عيـــلتنــا ((باللهجه الليبية))

البارت الثامن

هلال ﴿﴿﴾﴾

كيف سكرت التليفون وحطيته على الطاولة سمعت صوت دوشه و تسليم طلعت شفت تسنيم و جنان مشيتلهم .
انا: جنوون .. حضنتها .
جنان: هلوله حبيبتي 😍
انا: شن جوك ؟
جنان: تمام .
انا: تسنيمو حياتي .. حضنتها .
تسنيم: هلولتي 😍
انا : ياااي طالعين زي القمر .
جنان: حتى انتي حلــوه .
انا: شكراً... لكن طالعين عســل.
جنان: وين باقي البنات؟
انا: الداخل .
تسنيم: وين دانا .
جنان بفضول: صح وينها .
انا: تو اناديها تفضلوا .
وانا خاشه شفت ايمن يجري .
انا: ايمن ايـمن .
ايمن تلفتلي : خيرك ؟
انا: انت خيرك تجري .
ايمن: شني تبيني نتمختر قدام البنات .
انا: اه اممم به به .
ايمن : حقى وين مرام .
انا : صح وينها ؟
ايمن: و الله وعلاش نسأل كان نعرف .
انا: واك واك خلاص .
ايمن : قاعدة في حوشهم زعما ؟
انا: تو نسأل ميس .
ايمن: كان هذا نمشي انجيبهم اهو في الشارع اللي مقا..
انا: تي نعــرف ووه حاله .
ايمن: غر اسكتي .
انا بتركيز: ايمـن .
ايمن: ها ؟
انا "بعصبية" : شن في ورا ظهرك؟
ايمن 'تأفف'
انا: شني ؟؟
ايمن: احح .. مقروض و كنافة .
انا 'شهقت' : علاش ؟
ايمن: للشباب .
انا 'شفت لأيمن بجدية': باللهِ
ايمن: هي وراسك مكلينا شيء من الغذى
انا "بإستغراب" : كــيف ؟؟ قلتلهم ايطلعولكم قريب عشرة مرات.
ايمن: تؤتؤ مكلينا شييييء
انا 'شفت لأيمن اللي يشوفلي بنظرات بريئة، ضحكت': به خلاص ارفع اللي عندك و جيب مرام .
ايمن: به تشاو .
انا: مجاش وسام ؟؟
ايمن 'كيف بيدوي خش وسام شاد صناديق'
وسام: السلااام.
ايمن: ولد الحلال تذكره يبان .
وسام 'شاف لأيمن' : ولد حلال غصب عنك .
ايمن: به ما قلت شيء انا .
وسام: بالك بتقول شيء 😡
ايمن 'تأفف و طلع'
انا: واخيـراً
وسام: اسكتيلي ترا واصله حدي .😠
جنان : خيرك 😊
وسام "بإرتباك" : ها؟.. شي .
انا : هي وسام بنبعتوك .
وسام "بعصبية" : تبعتوا عينكم الحوله .
جنان 'ضحكت'
وسام: ما كتر ربي غير السيارات و الشباب عندنا .
انا: به من نبعتوا .
وسام: حلوه هيا ... ابعتوا بسام عرسه هوا مش عرسي انا 😡
انا: به خلاص .
وسام 'حمحم بصوته' : افتحي نت عندي مانقول .
انا "بإستغراب" : شني؟
وسام 'شافلي على جنب' : مش عليك .
جنان 'هزت راسها ومشت'
وسام: هي تشاو .
انا: خيرهم هبلوا الولاد اليوم .؟
___________________________

وسام﴾﴾﴿﴿

'ركبت للحوش غيرت دبشي ونزلت للجنان لقيت الشباب مقعمزين يضحكوا ومعاهم جواد ناديت على اصيل'
انا: اصــو .
اصيل : ها ؟
انا: برا قول لدانا قالك وسام هاتي عصاة السيلفي .
اصيل: ميا ميا 'مشى' .
انا 'مشيت للشباب وقعمزت جنبهم'
الصيد: اووو ... كل ما تكسد تغير دبشك.
رامي: تعلم تعلم .
سالم: حقــى .
احنا: شني .
سالم: لا لا لين يجي اصو .
احنا 'شبحناله بربع عين'

اصيل 'كان ماشي لدانا من باب المطبخ الخلفي شاف بنت واقفه تشرب في ميا في الجنان شافلها بصدمه وبدي يمشي بتسلل من حيط لحيط لين البنت تلفتت له'
اصيل 'صفر و شافلها من فوق للوطه'
اصيل : ناديلي على دانا .
: من دانا .
اصيل: تي دانا
'شافتله بإستغراب'
اصيل: اخت بسام .
:من بسام؟.
اصيل : تي العريس .
'قامت قصتها بتفكير' : اها عرفتها .
اصيل 'استند على الحيط' : الحلو شن اسمه😉'غمزلها'
البنت 'خشت تجري ونادت على دانا'
دانا 'بعبايتها' : ها خيرك ؟
اصيل: قالك وسام هاتي عصاة السيلفي
دانا: اها به ...'لفت بتمشي' .
اصيل: دانا دانا .
دانا 'لفت' : نعم ؟؟
اصيل: البنت شن اسمها ؟
دانا : اي بنت ؟
اصيل: اللي كلماتك تو .
دانا: تسنيم علاش ؟
اصيل: تسنيم مني ؟ شن اسم بوها ؟
دانا: مشعارف اصبر تو نسأل .
اصيل: خلاص قوليلي بعدين .
دانا: تمام ... اه هاك العصاة .
اصيل: ميا ميا بنت خالي 😁
دانا: باي 'خشت' .
اصيل 'مشي للشباب و مد العصاه'
محمد: هي شن بتقول يا سالم ؟
سالم: درنا مفاجأة انا و حسام و الصيد .
انا: مفاجأة شني ؟
الصيد: شرينا 4 مايكات .
حسام: منضومه صغيرة.
اسامه: وعلاش ؟
سالم: لوسام و محمود و اصيل و بسام.
محمد: ايه واحنا شن دخلنا 😒
سالم : والله متعرفوش تغنوا😏
انا: اطلع طووول هي نجربوهم .
بسام : منبيش انغني توا .
محمود: ولا انا .
اصيل: نبي .
انا: تمام هي جيبوهم .
جابوا الشباب المنضومه و 2 مايكات و ولعوهم .
انا: اصو شن انغنوا ؟
اصيل: مش عارف .
انا: اغنية قنابل .
اصيل: ايه ايه .
بسام: اطلع طول .
محمود: ايمن برا كلم دانا تجي تصورهم .
ايمن : به ... مشي وجي بسرعة .
محمود: اللطف مسرع .
ايمن: انا قلت لدانا لكن كلهم سمعوا و متبحتوش في الشباك غادي .
كلنا تلفتنا وشفنا البنات يصوروا فينا انا جت عيني في عين جنان ابتسمتلها .
اصيل 'شاف تسنيم فرح' : هي هي .
انا: درت وضعيته اللحن بس ؟
اصيل: ايه .
انا: هي 1 2 3 افتح 'بديت نغني و قسمنا المقاطع بينا الإتنين، قعدت مركز على جنان و نغني بكل حُب لين كملنا الأغنية و بدوا كلهم يصفقوا'
محمود: اوووويلي عليك.
انا 'ضحكت'
الشباب ' قعدوا يصفقوا و يصفروا'
انا 'شفت للروشن و اشرت للبنات يخشوا، تلفتت لمحمود' : محمود جيبلي ميا
محمود: به 'وقف و مشى'
انا 'بعتت لجنان رسالة' : نبيك في الجنان بعد شويا .... اطلعي من الباب الخلفي.
'سكرت التليفون وحطيته على الطاولة'.
_________ ________ _______
محمود 'كان ماشي للمطبخ وهو خاش من الباب الخلفي شاف دانا تحاول تاخد حافظة من الدور الثالث في الدولاب و ما قدرتش وبطنها تبان من السوريه الزرقاء وقونتها قصيــرة قرب منها ومد يده ونزل الحافظة وحطها على الدولاب اللوطي'.
دانا 'لفت وجى وجهها في وجه محمود'.
محمود 'ابتسم بطريقه غريبه' .
دانا 'ارتبكت منه' : مـ ... محمود .. خيرك.
محمود : شيء بس اللي يشوف لهاذي العيون يسكر .
دانا 'حست بمحمود يقرب ومش في وعيه دفاته ومشت بسرعة '.
محمود 'انصدم من نفسه و حط يده على راسه' : حي على امي شن درت ؟... لكن والله حق اللي يشوف عيونها يســكر ..'ابتسم و هو يتذكر منضرها وهي متحشمه و خايفه منه .. خدى ميا وطلع بسرعة ومشى للشباب'
انا: نسيت اني عطشت تعرف ؟
محمود: ها ... شد بلا جو .
جواد: خيرك مرتبك ؟
محمود: تىء ... شي شي 'مشى'
انا: لنقنا مرض .
ايمن: هــيء .
سالم: خيرك؟
ايمن: نسيييت بنجيب مرام.
محمد: برا برا زييينه مخاطريش نمشي .
ايمن 'خدى تليفونه وطلع بسرعة وهو في نص الطريق شاف مرام جايه و وراها 4 ولاد في السيارة يعاكسوا فيها وهي خايفه'
: بس بس انت يا حلــو .
: تعالى انوصلوك .
مرام 'بدت تسرع في خطواتها'
: حي حي الغزال يعرف يجري .
: عسل يقطر .
: عليك جسم ياوي زي الغزال ..'صفر'
ايمن 'معاش استحمل وهو يشوف مرام تبكي قدم للسيارة' : في شيء انت وياه.
: انت خيرك ؟
ايمن: خطيبتي شن تبي منها .
مرام 'انصدمت من الكلمة'
: والله يا سعدك .
ايمن : هيييي تعرف تمشي خير ما نكسرلك خشمك .
الشباب 'شافوا لبعض' : ربي يخليكم لبعض .. 'سكروا الروشن و مشوا' .
ايمن 'لف لمرام وشدها من ايدها': امشي تعالي .
مرام : ايمن .
ايمن: ها .
مرام 'ضحكت' .
ايمن 'وقف ولفلها' : خير شن يضحك فيك.
مرام 'زادت ضحك لين عيونها دمعوا' .
ايمن: تي اسكتي يا بنت ... شن في؟
مرام 'ضحكت و قعدت تاخذ في نفس متقطع و تحاول تتكلم'.
ايمن "بعصبية" : مراااام .
مرام: في مـ... مقروضه في جيبك 'ضحكت و شافتله'
ايمن 'حط يده في جيبه و طلع المقروضه و ضحك'
مرام 'قعدت تضحك و مسكتتش'
ايمن 'حط يده على فم مرام' : اششش.
مرام 'هزت راسها بمعنى بِه'.
ايمن 'نحى يده وكمل مشي وهو شاد ايدها' : شن جو امتحانك ؟
مرام: تمام وانت .
ايمن: الحمدلله .
'وصلوا للفيلا و سالم و اسامه كانوا يسقوا في الزرع'
ايمن 'فتح الباب و كل الشباب الحاضرين تلفتولهم' .
ايمن: خيركم ؟
اصيل : انت خيرك؟
ايمن: خير بلاك .
سالم  'شد في ايد اسامه': حبيي .
ايمن : مفهمتش ؟
انا: تي امتى ارتبطتوا .
الصيد: هكي تكبد و متقولش .
ايمن 'شاف لإيده وطلق ايد مرام وهي خشت تجري'.
انا: حب من غير مقدمات .
ايمن: وااك مفضاكم 'بالف و طلع'
•بعد دقيقه طق الباب•
سالم 'فتح الباب وًشافله' : شني مصارش؟
ايمن: مش عارف وين نمشي .
انا 'جتني رسالة فتحتها لقيتها من جنان ' انا نستنى فيك برا...
انا 'قريت الرسالة و ابتسمت'
محمود: اوووو .
انا : اه ؟
سالم: شني انتم بديتوا تكبدوا و ادسوا.
محمود 'همس في وذني' : برالها برا .😉
انا 'سيبتهم ومشيت لجنان'
_________________________،

هلال ﴿﴿﴾﴾

'كنت مقعمزة جنب تسنيم و شوي وناضت جنان انا فتها وقعدت انهدرز مع البنات لين جت دانا'
دانا: هلووول تعالي .
انا 'نضت ومشيت لدانا' : خيرك ؟
دانا: تعالي جيبي السفرة امتع الحلو .
انا: به تمام ... 'خديت السفرة ومشيت ورا دانا و وزعنا على البنات و ملك و ميس مشوا للمربوعة و وزعوا على النساوين'
دانا: وين جنان؟
انا: مش عارفه تو اندور عليها .
'مشيت اندور عليها وملقيتهاش خشيت بنشرب ميا من المطبخ جت عيني على #### ####.

_________________________

استنوني في البارت التاسع 👋

و متنسوووش التفاعل 💫