عيـــلتنــا ((باللهجه الليبية))

البارت الثالث و الأربعرون (2/23)

#عيلتنا
.
.
.
.
.
انا 'إبتسمت ، وقلت في نفسي : الواضح ان فضولها و غيرتها مهبْلينها' .. :
هاذي منال .
هلال: منال!
انا : اي ، البنت الصغيرة .
هلال : اي عرفتها .. حقى .
انا : شني ؟
هلال 'طلعت تليفونها و ومدتهولي'
انا "بإستغراب" : شني !
هلال : اقرى ثالث تعليق .
انا 'رفعت حاجبي بإستغراب و شفت زي ما قالت ... ضحكت بقوة و شفتلها' : تراقبي انتي .
هلال : اي ... ديرلها بلـوك .
انا : لا شمنت .
هلال : غر ديرلها ، و دير لكل البنات .
انا : نص المتابعين بيـطيروا .
هلال : معترف صار .
انا : ايي ، اصلا واضحة ، الولد اللي متابعينه هلبا نصهم بنات ، و العكس طبعا.
هلال : قصدي باردين ، تو زي هاذي معلقتلك ، "بتقليد" ، راجل و البدلة العسكرية زايداتك رجولية ،  تاافــهة .
انا 'ضحكت' : تغاري .
هلال 'شافتلي بربع عين' : عندك مانع!
انا : لاا لا ، بالعكس .
هلال : من اليوم وجاي بنراقبك را .
انا 'إبتسمت و شديت يدها' : ولو لقيتي اي خطأ حاسبيني ، و أوعديني انك ما تصدقي كلام الناس ، و اي شيء تسمعيه تقوليلي عليه ، و تأكدي إني حــنحكيلك الصدق و مش ح نكذب عليك في اي حاجة ... 'إبتسمت و شفتلها بحنان' .... هلال ، أوثقي فيا ، و الله الموضوع جِدّي و نبيك بالحلال ، مش لعب صغار ولا علاقة عابرة .
هلال 'إبتسمت' : نحبك انا ، و واثقة فيك ، و متأكدة انك حـتوفي بوعدك هذا .
انا : مش قادر نوصفلك الفرحة اللي انا فيها بسببك ، والله نحمد الله في كل لحظة على حبك ، بجد انا كنت معمي بحب ناس ما تستاهل ، هلال إنتي مفيش زيك بالنسبة ليا ، إنتي حلم ، إنتي دعاء دعيته في لحظة إستجابة ، 'رفعت رأسي للسماء' ... الحمدلله  الحمدلله .
هلال 'غمضت عيونها' : وسام ، حبك ليا. حلـــم ، من الطفولة و انا نحلم بيه ، انا في اللحظة هاذي أيقنت ان الله ما يخيّب أمل حد ، و الدنيا نصيبات .
انا : ربي يتمملنا على خير ،  هئحم ، حقى .. حاولي تجسّي نبض أمك في موضوع الخطبة و الزواج ، ولو قالتلك علاش و مني  ، قوليلها واحد من العيلة بس، هلال انا منبيــش علاقتنا تمتد أكثر و ندخلوا في الحرام  لا سمح الله ، نبي في أسرع وقت تكوني حلالي و من قسمي .
هلال 'إبتسمت' : تمام ، بنمشي انا توا ّ
انا: علاش!
هلال : خلاص ساد .
انا : به ، بالله ناديلي على ملك .
هلال : به 'مشت'
انا 'قعدت نفكر في موضوع محمد و ملك ، و نفكر في ردّه فعل محمد لما بيعرف  بـخطبة ملك لزياد ، زفرت و تلفتت لملك'
انا : مسرع !
ملك : كنت قريبة من اهنا ، قالتلي هلال انك تبيني .
انا : اي ، نبيك تفتحي عقلك و تفكري في الكلام اللي بنقولهولك .
ملك "بإستغراب" : شن في ؟
انا : ملك ، في واحد كلّمني عليك ويبي يخطبك ، طبعا انا قلت لبوك ، و الولد ح يجي يتقدملك رسمي بعد غدوا .
ملك 'رفعت حاجبها بإستغراب' : أمتى صار هذا كله!
انا : بالنسبة للولد ، كلمني من لما كنت في بريطانيا ، و اليوم كلمت بوك.
ملك : لحظة لحظة ، انا نعرفه ! ومن هوا أصلاً
انا : شايفتيه ،و تعرفيــه ، صاحبي زياد.
ملك "بإرتباك" : زياد ؟
انا 'ضحكت بهزوة ' : اي زياد ، يخدم في وزارة الداخلية  ، طبعا تعرفي كل شيء  لكن  ..خليني نقولك حاجات مهمــه عليه ..  راهو يتشـرط هلبا ، و من الاخير صايع ، و ما يمشيش معاك ، اهو قلتلك ، شخصيتك و شخصيته مش راكبين على بعض بكل ، يتصنّع 'زفرت' ، يعني حتى لو وافقتي و صار من الموضوع ،  حــ يجي يوم و يدير جو التكبر .
ملك : وكيف تسميه -صاحبك-
انا 'ضحكت' : هذا في وقت الشدائد  يوقف معاي .
ملك : اممم ، باهي انت شن رايك .
انا : تبي رأيي ، أرفضي طوول .
ملك : علاش ؟
انا : في قلب يستحقك أكثـــر من زياد بهلبا ، و لو وافقتي ، حيوقف نبض ذاك القلب .
ملك "بإستغراب" : مني ؟
انا : منقدرش نقول  يجي يوم و تعرفوا 'لفيت بنمشي'
ملك : علاش تدوا معاي بالألغاز !
انا 'تلفتلها' : انا و مني ؟
ملك : انت ومحمد ، خيركم!
انا 'إبتسمت و مشيت لحوشنا ، دخلت للصالة ولقيت أمي و سالم مقعمزين يتفرجوا على فيلم ، حدفت روحي على الكنبه و ميلت رأسي للخلف'
سالم : و عليكم السلام .
انا 'شفتله بربع عين و قعدت نشوف للسقف'
أمي : خيرك وسام!
انا : نفكر .
سالم : في شني تفكر ؟
انا : تو بسام  علاش ما يشري فيلا ويسكن فيها هو و زوجته؟
أمي : وينها  الفيلا؟
انا : في هلبا ، و أولهم أمتاع جارنا  فتحي .
سالم : و من قالك الراجل بـيبيع ؟
انا : هو قالي أمس .
أمي : خلاص كلم خوك .
بسام : من خوه ! و شن يبي منه؟
انا 'تلفتت لبسام' : معاش إديرها اللقطة هاذي .
بسام 'ضحك وقعمز جنبي' : خفت!
انا : لا ، لكن باردة .
سالم : بسام وسام يبي يلزك من الحوش .
انا 'فتحت عيوني بصدمة'
بسام : شني ؟ و علاش!
انا : كذاب را .
سالم : لا لا صدقني .
انا : أسكت ، الفتنه أشد من القتل .
بسام : شن صاير؟
انا : علاش ما تشري فيلا ؟
بسام :  نبي وحدة قريبة .
انا : خلاص ، انا لقيتلك وحدة قريبة .
بسام : وين؟
انا : امتاع فتحي جارنا .
بسام : قصدك بــيبيع ؟
انا : اي .
بسام : تماام ، تو نكلمه.
انا : به .، بوي وين؟
أمي : قال ماشي هو و عمك مراد لصاحبهم .
سالم : بـــوي و عمي مراد ! لا و صاحبهم ! كيف صار .
انا : عادي .
بسام : أمي ، تو كان جتني بنت ، شن نسميها!
أمي : مندري عليك ، مرحلة الأسماء منحبهاش .
انا : من سماني انا؟
أمي : انا .
سالم & بسام : و انا .
أمي : سالم سمّاك  جدك لأنك جيت في الشهر السابع و سالم .، و بسام سمّاك بوك ، لأن من أول ما طلعت للدنيا  مبتسم .
بسام 'ضحك' : متفائل .
انا : وانا علاش سميتوني وسام؟
امي : هكي .
سالم : ع خاطر كل اللي أسمهم وسام طروف .
بسام 'ضحك'
انا : صقع عليك ، بنمشي نصلي و نرقد انا خلاص .
أمي : به .
'نضت توضيت و صليت ، بعدها مشيت و إتكيت على السرير ، فكرت في موضوع ملك ، طلعت تليفوني و بعتت لزياد  إن عمي وافق و إن يجي لما يفضى ، سكرت التليفون و رقدت'

ــــــــــــــــــــــــــــــــــــــــــــــــــــــــــــــــــــــــــــ

في الصباح ..

هذه المرة نضت تلقائيا من غير صوت أي شخص او أي شيء ،
كالعادة توضيت و صليت و درت تمارين ضغط بعدها طلعت للصالة ، شفت للساعة لقيتها الـ9:30. إستغربت و طول تسائلت (خيرهم راقدين لتوا ؟ )

سالم 'شهق' : شن صاير في الدنيا ! ، خيرك نايض بكري ؟
انا 'تلفتت بعصبية' : خيرك الزفت ؟ ، شهقتك بروحها تخلع .
سالم : غر بالحق شن في ؟ ... المخدّه غليظه ؟ ولا السرير يابس!
انا : مبردك را 'مشيت للمطبخ و لحقني سالم'
سالم : إحسبني معاك .
انا : في شني ؟
سالم : اللي بديره .
انا 'مديتله طاسة عصير ليمون و نعناع fresh '
سالم : لا لا لا ، الا هذا .
انا : عديم الذوق .'خديت الطاسه و شربتها و انا نشوف لـسالم و سالم يشوفلي'
سالم : أمتى بـنمشوا ؟
انا : وين ؟
سالم : حوش جدي .
انا : مزال اللطف ، نطلعو من اهنا الساعة 11 .
سالم : مزاال .
انا : اي نعرف .
سالم : هئحم ، وسام .
انا : لا .
سالم : شني هي .
انا : اللي هوا ، المهم لا .
سالم : نبي الـ4G  إمتاعك شويا بس .
انا : لــاــ ، لما نموت خوذه .
سالم : غر هيا يا راجل .
انا : مش في الـDCL .
سالم : تم أمس .
انا : مخصنيش فيك .
سالم : تي هيا .
انا : قلنا لا ، صبح متخلينيش نتعصب .
بوي : أسكتوا ، شن هذا الناس تصبح مش تتعارك .
انا : قوله .
بوي : أطلعوا قعمزوا  برا شن إديروا اهنا ؟
انا : كنت نشرب في عصير وهو يلحق فيا 'طلعت فتحت التلفزيون و قعدت نتفرج'
- مر الوقت ، مشينا لحوش جدي و  تغذينا و حاليا مقعمزين في المربوعة-
يزن : كساد .
محمد : مراد قوللنا نكته .
مراد : هئحم ، كان في مصري راكب طيارة كلها شيعه .
انا & هاشم : أســكت
مراد 'قعد يضحك'
هاشم : اف ، تقول ما يعرف الا هاذي .
انا : ويا ريتها مليحه .
مراد : نحب نستفزكم .
محمود : الساعة كم يا ولاد ؟
زيد : الـ3 .
بسام 'تأفف' : تي خيره الوقت بالقطرة !
هشام : بسام شن بتسمي صغارك !
بسام : مزال ما قررت .
طيف : كان ولد سميه طيف .
يزن : لا سميه يزن ، خلي يطلع زيني .
انا : ولد خوي ما نبيه يشبه الخليج .
رائف : اي .
بسام : لا إله إلا الله ، بتعطوني بعين انا و مرتي و طفلي اللي مزاال ما جى .
مراد 'مد لبسام بخور' : بخر هي .
°ضحكنا°
بسام : مش وقت بصارتك .
مراد : ع الأقل خليتكم تضحكوا و إنتوا تقول في عزاء .
انا : وين عماد و زين و لؤي و الباقي ؟
محمد : طلعو .
سالم : اي حق ، مني ما جى في عزاي ؟ خلي نوريه نجوم الظهر .
هاشم : انا جيت .
انا : كلهم جو ، الا صحابك اللي في شارعنا .
محمد : الا رضا جى و قعد يبكي لين غرق .
سالم 'ضحك' : حتى هو رضا .
محمود : خاطري نرقد .
انا : حقى ، تعال نبيك في موضوع .
محمود : شنو هوا ؟
انا : تعالى في الجنان .
محمود : هي 'طلعنا و وقفنا في أخر الجنان بحيث ما حد يسمعنا'
انا : امس قلت لعمي على زياد ، و وافق و قالي  يبيه يجي لما يفضى ، لكن صار شيء مش متوقع .
محمود : شن هوا ؟
انا : محمد يحب ملك ، و بجنون ، يا محمود يحبها حب صــادق ، شفت كل معاني الحب في عيونه. ، يفديها بروحه و لو تطلب عيونه يعطيها .
محمود: به ، قول لملك ترفض زياد .
أنا : منقدرش ، ملك تكلم في زياد  ، ماتسإلني كيف لإني مش عارف .
محمود : و محمد عرف إنها تكلم في زياد ؟
انا : لا ، يعرف إنها تكلم في واحد و واعده بالهلاك. لكن ما يعرف انه زياد ، ولا يعرف ان زياد بيخطب ملك ، ولعت يا محمود ولــعت .
محمود : #####

شن تقترحوا على بسام ان يسمي بنته/ولده ؟