الحمد لله انى لايقالك
وان قلبك وبس علي مقاسى
بحبك يا مطمن خوفى
ومونس روحى ومحلى احساسى
انا شقية وحنينة وقوية
بسببك انت يا اغلى ناسى
ربنا يصلحنا لبعض دايما
وسوا فى الافراح وفى المآسى
رامى علق اول حد كتبلي
ده الحب شكله ولع فى الدرا يا دعاء
منى معاها حق رامى لزج لزج يعنى مش مجاملة
ده واحد اتخانق مع عمر حب عمرى علشانه يا ربى كان عقلى فين وانا بعمل كده
المهم بعد ما خلصت تهزئ فى نفسي وندمت ندم شديد والله
كتبتله جدا يا رامى مش قادرة اوصفلك ربنا يحفظنا لبعض ويكفينا شر العين وشر الناس اللي مش سالكة وقلوبها من جوا مش نضيفة
وقبل ما يرد كنت ظرفاه بلوك يطلع من عينه
لقيت عمر بيرن عليا رديت بسرعة
عمر :وده من ايه ده ان شاء الله
دعاء :ايه جوزى حبيبى وبصالحه وبحب فيه انا حرة
عمر :وبالنسبة للتلقيح وقصف الجبهة اللي كنتى كتباه من شوية
دعاء :ده انت متابع بقي
وبعدين عادى غلطة وصلحتها بوست واتحذف ومش هيتكتب زيه تانى ابدا ابدا ابدا
عمر :دعاء ايه اللى حصل مالك فيكى ايه
دعاء :فيه انى اكتشفت انى غبية ومعنديش عقل
عمر :غبية
دعاء :اه واكتشفت انى بحبك جدا ومليش غيرك ومقدرش على زعلك وميهمنيش اى حد غيرك
عمر :ورامى
دعاء :رامى مين خلاص بقى ماضى رزعته البلوك المتين ولو عايزنى اعمل لخالتى بلوك حالا اكون عملالها
عمر :لا وانا مالى بخالتك الفكرة كلها كانت في ابنها ال
دعاء قاطعته :اللزج ده معاك حق هو لزج فعلا يلا ربنا يهديه ويركز في حياته بقى وملوش دعوة بحياة الناس التانية
عمر :وايه سر الاكتشافات العظيمة دى كلها
دعاء :فكرت ولقيت انك عملت علشانى كتير ومن غير متستنا منى مقابل
حتى خصامنا اللي طول المرة دى انا السبب فيه بعندى وغبائى
وانى قبل مطلب منك حاجة لازم اسال نفسي انا بقدمهالك الاول ولا انانية ومستنية منك انت بس اللي تعملها
ولما لقيت نفسي للاسف الاسيف طلعت انانية
قلت اتصرف بقي
عمر : واحسنتى التصرف والله
كلامك عجبنى اوى بس مبقتش فاهم ايه الي جرا خلاكى تكتبي كده
وكلمتك انا اصلا كنت ماسك نفسى بالعافية طول الاسبوع اللي فات انى اكلمك
علشان الموضوع كان فعلا خنقنى ولازم يخلص بقى
دعاء :واديه الحمد لله خلص ووعد مش هيتكرر تانى
عمر :وانا من غير متوعدينى مصدقك
دعاء :متيجى تتغدى معانا بكرة هعملك مكرونة بشاميل عربون صلح
عمر :موافق طبعا هو في احلى من كده عربون
احلي حاجة فيكى يا دعاء انك عارفة نقط ضعفي وبتستغليها كويس انا فخور بيكي يا زوجتى العزيزة والله
دعاء :طبعا وانا عندى اعز منك استغل نقط ضعفه
هستناك بكرة
عمر :وانا مش هتاخر عليكى
اوقات كتير بنبص للي حوالينا ونتمنى اللي عندهم
اتنين صحاب جامدين اتنين بيحبو بعض
اتنين متجوزين وعلاقتهم حلوة
واحد واهله وعلاقتهم قوية ببعض
نقوم احنا نبص للنتيجة ونتمنا زيها ومبنفكرش في تعبهم علشان يوصلو للي احنا شايفينه ده
التمن اللي دفعوه احنا بننسي نفكر فيه
مبنسالش نفسنا اذا كنا مستعدين نتعب زيهم وندفع التمن اللي دفعوه ولسه بيدفعوه ولا لا
حتى مبنسالش نفسنا اذا كنا بنقدم للى حوالينا اللي احنا مستنينه منهم ولا لا
اللى مستنية فارس الاحلام اللي هيغير حياتها مية وتمانين درجة وهيحقق كل احلامها
مستعدة تتعب علشانه هى كمان ناوية تتحمله وتغير الوحش اللي فيه للاحسن
اللى عايز صاحب جدع يسنده وقت الزنقة
مستعد هو كمان يكونله سند ووقت الجد يبقي في ضهره
قبل ما تتمنى حاجة فكر اذا كنت مستعد تدفع تمنها ولا لا
قبل ما تستنى حاجة من حد شوف اذا كنت بتقدمهاله ولا
ربنا عدل ومش هيدى لحد حاجة هو ميستحقاش
لان ربنا بياخد بالاسباب واللي مش مستعد يتعب علشان الحاجة اللي بيطلبها من ربنا
ربنا مش هيديهاله لانه ببساطة مش هيقدرها
اللي هيقدرها هو اللي تعب علشانها لما اتمناها من قلبه
اللي اخد بالأسباب وسعى وعمل اللي عليه
انا عن نفسى حياتى اتغيرت للاحسن كتير لما فهمت الدرس ده وكنت هخسر كتير اوى لو مكنتش فهمته
رامى معاتبنيش عالبلوك لانى مديتوش فرصة الكلام بينا قل كتير
وخالتي لما قالت لماما ماما رديت عليها بان عمر كان متضايق وان رامى لو كان مكانه كان هيضايق
وانى مراته وهو حر يخلينى اعمل الي هو عايزه
فخالتى خدتها من قاصرها وسكتت وقفلت عالموضوع
وانا وعمر اتجوزنا وخلفنا سارة واياد
وانا بقيت قبل ما استنا منه يعمل حاجة علشانى
ابدء انا واعملها علشانه الاول
وربيت ولادنا على كده اللي عايز حاجة بجد يبقي يتعب علشانها ويدفع تمنها
انما التمنى وخلاص ده مبيوصلش لحاجة
المعادلة بسيطة
ندعى بالي احنا عايزينه وبنتمناه
ونسعي ونتعب علشانه وناخد بالاسباب
وبعدين نستني تحقيقه من ربنا بصبر ويقين💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
حكاية"التمن"
Start from the beginning
