Unicode
" လက်ထပ်မယ်။ ဟက် "
မေမြတ်သူ ခပ်ဟဟရီလိုက်ပြီး
" ငါ အနာဂတ်မရှိဘဲ လမ်းပျောက်နေတဲ့ လူတစ်ယောက်နဲ့ ရှေ့မဆက်နိုင်ဘူး "
တည်ငြိမ်စွာပင်ပြောကာ လှည့်ထွက်သွားသည့် မေမြတ်သူကို နောက်မှ သိုင်းဖက်လိုက်သည် ။
" ကိုယ်တို့အမြဲအတူနေကြမယ်လေ ။ ကိုယ့်အမြဲမေ့ဘေးနားမှာရှိနေမှာ ။ မေ့က ကိုယ့်ဘဝမှာ အရေးပါဆုံးပဲ "
" ဦးတည်ချက်မဲ့နေတဲ့လူတစ်ယောက်နဲ့ ရှေ့ဆက်ရလောက်အောင် ငါမရူးသေးဘူး "
" မေ ဘာကိုဆိုလိုချင်တာလဲ "
" ငါပြောတာ ရှင်းပါတယ်...ငါနင်နဲ့ ဆက်မတွဲနိုင်ဘူးလို့ ။ ပိုရှင်းရှင်းပြောမယ် ရှိုင်း နင်နဲ့ငါ ပြတ်ပြီ "
ဖက်ထားတဲ့သူ့လက်တွေကို ရုန်းကာ အပြင်သို့ထွက်သွားတဲ့ သူမရဲ့ လက်ကိုမိမိရရဆွဲလိုက်သည် ။
" ငါနင်နဲ့ ဆက်ပြီးမပတ်သက်ချင်တော့ဘူးဟာ "
အံ့သြမှုကြောင့် သူ ဆွဲထားတဲ့လက်များ ပြေကျသွားသည်ချိန်တွင် မေကသူ့အဝေးကိုထွက်သွားခဲ့ချေပြီ...
သူ့ကို ကျောခိုင်းကာထွက်သွားသည့် မြတ်သူနောက်ကိုလည်း ဆက်မလိုက်မိ...
လက်ထဲမှ ကတ္တီပါဘူးအနီလေးကိုသာ ကျစ်ကျစ်ပါအောင် ဆုပ်ကိုင်ရင်း
ဖြေသူမရှိတဲ့ မေးခွန်းများစွာနဲ့ ထိုနေရာမှပဲ ကျန်ခဲ့ပေသည် ။
မဟုတ်ဘူး နားကြားမှားတာနေမှာ..
မဟုတ်ဘူး မေက
ငါ့ကိုဘယ်တော့မှလမ်းခွဲမှာမဟုတ်ဘူး။
မေ စနေတာပါ ။
မေက ငါ့ကိုသိပ်ချစ်တာလေ။
စိတ်ဆိုးတုန်းမို့ ပြောတာပါ ။
ငါချော့လိုက်ရင် သူစိတ်ဆိုးပြေသွားမှာပါ..
သူအသိပြန်ဝင်လာတဲ့အခါမှာတော့ မေက မရှိတော့...
အိမ်ကိုလိုက်သွားတော့လည်း ပြန်မရောက်သေးဘူးတဲ့..
ဆိုင်ကို သွားပြန်တော့လည်း မရှိပြန်ဘူးတဲ့..
ဖုန်းခေါ်တော့လည်း မကိုင်...
ဘယ်လိုမှလည်း ဆက်သွယ်မရ...
အချိန်အတော်ကြာ မေရှိနိုင်မဲ့ နေရာတွေကို ပတ်ရှာပြီးကာမှ ပုလဲဖြူ ဆီမှ မေပြန်ရောက်နေပြီဆိုတဲ့ မက်ဆေ့ချ် ကြောင့် အိမ်ကိုစိတ်ချစွာ ပြန်လာခဲ့ပါသည် ။ အခုလို သွေးဆူနေတဲ့အချိန်တွင်တော့ မေ့ကိုသွားချော့လို့မဖြစ်သေး ။ ပိုဆိုးသွားနိုင်သည် ။...မနက်မှပဲ ချော့တော့မည်ဟုတွေးရင်း အိပ်ရာဝင်လိုက်သည်။ ထိုညတော့ ဘယ်လိုမှ အိပ်မရ....မေ့ကို ဘယ်လိုချော့ရမည်ဆိုတဲ့ နည်းလမ်းတွေကိုသာ စဥ်းစားနေမိသည်.....
YOU ARE READING
နင်စေရင်
Romanceဘယ်သူပိုချစ်တာလဲလို့ မမေးနဲ့.. အချစ်ဆိုတဲ့ အရာကို ကိုယ်ဖော်ပြတတ်သလို ဖော်ပြခဲ့တာချည်းပဲ... ..................................
