت عينيها في وجهي...غزرتلي ندرا كيف تحكي
زهرة:ف..فاش تعمل هوني ؟
انا:نظن لي احنا بحاجتها
زهرة:انت طلبتها ؟
انا:نخبرك بتفاصيل مبعد
زهرة؛ب..باهي
حطيت يدي على خدها و تبسمتلها...نهدي فيها...نعرف لوجود ملك باش يوترها اكثر...اما منجمش نردها بعد ما وصلت لهوني...تنهدت بالقاوي...و خلطت وراها...دخلت للمنطقة متاعو...اما حسيت بروحي رجعت خطوات لتالي...حتى حد ما عطانا معلومة يمكن توصلنا ليه...لهدرجة المزرعة متاعو مش معروفة هوني...و لا بالمعنى الصحيح...و لا حد حب يعطينا معلومات عليه...عديت يدي على وجهي و تكيت عالكرهبة...آخر امل بالنسبة ليا حسيتو باش يضيع من يدي...اختي قعدت بين عينيا...نعرفها حساسة...نعرفها متنجمش تتحمل لي قاعد يصير معاها...و الوضع لي هي فيه...تليفونات بابا و امي لي محبوش يحبسو وتروني اكثر...قربتلي شوية...حطت دبوزة الما في يدي تحكي
ملك:مزال فما اكثر من بلاصة
انا:الوقت ماهوش في صالحي...مدام اختي لتوا بين يديه...كل ثانية محسوبة عليا
قربت مني اكثر...و مدت يدها حطتها على زندي...تبسمتلي تحكي
ملك:باش يكون فما حل اكيد
دوب تبسمتلها و تلفت نغزر لزهرة لي نزلت من الكرهبة...جبدت روحها شوية لتالي...تحكي
ملك:نكمل نسال و نرجعلك
انا:باهي
اول ما بعدت...مديت يدي لزهرة...قربتلي بالوقت...حطت يدها في يدي تحكي
زهرة:سامحني عمر
انا:يجا هوني
جبدت عندي بالوقت...حضنتها بين يديا زوز...و نزلت بستها من راسها...نستمد في وقوتي منها...كبست بيدها على جنبي...و هزت راسها...غزرتلي تحكي
زهرة؛توقعت انو المعلومات لي عندي باش تفيدك...و باش نجمو نمنعو هند منو...اما يظهرلي طلعت غالطة
انا:مزال فما امل يا روحي
كبست على جنبي اكثر...و غزرتلي ندرا كيف...تحكي
زهرة:فما حل واحد يا عمر...انك تقبل الشرط متاع مراد
انا:مستحيل...على جثتي نخليك ترجعلو
زهرة:باهي و هند شنية ذنبها...حتى كان ماهوش باش يأذيها...صدقني نفسيتها باش تتعب برشا
حاوطت وجها بيديا زوز...و غزرت لعينيها...نحكي
انا:متحكيش على حاجة...تعرفني منجمش نعملها زهرة...اختي باش نمنعها من يديه...و باي طريقة...اما انسى اني نسلم فيك...و لا نخليك ترجع عندو مرة اخرى...مفهوم كلامي
زهرة:باهي...هدي روحك
رخفت يديا شوية و تكيت لتالي...رغم انو كلامها كمل على ما بيا...اما ظطريت نسكت...على خاطر نعرف لي نفسيتها تاعبة...نعرف لي ماهيش قد بعضها...و تلوم في روحها عاللي صار...خذيت نفس نحكي
انا:هيا اطلع توا
زهرة:نحب نبقى معاك
جيت باش نحكي...قصت عليا ملك لي قربت منا...غزرت لزهرة و عاودت غزرتلي تحكي
ملك:فما حاجة ضايعة...غريبة كيفاش منطقة كاملة ما تعرف عليه شي
انا:زعمة عندو هوية اخرى ؟
زهرة:لاااا...مرااد ديما عندو البديل
انا:شقصدك ؟
زهرة:نقصد لي احنا في منطقة كريم مش مراد
بقيت نغزرلها مستغرب...منعرفش علاش مجاتش في بالي الحكاية...ضيقت عينيا نحكي
انا:معناها كريم هو المالك هوني
زهرة:بالظبط...معناها احنا كنا نفركسو على الشخص الغالط...لي حاجتنا بيه هوني هو كريم بن عيسى
انا:زعمة باش نلقاو شكون يجاوبنا
ملك:المرة هاذي باش نسألو على اساس ضيعنا الثنية
زهرة:شقولك ؟
انا:باهي اركب توا...و انتي زادة ملك...من غير ما نلفتو الانتباه اكثر من هكا
ملك:باهي
خذيت نفس و رجعت للكرهبة...شديت الثنية مرة اخرى...على آخر امل...يمكن يخليني ناخو اللي حاجتي بيه...نرجع اختي و حياتي لي سرقها مني زادة...شديت الفران كي ريت جماعة من الفلاحين راجعين لديارهم...شاورت بيدي لواحد منهم نحكي
انا:ميسالش لحظة
هو:تفضل
انا:يظهرلي ضيعت ثنية المزرعة متاع كريم بن عيسى
هو:انت في الاتجاه صحيح...شد اول دورة عاليمين...تلقاها في آخر الثنية...تقريبا ربع ساعة توصل
انا:باهي عيشك
تلفت لزهرة بالوقت كبست على يدها...تبسيمتها هداتني شوية...خدمت الكرهبة و شديت الثنية...المرة هاذي...لنهاية مراد بالظبط...منعرفش على روحي كيفاه وصلت....شديت الفران على جنب...نغزر لرجالو لي برا...رغم انهم زوز كهو...اما تنجم تولي مشكلة بالنسبة لينا...دورت راسي على صوت ملك تحكي
ملك:شنية الحل توا ؟
انا:اللي حاجتنا بيه هوني
زهرة:كيفاش باش تدخل عمر ؟ مدام ماهمش موجودين هوني...اكيد ميسمحولناش باش ندخلو
انا:هدي روحك عزيزتي...اكيد فما طريقة
زهرة:معادش عندنا برشا وقت يا عمر
ملك:انا نتصرف
انا:شقصدك ؟
ملك:فما دوسيات في صاكي تخص كريم...على اساس باش نستناه في دار و هو يخلط عليا...منعرفش باش نحاول نقنعهم...و باش نلقى طريقة ندخلكم بيها
انا:متأكدة ؟
ملك:اثق فيا عمر
انا:باهي...رد بالك على روحك
حلت صاكها...جبدت الدوسيات في يدها و نزلت من الكرهبة...بقيت نغزرلها لين بعدت...دورت راسي على صوتها تحكي
زهرة:متظنش انك تسرعت برشا
انا:في شنية
زهرة:في انك تاثق فيها
انا:مفماش حل اخر
زهرة:عندك حق
دورت راسها بالوقت...متحبش تغزرلي...تنهدت بالقاوي...و عديت صوابعي على خدها نحكي
انا:زهرة...يزي عزيزتي
زهرة:عاادي...ما صاار شي
انا:واضح برشا
دورت راسها غزرتلي...اصلا نعرفها و حافظها...و نعرفها وقت تبدا غايرة زادة...رغم انو مش وقت غيرتها جملة...اما لي صار آخر مرة و مع ملك بالظبط...خلاني نعذرها...نزلت بيدي...لظهرها و جبدتها عندي نحكي
انا؛ايجا هوني
قربتلي بالوقت...حطت راسها على صدري...يمكن هذا لي بحاجتو توا...كبست عليها و تكيت راسي لتالي...نحكي
انا:امورنا باش تتحل بعد توا...اول ما نرجع هند...نكتبو صداقنا مرة اخرى
زهرة:باش نرجعو لدارنا ؟
انا:اكيد يا روحي
زهرة:و ترجع لخدمتك زادة ؟
انا:كان باش تمرجني بالروطار متاعك...منظنش باش نرجع مرة اخرى
زهرة:بربي
تبسمت بالوقت..اصلا هذا الحل الوحيد...باش نقصو التوتر لي احنا فيه...و نهديها شوية...منعرفش قداش تعدا علينا بالظبط...قص عليا صوت الميساج لي في تليفوني...حليتو نقرا فيه << الباب تلاني لي ورا دار...محلول...تنجم تدخل منو للكوجينة...و من غديكا تصرف...انا باش نظطر نبقى مع ام كريم و مراد شوية >> ضيقت عينيا نحكي
انا:كنت تعرف لامو عايشة ؟
زهرة:لا
انا:باهي باش نظطرو ندخلو من الباب تلاني ملا
زهرة:متأكد عمر ؟ كان يشلقو بينا ؟
انا:متخاافش عزيزتي...هيا انزل
هزتلي براسها ايه...خذيت نفس و نزلت من الكرهبة...يدها لي كبست على يدي...وصلتلي خوفها...و اللي تحس فيه...ظطريت نخلي الكرهبة بعيد...و نمشو على ساقينا...دخلت من الجنينة الكبيرة...لورا الدار...قربت من الشباك...نغزر للبون لي قاعدة تدور الداخل...كبست على يدي تحكي
زهرة:شفما ؟
انا:اهدا عزيزتي...مفما شي
هزتلي براسها ايه...و قربتلي اكثر...اول ما خرجت البون...كبست عالبواني...حليتها شوية شوية...دخلتها و دخلت وراها...غزرتلها نحكي
انا:متخاافش
كبست على يدها اكثر...و كملت بخطوات ثابتة...خرجت لصالة...غزرت لملك...لي هزتلي براسها ايه...دورت راسي شوية نغزر لمرا في كرسي متحرك...عاطية بظهرها...فيقني من سرحتي صوت البون لي صاحت...و يد زهرة لي تغرست فيا اكثر...عينيا قعدو معلقين في الكرسي...لي دار عندنا شوية شوية...جات عيني في عينها...مرا كبيرة...تقريبا عندها نفس ملامح ولدها...لون عينيه بالظبط...اما ظاهر زمان خانها...و خلاها مرا عاجزة...دوب تحرك يدها كهو...غزرتها كان تحاول تفهم بيها لي قاعد يصير...و الزر الاخضر لي كبست عليه...خلى البون تسكت بالوقت...عينيها تركزو في زهرة...لي كابسة على يدي...منعرفش قداش بقات تغزرلها...وقتها برك بديت نستوعب...انو دخولنا لهوني...عندو احتمالين...نهاية مراد ؟ و لا فخ لينا احنا الكل...هذا لي نجمت نفهمو من غزرتها لزهرة...رغم انها عاجزة على الحركة و النطق...اما فما برشا حاجات مخبييين ورا غزرة عينيها...و اولهم حقيقة ولدها...نزلت راسي شوية...نغزر لزهرة...لي حتى هي قعدت تغزرلها من غير حتى كلمة...شنوة الرابط القوي لي بيناتهم منعرفش...و شنية لي مخبي في الدار هاذي...و وين باش يوصلنا...مزال مجهول بالنسبة ليا...كلشي نعرفو و متأكد منو...اني مستحيل نخرج من هوني قبل ما نعرف شكون هو مراد بن عيسى ؟

#سمر💙💙💙