حكايات منار

حكاية " استثناء "

يوسف وهو بيمسكها من كتفها يثبتها ويلفها ليه :انتى بتلفى وتهربى منى ليه
سمر وهى بتضحك :بحاول اعمل فيها عروسة ومكسوفة وكده بس انت مسبتليش فرصة الحقيقة
ايه رايك شكلى حلو
يوسف :احلى من القمر
سمر :طيب ايه اعمل حاجة بيصورو فيديو للذكرى
يوسف :حاجة زى ايه يعنى
سمر :امسك ايدى لففنى بوس راسى كرمشلى ميتين جنيه فى ايدى اى حاجة بس اعمل منظر انت مش متجوزنى تخليص حق يعنى
يوسف وهو بيضحك :معاكى حق
سمر :انا دايما معايا حق
يوسف وهو بيحضنها :انا مش متجوزك تخليص حق انا بحبك النهاردة احلى يوم فى حياتى

سمر :لما حضنتنى ساعتها كانت اول مرة تحضنى واول مرة احس انك بقيت جوزى الشخص اللى هكمل معاه بقية حياتى
عقلى كان فاهم ده من لما اتخطبنا
بس قلبى فى اللحظة دى كان اول مرة احس بيه وانه مكنش عايز غيرك يكون جوزى وشريك حياتى واعيش معاه اللحظة دى
قلبى بدء يقع فيك لحظتها
يوسف :وامتى حسيتى ان قلبك خلاص وقع واللى كان كان
سمر :بعد جوازنا باربع شهور انا روحت اقعد فى بيت اهلى خمس ايام قبل فرح احمد اخويا
من اول يوم حسيت انك واحشنى اوى نفسى مش مفتوحة للاكل علشان انت مش معايا مش عارفة انام بسهولة لانك مش جمبى
فتحت الكمبيوتر اللى فى بيتنا وفضلت اتفرج على صورنا القديمة فى افراح العيلة وتجمعاتها
ولقتنى بسأل نفسى انا ازاى كنت شايفاك مجرد قريب وزيك زى غيرك
ازاى فكرت ولو للحظة انك زيك زى اى حد او ان فى حد ينفعلى غيرك
وقتها عرفت انى بحبك
ولقتنى بمسك موبايلى وبكلمك فاكر المكالمة دى اللى قفلت السكة فى وشى فيها
يوسف وهو بيضحك :من فرحتى والله مكنتش هصدق ودانى غير لما اسمعها منك وش لوش
كان بقالى كتير اوى مستنيكى تقوليها تحسيها من قلبك ومن نفسك تقوليها
مكنش ينفع بعد كل الانتظار ده مسمعهاش منك واشوفك بعنيا وانتى بتقوليهالى

يوسف :الو يا سمر بنت حلال كنت لسه هكلمك...سمر انتى سمعانى
سمر :سمعاك اه انا متصلة علشان عايزة اقولك على حاجة
يوسف :سمر هانم بجلالة قدرها متصلة بيا علشان تقولى حاجة دى اكيد حاجة مهمة
سمر :مهمة اوى
يوسف :قولى طيب
سمر :انا بحبك...الو يوسف...يوسف انت معايا

بعد ساعتين
سمر بخضة :انت بتعمل ايه هنا
يوسف :ليلى ممكن تجيبيلى اشرب وحاولى تتأخرى يا ريت لو تنزلى تجيبيلى مياه معدنية من المحل اللى بعدكم بتلت شوارع ده
ليلى وهى بتضحك :انت بتطرقنى يا ابيه ماشى هطرق وهاخد الباب فى ايدى كمان عد الجمايل
يوسف :انتى قولتى ايه فى الموبايل
سمر :يعنى انت قفلت السكة فى وشى ومرديتش عليا لما كلمتك زى الهبلة بعدها علشان قولت يمكن الشبكة وقعت ولا حاجة
وجاى تقولى قولتى ايه فى الموبايل
يوسف :انا اسف انى قفلت السكة حقك عليا متزعليش
بس بالله عليكى ردى انتى قولتى ايه فى الموبايل
انتى قولتى اللى سمعته يعنى قولتى اللى كان نفسى اسمعه لا مش نفسى انتى قولتيها بجد صح انا مكنش بيتهيألى انتى قولتى انك...
سمر قاطعته بابتسامة :انى بحبك قولتلك انى بحبك يا يوسف

يوسف :مهما حاولت اوصفلك فرحتى وراحتى وقتها مش هقدر دى لحظة من اسعد لحظات حياتى بجد
سمر :لحظة متوقعة على فكرة اكيد كنت هحبك مين ممكن تعرفك ومتحبكش
انت تتحب يا يوسف بكل سهولة تتحب انت مش محتاج تعمل حاجة علشان تتحب كفاية تكون على طبيعتك تكون زى ما انت واى قلب هيقرب منك هيحبك
حبى ليك حاجة طبيعية جدا على فكرة
يوسف :ده بالنسبالك انتى انما بالنسبالى انتى استثنائى
وان استثنائى تحبنى دى اكتر حاجة مميزة ومختلفة وحلوة ممكن تحصلى فى الدنيا
سمر بابتسامة :استثنائك بتحبك وبتحمد ربنا على نعمة وجودك فى حياتها
وفرحانة انها حامل فى تؤام انت ابوهم
بس هو الصراحة استثنائك تعبت من كتر المشى كفاية كده ونكمل مشى بكرة
يوسف بابتسامة :بكرة وبعده ولاخر العمر هيكون طريقنا واحد وهنمشيه سوا بإذن الله

احلى حاجة فى الدنيا ان حد يعتبرك استثنائه
الحالة الشاذة لكل قواعده
الحاجة المختلفة والمميزة فى وسط كل الحاجات العادية والتقليدية اللى فى حياته
واسوء حاجة فى الدنيا انك تعتبر حد استثنائك ويعتبرك هو حاجة عادية وتقليدية ويمكن اقل من العادية كمان
ادعو ربنا يكفيكم شر كسرة القلب ووجع الروح وتعب النفس اللى ممكن تحسوه وقتها
وادعوه كمان يرزقكم بفرحة وراحة انه استثنائكم يعتبركم استثنائه💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يزره زائر ولم يذكره ذاكر