عيـــلتنــا ((باللهجه الليبية))

البارت السابع عشر

#عيلـ★ـتنا
.
.
.
.

هلال﴿﴿﴾﴾

بعد ما طلعوا الولاد من المربوعة ضميناها على السريع انا و روان و خشوا النساوين و احنا طلعنا للجنان لقينا الولاد ميتين من الضحك .
انا: خيركم العفو.
سالم: وووه يا ايمن والله تعرف تنكت.
محمد: اااه يا بطني .
روان: خيركم هيا ضحكونا.
رامي: تي بري انتحري بالله.
انا: المــهم ... وين محمود و حاتم و وسام .
حسام: عندهم خدمة .
انا: اها ... امباه وين اصو .
اصيل من الخلف: يا عينيييي اصو مصح وجهك ... أصييييل .
انا: تي باهي .. برا للدكان.
اصيل: وشن معنى انا يعني.
انا: ايييح عااد .. هي نوضوا كلكم اطلعوا للشارع .
اسامة: مصح و جهك و خلاص .
روان: انتم خيركم قاعدين مش عندكم محاضرات .
سالم: حي حي الساعة كم .
انا: الوحد الا ربع .
الصيد: تي حيييي المحاضرة قريب نوضوا.
و في لحظة ناضوا الشباب امتاع الجامعة و مشوا لمحاضراتهم .
روان: هي اصووو برا الدكان .
ايمن: وخيرني انا .
انا: به نوض يا ايمن للدكان .
ايمن: بالله تو هذاكا اصو وانا ايمن بالجاف.
انا : به عادي توض يا ايمون و تمشي للدكان.
ايمن يقلد نبرة صوتي: لا لا مش عادي.
أصيل: تي ابعتوا ايهم الزفت.
روان: العفوو تبونا نبعتوا واحد صغيرون وكيوت باش في نص الطريق يخطفوه.
ايمن: هه امالا تحسابي روحك في كولمبيا يا ماما.
اصيل: شني قصدك احنا مش حلوين؟
انا: ووووه حتى الناس بيروحوا نوضوا الهم .
ايمن: تي باهي باهي .. شاف لأصيل .. هي نضنا اصيل.
اصيل: هيا .
انا و روان:: مصح وجهكم.
ايمن: ههاي عارفينه وجهنا صحيح.
انا: زينقوو.
أصيل: وااك نفخ انتم راه ... جيبوا الفلوس و انتلفوا من هنا.
روان: امباه غر بالشويا ع الأعصاب .
اصيل: تي بررري.
مشيت انا و روان جبنا الفلوس و رجعنا🙌
ايمن: لوووولي كان نعرف انزعرت راه صدعت وذانكم.
اصيل: هاتي الفلوس .. خذاهم ومشى وبعد شويا رجع .
ايمن: هه  خيرك شن في؟
أصيل: تي شن تبوا اصلا ؟
روان: بسكوييت.
ايمن: ااه بشكتي.
اصيل: غر لا يا راجل .. تي ضملنا فمك الزفت .. راه بتركبولي السكر انتم .
انا: على خاطر احنا حلويين.
ايمن: ما هو احنا زي العسل .
روان: و السكر يجيب السكر .
اصيل قعد يحدف في الفلوس علينا: يلعن الدكان على بو الدكان على اللي بيمشي للدكان معاكم ... بروا درقوا جوهكم يا متخلفين يا مهابيل وووااك .. وطلع برا الحوش.
احنا قعدنا نضحكوا علي اصيل بعدين جت عمتي سالمة.
عمتي: هئئ غبارة السوداء مزال ما مشيتوا للدكان ؟
انا: هذا ولدك يا عمتي ما يبي يمشي.
ايمن: مش اناا .. اصيل .
عمتي: تي حي حي عليكم كان نجي انريشكم.
روان: تو باللهِ حتى انتم تصرفوا في الفلوس ... مش في حلويات في المخزن طلعوا منها علاش الهبال هوا.
عمتي: اي والله حق ... ومشت.
ايمن: بففف تي نبصم بالعشرة انكم مجانين.
انا: والله هاذي هيا عيلتنا كان مش عاجبك اتبرى منا.
ايمن يقلد في صوتي : هادي هيا عيلتنا كان مش عاجبك اتبرى منا ... تي وراص بوك انتحري .
خشيت انا و روان وقعد ايمن ينادي .
ايمن: وحق ربي مهابيل بااهي.. ومشى.
وبعد شويا روحوا النساوين وبدينا انضموا في الدور اللوطى امتاع جدي و اميما و لبسنا كلنا نفس الفستان (هما امتاعات اميما 😋)
دانا دارت شعرها كوده و بدت تمسح في الصالة.
و  انا قمت شعري ذيل حصان و بدات نشفط (نكنس) بالكهربائية في الصالة.
وملك دارت شعرها ظفرتين من فوق و تشفط في المربوعة امتاع الولاد .
و ميس قايمه شعرها كوده و تغسل في المواعين هي و مرام .
و روان و رزان ينشفوا .
و حسناء تمسح في الممر .
و فاطمة و عائشة يساوو في المخزن.