نَـــسْــــلُ آلـــقَـــبَـــائِـــلْ

الفصل 77

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 160:

شرقات شمس وصبح يوم جديد ونهار لي شحال وهما يوجدو فيه ويخططو ليه وصل وهاد نهار هو نهار قمر بنت الاصول والجودة والكرم..

عطاها ربي زين والقبول وزاد ففهامتها وخلا كلامها ما يكون طويل ما يكون قصير ولكن بكلامها تعطي وتوفي وتعرف وقتاش تقدم وفين توخر  ..ربي كمل عقلها برزانتها ودينها وخلاها لويزة حرة مصقولة واخدة من ناس زمان الحكمة ومن بنات ليوم نفخة  وسميتها بحال شخصيتها حيت القمر مرة يكون كامل منور ويضوي طريق كل تالف ومرة يكون غايب ومضلم...

ناس من كل مكان جات تحضر لعرس بنت جعفر و  لفيلا كلها عمرات وبزغاريت قواة والعروسة بلباسها الابيض مطرز بخيوط خضراء طالقة شعرها الأسود ومقسوم لكل جنب ومضفور بخيط دهبي و وجها بيض ومنور مادايرة مكياج من غير لكحل لي باين فعنيها  وهازة يديها لنقاشة كتحني ليها وحبابها دايرين بيها يغنيو عليها وهي تبسم ليهم ..

كلشي لابس ومقاد وحيت نسا بوحدهم عراو شعرهم وبقاو فراحتهم يغنيو ويشطحو ونرجس جالسة وساكتة كتضحك ولكن من عنيها باين الحزن ومينة حسات ببنتها متغيرة وقربات عندها كتهضر معاها غير بشوي ..

مينة:مالكي ابنتي ياك لباس...

نرجس : والو اماما غير كنشوف  قمر شحال وهي معانا ودابا صافي اتمشي عند راجلها..

مينة تبسمات بحنية: هادي هي دنيا ابنتي وتا نتي ما بقا والو وتروحي عند راجلك وتخليني بوحدي ..

نرجس بقات ساكتة مرداتش عليها وقلبها ربي لي عالم ما بيه  اما رجال كانو برا ديال لفيلا تبنات قاعة كبيرة مخصوصة ليهم  وكلشي حجالس وضياء متوسط رجال عائلتو ولابس جلابة جوهرة رجالية بالبيج ودهبي  ومن تحتها جبادور وفرجليه بلغة صفرا وداير فيديه ساعة جلدية وفصبعو خاتم نقرة ديال زواجو ..

كيهضر مع ناس ويضحك فرحان براسو والعرس قايم تا وصل لوقت ديال خروج لعروسة من دار ابوها ...

توقفو سيارات عدة امام باب لفيلة وضياء واقف مع جعفر و ولادو كيهضر معاهم تا بداو نسا كيخرجو من لفيلا متوسطاهم قمر لابسة قفطان ابيض طويل مديراش لحزام ومخلياه نازل عليها كاملة ودايرة زيف مغطية بيه شعرها و وجها كيبانو غير يديها وحادرة راسها..

شافت يدين ممدودين ليها ومن شكلهم عرفاتهم ديال باها ..مدات يديها بجوج حاوطات بيهم يدين باها وهزاتها عندها قبلتها ودموعها هبطو على يدين جعفر لي تزير ونفسو وقفات ليه فحلقو ودموع تشكلو فعينو ما قدر يهضر حيت خاف صوتو يخونو وكتفى فقط يحضن بنتو بقوة وهي دخلات فصدرو كتشم ريحتو الطيبة حيت عارفة مكاين بحال باها وعمرها تلقى بحالو هو صدر الحنين والحامي والمحب وكلشي مجموع فيه..