نَـــسْــــلُ آلـــقَـــبَـــائِـــلْ

الفصل 84

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 173:

عند فيلة عائلة  سباعي ..

حلات  عنيها بثقل  ومزال نعاس شاد فيه وكتحس بعضامهم كيضروها   ، بغات تنوض وهي تحس بيدين ضياء شادينها فخسرها   حولات تحيد يديه وهو حس بشي حد كيتحرك حداه وهي يدور لجهة لأخرى تكى على كرشو ودخل راسو تحت لمخدة  وكان عريان ملابس والو   هزات ليزار بغات تغطيه وهي توقف مصدومة من شافت وشم تحت دراعو اليسرة مكيبانش الا لو كان رافع يدو   ، ضنات انها غلطات وقربات عندو كثر تا بان ليه واشم عقرب   صغيرة  بقات كتشوف وصدمة بانت فيها وبقات جالسة فمكانها كتشوف مرة فالوشم ومرة فضياء وهي تجمع لوقفة بصمت وكلشي كيضرها ورجليها بزز باش كتحركهم  وكتحس بالحريق من لتحت ومصبرة راسها تا وصلات لهاتف ديالها شعلات ضو وقلبات على لفاليز ديالها لقاتهم محطوطين فدريسنغ ديال ضياء ..

حلاتهم خدات منهم  ملابس داخلية بيضين مع صوفيطمة وشورط ديالها طويل شوي واصل حد ركبة و قميص بلون لبيض بحال لقفطان مخيط برانضة فلون لبيج مع زيف فنفس لون لخياطة  وخدات فوطات ديالها مع لاطروس ديال لدوش  ..هزات كلشي دخلات لدوش حطاتهم فبلاصة ديال لملابس ورجعات خرجات وتوجهات لبلاصة فين ناعس ضياء بدات كتقلب ومستعملة غير ضو ديال تليفون باش ما تصدعوش  ، بان ليها زيف فين مسح دم ديالها هزاتو ومشات نيشن غسلاتو حيدات منو كل اثر دم وخلاتو بيض مباين فيه والو ونشراتو على حديدة كتخدم بضو كتنشف لحوايج  ...

طلقات لما سخون فبانيو ديال دوش خلاتو تا عمر  ودخلات فيه وغمضات عنيها حسات براحة  وبداو عضامها كيطلقو ولتحتاتي ديالها كيخفف لحريق  بقات فيه  تا بدا لما كيبرد عاد ناضت طلقات رشاشة غسلات شعرها وتوضات مزيان ودارت عليها فوطة ومسحات جسدها مزيان ونشفات شعرها  ولبسات حوايجها خلات غير لقميص وستفات دوش كامل ومسحات طبايع ديال لما رجعاتو كيف دخلات ليه اول مرة ..لقات زيف لي دارت نشف طواتو وحطاتو فلاطروس وخرجات خباتو فالفاليز ديالها ورجعات لبسات لقميص ودارت زيف على راسها  وهزات حوايج ديال صلاة   من فاليز بلون ابيض وفيهم طرز بالدهبي بدات كدور فالبيت كتقلب على صلاية ملقاتهاش وهي توجه عند ضياء حركاتو بشوي باش ينوض تا هو يصلي وهو   فسابع نومو عيات ما تحرك فيه و والو مفاقش   ...

حشمات تزيد تفيقو ومشات فرشات زيف ديالها وبدات كتصلي لفجر  ومن سلات بقات جالسة كدعي الله لمدة طويلة حتى بدا تحتها كيحرقها وهي تنوض شافت فساعة لقاتها سبعة وضو ديال شمس بدا كيضوي لبيت   بقات كتمشا ودور فلبيت   تا عيات وهي تمشي تجلس فطرف ناموسية  وبقات كتسنى ضياء يفيق   ، دازت ساعة و والو ما تحركش من بلاصتو وهي تنوض كتقلب على لقرأن وعاود ما لقاتوش وهي تزير على فمها  ومشات رجعات جلسات وهزات تليفون وبدات كتقرا القرأن غير من تليفون ..