حكايات منار

حكاية " احتمالين "

احمد :اما قصة عبرة بصحيح
النهايات اخلاق فعلا اخر حاجة قولتوها لبعض انا بحبك
لا انا اخر حاجة قولتهالها كانت انها بومة ولسانها بينقط زفت وهى قالتلى ربنا ياخدك
كان ناقص بس نكسر قلل فوق راس بعض وكانت تبقى اتعشت كده
بسنت وهى بتضحك :شرشحتو لبعض يعنى
احمد وهو بيضحك :اه هى دى الفركشة اللى على حق زى ما الكتاب ما بيقول نشرشح لبعض ونعمل لبعض بلوكات من كل حاجة
مش تقوليلى كل واحد فينا قال للتانى بحبك وكان ناقص تجيبو لبعض هدايا علشان تفتكرو بعض بيها
ده ايه الفركشة النايتى دى فين الاكشن فين الاثارة
بسنت :وانا اعمل اكشن واثارة وشرشحة ليه وانا بنهى علاقتى بواحد بحبه وبيحبنى
هو اينعم حبنا مكنش كفاية يخلينا نكمل سوا بس حبنا كان كفاية ميخليناش نهين بعض واحنا بنسيب بعض
هو انت كنت بتحبها
احمد :لا مش لدرجة بحبها بس هى كانت عاجبانى
كانت بومة بس حلوة اوى الصراحة
بسنت :طيب وهى كانت بتحبك
احمد :لا اللى زى منة ملهمش فى الحب مبيعرفوش يحبو
هما بس لازم يكونو فى علاقة لازم يكونو مرتبطين بحد حاجة كده لزوم التباهى والفشخرة زى لبسهم ومكياجهم
بسنت :بس دى كده تافهة وسطحية اوى
احمد وهو بيضحك :وانا كنت قولتلك انها بتخصب يورانيوم ما انا عارف انها تافهة وسطحية
ما هو ده نوعى المفضل
بسنت باستغراب :بتحب البنات التافهة السطحية
احمد :لا مبحبهمش وعلشان كده هما نوعى المفضل لانى لا عايز احب ولا عايز ادخل فى علاقة بجد انا عايز علاقة كده طيارى لما انهيها مكسرش قلب حد
بسنت :ليه
احمد :لانى عارف ان كسر القلوب مش بالساهل
بسنت :قصدى ليه مش عايز تحب ولا تدخل فى علاقة بجد
احمد :وبعد ما احب وادخل فى علاقة بجد واخطب واتجوز واخلف كمان هيحصل ايه هرمى عيالى واروح اتجوز وترمى هى راخرة عيالها وتروح تتجوز وفى الاخر ابنى يقعد يحكى مأساة حياته دى لموظفة كحيانة سايبة شغلها وقاعدة ترغى معاه يلا يا انسة على شغلك بدل ما اقطع عيشك من مكتبى
بسنت وهى بتضحك :خلاص الموظفة الكحيانة هترجع شغلها بدل ما مديرها الظالم يقطع عيشها
بس قبل ما ارجع عايزة اقولك كلمة واحدة
احمد وهو بيضحك :اتق الله
بسنت بابتسامة :لا هقولك انك لما تتجوز مش هتعمل زى باباك وترمى ولادك اذا كنت معملتش كده فى مريم اختك وربيتها وعوضتها عن غياب باباكم ومامتكم
انت مش هتعمل زى باباك لانك مش زيه ومستحيل تبقى زيه فى يوم انا متأكدة
هرجع اكمل شغلى بقى
احمد :بسنت
بسنت وهى بتبصله :نعم
احمد بابتسامة :شكرا
بسنت بابتسامة :متشكرنيش انا مقولتش غير الحقيقة
احمد وهو بيضحك :مبشكركيش على اللى قولتيه بشكرك علشان اخيرا هتروحى تكملى شغلك اللى معطلاه ده

بعد شهر
بسنت :طيب انت اختك اتخطبت وانت عايز تجبلها هدية انا مال اهلى واخدنى معاك ليه
احمد :عايز اجبلها حاجة ذهب ويكون شكلها حلو ومحتاج زوق بنت والمفروض انك بنت
بسنت :انت مش مرتبط دلوقتى ببريهان
احمد :ميريهان
بسنت :ميريهان مخدتهاش هى ليه
احمد :ميريهان مين دى اللى اخدها تنقى معايا هدية لاختى ده انا معرفتهاش ان اختى اتخطبت من اصله
وبعدين انتى بتشغلى عندى يعنى لازم تسمعى كلامى
بسنت :انا بشتغل معاك مش عندك
احمد :انا اللى بقبضك مرتبك فى اخر الشهر وانا قولت بتشغلى عندى يبقى بتشتغلى عندى
بسنت :بسيطة اقدم استقالتى واشوف حد اشتغل معاه مش عنده يا نرجسى يا مغرور انت
احمد :لا يا بيسو شغل ايه اللى تسيبيه ده انتى بتشغلى معايا جدا ده انتى شريكتى فى المكتب بمجهودك
وبعدين مش الصديق وقت الضيق ولا ايه
بسنت :ما كنت بشتغل عندك وبتقبضنى من شوية دلوقتى بقيت شريكتك بمجهودى والصديق وقت الضيق
ماشى هنقى معاك على الله يطمر
احمد :هيطمر هيطمر متقلقيش