حكايات منار

حكاية " خير كبير "

بعد اسبوعين
شيماء :لا هنقعد من المدرسة ازاى واشوفك فين
سيرين :بصى احنا نشوف بعض فى الدروس احنا بنروح عند نفس مدرس العربى بس مجموعات مختلفة نروح نفس المجموعة والانجليزى والفرنساوى هروح عند نفس المدرسين اللى بتروحيلهم مش هما شاطرين
شيماء :هما شاطرين اه بس هتسيبى مدرسينك علشانى
سيرين :انا كده كده مببقاش مركزة اوى مع شرح اى مدرس ومبفهمش الدروس غير لما اذاكرها بنفسى فمش هتفرق اوى اروح عند مين المهم احترم نفسى واتنيل على عينى اذاكر
شيماء :انتى مش المفروض خدتى كل الكلام ده السنة اللى فاتت
سيرين :ما هو المفروض عند المكوجى
كان نفسى والله تبقى الحاجات اسهل بالنسبالى بس انا ذاكرتى ذاكرة سمك وبعد اربع خمس شهور مذاكرتش فيهم ومفتحتش فيهم كتاب المنهج اتبخر من دماغى واكاد اكون باخده لاول مرة مخى مش مقتنع انها المرة التانية

بعد شهر
سيرين :رجعت البيت من الدروس عصافير بطنى يا عينى ماتو من الجوع دخلت على المطبخ كالعادة لقيت حلة على النار بصيت عليها وانا كلى فرحة وامل تكون فراخ ولا لحمة ولا حتى شوربة عدس قوم الاقيلك ايه الحلة فيها مشابك ست الحبايب بتغليهم
روحت سالتها فين الغدا قالتلى النهاردة يوم الغسيل اللى هو هاكل هدوم مغسولة ولا ايه انا مش فاهمة قالتلى اخوكى راجع من الجيش بكرة هطبخ بكرة طيب والنهاردة اعمل فيه ايه انا قالتلى اسلقيلك بيضتين ومشى حالك النهاردة
دى معاملة يعاملونى بيها وانا ثانوية عامة ده انا كده اجبلهم ملاحق بضمير مستريح
لا وكمان قالتلى فاضل تلت جرادل انشريهم انتى بما انك رجعتى وانا هدخل استحمى ودخلت استحمت فعلا بس انا مسكتش والله ما سكت لا
شيماء وهى بتضحك :عملت ايه يا شبح
سيرين :مسلقتش بيض وخدت منها فلوس جبت جبنة رومى ولانشون وعملتهم سندويتشات وجبت هوت شوكلت على حسابى مرضيتش تدينى فلوسه ومدتنيش فلوس الجبنة والانشون غير لما نشرت التلت جرادل
انا شاكة انهم متبنينى والله بمعاملة مرات الاب اللى بتعاملنى بيها دى بس فيه اوراق رسمية بتاكد انى بنتهم وفى كمان صور ليا معاهم
شيماء وهى بتضحك :وخوفهم عليكى ساعة العملية
سيرين :فكرتينى بالعملية والعز اللى شوفته وقتها انا كان كل حاجة بتجيلى لحد السرير من اول الاكل لحد الماية ادلعت اخر دلع تقريبا بيطلعو عليا الدلع اللى ادلعته وقت العملية دلوقتى
شيماء :انا رجعت لقيت ماما عاملة سمك وطبعا كالعادة اتفاجئت انى مباكلوش فسلقت بيض وكلت بيض وجبنة وخلاص
سيرين :من بعد العملية وكمية البيض اللى كلته واللبن اللى شربته وانا مبقتش اطيق اشوفهم انا كلت كمية بيض كفيلة تحولنى لفرخة والله وشربت لبن يخلينى بقرة حلوب وكل ده علشان الدكتور قال لماما انى ضعيفة ونسبة الكالسيوم فى جسمى قليلة وعلشان كده عضمى مبيلحمش بسرعة تحسيه بيتكلم عن كاوتش عربية مش عن عضم بنى ادمة
المهم يعنى انى كلت بيض وشربت لبن يكفينى بقية عمرى الجاى خلاص كفاية بيض ولبن لحد كده واركز بقى على خيرات الله ونعم ربنا الباقية