حكايات منار

حكاية " عيشة والسلام "

بعد ساعة
جيلان :خلاص بقى يا اميرة حمزة جالك لحد هنا وباس راسك
حمزة :ومستعد ابوس راسها تانى يا طنط بس ترجع معايا البيت وحش من غيرها
جيلان :خلاص بقى يا اميرة
منة :وجابلك كمان برفان هدية وساعة كمان
رانيا :وجابلك ورد وانا مخطوبة بقالى شهرين لمحمد معبرنيش بحزمة بقدونس ولا رابطة فجل حتى
اميرة :خلاص هرجع معاه علشان خاطركم بس
جيلان :عين العقل يا حبيبتى هو انتو ليكم غير بعض

باليل فى شقة اميرة وحمزة
اميرة :طبعا كالعادة سايبلى مواعين كتير فى المطبخ وايه ده القهوة بتاعتى برضه خلصتها مع انى قولتلك متشربهاش
حمزة :يا ظالمة فاضل فيها تلقمتين بعد العشا تعمليهم نشربهم وبكرة وانتى راجعة من الشغل جيبى قهوة من مطحنة البن اللى جمب شغلك
اميرة :حسبى الله ونعم الوكيل..ماشى هغير هدومى واغسل المواعين وبعدها احضر العشا
حمزة :لا حضرى العشا الاول انا جعان
اميرة :لحقت تجوع ده احنا لسه متغديين من كام ساعة عند اهلى
انت بطنك فيها حاجة على فكرة
حمزة :انا اللى بطنى فيها حاجة ولا انتى اللى مبتحبيش الاكل عارفة انتى لو عيشتى لوحدك مش هتاكلى مش هتلاقى حد يفكرك انك لازم تاكلى انتى بتاكلى علشان اللى حواليكى بياكلو وخلاص
اميرة :مش للدرجة دى بس انا مبحبش الاكل زيك انا باكل علشان اعيش انما انت عايش علشان تاكل
حمزة وهو بيضحك :ده حقيقى غيرى بسرعة بقى وحضرى العشا علشان بعدها تعمللنا قهوة وحشتنى القهوة من ايدك

بعد شهرين
اميرة :نتخانق على ايه المرة دى نقول انى مش بهتم بالبيت
حمزة :اميرة انتى بتطبخى كل يوم وبتغسلى كل اسبوع وبتمسحى خمس ست مرات فى الشهر
اميرة :طيب نقول انى مهملة فيك انت
حمزة :بس ده مش حقيقى انتى مهتمية بكل حاجة تخصنى سواء فى اكلى او لبسى ده انتى حتى شراباتى مش بضيعيها بتهتمى بيا ولا كأنى ابنك
اميرة وهى بتسقف :بس هى دى لقيتها انت تشتكى لمامتك انى بهتم بيك زى ما تكون ابنى وانك حاسس انى مامتك مش مراتك وانك حاسس انك زهقت وتعبت منى ومن اسلوبى ده معاك
بص روحلها بكرة واشتكيلها منى وبات عندها مش كل مرة انا اللى اسيب البيت المرة دى تبقى انت اللى مضايق منى
حمزة :اكيد مش هسيبك تباتى لوحدك فى البيت بس هروح بكرة واشتكى لماما منك وهطول عندها وارجع متأخر بالليل
اميرة :خلاص ماشى

بعد يومين
حمزة :اخيرا رجعتى طنط جيلان قالتلك ايه
اميرة وهى بتحط شنط على الكنبة وبتقعد بتعب :ماما قالت حاجات كتير وعملت حاجات اكتر
قالتلى اهتم بيك واهتمام مش معناها طبيخ وغسيل ومسيح لا معناها انى اكون زوجة بجد زوجة تاخد عقل جوزها وقلبه فضلت ساعة تدينى محاضرة عن الحياة الزوجية وبعد ما خلصت الجزء النظرى جه دور الجزء العملى
حمزة وهو بيضحك :عملت ايه
اميرة وهى بتفك حجابها :خدتنى كوافير عملتلى صيانة هناك وخليتهم يقصو شعرى وبالعافية منعتها اننا نصبغه لانى بحب لونه
حمزة :وهو طويل احلى لما يطول تانى متقصيهوش بحبه طويل
اميرة :ايه الطموح ده انا شعرى هياخدله بتاع سنتين على ما يرجع لطوله القديم معتقدش هنكون لسه متجوزين وقتها
حمزة :كملى عملتو ايه تانى النهاردة
اميرة :خدتنى لمحلات ماكياج وبرفانات حاولت اقنعها انى عندى كتير وفى حاجات لسه متفتحتش اصلا بس هى مقتنعتش بس لقينا درج روج تحفة لونه خوخى حلو اوى مبسوطة انى جبته
حمزة :لونه خوخى ازاى يعنى
اميرة :يعنى لون الخوخ برتقانى
كده شوية
حاجات كتير جبناها بلا هدف لانك مش هتسيبنى احط مكياج
حمزة :انا مراتى متحطش مكياج يشوفوها بيه الناس فى الشارع
اميرة :ده على اساس انى مراتك بجد
حمزة :مراتى بجد مراتى بهزار المهم انك مراتى وعلى اسمى عايزة تحطى مكياج حطى براحتك بس هنا فى البيت
اميرة :يعنى افضل بتاع ساعة احط فاونديشن وايشادو وايلاينر وكحل وروج علشان افضل بيه فى البيت يرضى مين ده
حمزة :يرضينى انا
اميرة :لا وعلى ايه طول ما احنا متجوزين مش هحط وامرى لله
لفينا كتير اوى هى خناقة المرة دى اللى خلتنى الف على كعوب رجلى دى فكرة مين فينا
حمزة وهو بيضحك :فكرتك طبعا كالعادة وهو انا برضه ليا فى الخناقات وخراب البيوت...بس ايه الشنط دى
اميرة :هدوم ...استنى انت هتعمل ايه
حمزة :هشوف جبتى ايه
اميرة وهى بتقف بسرعة وبتاخد الهدوم وبتروح ناحية اوضتها :وانت مالك انت تشوفهم بتاع ايه ده انت انسان غريب جدا
حمزة وهو بيضحك :طيب هبص بصة واحدة بس وانا بقولك البسيهم ده انا بقولك هشوفهم اميييييرة انتى زوجة مش جدعة على فكرة