زهرة🌸

الحلقة السادسة و الثمانون

🔸️حلقة 86
🔸️سليم_يحكي :
كبست عليها بيديا زوز...دورتها عندي...نغزرلها مصدوم من حالتها...للحظة وحدة سرحت فيها...منجمتش نتعرف على ملامحها بالقدا...نزلت راسي نغزر لروبتها لي بكلها دم...حاجة داخلي..خلاتني نتكبس في بلاصتي و منعرفش شنية نعمل بالظبط...كأني أول مرة نرا حالة هكا...فقت من سرحتي على صوت فارس ورايا يحكي
فارس:سيدي...لباس ماهو ؟
غمضت عينيا بالقاوي...و عاودت حليتهم...نثبت فيها بالقدا...حطيت صوابعي على رقبتها...نتحسس في نبض متاعها...نزل قعد بجنبي يحكي
فارس:حية ؟
أنا:ح..حية
فارس:ظاهر حالة إغتصاب ؟
أنا:منعرفش...حل الكرهبة فيسع
فارس:باهي سيدي
كبست عليها أكثر...هزيتها بين يديا..حطيتها في الكرهبة من تالي...و ركبت بجنبها..نحيت الفاست متاعي غطيتها و بعدت شعرها لتالي نحكي
أنا:فما كلينيك قريبة للمحطة...متضيعش وقت
فارس:باهي سيدي
نزلت راسي نغزرلها...بدنها بارد ثلج...منعرفش علاه حسيت روحي نعرفها قبل...أما شكونها ؟ و شتعمل هوني و في الحالة هاذي ؟ كمية الدم لي نزلت منها ماهيش حادثة متاع إغتصاب...جرد فكرة خلات قلبي يدق بالقاوي...منعرفش علاه...حاولت برشا إني نتذكر وين ريتها قبل...أما منجمتش...نزلت راسي نغزر لدمها لي قوا في لحظة...للحظة حسيتها قاعدة تصارع بين يديا باش تعيش...غزرت لفارس نحكي
أنا:فيييسع فااارس...الطفلة باش تموت
فارس:باش نوصلو سيدي...مبقاش برشااا
عديت يدي على وجها...رجعتلها شعرها لتالي...نحكي
أنا:تحمل...مبقاش برشا...باش تكون مليحة وعد مني
كبست عليها أكثر...فرد وقت نغزر لثنية...عندي برشا عالخوف لي حسيتو توا...لدرجة تصدمت في روحي...و معرفتش شنية نعمل بالظبط...أول ما شد الفران...نزل حلي الباب...نزلت و هزيتها بين يديا...و دخلت ساقي أعلى من راسي...الكلينيك فارغة عالصباح...دوب لقيت زوز فراملة...يغزرولي مصدومين...صحت عليهم نحكي
أنا:حددد فيييكم يتصرف...الطفلة باش تموت
هو:حطها هوني مسيو
حطيتها عالسرير لي قدامي...نرد في نفس بالسيف...و هزيت راسي قحرتلهم نحكي
أنا:وين الطبيب ؟
هو:الدوام متاعو وفا
أنا:شمعناها ؟ مفماش غيرو ؟
هو:للأسف باش نستناو ساعتين أخرى
أنا:وينو توا ؟
هو:يرتاح في البيرو متاعو
أنا:وين بيروه ؟
هو:نبهنا كان
هديت عليه...جبدتو من البلوزة متاعو...و قحرتلو نحكي
انا:سألتك جاوبني
هز يدو شاورلي لبيروه...دزيتو لتالي...و هديت عليه فاق مفجوع...يحكي
دكتور:شفماااا هووني
أنا:فما مريضة...و باش تقوم بيها توا...مكانش نسفرلك بروحك
دكتور:شنية تستخايل في روحك أنت ؟
مديت الفرد في وجهو...منعرفش كيفاه عملتها من أصلو...ما نهزو في وجه حتى حد...كان كي يبدا فما شي خطير...قحرتلو نحكي
أنا:فييسع
هزلي براسو إيه...و خرج يجري...خرجت وراه...غزرلها و تلفتلي يحكي
دكتور:شبيها ؟
أنا:أنت باش تقولي شبيها
قرب منها يعدي عليها بالزربة...و غزرلهم يحكي
دكتور:حضرو الطاقم و بيت العمليات فيسع معادش فما وقت
أنا:شصار ؟
هو:منعرفش...أما حالتها خطيرة برشا...و ظاهر نزفت برشا دم
أنا:تصرف ملا...كان تجرالها حاجة...نسفرلك بروحك قبلها
هو:باهي...إن شاء الله خير
بقيت نغزرلهم كيفاه هزوها من قدامي...نزلت الفرد بالوقت...حسيت روحي تهديت...بالرسمي تقول كابوس قاعدين نعيشو فيه...غزرلي فارس يحكي
فارس:أكيد حالة اغتصاب
أنا:سكر فمك فارس...مانيش ناقصك راو
فارس:باهي...سي سليم...شقولك تمشي ترتاح أنت...و أنا باش نخبرك بكلشي جديد
انا:لا لا...لباس عليا
فارس:أما دبشك كلو بالدم
أنا:ميهمكش فيا توا...أسمعني شباش تعمل
فارس:تفضل سيدي
أنا:أبعث دورية تحقيق...للبلاصة لي لقينا فيها الطفلة كان لقيت أي حد مشتبه بيه...شدو بالوقت
فارس:باهي...كيما تحب
انا:أستنى لحظة
فارس:نعم
أنا:شكون الأكابر في المنطقة هاذي ؟
فارس:عثمان بن قاسم...و يقولو لي فما حد آخر ينافس فيه...نظن اسمو مراد بن عيسى
أنا:مراد بن عيسى
تبسمت على جنب...و هزيتلو براسي ايه...نحكي
أنا:أول ما يطلع نهار أبعثلهم خبر زوز...بلكشي يتعرفو عالطفلة...مدام المنطقة هاذي في يدهم
فارس:باهي سي سليم
أول ما خرج هزيت الفاست متاعي لي حطوها عالكرسي...و حطيت الفرد ورا ظهري...و خلطت عليهم لبيت العمليات...نمشي و نجي في بلاصتي...ريحة دمها لتوا في خشمي...منعرفش كيفاه وصلت للحالة هذيكا و لا علاش مطيشة في نص شارع...مخي تحرق من داخل و ملقيتش جواب نهدي بيه روحي...مديت يدي باش نعديها على شعري لقيتها كلها دم...على تلفيتي لقيت الفرملية خرجت تجري...وقفتها نحكي
أنا:شبيها ؟
هي:المدام والدة جديد...و نزفت برشا...لازمها دم و عملية فيسع
خلاتني في بلاصتي...منجمتش ننطق كلمة أخرى..كيفاه مرا ولدت جديد...ملوحة بالطريقة هذيكا...في البرد و المطر هذاكا...قد ما حاولت إني نستوعب و ندخلها لمخي أما منجمتش...خذيت نفس طويل...و عاودت تلفت للبلوك...نستنى فيها ترجع...شوية وقت و رجعت تجري...وقفت في وجها نحكي
أنا:الطفلة لي الداخل لازمها تعيش تسمع فيا ؟
هي:لازمنا دم مسيو...و فيسع زادة
أنا:شنية زمرة دمها ؟
هي:حسب تحاليل لي ظهرت A+
أنا:باهي برشا...أنا نعطيها دم
هي:باهي تفضل معايا
خلطت عليها...حطيت الفرد على جنب و ترميت عالكرسي...حسيتها تكبست بالوقت...قحرتلها نحكي
انا:مانيش قتال أرواح...كمل خدمتك بلا خوف
هي:ب..باهي
أنا:حالتها خطيرة برشا ؟
هي:للأسف...كان تعدات المرحلة هاذي...معناها بالرسمي قوية
أنا:زعمة قداش عندها من وقت ولدت ؟
هي:أحسن شي أنك لحقت بيها...كان عندها تقريب ساعة أكاكا
أنا:باهي
هي:كملنا مسيو
هزيتلها براسي إيه...و جبدت يدي منها...هزيت الفرد ووقفت...غزرتلي تحكي
هي:لازمك ترتاح شوية
منجمتش نرجعلها...هزيت روحي و خرجت...نحس في راسي باش يطرشق...معادش نجم نستوعب...شكون الحيوان لي ينجم يعمل في مرا حبلة هكا...و الأهم من هكا...ولدها وينو ؟ مش والدة جديد...وين خلات صغيرها ملا...إستندت بيدي عالحيط...نستنى في خبر منهم...ساعة أخرى تعدات...و لتوا حد منهم ما خرج قص عليا صوت تليفوني...هزيت على فارس نحكي
أنا:وصلتو لحاجة ؟
فارس:استجوبنا الكل هوني...أما حد ما تعرف عليها إحنا بحذا القصر متاع عثمان بن قاسم...نعطولو خبر توا ؟
أنا:باهي...أعمل لي تشوفو مناسب
فارس:كان يرفض يجي معانا
أنا:يعني مهم برشا عندي...باش نخمم فيه أنا توا...خليه يرفض...ساعة عمرو لا جا من أصلو...جيست أعطيه خبر و كهو...بلكشي تكون بنت واحد من الفلاحين هوني
فارس:باهي سي سليم
أول ما علقت عليه...جات عيني عالطبيب...لي خرج مهدود من داخل...للحظة دخلت بعضي...و أنا نغزر فيه منعرفش كيفاه لميت طرف القوة لي عندي و قربت منو نحكي
أنا:ل..لباس توا ؟
بقى يغزرلي من غير حتى كلمة...ركبني العصب أكثر من الأول...قحرتلو نحكي
انا:نسأل فيك ؟
هو:حالتها مستقرة توا...أما باش تبقى تحت المراقبة 24 ساعة
تنفست براحة...للحظة حسيت الطفلة هاذي تعنيلي برشا...غزرتلو نحكي
أنا:نحب نشوفها
هو:يبدلولها البيت...وقتها تنجم تشوفها
أنا:باهي
هو:باش نسألك ؟
أنا:نسمع فيك
هو:الصغير متاعها وينو ؟
أنا:منعرفش...الطفلة لقيتها مطيشة و هي في الحالة هاذي
هو:معناها متعرفهاش ؟
أنا:لا
هو:لازم توصلو خبر للحاكم...هاذي قوانين الكلينيك
مديت الكارت متاعي في وجهو...بلع ريقو...و عاود غزرلي يحكي
هو:مكنتش نعرف لأنت من الحاكم
أنا:و إلا كنت باش تشتكي بيا كي هديت عليك بالطريقة هذيكا ؟
هو:أكيد
أنا:أنت أهتم بخدمتك و حتى حد ماهو باش يتعرضلك
جبدت روحي منو...نغزرلها...و هوما يهزو فيها للبيت لأخرى...خليتو و خلطت عليها...دخلت وراهم بالظبط نثبت في تفاصيل وجها...غمضت عينيا بالقاوي...كانو الأحداث تعاودت في راسي على غفلة...حليت عينيا مروهج...نفس الطفلة لي ريتها في الحبس و هي حبلة شنية كانت تعمل غديكا و فاش تعمل هوني توا..خرجت من البيت من غير ما نخمم مرتين...دخلت بعضي أكثر من نهارتها منجمتش نحيها من مخي...كيفاش و علاش تلقيتها مرة أخرى و هي في الحالة هاذي ؟ حسيت نفس تسكر عليا في لحظة...وقفت برا نغزرلها من البلار نثبت في ملامح وجها...هزيت راسي على صوت العركة حطيت الفاست من يدي...و مشيت...نلقى فارس يجبد فيه...و هو يخنق في طبيب...و يصيح
فارس:سي مراد اهدا أماانك
مراد:ويييينها...حللل فمك
هو:ل..لباس عليها
مراد:و الصغيرر ؟ نكلم فييك بنتتتها وييينهاااااا ؟
هو:م...منعرفش
أنا:سي مرااااد
دزو لتالي...و طلع راسو يغزرلي...قد ما توقعت إني نقابلو...متوقعتش باش تكون الفرصة هاذي هكا...و لي متوقعتوش أنو الطفلة لي الداخل تابعة ليه...هزني و حطني...يغزر لدبشي لي مزال بدمها...قرب مني مروهج يحكي
مراد:و..وينها زهرة
بقيت نغزرلو...متوقعتش يكون إسمها حلو لهدرجة لدرجة أول ما سمعتو قلبي دق بالقاوي...خذيت نفس نحكي
أنا:طمن لباس عليها
مراد:شكونك أنت ؟
مديت الكارت متاعي في وجهو...و عطيتو يدي...غزرلي و صافحني بالوقت...هزيت عينيا فيه نحكي
أنا:المحقق سليم اليوسفي
مراد:مراد بن عيسى
أنا:المدام لي هوني مرتك ؟
مراد:تنجم تقول إيه...وين لقيتها...و شنية لي صار بالظبط ؟
أنا:لقيتها مطيشة في شارع...بعد ما ولدت
مراد:ك..كانت معاها طفلة صغيرة...كانت حبلة بطفلة ياخي ملقيتش بنتها معاها ؟
أنا:للأسف لا...حالتها كانت خطيرة...و غايبة عالوعي منجمتش نسألها و لا نحكي معاها لتوا...أما مدام المدام تابعتك...حتى أنت لازم تتعدا لتحقيق
مراد:باش نتعدا طمن...و عيشك عاللي عملتو معاها
ضربني لكتفي...و مشى ناحيتها...حل الباب و دخل من غير ما يشاور حد...قعد على ساقيه بجنب راسها...و كبس على يدها...بلا ما يقول كلمة...بقيت نغزرلو من البلار...لهدرجة حبو ليها هدو...ظاهر في تصرفاتو...في غزرة عينيه...في كلامو...لهو مات ألف موتة قبل ما يعرف بلاصتها و يوصل لهوني...متوقعتش الحب باش يهد راجل كيفو...و الأهم من هكا ؟ شكون هو مراد بن عيسى ؟ شكون زهرة ؟ و شنية لي قاعد يصير بالظبط ؟ و شكون عندو مصلحة يفكلها صغيرها ؟ من سؤال واحد....لقيت روحي غارق في بير من الأسئلة بين ليلة و نهار...و أكيد مانيش باش نخلي هذا الكل من غير جواب...و باش يكون عندي لقاء سبيسيال مع مراد بن عيسى.