زهرة🌸

الحلقة مئة و أربعة

حلقة 104
زهرة تحكي:
بقيت نحرك في الشوكة...سارحة في الصحن...من غير حتى كلمة...تفكيري الكل في اللي صار البارح...لتوا مش مصدقة...اني كنت معاه مرة اخرى...بعد اللي تعدا علينا الكل...بعد ما حسيت اني خسرتو جملة...رغم لتوا نحس في بدني مدقدق...اما لتوا شايخة عاللي صار بيناتنا...اصلا اللي صار كان كافي باش يخليني نحس بحبو و لهوتو بيا...خلاني نعرف انو مهما تعدا علينا الوقت...و مهما كانت مشاكلنا كبيرة...و مهما بعدنا على بعضنا...حبنا ماهوش باش ينقص جملة...العكس...لي حسيتو خلاني نتأكد...انو حبنا كبر اكثر...و حتى شي في الدنيا ماهو باش يدمر حبنا و لا حتى ينجم يفرقنا على بعضناحطيت يدي على رقبتي...تحت شعري بالظبط...غمضت عينيا بالقاوي...و انا تحسس في العضة متاعو...تبسمت بالوقت...و انا نذكر في اللي صار بالتفصيل...كانو اول مرة عمر يملكني...و لا نقول كاني قاعدة نعشق فيه من اول و جديد...كلامو...ضحكتو...لمسة يديه...بنة شفايفو زادة...حاجات ترسخت في مخي...و عطاتني امل من اول و جديد...فقت من سرحتي...على صوتو...لدرجة اني نسيت لهو قاعد بجنبي و يغزرلي...رغم اني معاه فرد دار و فرد طاولة...الا اني لغيت وجودو من حياتي جملة...كلشي يهمني...اني نلقى الحل لي يخرجني من هوني من غير ما نضر حتى حد...هزيت راسي غزرتلو...و نسمع فيه فرد وقت يحكي
مراد:لباس ماهو ؟
انا:مممم عاللخر
مراد:شبيك ماكش تاكل ؟
انا:معجبنيش
مراد:تحب حاجة اخرى ؟
انا:لا...صحة ليك...انا باش نمشي نشوف امي توا
هزيت روحي وقفت...وقف في جرتي...غزرت لوجهو بالوقت...من ملامحو عرفت لهو معصب عاللخر...نطر الكرسي لتالي...و غزرلي ندرا كيف يحكي
مراد:شفما ؟
انا:حتى شي
مراد:تصرفاتك تقول العكس
انا:تصرفاتي ديما تقول العكس مراد...انت برك متحبش تشوف الحقيقة
قرب مني شدني من يدي و كبس عليا...لين حسيت صوابعو تغرسو في لحمي...و نفس الغزرة في عينيه...الغزرة لي ينجم يدمر بيها كلشي في لحظة وحدة...و كهو...جا باش يحكي...قص علينا صوت تليفونو...لي باقي ينوقز..محبش يسكت...جبدت روحي منو...وخرت خطوة لتالي...و حطيت يدي على تراص صوابعو...لي خلات الدم يتحصر في المعصم متاعي...هزيت راسي قحرتلو...نفخ بالقاوي...و هز عليه يحكي
مراد:شفمااا زاادة ؟
جيت باش نمشي...اما صوتو خلاني ناقف في بلاصتي...مرة اخرى...هزيت راسي...غزرتلو...و نسمع فيه فرد وقت يحكي
مراد:عاايش ؟
كبست بيدي عالكرسي...اول احتمال جا لمخي...انو عمر صارتلو حاجة...منعرفش كيفاش تلمت الحروف بين شفايفي...خذيت نفس بالسيف...نحكي
انا:ش..شفما ؟
علق عليه...و هز عينيه في وجهي...بقيت نغزرلو...نستنى فيه يقول اي حاجة...عدا يدو على وجهو...الحاجة لي دخلتني بعضي اكثر...غزر في عينيا  يحكي
مراد:حساام
ضيقت عينيا مستغربة...و كبست عالكرسي اكثر...حسيت نفس تسكر عليا في لحظة...دوب نجمت نلم الحروف باش نحكي
انا:شبيه حسام  ؟
مراد:عمل اكسيدون عشية
حطيت يدي على فمي مصدومة...حسيت الدنيا الكل دارت بيا و شعرة لا طحت...قرب مني...شدني من كتافي بالوقت يحكي
مراد:هدي روحك عزيزتي
هزيت راسي شوية...غزرت لوجهو...و مديت يدي حطيتها على صدرو...نحكي
انا؛ع..عايش ؟ قلي حسام مزال عايش مش هكا ؟
مراد:عايش...توا وين خرج من العملية
انا:هزني عندهم توا
مراد:كان تحب نمشو صباح
انا:نحب نشوف حسام توا
مراد:باهي...اقعد هوني...لي تجيبلك فضيلة كبوطك
قعدت عالكرسي من غير حتى كلمة...جابلي كبوطي و رجع...يحكي
مراد:هيا قوم
هزيت روحي بالسيف لبستو...و هزيت تليفوني من الطاولة...خلطت عليه...نمشي جهامة بلا روح...ركبت بجنبو من غير حتى كلمة...دموعي تحصرو بين عينيا...تعدات بين عينيا اللحظات لي جمعتنا الكل...من اول مرة قابلتو فيها في نادي...حسام كان اكثر من خويا...لي تحرمت منو...مستحيل ننسى وقفتو معايا مهما صار...جات بين عينيا مريم...مريم لي تحرمت من كلشي في دنيا...و توا تحطت قدام امتحان اخر...مستحيل تنجم تتحمل اكثر من هكا...نزلو دموعي على خدي...منجمتش نمنعهم...فكرة انو احنا باش نخسرو حسام...منجمتش نتقبلها...نعرفو قوي...و باش يتعدا كلشي...على خاطر امي فتحية...مريم و محمد...حط يدو على يدي...كبس عليا يحكي
مراد:متخاافش...باش يكون لباس
جبدت يدي منو...مسحت دموعي و تنهدت بالقاوي...نحكي
انا:ان شاء الله
نزلت البلار...و سرحت لبعيد...معاد نجم نخمم في حتى شي كان اني نوصل عندهم و كهو...اول ما شد الفران...نزلت من الكرهبة نجري...خلط عليا يمشي ورايا...سألت عليهم...و مشيت للاصونصير بالوقت...دخل ورايا يحكي
مراد:زهررة هدي روحك
انا:مش قبل ما نطمن عليه
بقيت نفرك في يديا...نحسب في الوقت بالثانية...اول ما حبس...حليت الباب و خرجت...لقيتهم الكل مع بعضهم...قربت منهم بالزربة...اول وحدة تلفتت عندي مريم...الخطوات لي بيناتنا...محيتهم وقت قربت منها و عنقتها بكل قوتي... بوحش الشهور لي تعدات علينا...جبدت روحي منها شوية...حاوطت وجها بيديا زوز نحكي
انا:حسام باش يكون مليح لباس...عندي ثقة لهو باش يقوم لباس
هزتلي براسها ايه...ورجعت حضنتني...كبست عليها بيديا زوز...نهدي فيها...انا اكثر وحدة...و مستغربتش كي ملقيتهاش تبكي...نعرف لهي مستحيل تبكي توا...و لا تنزل منها دمعة...و هذاكا لي يخليها اضعف وحدة فينا...كبست عليا تحكي
مريم:خليك معايا زهرة
خذيت نفس..و عديت يدي على شعرها...نحكي
انا:هاني معاك يا روحي
جبدت روحي شوية...و تلفت لمحمد لواقف بجنبها بالظبط...قربت منو...شديتو من يدو...نحكي
انا:توا وين عرفت
محمد:ميسالش
قربت منو حضنتو بالوقت...مريم...محمد و حسام...امي فتحية...هوما العيلة لي تحرمت منها...و هوما كانو الملجأ متاعي في نهار من نهارات...نزلو اكثر...خذيت نفس نحكي
انا:متأكدة باش يكون مليح
محمد:ان شاء الله
خذيت نفس و عديت يديا زوز على وجهي...مسحت دموعي...و تلفت نغزرلو...متكي بدنو عالحيط...و هي واقفة بجنبو...غزرت لعينيه بالظبط...انا كهو...نعرف شنية حسام بالنسبة لعمر...و نعرف شنية لي قاعد يحس فيه بالظبط...اما منجمت نعمل حتى خطوة...منجمتش نقرب منو...رغم انو غزرتو ليا كافية باش تخليني نرمي كلشي ورايا و نترمى في حضنو...اما مراد لي واقف يراقب فينا من بعيد...خلاني جامدة في بقعتي من غير حتى حركة...فقت من سرحتي على صوت محمد يحكي
محمد:زهرة...انتي الوحيدة لي تنجم تقنعها تمشي ترتاح شوية
مريم:مانيش باش نمشي لحتى بلاصة
محمد:مريم مش وقت عنادك
انا:ميسالش...خليها على راحتها
هزلي براسو ايه...شديتها من يدها و قربت من البلار...وقفت بحذاها...نغزرلو...و لا مرة توقعت نشوف حسام في الحالة هاذي...مشى محمد باش يطمن على امي فتحية...عمر و ملك...منعرفش وين مشاو...خذيت نفس و تلفت عندها نحكي
انا:مريم...ايجا ارتاح شوية
مريم:منحبش نخليه وحدو
انا:ماهوش وحدو يا روحي...اما عالاقل كي يفيق ميلقاكش في الحالة هاذي
مريم:باش يفيق مش هكا ؟
انا:متخافش...حسام قوي و باش يعديها...هيا معايا توا
تلفت لعم احمد...و طمنتو لهي باش تكون معايا...خلطت علينا رنيم...بعد ما مشى مع طاطا حياة...دخلنا لبيت امي فتحية...لي غطست في نوم بعد ما حطولها سيروم...قعدت عالفوتاي بجنبها...من غير حتى كلمة...نعرف لي باش نقولو ماهوش باش يواسيها...محمد خرج و رنيم قعدت معانا...بقيت نهدي فيها لين غفات في حضني...عدلتها عالفوتاي...و هزيت الملحفة لي محطوطة على جنب...حطيتها فوقها...غزرت لرنيم نحكي
انا:تحب تقعد هوني و لا تخرج معايا ؟
رنيم:باش نمشي نشوف محمد
هزيتلها براسي ايه...و خرجنا مع بعض...لقيت مراد يستنى فيا...خذيت نفس و قربت منو نحكي
انا:مزلت هوني ؟
مراد:تحبني نخليك وحدك ؟
انا: انا مع عيلتي مراد...مانيش وحدي
مراد:خلينا نمشو توا...و نرجعك صباح
انا:امشي انت...انا مانيش باش نرجع قبل ما يفيق حسام
جا باش يحكي...مديت يدي حطيتها على زندو...نحكي
انا:مش اليوم مراد...انا نحب نبقى هوني
مراد:باهي على راحتك...رد بالك على روحك...و كان صارت حاجة كلمني...و تو نبعث اشرف يبقى معاك هوني
انا:باهي...طمن
هزلي براسو ايه...ووخر خطوة لتالي...بقيت نغزرلو...لين غاب على عيني...تنهدت بالقاوي...و تلفت نغزر لخالتي نعيمة لي واقفة بحذا البلار...خذيت نفس و قربت من الدروج...نزلت اللوطة...و مشيت للكافي...قربت من الكنتوار طلبت قهوة...على تلفيتي لقيتهم قاعدين مع بعضهم...هزيت حاجبي مستغربة...وقت حطت يدها على يدو...دورت وجهي بالوقت...منحبش نركز معاهم اكثر...اصلا معادش نجم نتحمل شي آخر توا...حطيت الفلوس عالكنتوار...و شديت عليه كاسة القهوة...كبست عليها في يدي...و خرجت للجنينة...قعدت على كرسي مطرف...الدنيا باردة بصفة غريبة...خاصة و توا نص الليل...كبست عالكاسة اكثر...ندفي في يديا بيها...منعرفش شنية مزال باش يصير فينا اكثر...حسام لازمو يعيش...على خاطر الناس لي تحبو لازمو يقاوم...عالاقل يعيش لي تحرم منو مع مرتو...المدة هاذي الكل...و يفرح بصغير آخر بعد ما خسر بنتو...دورت راسي شوية.. كي حسيت بيه قعد بجنبي...من غير ما يقول حتى كلمة...متوقعتش باش يخليها وحدها و يخلط عليا...اصلا معاد نجم نتوقع حتى شي...تكى لتالي و تنهد بالقاوي...تنهيدة كانت كافية باش تلخص لي قاعد يحس فيه...خذيت نفس و مديت يدي حطيتها على يدو من غير ما نخمم مرتين...غزرتلو نحكي
انا:باش يكون مليح...نعرف لحسام قوي و باش يتحمل
عمر:منجمش نخمم في احتمال غير هكا
حطيت الكاسة على جنب...و قربت منو لين معادش فما مسافة بيناتنا...كبست على يدو اكثر نحكي
انا:انت زادة لازم تكون قوي عمر...على خاطر امي فتحية و محمد زادة...معندهمش غيرك
غزرلي ندرا كيف...غزرة خلاتني نفهم حجم وجيعتو...هزلي براسو ايه...يحكي
عمر:و انا بحاجتك انتي توا
حطيت يدي على خدو...و هزيتلو براسي ايه...نحكي
انا: انا معاك ديما يا عمر
كبس على يدي فوق خدو...باسني منها...و نزل عليا اكثر...حط راسو على صدري...و دور يديه زوز عليا...كبس عليا بكل قوتو...مسحت اول دمعة نزلت من عيني...حطيت يدي على خدو...و هزيت يدي لاخرى نعدي فيها بين خصلات شعرو...نهدي فيه...نزلت عليه شوية...بستو من جبين...و خذيت نفس نحكي...من غير ما نبعد شفايفي عليه
انا:كلشي باش يكون مليح...يا روحي...صدقني
عمر:خليت مريم وحدها ؟
انا:خليتها راقدة بجنب امي فتحية...عالاقل ترتاح شوية
عمر:باهي برشا
انا:شنية قال طبيب ؟
عمر:48 ساعة الجاية...تحدد اذا كان باش يعيش و لا
قصيت عليه كي حطيت صوابعي على شفايفو...تكفي الغصة لي واحلة في حلقو...كبست على شعرو نحكي
انا:ماهو باش يصير حتى شي...متأكدة لهو باش يعديها و يفيق
عمر:باش تبقى هوني انتي ؟
انا:اكيد يا روحي
كبس على يدي...لي قاعدة نعدي فيها على خدو...باسني منها مرة اخرى...جبدتها منو موجوعة...هز راسو شوية يحكي
عمر:شنية هذا ؟
انا:شنوة ؟
كبس على يدي...يعدي في عينيه على تراص صوابعو لي تغرست في لحمي قبل ما نجو لهوني...جبدت يدي بالوقت نحكي
انا:حتى شي
عمر:سألتك شنية هذا ؟
انا:لباس عليا عمر...شبيك كبشت ؟
عمر:الكلب هذاكا عمل فيك هكا
سكت بالوقت...ملقيتش شنية نقولو...اصلا لي تراص واضحين عالمعصم متاعي...كأنو تعمد باش يخلي بصمتو عليا كي العادة...نفخ بالقاوي يحكي
عمر:شصار ؟
انا:تقلق مني و كهو
عمر:و كهو ؟
هزيت يديا زوز...حطيتهم على وجهو...اول ما حسيتو باش يفقد اعصابو...غزرتلو لعينيه و خذيت نفس نحكي
انا:ما صار شي عمر...حياة حسام اهم مني توا...كلشي باش يكون مليح صدقني...مراد مينجم يعملي شي
عديت عينيا على وجهو...اول مرة يغزلي بالطريقة هاذي...لدرجة خفت من اللي قاعد يدور في مخو...منجمتش نغزرلو اكثر...جبدتو عندي بالوقت عاودت حضنتو لصدري...كبست عليه و بستو من راسو...صوابعو لي كانت تتعدا على تراص يدي...خلاتني نتاكد من اللي قاعد يدور في راسو...غمضت عينيا بالقاوي...و عاودت حليتهم...و في كل لحظة نزيد ننقم على مراد اكثر من قبل...كل مرة نحس انو نجم نخسر عمر...جرد فكرة انو باش يجي نهار و نشوفو في نفس حالة حسام...خلاتني نكبس عليه اكثر...مهما صار...مانيش باش نسمحلو...يقرب منو...و لا حتى يضرو مرة اخرى...اما قبل ما نخمم في هذا الكل...نحب نطمن على حسام...و نعرف لي الوجيعة داخل كل حد فيهم وفات...و اهم شي نحب عمر يكون قوي ديما...على خاطر صاحبو و على خاطري انا زادة...نعرف لي حالة حسام هداتو عاللخر....منحبوش يخمم في مشاكلنا فرد وقت...متاكدة لماهوش باش يتحمل اكثر...على هذاكا نحبو يرتاح من كلشي و كهو.
🌸🌸🌸🌸🌸🌸🌸🌸🌸🌸🌸🌸🌸
#رنيم_تحكي:
خرجت للجنينة نفركس عليه بعينيا...منعرفش وين مشى بعد ما خرج من البيت...من وقت عطيتو الخبر في تليفون...معاودتش حكيت معاه مرة اخرى...سوايع تعدات...بقيت نغزرلو من بعيد...لا نجمت نقرب منو و لا نحكي معاه...لي صار كان صدمة لينا الكل...مكانة حسام واضحة عند كل حد فينا...انا اكثر وحدة نعرف قداش يحب مريم...و شنية عمل على خاطرها...نعرف لهو ميستهلش هذا الكل...و نعرف كمية الخوف لي مزروعة داخل كل حد فينا...عشت الحالة هاذي قبل مع مريم...اما لي صار ليلة قوي برشا...خاصة موت السيد لي عمل معاه الاكسيدون...و الحالة لي كانت فيها عيلتو...لي صار كابوس بالحق...خذيت نفس من النسمة الباردة...و تلفت نغزرلو...قاعد عالكرسي...مشبك يديه و يغزرلهم...قلبي خض بالقاوي...منعرفش شنية نعمل بالظبط...منعرفش اذا نقربلو و لا نخليه قاعد وحدو...منعرفش اذا وجودي باش يكون عندو فايدة و لا لا...نعرف الموقف لهو فيه صعيب برشا...و حمل كبير عليه...و رغم التساؤولات لي هدت عليا...ساقيا هزتني ليه بلا ما نحس...قعدت بجنبو...و هزيت راسي شوية نغزرلو...نغزر لتفاصيل وجهو الحزينة...لملامحو لي غطى عليها الحزن في ساعات برك...قلبي حسيتو باش يخرج من بقعتو...من دموعو لي تحصرو...هزيت يدي من غير ما نخمم مرتين....حطيت صوابعي على خدو...و اول دمعة جات في يدي...كبست عليها...مع دمعتي لي نزلت....تلفت عندي بالوقت...غزرلي ندرا كيف...غزرة كافية باش تخليني نعرف كمية الوجيعة و الحرقة لي في قلبو...عاود دور وجهو...من غير ما يقول حتى كلمة اخرى...خذيت نفس...و قربت منو شوية...لين عدمت المسافة بيناتنا...دوب لقيت الكلام باش نحكي
انا:م..مانيش باش نقلقك...اما نحب نقعد معاك و كهو
تنهد بالقاوي...و نزل راسو...من غير ما يقول حتى كلمة...دقايق تعدات علينا و احنا ساكتين...اصلا معنديش كلام باش نواسيه بيه...نعرف لي صار صعيب برشا...و الوقت لي جاي اصعب من توا...مش بالعادة نشوفو هكا...هاذي اول مرة نشوف محمد في الحالة هاذي...اول مرة نشوف دموعو...و اول مرة منعرفش شنية نعمل بالظبط...لميت طرف القوة لي عندي...و مديت يدي مترددة...حطيتها في يدو...كبست عليها...من غير ما نقول حرف...يكفي لهو يحس انو ماهوش وحدو...و انو فما حد بجنبو...حتى كان وجودي ماهوش باش يصنع فرق....مانيش باش نخليه وحدو...مهما صار...كبس عليا في لحظة...هزيت عينيا في وجهو مستغربة...سرحت في وجهو مع ضو الكلينيك لي ضارب فيه...بقيت ساكتة...بلا ما نقول حتى كلمة...جيست نسمع فيه و هو  يحكي
محمد:كان عمري 7 سنين وقت مشى بابا و خلانا...دوب نجمت نستوعب لهو بالرسمي مات و معادش يرجع...حليت عينيا على حسام...كنت نشوف فيه البو لي فقدتو...قبل ما يكون خويا...كلشي كنت نحب عليه نطلبو منو...مكانش يرفض...مهما كان طلب متاعي...كان يحضر بالوقت...تربيت من غير بو...اما حسام مخلانيش نحس بالفرق...رغم انو هو زادة خسر بوه...رغم انو هو زادة كان يتيم كيفي بالظبط...اما هذا الكل مشفعلوش عندي...على خاطر طفلة...على خاطر كذبة...خسرت خويا سنين طويلة...معملتش خاطر لتضحيات متاعو...و للحاجات لي تحرم منها على خاطري انا...خسرتو من قبل و باش نخسرو توا زادة
سكت شوية...مع الغصة لي وحلت في حلقو...و دموعو لي تحصرت اكثر...كانو يفركس عالنفس باش يكمل كلامو...مديت يدي لاخرى...حضنت يدو بين يديا زوز...نحبو يحكي كلشي و يرتاح...نعرف بالقدا شنية لي قاعد يحس فيه...تعديت بيه قبل...نعرف شمعناها تخسر حد و هو قريب منك و معاك فرد دار...تخسر سنين من عمرك جراير غلطة و انت ما عملت لا ايدك و لا ساقك...يمكن كان يحكي لي عندو توا...يرتاح و تنقص وجيعتو شوية...هذا لي كنت نعملو ديما وقت ضعفي...ووقت حسيت لانا باش نخسر اختي...حكيت كلشي داخلي و كلشي نحس فيه ليه هو...رغم اني منعرفوش قبل...تنهد بالقاوي و كمل كلامو يحكي
محمد:تعرف قداش من مرة رفضت اني نسمعو ؟ تعرف قداش من مرة وجعتو بكلامي...رغم اني كنت نعرف شنية الماضي بالنسبة ليه...رغم اني كنت نعرف لمكانش غالط في حق شراز...اما كنت نخفف وجيعتي كي نلومو...كي نرمي عليه الذنب...5 سنين تعدات و هو متحملني...متحمل كلامي...متحمل طيشي و هبالي...و متحمل الخماج لي كنت غاطس فيه...تعرف علاش ؟
بقيت نغزرلو من غير حتى كلمة...كاني قاعدة نتعرف على حياتو قبل...على حاجات مكانش باش يحكيها...و باش تبقى توجع فيه ديما...عدا يدو على وجهو...مسح دموعو...و تكى لتالي يحكي
محمد:على خاطرني أمانة عندو...امانة بابا...رغم لي عملتو الكل...كان ديما يتنازل و يساامحني...كان ديما يعديلي...رغم اني كنت واحد فااسد...ما نجي شي قدامو...اما كان ديما السند لي نتكى عليه...كنت ديما كي نضيع و رغم ماشي في بالي لي هو الغالط...نمشيلو ليه...نرمي حملي عليه...و نطلب كلشي منو...كانو واجب عليه مش مزية فيا...انا غلطت في حق خويا برشااا...ظلمتو على خاطر كذبة...و عمري ما خممت نفركس عالحقيقة...كان مظهرتش قدامي وحدها...كنت باش نبقى نلوم فيه حياتي الكل...اما تعرف شنية اكبر غلطة عملتها وسط هذا الكل ؟
هز راسو شوية...غزرلي...غزرة فيها كمية كبيرة من الوجيعة و القهرة...غزرة خلات دموعي ينزلو بالوقت...و منجمتش نتحكم فيها...كبست على يدو اكثر...نحب ناخو من وجيعتو حتى شوية...غمض عينيه بالقاوي...و عاود حلهم...يحكي
محمد:اكبر غلطة عملتها...اني مطلبتش السماح منو...اني رغم لي عملتو الكل...اما عمري ما وقفت قدامو و قتلو سامحني...على كلشي عملتو فيك...و منعرفش اذا باش تكون عندي فرصة اخرى و لا
قصيت عليه كي حطيت صوابعي على شفايفو...مخليتوش يكمل باقي كلامو...مستحيل حسام يمشي و يسلم بالسرعة هاذي...لازمو يكون اقوى من هكا...و ميخممش في حاجة خايبة مهما صار...لازم يكون عندو ثقة في خوه انو مهما صار ماهوش باش يمشي و يخليه...هزيتلو براسي لا...و غزرت لعينيه...نحكي
انا:ششش...رد بالك محمد...صدقني خوك باش يكون مليح...حسام مستحيل يسلم بالسهولة هاذي...ماهوش باش يخليك و لا يخلي مريم...ماهوش باش يحرق قلب امو و يخليها...في الفترة لي عرفت فيها حسام...تخليني متأكدة لهو قوي و باش يقاوم...صدقني خوك ماهوش باش يخليك...مش انت أمانة عندو...اكيد ماهوش باش يسلم فيك...باش يرجع و يكون عندكم وقت كافي باش تطلب منو سماح...و تعوض لي تحرمت منو الكل...باهي هزلي براسو ايه...جبدت يدي منو و قربتلو اكثر...عنقتو بيديا زوز...كبسة يديه على ظهري...كانت كافية باش تخليني نحس بوجيعتو...و الخوف لي قاعد يعيش فيه...لزيت ليه اكثر...و حطيت يدي على راسو من تالي...نعدي في صوابعي بين خصلات شعرو...دمعتو لي نزلت و تغلغلت في رقبتي...خلات دموعي تنزل من غير ما نحس...نكذب كان نقول لهو ما يعنيلي حتى شي...نكذب كان نقول لانا منحبوش...اللي نحسو معاه...اكبر ببرشا من اني نجم نوصفو...اكبر ببرشا من اني نجم نخليه و نسلم فيه...رغم قصة حبو تعدا عليها برشا...اما لتوا نحب نعرفها الطفلة هاذي...نحب نشوف الطفلة لي عدا سنين من عمرو و هو يحب فيها...حتى بعد لي صار...منجمش نصدق لهو نحاها من قلبو جملة...قلبو لي نحس في دقاتو تضرب في صدري...دقات نحس لهي من حقي انا و كهو...عمري ما توقعت انو الراجل لي هد عليا لبيتي...في ليلة من الليالي...باش يعمل فيا هذا الكل...باش ياخو قلبي و عقلي معاه...باش يخليني نعيش حاجات منعرفهاش قبل...و ما جربتها مع حتى حد غيرو...انو الراجل هذا مهما هربت منو...نلقى روحي عندو...و في حضنو...راجل وثقت فيه حتى قبل ما نعرفو...راجل قلبي دق ليه هو و كهو...راجل جربت معاه كلشي لاول مرة...اول غزرة...اول تعنيقة...اول دقة حب...اول بوسة...كلشي معاه كان عندو لمسة سبيسيال في حياتي...و وجيعتو توا...حرقتني بصفة غريبة...وجيعة لي مهما عملت و مهما قلت ماهيش باش تنقص...الا بعد ما يفيق خوه و يرجعلو...سوايع لي جاية باش تكون اكبر امتحان ليه و لمريم زادة...و كل حد منهم يلزمو يكون قوي على خاطر حسام و كهو...خذيت نفس و جبدت روحي منو شوية...من غير ما نبعد عليه...نفس متاعو كان سخونة برشا على وجهي...عكس البرودة لاحنا فيها برا...يديه زوز قعدو على ظهري...خذيت نفس و حطيت يديا زوز على وجهو...و غزرت لعينيه...نحكي
انا:حسااام باش يكون لباس...و باش يرجع...و انا باش نشتكيلو لي عملتو فيا الكل...اصلا انت حد ما ينجم عليك غيرو هو...و كهو
محمد:بربي ؟
انا:مممم...باش نحكيلو كلشي...و باش نقولو لانت ديما تبكيني...و ديما تاخو قرارات غالطة...و تعمل لي تحب عليه انت و كهو
محمد:هذا الكل ؟
انا:و مزال برشا
محمد:شنية اكثر ؟
انا:باش نحكيلو على الطفل لي ضربتو زادة
محمد:هاذي بالظبط باش يشكرني عليها
انا:بربي ؟
محمد:والله
عديت عينيا على كل تفصيلة في وجهو...و كبست عليه اكثر...نحكي
انا:اما زادة...باش نقولو...رغم كل لي عملتو فيا...ماكش انسان خايب...و اكثر حد وقف معايا و فهمني...و اكثر حد نحس معاه بالامان...و مهما هربت منو...مستحيل يخليني...و باش يبقى ورايا ديما
هز حاجبو بالوقت...و غزرلي ندرا كيف...خذيت نفس نحكي
انا:انت قتلي ؟ مش هذا كلامك انت ؟
ضحك بالوقت...آخر حاجة توقعتها...اني نشوف ضحكتو الليلة...كبست على شفايفي بالوقت...عاود حضني بالوقت...و عدا يدو على ظهري يحكي
محمد:مانيش باش نخليك رنيم...مستحيل نسلم فيك...و باش تكون علاقتنا اول حاحة نحكيها لحسام بعد ما يفيق
انا:باش يوافق ؟
محمد:اكيد...مش انتي مصدر المخابرات متاعو
ضربتو بيدي لكتفو...باش يسكت...كبس عليا اكثر و باسني من راسي يحكي
محمد:صدقني كنت بحاجة حد يسمعني
انا:كنت بحاجتي انا...مش حد آخر
محمد:و انا عندي حد غيرك
انا:لا معندكش
هزيت راسي شوية...من غير ما نبعد عليه...غزرتلو نحكي
انا:خليك قوي محمد...حسام بحاجتك انت...اكثر منا الكل...هو بحاجة خوه توا
محمد:باهي يا روحي...مريم وينها ؟
انا:رقدت في البيت مع خالتي فتحية
محمد:باهي برشا...لازمها ترتاح شوية
انا:مريم...ماهيش قوية برشا...باش تتحمل هذا الكل
محمد:حتى حد فينا ماهو قوي يا رنيم...اصلا منجمش نحط احتمال لي باش يجي نهار...يمشي حسام و يخليني
انا:حسام باش يكون بخير...متأكدة
محمد:ان شاء الله
انا:شقولك ندخلو توا ؟
محمد:علاش ؟
انا:مزلت مريض
محمد:لباس عليا عزيزتي
نزلت عينيا من وجهو...و مديت يديا زوز...حطيتهم ورا ظهرو بالظبط...حسيت بشفايفو لي تحطت على راسي...غمضت عينيا بالوقت...منحبش نخمم في اي حاجة خايبة...و لا حتى جرد احتمال...انو حسام باش تصرالو حاجة...لا محمد و لا مريم...و لا حتى حد فينا يمكن يتحمل لي باش يصير...الوقت لي جاي اصعب من انو حد يخمم فيه...و كلشي باش يبقى بيد ربي...و الارادة متاع حسام...اذا باش يقاوم و لا لا...48 ساعة باش تكون فاصل في حياتنا الكل...و مهما كان خوفنا ووجيعتنا...ماهيش باش تكون قد وجيعة خوه و امو...مريم و عمر زادة...كبست عليه اكثر...بعد ما حسيتو هدا على قبل...يدو لي قعدت تتعدا على شعري...خلاتني نغفى...من غير ما نحس على روحي...على امل انو يطلع نهار جديد...مع اخبار باهية...اخبار ترد الروح في كل حد فينا...نهار جديد...و فرصة جديدة لكل من محمد و مريم...انو يصلحو لي تكسر في الماضي...و يخلو علاقتهم قوية...و مهما كان لي باش يصير...مشباش يخلو اي حد آخر يتدخل بيناتهم...كل حد منهم...باش تكون عندو فرصة يعرف فيها قيمة حسام في حياتو...و زوز باش يعملو جهدهم...باش يعوضو لي فاتهم...و يعيشو مع حسام لي تحرمو منو الكل
🌸🌸🌸🌸🌸🌸🌸🌸🌸🌸🌸🌸🌸
مريم تحكي:
حليت عينيا شوية...على صوت قوي...صوت نعرفو و ديما يجيني في احلامي...صوت بنتي و هي تبكي...هزيت راسي شوية...نفس البلاصة مرة اخرى...نفس البحيرة لي صوتها تحفر في مخي و منجمتش ننساه...استندت بيديا الزوز عالارض...و هزيت روحي وقفت...بنفس الروبة البيضة متاع كل مرة...دورت راسي في كل شيرات...نفركس على صوت بنتي...نحب نشوفها مرة أخرى حتى كان الحكاية مجرد حلمة كي العادة...اما حبست في بقعت كي ريت امي واقفة بحذا البحيرة بالظبط...و فرح بين يديها...كيما آخر مرة...هزيت يدي باش ناديلها...اما سكت و صوتي ضاع وسط الحلمة...وقت ريت حسام لي قرب منهم في لحظة...غزرتلو مستغربة...الكلام وحل في حلقي و منجمت نقول حتى حرف...نغزرلو كيفاه استلم فرح من يدها...و قربها لعندو...يشم في ريحتها...مديت ساقي باش نخلط عليه...اما منجمتش...بدني مش مطاوعني...و منجمت نعمل حتى حركة...كانو فما شكون كابس عليا...خرج صوتي بالسيف عليا...و انا نصيح بكل قوتي
انا:حساااام...حساااام فاااش تعمل ياااخي...ارجع لهوني اماانك...حسااااام
تبسملي ندرا كيف...و كبس على فرح لي قصت عالبكا في حضنو...هزيتلو براسي لا...نعرفها البلاصة هاذي بالقدا...نعرف كان يمشي فيها ماهوش باش يرجع....البلاصة هاذي...في كل مرة تاخو مني حد نحبو و قريب ليا و مستحيل كان يرجع منها مرة اخرى...غمضت عينيا بالقاوي...منحبش نخمم لهو باش يعملها و يمشي و يخليني زادة...منحبش نغزرلو...منحبش نشوف نفس المشهد مرة اخرى...نعرف لهو مستحيل يعملها...نعرف انو هذا الكل حلمة...كيما كل مرة...حلمة تاخو مني كلشي في الواقع...مجرد حلمة و كهو...هذا لي كنت نعاود فيه داخلي من غير ما نحل عينيا...نفس الخوف متاع كل مرة تسلل داخلي...نفس الخوف حسيتو وقت خسرت امي و بنتي...عيطت عليه بكل صوتي...و حليت عينيا مفجوعة...تقعدت بالوقت نرد في النفس...نحس في بدني الكل يلب بالعرق...رجعت شعري لتالي...و دورت عينيا عالبيت...حتى امي فتحية مفماش في فرشها...و زهرة ماهيش موجودة...الضو لي داخل من شباك...اكدلي لي وفا شطر الوقت...و نهار طلع...الوقت لي عديتو راقدة من غير ما نحس...طيشت الملحفة من فوقي...و هزيت روحي....خرجت من البيت نجري...كلشي يهمني اني نشوفو و نتأكد لهو لباس...منعرفش على روحي كيفاه وصلت ليهم...جمدت في بقعتي و انا نغزرلهم الكل واقفين بحذا البلار...منجمش نحط جرد احتمال انو صارتلو حاجة...منعرفش كيفاه لميت طرف القوة لي عندي و قربت منهم...دخلت في وسطهم من غير ما نقول حتى كلمة...وقفت بحذا البلار بالظبط...منجمتش نشوف وجهو...منجمتش نغزرلو...و هو محاوط بالفراملة و الطبيب معاهم...كبست بيدي عالبلار من غير ما نقول كلمة...من غير ما نسمع حد منهم لا كلامهم و لا بكاهم...و لا حتى صياحهم...نعرف لهو هو اقوى من هكا...نعرف لهو باش يعدي مرحلة الخطر مهما صار...غمضت عينيا بالقاوي ندعي سري و نحكي معاه كأنو يسمع فيا...حليت عينيا على صوت الماشين و صياح محمد لي ضرب عالبلار في لحظة...جبدت روحي منهم و مديت يدي حليت الباب...من غير ما نخمم مرتين...اول ما دخلت...قربت منو بالزربة...حبسني الطبيب كي تلفت عندي....غزرتلو نحكي
انا:ا..اعمل حااجة امااانك...متخليهش يمشي و يخليني اماانك...نعرف لهو باش يقااوم...حاول مرة اخرى...اماانك
كبس على كتافي في لحظة...دم جمد في عروقي...هزيتلو براسي لا...منحبش نسمع كلامو...و لا اللي باش يقولو...جييت باش نحكي...قص عليا بكلامو
هو:اهدا مدام
انا:اعمل حاجة امااانك...اماانك
هو:سي حسام لباس...انتي اهدا توا
انا:ش..شقصدك ؟
هو:تعدا مرحلة الخطر
هزيت راسي شوية نغزر...للفرملية و هي تعدل في سيروم...و عاودت غزرت لطبيب مش مصدقة لي نسمع فيه...تبسم و كمل كلامو يحكي
هو:تعدا مرحلة الخطر...اما باش يبقى تحت المراقبة لين يفيق...منجموش نتوقعو شنية لي باش يصير زادة
انا:م..مش قتلي تعدا مرحلة الخطر ؟
هو:مبدئيا...على هذاكا باش يبقى تحت المراقبة لين يفيق...باهي
هزيتلو براسي ايه...وخر خطوة لتالي...و تلفت للفرملية يحكي
هو:اخرج طمنهم توا...و ما تخبي عليهم شي
هي: باهي دكتور
هو:و انتي وجودك هوني غالط...تنجم تستنى برا
انا:نحب نبقى معاه...اماانك
هو:مش توا...مبعد تنجم ترجع عندو
هزيت يديا زوز...كبست على يدو...و هزيت راسي نغزرلو و نحكي فرد وقت
انا:اماانك...مش هو عدا مرحلة الخطر...مانيش باش نقلقو والله...امااانك...نحب نبقى معاه و كهو
هو:برا مع الفرملية تعاونك...و ارجعلو...منجمش نخاطر بيه توا...خاطرو مزال في العناية
انا:ب..باهي...باهي...هاني باش نمشي معاها توا
جبدت روحي منو و تلفت غزرت لحسام مرة اخرى...خذيت نفس و خلطت عليها...منجمت نحكي مع حتى حد برا...مخي و تفكيري بقى معلق عندو...منعرفش كيفاش طاوعت الفرملية و هي تعاون فيا باش نعمل اللازم...كلشي يهمني اني نرجعلو و كهو...جبدت روحي منها...ورجعت ساقي اعلى من راسي...اما قبل ما ندخل قربت من امي فتحية لي مزالت واقفة...مسحت دموعها بيديا زوز...و تبسمت نحكي
انا:قتلك لهو باش يقاوم...نعرف لماهوش باش يسلم فينا يا امي
هزتلي براسها ايه...عنقتها بالوقت...كبست عليها...نحكي
انا:صدقني باش يكون مليح
فتحية:نعرف يا روحي
جبدت روحي منها شوية...ورجعت لتالي...حليت الباب و دخلت...غزرت لطبيب...لي هبط الريدو عالبلار...و غزرلي يحكي
هو:متعبوش برشا
هزيتلو براسي ايه...و بقيت نغزرلو لين خرج...خذيت نفس...و قربت منو بخطوات رزينة...نغزر لسيروم و للخيوط لي لاصقين في لحمو...و البونداج لي على راسو...عديت عينيا على كل تفصيلة...قبل ما نوصل ليه...وقفت قدامو بالظبط...و هزيت يدي مترددة...عديت صوابعي على خدو...نتحسس فيه...نحب نحس لهو بالرسمي مزال معاايا...و ماهوش باش يخيليني جملة...نزلت عليه شوية...بستو من جبينو تحت البونداج...و قعدت عالكرسي بجنبو...حضنت يدو...بين يديا زوز...كبست عليها...و قربتها عندي اكثر...بستو منها...قوتي ضاعت بالوقت...منجمتش نزل يدو...و لا نبعد شفايفي عليها...دموعي نزلو يحرقو...نزلو على يدو هو...دموعي لي حسيتهم نشفو من الصدمة و ماهمش باش ينزلو مرة اخرى...هذا لي كان يصير معايا ديما...اما الوجيعة لي نحس فيها توا...قوية برشا...قوية لدرجة منجمش نتحملها اكثر من هكا...كبست على يدو اكثر...نحكي
انا:س..سامحني حساام...ساامحني اماانك...منحبكش تعاقبني بالطريقة هاذي...متعاقبنيش بيك...متخلينيش...كلشي عملتو من خوفي اني نخسرك...انت عمرك ما كنت المذنب الوحيد في اللي صار...متخلينيش نخسرك كيما خسرت بنتنا قبل...متخلينيش نعيش نفس الاحساس...لي كنت نعيشو معاك قبل...وقت كنت نحس لانت تنجم تخليني في اي لحظة
سكت شوية...نرد في النفس...و هزيت راسي غزرت لوجهو...خذست نفس و كملت كلامي نحكي
انا:وقت ريتك اول مرة...حسيت بحاجة جديدة تحركت داخلي...مكنتش نعرف لانا و انت بعد اكا لقاء باش نوصلو لهوني...مكنتش نعرف لانا باش نحبك لهدرجة...مندمتش عاللي عملتو قبل...مندمتش اني اخترتك على عيلتي...و كان يرجع بيا الوقت لتالي...كنت باش نعمل نفس الشي زادة...كان عندي يقين انك الحاجة الوحيدة الباهية في حياتي...كنت انت الوحيد لي ريت مريم اللي انا خبيتها على الكل...كنت ديما الطفلة المعقدة و المتسلطة لي ما يهمها حد غير روحها...انت بدلتني برشا على قبل
مديت يدي مسحت دموعي لي غمت عليا صورتو...و كملت نحكي
انا:ن..نستعرف اني توجعت منك برشا قبل...توجعت من كلامك خاطرني حبيتك...خاطرني وثقت فيك...و قلت انو مهما صار حسام ماهوش باش يضرني...اما هذا ما جا حتى شي قدام غيرتي عليك...و من الطفلة لي حبيتها ورجعت لحياتك في لحظة...رغم انك و لا مرة حكيتلي عليها قبل...اما كنت نحس بوجودها بيناتنا...ك..كل مرة كنت تكلمها و لا تحكي معاها حتى بميساج...كل ليلة كنت تعديها برا الدار...كنت انا نستنى باش تدخل عليا و تنهي علاقتك بيا بكلمة وحدة...كنت نخاف وقت نطلب الطلاق و انت توافق...كنت نخاف من فكرة انك تخليني و ترجعلها...رغم علاقتنا مكانتش كاملة...كان عندي امل لانت باش ترجع على خاطر بنتنا...رغم اني كنت نحس لي حبك ناقص ليا...اما كنت نحب غزرتك...نهارت لي عرفت انو الطفلة لي كنت تحبها هي شراز...حسيت روحي في دوامة...خفت انك تكون استغليتني...و باش تخليني على خاطرها...على خاطر الفرق كان واضح...نهارتها خفت انك ترفضني و تخرجني من حياتك...مدام الحقيقة ولات واضحة...على هذاكا مخممتش حتى اني نسمعك...و لا يمكن محبيتش نسمع الحقيقة منك...خاطرني كنت نعرف تأثيرها عليك...كان انا طفلة و كانت تعجبني...شنية كنت نتوقع منك
غمضت عينيا بالقاوي...و انا نتذكر في الاحداث لي صارت الكل...حضنت يدو اكثر...و كملت نحكي
انا:ك..كان سمعتك نهارتها...مستحيل نوصلو لهوني...مستحيل كنت نخسر بنتي...قلة ثقتي في روحي...خلاتني نكون انانية مع الكل...كنت نلومك انت...باش باش نخبي ضعفي...باش تنقص وجيعتي...كنت ديما انا لي نحب نبعد...باش ما نعرف عليك حتى شي مبعد...مكانش عندي القوة باش نسمع منك لانت باش ترجع لحبك القديم...مكنتش نجم نشوفك معاها...و لا نسمع لي عندك صغار منها...غيرتي عليك كانت اقوى من الكلام لي سمعتو منك الكل...كانت اقوى من النقص لي كنت نحس بيه قدامك...و البارح...خفت انك تخليني...كان بابا وجعك بكلامو...خفت عليك من الوجيعة...و خفت انك تتعب مني و تسلم فيا...منجمش نستخايل حياتي من غيرك...انا منستهلش باش يصير فيك هكا على خاطري...منستهلش حبك ليا...مدامني عمري ما وثقت في روحي...منجمتش ناثق في حبك...منجمتش نصدق انو حد كيفك ينجم يحبني...و باش يختارني على شراز...على حب عاش عليه سنين...انا من خوفي اني نخسرك...خسرت روحي يا حسام...خسرت بنتي...و خسرت ثقتي في ناس الكل...اما توا عرفت لانا نجم نتحمل هذا زادة...لي منجمش نتحملو بالحق...انك معادش باش تكون موجود معايا...انا عرفت درسي بالقدا...كان فما مذنب الوحيد في الللي صار الكل...هي انا...انالي حكيت عليك بطريقة خايبة ليلة عرسنا...رغم الكلام مكانش من قلبي...جيست كنت نحب نكون قوية قدام اختي...انا لي كنت سبب في موت بنتنا...كان وثقت فيك نهارتها...كان سمعتك مرة وحدة...توا راهي تلعب بيناتنا...سامحني على خاطر محاولتش نفهمك قبل...سامحني خاطرني كنت انانية معاك
كبست على يدو اكثر...و عاودت بستو منها...نحكي
انا:متخلينيش...متخلينيش وحدي امانك...كان ماكش باش تقاوم على خاطري...متخليش امك و محمد...و نوعدك معادش نخليك تتغشش مني مرة اخرى
سكت كي تحل الباب...هزيت راسي شوية نغزر للفرملية...لي تحبني نخرج...خذيت نفس و هزيت روحي شوية...بستو من خدو...و عديت يدي على لحيتو...نزلت نحكي في وذنو
انا:نحبك يا روحي
عاودت بستو مرة اخرى...و جبدت روحي لتالي...خرجت من البيت من غير ما نعاود نتلفت ورايا...نحيت البوني من راسي...جيت باش نتلفت للجماعة...حبست في بلاصتي...كي جات عيني في عينها...آخر وحدة نحب نقابلها توا...و حسام في الوضع هذا...طيشت البوني من يدي...و قربت منها بالزربة...من غير ما نخمم وين انا و لا في اللي قاعدة نعمل فيه...دزيتها لتالي بيديا زوز...نحكي
انا:شتعمممل هوووني...شمممجيبك ؟
هزت راسها...غزرتلي نفس الغزرة متاع كل مرة...نفس الحقد في عينيها...من اول ما عرفت اني عرست بحسام...هزتني و حطتني تحكي
شراز:انتي آخر وحدة...تاقف في وجهي و تحاسبني...الراااجل لي موجود هووني...حب حياااتي...حبيت و لا كرهت...انا باش نبقى بحذاه...و مانيش باش نسلم فيه...على خاطر وحدة ما تسوا شي كيفك
هزيت يدي...ضربتها كف بكل قوتي...لدرجة منعرفش كيفاش عملت اكاكا...و لا كيفاه هزيت يدي في وجها...اما اعصابي معادش تتحمل اكثر من هكا...معادش نتحملها هي زادة...و ما نحب نسمع حتى كلمة منها عليه هو...هزت راسها مرة اخرى باش تحكي...هديت عليها ندز فيها لتالي و نحكي
انا:اخرررج من هوووني...اخرررج
حبست كي كبس محمد على اكتافي...جبدني عندو يحكي محمد:مررريم...يزززي...اهدااا
انا:مش قبل مااا تقلب منظرها من هوني
شراز:مانيش باش نمشي قبل ما نشوف حسام
محمد:امشي من هوني شراز
شراز:مش انت لي تقرر نمشي و لا نقعد
خلط علينا عمر بالوقت...وقف جنب محمد...و هز راسو قحرلها يحكي
عمر:شرااااز...حتى حد ماهو ناقصك توا...و اللي تعمل فيه زايد...امشي من هوني توا
شراز:اما ؟
انا:نظن خذيت الجواب الكافي...لا احنا و لا حسام...نحبو نشوفو منظرك معانا...على هذاكا امشي هوني...احسنلك
هزتلي براسها ايه...و غزرتلي ندرا كيف...هزتني و حطتني...بعدما وخرت خطوة لتالي...و تلفتت في لحظة...صوت الكعب متاعها ماشي و يبعد...حسيت روحي تهديت و منجمتش ناقف اكثر...تكيت على محمد اكثر...كبس عليا بيدو يحكي
محمد:مرريم...شبيك ؟
تلفت عندو شوية...و حطيت راسي على صدرو...نحكي
انا:معادش نجم نتحمل اكثر من هكااا...معاادش عندي قوة لهذا الكل
محمد:وفاات...مدامو تعدا مرحلة الخطر باش يكون مليح
هزيت راسي شوية...غزرتلو و تنهدت بالقاوي...نحكي
انا:زعمة باش يسامحني ؟
عدا صوابعو على خدودي...يمسحلي في دموعي و يحكي فرد وقت
محمد:معندوش حل آخر عزيزتي
انا:ماهوش باش يخليني...مانيش باش نسمحلو
كبس عليا بالوقت...و عدا يدو على ظهري...يهدي فسا و يحكي فرد وقت
محمد:ششش يززي مريم...كلنا نعرفو لي حسام مستحيل يسلم فيك
انا:مقصدتش لي قلتو البارح...انا عملت حاجة خايبة محمد محمد:شصاار ؟
انا:قتلو لي حكايتنا وفات...ورجعتلو خاتمو
محمد:شنوووة
جبدت روحي شوية...عديت يديا زوز على وجهي...و خذيت نفس نحكي
انا:ا..انا سبب في اللي صاارلو الكل
محمد:علاش عملت هكا ؟
انا:ض..ضرب صبري...تعاركو البارح قدام البوتيك
محمد:بااهي مريم...معادش تخمم في اللي صار...و معادش تلوم روحك...هيا معايا توا
هزيت راسي شوية باش نحكي اما سكت...كي ريت امي فتحية...و من غزرتها فهمت لهي سمعت كلامي...اصلا معادش عندي كلام نبرر بيه...بعد اللي عملتو...باش نتقبل اي قرار منهم و من حسام...كان رفض انو يسامحني...ياش نتقبل راايوو...يززيه ما تظلم جرايري...خذيت نفس و جبدت روحي منهم...بعدت من غير ما نسمع حتى كلمة اخرى...و من غير ما نوجعهم عليه اكثر...ترميت عالكرسي...بحذا زهرة...لي كبست على يدي...من غير ما تقول حرف واحد...هي اكثر وحدة تنجم تفهمني توا...حطيت راسي على كتفها...نغزلهم و هوما داخلين عندو...بعد ما عطاهم الطبيب اذن انهم يشوفوه...رجع بابا مع طاطا حياة...حتى رنيم تعبت معايا...و مرضاتش تمشي كان بعد الحاح كبير...تعدا النهار رزين عاللخر...خرج الطبيب من عندو بعد ما عدا عليه مرة اخرى...وقفت بالوقت...نسمع فيه
هو:الوضع تحت السيطرة
محمد:فااق ؟
هو:تنجم تقول فاق
حطيت يدي على فمي مش مصدقة لي سمعتو...تلفت لزهرة...حضنتها بالوقت...دموعي غلبتني مرة اخرى...جبدت روحي منها و انا نسمع في بقية كلامهم
عمر:نجم نشوفو توا
هو:مزال تحت تأثير البنج...ماهوش باش يفيق قبل صباح...غير هكا...الحمد الله على سلامتو
انا:نجم نبقى بجنبو ؟
تبسملي بالوقت...و هزلي براسو ايه...يحكي
هو:تنجم تبقى معاه
انا:عيشك
اول ما مشى...قربت خطوتين ووقفت في وسطهم نحكي
انا:باش نبقى معاه ليلة
محمد:برا ارتاح انتي...هاني انا موجود
انا:لااا...امي احكي معاه اماانك
فتحية:محمد خليها على راحتها...متأكدة لهو بحاجتها زادة
محمد:لي يغلبك يجي يحاسبني 
انا:اماان...عيش خوويا
محمد:باهي صغرون...هاني باش نهز فتحية ترتاح...و نرجعلك
انا:و انت زادة برا ارتاح شوية...متخليش امي وحدها
محمد:باهي كان صار شي كلمني
انا:باهي دالي
بابا:رنيم عزيزتي هيا انتي زادة
رنيم:باش نبقى مع اختي
انا:برا مع بابا توا...من صباح تنجم ترجع
رنيم:اما
انا:هيا عزيزتي
رنيم:هوكا دبشك في صاك...كان حبيت تبدل...و كول حاجة زادة
انا:باهي يا روحي
عمر:زهرة...انتي زادة لازم تمشي...هيا ايجا
زهرة:باش تبقى مريم وحدها ؟
انا:متخافش عليا عزيزتي
زهرة:اما
عمر:ايجا نوصلك بحذا ريحان...و نرجع لهوني
زهرة:باهي
بقيت معاهم لين خرجو الكل...هزيت الصاك من الكرسي...و دخلت لبيتو...تفرهدت كي لقيت الخيوط لي كانت عليه تنحات...دخلت لتوالات لي في بيتو...غسلت وجهي...و استندت بيديا الزوز على لافابو...نغزر لروحي...عديت يدي على رقبتي...لتوا مش مصدقة لي صار...خذيت نفس و زوز...و هزيت روحي خرجت عندو...جبدت الكرسي شوية قعدت عليه...و مديت يدي...نعدي في صوابعي على خدو و شفايفو...مش مصدقة لانا قاعدة نمس فيه...و لهو باش يفيق في اي لحظة...قربتلو اكثر...خطفت بوسة من شفايفو...ووخرت لتالي...هزيت ساقيا الزوز عالكرسي...و استندت عليهم بيديا...سرحت في تفاصيل وجهو...كيما كل مرة...منعرفش كيفاش نجم نعدي حياتي من غيرو...معادش نعرف شنية لي عملو فيا بالظبط...مستعدة نسلم في كلشي مرة اخرى...و منسلمش فيه...انا لي قلت قبل مستحيل نسامحو كان على جثتي...شنية لي صار توا ؟ علاش منجمتش نكون قد كلمتي...علاش قاعدة نحب فيه اكثر من روحي...كان جا لقائنا وقتها في ظروف اخرى...كان عمرنا ما جرحنا بعضنا قبل...كيفاه كانت راح تكون علاقتنا ؟ كان يرجع بينا زمان لاكا ليلة مرة وحدة...ليلة عرسنا...لا انا حكيت و لا هو سمعني...كان حكالي على شراز من اول مرة...كان واجهني ليلة هذيكا باللي سمعو....و كان انا صدقتو مرة وحدة...لهو حبني انا و كهو...برشا أسئلة جات لمخي...و انا نغزر لتفاصيل وجهو...تفاصيل وجهو لي كانت باش تكون نفس تفاصيل بنتنا...الاسئلة هذوما خلاوني نعرف علاش منجمتش نحافظ على علاقتنا...لا هو كان يحكي لي داخلو و لا انا كنت مستعدة اني نفهمو...و الضحية الوحيدة كانت فرح و كهو...فرح لي كان مش هو كان معايا...و بجنبي...مكنتش باش نتعدا موتها...و نتقبلو...مكنتش باش نتقبل فراق بنتي لي هزيتها ميتة بين يديا...حساام قد ما وجعني...قد ما ثبتلي لهو ندم بدل المرة الف...قد ما خفت من انو يمشي و يخليني...لقيتو مكبش فيا ﻻخر نفس...قد ما خفت شراز و الماضي يأثرو عليه...لقيت تأثيري على حياتو أكبر...قد ما غلط...صلح...و قد ما بعدت عليه...قرب مني اكثر و اكثر...وسط هذا الكل انا ما عملت شي...كنت ديما انا الضحية و هو الجلاد...رغم انو ساعات كانت الادوار بالعكس...اما لا انا حسيت و لا هو حسسني بالفرق...غاضتني بنتي و نسيت لهي قطعة منو زادة...بكيت لوجيعتي...و مأثرتش فيا وجيعتو...منعرفش اذا كنت ننتقم منو و لا من روحي...منعرفش اذا كنت ناقمة عليه و لا على روحي...اما لي متأكدة منو...انو عمرو ما كان المذنب الوحيد في اللي صارلنا الكل...الوقت لي جمعنا في ظروف خايبة كان مذنب...بابا لي حطنا بين قرارين كان مذنب...الماضي كان مذنب...و انا كنت اكبر مذنبة...و اكبر ذنب شتركنا فيه زوز...هو ديما كان فما طرف ثالث في علاقتنا...في الاول شراز...و نفس الغلطة تعاودت مع صبري...بعد ما راجعت حساباتي...و الكلا لي سمعتو من بابا البارح اكدلي انو مدام وصل ضرب صبري بالطريقة هذيكا...معناها الحكاية اكبر من لي توقعت...و اكيد فما حلقة مفقودة...باش يجاوبني عليها هو و كهو...شنية لي سمعو منو ؟ اصلا وليت خايفة من الكلام لي تقال في غيابي...و لي غفلت عليه انا...عديت عينيا على وجهو مرة اخرى...و تنهدت بالقاوي...تنهدت بحرقة...و اسئلة اخرى جات في راسي...زعمة اللي صار فينا الكل...ميكفيش...خسرنا بنتنا ؟ و ضيعنا شهور من حياتنا...شهور كان من المفروض...نعدوهم مع بعضنا...تحت سقف واحد...و فرش واحد...و مهما اختلفنا في النهار...نرضو بعضنا مبعد...لا هو يسلم فيا و لا انا نبعد عليه...قد ما تعبت...تعبتو معايا و اكثر...زعمة باش يتحمل بعد تواا...باش يسامحني بعد اللي عملتو فيه...منحبش نخمم في احتمال آخر...و منحبش نخمم لهو ينجم يسلم فيا و يبعد...نعرف لماهوش باش يوجعني مرة اخرى...و ماهوش باش يخليني بعد ما بابا وافق على علاقتنا...غمضت عينيا بالقاوي...نطرد في الافكار الخايبة لي جات لمخي...و لي سيطرت على تفكيري...و نخلي تركيزي على حاجة وحدة كهو...انو الراجل لي قدامي توا...متاعي انا و كهو...مهما صاار...و مهما كلن لي باش يصير...ماهوش باش يخليني...و مانيش باش نخليه يبعد عليا...و مانيش باش نخلي حد آخر يفكو مني بعد توا...لا شراااز...و لا صبري...و لا اي حد في دنسا ينجم يبدل الحقيقة هاذي...حتى هو...باش يفهم و يستوعب...انو معندوش مهرب آخر...و مهما بعد باش يرجعلي في الاخير...حسام باش يكون ليا انا...انا و كهو.

#سمر💙💙💙