ايات :ايوه بقى الناس اللى عمها مظبطها
ابتهال :يا شيخة اجرى كده مظبط مين ده كان لسه بيقولى هخلى صحابى المعيدين يشيلوكى المواد بتاعتهم
ايات وهى بتضحك :يا ستى على الاقل راحمك من المواصلات
ابتهال :عندنا ايه اول حاجة
ايات :سيكشن دكتور منذر
ابتهال :يا ريتنى ما سألت
ايات وهى بتضحك :ليه بس ده حتى شرحه حلو وكمان مركز معاكى وشكله كده عاشق ولهان شارى
ابتهال :شارى ولا بايع مالى انا يعنى مش كفاية عمى شابهنى بره الجامعة يجى هو يشبهنى جوا الدفعة
ايات :معملش حاجة تخليكى تقولى عنه شابهك هو انسان محترم ومتخطاش حدوده بلاش ظلم وافترا يا ابتهال
ابتهال :ولما يفضل مركز بعينه عليا كل سكشن ولما يسالك عنى لما اغيب ده عادى يعنى وانتى عارفة بنات الدفعة ميتوصوش ودماغهم مفيش افضى منها
ايات :يا ستى سيبك منهم
ابتهال :مصطفى يقولى سيبك من كل اللى فى الجامعة وانتى تقوليلى سيبك من اللى فى الدفعة انا ايه اللى خلانى اكمل تعليم ما كنت قعدت فى بيتنا استنى العدل وخلاص
ايات وهى بتضحك :ليكى نصيب اعرفك وتعرفينى يا بيتو
ابتهال بابتسامة :والله يا بنتى ده اللى مصبرنى انتى احلى حاجة فى المكان ده بالنسبالى يلا طيب بقى علشان نلحق السيكشن
ايات :دكتور منذر هيدخلنا حتى لو اتأخرنا علشان خاطر عيونك يا جميل
ابتهال :ايوه علشان تبقى كملت مدى يا ايات علشان نلحق ندخل لو لقيته دخل خلاص مش هخبط اصلا وفى داهية السيكشن
ايات :لا متقلقيش كده كده لسه عشر دقايق يعنى هنلحقه
بعد شهرين
ابتهال :يا مصطفى متشلنيش اتنيل وقفها خد منها رقم والدها ولا تحب اوقفهالك انا
مصطفى :افرضى رفضت
ابتهال :وترفض ليه معيد وزى القمر ومحترم وابن ناس وانا بنت اخوك هى هتلاقى عريس عنده بنت اخ عسل زيى كده فين
مصطفى :خفى العسل يا ابتهال واتكلمى جد
ابتهال :يا صاصا يا حبيبى بقالك سنتين متردد تاخد منها رقم والدها دى البنت اتخرجت وانت لسه منطقتش يا ابو الهول وربنا بعتهالك تانى لحد عندك تحضر ماجستير واهى فى التمهيدى اهيه ايه هتستناها لما تاخد الدكتوراة ولا لما تيجيلكم مخطوبة
بص يا مصطفى ان البنت دى تيجى تحضر ماجستير وهى لسه متخطبتش معناها حاجة من اتنين
مصطفى :ايه بقى يا عبقرينو
ابتهال :ياما هى معقدة وكارهة الرجالة ومعتصمة عن الزواج ياما ربنا بيديلك فرصة تانية وتبقى غبى لو ضيعتها زى ما ضيعت الفرصة الاولى
انا كابتهال برجح الاحتمال الاول ان شاء الله تطلع معقدة وبتكرهكم وترفضك شر رفض
مصطفى وهو بيضحك :كده برضه يا بيتو
ابتهال :لا يا حبيبى مش كده انا بهزر بس بجد يا مصطفى بقى ابوس ايدك وقفها اطلب منها رقم والدها
مصطفى :محروج اعمل كده
ابتهال :يا عم الموضوع بسيط قولها انسة رضوى ممكن رقم والدك سهلة يعنى زى شكة الدبوس
مصطفى :يا سلام وانتى كنتى جربتى توقفى حد قبل كده تطلبى منه رقم والده علشان تقولى سهل ومش سهل
ابتهال وهى بتضحك :لا انا مش بائسة لدرجة انى اوقف الشباب اطلب رقم اهاليهم يا صاصا
بس اسمع منى بقى وكلمها لو خلصت الماجستير ولا حتى اتخطبت وانت لسه متكلمتش معاها وطلبت منها رقم والدها هولع فيك انا علشان زهقتنى من كتر كلامك عنها على الفاضى
مصطفى :خلاص هى هتيجى كمان يومين عندها محاضرة هوقفها واطلب منها الرقم
ابتهال وهى بتصقف :ايوه بقى هو ده الكلام يا صاصا يا جامد
مصطفى :لو قولتيلى يا صاصا دى قدامها انا اللى هولع فيكى
ابتهال :يا عم اخطبها انت بس وانا مستعدة اقولك يا عمى حتى
مصطفى :تفتكرى هتوافق تدينى الرقم
ابتهال :ان شاء الله هتوافق انا متفائلة
حكاية " مشاعر مش بتروح لحالها "
Start from the beginning
