🔸️حلقة 40
حليت الباب و دخلت...لقيت مريم في وجهي...قربت مني بالزربة...ظاهر فيها مفجوعة عليا...تحكي
مريم:وينك لتوا انتي ؟
أنا:هاني جيت
مريم:زهرة لباس ماهو...خرجت من غير ما تفسر شي تعرف قداش كلمتك
أنا:مسمعتوش...يززي عاد خلينا ندخلو توا...عندي ما نحكي
مريم:شفما زادة ؟
أنا:وينهم الجماعة ؟
مريم:في صالة
أنا:باهي إيجا
مريم:يا طفلة باش تهبلني راك
انا:تي ايجا برك
شديتها من يدها و دخلتها معايا لصالة...نغزر لحسام قاعد عالفوتاي يحكي مع أمو...خذيت نفس نحكي
انا:عالسلامة
فتحية:اهلا عزيزتي...تحيرت عليك...وينك لتوا ؟
أنا:جيت أمي
حسام:وين مشيت ؟
أنا:قابلت مراد و عمر
حسام:شنننوة ؟
غزرتلي مريم مستغربة...خذيت نفس...و رجعت شعري لتالي نحكي
أنا:صراحة انا باش نحكي معاكم في موضوع
حسام:موضوع شنية زادة ؟
انا:ب باش نمشي من هوني
بقى الكل ساكت من غير حتى كلمة...تركزت بعينيا في امي فتحية...نسمع في حسام يحكي
حسام:شقصدك ؟
أنا:باش نرجع لدارنا...نقصد دار بابا...باش نستقر غديكا
وقفت امي فتحية بالوقت...جا وجها مع وجهي...تحكي
فتحية:تخرج من هوني على جثتي
أنا:ا أما أمي
بقيت نغزرلها مصدومة..الكلام وحل في حلقي معرفتش باش نجاوبها...قربت مني أكثر...وقفت قدامي تحكي
فتحية:تخرج من الدار هاذي عروسة...لدار راجلك...من غير هكا...طول ما انا عايشة مانيش باش نسمحلك تتمرمد في حياتك...باش تشد الدار و تتلهى في قرايتك و كهو
متوقعتش باش تحكي معايا بالطريقة هاذي...متوقعتش لي هي تحبني لهدرجة حتى اكثر من أمي لي جابتني لدنيا...خذيت نفس نحكي
أنا:أمي...كان انا بقيت هوني...إنتي باش تخسر عمر...و ماكش باش تراه كيما الأول و انا منحبش نخسر العلاقة بين ام و ولدها
فتحية:عمر بطبيعتو باش يسافر...و مدامو اختار الثنية هاذي...معناها يعرف فاش يعمل...و كي يحب يجي لبلاصة حد ما ينجم يوقفو...و انا ميهونش عليا نخلي طفلة تعيش في دار وحدها...و تولي العيون الكل عليها
نزلت عينيا منها...معناها بالرسمي باش يعرس و يمشي من هوني...بالرسمي معادش نشوفو و معادش حتى باش نسمع صوتو...جيت باش نحكي قص عليا صوت حسام يحكي
حسام:كلام أمي واضح زهرة...إنتي وحدة منا...و آخر مرة نسمع الكلام هذا منك
هزيتلو براسي باهي...معادش نعرف شنية نقول...قربت من امي فتحية حضنتها بالقاوي...كبست عليها بيديا زوز...منحبش نخسرهم...بالرسمي نحسهم عيلتي الوحيدة...حتى من حسام و محمد اكثر من خواتي جبدت روحي منها...تبسمتلي تحكي
فتحية:هيا برا توا...نعرف عندكم ما تحكيو مع بعض نستناكم عالعشا
انا:باهي امي...ربي يخليك ليا
فتحية:عيش بنتي
هزيت صاكي...و خرجت من صالة...خلطت عليا مريم بالوقت تحكي
مريم:شنية هذا لي عملتو انتي ؟
انا:شنوة ؟
مريم:كيفاش تمشي من هوني ؟
انا:هذا احسن حل مريم...اما راك ريت ردة فعل امي فتحية
مريم:ياخي بهلولة و لا تتبهلل انتي...نورمال تخلي عيلة هكا و تمشي تعيش وحدك...في بالك ساهلة هي باش تلقى خدمة و تقد روحك بين يوم و ليلة
انا:نعرف...اما يزي ما عملو فيا مزية...نحب نعمل على روحي...نحب نبدا من جديد
مريم:كمل قرايتك قبل...و تو بعدها ربي يعمل ألف حل
انا:باهي...باهي
مريم:ايجا لهوني ساعة...علاه مقتليش باش تقابل عمر
انا:قصينها من تالي
مريم:شقصدك ؟
انا:رجعتلو خاتمو
مريم:كيفاش رجعتلو خاتمو...و شنوة عمل هو ؟
انا:حتى شي...رجع كيما الاول...كلمة و قص و تنبيز
مريم:علاه محكيتلوش على مراد
انا:منحبوش يعرف...رد بالك تحكيلو مريم...منحبش نقلقو بالحكاية هاذي مرة اخرى...حلمتي وفات قبل ما تبدا...و مدام هو اختار سيرين مرة اخرى...انا باش نبدا حياة جديدة هو ماهوش فيها
مريم:اففف تي صحيح مزلت معصبة منو...اما منعرفش علاه حاسة انو مزال يحبك
انا:معادش يهم برشا...كل حد فينا باش يمشي في ثنية...على هذاكا امانك معادش تجبدلي عليه جملة
مريم:باهي...ان شاء الله متكونش تسرعت في قرارك هذا
انا:لا بالعكس اول مرة ناخو قرار...و نكون واثقة منو
مريم:باهي عزيزتي
انا:هيا ايجا
مريم:انتي اطلع توا...نسيت تليفوني في الصالة...تو نخلط عليك
انا:باهي
خليتها و طلعت...حليت باب بيتي...حطيت صاكي عالفوتاي...نحيت الفاست...و ترميت عالسرير...تسطحت لتالي...نغزر لسقف...منعرفش اذا لي عملتو صحيح و لا غالط...برغم حسيت روحي رتحت بعد اللي صار...اما قاعدة نحس بوجيعة قوية...وجيعة فضلت نكتمها داخلي...و ما نوريها لحد...خسارتي لعمر...حسيتها اكبر خسارة في حياتي بعد بابا...منعرفش كيفاش باش نتعدا هذا الكل...و نعيش من غيرو...غمضت عينيا...نتذكر في كلشي تعدا بينا احنا زوز و كهو...من اول نهار ريتو فيه منعرفش اذا الذكريات هاذي...باش تعاوني في غيابو و لا باش تقتلني عرق بعد عرق...الوقت كهو اللي باش يثبت كلشي
YOU ARE READING
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
