نَـــسْــــلُ آلـــقَـــبَـــائِـــلْ

الفصل 70

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 147:.

نطقات كلامها بحال شي قنبولة ترمات على عبدالرحمن لي ما عرف راسو باش تبلا  ،جمع لوقفة مخرج عينو وشار بصبعو لنفسو..

عبدالرحمن: كتهضري عليا انا..

حدرات راسها و وجها حمر مزنكة مقدراش تهضر وكتفات فقط تحرك راسها بالإيجاب شي لي خلا عبدالرحمن يجلس فاشل تلفات بيه لأرض ما بقى عارف شنو يقول ولا باش يجاوب بينما العائلة كلها تبسمات و اولهم جعفر لي قال ...

جغفر: ما طلبتي ابنتي غير لموجود..

عبدالرحمن تصدم : لواااليد...

دار عندو جعفر وقال بهدوء ..

-عندك ما تقول ..

عبدالرحمن  حدر راسو مزير: لا الواليد ما عندي والو ...

اناس لي كانت شداه لموت وسخفة غير سمع اسم عبدالرحمن خارجة من فم بنتو وهو يتوگد وبدا كيضحك بحالي كيهروه  وكيشوف فبنتو لي حشمانة ..

اناس: واش بغيتي ابنتي عبدالرحمن..

ملاك رمشات عويناتها ببرائة : اه ابابا ..

عنقها كيضحك فرحان : تربيتي مامشاتش فيك خلا ختاريتي وعرفتي اش تختاري ..

عبدالرحمن خسر سيفتو : خااالي...

اناس فرحان: اشمن خالي وعيط عليا نسيبي اصاحبي ...

كلشي بدا كيضحك ولكن عفراء قالت ..

- ولكن خاص ناخدو رأي ديال عبدالرحمن هو الأول مخاصش نزربو عليه...

كلامها خلا عبدالواحد يدور راسو عندها كيشوف فيها وجسدو تزير حسات بيه نرجس وهي دور عنيها ليه وهو بسرعة رجع لطبيعة ديالو وكتفى انه يتبسم ليها ورجع عينو كيشوف قدامو بصمت...

بينما العائلة كلها شافت فعفراء مفاهمينش اش كتنوي بهضرتها وهي لي زوجات ولدها بلا ما تطلب رأيو ولا تاخد ادنو ..

ولكن تا حد مقادر يهضر فوجود نرجس و والديها لي ما عندهم خبار وكتفى سليم يتكلم من شاف كلشي سكت..

سليم : ما عند عبدالرحمن ما يقول راه بنت خالو ومايلقاش بحالها ...

كمال كمل كلامو: وملاك مربية وحافضة دينها وبعقلها تبارك الله..

عبدالرحمن سمع لعقل وهو يضحك مفقوص غير لي شاف منها عرفها ما عندها عقل ولا تكسابو وزيد عارف خالو اناس مزيان وعارف تربيتو كيف دايرة وهو عقلو ما يناسب عقلها ولا يصبر لهبالها وفشوشها ولكن لسان لي يقول بيه هادشي تلجم ليه بنظرات باه وقطع لكلام  وخلاهم هما يغنيو بغناهم كيف  بغاو ..