🔸️حلقة 21
🔸️عمر يحكي:
حليت عينيا على صوت المطر...غزرت لساعة تقريب نص نهار تعدا...منعرفش كيفاش رقدت لتوا...هزيت روحي شوية قعدت على طرف السرير...جيت باش نقوم...حبست كي ريت تليفوني ينوقز...مديت يدي هزيتو لقيتها سرين تطلب...خذيت نفس و رديت عليها نحكي
أنا:بونجور عزيزتي
سيرين:حبي راقد لتوا ياخي
أنا:مممم
سيرين:منكونش فيقتك
انا:لا..وينك إنتي ؟
سيرين:في الخدمة
أنا:شرايك نفطرو مع بعضنا
سيرين:تحكي بالرسمي ؟
انا:مممم تو نحضر روحي و نتعدالك
سيرين:باهي يا روحي
علقت عليها...و حطيت تليفون...جات عيني عالبراصلي متاعها...فوق تابل دونوي...هزيتها في يدي نغزرلها منعرفش علاه منجمتش نرجعهالها...و لا شبيني خليتها عندي...تقريبا كل ليلة نهزها في يدي و نغزرلها...ظاهر فيه خدمها لبنتو ببرشا حب...اسمها لي محفور فيها...و الحجر الاخضر و الروز لي مزينها بيهم...رغم السنين لي تعدات عليها...اما بقات على حالها...تنهدت بالقاوي حليت القجر حطيتها الداخل و هزيت روحي...دخلت لبيت البانو عملت دوش و خرجت...بدلت دبشي...هزيت تليفوني و مفاتحي و خرجت...دريكسيون للسوسيتي ركيت على جنب...و بعثتلها ميساج...نغزر للمطر تذكرت اخر مرة وحلنا فيها عند عمي طاهر...منعرفش كيفها توا...من نهار القضية مريتهاش...و محبيتش نكلمها و لا نمشي عندهم...يومين و لا ثلاثة...منعرفش قداش تعدا حتى الوقت منحبش نحسبو...يمكن هذا أحسن حل نجم نعملو باش نحي الأفكار هذوما من مخي منحبش نتعلق بيها اكثر..حليت عينيا شوية...نغزرلها جاية تجري ركبت بالوقت...تحاول تاخو نفس...مديت يدي...بعدت خصلات شعرها...من وجها...نغزر لشفايفها لي يرعشو من البرد...تبسمت على جنب...غزرتلي تحكي
سيرين:شفما ؟
أنا:شي
سيرين:شبيك تغزرلي هكا ؟
انا:منعرفش
سيرين:مممم متكونش توحشتني
عديت صوابعي على خدها...و نزلت بيهم لشفايفها نحكي
أنا:مبقاش برشااا
سيرين:يعني بالرسمي باش نعرسو بعد شهرين ؟
هزيتلها براسي إيه...قربتلها أكثر...و غطست في شفايفها...فرد وقت نحاول قد ما نجم منخممش في زهرة...و لا حتى نرا صورتها بين عينيا...دوب جبدت روحي منها...حضنتني بالوقت...حطيت يدي على ظهرها خذيت نفس من ريحتها...شي ما تبدل...نفس احساسي مع سيرين كي العادة..حاولت نفركس داخلي عالحاجات لي نحسها وقت نبدا مع زهرة...أما شي يحضرو كان وقت تبدا معايا هي و كهو...تنهدت بالقاوي نحكي
أنا:هيا يا روحي...كان نبقاو عالحالة هاذي...ترصالنا في عشا مش فطور
جبدت روحها مني...و تكات لتالي...دفي في يديها و تحكي
سيرين:إيه وين باش نمشيو ؟
انا:إختار انتي ؟
سيرين:تحكي بالحق ؟
انا:ممممم
سيرين:شرايك في ريستو ¤¤¤¤¤¤
عقدت حواجبي مستغرب...و لا مرة مشينا ليه...من قبل هزيتلها براسي ايه...محبيتش نسألها...خذيت نفس و خدمت الكرهبة..محسيتش بالثنية كيفاش وصلت دخلنا مع بعض...شديت طاولة مطرفة...تكيت لتالي نغزرلها نحكي
أنا:جيت هوني من قبل ؟
طلعت راسها غزرتلي ندرا كيف...منعرفش علاه حسيت سؤالي دخلها بعضها اكثر...تبسمتلي تحكي
سيرين:ا..إيه جيت
أنا:صاار
سيرين:مش أنا قتلك قابلت كليون من قبل...تقابلنا هوني...كهو لي صار
أنا:كليون راقي هذا
سيرين:ع..عمر أمانك...من غير ما تفهم بالغالط...جيست حكينا عالخدمة و كهو
أنا:نحسب روحي ما سمعت شي...منحبش نخسر نهاري بسبب الموضوع هذا توا
سيرين:عملت شي غالط أنا
أنا:لا ما عملت شي...حكاية أسبوع و يوفا كلشي
سيرين:شتقصد ؟
أنا:مش قلت العقد 3 شهور و كهو...هوكا وفاو
بقات تغزرلي من غير حتى كلمة...وصلت الماكلة بالوقت هزيت يدي شاورتلها لطاولة...و بديت ناكول...منعرفش علاه حسيتها دخلت بعضها اكثر...كملنا الفطور عالساكت غزرتلي تحكي
سيرين:تأخرت عالخدمة
أنا:باهي قوم نوصلك
حطيت الفلوس عالطاولة...و خلطت عليها للكرهبة..بقات طول الثنية ساكتة...شديت الفران بالقاوي...و تلفتلها نحكي
انا:شبيك ؟
سيرين:شي
أنا:سيريييين...سألتك جاوبني ؟
سيرين:منحبش
أنا:شنووة ؟
سيرين:م..منحبش نبطل خدمتي
عقدت حواجبي مستغرب من كلامها...فكيت الحزام...و عديت يدي على وجهي نحكي
انا:نظن حكينا فيه الموضوع هذا
سيرين:أمانك عمر افهمني...منحبش نخلي خدمتي لي تعبت عليها...هوكا من أربع سنين نخدم هوني...نحب نعرس بيك...أما زادة منحبش نخلي خدمتي و منجمش نخليك زادة
أنا:ماكش باش تقنعني سيرين...الموضوع حكينا فيه و تسكر على روحو
سيرين:أما
أنا:تنجم تخدم في سوسيتي أخرى...و هذا آخر كلام عندي...باش تظطر تختار بينا
سيرين:شننننوة ؟
أنا:وقت تختار تعرف وين تلقاني
جات باش تحكي...دورت وجهي بالوقت...تنهدت بالقاوي و نزلت...اول ما سكرت الباب...طرت بالكرهبة اصلا ولا مرة عدينا نهار عادي...كيما العباد...وليت لدار...أصلا ما عيني في شي توا...خاصة و الجو برا مقلوب...نحيت الفاست طيشتها على جنب...و ترميت عالفوتاي...تكيت راسي نخمم في كلام سيرين...أصلا طول المدة لي تعدات علينا...باقي ندورو في نفس المشكل...منعرفش علاه ديما نحسها متعلقة بخدمتها اكثر مني...خاصة الحكاية متاع الكليون لي خرجت بيها جديدة...منعرفش قداش تعدا عليا وقت...و أنا نخمم...قص عليا سرحتي صوت تليفوني...لقيتو حسام يطلب...ضربت في راسي زهرة...خفت من احتمال تكون صارتلها حاجة...هزيت عليه بالوقت...نسمع فيه يحكي
حسام:وينك يا راجل ؟
انا:لباس شفما ؟
حسام:لباس...شبيك تفجعت ؟
أنا:زهرة لباس ؟
حسام:لباس عليها...تعشات معانا و شدت بيتها
أنا:باهي
حسام:ميسالش كان تسأل على صاحبك شوية
انا:مدامك كلمتني...ظاهر فيك أحسن مني
حسام:والله بعد ما مشات أكا السخطة إرتحت في راسي
انا:تقصد مريم ؟
حسام:بربي مرة أخرى خبرني من قبل ما جيبها لهوني
أنا:يهديك ربي...شبيك حاقد عالطفلة
حسام:ربي يعينهم عليها
أنا:يزززي برك...أنت شعامل ؟
حسام:هوكا بقى يومين و يوفى الكونجي متاعي
أنا:والله نفس الشي
حسام:لحظة برك عمر
انا:شفما ؟
حسام:أدخل زهرة
أول ما سمعت اسمها...تعدلت في قعدتي...نسمع فيها تحكي
زهرة:حساام...صراحة أنا
حسام:شبيك لباس ؟
زهرة:لباس...مفما حتى شي...ظاهر فيك مشغول منحبش نعطلك أكثر
حسام:لااا نسمع فيك
زهرة:تنجم تعاوني...صراحة وحلت و نحب نكمل المخطط على بكري
حسام:بالطبيعة...تو نخلط عليك
زهرة:باهي عيشك
طلعت حاجبي مستغرب...عديت يدي على وجهي نحكي
انا:فاش قام حتى تعاونها انت ؟
حسام:و أنت شمدخلك فيا ؟
أنا:شووو كي ¤¤¤¤¤¤ مانيش ناقصك راهو
حسام:شبي ¤¤¤ أنت توا...هاك سمعت بوذنك
أنا:على أساس من قبل كانت بحاجتك
حسام:يهديك ربي...باش ناكولها طفلة ياخي
أنا:حساااام
حسام:برا زمر...الطفلة تستنا فيا
انا:استنى
حسام:شنننوة ؟
أنا:من غير ما طول معاها
حسام:والله لي يسمعك يقول تعشق في الطفلة...برا اخطاني...اتلهى بمرتك أحسن
أنا:باهي يا حسام باهي
حسام:توصي على حاجة
نفخت بالقاوي...و علقت عليه...كلامو ركبلي العصب مع أنو عندو حق...أما لقيت روحي عصبت...و عصبت عليها اكثر...طيشت تليفون بغزول...و عديت يديا زوز على وجهي...كلام حسام دخلني بعضي اكثر...و لهوتو بيها فدتني عاللخر...منعرفش علاه...نحس في راسي باش يطرشق...نعرف لهذا الكل ميجيش نخمم فيه...اول مرة منعرفش على روحي شنية نحب بالظبط...و لا كيفاه لازمني نتصرف...في بالي كلشي باش يتحل بالساهل معملتش حساب اني باش نتعلق بيها...و نوصل نخمم فيها لهدرجة...خذيت نفس...نحاول نهدي روحي بيه تنهدت بالقاوي...و هزيت روحي لبيت البانو...عملت دوش مفماش نرتح اعصابي بيه...أما شي باقي الكلام الكل يدور في مخي...كلام سيرين و اللي صار و كلام حسام من شيرة...و اللي نحس فيه مع زهرة من شيرة أخرى...يمكن احسن شي يرجع كلشي كيما كان في الأول...علاقتي بزهرة باش تكون في حدود القضية و كهو...اللي باش نعملو...هو إني نحاول نخليها بعيدة عليا قد ما نجم...هذا باش يكون أحسن حل ليا و ليها.
YOU ARE READING
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
