بعد ست سنين
فى بيت على وسلمى
سلمى :زياد بطل تنطيط وتعالى كمل اكلك
زياد وهو بيتنطط على الكنبة :لا
سلمى بغضب :زياد متعصبنيش عليك تعالى علشان أاكلك والبس بنطلونك انت قاعدلى بالمنظر المعفن ده ليه
زياد :انا مبحبش البنطلون ومش هلبسه
سلمى :ولاااا متطلعش عفاريتى عليك والبس بنطلونك كده غلط
زياد :لا انا مبسوط كده
سلمى :زيااااااد..هرد على موبايلى وارجعلك صبرك عليا بس
..الو ايوه يا ليلى بجد مبروك يا حبيبتى ..لا ازاى طبعا هنيجى ..مليون مبروك عقبال ما تفتحى مستشفى كاملة مش بس عيادة..لا تمام يا حبيبتى روحى شوفى شغلك ..مبروك بجد فرحتلك خلى بالك من نفسك سلام
زياد انت يا عملى الرضى روحت فين..زياااااد ...زياد انت فين
زياد وهو بيخرجلها من ورا الباب :بخ انا هنا يا سلمى
سلمى بخضة :يا ابنى حرام عليك هتقطع خلفى ومش هيبقالك اخوات كده
زياد :انا عايز العب استغماية
سلمى :مش هينفع دلوقتى انا بعمل الغدا
زياد :لا دلوقتى دلوقتى دلوقتييييى
سلمى :يوم الجمعة هنروح لخالتو ليلى والعب مع ساندى وليان بناتها براحتك
زياد وهو بيتنطط من الفرحة :بجد هنروح عند ساندى وليان
سلمى :بجد تعالى كمل اكل بقي
زياد :لا هاكل مع بابا لما يجى
سلمى :طيب فين بنطلونك علشان تلبسه
زياد :مش عارف
سلمى :اومال مين اللي يعرف زياد بنطلونك فين عيب كده
زياد وهو بيطلعلها لسانه :لا مش عيب
سلمى :زياد يا حبيبى قولى البنطلون فين بدل ما مش هديلك شيكولاتة تانى
زياد وهو بيجرى منها فى الشقة :هخلى بابا يجبلي
سلمى :زيااااد..يا نهار ابيض ايه الريحة دى الفراخ دى اتحرقت..انا تعبت كده كتير
زياد :سلمى بتعيطى ليه سلمى متعيطيش خلاص هدور على البنطلون والبسه بس متعيطيش
بابا سلمى بتعيط فى المطبخ
على وهو بيقعد جمبها على الارض فى المطبخ :سلمى فى ايه بتعيطى ليه ..سلمى ردى عليا متقلقنيش..سلمى
سلمى وهى بتعيط :انا انسانة فاشلة وتعبت والله تعبت
على :فاشلة ايه بس ليه بتقولى كده
سلمى :لانى فعلا فاشلة معرفتش اوفق بين بيتى وبين شغلى وسيبت الشغل البيت دايما مش متروق بسبب زياد والفراخ اتحرقت منى يعنى حتى في بيتى فشلت وزياد مبيقوليش يا ماما وطول النهارد قاعدلى فى البيت بلبوس من غير بنطلونه ومش قادرة عليه اخليه يلبسه انا فاشلة يا عبقرينو وانت تستاهل زوجة احسن منى
على :انتى سيبتى شغلك علشان تهتمى بزياد علشان تعرفى تاخدى بالك منه ومن الببت ومنى وعملتى كده من غير ما اطلب منك لانك ام كويسة ومش فاشلة
البيت اللى زياد مبهدله ده انتى مبتبطليش ترويق فيه ليل نهار ورغم كل اللى زياد بيعمله انتى مش بتضربيه علشان شخصيته متطلعش مهزوزة وهو بيقولك يا سلمى من حبه فيكى يا سلمى هو بيحبك وبيقضى كل وقته معاكى لان انتى ام كويسة وست بيت هايلة
سلمى :ليلى خلاص هتفتتح العيادة بتاعتها وتبدء فيها شغل وانا معملتش اى حاجة فى حياتى العملية
على :حياتك العملية دى انتى وقفتيها علشان بيتنا علشان زياد وعلشانى انما انتى لو كنتى اتفرغتى لشغلك كان زمانك محققة نجاح كبير جدا
سلمى وهى بتعيط :حسا انى مبعملش حاجة صح فى حياتى وانى مليش اى انجاز فى الدنيا يا عبقرينو احساسي بالفشل ده هيموتنى
على :انتى مبتعمليش حاجة فى حياتك اومال مين اللى ممشي البيت وبيهتم بكل حاجة فيه الصغيرة قبل الكبيرة ده انتى حتى المكواة مبترديش اوديها للمكوجى وبتكويها بنفسك مين اللى رفضت تحمل على امها او امى واصرت تهتم هى بزياد وسابت شغلها علشانه مين اللى مجرد ما اهلى او اهلها بيحتاجوها بيلاقوها تحت رجليهم
انتى عارفة والدك قالى ايه يوم جوازنا
سلمى :قالك ايه
على :قالى انا بديلك روحى مش بس بنتى سلمى دى ضحكة البيت كله ويعز عليا فراقها اكتر من ليلى كمان بس انا عارف ان مسيرها لبيتها وجوزها انا بديلك ضحكة بيتى علشان تبقي ضحكة بيتك انت قدرها واوعى تيجى عليها في يوم متندمنيش على ثقتى فيك
ومامتك لما بتكون مضايقة بتكلمك انتى مش ليلى
سلمى :علشان ليلى مش فاضية
على :لا علشان انتى احن عليها من ليلى مع انها هى الكبيرة والمفروض تكون اقربلها منك بس الحقيقة ان انتى اللى اقرب وليلى نفسها سرها معاكى انتى اهلك بيحبوكى جدا بزمتك ده مش نجاح
سلمى :دول اهلى يا عبقرينو وطبيعى يحبونى ويعتمدو عليا فى حياتهم
على :طب واهلى انا
امى اللى لما عيت خلتينا روحنا قعدنا معاها هى وبابا تلت اسابيع ومقولتيش ومرام اختك متجيش ليه وهند مرات محمد اخويا ولا صفاء مرات احمد مقولتيش اشمعنى هما في بيوتهم وانا اللى اجى اقعد بامك واتحمل ابوك
سلمى :اهلك يعنى اهلى يا عبقرينو ومامتك لا بترتاح فى صفاء ولا هند ولا هما هيسيبو شغلهم وبيوتهم ويجو
ومرام كانت حامل يعنى اصلا محتاجة اللي يهتم بيها كفاية عليها بيتها وجوزها
على :طب بالله عليكى دى تصرفات انسانة فاشلة ده امى بتعتبرك زى مرام واكتر ده انا ابويا اللى بيتخانق مع دبان وشه ومش طايقنا واحنا ولاده بعد ما روحتى قعدتى معاه هو وامى علشان تاخدى بالك منهم واتحملتى عصبيته وخلقه الضيق وهو خلاص بقي بيحبك ومفيش مرة اروح اطمن عليهم من غيرك
غير ويسالنى اومال سلمى فين مجتش معاك ليه
سلمى :والدك طيب هو بس عصبي بحكم سنه الواحد لما بيكبر خلقه بيضيق وصبره بيقل انما هو طيب وقلبه ابيض
على :طيب ينفع بعد كل ده تقولى عن نفسك فاشلة
سلمى وهى بتقوم وبتفتحله فرن البوتجاز :بص الفراخ اتحرقت ازاى دى مش فراخ مشوية في الفرن دى فراخ مشوية فى نار جهنم يا عبقرينو
على وهو بيضحك :يا ستى يمكن كانت ماشية مشى بطال وهى عايشة وربك بيخلص منها
زياد :سلمى بصى انا لقيت البنطلون ولبسته اهو خلاص متزعليش منى
سلمى وهى بتشيله تحضنه وتبوسه :مش زعلانة منك يا قلب سلمى يا عمرها كله
على وهو بيضحك :واهو حتى زياد لبس بنطلونه انجاز ده ولا مش انجاز يا متعلمين يا بتوع المدارس
سيبك بقى من الفراخ المحروقة دى وتعالى اخدك انتى وزياد نتغدى بره
حكاية"عبقرينو"
Start from the beginning
