#عيلتنا
.
.
.
.
هلال : وسام أنا نحبك.
انا 'ضحكت و قعدت نشوف للملعب'
هلال 'رفعت حاجبها بإستغراب'
انا 'قعدت ساكت و إنفكر'
هلال 'وقفت' : أصلا انا الغبية اللي حبيتك و إعترفتلك 'مشت'
انا 'تلفتت بصدمة' : هلال ... يا هلاال 'حطيت يدي على وجهي' ... تي خيرني انا خيـرنييي ... عقلي وقــف ولا شن صارلي .. 'حدفت الولاعة بعصبية' الززفت.
محمود 'قعمز' : غر وسّع بالك .
انا 'تلفتت' : الـ .. إستغفر الله وخلاص.
محمود : خيرك شن صار.
انا : تي نحبها انا نحبهااا .. صح كلامك يا محمود صح ... كنت نكابر و كبريائي عماني ... لكن أيقنت اني نحبها.
محمود 'إبتسم' : و أخيرا ... به خيرك متعصب؟
انا : ماهو العقل الهم اللي عندي هوا.
محمود : تي ادوي الزفت هيا.
انا : إعترفتلي انها تحبني.
محمود "بفرح" : به. وانت شن قلتلها؟
انا : ضحكت و بعدها قعدت ساكت زي الغبي.
محمود 'تحولت ملامحه من فرح الي عصبية' : بليــد و خــرا و دراه كبد انت .
انا "بعصبية" : ما تزيدها عليا ترا .
محمود : تبيني نصفقلك يعني؟
انا : تي إسكت. را حاس راسي بيتفجر اناا.
محمود : تبي حل؟
انا : شني؟
محمود : برا كلمها.
انا : تي مش ح تسمعلي صدقني .
محمود : برررا كلمها.
انا : لا ... عارفها ح تردني .
محمود : به ... كلمها غدوا.
انا : لما تهدا و تصالحني تو نعترفلها.
محمود 'شافلي بربع عين' : تصطفل .
انا : باهي خلاص غير الموضوع.
محمود : بفف.
انا : حقى ... عرسك في موعده را ما تغير.
محمود 'عدلت جلسته' : ها!
انا : زي ما سمعت.
محمود "بفرح" : تي إن شاء الله تصالحك غدوا و تعترفلها بااهي وتعيشوا احلى قصة حب .
انا 'ضحكت' : الله الله ع الدعاء.
محمود 'صفر' : قشــطه.
انا 'شفتله' : را قاعد عزاء.
محمود : سامحني .... لكن السعادة اللي حاس بيها توا ما نقدر نوصفهالك.
انا : عارف عارف ... ربي يتمم على خير.'وقفت' .. بنمشي نرقد .
محمود : تصبح على خير .. 'طلع تليفونه و إتصل بدانا.
انا 'مشيت و ركبت للحوش .. طبعا كان فاضي لإن الكل ح يقعد في حوش جدي .. خليت الضي مسكر و مشيت لداري ... غيرت دبشي و إتكيت ع السرير ... قعدت إنفكر في هلال و كيف إعترفت ... حسيت لحظتها اني أسعد شخص بالدنيا .. انا متأكد انها تحبني .. سمعت نبرة الصدق في صوتها ... لمحت لمعة الحب في عيونها .. زفرت براحة و كإني تخلصت من كل هموم الدنيا ... انتقلت للتفكير في ردّة فعلى ... لحظتها حسيت ان كل الكلمات تشفّرت .. ماقدرت نقول ولا حرف ... و كإن في شيء واقف بحنجرتي ... عاتبت نفسي على الموقف اللي درته و انا خايف تكون كرهتني .. طردت الفكرة من رأسي و إستسلمت للنوم ..
______________________________________________
هلال ﴿﴿﴾﴾
ركبت للحوش بسرعة بعد ما كلمت وسام ... فتحت باب الدار و حذقت روحي ع السرير .. قعدت نبكي بحرقة. ردّة فعله أطفإت كل المشاعر اللي بداخلي .. كسر قلبي و قسمه لنصين ... حسيت إني من دون قيمة و إن حبي ليه عماني و خلاني ضعيفه قدامه ... بكيت لإني و لأول مرة نحس بالندم لإني حبيته. اول مرة في حياتي نندم على حبه ... مسحت دموعي و وقفت قدام المرآيا ... تنفست بقوة و رمشت عيوني'
قلت و انا نشوف للمرايآ: هلال يا غبية .. من اليوم ح تتغيري ... طيبت قلبك الزايدة ما ليها أي فائدة مع البني أدم اللي إسمه وسام ... معاش ح نكلمه ولا نشوفله ... مش ح نعامله بحب و حنان الا لما يحبني من كل قلبه ... 'إبتسمت' .. و طبعا مش ح نصدق حبه الا بعد فترة ... آسفة يا حلو لكن لازم إنذوقك من اللي ذقته 'تنفست بقوة و غيرت دبشي و رقدت'
أنت تقرأ
عيـــلتنــا ((باللهجه الليبية))
Teen Fictionرواية ليبيه تحكي عن صغار عم والحب اللي ترعرع بينهم و المشاكل العائليه و الهياجات و المقالب اللي داروها وماعمرهم ما دسو على بعض حاجه 😍 1# - طرابلس #1 - بنغازي #1- ليبين 2# - ليبيه #2 - رومنسيه 4#- ليبيا هاذي هيا العيله ... #عيلتنا 💙 للكاتبة...
