مرت الأيام و جى يوم الحنه ~~ و اللي صار في هذه الايام ↓↓
محمد طلع من المستشفى و علاقته هو و ملك زادت...
أسامة مزال يستفز في عائشة بعد ما أعترفتله بإنها معجبه بيه...
وسام خذى ثار مجاهد و سيِّب الموضوع و خذى حقه من جواد...
جواد و الجماعة اللي معاه حبسهم إبراهيم بإعتبارهم مجرمين و ضد الامن..
رامي رجع و تغير 180°، جمال، دين، أخلاق و اكثر من مرة يحاول يعترف لحسناء لكن خايف من ردِّة فعلها..
___________________________________________________
وسام ﴾﴾﴿﴿
كنت مقعمز مع الشباب في الجنان بعد ما خذوا مني التليفونات و النت و مفتاح السيارة ... حسيت بملل مع إنهم ينكتوا و يتسهوكوا و مدايرين جو، لكن الملل و الكساد معاي في كل لحظة (😁)
سالم : خيرك إنت تقول في عزاء؟
انا 'شفتله بربع عيني'
محمد 'ضحك' : خيره هوا؟
انا : تي كساد.
سمعه : ساد و انت من اول ما خذينا حاجاتك و هذه الكلمة على لسانك.
محمود : عاد كان يكلم في الكبيده.
انا : والله هلبا هكي، لا نشوفها و لا نسمع صوتها، ظلم.
بسام 'ضحك' : و اخيرا ذقت هالإحساس.
انا 'ضحكت برود' : مبسلك.
الصيد : جيعان.
رامي : اصيل برا مشـطلنا حاجة.
اصيل : تبي امي تلزني شهرين؟
أسامة 'ضحك' : وين الفرخ ايهم؟
سمعه 'ضحك' : عطيته طريحه امبكري، خليته يعرفني صح.
انا 'ضحكت' : حرام عليك.
ايمن : و انا نقول خيرها امي مقعمزه تدعي.
°شن تدعي°
ايمن : ربي يرزيني فيك يا سمعه يا متاع ليان، يعطيك كسره في ايدياتك يا آخر العنقود يا مدلل... و كلام عزايز.
°ضحكنا°
سمعه : يا عليك عيله و خلاص.
انا : خيرها عيلتنا؟ كان مش عاجباتك اطلع منها.
سمعه : مصحك.
عمتي سهى : يا شباب يجي واحد منكم ياخذ سفرة الغذى.
انا 'وقفت'
عمتي : لا انت قعمز عارفاتك تبي تشوفها.
انا 'رفعت حاجبي و الأولاد ضحكوا' : شني شكلكم فضَّحتوا بيا.
عمتي : انا نعرف كل شيء.
انا : غر لا يا سوسو بالشويه علينا.
عمتي : مش حتقدر تغير رأي بشوية كلام و نظرات بريئة.
'الشباب ضحكوا'
انا : اول وحدة تقولهالي .
عمتي : ماهو الموضوع عندكم وراثه.
سالم : هذه تلقيحه و لا مغازله؟
عمتي 'ضحكت' : الزوز.
بسام : معناها خالي طلع خطير.
عمتي : خلاص تحشموا و تعالوا خوذوا الغذى.
سالم 'وقف' : انا و من ثاني؟
اسامة : انا.
عمتي : به هي تعالوا 'مشوا'
سمعه : و اخيرا بنتسمسموا حاجة.
انا : انا مش جيعان.
الصيد : وفرت علينا.
انا 'ضحكت' : متفهك.
سالم : بيب بيب و سعوا.
اسامة : حولــوا.
انا : باهي حطيتوا على الطاولة.
سالم : لا نبي نقعمز على العشب.
انا 'ناديت على ايهم'
ايهم : نعم؟
انا : نهار احرف يا سمعو لعبتله في وجهه .
سمعه 'ضحك' : هكي الصح.
اصيل : الله بردت على قلبي.
انا : برا قول لدانا .. اعطيني الكاميرا، تلقاها في داري.
ايهم : به اعطيني دينار الاول.
انا : شكلك تبي ضربة زي امتاع سمعه.
ايهم 'مشى يجري'
ايمن : اللــه منور يا سمعه، تو اي حاجة نبيها يديرهالي.
سمعه 'ضحك' : ايوا.
' قعدوا يتغذوا و انا نصور فيهم من غير ما يعرفوا'
سمعه 'وقف' : الحمدلله.
انا : صحه صحه.
سمعه : سلمك .
'ناضوا الاولاد كلهم و جت عائشة و معاها ملك و رفعوا السفُر'
أسامة 'وهو ماشي خبط في عائشة و كانت بطِّيح لولا يده اللي حاوطت خصرها'
عائشه 'قعدت تشوفله و متوتره'
اسامة ' إبتسم، طلقها' : ديري عيون .
عائشه 'رفعت حاجبها' : خليتهملك.
اسامة : قيمي السفرة و تسقدي 'قعمز'
عائشة 'قامت السفرة و دخلت'
انا : خيرك؟
اسامة : شيء.
'مر الوقت و احنا نضحكوا و نغنوا و مدايرين جو'
سمعه : تخطر في ضي القمر.
محمود : تخطر يحلالي السهر.
انا : لا نبوا وحده ناشطه.
حسام : يا غير عليا رن.
°ما عندكش مشكله°
محمد : حتى في نص الليل.
°معندكش مشكله°
انا : قديمه فوتوها.
سالم : ايح عاد.
انا : عرسي.
بسام : ايح.
انا : خيرك يا حاسد.
بسام : برا عشت الشعور قبلك.
حاتم : تي غر فكرولنا في أغنيه.
أنا : شوفوا ها خليتوا العريس يغنيلكم معقولة.
سمعه : تي غر غني.
انا : صلي يا مصلي ع الزين.
حسام & رامي 'بدوا يدربكوا بإيقاع الاغنية'
سمعه : حويته و خميسه و قرين.
انا : حزامك هاللي تلوي فيه.
سمعه : حويته و خميسات عليه.
انا : اقربني يا مكحول العين.
بسام : اقربني نراجي فيك سنين.
محمود : اقربني ساولتك بالله.
انا : و راهو قليبي دار عزاه.
'ناضوا الشباب يرقصوا و انا و سمعه نغنوا و نضحكوا عليهم'
سالم 'وقف جنبي' : نوض ارقص.
انا : لا لا.
سالم ' شدني من ايديا' : والله لما تنوض .
انا 'ضحكت' : به 'نضنا و قعدنا نرقصوا و سمعه قعد مقعمز و منسجم في الاغنيه'
انا ' نلف في راسي و خصلات شعري تلف مع الريح'
سمعه 'وقف' : معاش فيها بنرقص .
انا 'ضحكت' : و انت خاش بالعرض .
سمعه : صقع عليك.
' وقفت انا و سمعه و سالم و بسام و محمود و درنا دائرة و كل مرة واحد يقول مقطع من الاغنية و الثاني يكمل عليه'
بسام : ايواه ايواه ايواه .
سالم : مشيت بعقلي جيت بلاه.
محمود : ايواه ايواه ×2
انا : ركوبك فوق الحيط لواه؟
سمعه : ان شاء الله نكمل عمري معاه.
'قعدنا على هذا الحال لين تمت الاغنية و قعمزنا من جديد'
___________________________________________________
أنت تقرأ
عيـــلتنــا ((باللهجه الليبية))
Teen Fictionرواية ليبيه تحكي عن صغار عم والحب اللي ترعرع بينهم و المشاكل العائليه و الهياجات و المقالب اللي داروها وماعمرهم ما دسو على بعض حاجه 😍 1# - طرابلس #1 - بنغازي #1- ليبين 2# - ليبيه #2 - رومنسيه 4#- ليبيا هاذي هيا العيله ... #عيلتنا 💙 للكاتبة...
البارت الأخير
ابدأ من البداية
