الوداع ~~ الإبتعاد~~ الرحيل ~~~
تعدد المسميـات ... و الألــم واحــد💔
~~~~~~~~~ ~~~~~~~
ركبت في السيارة و انطلقت بسرعة رهيبة .. ضربت الدومان و زفرت بقوة نزلت دموعي و انا نتذكر كلامها ليا .. نتذكر نظراتها المكسورة .. بكيت ... ايه بكيت لإني بني آدم و نحس ... لإن عندي مشاعر تدق في قلبي ... لإن اللي فقدتها حاليا حب حياتي ... من قال الراجل ما يبكي ؟؟ لاا الراجل يبكي لو فقد حبه الحقيقي ... يبكي لو مات رفيق عمرة او احد والديه او شخص قريب منه ... يبكي على بلاده لو ضاعت ... لكن ما يبين حزنه قدام الناس لإنه في مجتمع يعتبر دموع الرجل عــار ... يبكي لما يكون لوحدة و يتذكر حزنه ...
قعدت ماشي في الطريق و انا نتذكر كلامها و نفكر في السبب ... السبب اللي دفن حبها ليا ... اللي خلاها تطلب فسخ الخطوبة و انا حلم حياتها ... يا ترا شن هوا السبب ؟؟
~~~~~~~~ ~~~~~~~~
خلاني بــروحي و عدا 💔
رخـاني في وقت الشـده✋
جرح قلب حبــه💔
قليل الخيــر
نســاهم خلااص أيــامي💘
باع بالرخيص أحلامي
عشــمني بكلاااامه
وعــدا للغيــر🚶
سلمتك قلبي امـانة💝
جازيتني ليش بالخيـاانه✊
ضحيت غرامـــك😿
ما عندك ضميـر👎
.....................
مر الوقت ليــن دخلت في طريق جبلية
درست السيارة و نزلت .. وقفت على حافة الجبل و صرخت بأعلى صوتي بإسمها و من بعدها نزلت دموعي تبعتها شهقات الم في قلبي بطعنه حبيب ... نزلت على ركابي و دموعي ما فارقتني كل دمعه معاها نفس السؤال علاش هكي؟؟ علااش بس؟؟ ... طلعت الدخان و ولعت أغنية وين بدك تروح و قعدت انغني معاها بكل شغف قمت راسي للسماء و تأملت في النجوم و انا نتذكر ايامي معاها من الأعدادي لي فراقنا حاليا ..
قاطعني صوت تليفوني يرن تلفتت و لقيته محمود مسحت دموعي و رديت: الو!
محمود: تي وينك يا راجل الساعة 2 را.
انا شفت للساعة و ابتسمت لإني ما حسيت بالوقت ابداً
محمود: الووووو ؟
انا: اها نسمع فيك.
محمود: وين انت.
انا: تعبـــااان يا محمود تعبآن.
محمود"بإستغراب": خير شن في؟؟ وين انت توا ؟
انا لفيت راسي بسرعة "بشك": يبدوا اني في ترهونه.
محمود"بصدمة": ترهوونه .. غادي غادي.
انا: ايه يا راجل ما تنسى اننا في طريق المطار .
محمود: مش ناسي مش ناسي .. لكن شن رفعك غادي .
انا : سيارة سالم ..."شهقت".
محمود: خيرك؟
انا نضت و لميت بضاعتي: السيارة مخليها مفتوحة .
محمود: كان يسمعك سالم يقتلك.
انا: ممكن اتجيه الجلطه قبل ما يوصل فيا... امباه لقيتها مسكره.
محمود: بالله تو فيها بنزينه.
انا: بعد الفل بي خطين.
محمود: به مليح .. هي روح نستنى فيك.
انا: باهي به ... بنروح بنرقد را.
محمود: تي غر روح انت ... ما تنسى تتسحر .. اوقف ع اول دكان يقابلك.
انا : تمام ... سلام تو.
محمود: سلام.
انا إبتسمت بقهر .... فراقها نسّاني في السحور و في الوقت و في عيلتي ... غريب الشوق ! لما يجي ينسينا كل شيء.
و ما يخلي غيرة في ذاكرتنا ... ولعت السيارة و انطلقت بسرعة متجاهل كل الأمور و في بالي امر واحد ليش نستني فتحت اغنية ليش الجفى لعلها تنسيني لي صار ... و ما فادتني شيء غير انها فتحت جروحي ....
~~~~~~~ ~~~~~~~~
ESTÁS LEYENDO
عيـــلتنــا ((باللهجه الليبية))
Novela Juvenilرواية ليبيه تحكي عن صغار عم والحب اللي ترعرع بينهم و المشاكل العائليه و الهياجات و المقالب اللي داروها وماعمرهم ما دسو على بعض حاجه 😍 1# - طرابلس #1 - بنغازي #1- ليبين 2# - ليبيه #2 - رومنسيه 4#- ليبيا هاذي هيا العيله ... #عيلتنا 💙 للكاتبة...
البارت التاسع عشر
Comenzar desde el principio
