حكايات منار

حكاية " موقف "

على الماسينجر
سمر :السلام عليكم
اخبارك ايه
خليفة :وعليكم السلام انا بخير الحمد لله انتى عاملة ايه
سمر :الحمد لله
رجلك عاملة ايه
خليفة :كويسة
سمر :مش قولتلك محدش بيوصل حد فى الجو ده شوفت اخرتها ايه اديك وقعت بسببى
خليفة :بسببك ليه يعنى
سمر :لو مكنتش وصلتنى كان زمانك فى البيت ومكنتش وقعت واتجبست
خليفة :وانا يعنى مكنش ممكن اقع فى بيتنا ومكنش ممكن اقع قبل الوقت اللى وقعت فيه
ده نصيب
سمر :معرفش بقى انا حاسة بالذنب
انت كويس طيب رجلك بتوجعك
خليفة :لا هى متكسرتش هو بس شرخ بس فى مكان حساس فالدكتور اصر يجبسها اسبوع علشان الشرخ ميبقاش كسر
سمر :بعد الشر عليك من الكسر
طيب انت كده مش هتروح شغلك صح
خليفة :لا وحتى قولتلهم يبعتولى شغلى اخلصه من البيت زمايلى قالو لا احنا هنشيل شغلك انت ياما شلتنا
فهو شكله هيبقى اسبوع ممل
سمر :ملل ايه بس يا بختك
اسبوع فى السرير واكل شارب نايم موبايلك فى ايدك قضيها افلام بقى مسلسلات روايات ماتشات كورة
خليفة :انا شامم ريحة حسد
سمر :وهو حسد وبس ده حسد ونق وحقد وقر
يلا ربنا يسعدك
خليفة :وانا بقولك هقضى اسبوع فى شرم الشيخ علشان اللى بتقوليه ده كله
انا بقولك هقضى اسبوع محبوس فى البيت
شوفتى كان هيجرالك ايه لو وقعتى
سمر :بالدلع اللى انت فيه ده
يا ريتك سيبتنى اقع
خليفة :المرة الجاية
سمر :حمدلله على سلامتك
خليفة :الله يسلمك
سمر :انا اسفة
خليفة :على ايه
سمر :حاسة انك وقعت بسببى
خليفة :هو انتى اللى وقعتينى كمان انا موقعتش انا لويت رجلى
وده كان ممكن يحصلى فى حمام بيتنا او فى الصالة او فى اوضتى
كان ممكن يحصل فى اى حتة
انتى مش السبب ولا ده غلطك
سمر :حاسة بالذنب اوى
خليفة :متحسيش بالذنب انتى معملتيش حاجة
انتى حتى قولتى مش لازم اوصلك وانا اللى اصريت يعنى اللى حصل ده بره عنك
سمر :الله يباركلك والله علشان قولت كده سكت ضميرى بعد ما كان نازل زن وقارفنى
اهو اقتنع ان الموضوع بره عنى
المهم الف حمدلله على سلامتك
اسيبك ترتاح بقى مع السلامة
خليفة :مع السلامة

تانى يوم
خليفة :اخبارك ايه
سمر :انا بخير الحمد لله انت عامل ايه النهاردة
خليفة :زهقان اوى هموت من الملل فقولت استغلك
سمر :تستغلنى فى ايه
خليفة :رشحيلى حاجة اتفرج عليها
سمر :انت بتحب تتفرج على ايه عربى اجنبى هندى
خليفة :لا هندى ايه مليش فيه
وبلاش عربى خلينى فى الاجنبى
سمر :افلام ولا مسلسلات
خليفة :انا بزهق بسرعة ومش هكمل مسلسل
قوليلى على افلام كويسة
سمر :انت ايه نوعية افلامك المفضلة
خليفة :يعنى ايه
سمر :يعنى بتحب الاكشن ولا الكوميدى ولا التراجيدى ولا افلام جرايم القتل والسرقة ولا الرومانسى ولا الاجتماعى ولا الرعب
حدد انت بتحب تتفرج على ايه علشان ارشحلك فيلم يعجبك
خليفة :خليها كوميدى انا زهقان وعايز اضحك
سمر :بص انا بعتلك لينك تلت افلام اختار واحد منهم اتفرج عليه
خليفة :انتى شوفتيهم قبل كده
سمر :اه اومال برشحهملك ازاى
خليفة :وعجبوكى
سمر :اه ضحكونى اوى
خليفة :دول افلامك الكوميدى المفضلة يعنى
سمر :لا اكتر فيلمين كوميدى بحبهم واحد هندى وواحد مصرى
خليفة :خلاص ابعتيلى اللينك بتاعهم هما كمان
سمر :مش قولت مش عايز عربى ولا ليك فى الهندى
خليفة :يا ستى بوسع دايرة اختياراتى انا حر
سمر :بعتلك اللينك بتاعهم
سهرة سعيدة
خليفة :تسلمى تعبتك معايا
سمر :مفيش تعب ولا حاجة
وقت ما تحس بملل ومتبقاش عارف تتفرج على ايه ابعتلى وانا اختارلك
سلام
خليفة :سلام