نَـــسْــــلُ آلـــقَـــبَـــائِـــلْ

الفصل 27

[#رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء الأول : ضياء القمر....

الفصل 54 :

"فيلا عائلة سباعي"

نزل من سيارتو  وخرج منها كيدندن عاجبو الحال وابتسامة مزينة وجهو ..

توجه لجليسة لي كاينة فجردة مغطية من شمس وتحتها طابلة كبيرة ودايرين بيها سدادر  ومخاد كبار ..

حيد سبرديلة ديالو  ونعس فوق صداري جر المخدة حطها تحت راسو وهز تليفون كيقلب فيه ساهي ..

دخلات عندو سعيدة لابسة قفطان مزينة حالتها وخا لكبر واضح فتجاعيد وجها  لكن مزال شادة فراسها وكتلبس غير لبلدي وتزين نفسها بالمجوهرات التلقليدية ..شارت لخدامة تحط صينية ديال اتاي فوق طبلة  مع بلاطو كبير و مزين باشكال كثيرة من الحلويات  مشكلين بحلويات تركية و مغربية ...

جلسات حدا راسو وكبات كاس اتاي مداتو ليه وهو تقاد فالجلسة وخدا منها لكاس وبقات عينو على  الهاتف ..طلات من جنب شافتو كيدور  فبعض الفنادق فإسبانيا ...

سعيدة : اتمشي لإسبانيا ...

ضياء نطق ساهي : مزال ما عرفت ...

سعيدة : وعلاش كتقلب على لوطيلات تم ...

طفا تليفون دخلو فجيبو  وقال بشكل عادي ..

- غير كنقلب وصافي  ...

هزات راسها وبقات كتشرب فأتاي ديالها وهو يدور عندها كيشوف فيها بنص عين ..

- لواليدة كتعرفي قمر مزيان ..

سعيدة : صراحة لا ،  لحاجة لي كتعرفهم مزيان حيت كتزورهم بزاف انا كنعرف غير مامها عفراء...

ضياء : هي قولي الحاجة لي تعطيني لخبار وصافي ..

سعيدة  كتقاد فزيف ديالها ..

- شمن خبار ...

ضياء : بغيت غير نعرف شنو كيعجبها   واش عندها شي دولة كتبغيها وتبغي دوز فيها العطلة ديالها ...

سعيدة : انا لي كنعرف انها اكثرية كتمشي لسعودية عند خوها عبدالواحد عندها عزيز بزاف تقيص عنيها وما تقيصش ليها هاد خوها ولا تجبدو بالعيب  ...

ضياء حك لحيتو لي خفيفة وحرك راسو بشوي ..

- وهاد خوها كيف داير ...

سعيدة حطات لكاس فوق طبلة وجمعات يديها وتنهدات بعمق ..

- شغادي نقول ليك وخا نوصف تا نعيا ماغديش نوفي حقو لي  انقول  ليك هو سي جعفر ولد  ولاد وزنهم يتقاص بذهب ...

ضياء  : تبارك الله  ..."ضحك بشوي"..دابا قولي ليا لا بغيت نخلي لبنت تبغيني  خاص نولي عزيز على خوها هو لول ....