نَـــسْــــلُ آلـــقَـــبَـــائِـــلْ

الفصل 11

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء الأول : ضياء القمر....

الفصل 20:

شمس: اوا نوضي تنعسي وحلمي ليك بفراس الاحلام باش نهار تولي حلالو متبقايش ترعدي ليه ...

بفرحة ناضت كتعرج حيدات لحزام لي كانت محزمة بيه خسرها وهبطات لبيجامة من سليب وتكات فبلاصتها و شمس طفات ضو وخلات ضو خفيف ومشات تكات حداها  هازين تليفون كيقلبو فيه و يطيبو نعاسهم ..

دورات عنيها لنرجس لقاتها كتفرج فصور عبدالواحد وعنيها حاملين حب ورقة ..كتكبر صورة وتركز فوجهو رجولي  و وسامتو لي كتخلي قلبها ينبض بعنف ..لمسات باصابعها صورتو على لهاتف و شمس تكلمات معاها بصوت خفيف ...

- مابقا والو وتشوفيه قدامك ...

نرجس بصدمة هزات راسها : ايدخل لمغرب ..

شمس: معلوم ايرجع باش يحضر لعرس قمر ما يمكنش ختو تزوج وهو مايكونش ...

رجعات تكات حاطة يديها فوق قلبها وطفات تليفون على صورتو وبقات ساهية فصقف ...

شمس: اعودو بالله من الشيطان الرجيم اشداني نشوف هادشي فهاد ليل ..

نرجس دارت عندها : فاش تفرجتي ....

شمس: غير شي فقيه شاد وحدة كيصلخها عصا باش يخرج منها داك جن لي ساكنها...

بقات كدور فعنيها و تفكر غير بوحدها وراسها ومقال ليها فهاد ليل ولي كيديها غير لمصايب.. تقدات فالجلسة ونغزات شمس لي متكية حداها ...

شمس : مالكي...

نرجس مصغرة عنيها : دابا هاد جنون لي كتهضري عليهم كاينين بصح ..

شمس هزات كتافها: اختي هادشي لي سمعت ناس كيعانيو منهم بزاف بالاخص لجن العاشق الله يستر واعر ..

نرجس : وزعمة هاد العاشق مكايبانش ليه زين كيدخل غير لخايبة وختها ...

شمس : صراحة تا انا كيجيوني غير كيكدبو ياك حنا زينات و كنحمقو علاش عمرو جا لينا...

نرجس رمات لغطا من فوقها وجمعات لوقفة ..

- نوضي نمشيو نشوفو و نرجعو ...

شمس: فين انمشيو فهاد ليل ....

نرجس : غير لحمام نديو معانا لما صخون و نخويوه تما كيقولو لما سخون كيفيقهم ولكان بصح راه ايخرجو لينا ونشوفوهم ...

شمس : وزعمة يخرجو ..

نرجس دافعة جبهة : نجربو و نشوفو مالهم ايخلعونا ...

لبسو بينوار سترو راسهم وهبطو لتحت متابعين دخلو لكوزينة  دارو لما يطيب تسناوه تا غلا مزيان عاد طفاو عليه لبوطة ورجعو طلعو ،  دخلو لدوش و وقفو قدام طواليط كيشوفو فبعضهم ...