زهرة🌸

الحلقة السادسة و الخمسون

🔸️حلقة 56
🔸️مريم تحكي:
فقت الصباح...نحل في عينيا بالسيف...تلفت على جنب نغزرلو غاطس في النوم...منعرفش إمتى رجع في الليل أصلا ليلة هوني و ليلة برا...عديت عينيا على تفاصيل وجهو...ملامحو ياسر هادية و هو راقد...تبسمت من غير ما نحس...شي أقوى مني خلاني منجمش نبعد عليه تنهدت بحسرة...زعمة شنية السبب لي خلانا نوصلو لهوني...علاه تقلب فرد لحظة...علاه جبرنا نعيشو هذا الكل...مستحيل اللي عشناه الكل يكون كذبة منو...باش ينتقم مني و كهو...أكيد فما سبب أقوى من هكا...كان جينا في وضع آخر كنت سألتو...أما الكلام لي قالو ليلتها...بنى حاجز كبير بينا...نعرف لأنا نحبو و نموت عليه...أما صعيب برشا اني نسامحو...و لا ننسى لي صار نعرف بالقدا لي مستحيل يكون فما شي بينا بعد توا مسألة وقت و كهو...و نخرج من العيلة هاذي...كيما دخلتها...خذيت نفس و جبدت روحي..قعدت على طرف السرير...حطيت يدي على كرشي نرد في النفس أيامات و أنا على نفس الحالة...هزيت روحي بالسيف لبيت البانو...دوب دخلت...إستندت بيدي على الرخامة خواطري دايرة مع الصباح...حتى تقييت باش حسيت روحي إرتحت شوية...غسلت وجهي...هزيت المنشفة في يدي و خرجت...طلعت راسي غزرتلو...قاعد على طرف السرير...عدا يدو على شعرو...و هز راسو...هزني و حطني...دورت وجهي بالوقت...منحبش نوحل معاه عالصباح...أصلا منعرفش كيفاش عديت اليومين هذوما رايضة من غير مشاكل...هز روحو وقف...قرب مني وخرت خطوة لتالي...فك المنشفة من يدي و دخل لبيت البانو...عرفتو تعمد الفازة بلعاني...تنهدت بالقاوي...و حليت القارد روب...بدلت دبشي...و سبقتو اللوطة منحبش نبقى معاه وحدي...لقيت محمد نازل...تبسمت نحكي
أنا:صباح الخير
محمد:صباح النور
أنا:هاك فقت بكري اليوم
محمد:عندي أوراق لازمني نريقلهم
أنا:ممممم باهي...بون كوراج ملا
محمد:عيشك...و إنتي شبيك مش قد بعضك
أنا:شي
محمد:متأكدة
أنا:حاسة روحي وحدي كهو...خاصة و زهرة مش هوني
محمد:وينها ؟
أنا:مشات مع عمر...رجع لدارهم
محمد:تحكي بجدك ؟
أنا:هذاكا لي صار...قالت باش يعديو يامات غديكا
محمد:غريبة والله...هيا إيجا
انا:باهي
خلطت عليه بالوقت...صبحت على خالتي فتحية و قعدت عالطاولة...قلبي غم عليا من الريحة...هزيت كأس الما شربت منو...و طلعت راسي نغزرلو...جبد الكرسي و قعد بجنبي...ريحتو فرهدتني شوية...غزرتلي تحكي
فتحية:مريم عزيزتي...لباس ماهو ؟
أنا:مممم
رجعت شعري لتالي...دوب نجمت نحط لقمة في فمي غزر لامو يحكي
حسام:باش نمشي توا...كان احتجت شي كلمني
فتحية:باهي
هز الفاست متاعو و خرج...من غير ما يغزرلي...خذيت نفس نهدي في روحي...و نحكي فرد وقت
أنا:ميسالش نطلع لبيتي
فتحية:أكيد عزيزتي
أنا:عيشك
خليتهم...و طلعت نجري...سكرت الباب...و تكيت عليها نرد في نفس...منعرفش شبيني خاصة بعد الفازة لي عملها اللوطة..قربت من التابل دونوي...هزيت الفونتولين متاعي...خذيت نفس و قعدت على طرف السرير..نعرف بالقدا لي حكايتنا وفات...بعد اكا ليلة على هذاكا لازمني نكون اقوى من هكا...هزيت تليفوني باش نكلم زهرة جات عيني عالدات...عقدت حواجبي مستغربة...من الشي لي تعدا على راسي...نسيت لي عندي روطار جملة...تخنقت أكثر...منحبش نستخايل لي الحكاية صحيحة...مستحيل نكون حبلة و منو هو زادة هزيت روحي بالسيف...جبدت صاكي...حسبت الفلوس لي عندي...لتوا ما صرفت منهم شي...أصلا من العرس معادش خرجت...زهرة لي كانت تجي عندي مرة على مرة...بدلت دبشي مرة أخرى...هزيت صاكي...و نزلت اللوطة مشيت عندها...وقفت قدامها نحكي
انا:خالتي...صراحة مظطرة نخرج
فتحية:خير بنتي ؟
انا:خير...لازمني نقابل زهرة...مانيش باش نطول...و حسام يعرف بالحكاية
فتحية:برا عزيزتي...تستحق حاجة قبل ما تمشي
انا:لا عيشك
خرجت و خليتها...شديت طاكسي...طلبت منو يوصلني لأقرب كلينيك...فرد وقت...نحس في قلبي باش يخرج من بقعتو...منعرفش كيفاش وصلت...دخلت مترددة قربت من الرسيبسيون نحكي
انا:ن نجم نقابل gynécologue
هي:عندك رونديفو مدام
أنا:لا...أما لازمني نعدي اليوم...أمانك
هي:باهي لحظة
بقيت نغزرلها...كبست على صاكي...نسمع فيها تحكي
هي:باش تتعدا بعد ساعة...لين يكمل لي قبلك
انا:باهي عيشك
هي:الطابق الأول...الدكتور ¤¤¤¤¤¤¤¤¤
هزيتلها براسي باهي...خذيت نفس...و طلعت...قعدت عالكرسي...نغزر للنسا لي قدامي...بقيت نثبت في المرا لي مقابلتني...حاطة يدها على كرشها...تبسمت نحكي منعرفش أصلا كيفاش سألتها
أنا:قداش عندك من شهر توا ؟
هي:ست شهور...و إنتي ؟
أنا:منعرفش
هي:أول رونديفو متاعك ؟
انا:مممم
هي:إن شاء الله تطلع حبلة
بقيت نغزرلها...قلبي دق بالوقت من كلامها...منعرفش شنوة باش نجاوبها...منجمش نقلها...ياريت منطلعش حبلة...ياريت نكون غالطة في إحساسي...كنت باش نحكي...أما قص علينا راجلها كي قرب منها...حط دبوزة الما في يدها...و باسها من راسها...نزلت راسي بالوقت منعرفش قداش تعدا وقت بالظبط...زوز لي قبلي تعداو بقيت وحدي في صالة...غمضت عينيا بالقاوي...نحكي مع روحي
أنا:أنا شنعمل هوني...ياخي صدقت لإنتي باش تطلع حبلة
كبست بيديا زوز على حرف الكرسي...و وقفت باش نمشي...حبسني صوت الفرملية تحكي
هي:مدام تنجم تتفضل
كبست على صاكي...و هزيتلها براسي إيه...منعرفش كيفاش نجمت نوصل...دوب نجمت نجاوب على أسئلتو الوقت تعدا رزين برشا...خرجت من عندو...و كلامو يتعاود في وذني
هو:مبروك مدام...إنتي حبلة...عندك 3 جمعات توا..حاول تتلهى بروحك أكثر...و تبعد على الستراس الفترة هاذي و هذوما التحاليل لي باش تعملهم...حاول ترجعلي بيهم في أقرب فرصة...و مبروك مرة أخرى
خذيت نفس من النسمة الباردة...و حطيت يدي على كرشي...حاسة روحي في دوامة...منعرفش شنوة باش نعمل توا...كيفاش باش نواجهو...و لا شنوة لي باش يصير...رجعت شعري لتالي مروهجة...حتى حق طاكسي معنديش توا...رصاتلي نشد الكار...محسيتش بالثنية كيفاش وصلت...حتى الوقت تعدا فيسع...أحسن شي ملقيت حتى حد لوطة...طلعت لبيتي بالزربة...قعدت على طرف السرير...هزيت الايكو في يدي نغزرلو...مزال صغير برشا...حتى ميبانش هوني...عديت صوابعي عليه و تبسمت بالوقت...مش مصدقة لي قاعد يصير...مش مصدقة لي فما صغير داخلي باش يكبر و لا مرة توقعت إني باش نحبل منو...رغم أنو منعرفش شنوة باش تكون ردة فعلو...أما متأكدة ماهوش باش يفرح بالصغير هذا جملة...يمكن حتى ميلزمش نتعلق بيه برشا...أول ما حسيت بالباب باش يتحل...حليت القجر حطيتو...و رجعت سكرتو...نغزرلو كيفاش حط الفاست متاعو على الفوتاي...رجع بكري غير العادة...بقيت نتبع فيه بعينيا غزرلي يحكي
حسام:شفما ؟
منعرفش كيفاش حس لي فما شي...نفخت بقوة...و هزيت روحي نحكي
أنا:شيهمك فيا ؟
جيت باش نخرج...سبقني للباب...وقف قدامي بالظبط يحكي
حسام:قتلك أخرج أنا
أنا:مانيش مظطرة ناخو إذنك...أبعد
حسام:برا شد بلاصتك
أنا:منحبش نبقى هوني
حسام:مظطرة باش تقعد
شدني من زندي...كبس عليا...وجرني معاه...قعدني عالسرير...يحكي
حسام:جرب قوم توا
انا:شنية تستخايل في روحك تعمل ؟
حسام:لي نحب عليه...مش هذا كلامك إنتي...هاني ملا باش نعمل لي نحب عليه و كيما نحب زادة...وجرب حل فمك تراه
انا:أنت واحد مريض...أكيد ماكش باش تخوفني بتصرفاتك هذوما...ملا تهنى
هزيت يدي حطيتها على صدري...نرد في نفس...حسيت بدوخة قوية...شي من النفس لي قاعد يتقطع...و شي خواطري لي دايرة...غمضت عينيا و رجعت حليتهم نغزرلو...هز الفونتولين من تابل دونوي...رماها في يدي يحكي
حسام:شد اتنفس كي العباد...مزال بكري باش تموت...ما ريت مني شي لتوا عزيزتي
كبست عليها في يدي و هزيت راسي قحرتلو...منعرفش علاه قاعد يتعمد...يكرهني فيه لهدرجة...تبسم على جنب...و دخل لبيت البانو...نطر الباب وراه..خذيت نفس منها...حطيتها في مكتوبي و خرجت من البيت معادش نحب حتى نلمحو قدامي...لقيت خالتي نعيمة تحط في العشا...وقفت بحذا طاولة نحكي
انا:وين خالتي فتحية و محمد ؟
نعيمة:محمد في الجنينة...و مدام فتحية تو تنزل
انا:باهي عيشك
أول ما طلعت راسي..لقيتو داخل...تبسمت بالوقت..قرب مني يحكي
محمد:وينك لالة...مش على أساس باش تعاوني...ولا فيسع فديت
انا:لا مش اكاكا
محمد:ملا
انا:اليوم ظطريت نخرج على هذاكا
محمد:باهي...هيا أقعد...تو يلحق الباقي
انا:باهي
جبدت الكرسي...و قعدت مقابلاتو...جات خالتي فتحية بالوقت...قعدت عالكرسي...تحكي
فتحية:وينو حسام ؟
انا:تو ينزل
فتحية:كيفها زهرة ؟
طلعت راسي غزرتلو...استغرب سؤال أمو...خاطرني خبرتو صباح لهي مشات مع عمر...خذيت نفس نحكي
أنا:لباس خالتي عيشك
فتحية:مزية كي طلعت بدلت جو معاها...أحسن ما تعدي نهار الكل هوني
غزرت لمحمد بالوقت...حاول يسألني بعينيه...هزيتلو براسي لا...منحبوش يفكر لأنا كذبت على أمو باش نخرج..مانيش ناقصة مشكل آخر...جيت باش نحكي أما هد عليا في لحظة...محسيتش بيه حتى كي دخل شدني من زندي كبس عليا....وقفني يحكي
حسام:أمشي قدامي
فتحية:حساااام شفما ؟
وقفو زوز مع بعض...كبس عليا أكثر...و غزر لأمو يحكي
حسام:حد ما يدخل
محمد:سيب الطفلة...شنية التصرف هذا ؟
حسام:أنت بالذات مدخلش روحك في مرتي
محمد:تفرج عاد فتحية...هذا لي حبيت عليه إنتي..أصلا ديما هو لي عندو حق...ياخي طفلة لعبة عندك باش تعاملها هكا
حسام:شمدخل ¤¤¤¤¤¤¤ أنت...وين تحب توصل شنية لي حارقك عليها ؟
فتحية:حسااااااام
رخف يدو شوية عليا...و جا باش يقرب من محمد نعرف كان تلحم بيناتهم توا...مستحيل حد يفكها..وقفت في وجهو...و حطيت يديا زوز على صدرو نحكي
انا:حسااام يززي...مشكلتك معاايا أنا
كبست عليه اكثر...باش ما يتهورش...غزرتو دخلتني بعضي...عرفتو مش ناوي على خير الليلة...بعد اللي سمعو...نعرف روحي غلطت...أما كان أحسن حل باش نخرج من غير مشاكل...خاطر متعرفش لي هوما سافرو اما علقت اكثر...دورت راسي غزرت لمحمد...نحكي
أنا:محمد أمانك اهدا...مفما شي يستهال...باش تتعاركو على خاطرو
كبس على يدي أكثر...غمضت عينيا بالوقت...و رجعت حليتهم...نترجى فيه باش يخرج...نطر الكرسي لتالي...و خرج من الصالة...جرني معاه بالوقت...ما نجمت نحكي حتى كلمة...حل الباب...دزني و نطرها بالقاوي...يحكي و يصيح فرد وقت
حسام:هاااااني نسمع فيك...حل فمك...من إمتى تخرج من الدار وحدك...و من إمتى تعلمت تكذب على أمي زادة...آه و لا رجعت لصنعتك...أصلا أكا لي شاطرة فيه إنتي
بقيت نغزرلو...يمشي و يجي في البيت باش يطرشق يرمي في الكلام...من غير ما يعمل حساب لمبعد...عدا يدو على وجهو و كمل يحكي
حسام:شبيييك تغزرلي...حل فمك...تعرف بالقدا لزهرة ماهيش هوني...وين مشيت ¤¤¤¤¤ ويييين مشيييت ياخي ناوية تهبلني...نووورمال إنتي في مخك...لوين باش توصل بالكذب متاعك...اننططق مريم...حلللل فمك أحسن ما نعمل فيك شي...في هالليلة الكلبة
أنا:أنا حبلة
وقف في لحظة..تلفت عندي...غزرلي ندرا كيف ملقيتش حل آخر غير إني نخبرو باش يسكت...خاطر مستحيل نجم نخبي بعد توا...و إلا باش نوحل معاه أكثر...باقي يغزرلي من غير حتى كلمة...كأنو قاعد يستوعب في الكلمة...خذيت نفس و كملت نحكي
أنا:مشيت للكلينيك...عملت فحص...كهو الحكاية منجمتش نخبر أمك...باش متتقلقش عليا...على هذاكا من غير ما تفسر الأمور كيما تحب أنت
وخرت خطوة لتالي...منحبش نسمع كلامو...خاصة توا كنت باش نمشي...أما وقفني يحكي
حسام:باش تجهض الصغير لي في كرشك
وقفت في بلاصتي...الدنيا دارت بيا وقتها...كنت نعرف لهو ماهوش باش يقبل البيبي..أما متوقعتش باش ياخو قرار بالسرعة هاذي...معناها لهدرجة...ميحبنيش نكون في حياتو...ما يحب حتى شي يربطني بيه...و هاذي كانت ثاني أكبر ضربة من حسام...بعد ليلة عرسي و لا بالأحرى...أسوء ليلة في حياتي...تلفت عندو بالوقت عديت عينيا على وجهو...ملامحو باردة كي العادة تبسمت على جنب نحكي
أنا:أكيد مانيش باش نحب عليه أنا زادة...طمن
غزرلي بالوقت...عدا يدو على شعرو و تبسم ندرا كيف يحكي
حسام:أحسن ملا
أنا:باز مانيش باش نخلي الصغير هذا يربطني بيك حياتي الكل...هذا أحسن حل لينا زوز...تو نكلم الطبيب في أقرب وقت
حسام:إن شاء الله متكونش تأخرت
أنا:متخافش...مزالت الحبالة في أولها...من غدوة توفى الحكاية
هزلي براسو إيه...حسيتو تقلق أكثر...قرب من الكوافوز حط الكارت متاعو يحكي
حسام:دبر روحك بهاذي..و ياريت حد ما يعرف بالحكاية هاذي
بقيت نغزرلو من غير حتى كلمة...فقت من سرحتي على صوت الباب...كي سكرها...نزلت دمعتي بالوقت...عديت يدي على خدي مسحتها...منعرفش شنوة لي حسيتو بالظبط...منحبش نخسر الصغير هذا...شي أقوى مني خليني نتعلق بيه...بين ليلة و نهار...منعرفش قداش بقيت واقفة في بلاصتي...تنهدت بقوة و هزيت تليفوني خذيت رونديفو من نفس الكلينيك...برغم الوقت مأخر...أما منجمش نستنى أكثر من هكا...نحب نتهنى من الحكاية هاذي في أقرب وقت...خذيت نفس و خرجت من البيت...نزلت اللوطة...ما لقيت حتى حد أصلا بعد لي صار...منتوقعش باش يتلمو ليلة مرة أخرى خرجت للجنينة...الهوا فرهدني عاللخر...مشيت شوية وقعدت عالكرسي...هزيت يدي حطيتها على كرشي نحكي
أنا:سامحني أمانك..سامحني معنديش حل آخر منجمش نخليك تعيش لي عشتو...و منجمش ناقف في وجهو زادة...نعرف بالقدا باش تكون أكبر خسارة في حياتي على هذاكا سامحني
كبست على كرشي أكثر...منحبش نضعف...و منحبش نتعلق بيه أكثر...حسيت بالفاست متاعو...تحطت على كتافي...و قعد بجنبي...تلفت عندو نغزرلو...تكى لتالي يحكي
محمد:لباس توا
انا:مممم
محمد:شنوة لي صار ؟
أنا:شي
محمد:مريم...نعرف لزوز قاعدين تكذبو على بعضكم بالعرس هذا...منعرفش شنوة لي صار باش وافقت...اما كان تحب تبعد عليه...باش ناقف معاك اكيد
أنا:أنا حبلة محمد
غزرلي بالوقت..عدا عينيه على وجهي...كبست عالفاست متاعو...و تلفت تكيت لتالي...بقى ساكت من غير حتى كلمة...تبسمت على جنب نحكي
أنا:باش نحي صغير هذا غدوة
غمضت عينيا بقوة...و رجعت حليتهم...منحبش دموعي تنزل قدام حتى حد...حط يدو على يدي...نزلت راسي نغزرلو...و رجعت غزرت لوجهو...كبس عليا يحكي
محمد:متنحيهش...الصغير هذا متاعك إنتي...ولدك متفرطش فيه
بقيت نغزرلو مصدومة...متوقعتش باش نسمع منو الكلام هذا...قلبي دق بالوقت...دخلت بعضي و منعرفش وين باش توفى الحكاية هاذي الكل...خذيت نفس نحكي
أنا:ولدي باش يعيش من غير بوه...باش ياقف قدامي و يسألني عليه...بشنوة تحبني نجاوبو...نقولو لي جبتك بالسيف عليه...أنا عشت برشا حاجات توجع محمد مانيش مستعدة نخليه يعيشها هو زادة
محمد:حارب على خاطرو...أخطاك من حسام...خمم في روحك...إنتي مستعدة للعملية هاذي
أنا:أمي خلاتني و عمري خمس سنين...أنا لقيت بابا وقتها...أما ولدي ماهوش باش يلقى حد..كان بوه رفضو من توا
جبدت يدي منو...و رجعت تلفت...حاسة بغصة في حلقي...منجمتش نحكي أكثر...نفخ بالقاوي يحكي
محمد:علاه عرست بيه مريم...علاه رميت روحك في النار هاذي
أنا:خاطرني حبيتو
محمد:ياخي نورمال...مزلت تعترف...بعد هذا الكل
أنا:نحكي لي نحس فيه و كهو...ميهمنيش هو جملة...و لا أنا شنوة بالنسبة ليه
محمد:حسام مستحيل يدفن الماضي متاعو
أنا:شقصدك ؟
محمد:معناها حسام عندو مرا وحدة في حياتو...هي الماضي و الحاضر متاعو...حتى و معادتش موجودة توا هو مستحيل ينجم يتخطاها...و هذا واضح...إنتي كنت وسيلة باش يعيش حياتو عادي...أما منجحش...على هذاكا فيق على روحك و متخسرش روحك أكثر...حسام من بكري يختار الثنية لي يحس روحو مرتاح فيها
كبست بيدي على كرشي...آخر شي توقعت نسمعو...أنو فما شكون في حياتو..غزرت للفراغ مرة أخرى مستحيل يكون استغلني لهدرجة...لا مستحيل مينجمش يعملها أكيد فما سبب آخر...مديت يدي بالسيف...جبدت الفونتولين متاعي...خذيت نفس منها...نحكي
أنا:ش..شكونها ؟
محمد:ميهمش برشا تعرف شكون...سافرت ليها برشا...و على حد علمي ماهيش باش ترجع مرة أخرى...مانيش نقلك الكلام هذا...باش نخليك تكرهو...أما باش تعرف لي قاعد يصير...و متضيعش روحك أكثر...و متخسرش الصغير بسبب التهور متاعو هو
أنا:طمن محمد..مستحيل نخلي حد يهدني...حتى حسام ميهمش برشا...شنوة يحب مني...و لا شنوة باش يعمل فيا...أما أكيد باش يجيه نهار و يندم على هذا الكل
هزيت روحي وقفت...حطيت الفاست في يدو...تبسمت و كملت كلامي نحكي
أنا:وقتها أكيد ماهوش باش يلقاني
هزلي براسو إيه...و تلفت باش نمشي...وقفني يحكي
محمد:أنا معاك ديما...و في أي قرار أنت تاخو...إعتبرني خوك بعد توا
انا:عيشك محمد
تبسمتلو...و عطيتو بظهري...كلامو قد ما وجعني ريحني في التالي...يمكن وقيت باش نفيق على وضعي...طلعت للبيت بالسيف...لتوا مزال مدخلش كي العادة...قربت من السرير...شديت فرشي...حطيت راسي...أكثر بلاصة كرهتها البيت هاذي...و الفرش هذا...حطيت يدي على كرشي مرة أخرى...و مديت يدي لأخرى...جبدت الايكو كبست عليه...بكل قوتي...كلام محمد يتعاود في مخي منعرفش علاه إحساسي يقولي أنو المرا هاذي...قريبة منا برشا...حتى قريبة ليا زادة...تعدات ساعة و زوز و ثلاثة...و لتوا مدخلش لدار...دوب غفيت...و رجعت فقت هزيت تليفوني غزرت لساعة...ستة متاع صباح...باز بايت برا كي العادة...هزيت روحي بالسيف...دخلت لبيت البانو...عملت دوش...بدلت دبشي...عدلت روحي...هزيت صاكي و الكارت...وخرجت قبل ما يفيق حد...منحبش نتحط في نفس الموقف مرة أخرى...منعرفش كيفاش وصلت...قربت من رسيبسيون...لقيت نفس الممرضة قربت منها نحكي
أنا:خذيت رونديفو البارح في الليل...بخصوص العملية
هي:تقصد عملية الإجهاض ؟
أنا:مممم
هي:الطبيب مزال موصلش...تنجم تستناه
أنا:باهي عيشك
خليتها و طلعت...ساعة أخرى و جا طبيب...قرب مني يحكي
هو:حاضرة مدام
هزيتلو براسي إيه...غزر لساعتو...و رجع غزرلي يحكي
هو:باهي ملا تفضل مع الممرضة...تعاونك...تو نخلط عليك
أنا:باهي
كبست على صاكي..نعمل في الخطوة بالسيف منجمتش نزل يدي من كرشي...أول مرة نحس بالخوف هذا دخلت معاها للبيت...عينيا تركزو في السرير هذاكا دقات قلبي قوات أكثر...حطت اللبسة في يدي تحكي
هي:متخافش...نص ساعة و توفى...ماكش باش تحس بشي
هزيتلها براسي إيه...من غير ما نبعد عينيا عالسرير غزرتلي تحكي
هي:بدل دبشك...لين يجي طبيب
أنا:ع..عيشك
غمضت عينيا بالقاوي..نص ساعة كهو...و يوفى الكابوس هذا...و معاد يربطني بيه حتى شي...مهما صار بعد توا مستحيل نسامحو...و لا نغفرلو...فرط فيا لثاني مرة...و جبرني نعيش أقوى وجيعة...كلشي نحب عليه إني نلقى القوة باش نعمل هذا الكل...باش نقتل ولدي من غير وجيعة...و من غير دموع...نحب نكون قوية و كهو.