အမဲရောင်ကိုမှရေနံကြီးကိုသေချာစွာသုတ်ထားသည်မို့
ပြောင်လက်နေပြီး အိမ်ရဲ့ခြေတံက လူတစ်ရပ်ကောင်းကောင်းဝင်နိုင်သည်။ ကျွန်းလုံးကြီးများဖြင့်ဆောက်ထားသည့် အိမ်တိုင်ဟုဆိုခြင်းကြောင့် ခိုင်ခံ့နေသည်ကအသေအချာပင်။ ဓနိမိုးထားသည်မို့ သွပ်ပူဒဏ်ကိုခံရမည်တော့မဟုတ်ပေ။ အေးနေမည်မှာအသေအချာပင်။
အိမ်ပေါ်တက်လှေကားတွေကလည်း ပျဉ်းကတိုးသားများဖြစ်သည်မို့ ခိုင်မာနေရောပဲ။
"အထုတ်တွေကို အကို့ညီတွေသယ်လာလိမ့်မယ်သိလား...."
စကားသံအဆုံး ခေါင်းငြိမ့်လိုက်သည့်ကိုဉာဏ်နဲ့အတူ
သူ၏ညီမဖြစ်သူတစ်ယောက်က ပြတင်းတံခါးဆီသွားကာ
တံခါးဖွင့်နေလေသည်။ ပွင့်သွားသည့် တံခါး၏အပြင်သို့ကြည့်မိရာ ရွာလမ်းလေးတစ်ခုကိုဖြောငိ့နေအောင်တွေရြလေသည်။အိမ်ကသိပ်တော့မကျယ်ပေ။ ပေ၃၀ပတ်လည်ဝန်းကျင်လောက်သာရှိလိမ့်မည်။
"ကိုဉာဏ်ကြီးတို့ ဟိုဘက်အခန်းမှာ
အိတ်တွေထားလိုက်လေနော့်......"
ထရံခြားထားသည့် အခန်းလေးတစ်ခုကိုကြည့်လိုက်ပြီး
ခေါင်းငြိမ့်ပြလိုက်ပါသည်။ အိပ်ယာပြင်ပေးထားသည်မို့ ထိုအပေါ်တွင်ပဲခြေပစ်လက်ပစ်ထိုင်လိုက်မိသည်။ ကျွန်တော်ပင်ပန်းနေသည်ကြောင့်ရော ကားမောင်းလာရသည်က နာရီပေါင်းမနည်းသည်ကြောင့်ပါ အိပ်ချင်သည်။ နုံးနေလေသည်။
"အိပ်ယာကလေ အောက်ကမွေ့ယာအပါးလေးတော်ရေ....
သုံးထပ်ခင်းပေးထားတယ်.....သင်ဖြူးဖျာလေးက အေးအောင်လို့ အပေါ်ကခင်းပေးထားတာ......"
ထိုင်ရသည်ကအနည်းငယ် သက်တောင့်သက်သာရှိသည်။ ဖျာရဲ့အအေးဓာတ်လေးကလည်း အေးနေသည်မို့အတော်ကိုသက်သာသည်။ ပြောပြသည့်ညီမဖြစ်သူကို ခေါင်းငြိမ့်ပြလိုက်ပါသည်။ ယခင်ကဆို ဟိုဘက်တိုက်အိမ်ကြီးထဲတွင်သာ နေသည့်ကျွန်တော်က ညအိပ်လျှင် ကားစက်နှိုးကာ ကားထဲ အဲယားကွန်းဖြင့်အိပ်တတ်သော်လည်း ယခုကညီရော၊သားရောပါရှိသည်မို့ အိပ်ယာပြင်ပေးထားဖို့ဖုန်းဆက်မိတော့ အဖွားအေးကထိုသို့လုပ်ပေးထားသည်တဲ့လေ။ မွေ့ယာသုံးခုပေါင်း ၃လက်မကျော်ကျော်လောက်တော့ရှိမည်။ အပေါ်ကနေဖျာလေးခင်းထားပြီး ခေါင်းအုံးကလည်းဆင်တူနှစ်လုံးနဲ့ အညာစောင်အပါးလေးဆင်တူနှစ်ထည်။အလယ်က ခေါင်းအုံးအသေးလေးက သားအတွက်နေမည်။
