نَـــسْــــلُ آلـــقَـــبَـــائِـــلْ

الفصل 5

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء الأول : ضياء القمر....

الفصل التامن :

نرجس حدرات راسها كتاكل فشفايفها وعنيها كيتلئلئو بدموع ...

- زعمة مايبغينيش شي نهار ...

شمس بحزن : ماعرفتش شخصيتو كتجيني جدية بزاف و محال واش هداك يبغي شي نهار ...

غمضات عنيها بألم وخلات دموع يهبطو ورجعات كتنخصص بصوت مكتوم ..عنقاتها شمس بلطف  ..

- علاش كتبكي علاااش هو محاسش بوجودك گاع ونتي كتبكي عليه ...

نرجس بحرقة : شنو بغيتيني نديير من نهار عرفت الحب عرفتو معاه ، سكن فقلبي لدرجة مكتصورش وليت نعس بيه ونفيق بيه ، واخد تفكيري كامل قربت نتسطا بيه...

شمس: نتي هبيلة  وحق الله ناس من كيبغيو كيبغيو لي يضحكهم و يفرحهم و يوريهم لحياة و يعيش معاهم لمغامرات اما عبدالواحد غادي غير يسجنك فدار و يقول ليك ديري لخمار يحبسك ما يبقا تاحد يشوف فيك تولي تلبسي ديك لخيمة ما يبان وراك من قدامك ...

نرجس : اختي يشوف فيا غير هو هداك هو العالم عندي ما خاصني بناس...

دفعاتها شمس مفقوصة : اففف منك ومن هاد دل لي طاح عليك فعمرك غير 24 سنة ومخسرة راسك ونتي زين لي فيك ما كاين فتاشي بنت واي واحد يتمناك وشحال من واحد جا خطبك و رفضتيه كتسناي عبدالواحد ايوا غير بقاي تسناي تا تشرفي ...

نرحس بغوات : انا بغييت عبدالواحد ...

شمس مفقوصة: نتي هضري بشوي..شنو بغيتي  ندير ليك نولد ليك عبدالواحد اخر ولا شنو ..بغيتيه سيري عندو وهنيني من هاد لكسيطة ديالك لي عيتيني بيها كل نهار تسمعيها ليها ...

نرجس وقفات معصبة: وخا الالة سمحي ليا صدعتك ..

شمس شداتها :  مالكي دغيا كتقلقي و تهزي عليا نيفك كون كنتي ديري هادشي لخويا كون شحال هادي نسيتيه لكن كتعرفي غير ليا اما هو كيجيب ليك شلل ..

نرجس ربعات يديها ساخطة : دابا واش اتبدلي عليا الموضوع ولا نمشي بحالي ...

شمس: صافي الالة اجي ختاري معايا شي لبسة نخرجو ندورو شوي قبل ما يجي بابا راني تخنقت فهاد دار ...

حلات لماريو ديالها كتقلب فلحوايج لي معلقين وضحكات بإسستهزاء...

- شوفي اختي هاد بابا اش كيوقل ليه راسو .."هزات لملابس لي معلقين "... مكاينش شي حاجة لي قدي كلشي واسع يلبسوه معايا ربعة وزيد طويل كيتجرجر مع الأرض اما واحد لفولاد هابط تال لركابي ...