نَـــسْــــلُ آلـــقَـــبَـــائِـــلْ

الفصل 8

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء الأول : ضياء القمر....

الفصل 14:

عند رجال لي واخدين راحتهم فالكلام..تبسم جعفر وعاود رحب بضِياء...

- مرحبا بيك اولدي ضياء ...

ضِياء بإبتسامة خفيفة: الله يكبر بيك الحاج....

جعفر شار لتامي : باين اتكون جبتيه نيشن من المطار ماخلتيه تا يرتاح ..

تامي جاه نيشن : سي جعفر لوجيبة جات تال بين يدينا وحنا نقولو لا  وراحة راه ايرتاح من بعد المهم هو قول ليا  كيف جاك لولد ...

جعفر ضحك وشاف فخوت مراتو لي معاه  وهما هزو يديهم بجوج ..

علال: انا اسيدي ماعندي مانقول   سيد تبارك الله راجل مافيه مايتعاب ...

كمل عبدالقادر كلام خوه :  وكيف كيقول المثل منين داك الغصين من ديك شجيرة وحنا عائلة سباعي كنعرفوهم مزيان و سمعة ديالهم معروفة فالبلاد متدينين وخدمتهم نقية  وكلشي كيشهد بهادشي  ورجالهم تبارك الله شداد بدراعهم وكلمتهم ...

تامي فرحان: اوا هانتا الحاج جعفر ها خوت مراتك قالو ليك المفيد اش بان ليك ...

جعفر تقاد فالجلسة  : اوا نسمعو  بعدا لسي ضِياء لي كيهمو الأمر ...

ضياء  حط كاس ديال اتاي فوق طبلة وتقابل مع جعفر وتكلم بجدية ...

- سي جعفر انا من قال ليا خويا و الحاجة انني انتناسب معاك مابقا عندي كلام شكون هاد  راجل لي ميتمناش نسوبية مع ناس مزيانين بحالكم ولي مربين بناتهم احسن تربية  ومنلقاش خير منكم ومن بنتكم ...

تامي فرح من قلبو و الحق يتقال كان شحال وهو كيتمنى تحول صداقتو بجعفر  الى نسوبية ويرجعو عائلة وحدة ..ضرب كتاف خوه  وقال لجعفر ..

- اوا اش قلتي اسي جعفر ...

جعفر بقا ساكت و صبعو كيضرب فوق فخضو ببطئ ومن عادتو ما كيزينش الهضرة وهادشي لي خلاه يقول لي عندو ...

- تا انا مانلقاش حسن منكم نسابي ومعاكم انحس براحة من جهة بنتي حيت عارف اصلكم تبارك الله  لكن اتسمحو ليا عندي شروط فهاد زواج وباش ما نغركمش انا مزال مادويت مع بنتي حيت مابغيت نقول ليها والو تا نقول ليكم انا شروطي وافقتو عاد انهضر مع بنتي ما وافقتوش اتبقا الهضرة بيناتنا ونسدو الموضوع ...

تامي ختفات الإبتسامة من وجهو فقط ضِياء لي بقا محافظ على الجدية  وحرك راسو بفهم ..

- من حقك اسي جعفر قول شروطك  وربي يقدرني نقبلهم كاملين انشالله ...

جعفر تنهد براحة : شنو غادي نقول ليك اولدي هذا حقك وربي عطاه ليك لكن انا ماقدرتش ومابغيتش لبنتي هادشي   ، كنتكلم على قضية التعدد لي عندكم فالعائلة انا مانبغيش بنتي دخل عليها الضرة ...