တစ်နာရီတစ်သိန်း အစားထိုးချစ်သူ

အခန်း၁၀၁

ထိုစကားများကိုကြားသောအခါ ဘိုင်ကျိုး၏အမူအရာမှာ သိသိသာသာ ​ပြေလျော့သွားခဲ့သည်။ သူက ခုံတန်းလျားပေါ် မှီလိုက်ပြီး "ဒီကို ပထမဆုံးအကြိမ် စရောက်ခဲ့တုန်းက ကျွန်တော်တို့ မိသားစုလိုက်လာခဲ့ကြတာ။ ဒါပေမယ့် တစ်ရက်တောင်မပြည့်သေးဘဲ သူတို့နှစ်ယောက်က ရန်ဖြစ်ကြတယ်။ တစ်ယောက်နဲ့တစ်ယောက် အော်နေကြတုန်း ကျွန်တော်ခိုးထွက်လာပြီး ဒီနေရာကိုရှာတွေ့ခဲ့တာ။ အဲဒီတုန်းကလည်း တိုက်တိုက်ဆိုင်ဆိုင် နေထွက်ချိန်လေ။"

ကျီဖန်ယင်းသည် သူ့ကို ခေါင်းညိမ့်ပြကာ သူပြောနေသော ပုံပြင်ကို စိတ်ဝင်စားစွာ နားထောင်​ပေးသည်။

"... ကျွန်​တော် ပြန်​ရောက်တဲ့ချိန်ကျ သူတို့ရန်ဖြစ်တာရပ်သွားပါစေစလို့ နေကိုကြည့်ရင်း ဆုတောင်းခဲ့တယ်။" ဘိုင်ကျိုးသည် သူ့ရှေ့မှ ကျယ်ပြောလှသော ပင်လယ်ပြင်ကို ကြည့်ရင်း စကားပြောနေသည်။ "တကယ်လည်း ကျွန်တော် ပြန်ရောက်တဲ့အချိန် သူတို့ရန်ဖြစ်တာ ရပ်သွားကြပြီ။ ကျွန်​တော် ပျောက်သွားလို့ စိုးရိမ်ပြီး လိုက်ရှာနေခဲ့ကြတာလေ၊ သူတို့နှစ်ယောက်က။ အဲဒီတုန်းက သူတို့နှစ်ယောက်က တကယ့်မိဘတွေနဲ့တူတယ်လို့ ကျွန်တော်ခံစားလိုက်ရတဲ့ တစ်ခုတည်းသောအချိန်ပဲ။"

ကျီဖန်ယင်းက ဒီအကြောင်းကို တစ်ခါမှ မသိခဲ့သေယ်လည်း သူမ အရမ်းအံ့သြမသွားပေ။

ဟုတ်တာပေါ့၊ ကလေးတုန်းက စိတ်ဒဏ်ရာတွေသာမရှိခဲ့ရင် ဘယ်လိုလုပ်မျက်လုံးကန်းပြီး သူ့ကိုမချစ်တဲ့မိန်းမတစ်ယောက်ကိုပဲ အရူးအမူးစွဲလမ်းနေမှာလဲ။

ဘိုင်ကျိုးသည် ကျီရှင်းရှင်း၏ ဟန်ဆောင်မှုများကို မြင်နိုင်လောက်အောင် ထက်မြက်​သော်လည်း ကျီရှင်းရှင်း သူ့ကို လှည့်စားတာကို ခံနေရသေးပါသည်။

ကျီရှင်းရှင်း သူ့ကို အသုံးပြုခဲ့သည့် လှည့်ကွက်များကို သိပ်မပါးနပ်သလို မည်သူမဆိုလည်း အလွယ်တကူ အသုံးပြုနိုင်သော အရာများဖြစ်သည်။ လှည့်ကွက်များ အလုပ်ဖြစ်၊ မဖြစ်ဆိုတာက အသုံးပြုသည့်လူများနှင့် သူတို့၏ပစ်မှတ်များအပေါ်တွင်မူတည်ပါသည်။