نَـــسْــــلُ آلـــقَـــبَـــائِـــلْ

الفصل 65

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 138:.

من شافها حدرات راسها تفكر انه ملابسش تريكوه خرج بزربة مشا هز تريكوه لبسو ورجع عندها  كيضحك غير وحدو ..دخل لصالون جلس قدامها وجر مخدة حطها ورا ضهرو وقال بإبتسامة ...

مبارك: مرحبا بيك اشمس...

نطقات بصوت رقيق : ترحب بيك جنة...

مبارك: اش طرا وجرا  تا تجي عندنا ...

شمس زيرات على فمها وميلات راسها وقالت بشوي ...

- علاش ممرحبش بيا هنا ...

ردها خلاه يتبسم تا بانت درسة لعقل وقال  بصوت تقيل ودا معنى ...

- مرحبا وألف مرحبا وماشي غير بيبان داري لي محلولين ليك تا لباب لي فراسك محلول خاصك غير تقبلي ..

هبطات راسها من فهمات قصدو وكتفات بصمت مقدرات ترد عليه قدام ميمتو وهو صمتها فهمو بشكل اخر  خلاه يضحك من قلبو ...

ولالة مونية بقات كتشوف فولدها ومدات ليه كاس اتاي وهو خداه منها وعينو غير على شمس والإبتسامة مخطاتش وجهو وهي تحرجات بنضراتو وقالت لنعيمة ..

شمس: جيبي لكتوبة باش نشرح ليك درس لي بغيتي ...

لالة مونية: تا تفطري ابنتي راكي ما كليتي والو ...

شمس برفض : براكة عليا اخالتي هدا راه تالت فطور عندي فهاد صباح ...

مبارك كيدور لكاس فيدو وقال ..

- كنتي عند لالة ماما ...

شمس: اه..

خدات لكتوبة من نعيمة  لي جلسات حداها كتوريها درس لي بغات وسكينة كتجمع طبلة حطات صينية قدام خوها باش يفطر وطبلة خواتها وقرباتها لعند شمس لي حطات فوق منها لكتوبة وجلسو حداها  ومبارك ربع رجلو حدا صينية وبدا كيفطر وبنص عينو مراقب  شمس وساهي فيها ودغمة حاطها على فمو معاق براسو تا نغزاتو مو وقالت ..

- خاصك تمشي لبحيرة اولدي...

مبارك نحنح بحرج وقال بشوي ..

- تال لعشية ونمشي نطل عليها ...

بقات مو غير تتشوف فيه وناضت تكمل لغدا وهو بقا كيسمع لشمس لي كتشرح لخوتاتو ...

سكينة قالت بفرحة: عندك شرح زوين دغيا كيدخل لراس ماشي بحال الأستاد..

شمس هازة ستيلو وكدور بيه على لقواعد وقالت ..

- مغتحتاجوش گاع لشرح ديال الأستاد   خاصكم تحفظو غير لقواعد ديال دروس وتبعو الأمثلة وركزو على تمارين راه كلشي ايبقى يجيكم ساهل خاصكم غير تعودو دماغكم على تمارين حيت هاد شعبة لي دايرين شوي صعيبة كتحتاج صبر ...