على الاكل
حمزة :انتى عاملة لنفسك سندوتشات ايه
وسام :ده فول بأوطة
حمزة :فول بطماطم قصدك
وسام :انا متعودة اقول عليه فول بأوطة
حمزة :انتى من يوم ما اتجوزنا وانتى كل يوم عالعشا تحطيلي جبن ولانشون وبيض والاقيكى انتى قدامك طبق فيه سندوتشين ومبتمديش ايدك على حاجة غيره
وسام :انا مبتعشاش غير فول بأوطة
حمزة :كل يوم
وسام :اه
حمزة :ومبتزهقيش
وسام :انا مبزهقش من الحاجات اللى بحبها
حمزة :جربتى الحاجات التانية ما يمكن تعجبك
وسام :انا مببدلش الحاجات اللى بحبها بحاجات تانية وجربت اتعشي بحاجات تانية غيره بس حسيت كأنى مكلتش
العشا يبقي فول بأوطة
حمزة :لازم طماطم مبتاكليهوش لوحده
وسام :مش حلو لوحده من غير الاوطة مبيبقاش ليه طعم مغيش حاجة بتبقي حلوة وهى لوحدها الونس حلو برضه
حمزة وهو بيضحك :يعنى هى الطماطم اللى بتونس الفول
وسام وهى بتضحك :اهى بتاخد بحسه فى الساندويتش
بعد اسبوع
وسام :حمدلله على سلامتك السفرية كانت حلوة
حمزة :سفرية شغل يا وسام كلها تعب
وسام :تعب بسبب الشغل مش بسبب بعدك عن البيت
حمزة :لا بسبب الشغل
وسام :هو انت لو قولتلى كلام حلو هيجرالك حاجة الدنيا هتمطر وهيحصل برق ورعد وكوارث كونية يعنى لو قولتلي وحشتينى
خرم الاوزون هيكبر لو قولتلى مبسوط انى رجعت للبيت ورجعتلك
حمزة :
وسام :غير هدومك على ما احط الغدا
حبطتها ودى مش اول مرة من يوم ما اتجوزنا وانا بحبطها هى بتحاول تقرب وانا واقف فى مكانى مبقربش خطوة واحدة ليها مش قادر مش عارف احبها فى واحدة واقفة بينى وبينها مخليانى مش قادر اقرب منها
واحدة اتجوزت وخلفت ونسيتنى وانا اللى حياتى واقفة عليها وانا اللى عينى رافضة تشوف واحدة غيرها وعقلى رافض يبطل تفكير فيها وقلبى مش عايز يحب غيرها
مع انها عملت زى ما وسام قالت واختارت اهلها لما اتخيرت بينى وبينهم الفرق بينها وبين وسام انها بعد تلت شهور اتخطبت واتجوزت وعايشة حياتها عادى ولا كأنها كسرت قلبى ولا كأنها سابتنى لوحدى فى نص الطريق سابتنى عايش على ذكريات سنين بنا نسيتها هى وانا اللى موقف حياتى عليها
بعد شهر
وسام :ايه رايك شعرى حلو بعد ما قصيته
حمزة :حلو يا وسام
وسام :يعنى كده احلى ولا لما كان طويل انت بتحب مين فيهم اكتر الشعر القصير ولا الطويل
حمزة :عادى مش فارقة كتير
وسام :عندك حق مش فارقة فعلا
مجهود كبير بتبذله علشان تقربلي بتهتم بكل حاجة تخصنى لبسى بتعمل الاكل اللى بحبه بتغير فى شكلها ولبسها وانا مش شايف كل ده ومش فارق معايا كل ده مبتأثرش بيه
بعد اسبوعين جالى نزلة برد جامدة حرارتى كانت عالية جدا وسام كانت بتسهر جمبي تعملى كمادات وتدينى ادويتى
بعد كام يوم بقيت كويس بس كنت ملاحظ ان وسام متغيرة ساكتة وعينيها فيه حزن بتبصلي بيه بشوف في عينيها نظرة حزن ووجع منى حاسس انهم منى
بعد ما بقيت كويس هى طلبت تتكلم معايا
وسام :الحمد لله انت بقيت كويس انا محتاجة اتكلم معاك
حمزة :اتفضلى
وسام :مين حبيبة يا حمزة
حمزة :انتى عرفتى الاسم ده منين
وسام :منك كنت بتخترف بيه لما كانت حرارتك عالية وانا سهرانة جمبك بعملك كمادات وبديلك ادويتك انت كنت بتخترف باسم واحدة تانية تحب اقولك كنت بتقول ايه
حمزة :
وسام بنبرة كلها وجع :كنت بتقول بحبك يا حبيبة سبتينى ليه مش قادر انساكى طول الليل بتقول كده وانا سمعاك يا حمزة ليه عملت فيا كده ليه
حمزة :انا مقولتلكيش انى بحبك احنا اتجوزنا جواز تقليدى
وسام :ومقولتليش انك بتحب واحدة غيرى مقولتليش انى مهما عملت انت مش هيفرق معاك لانك مش شايف غيرها انت خدعتنى
حمزة :كنتى عايزانى اقولك ايه اقولك بحب واحدة تانية ومش قادر انساها كنتى هتوافقي عليا
وسام :لا مكنتش هوافق يا حمزة وكان حقى ارفض انما انت جبرتنى على الوضع ده جبرتنى اعيش مع واحد جثة بس لا فيها قلب يحس بيا ولا عين تشوفنى ولا عقل يفكر فيا
ده مش من حقك انت ظلمتنى
حمزة :وهى ظلمتنى
وسام :انا مالى ذنبى ايه تعمل فيا كده ليه
حمزة :مكنتش عايز افضل لوحدى لحد امتى هوقف حياتى عليها كان لازم حياتى تمشي زى ما هيا حياتها مشيت
وسام :وعلشان حياتك تمشى تدوس عليا انا
انت اكتر انسان انانى انا شوفته فى حياتى
حمزة :هى انانية اكتر منى
وسام :يعنى علشان هى ظلمتك تظلمنى علشان هى وجعتك توجعنى علشان هى كانت انانية معاك تبقي انت انانى معايا بتنتقم لنفسك منها فيا وفى الاخر يا ريتك كرهتها لا بتحبها وموقف حياتك عليها وقلبك بيناديها ومحتاجها جمبك
تدخلنى حياتك ليه وانت معندكش حاجة تديهالى
حمزة :علشان تعبت من وحدتى
وسام :لا علشان انانى ومبتفكرش غير فى نفسك
انا همشي هسيبك توقف حياتك عليها براحتك هخرج من حياتك اللى مليش فيها مكان دى
حمزة :انتى قولتى انك مبتنسيش بسهولة ببساطة كده هتسبينى وهتنسي ذكرياتك معايا
وسام :ذكرياتى معاك مش حلوة يا حمزة كلها بعد منك عنى رفض منك لقربي كلها رفض منك لمحاولاتى دى ذكريات تستاهل انساها
انا عملت اللى عليا وفضلت جمبك لحد ما خفيت بس خلاص انا مش هقدر افضل هنا انا هرجع بيت اهلى
حمزة :انا مش هطلقك يا وسام
وسام :وانا مش هقدر اعيش معاك وانت معندكش حاجة تديهالى يا حمزة ولا مقدر ولا شايف اى حاجة انا بعملها علشانك
حكاية " فول بأوطة "
Start from the beginning
