انا نانسى عندى تلاتة وعشرين سنة اخر سنة كلية اعلام
هيثم وميار ومرام يبقو ولاد عمى انا عايشة معاهم لان اهلى عايشين فى الشرقية وانا جامعتى فى القاهرة اخترت اعيش مع عمى طاهر لان عنده بنتين فى البيت ولان شخصية هيثم متخوفش هو مبيعبرنيش اساسا ففكرة اننا نكون عايشين فى بيت واحد مش محرجة لانه مبيشكلش خطر باى شكل من الاشكال ودكتور وعنده عيادة مشغول تقريبا طول الوقت
انما عمى سالم عنده ولدين والاتنين اكبر منى وعمتى ليلى عندها تلت ولاد غير جوزها عمى طاهر كان الاختيار الانسب بقضى الدراسة معاهم وبرجع لاهلى فى الاجازة وكمان كل شهر بنزلهم يومين تلاتة هما بصراحة بيوحشونى اوى واخواتى وولادهم انا عندى اخ واخت اكبر منى متجوزين ومخلفين واخت اصغر منى ودى اللى مونسة بابا وماما فى البيت دلوقتى
عدى على الموقف ده شهرين كنت واقفة فى البلكونة بشرب شاى بنعناع لانى بحبه جدا لقيت هيثم ابن عمى عامل قهوة وجاى يشربها معايا فى البلكونة
هيثم :نظريتك طلعت غلط خطتك منجحتش
نانسى :قصدك ايه
هيثم :صاحبى جرب ينسي المانجة ويركز مع جوافة
نانسى :وبعدين
هيثم :محصلش اى حاجة جرب يهتم بجوافيتين تلاتة ولا الهوا لسه بيفكر فى المانجة والجوافة لا مالية عينه ولا شاغله عاقله ولا مالكة قلبه
نانسى :طيب ما يجرب مع جوافاية رابعة يمكن تطلع هى جوافاية احلامه قصدى يعنى الانسانة المناسبة ليه
هيثم :تفتكرى
نانسى :افتكر جدا ما هو بص صاحبك يا يحب المانجة وهى مانجة ويقبل بقى انها مانجة ومستحيل تبقي جوافة يا يروح يشوف جوافة يحبها وميقرفش المانجة معاه
هيثم :تمام
عدى تلت شهور كان تعاملى مع هيثم اختلف شوية بقي بيكلمنى احيانا عن صاحبه كمان بقى بيبتسم فى وشى تخيلو وساعات بيسألنى عن اخبارى فى الكلية
هيثم :واديه جرب اربع جوافات كمان ولا فارقين معاه ولا هزو منه شعرة مش شايفهم المانجاية بتاعته ساحره عينه وواخده قلبه وعقله
نانسى :هو لسه عاوزها تبقي جوافة ولا بيحبها وقابل انها مانجة
هيثم :مش عارف ياخد قرار
لا متحمل انها مانجة مش جوافة ولا الجوافة ماليه عينه
نانسى وهى بتضحك :يبقى يلبس بقي لما المانجاية بتاعته يجى اللى يشتريها
هيثم :يشتريها
نانسى :اه طبعا يشتريها لو صاحبك فى صراع ومش عجباه المانجة فغيره بيعشق المانجة ويتمنالها الرضا
هيثم :قصدك مين يعنى
نانسى :مش قصدى حد انا بتكلم عموما انا لا اعرف صاحبك ولا اعرف المانجاية ولا اعرف السبع جوافات اللى عرفهم
هيثم :معرفهمش هو حاول يركز معاهم يشغل نفسه بيهم يكلمهم فى حدود الزمالة بس ملفتوش انتباهه والمانجاية المغفلة دى واخدة قلبه وعقله وهى مش حاسة وهو تفكيره فيها بيزيد ده مرضاش يطرد بنت من السكشن لانها نفس اسمها تخيلى قلبه مطاوعوش لا وطول الوقت عمال يتخيل شكلها هيبقى ازاى فى الفستان الابيض وهو فى البدلة السودا لسع صاحبى لسع على كبر مكنش يومه
نانسى وهى بتضحك :اهل الحب صحيح مساكين
بس زى ما قولتلك نهاية الصراع ده لازم هو اللى يحطها لازم يختار يا يقبل بالمانجة وهى مانجة ويحبها لانها مانجة يا..
هيثم قاطعها :يا ايه يركز مع جوافاية تامنة ما جرب وفشل
نانسى وهى بتضحك:خلاص يجرب الفراولة ولا الكنتالوب ولا الكيوى
السوق مليان فاكهة
هيثم :الاختيار صعب
نانسى :بالعكس صاحبك هو اللى مصعبها على نفسه قلبه اختار المانجة بس عقله عايز الجوافة وفى الحب مدام القلب اختار يبقي على العقل السلانكتيه يعنى كل كلام العقل واحكامه يبلها ويشرب ميتها ولو ركز مع عشرين جوافاية هتفضل المانجاية هى اللى فى قلبه هى اللى شاغله تفكيره ومجنناه بيها
صاحبك عمال يفكر فى صراعه مع قلبه وعقله وناسى انه ممكن يلاقى نفسه بيشرب حاجة ساقعة وبياكل جاتوه ببلاش فى فرح المانجة ما هى مش هتفضل لوحدها فى الدنيا ومسيرها تلاقى فكهانى يقدرها ويبقى يدور صاحبك بقى على جوافاية تنسيه ولا على مانجاية تعوضه عن المانجاية اللى خسرها بانايته وتردده وغباءه
هيثم :غباءه انتى ازاى تقولى عنه كده ده صاحبى
نانسى :هو نفسه هيقول كده عن نفسه لو خسرها لانه مش هيعرف يعوضها مهما عمل عارف ليه
هيثم :ليه
نانسى :علشان المانجة خلته يحبها غصب عنه نسى مبادئه وافكاره وقناعاته جابته على ملا قلبه ومبقاش شايف اى فاكهة تانية فى الدنيا غيرها وده حب مش اى حد بيلاقيه فى الدنيا صاحبك مميز ومحظوظ غيره بيعيشو ويموتو من غير ما يلاقوه انا عارفة انه مكنش مناه يلاقى الحب ده وكان عايز عنصر نشط زيه يكمل بيه المعادلة بتاعته بس ربنا كاتبله معادلة احلى هتديله مركب اجمل من اللى هو كان عايزه قصدى يعنى حياة احلى من اللى هو كان راسمها لنفسه الحب رزق واللى يضيع رزقه من ايده يبقي ايه
هيثم :غبى
نانسى :بالظبط يبقى غبى ويستاهل يقضى حياة تعيسة مع جوافاية يعيش معاها وهو بيفكر فى المانجاية اللى ضيعها من ايده او يعيش وحيد وبرضه يندم على المانجاية اللى ضيعها من ايده
هيثم :يعنى هيندم هيندم
نانسى :طبعا هيندم مش غبى الاغبية بيغلطو ويقضو بقية حياتهم ندمانين على غلطهم
هيثم :معاكى حق
بعد يومين
نانسى :مبقاش يحلالك شرب القهوة الا فى البلكونة زيى
هيثم :لا مبقاش يحلالى شرب القهوة الا معاكى وانتى بتشربى شاى بنعناع
نانسى :ده كلام حلو انت بتقولى كلام حلو
هيثم وهو بيضحك :المفروض انا حاولت ويكفينى شرف المحاولة المهم كنت عايز اقولك اخر تطورات الجوافة والمانجة
نانسى :قول
هيثم :صاحبى قرر ميبقاش غبى قرر ياكل المانجة قصدى قرر يشتريها وبيحبها وهى مانجة وعارف انها هتفضل مانجة ومش هتبقى فى يوم جوافة فهم انه مش عايز جوافة هو عايز مانجة ها بقى المانجة رايها ايه
نانسى :ها
هيثم وهو بيضحك :لا ده واضح ان مش صاحبى بس اللى غبى ايه يا نانسى معقول مفهمتيش ان كلامى اللى فات ده كله كان عنك
نانسى :هو انا فهمت ومن الاول فاهمة اصلها قديمة اوى حكاية صاحبى عنده مشكلة دى
هيثم :فاهمة من الاول وسمعتينى واتكلمتى معايا ودورتيلى على حلول كمان
نانسى :متفاجئتش انك شايفنى كده اصلا كنت متوقعة
واتكلمت معاك لانى عارفة انك لو عندك حد تانى تحكيله كنت حكتله ومكنتش حكتلى انت حكتلى لانك معندكش حد تانى تحكيله وعلشان كده سمعتك ودورتلك على حلول كمان ومفرقليش انت شايفنى ازاى المهم انا شايفانى ازاى المهم انا عارفة نفسي على ايه
بالعكس انا صعب عليا احساسك بالصراع اللى جواك
هيثم :كلامى مضايقكيش خالص
نانسى :بصراحة فى الاول مكنش بيضايقنى خالص بس من فترة بقى بيضايقنى شوية
هيثم :طب ايه المانجة لو طلبت اشتريها وتبقى مانجايتى للابد هتوافق ولا هتسبنى اندم بقية عمرى عليها
نانسى وهى بتخرج من البلكونة :المانجة تعرف ردها من ابوها اللى هو عمك يا دكتور
متتخضوش وافقت عليه اينعم هو فضل شهر ونص متكلمش مع عمى ولا بابا فى الموضوع لحد ما خلصت امتحانات وانا مكنتش بقف فى البلكونة كنت بخليه يشوفنى قليل ولما اتقدم فضلت عشر ايام بفكر بس فى الاخر وافقت مقدرتش اتخلى عن واحد حبنى غصب عنه جبته على ملا قلبه من غير ما احس ورغم رفضه ومقاومته للحب ده الا انه فشل وحبى جواه كان اقوى من محاولاته اقوى من عقله ومن مبادئه انا كمان حبيته لما قربت منه ساعة لما كان بيحكيلى فى الاول اعجبت بيه وبعد ما اتخطبنا حبيته ولما اتجوزنا بقيت بحبه اوى زى ما هو بيحبنى
بحبه ومقدرش اعيش من غيره وعارفة انه شخص منظم عايش حياته بالورقة والقلم دكتور والثانية عنده ليها قيمتها وكلمته بحساب ومبيعبرش عن مشاعره بسهولة حبيته زى ما هو ومش عايزاه يتغير
وهو حبنى وهو عارف انى شخص عشوائى فوضوى ومش منظم كلامى كتير وبعبر عن مشاعرى طول الوقت
حبنى وهو عارف انى مانجة وقابل انى مانجة ومستحيل ابقى جوافة
من الاول حددو اللى انتو عايزينه وخدوه
عايزين مانجة خدو مانجة
عايزين جوافة خدو جوافة
وخليكم فاكرين التغيير صعب جدا ومحدش بيتغير مية فى المية المانجة هتفضل مانجة حتى لو اتعملت بكنافة والجوافة هتفضل جوافة حتى لو اتعملت عصير هيتغيرو شوية بس مش هيتغيرو بالكامل مش هيتحولو لحاجة تانية عمر المانجة ما هتبقى جوافة ولا الجوافة هتبقى مانجة فى يوم اتفقنا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
حكاية " مانجة وجوافة "
Start from the beginning
