#عـــــــدت
" الى جميع قارئاتي العزيزات لقد تدفق الزمن كالنهر، وضيعت طريق العودة إليكم، ولكنني ما زلت أحبكم بصدق"
#الكاتبة : [#FATIMA_Z_F]
#الرواية : #نَـــسْــــلُ_آلـــقَـــبَـــائِـــلْ
القصة ابطالها ابناء ابطال قصة #قدر_المنحوسة
مكاين تا ترا...
[ #رواية_نَـسْـلُ_الـقَـبَـائِـل ] الكاتبة : FATIMA Z-F الجزء الأول : ضياء القمر.... الفصل 108:
شد طريق لكازا وعقلو كل مرة كيرجع ليه كلمة الاخيرة لي نطقات بيها نرجس ولي ماعرفش كيفاش يرد عليها و تلجم ليه لسان فديك لحضة وكتفى فقط يحرك راسو ورجع لسيارتو .. اول مرة كيتعامل مع انثى بهاد طريقة وعمرو بغا شي انثى من قبل ولا تعامل مع انثى غير اخواته ودابا مع نرجس لي اتولي شريكة حياتو كيحس بحاجة جديدة مخالفة عن اي احساس حسو من قبل.. تنهد ببساطة و وكل امرو لله وصفا عقلو من الافكار الكثيرة وركز مع طريق.... عند قمر لي خرجات من مكتب المدير مزيرة ودمعة على رموشها والمدير تابعها مم لور مع الكاتبة ديالو لي كتحاول توقف قمر ... الكاتبة: استادة قمد هادشي ماشي ديالك خلي غير نفهموك بعدا ... قمر وجها حمر مبغاتش تبكي وقالت بعصبية... - انا قلت ليكم لي عندي داك تلميد ميعاودش يحط رجلو عندي فالقسم... المدير كيحاول يصلح لخواطر... - استادة قمر تلميد مزال صغير ومعارفش شنو كيدير عطيه فرصة ... قمر عضات شفاها بقوة وكتكلم بقهر ... - لي صغير مكيديرش داك الفعل وماشي اول مرة كيفوت الحدود ديالو معايا وكثر من مرة كنعطيه فرصة وكنغمض عيني ولكن دابا لاااا ميعاودش يحطو رجلو فقسمي... المدير : واش باغية تخرجي على لولد... قمر بصرامة : نتا عارفني مزيان كيف دايرة وكفاش كنقري وسول جميع تلاميد لي دازو عندي وتعاملي معاهم ودايما كنسبقهم على نفسي وعمري حاولت نخرج على تلميد وعمري درت تقرير بشي تلميد لكن باش واحد من بداية لعام عمرو حتارمني ويزيد يتبسل عليا ومن نحاول نخرجو بتجاوز حدو ويحاول يحيد ليا الحجاب ديالي اذا هنا حبس ميعاودش يدخل عندي .... المدير ساط بجهد : هو صغير معارفش ... قطعاتو قمر : لي فعمرو 14 سنة ماشي صغير واخر مرة انقولها مايحطش رجلو عندي فالقسم ... بقاو غير كيشوفو فيها ماعرفو باش يردو مولفين ديما كيشوفوها حنينة وعاطيا الخاطر فوق القياس ومسبقة تلاميد على نفسها ..اول مرة كيشوفوها بهاد شخصية القوية وكلامها لي مكتنزلوش للارض ونضراتها لي مفيهمش الحنية وكتكلم بجدية ومكترجعش فكلام قالتو .... خرجات امامهم وجسدها مزير دازت من حدا تلميد لي تبسل عليها واقفين حداه والديه بغاو يهضرو معاها وهي دازت من حداهم معطياهمش فرصة فين يتكلمو ولا يطلبو منها تسحب تقرير لي دارت بيه ...
#تتبع
||• # تتمة_الفصل •||
[ #رواية_نَـسْـلُ_الـقَـبَـائِـل ]
الكاتبة : FATIMA Z-F
الجزء الأول : ضياء القمر.
تبعاتها الام ديالو شداتها من يديها كطلب فيها وتعاود ...
- الله يخليك ابنتي سمحي ليه غير هاد المرة راني قتلتو عصا شوفي غير حالتو تعطيك لخبار وراه حلف عمرو يعاودها ..
قمر بعدات يديها بعنف وقالت بصرامة ...
- الكلام لي عندي قلتو وضرب الالة ماعندو ما يفيد حيت ولدك خاصو تربية ويحتارم الاساتدة ديالو ...
الأم تعصبات: ولد صغير اش ايعرف ...
قمر زيرات على سنانها..
- ولدك الالة حاول يحيد ليا الحجاب وتبسل عليا واش كتشوفي هاد الفعل ديال دري صغير ...
الأم : راني ضربتو وحلف ما يعاودش الله يخليك سمحي ليه غير على وجهي ...
تزيرات قمر مبغاتش تسامح ولا تهبط كلمتها حيت عارفة لو سمحات ايعاود يدير نفس الفعل وكل مرة يجيب الام طلب فبلاصتو ...
قمر: انعطيك نصيحة الالة ماتبقايش تابعة ولدك وطلبي عليه الناس خليه يتحمل مسؤولية اغلاطو ويعرف شنو كيستناه اما لو بقيتي ديما تبعاه وطلبي فمكانو فعمرو غادي يتبدل ...
الأب حدر راسو كيطلب فيها ...
- غير هاد المرة سمحي ليه وعمرو يعاود راه غير هو لي عندنا وبغيناه يكمل قرايتو ... قمر تنهدات بجهد : اسيدي انا خرجتو من القسم ديالي منعاودش نشوفو عندي لكن ما منعتوش من القراية ممكن دير ليه انتقال لقسم اخر او تانوية اخرى اما باش نسمح ليه ويرجع يقرا عند فهادي عمرها تكون ...
قمر قطعاتو : اسيدي بابا لو شاف ولدو دار هاد المعاملة كان هو بنفسو ايخرجو من المدرسة ويعاود ليه تربية ... وحاشة يكون واحد من خوتي بحال ولدك وسمح ليا نقول ليك نيشن وبلا زواق ولدك ما مربيش وبلاصت انك تفهمو غلطو وتحملو المسؤولية ديال افعالو جيتو عندي كطلبوني نسمح ليه ورجعتوني انا هي الغالطة ... هبطو راسهم ما عرفو باش يردو عليها وهي خطات خطوة بغات تمشي لسيارتها ما بقا عندها ما تزيد فالكلام ...وفور ما خطات خطوة وقف قدامها تلميد لي درات بيه تقرير ولي كان كيشوف فقمر و وجهو كلو مجروح بضرب امه ... حاس براسو و كيضن نفسو شي حاجة وقال بصوت عالي باغي يخلعها... - الله يلقيني بيك فشي زنقة خاوية مكتخرجش ... قمر زيرات على سنانها بجهد وقبل ما تنطق حسات بجسد قوي داز من حداها وتوجه لعند تلميد مباشرة ضربو بطرشة خلاه يدور فبلاصتو ورجع شدو من لكول ديالو وضربو بروسية لنيف خلا دمو يسيل ورجليه فشلو وسخف ..
رماه من بين يديه بحال شي ورقة ودار بقوة عند قمر لي بقات مبهوضة فيه وهو بعصبية نطق بلا ما يرد بال انه خرج شخصيتو الحقيقية ....
ضياء : شبغا عندك هاد ولد القــ حبة ....
#بونوي
Oops! This image does not follow our content guidelines. To continue publishing, please remove it or upload a different image.
