زهرة🌸

الحلقة الواحدة و التسعون

🔸️حلقة 91
🔸️مريم_تحكي:
سكرت الباب و خرجت...الدنيا باردة عاللخر...لفيت روحي أكثر...و شديت ثنية البوتيك..مدام القراية مزال عليها شوية...نحس في روحي مخنوقة...و مش قد بعضي...خاصة لي بنتي اليوم تعمل خمس شهور...كان جات معايا توا...راني أسعد وحدة...كان نجمت نحملها مرة وحدة كهو...و قد ما حاولت نهرب من اللي صار منجمتش...و كمل عليا كي مطلبنيش ليلة كاملة...و حتى صباح ملقيتش ميساج و لا أبال منو...محسيتش بروحي كيفاه وصلت...جبدت مفاتحي من المكتوب باش نحلو...قص عليا صوتو يحكي
صبري:صباح الخير
تلفت عندو...دوب تبسمتلو...و خذيت نفس...نحكي
أنا:صباح النور
صبري:خلي عليك
مد يدو باش يشد عليا المفتاح...هزلي براسو إيه عطيتهولو...و وخرت خطوة لتالي...نغزرلو و هو يحل فيه...من غير حتى كلمة...لين هز راسو غزرلي يحكي
صبري:أدخل دنيا برد
أنا:باهي عيشك
خذيت نفس و دخلت...شعلت شوفاج...و هزيت ريدو دخل ورايا يحكي
صبري:فطرت ؟
أنا:مممم
صبري:شقولك في قهوة ؟
هزيتلو براسي إيه...منجمتش نردو بعد اللي عملو عليا الكل...تبسم يحكي
صبري:تو نرجعلك
أنا:باهي
أول ما خرجت...جبدت تليفوني من كبوطي...فديت أكثر كي ملقيتوش طلبني...حتى البارح...دوب كلمني و علق...خممت باش نطلبو...أما بطلت...نفخت بالقاوي...و أفكار تهز فيا و تجيب...زعمة صارت حاجة ؟...زعمة مريض ؟ خاصة و لينا أيامات متقابلناش فيهم...يمكن الشهرين اللي تعدات...عرفتو فيهم أكثر...من وقت كنت عايشة معاه...تحت سقف واحد...و الحاجز لي كان بينا بدا يتهد شوية شوية...أما بيني و بين روحي...لتوا مزلت خايفة من اللي جاي...لتوا عندي إحساس خايب أنو الفرحة هاذي ماهيش باش تكمل...و لتوا مزلت بغصتي على بنتي...و كل ما نتذكرها يصير فيا أكثر من قبل...و خاصة اليوم...و كي العادة لتهيت نرتب في البوتيك...نتهرب من أفكاري اللي هدت عليا...فرد وقت نستنى فيه يطلبني...دورت راسي على دخلتو...تبسم و حط الكاسة في يدي...غزرتلو نحكي
أنا:مرسي
صبري:من غير مزية
خذيت رشفة و حطيتها عالبيرو لي محطوط على جنب و كملت نعدل في روبات الروز...تبسمت بوجيعة...قداش كانو باش يواتوها...و تعمل بيهم جو...فقت من سرحتي على صوتو يحكي
صبري:تحبش نعاونك
أنا:سيبون...جيست ركحتهم في صف واحد
تلفت عندو...عدا عينيه على وجهي...و غزرلي ندرا كيف تربثت من غزرتو...و تبسمت نحكي
أنا:متخدمش اليوم
صبري:خذيت كونجي...نرتح بيه راسي أيامات
أنا:صحة ليك...تفضل أقعد
مديت يدي شاورتلو عالكرسي لي وراه...و قعدت مقابلاتو...و هزيت الكاسة...كبست عليها في يدي نحكي
أنا:صبري باش نسألك على بابا...اما من غير ما تخبي عليا باهي
صبري:أكيد
أنا:نعرف لي وضعو تاعب برشا...أما لا يحب يحكيلي و لا حتى يخليني نجي معاه للكلينيك...على هذاكا نحبك تحكيلي كلشي...خاطر نعرف لهو ما يخبي عليك شي
حط الكاسة من يدو...و ملامح وجهو تبدلت بالوقت الشي لي دخلني بعضي اكثر...هز راسو غزرلي يحكي
صبري:أسمعني مريم...مانيش باش نخبي عليك...سي أحمد حالتو تاعبة برشا...و كان باش يكمل عالحالة هاذي ماهوش باش يتحمل أكثر
كبست عالكاسة في يدي أكثر من قبل...و غزرت لعينيه نفركس على امل صغير يطمني بيه...دوب نجمت نلم الحروف لي باش نسالو بيهم
أنا:ل..لهدرجة قلبو تاعب ؟
صبري:للأسف...لازمكم تعرفو
أنا:و شنية الحل ؟
صبري:لازم نقنعوه بالعملية...هذا الحل الوحيد توا
أنا:علاش رافضها ملا
سكت شوية...شبك يديه و قربلي أكثر...حط عينيه في عينيا يحكي
صبري:العملية تكلف برشا
أنا:قداش ؟
صبري:فوق ما تتصور...أما هذا ماهوش عائق...حاولت معاه لأنا باش ندفع النص...و نحكي مع طاقم الكلينيك و نكملو باقي بالتقسيط...في هذا الكل انا نحبك تقنعو و كهو...و الباقي عليا
بقيت نغزرلو...فرد وقت نستوعب في كلامو...خذيت نفس نحكي
أنا:صبري...أنا مقدرة وقفتك معانا...أما عملية بابا...خليها عليا...أنا نتكفل بالنفقات الكل
ضيق عينيه مستغرب...و تكى لتالي باش يحكي...قص علينا صوت الميساج متاع تليفوني...هزيتو في يدي...و حليتو بالوقت نقرا فيه << توا بالظبط محتاج ضحكتك و صوتك باش نجم نكمل نهاري...صغرونتي المزيانة نحبك>> تبسمت و أنا نقرا فيه...حسيت روحي كنت مضيعة حاجة...و لقيتها مع الميساج متاعو...كنت باش نعاود نطلبو...قص عليا يحكي
صبري:حسام ؟
هزيتلو براسي إيه...و أنا نغزرلو...تبسم على جنب يحكي
صبري:مانيش باش ندخل في أمورك...أما محسيتش لإنتي تعاود في نفس الغلطة متاع بكري
أنا:شقصدك ؟
صبري:إنتي فهمت قصدي بالقدا مريم...أنا و إنتي نعرفو حسام..في رايك يستهل الفرصة هاذي منك مرة أخرى ؟
أنا:صبري في رايي أنا نقرر إذا كان يستهل فرصة أخرى و لا لا
صبري:أنا مانيش نخمم فيك إنتي مريم...نخمم في سي أحمد كان يسمع بهذا الكل...شنية باش يكون رايو
أنا:مانيش نعمل في حاجة حرام...حسام مزال راجلي لتوا...و نظن بابا يعرف بهذا زادة
صبري:مانيش نهدد فيك...أما تعرف لبوك ماهوش باش يتحمل صدمة أخرى...خاصة بعد الحالة لي وصلتلها اخر مرة...و في رايي ماكش باش تحط روحك في نفس الموقف...و تختار بين حسام و بوك...خاطر المرة هاذي سي أحمد باش يمشي فيها جرايرك
بقيت نغزرلو من غير حتى كلمة...نحس الحروف رزنت في لساني...و ملقاتش طريق باش تخرج...تنهد بالقاوي و كمل كلامو يحكي
صبري:نعرف لي الكل مظلوم في الحكاية...أما المرة هاذي خمم في بوك مريم...هاك عشت من غير سند و ريت لي صار فيك...متعاودش نفس الغلطة مرة أخرى مدام بوك ماهوش موافق على حسام...معناها متأكد من مصلحتك...إنتي وقفت في وجهو و ريت النتيجة بعينيك...على هذاكا رد بالك
هز روحو وقف...مشى خطوتين...و عاود تلفت عندي يحكي
صبري:خمم في كلامي بالقدا...و متنساش لأنا معاك في أي قرار تختارو
منجمتش نهز راسي في وجهو...و لا حتى نغزرلو...كأني فقدت حواسي الكل...الأحداث لي صارت معايا الكل تعاودت بين عينيا...هزيت راسي شوية...نغزر لحسام و هو يطلب فيا...منجمتش نمد يدي و نهز عليه..منجمتش نتحرك من بقعتي...الدموع لي تحصرو في عينيا محبتش طيح و ترتحني...الدموع لي نسيتها من شهرين خاطرني ستانست بحسام و بديت ننسى لي صار..بديت نعمل في خطوات جديدة معاه...علاه باش نرجعو لتالي توا...زعمة باش يرجع كيما قبل ؟ باش يعاود عملتو ؟ زعمة شراز باش تبقى في حياتنا ؟ أسئلة نسيتها من أول مرة قررت نعطي فرصة لبعضنا...علاش نخمم فيها توا منعرفش...خايفة نطيح في نفس القرار مرة أخرى و نظطر نختار بين بابا و حسام...خاصة لهو رافضو أكثر من الأول جراير لي صار...مديت يدي بالزربة نفركس في مكاتبي عالفونتولين متاعي...خذيت منها نفس...و تنهدت بالقاوي...هزيت تليفوني و مفاتحي...و خرجت من البوتيك...سكرتو كيما جا...و شديت ثنية...وين ماشية منعرفش...تليفوني لي ينوقز و يعاود منجمتش نسمعو مع صوت الريح القوية...شيعت راسي لسما نتحسس في قطرات المطر لي طاحت على وجهي شكون باش يفهمني ؟ شكون منهم يحاول يفهم لأنا نحب نعيش حياة طبيعية...بين عيلتي و مع حسام زادة كان رضى بابا من الأول بعلاقتنا...مكانش صار هذا الكل و مكنتش حكيت مع رنيم بالطريقة هذيكا ليلتها...و لا هو سمعني...و صار لي صار...فرد وقت منحبش لي عاشتو أمي يتعاود معايا...منحبش نعيش حياتي بعيدة على حسام...و منجمش نشوفو مع شراز و لا غيرها..كان بابا يتفهم هذا الكل مرة وحدة...راني موصلتش لهوني و مخسرتش قطعة مني...أما توا الوضع غير...توا منجمش نتحدى بابا و ناقف في وجهو...منجمش نطلب منو فرصة اخرى...أنو يسمعني بخصوص حسام منحبش نعيش من غيرو هو زادة...منحبوش يخليني كيما أمي...و منحبش نعيش بعيدة على رنيم زادة
عديت عينيا عالرخامة لي مكتوب فيه إسمها...و إسم بنتي عالرخامة الصغرونة لي بحذاها...منعرفش كيفاه جابوني ساقيا لهوني...قعدت بجنبها كي العادة...و كيما كل مرة تضيق بيا...عديت يدي على ترابها...نغزر لقبرها من غير حتى كلمة...عكس الكلام لي كنت نحكي فيه داخلي و الدمعة لي كانت محصورة بين جفوني...لقات طريقها و نزلت على خدي...مديت يدي مسحتها و غزرت للقبر الصغرون متاع بنتي...لي كل مرة تجي عيني عليه نحس بوجيعة أخرى...نحس بالذنب على خاطرني تسرعت و منجمتش نحميها...حسيت بالذنب خاطر اليومين لي عداتهم و هي تبكي داخل الحضانة أنا مكنتش معاها و من دمعة ولات دموع...كل مرة نعدي يدي على خدي...ينزلو أكثر من قبل...حسيت بيدو لي تعدات على شعري...دوب هزيت راسي غزرتلو منعرفش كيفاش لقاني هوني...غزر لقبر فرح...و نزل قدامي...قعد على ركبة و نص...و كبس على يديا زوز باسني منهم و مد يدو يمسحلي في دموعي...و يحكي فرد وقت
حسام:علاش جيت لهوني وحدك ؟
أنا:م..منعرفش
حسام:سامحني يا روحي
هزيت يدي حطيتها على خدو...منعرفش شنية لي جا في مخو...يمكن حس بالذنب مرة اخرى...غزرت لعينيه نحكي
أنا:ك..كنت بحاجتك...أحسن شي جيت عندي حسام
حسام:إيجا عندي تراه
جبدني من يدي...ترميت في حضنو...دورت يديا زوز على رقبتو و غرست راسي في حضنو...نشم في ريحتو لي هداتني بالوقت...حتى حد ماهو باش يفهم لأنا منجمش نعيش من غيرو...حتى حد ماهو باش يفهم لانا منجمش نهرب منو و لا نراه مع حد غيري.. كبس على شعري يحكي
حسام:يززي حبي...متحرقنيش أكثر من هكا
كبست عليه بيديا زوز...منحبوش يبعد عليا و لا يجبد روحو...خاصة توا...جبد روحو شوية...باسني من راسي يحكي
حسام:يززي...مش تفاهمنا معادش فما دموع
أنا:ق..قاعدة تنزل وحدها
حسام:لطف على رويحتي...هيا نمشو من هوني منحبكش تمرضلي من توا
أنا:وين نمشيو ؟
حسام:وين تحب إنتي
أنا:نحب نبقى معاك
حسام:باهي يا عمري...إيجا
كبس عليا...و وقفني معاه...غرست راسي في حضنو تنهد بالقاوي يحكي
حسام:اليوم عندها 5 شهور
هزيتلو براسي إيه...و تلفت نغزر لقبرها...و هزيت راسي غزرتلو...تنهد بالقاوي....و باسني من جبيني يحكي
حسام:هيا عزيزتي
بلعت الكلام لي كنت باش نقولو...بعد ما ريت حالتو و هو يغزر لقبرها بحصرة...بعدنا عليها بخطوات رزينة و مع كل نسمة باردة...نتخبى في حضنو اكثر...حضنو لي نحس فيه دافي عاللخر و الحاجة لي كنت بحاجتها..من اول ما حليت عينيا الصباح...اول ما وصلنا للكرهبة..حل الباب و ركبني...سكرها و خلط عليا...مد يدو...عدا صوابعو على خدي...و رجعلي شعري لتالي نحكي
حسام:مريم...معادش تجي لهوني وحدك باهي
أنا:البلاصة هاذي فيها امي و بنتي حسام
حسام:أسمعني...منحبكش تضر روحك أكثر من هكا
أنا:مش بيدي
حسام:أغزرلي هوني
حط يدو على رقبتي و هز راسو...غزرلي لعينيا قد قد يحكي
حسام:صارت حاجة...انا منعرفش بيها ؟
هزيتلو براسي لا...مد يدو لأخرى...عدا صوابعو على خدي...يحكي
حسام:مريم...يا عمري...ماكش باش تخبي عليا...نعرفك كي تبدا في الحالة هاذي...معناها فما شكون سمعك كلام إنتي متحبش تسمعو...كيما متأكد كان رديت عليه ماكش في الحالة هاذي
أنا:ك..كان باش نحكيلك...ماكش باش تتغشش مني
هزلي براسو لا...فرد وقت يرجعلي في خصلات شعري لتالي...و يحرك في يدو على رقبتي...يهدي فيا...خذيت نفس نحكي
أنا:ص..صبري
حسام:¤¤¤¤¤¤¤ مش قتلك معادش تدور ب¤¤¤¤¤¤ و توا تقول في إسمو ضربة وحدة
دموعي نزلو أكثر...نفخ بالقاوي...و قربلي أكثر...يحكي
حسام:باهي...يزززي...حقك عليا يا روحي
باسني من عيني...باش نقص عالبكا...و عدا كف يدو على خدي يحكي
حسام:نسمع فيك
أنا:ب..بابا...صبري..قالي لي بابا حالتو خطيرة برشا...و ميحبش يعمل العملية
حسام:علاه حتى يرفض
انا:يمكن خاطر تكلف برشا
حسام:ميسالش تو أنا ندبر راسي
أنا:ل..لا منقصدش لي فهمتو...الفلوس لي عندي تكفي
حسام:فلوسك ماكش باش تمسها...مفهوم
أنا:ب..بابا ماهوش باش يقبل لا فلوسي و لا فلوسك...أنا نعرفو بالقدا
حسام:و شنية الحل ؟
أنا:منعرفش...أكيد باش يكون فما طريقة نقنعو بيها...أما حسام:أما شنية ؟
انا:ح...حسام منحبش لي صار يتعاود...منحبش بابا يخيرني بينكم...والله باش نموت المرة هاذي
جبدني عندو بالوقت...كبست بيديا زوز على جنابو...و غطست راسي في رقبتو...عدا يدو على ظهري يحكي
حسام:آخر مرة نسمع الكلام هذا من فمك...مانيش باش نسمح لي صار يتعاود مرة اخرى...و كان رفضني مرة و زوز...أكيد باش يجيه نهار و يرضى
هزيت راسي شوية...جات عيني في عينو...خذيت نفس نحكي
أنا:ب..باش تصبر أكثر من هكا ؟
دوب تبسم...مد يدو...و نزل بصوابعو...عداهم على تدويرة وجهي...و حبس بيهم على شفايفي...يحكي
حسام:باش نصبر
أنا:قداش ؟
حسام:لآخر نهار في حياتي
أنا:ماكش باش تبعد عليا مهما صار ؟
حسام:مريم...يا عمري...ريت الأسئلة لي قاعدة تدور في مخك الصغرون...نحبك تفسخها...و معادش تخمم فيها جملة
أنا:معناها...باش تبقى تحبني مش هكا ؟
حسام:خايفة مني إنتي ؟
هزيتلو براسي لا...و مديت يدي...من جنبو...حطيتها على رقبتو...و طلعت بيها شوية...عديت صوابعي على لحيتو نحكي
أنا:أنا نهرب من الناس الكل ليك أنت...أما
هزيت يدي لأخرى...حطيتها على قلبو...لي حسيتو باش يخرج من بقعتو و خذيت نفس نكمل في كلامي نحكي
أنا:ا..أما نحب نتأكد..أنو هذا متاعي انا و كهو و ماهوش باش يكون لحد غيري لا قبل و لا مبعد
كبس على يدي...و نزلها من خدو شوية...باسني منها يحكي
حسام:يا روح قلبي...صغرونتي...أعرف لإنتي ملكت هذا...و مستحيل يجي نهار يكون لغيرك
كبس على يدي...لي محطوطة على صدرو...قربتلو في لحظة...و حطيت شفايفي على شفايفو...سكرت عينيا نمحي في الكلام لي سمعتو من صبري...متأكدة لهو يحبني...و مستحيل يخليني...نعرف لهو باش يعمل المستحيل على خاطري المرة هاذي...و ماهوش باش يخليني...دوب جبدت شفايفي منو...عاود كبس على ظهري بالوقت...لين ضاعو شفايفي وسط شفايفو مرة اخرى...كبشت فيه اكثر...لين معادش فما مسافة بينا...و كل مرة ينزل عليا اكثر...نكبس عليه بالوقت...منحبوش يبعد..توا بالظبط...نحب نبقى بين يديه...و ننسى كلشي تعدا علينا...جبد روحو شوية...يرد في نفس..لي تقطعلي أنا زادة...دوب عاود باسني منهم...يحكي
حسام:باش تخليني نهبل عقاب عمري
أنا:ع..علاه ؟
حسام:ششش متحكيش...متحركش شفايفك قدامي...و إلا باش نعمل فيك أكثر
عديت لساني على شفايفي...لي حسيتهم باش يطرشقو جبدني عندو بالوقت حضني...و كبس عليا يحكي
حسام:ماكش باش تريض
أنا:ش..شعندي عملت
حسام:مريم ياخي كل نتقابلو فيها...تتعمد تعمل فيا هكا
انا:حسااام...امااان
حسام:اه من حسام...خليني نوصلك...أحسن ما نعمل فيك شي
جبدت روحي منو...و كبست على سوريتو...نحكي
أنا:توحشتك و نحب نعدي بقية نهار معاك
حسام:مش مني يا عمري...تشديت في الخدمة اليمات هذوما...و مع خروج عمر زادة...كلشي جا على بعضو
انا:علاش مترجع بحذا أمي فتحية اليمات هذوما ؟
حسام:مرتاح في داري مريم...و البيت هذيكا منحبش نبقى فيها من غيرك
أنا:زعمة باش نرجعو نعيشو مع بعضنا
حسام:في أقرب فرصة عزيزتي
أنا:إن شاء الله يا روحي
حسام:هيا ملا...مدام مريتي توحشتني و تحب تعدي نهار بجنبي...باش نظطر نهزك معايا لسوسيتي
أنا:بالمنظر هذا ؟
حسام:حد عندو إعتراض على مرت حسام الماجري ؟
أنا:لا مشاء الله عليك...ديما مضروب في روحك
حسام:هههههههه باش تجي و لا نهزك للبوتيك تعدي بقية نهار تستنى في كليونات ؟
أنا:تفرك فيهم عليا ؟
حسام:هيا قرر فيسع
أنا:أنت شنية تحب ؟
حسام:متسألنيش أحسن
أنا:بربي ؟
حسام:الله غالب حبي...كان نقلك لي نحب عليه توا تدور عليا
انا:باهي أنا نقلك لي تحب عليه أنت
حسام:نسمع فيك
أنا:تحبني نرجع معاك لدارك ؟
عديت صوابعي على رقبتو...و نزلت بيهم لصدرو..غزرت لعينيه نحكي
أنا:نقصد دارنا
كبس على يدي...و جبدني عندو أكثر...قرب لشفايفي يحكي
حسام:متختبرش قوة صبري...حرام عليك اللي تعملو فيا كل مرة
أنا:حتى أنا توحشتك عاللخر
كبس عليا أكثر...جبدني عندو...غطست راسي في رقبتو مرة أخرى...غرس يدو في شعري يحكي
حسام:معناها منغيضكش...عاملة فيا بلعاني إنتي
أنا:لا...أما هكا...نحس في روحي مرتاحة أكثر
باسني من راسي و خدم الكرهبة بالوقت...كبست عليه أكثر...باش نخنقو...ضحك يحكي
حسام:كان جات ليدي...نمشو لبقعة ما فيها حتى حد غيرنا...و مستحيل نفلتك من يدي
انا:حتى انا نحب نبقى معاك و كهو
غرس يدو في جنبي...و كمل يسوق...محسيتش بالثنية و انا بين يديه...هذا لي كنت بحاجتو ليلة كاملة و اول ما حليت عينيا...أول ما وصلنا...نزل راسو يحكي
حسام؛مريم...رقدت ياخي ؟
أنا:لا...جيست راسي يوجع فيا عزيزي
حسام:هيا معايا توا...و إرتاح في البيرو...متأكد لي ليلة كاملة مرقدتش
أنا:كنت نستنى فيك تطلبني...و تليفونك كان مسكر
حسام:سامحني حبي...الصباح باش فقت بيه
أنا:ميسالش
حسام:آخر مرة يا عمري...هيا توا
جبدت روحي شوية...نرد في شعري لتالي...تبسم و هو يغزرلي...ضيقت عينيا نحكي
أنا:لباس ماهو ؟ شنية يضحك فيك ؟
حسام:شي حبي...هيا توا
مديت يدي نزلت المرايا...نغزر لشفايفي لي منفوخين متوقعتش يكونو لهدرجة...قحرتلو نحكي
أنا:حسام...كيفاه باش نقابلهم هكا
حسام:قتلك بوسني ؟
أنا:بربي باش تمسحها فيا توا
حسام:هيا حبي...أكيد ماكش ناوية تعاركني توا
أنا:باهي
عديت صوابعي على شفايفي...طرشق بالضحك و هو يغزرلي...أول ما قحرتلو...حل الباب و نزل...خلطت عليه بالوقت...قرب مني شدني من يدي يحكي
حسام:عادي حبي معملتش حاجة عيب
أنا:بربي
حسام:هيا توا...مبعد حاسبني على راحتك...لازمني نكمل الدوسيات لي عندي
انا:باهي
كبست على يدو أكثر...و دخلت معاه...حسيت بالغزرات الكل علينا...اول ما وصل لبيروه...وقفت السكرتيرة تحكي
هي:سي حسام...الإجتماع متاع صباح...خليناه لغدوة على 10:00 كيما طلبت أنت
أنا:باهي برشا
هي:تستحق حاجة قبل ما تدخل
أنا:محمد هوني ؟
هي:لا لتوا مزال موصلش
انا:باهي وصي معاك على بيتزا بجبن زايد...و كولا زادة...متحبش حاجة اخرى ؟
هزيتلو براسي لا...دوب تبسملي...و عاود غزرلها يحكي
حسام:ما تخلي حتى حد يدخل عندي
هي:باهي سي حسام
أول ما دخلنا...باسني من خدي...و شد بلاصتو...حل الدوسي بالوقت...متوقعتش لخدمة فوق راسو لهدرجة و باقي يجري جرايري...نحيت كبوطي حطيتو عالفوتاي و بقيت ندور في البيرو...من غير حتى كلمة...تفكيري الكل في بابا...و كيفاه باش نقنعو بالعملية...قص عليا صوت تليفوني..هز راسو بالوقت...يغزرلي..دخلت بعضي و أنا نغزر لبابا يطلب فيا...غزرت لحسام...و هزيت عليه نحكي
انا:لباس بابا ؟
بابا:وينك عزيزتي ؟ البوتيك مسكر
أنا:اه...مشيت للفاك...فما شوية اوراق باش نريقلها
بابا:طول غديكا ؟
أنا:منعرفش...أول ما نكمل...نكلمك
بابا:باهي رد بالك على روحك
أنا:عيشك بابا
علقت عليه و نزلت يدي...نغزرلو كيفاه عاود غطس في دوسي...من غير حتى كلمة...حسيت بيه تغشش مني عندو حق...مانيش نعمل في حاجة حرام...اللي هوني راجلي...صحيح الظروف كانت ضدنا...اما مزلت على إسمو...هاذي هي الحقيقة الثابتة توا...حطيت تليفون عالبيرو...و قربت منو...وقفت وراه بالظبط...دورت يديا زوز على رقبتو...و حطيت راسي على كتفو نحكي
أنا:تغششت مني أنت ؟
حسام:لا
أنا:تعرف في وضعو هذا...ماهوش باش يتحمل
حسام:مريم...عادي يا روحي...من غير الحساسية هاذي الكل
أنا:شو كيفاه عوجت وجهك...مش عاجبك
حسام:تحبني نفرح...عالوضع لإحنا فيه ؟ هاني نحاول في جهدي نصلح لي تكسر...و أهم شي رضاية بوك
جيت باش نحكي...قص علينا صوت الباب...جبدت روحي شوية لتالي...نغزرلها و هي داخلة بالبيتزا..حطتها عالطاولة...و رجعت شعرها لتالي تحكي
هي:سي حسام...تحب حاجة أخرى
هزيتها و حطيتها...نغزر لجيب لي مفصل على بدنها...و الشوميز لي خلات صدرها باش يطرشق من تحتها يمكن الوضع عادي...أما لبستها و لون عينيها...ذكرني في شراز...قحرتلها نحكي
أنا:ما يحب حتى شي توا
هز راسو غزرلي بالوقت...و عاود غزرلها...هزلها براسو إيه...باش تخرج...أول ما سكرت الباب وراها...جبدت روحي منو نحكي
أنا:ياخي الخدامين هوني الكل هكا ؟
حسام:شقصدك ؟
أنا:حتى شي
حسام:مرررريم...تعرفني نفد من الألغاز هذوما
أنا:ما نقصد شي...فاش قام حتى تكش عليا
حسام:أستغفر الله...إيجا هوني
جبدني من يدي قبل ما نبعد عليه...وخر بالكرسي لتالي و قعدني في حملتو...كبس على كرشي يحكي
حسام:شبيك ؟
أنا:هاني قتلك حتى شي...أنت ستانست تعصب كي يبدا الموضوع متعلق بيك
حسام:هاني نسمع فيك
أنا:السكرتيرة متاعك ديما تلبس هكا ؟
حسام:شقصدك بهكا ؟
أنا:قصدي واضح حسام
حسام:شيهمني فيها شنية تلبس عزيزتي...كاتب عليها صداق أنا...باش نقلها متلبسش هكا
أنا:باهي اهدا
مد يدو رجعلي شعري لتالي...حطو على جنب...و قربلي أكثر...باسني من رقبتي يحكي
حسام:رهام ليها سنين تخدم معايا...و مش أنا لي نخلط بين خدمتي و حياتي...أما كان تحب تخدم في بلاصتها معنديش مانع
أنا:بربي
حسام:مممم
كبس على كرشي أكثر...و عضني بالوقت...عديت يدي على صدرو نحكي
أنا:حسام لازم هكا في كل مرة
حسام:شنعمل أنا...كي نضعف قدام بوسة الخال هاذي
أنا:أما توجع
ضحك بالوقت...و عاود باسني فوق تراص العضة يحكي
حسام:باهيشي هكا ؟
انا:ههههههه عالوضع باش تفلس على بكري
حسام:تعترف ملا...لإنتي قاعدة تلهي فيا
أنا:هاني باش نقوم...ناكل البيتزا متاعي...و أنت كمل على راحتك يا روح قلبي
خطفت بوسة من شفايفو...و جبدت روحي قبل ما يكبش فيا أكثر...تكى لتالي و تنهد بالقاوي...يحكي
حسام:صحة ليك
ترميت عالفوتاي...و هزيتها في حجري...و غزرتلو نحكي
أنا:متحبش تاكل ياخي
هزلي براسو لا...و عدا يدو على وجهو...مش قد بعضو حتى طرف...محبيتش نزيد معاه كلمة أخرى...على خاطرني منجمش نظمن شنية ينجم يعمل...أول ما كملت حطيتها من يدي...و تكيت لتالي...نحس في بدني تاعب عاللخر...لدرجة محسيتش كيفاه هزني نوم و رقدت...فقت على يدو...لي يعدي فيها على خدي..حليت عينيا بالسيف...نحكي
انا:ح..حسام سيبني
حسام:يا روحي فيق...راح الحال و بوك من بكري يطلب
أنا:قداش ساعة توا ؟
حسام:17:30
هزيت روحي مفجوعة...كبس عليا...و تبسم يحكي
حسام:سما الله عليك حبي...شبيك ؟
أنا:علاه مفيقتنيش
حسام:نعرف لي عديت ليلة فايقة على هذاكا
انا:مممم باهي...وصلني للبوتيك ملا
حسام:توا ؟
انا:مممم و من غديكا نمشي لدار
حسام:باهي هيا ملا
مديت وجهي بالوقت...تبسم و قرب مني...خطف بوسة من شفايفي يحكي
حسام:باهيشي هكا
انا:مممم
حسام:هيا ملا
هزيت الفاست متاعو من فوقي...حطيتها في يدو...و لبست كبوطي...كبشت فيه نعمل في الخطوة بالسيف...دايخة بالنوم...لدرجة منعرفش كيفاه وصلت للكرهبة...و عاودت ترميت في حملتو...ثنية كاملة...و يدو تتعدا بين خصلات شعري...لين وصلنا...باسني من راسي يحكي
حسام:هيا صغرون...وصلنا
انا:إمتى نرجع نشوفك ؟
حسام:بعد ما نكمل الخدمة نتعدالك للبوتيك...باهيشي هكا
انا:ممم توعدني
حسام:وعد يا روحي
هزيت راسي شوية غزرتلو...و مديت يدي حطيتها على خدو نحكي
انا:معادش طول عليا...و كلمني قبل ما ترقد
حسام:باهي حبي
كبس على يدي باسني منها...و قربلي أكثر...باسني من خدي يحكي
حسام:هيا عيش زين
انا:افففف منحبش نمشي
حسام:والله مذا بيا...متحبش نمشيو لدارنا
عديت عينيا على وجهو...و قربتلو أكثر...خطفت بوسة من شفايفو نحكي
أنا:معادش برشا...عندي ثقة فيك حسام
حسام:هيا أنزل ملا...كان تزيد دقيقة...ننسى كلشي و نطير بيك من هوني
أنا:نحبك
حسام:و أنا نموت عليك
تنهدت بالقاوي و نزلت من الكرهبة...أول ما وصلت للبوتيك...شاورتلو بيدي...تبسم و خدم الكرهبة...و على تلفيتي لقيتو يغزرلي من بعيد...نزلت راسي...و حليت البوتيك...باش نطفي الضو لي خليتو شاعل من صباح و نشد ثنية دار...و من حظي المطر قوات اكثر...و ظلامت دنيا معاها...رصاتلي نسكر الباب و نستناها لين تقص طفيت الضو...و قربت باش نهز تليفوني و نخرج...اما في لحظة رجعت خطوة لتالي...و انا نغزر لبلار البوتيك لي طاح عالارض مدقدق...صحت فرد صيحة...ووخرت لتالي اكثر...مع كل حجرة تدخل للبوتيك...دورت عينيا على ضو تليفوني...نغزر لكل قطعة جات في الأرض تكيت ورا الكنتوار نرد في نفس لي حسيتو تقص عليا بدني نحس فيه يلب بالعرق...قربت شوية باش نهز الفونتولين من الطاولة...اما فقدت تركيزي عالضربة لي جاتني على راسي...استندت بيدي عالارض...نحس في حاجة سخونة نازلة على خدي...و مع اخر حجرة لي جات على جنبي...طحت مروهجة...نغزر لتليفوني...لي يشعل و يطفى...حاولت نمد يدي باش نهز على أي حد...اما الدوخة لي حسيتها و النفس لي تسكر عليا خلاني نشوف روحي في بيت الكلينيك و بنتي في يدي...ملفوفة بالابيض...و تحرك في يديها زوز...دوب تبسمت عالحلمة المزيانة...لي ريتها في اخر تركينة متاع البوتيك...كبست على كرشي...من الضربة الثالثة لي جاتني عليها و من الوجيعة لي حسيتها...و الدم لي نازل من راسي...حسيت بيه على شفايفي و رقبتي...عينيا لي تسكرو بالسيف عليا...و خلاوني نغرق في بير غامق مرة اخرى...و رغم صياحي...اما مفما حتى حد سمعني..مفما حتى حد هوني معايا...في اللحظة هاذي...لا حسام و لا حتى بابا زادة...و امي معادش ريتها زادة...و بنتي لي غابت على عينيا...و من الظلام لي لقيت روحي فيه...و من حلمة لحلمة...لقيت روحي في كابوس...و معاد حسيت بحتى شي.