نَـــسْــــلُ آلـــقَـــبَـــائِـــلْ

الفصل 11

نرجس كتزعمها : خوي مالكي واقفة ..

شمس  سرطات ريقها بصعوبة ومدات ليه لما ...

- هاكي اختي كبيه نتي انا خفت ..

نرحس  خدات لما نافخة صدرها : هاني انصلق بوه دابا نيت مالو ايخلعني ..

كبات نص ديال لما سخون وبقاو كيتسناو ما وقع والو  رجعو كيشوفو فبعض ...

شمس: زعمة يكونو ناعسين ...

نرجس جمعات حجبانها : تا هما كينعسو ...

شمس : وعلاش ما خرجوش ..

فور ما نهات كلامها طرطقات لبولة لي فوق راسهم ..صرخو برعب ونرجس رمات لما من يديها طاح على نرجس حرقها من رجليها رجعات كتركل فبلاصتها ..

شمس: تحرقت انرجس تحراااقت ...

نرجس بخوف: ماشفتكش اختي بلاتي نعاونك ...

بدات كتلمس لحيط فضلام كتقلب على شمس وهي تحس بيد ضرباتها بجهد لحنك خلاتها تغوت بألم ..

نرجس: والله تا حرام عليك انا باغية نعاونك ونتي صرفقتيني ...

شمس بصوت باكي : نتي لي ضربتيني الكدابة فين حطيت عليك يدي ...

حسو بزايد معاهم وبدا رعب كيدخل لقلبهم مالقاو غير حلقهم رجعو كيغوتو ربي لي خلقهم وكل مرة تجيهم تصرفيقة من لا مكان خلاهم يتركلو فبلاصتهم وغواتهم جهاد ...

كل لي فالفيلا فاق بالغوات خرجو مخلوعين رجال كيلبسو دراعية ديالهم و العيالات كيغطيو شعرهم و  تابعين رجالاتهم ...

علال : منين جاي هاد لغوات ...

بنتو مينة رجع وجها صفر : هدا صوت بنتي نرجس ..

دازت فيها عفراء وطلعات كتجري ورجليها كيتخواو ليها فدروج حسات برجليها فشلو عليها بصوت بنتها وغير جعفر لي كيهزها من وراه ..كلشي طلع لمكان فين كاين صراخ شافو قمر وملاك خارجين من لبيت مفاهمينش والو ...

عفراء شدات فقمر : فيين ختك ونرجس  ..

قمر وجها صفر :  خليتهم فالبيت ...

دازت مينة تحل لباب لقاتو مسدود من لداخل مكيتحلش ..تقدمو رجال بقاو كيضربو لباب تا حلوه و دخلو سمعو لغوات جاي من  لحمام  وهما يتوقفو وخلاو لعيالات لي يدخلو وجعفر جاه شك وقال ليهم يدكرو الله ويدخلو برجلهم اليمنة ...

دخلات عفراء ومينة ومعاهم قمر شافو نرجس وشمس طايحين فالارض وشعرهم مشعكك و وجهم صفر مافيه قطرة ديال دم ..بزربة خرجوهم  وقمر رمات عليهم ليزار يغطيو شعرهم و سيقانهم لي عريانين عاد دخلو رجال كيسولوهم وهما كيترعدو الخوف غزاهم ماقدرو يهضرو ولا يحبسو من لبكا ...

جعفر دور يدو على شعرو وكيستغفر الله فنفسو ...

- نهار كامل طالق القران فدار و كنرقي بناتي كل فجر وعشا  منين ايوصلهم هادشي ..

عفراء بنرفزة بغات تريشهم ومالقات منين دوز ليهم بالحالة لي هما فيها بقات غير كتغوت وتقرص من لتحت جمعات نرجس و شمس برادت غدايد الخلعة فيهم ...

- جنون هما هاد جوجات  كيقلبو على خلاهم تا لقاو لي يجمعهم ..

مينة بقات فيها بنتها  وكتفكها من عفراء..

- صافي اختي عفراء شوفي حالتهم كيف دايرة مدزيديش عليهم ..

عفراء بعصبية : شفتي هاد لفشوش ديالك هو لي ايخرج عليها وعلى هاد المسخوطة لي عندي...

نرجس شفاها كيترعدو : خالتي والله ما ..

قطعاتها عفراء بغضب : ومزال زايدة فيه ...

جمال اب نرجس دوز يدو على وجهو :حمدلله من لقاونا مجموعين كون كانو بوحدهم علم الله شنو كان ايوقع ..

جعفر قوا قلبو  : مغادي يوقع والو بناتنا قلبهم متبت بدين وهادوك الكيد ديالهم ضعيف قدام ذكر  الله ...

ملاك بقات كطل عليهم من لباب ولسانها وما كيقول ليها ما كضرب ليه  حسبة ..

- حمدلله ما نعستش معاكم اما كان داك جنين يجمعني معاكم ويصدق واخدني ...

فاطمة ضغطات عليها جاتها ضحكة : زيدي ابنتي تنعسي راكي صغيرة وهادشي بعيد عليك ...

جعفر : عاونيهم اعفراء يتوضاو ويهبطو عندي نقرا عليهم شوي ديال القرأن ونصلي بيهم لفجر ...

#نتبع